| Library / Tipiṭaka / ತಿಪಿಟಕ • Tipiṭaka / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi |
೭. ಅತ್ತಾದಾನಅಙ್ಗಕಥಾ
7. Attādānaaṅgakathā
೩೯೮. ಅತ್ತಾದಾನಂ ಆದಾತುಕಾಮೇನಾತಿ ಏತ್ಥ ಕಿಂ ಅತ್ತಾದಾನನ್ತಿ ಆಹ ‘‘ಸಾಸನಂ ಸೋಧೇತುಕಾಮೋ’’ತಿಆದಿ। ಇಮಿನಾ ಪರಂ ಚೋದೇತುಂ ಅತ್ತನಾ ಆದಾತಬ್ಬಂ ಅಧಿಕರಣಂ ಅತ್ತಾದಾನನ್ತಿ ವುಚ್ಚತೀತಿ ದಸ್ಸೇತಿ। ಅಕಾಲೋ ಇಮಂ ಅತ್ತಾದಾನಂ ಆದಾತುನ್ತಿ ಏತ್ಥ ಅಕಾಲಂ ದಸ್ಸೇನ್ತೋ ಆಹ ‘‘ರಾಜಭಯ’’ನ್ತಿಆದಿ। ತತ್ಥ ವಸ್ಸಾರತ್ತೋತಿ ವಸ್ಸಕಾಲೋ। ಸೋ ಹಿ ವಸ್ಸೋ ಅತಿವಿಯ ರಞ್ಜತಿ ಏತ್ಥ ಕಾಲೇತಿ ವಸ್ಸಾರತ್ತೋತಿ ವುಚ್ಚತಿ। ವಸ್ಸಾರತ್ತೋಪಿ ಅಧಿಕರಣವೂಪಸಮತ್ಥಂ ಲಜ್ಜಿಪರಿಸಾಯ ದೂರತೋ ಆನಯನಸ್ಸ ದುಕ್ಕರತ್ತಾ ಅಕಾಲೋ ನಾಮ। ಇತೀತಿ ಅಯಂ ರಾಜಭಯಾದಿಕಾಲೋತಿ ಅತ್ಥೋ। ವಿಪರೀತೋತಿ ರಾಜಭಯಾದೀನಂ ಅಭಾವಕಾಲೋ।
398.Attādānaṃ ādātukāmenāti ettha kiṃ attādānanti āha ‘‘sāsanaṃ sodhetukāmo’’tiādi. Iminā paraṃ codetuṃ attanā ādātabbaṃ adhikaraṇaṃ attādānanti vuccatīti dasseti. Akāloimaṃ attādānaṃ ādātunti ettha akālaṃ dassento āha ‘‘rājabhaya’’ntiādi. Tattha vassārattoti vassakālo. So hi vasso ativiya rañjati ettha kāleti vassārattoti vuccati. Vassārattopi adhikaraṇavūpasamatthaṃ lajjiparisāya dūrato ānayanassa dukkarattā akālo nāma. Itīti ayaṃ rājabhayādikāloti attho. Viparītoti rājabhayādīnaṃ abhāvakālo.
ಅಭೂತಂ ಇದಂ ಅತ್ತಾದಾನನ್ತಿ ಏತ್ಥ ಅಭೂತಸದ್ದೋ ಅವಿಜ್ಜಮಾನಪರಿಯಾಯೋತಿ ಆಹ ‘‘ಅಸನ್ತಮಿದ’’ನ್ತಿ, ಇದಂ ಅತ್ತಾದಾನಂ ಅವಿಜ್ಜಮಾನನ್ತಿ ಅತ್ಥೋ। ಮಯಾ ಗಹಿತೋತಿ ಸಮ್ಬನ್ಧೋ। ಸೀಲವಾ ಪುಗ್ಗಲೋತಿ ಯೋಜನಾ। ಯನ್ತಿ ಅತ್ತಾದಾನಂ ಸಂವತ್ತತೀತಿ ಸಮ್ಬನ್ಧೋ। ಇದನ್ತಿ ಅತ್ತಾದಾನಂ।
Abhūtaṃ idaṃ attādānanti ettha abhūtasaddo avijjamānapariyāyoti āha ‘‘asantamida’’nti, idaṃ attādānaṃ avijjamānanti attho. Mayā gahitoti sambandho. Sīlavā puggaloti yojanā. Yanti attādānaṃ saṃvattatīti sambandho. Idanti attādānaṃ.
ನ ಲಭಿಸ್ಸಾಮಿ ಸನ್ದಿಟ್ಠೇ, ಲಭಿಸ್ಸಾಮಿ ಸನ್ದಿಟ್ಠೇತಿ ಏತ್ಥ ‘‘ನ ಲಭಿಸ್ಸಾಮಿ, ಲಭಿಸ್ಸಾಮೀ’’ತಿ ಇದಂ ಕಿಂ ಸನ್ಧಾಯ ವುತ್ತನ್ತಿ ಆಹ ‘‘ಅಪ್ಪೇಕದಾ ಹೀ’’ತಿಆದಿ। ತತ್ಥ ಅಪ್ಪೇಕದಾತಿ ಅಪಿ ಏಕದಾ। ಹಿಸದ್ದೋ ವಿತ್ಥಾರಜೋತಕೋ। ಏವರೂಪಾತಿ ಸನ್ದಿಟ್ಠಸಮ್ಭತ್ತಸಭಾವಾ। ತನ್ತಿ ಉಪತ್ಥಮ್ಭಕಭಿಕ್ಖುಲಭನಂ ಸನ್ಧಾಯಾತಿ ಸಮ್ಬನ್ಧೋ। ‘‘ನ ಲಭಿಸ್ಸಾಮೀ’’ತಿ ಇದಂ ವಚನಂ ವುತ್ತನ್ತಿ ಸಮ್ಬನ್ಧೋ।
Na labhissāmi sandiṭṭhe, labhissāmi sandiṭṭheti ettha ‘‘na labhissāmi, labhissāmī’’ti idaṃ kiṃ sandhāya vuttanti āha ‘‘appekadā hī’’tiādi. Tattha appekadāti api ekadā. Hisaddo vitthārajotako. Evarūpāti sandiṭṭhasambhattasabhāvā. Tanti upatthambhakabhikkhulabhanaṃ sandhāyāti sambandho. ‘‘Na labhissāmī’’ti idaṃ vacanaṃ vuttanti sambandho.
