| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
7. அத்தாதா³னஅங்க³கதா²
7. Attādānaaṅgakathā
398. அத்தாதா³னங் ஆதா³துகாமேனாதி எத்த² கிங் அத்தாதா³னந்தி ஆஹ ‘‘ஸாஸனங் ஸோதே⁴துகாமோ’’திஆதி³. இமினா பரங் சோதே³துங் அத்தனா ஆதா³தப்³ப³ங் அதி⁴கரணங் அத்தாதா³னந்தி வுச்சதீதி த³ஸ்ஸேதி. அகாலோ இமங் அத்தாதா³னங் ஆதா³துந்தி எத்த² அகாலங் த³ஸ்ஸெந்தோ ஆஹ ‘‘ராஜப⁴ய’’ந்திஆதி³. தத்த² வஸ்ஸாரத்தோதி வஸ்ஸகாலோ. ஸோ ஹி வஸ்ஸோ அதிவிய ரஞ்ஜதி எத்த² காலேதி வஸ்ஸாரத்தோதி வுச்சதி. வஸ்ஸாரத்தோபி அதி⁴கரணவூபஸமத்த²ங் லஜ்ஜிபரிஸாய தூ³ரதோ ஆனயனஸ்ஸ து³க்கரத்தா அகாலோ நாம. இதீதி அயங் ராஜப⁴யாதி³காலோதி அத்தோ². விபரீதோதி ராஜப⁴யாதீ³னங் அபா⁴வகாலோ.
398.Attādānaṃ ādātukāmenāti ettha kiṃ attādānanti āha ‘‘sāsanaṃ sodhetukāmo’’tiādi. Iminā paraṃ codetuṃ attanā ādātabbaṃ adhikaraṇaṃ attādānanti vuccatīti dasseti. Akāloimaṃ attādānaṃ ādātunti ettha akālaṃ dassento āha ‘‘rājabhaya’’ntiādi. Tattha vassārattoti vassakālo. So hi vasso ativiya rañjati ettha kāleti vassārattoti vuccati. Vassārattopi adhikaraṇavūpasamatthaṃ lajjiparisāya dūrato ānayanassa dukkarattā akālo nāma. Itīti ayaṃ rājabhayādikāloti attho. Viparītoti rājabhayādīnaṃ abhāvakālo.
அபூ⁴தங் இத³ங் அத்தாதா³னந்தி எத்த² அபூ⁴தஸத்³தோ³ அவிஜ்ஜமானபரியாயோதி ஆஹ ‘‘அஸந்தமித³’’ந்தி, இத³ங் அத்தாதா³னங் அவிஜ்ஜமானந்தி அத்தோ². மயா க³ஹிதோதி ஸம்ப³ந்தோ⁴. ஸீலவா புக்³க³லோதி யோஜனா. யந்தி அத்தாதா³னங் ஸங்வத்ததீதி ஸம்ப³ந்தோ⁴. இத³ந்தி அத்தாதா³னங்.
Abhūtaṃ idaṃ attādānanti ettha abhūtasaddo avijjamānapariyāyoti āha ‘‘asantamida’’nti, idaṃ attādānaṃ avijjamānanti attho. Mayā gahitoti sambandho. Sīlavā puggaloti yojanā. Yanti attādānaṃ saṃvattatīti sambandho. Idanti attādānaṃ.
ந லபி⁴ஸ்ஸாமி ஸந்தி³ட்டே², லபி⁴ஸ்ஸாமி ஸந்தி³ட்டே²தி எத்த² ‘‘ந லபி⁴ஸ்ஸாமி, லபி⁴ஸ்ஸாமீ’’தி இத³ங் கிங் ஸந்தா⁴ய வுத்தந்தி ஆஹ ‘‘அப்பேகதா³ ஹீ’’திஆதி³. தத்த² அப்பேகதா³தி அபி ஏகதா³. ஹிஸத்³தோ³ வித்தா²ரஜோதகோ. ஏவரூபாதி ஸந்தி³ட்ட²ஸம்ப⁴த்தஸபா⁴வா. தந்தி உபத்த²ம்ப⁴கபி⁴க்கு²லப⁴னங் ஸந்தா⁴யாதி ஸம்ப³ந்தோ⁴. ‘‘ந லபி⁴ஸ்ஸாமீ’’தி இத³ங் வசனங் வுத்தந்தி ஸம்ப³ந்தோ⁴.
