| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
৭. অত্তাদানঅঙ্গকথা
7. Attādānaaṅgakathā
৩৯৮. অত্তাদানং আদাতুকামেনাতি এত্থ কিং অত্তাদানন্তি আহ ‘‘সাসনং সোধেতুকামো’’তিআদি। ইমিনা পরং চোদেতুং অত্তনা আদাতব্বং অধিকরণং অত্তাদানন্তি ৰুচ্চতীতি দস্সেতি। অকালো ইমং অত্তাদানং আদাতুন্তি এত্থ অকালং দস্সেন্তো আহ ‘‘রাজভয’’ন্তিআদি। তত্থ ৰস্সারত্তোতি ৰস্সকালো। সো হি ৰস্সো অতিৰিয রঞ্জতি এত্থ কালেতি ৰস্সারত্তোতি ৰুচ্চতি। ৰস্সারত্তোপি অধিকরণৰূপসমত্থং লজ্জিপরিসায দূরতো আনযনস্স দুক্করত্তা অকালো নাম। ইতীতি অযং রাজভযাদিকালোতি অত্থো। ৰিপরীতোতি রাজভযাদীনং অভাৰকালো।
398.Attādānaṃ ādātukāmenāti ettha kiṃ attādānanti āha ‘‘sāsanaṃ sodhetukāmo’’tiādi. Iminā paraṃ codetuṃ attanā ādātabbaṃ adhikaraṇaṃ attādānanti vuccatīti dasseti. Akāloimaṃ attādānaṃ ādātunti ettha akālaṃ dassento āha ‘‘rājabhaya’’ntiādi. Tattha vassārattoti vassakālo. So hi vasso ativiya rañjati ettha kāleti vassārattoti vuccati. Vassārattopi adhikaraṇavūpasamatthaṃ lajjiparisāya dūrato ānayanassa dukkarattā akālo nāma. Itīti ayaṃ rājabhayādikāloti attho. Viparītoti rājabhayādīnaṃ abhāvakālo.
অভূতং ইদং অত্তাদানন্তি এত্থ অভূতসদ্দো অৰিজ্জমানপরিযাযোতি আহ ‘‘অসন্তমিদ’’ন্তি, ইদং অত্তাদানং অৰিজ্জমানন্তি অত্থো। মযা গহিতোতি সম্বন্ধো। সীলৰা পুগ্গলোতি যোজনা। যন্তি অত্তাদানং সংৰত্ততীতি সম্বন্ধো। ইদন্তি অত্তাদানং।
Abhūtaṃ idaṃ attādānanti ettha abhūtasaddo avijjamānapariyāyoti āha ‘‘asantamida’’nti, idaṃ attādānaṃ avijjamānanti attho. Mayā gahitoti sambandho. Sīlavā puggaloti yojanā. Yanti attādānaṃ saṃvattatīti sambandho. Idanti attādānaṃ.
ন লভিস্সামি সন্দিট্ঠে, লভিস্সামি সন্দিট্ঠেতি এত্থ ‘‘ন লভিস্সামি, লভিস্সামী’’তি ইদং কিং সন্ধায ৰুত্তন্তি আহ ‘‘অপ্পেকদা হী’’তিআদি। তত্থ অপ্পেকদাতি অপি একদা। হিসদ্দো ৰিত্থারজোতকো। এৰরূপাতি সন্দিট্ঠসম্ভত্তসভাৰা। তন্তি উপত্থম্ভকভিক্খুলভনং সন্ধাযাতি সম্বন্ধো। ‘‘ন লভিস্সামী’’তি ইদং ৰচনং ৰুত্তন্তি সম্বন্ধো।
Na labhissāmi sandiṭṭhe, labhissāmi sandiṭṭheti ettha ‘‘na labhissāmi, labhissāmī’’ti idaṃ kiṃ sandhāya vuttanti āha ‘‘appekadā hī’’tiādi. Tattha appekadāti api ekadā. Hisaddo vitthārajotako. Evarūpāti sandiṭṭhasambhattasabhāvā. Tanti upatthambhakabhikkhulabhanaṃ sandhāyāti sambandho. ‘‘Na labhissāmī’’ti idaṃ vacanaṃ vuttanti sambandho.
কোসম্বকানং ভণ্ডনাদি ভৰতি ৰিয ভণ্ডনাদি ভৰিস্সতীতি যোজনা। পচ্ছাপি অৰিপ্পটিসারকরং ভৰিস্সতীতি এত্থ কেসং অৰিপ্পটিসারকরং ভৰতি ৰিয পঞ্চঙ্গসম্পন্নাগতং অত্তাদানং আদিযতো পচ্ছাপি অৰিপ্পটিসারকরং ভৰতীতি আহ ‘‘সুভদ্দং ৰুড্ঢপব্বজিত’’ন্তিআদি। তত্থ পঞ্চসতিকসঙ্গীতিন্তি পঞ্চসতেহি মহাকস্সপাদীহি কত্তব্বং সঙ্গীতিং। মহাকস্সপত্থেরস্স পচ্ছা সমনুস্সরণকরং হোতি ইৰ হোতীতি যোজনা। এসেৰ নযো সেসেসুপি। সমনুস্সরণকরন্তি সম্মোদৰসেন পুনপ্পুনং অনুস্সরণস্স করং। ইমিনা ‘‘অৰিপ্পটিসারকর’’ন্তি পদস্স অত্থং দস্সেতি। পচ্ছাপীতি এত্থ পিসদ্দস্স অৰুত্তসম্পিণ্ডনত্থং দস্সেন্তো আহ ‘‘সাসনস্স চা’’তিআদি। তত্থ সাসনস্স চ সস্সিরিকতাযাতি সম্বন্ধো। ৰিগতউপক্কিলেসচন্দিমসূরিযানং ৰিয সাসনস্স চ সস্সিরিকতায সংৰত্ততীতি অধিপ্পাযো।
Kosambakānaṃ bhaṇḍanādi bhavati viya bhaṇḍanādi bhavissatīti yojanā. Pacchāpi avippaṭisārakaraṃ bhavissatīti ettha kesaṃ avippaṭisārakaraṃ bhavati viya pañcaṅgasampannāgataṃ attādānaṃ ādiyato pacchāpi avippaṭisārakaraṃ bhavatīti āha ‘‘subhaddaṃ vuḍḍhapabbajita’’ntiādi. Tattha pañcasatikasaṅgītinti pañcasatehi mahākassapādīhi kattabbaṃ saṅgītiṃ. Mahākassapattherassa pacchā samanussaraṇakaraṃ hoti iva hotīti yojanā. Eseva nayo sesesupi. Samanussaraṇakaranti sammodavasena punappunaṃ anussaraṇassa karaṃ. Iminā ‘‘avippaṭisārakara’’nti padassa atthaṃ dasseti. Pacchāpīti ettha pisaddassa avuttasampiṇḍanatthaṃ dassento āha ‘‘sāsanassa cā’’tiādi. Tattha sāsanassa ca sassirikatāyāti sambandho. Vigataupakkilesacandimasūriyānaṃ viya sāsanassa ca sassirikatāya saṃvattatīti adhippāyo.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / চূল়ৰগ্গপাল়ি • Cūḷavaggapāḷi / ৭. অত্তাদানঅঙ্গং • 7. Attādānaaṅgaṃ
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / চূল়ৰগ্গ-অট্ঠকথা • Cūḷavagga-aṭṭhakathā / অত্তাদানঅঙ্গকথা • Attādānaaṅgakathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / অত্তাদানঅঙ্গকথাৰণ্ণনা • Attādānaaṅgakathāvaṇṇanā