ಕೋಸಮ್ಬಕಾನಂ ಭಣ್ಡನಾದಿ ಭವತಿ ವಿಯ ಭಣ್ಡನಾದಿ ಭವಿಸ್ಸತೀತಿ ಯೋಜನಾ। ಪಚ್ಛಾಪಿ ಅವಿಪ್ಪಟಿಸಾರಕರಂ ಭವಿಸ್ಸತೀತಿ ಏತ್ಥ ಕೇಸಂ ಅವಿಪ್ಪಟಿಸಾರಕರಂ ಭವತಿ ವಿಯ ಪಞ್ಚಙ್ಗಸಮ್ಪನ್ನಾಗತಂ ಅತ್ತಾದಾನಂ ಆದಿಯತೋ ಪಚ್ಛಾಪಿ ಅವಿಪ್ಪಟಿಸಾರಕರಂ ಭವತೀತಿ ಆಹ ‘‘ಸುಭದ್ದಂ ವುಡ್ಢಪಬ್ಬಜಿತ’’ನ್ತಿಆದಿ। ತತ್ಥ ಪಞ್ಚಸತಿಕಸಙ್ಗೀತಿನ್ತಿ ಪಞ್ಚಸತೇಹಿ ಮಹಾಕಸ್ಸಪಾದೀಹಿ ಕತ್ತಬ್ಬಂ ಸಙ್ಗೀತಿಂ। ಮಹಾಕಸ್ಸಪತ್ಥೇರಸ್ಸ ಪಚ್ಛಾ ಸಮನುಸ್ಸರಣಕರಂ ಹೋತಿ ಇವ ಹೋತೀತಿ ಯೋಜನಾ। ಏಸೇವ ನಯೋ ಸೇಸೇಸುಪಿ। ಸಮನುಸ್ಸರಣಕರನ್ತಿ ಸಮ್ಮೋದವಸೇನ ಪುನಪ್ಪುನಂ ಅನುಸ್ಸರಣಸ್ಸ ಕರಂ। ಇಮಿನಾ ‘‘ಅವಿಪ್ಪಟಿಸಾರಕರ’’ನ್ತಿ ಪದಸ್ಸ ಅತ್ಥಂ ದಸ್ಸೇತಿ। ಪಚ್ಛಾಪೀತಿ ಏತ್ಥ ಪಿಸದ್ದಸ್ಸ ಅವುತ್ತಸಮ್ಪಿಣ್ಡನತ್ಥಂ ದಸ್ಸೇನ್ತೋ ಆಹ ‘‘ಸಾಸನಸ್ಸ ಚಾ’’ತಿಆದಿ। ತತ್ಥ ಸಾಸನಸ್ಸ ಚ ಸಸ್ಸಿರಿಕತಾಯಾತಿ ಸಮ್ಬನ್ಧೋ। ವಿಗತಉಪಕ್ಕಿಲೇಸಚನ್ದಿಮಸೂರಿಯಾನಂ ವಿಯ ಸಾಸನಸ್ಸ ಚ ಸಸ್ಸಿರಿಕತಾಯ ಸಂವತ್ತತೀತಿ ಅಧಿಪ್ಪಾಯೋ।
Kosambakānaṃ bhaṇḍanādi bhavati viya bhaṇḍanādi bhavissatīti yojanā. Pacchāpi avippaṭisārakaraṃ bhavissatīti ettha kesaṃ avippaṭisārakaraṃ bhavati viya pañcaṅgasampannāgataṃ attādānaṃ ādiyato pacchāpi avippaṭisārakaraṃ bhavatīti āha ‘‘subhaddaṃ vuḍḍhapabbajita’’ntiādi. Tattha pañcasatikasaṅgītinti pañcasatehi mahākassapādīhi kattabbaṃ saṅgītiṃ. Mahākassapattherassa pacchā samanussaraṇakaraṃ hoti iva hotīti yojanā. Eseva nayo sesesupi. Samanussaraṇakaranti sammodavasena punappunaṃ anussaraṇassa karaṃ. Iminā ‘‘avippaṭisārakara’’nti padassa atthaṃ dasseti. Pacchāpīti ettha pisaddassa avuttasampiṇḍanatthaṃ dassento āha ‘‘sāsanassa cā’’tiādi. Tattha sāsanassa ca sassirikatāyāti sambandho. Vigataupakkilesacandimasūriyānaṃ viya sāsanassa ca sassirikatāya saṃvattatīti adhippāyo.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಚೂಳವಗ್ಗಪಾಳಿ • Cūḷavaggapāḷi / ೭. ಅತ್ತಾದಾನಅಙ್ಗಂ • 7. Attādānaaṅgaṃ
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಚೂಳವಗ್ಗ-ಅಟ್ಠಕಥಾ • Cūḷavagga-aṭṭhakathā / ಅತ್ತಾದಾನಅಙ್ಗಕಥಾ • Attādānaaṅgakathā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ಅತ್ತಾದಾನಅಙ್ಗಕಥಾವಣ್ಣನಾ • Attādānaaṅgakathāvaṇṇanā