Na labhissāmi sandiṭṭhe, labhissāmi sandiṭṭheti ettha ‘‘na labhissāmi, labhissāmī’’ti idaṃ kiṃ sandhāya vuttanti āha ‘‘appekadā hī’’tiādi. Tattha appekadāti api ekadā. Hisaddo vitthārajotako. Evarūpāti sandiṭṭhasambhattasabhāvā. Tanti upatthambhakabhikkhulabhanaṃ sandhāyāti sambandho. ‘‘Na labhissāmī’’ti idaṃ vacanaṃ vuttanti sambandho.
கோஸம்ப³கானங் ப⁴ண்ட³னாதி³ ப⁴வதி விய ப⁴ண்ட³னாதி³ ப⁴விஸ்ஸதீதி யோஜனா. பச்சா²பி அவிப்படிஸாரகரங் ப⁴விஸ்ஸதீதி எத்த² கேஸங் அவிப்படிஸாரகரங் ப⁴வதி விய பஞ்சங்க³ஸம்பன்னாக³தங் அத்தாதா³னங் ஆதி³யதோ பச்சா²பி அவிப்படிஸாரகரங் ப⁴வதீதி ஆஹ ‘‘ஸுப⁴த்³த³ங் வுட்³ட⁴பப்³ப³ஜித’’ந்திஆதி³. தத்த² பஞ்சஸதிகஸங்கீ³திந்தி பஞ்சஸதேஹி மஹாகஸ்ஸபாதீ³ஹி கத்தப்³ப³ங் ஸங்கீ³திங். மஹாகஸ்ஸபத்தே²ரஸ்ஸ பச்சா² ஸமனுஸ்ஸரணகரங் ஹோதி இவ ஹோதீதி யோஜனா. ஏஸேவ நயோ ஸேஸேஸுபி. ஸமனுஸ்ஸரணகரந்தி ஸம்மோத³வஸேன புனப்புனங் அனுஸ்ஸரணஸ்ஸ கரங். இமினா ‘‘அவிப்படிஸாரகர’’ந்தி பத³ஸ்ஸ அத்த²ங் த³ஸ்ஸேதி. பச்சா²பீதி எத்த² பிஸத்³த³ஸ்ஸ அவுத்தஸம்பிண்ட³னத்த²ங் த³ஸ்ஸெந்தோ ஆஹ ‘‘ஸாஸனஸ்ஸ சா’’திஆதி³. தத்த² ஸாஸனஸ்ஸ ச ஸஸ்ஸிரிகதாயாதி ஸம்ப³ந்தோ⁴. விக³தஉபக்கிலேஸசந்தி³மஸூரியானங் விய ஸாஸனஸ்ஸ ச ஸஸ்ஸிரிகதாய ஸங்வத்ததீதி அதி⁴ப்பாயோ.
Kosambakānaṃ bhaṇḍanādi bhavati viya bhaṇḍanādi bhavissatīti yojanā. Pacchāpi avippaṭisārakaraṃ bhavissatīti ettha kesaṃ avippaṭisārakaraṃ bhavati viya pañcaṅgasampannāgataṃ attādānaṃ ādiyato pacchāpi avippaṭisārakaraṃ bhavatīti āha ‘‘subhaddaṃ vuḍḍhapabbajita’’ntiādi. Tattha pañcasatikasaṅgītinti pañcasatehi mahākassapādīhi kattabbaṃ saṅgītiṃ. Mahākassapattherassa pacchā samanussaraṇakaraṃ hoti iva hotīti yojanā. Eseva nayo sesesupi. Samanussaraṇakaranti sammodavasena punappunaṃ anussaraṇassa karaṃ. Iminā ‘‘avippaṭisārakara’’nti padassa atthaṃ dasseti. Pacchāpīti ettha pisaddassa avuttasampiṇḍanatthaṃ dassento āha ‘‘sāsanassa cā’’tiādi. Tattha sāsanassa ca sassirikatāyāti sambandho. Vigataupakkilesacandimasūriyānaṃ viya sāsanassa ca sassirikatāya saṃvattatīti adhippāyo.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / சூளவக்³க³பாளி • Cūḷavaggapāḷi / 7. அத்தாதா³னஅங்க³ங் • 7. Attādānaaṅgaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / சூளவக்³க³-அட்ட²கதா² • Cūḷavagga-aṭṭhakathā / அத்தாதா³னஅங்க³கதா² • Attādānaaṅgakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / அத்தாதா³னஅங்க³கதா²வண்ணனா • Attādānaaṅgakathāvaṇṇanā
