| Library / Tipiṭaka / តិបិដក • Tipiṭaka / ចូឡវគ្គ-អដ្ឋកថា • Cūḷavagga-aṭṭhakathā |
អត្តាទានអង្គកថា
Attādānaaṅgakathā
៣៩៨. អត្តាទានំ អាទាតុកាមេនាតិ ឯត្ថ សាសនំ សោធេតុកាមោ ភិក្ខុ យំ អធិករណំ អត្តនា អាទិយតិ, តំ អត្តាទានន្តិ វុច្ចតិ។ អកាលោ ឥមំ អត្តាទានំ អាទាតុន្តិ ឯត្ថ រាជភយំ ចោរភយំ ទុព្ភិក្ខភយំ វស្សារត្តោតិ អយំ អកាលោ, វិបរីតោ កាលោ។
398.Attādānaṃ ādātukāmenāti ettha sāsanaṃ sodhetukāmo bhikkhu yaṃ adhikaraṇaṃ attanā ādiyati, taṃ attādānanti vuccati. Akālo imaṃ attādānaṃ ādātunti ettha rājabhayaṃ corabhayaṃ dubbhikkhabhayaṃ vassārattoti ayaṃ akālo, viparīto kālo.
អភូតំ ឥទំ អត្តាទានន្តិ អសន្តមិទំ, មយា អធម្មោ វា ធម្មោតិ, ធម្មោ វា អធម្មោតិ, អវិនយោ វា វិនយោតិ, វិនយោ វា អវិនយោតិ, ទុស្សីលោ វា បុគ្គលោ សីលវាតិ, សីលវា វា ទុស្សីលោតិ គហិតោតិ អត្ថោ; វិបរិយាយេន ភូតំ វេទិតព្ពំ។ អនត្ថសំហិតំ ឥទំ អត្តាទានន្តិ ឯត្ថ យំ ជីវិតន្តរាយាយ វា ព្រហ្មចរិយន្តរាយាយ វា សំវត្តតិ, ឥទំ អនត្ថសំហិតំ, វិបរីតំ អត្ថសំហិតំ នាម។
Abhūtaṃ idaṃ attādānanti asantamidaṃ, mayā adhammo vā dhammoti, dhammo vā adhammoti, avinayo vā vinayoti, vinayo vā avinayoti, dussīlo vā puggalo sīlavāti, sīlavā vā dussīloti gahitoti attho; vipariyāyena bhūtaṃ veditabbaṃ. Anatthasaṃhitaṃ idaṃ attādānanti ettha yaṃ jīvitantarāyāya vā brahmacariyantarāyāya vā saṃvattati, idaṃ anatthasaṃhitaṃ, viparītaṃ atthasaṃhitaṃ nāma.
ន លភិស្សាមិ សន្ទិដ្ឋេ សម្ភត្តេ ភិក្ខូតិ អប្បេកទា ហិ រាជភយាទីសុ ឯវរូបា អត្តនោ បក្ខស្ស ឧបត្ថម្ភកា ភិក្ខូ លទ្ធុំ ន សក្កា ហោន្តិ, តំ សន្ធាយ វុត្តំ ‘‘ន លភិស្សាមី’’តិ ។ អប្បេកទា បន ខេមសុភិក្ខាទីសុ លទ្ធុំ សក្កា ហោន្តិ, តំ សន្ធាយ ‘‘លភិស្សាមី’’តិ វុត្តំ។
Na labhissāmi sandiṭṭhe sambhatte bhikkhūti appekadā hi rājabhayādīsu evarūpā attano pakkhassa upatthambhakā bhikkhū laddhuṃ na sakkā honti, taṃ sandhāya vuttaṃ ‘‘na labhissāmī’’ti . Appekadā pana khemasubhikkhādīsu laddhuṃ sakkā honti, taṃ sandhāya ‘‘labhissāmī’’ti vuttaṃ.
ភវិស្សតិ សង្ឃស្ស តតោនិទានំ ភណ្ឌនន្តិ កោសម្ពកានំ វិយ ភណ្ឌនំ កលហោ វិគ្គហោ វិវាទោ សង្ឃភេទោ ច ភវិស្សតីតិ។ បច្ឆាបិ អវិប្បដិសារករំ ភវិស្សតីតិ សុភទ្ទំ វុឌ្ឍបព្ពជិតំ និគ្គហេត្វា បញ្ចសតិកសង្គីតិំ ករោន្តស្ស មហាកស្សបត្ថេរស្សេវ, ទសវត្ថុកេ អធិករណេ ទសភិក្ខុសហស្សានិ និគ្គហេត្វា សត្តសតិកសង្គីតិំ ករោន្តស្ស អាយស្មតោ យសស្សេវ, សដ្ឋិភិក្ខុសហស្សានិ និគ្គហេត្វា សហស្សិកសង្គីតិំ ករោន្តស្ស មោគ្គលិបុត្តតិស្សត្ថេរស្សេវ ច បច្ឆា សមនុស្សរណករណំ ហោតិ, សាសនស្ស ច វិគតុបក្កិលេសចន្ទិមសូរិយសស្សិរិកតាយ សំវត្តតិ។
Bhavissati saṅghassa tatonidānaṃ bhaṇḍananti kosambakānaṃ viya bhaṇḍanaṃ kalaho viggaho vivādo saṅghabhedo ca bhavissatīti. Pacchāpi avippaṭisārakaraṃ bhavissatīti subhaddaṃ vuḍḍhapabbajitaṃ niggahetvā pañcasatikasaṅgītiṃ karontassa mahākassapattherasseva, dasavatthuke adhikaraṇe dasabhikkhusahassāni niggahetvā sattasatikasaṅgītiṃ karontassa āyasmato yasasseva, saṭṭhibhikkhusahassāni niggahetvā sahassikasaṅgītiṃ karontassa moggaliputtatissattherasseva ca pacchā samanussaraṇakaraṇaṃ hoti, sāsanassa ca vigatupakkilesacandimasūriyasassirikatāya saṃvattati.
អត្តាទានអង្គកថា និដ្ឋិតា។
Attādānaaṅgakathā niṭṭhitā.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / ចូឡវគ្គបាឡិ • Cūḷavaggapāḷi / ៧. អត្តាទានអង្គំ • 7. Attādānaaṅgaṃ
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / អត្តាទានអង្គកថាវណ្ណនា • Attādānaaṅgakathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / អត្តាទានអង្គកថាវណ្ណនា • Attādānaaṅgakathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / អត្តាទានអង្គកថាទិវណ្ណនា • Attādānaaṅgakathādivaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / ៧. អត្តាទានអង្គកថា • 7. Attādānaaṅgakathā
