| Library / Tipiṭaka / திபிடக • Tipiṭaka / சூளவக்³க³-அட்ட²கதா² • Cūḷavagga-aṭṭhakathā |
அத்தாதா³னஅங்க³கதா²
Attādānaaṅgakathā
398. அத்தாதா³னங் ஆதா³துகாமேனாதி எத்த² ஸாஸனங் ஸோதே⁴துகாமோ பி⁴க்கு² யங் அதி⁴கரணங் அத்தனா ஆதி³யதி, தங் அத்தாதா³னந்தி வுச்சதி. அகாலோ இமங் அத்தாதா³னங் ஆதா³துந்தி எத்த² ராஜப⁴யங் சோரப⁴யங் து³ப்³பி⁴க்க²ப⁴யங் வஸ்ஸாரத்தோதி அயங் அகாலோ, விபரீதோ காலோ.
398.Attādānaṃ ādātukāmenāti ettha sāsanaṃ sodhetukāmo bhikkhu yaṃ adhikaraṇaṃ attanā ādiyati, taṃ attādānanti vuccati. Akālo imaṃ attādānaṃ ādātunti ettha rājabhayaṃ corabhayaṃ dubbhikkhabhayaṃ vassārattoti ayaṃ akālo, viparīto kālo.
அபூ⁴தங் இத³ங் அத்தாதா³னந்தி அஸந்தமித³ங், மயா அத⁴ம்மோ வா த⁴ம்மோதி, த⁴ம்மோ வா அத⁴ம்மோதி, அவினயோ வா வினயோதி, வினயோ வா அவினயோதி, து³ஸ்ஸீலோ வா புக்³க³லோ ஸீலவாதி, ஸீலவா வா து³ஸ்ஸீலோதி க³ஹிதோதி அத்தோ²; விபரியாயேன பூ⁴தங் வேதி³தப்³ப³ங். அனத்த²ஸங்ஹிதங் இத³ங் அத்தாதா³னந்தி எத்த² யங் ஜீவிதந்தராயாய வா ப்³ரஹ்மசரியந்தராயாய வா ஸங்வத்ததி, இத³ங் அனத்த²ஸங்ஹிதங், விபரீதங் அத்த²ஸங்ஹிதங் நாம.
Abhūtaṃ idaṃ attādānanti asantamidaṃ, mayā adhammo vā dhammoti, dhammo vā adhammoti, avinayo vā vinayoti, vinayo vā avinayoti, dussīlo vā puggalo sīlavāti, sīlavā vā dussīloti gahitoti attho; vipariyāyena bhūtaṃ veditabbaṃ. Anatthasaṃhitaṃ idaṃ attādānanti ettha yaṃ jīvitantarāyāya vā brahmacariyantarāyāya vā saṃvattati, idaṃ anatthasaṃhitaṃ, viparītaṃ atthasaṃhitaṃ nāma.
ந லபி⁴ஸ்ஸாமி ஸந்தி³ட்டே² ஸம்ப⁴த்தே பி⁴க்கூ²தி அப்பேகதா³ ஹி ராஜப⁴யாதீ³ஸு ஏவரூபா அத்தனோ பக்க²ஸ்ஸ உபத்த²ம்ப⁴கா பி⁴க்கூ² லத்³து⁴ங் ந ஸக்கா ஹொந்தி, தங் ஸந்தா⁴ய வுத்தங் ‘‘ந லபி⁴ஸ்ஸாமீ’’தி . அப்பேகதா³ பன கே²மஸுபி⁴க்கா²தீ³ஸு லத்³து⁴ங் ஸக்கா ஹொந்தி, தங் ஸந்தா⁴ய ‘‘லபி⁴ஸ்ஸாமீ’’தி வுத்தங்.
Na labhissāmi sandiṭṭhe sambhatte bhikkhūti appekadā hi rājabhayādīsu evarūpā attano pakkhassa upatthambhakā bhikkhū laddhuṃ na sakkā honti, taṃ sandhāya vuttaṃ ‘‘na labhissāmī’’ti . Appekadā pana khemasubhikkhādīsu laddhuṃ sakkā honti, taṃ sandhāya ‘‘labhissāmī’’ti vuttaṃ.
ப⁴விஸ்ஸதி ஸங்க⁴ஸ்ஸ ததோனிதா³னங் ப⁴ண்ட³னந்தி கோஸம்ப³கானங் விய ப⁴ண்ட³னங் கலஹோ விக்³க³ஹோ விவாதோ³ ஸங்க⁴பே⁴தோ³ ச ப⁴விஸ்ஸதீதி. பச்சா²பி அவிப்படிஸாரகரங் ப⁴விஸ்ஸதீதி ஸுப⁴த்³த³ங் வுட்³ட⁴பப்³ப³ஜிதங் நிக்³க³ஹெத்வா பஞ்சஸதிகஸங்கீ³திங் கரொந்தஸ்ஸ மஹாகஸ்ஸபத்தே²ரஸ்ஸேவ, த³ஸவத்து²கே அதி⁴கரணே த³ஸபி⁴க்கு²ஸஹஸ்ஸானி நிக்³க³ஹெத்வா ஸத்தஸதிகஸங்கீ³திங் கரொந்தஸ்ஸ ஆயஸ்மதோ யஸஸ்ஸேவ, ஸட்டி²பி⁴க்கு²ஸஹஸ்ஸானி நிக்³க³ஹெத்வா ஸஹஸ்ஸிகஸங்கீ³திங் கரொந்தஸ்ஸ மொக்³க³லிபுத்ததிஸ்ஸத்தே²ரஸ்ஸேவ ச பச்சா² ஸமனுஸ்ஸரணகரணங் ஹோதி, ஸாஸனஸ்ஸ ச விக³துபக்கிலேஸசந்தி³மஸூரியஸஸ்ஸிரிகதாய ஸங்வத்ததி.
Bhavissati saṅghassa tatonidānaṃ bhaṇḍananti kosambakānaṃ viya bhaṇḍanaṃ kalaho viggaho vivādo saṅghabhedo ca bhavissatīti. Pacchāpi avippaṭisārakaraṃ bhavissatīti subhaddaṃ vuḍḍhapabbajitaṃ niggahetvā pañcasatikasaṅgītiṃ karontassa mahākassapattherasseva, dasavatthuke adhikaraṇe dasabhikkhusahassāni niggahetvā sattasatikasaṅgītiṃ karontassa āyasmato yasasseva, saṭṭhibhikkhusahassāni niggahetvā sahassikasaṅgītiṃ karontassa moggaliputtatissattherasseva ca pacchā samanussaraṇakaraṇaṃ hoti, sāsanassa ca vigatupakkilesacandimasūriyasassirikatāya saṃvattati.
அத்தாதா³னஅங்க³கதா² நிட்டி²தா.
Attādānaaṅgakathā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / சூளவக்³க³பாளி • Cūḷavaggapāḷi / 7. அத்தாதா³னஅங்க³ங் • 7. Attādānaaṅgaṃ
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / அத்தாதா³னஅங்க³கதா²வண்ணனா • Attādānaaṅgakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / அத்தாதா³னஅங்க³கதா²வண்ணனா • Attādānaaṅgakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / அத்தாதா³னஅங்க³கதா²தி³வண்ணனா • Attādānaaṅgakathādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 7. அத்தாதா³னஅங்க³கதா² • 7. Attādānaaṅgakathā
