| Library / Tipiṭaka / திபிடக • Tipiṭaka / மஹானித்³தே³ஸ-அட்ட²கதா² • Mahāniddesa-aṭṭhakathā |
15. அத்தத³ண்ட³ஸுத்தனித்³தே³ஸவண்ணனா
15. Attadaṇḍasuttaniddesavaṇṇanā
170. பன்னரஸமே அத்தத³ண்ட³ஸுத்தனித்³தே³ஸே அத்தத³ண்டா³ ப⁴யங் ஜாதந்தி பட²மகா³தா²ய அத்தோ² – யங் லோகஸ்ஸ தி³ட்ட²த⁴ம்மிகங் வா ஸம்பராயிகங் வா ப⁴யங் ஜாதங், தங் ஸப்³ப³ங் அத்தத³ண்டா³ ப⁴யங் ஜாதங் அத்தனோ து³ச்சரிதகாரணா ஜாதங், ஏவங் ஸந்தேபி ஜனங் பஸ்ஸத² மேத⁴க³ங், இமங் ஸாகியாதி³ஜனங் பஸ்ஸத² அஞ்ஞமஞ்ஞங் மேத⁴க³ங் ஹிங்ஸகங் பா³த⁴கந்தி. ஏவங் தங் படிவிருத்³த⁴ங் விப்படிபன்னங் ஜனங் பரிபா⁴ஸித்வா அத்தனோ ஸம்மா படிபத்தித³ஸ்ஸனேன தஸ்ஸ ஸங்வேக³ங் ஜனேதுங் ஆஹ ‘‘ஸங்வேக³ங் கித்தயிஸ்ஸாமி, யதா² ஸங்விஜிதங் மயா’’தி. புப்³பே³ போ³தி⁴ஸத்தேனேவ ஸதாதி அதி⁴ப்பாயோ.
170. Pannarasame attadaṇḍasuttaniddese attadaṇḍā bhayaṃ jātanti paṭhamagāthāya attho – yaṃ lokassa diṭṭhadhammikaṃ vā samparāyikaṃ vā bhayaṃ jātaṃ, taṃ sabbaṃ attadaṇḍā bhayaṃ jātaṃ attano duccaritakāraṇā jātaṃ, evaṃ santepi janaṃ passatha medhagaṃ, imaṃ sākiyādijanaṃ passatha aññamaññaṃ medhagaṃ hiṃsakaṃ bādhakanti. Evaṃ taṃ paṭiviruddhaṃ vippaṭipannaṃ janaṃ paribhāsitvā attano sammā paṭipattidassanena tassa saṃvegaṃ janetuṃ āha ‘‘saṃvegaṃ kittayissāmi, yathā saṃvijitaṃ mayā’’ti. Pubbe bodhisatteneva satāti adhippāyo.
தயோதி க³ணனபரிச்சே²தோ³. த³ண்டா³தி து³ச்சரிதா. காயத³ண்டோ³தி காயது³ச்சரிதங். வசீத³ண்டா³தீ³ஸுபி ஏஸேவ நயோ. திவித⁴ங் காயது³ச்சரிதந்தி பாணாதிபாதாதி³காயதோ பவத்தங் து³ட்டு²ங் சரிதங், கிலேஸபூதிகத்தா வா து³ட்டு² சரிதந்தி லத்³த⁴னாமங் திவித⁴ங் து³ச்சரிதங் காயது³ச்சரிதங். சதுப்³பி³த⁴ந்தி முஸாவாதா³தி³சதுப்³பி³த⁴ங். திவித⁴ந்தி அபி⁴ஜ்ஜா²தி³திவித⁴ங். தி³ட்ட²த⁴ம்மிகந்தி தி³ட்டே²வ த⁴ம்மே இமஸ்மிங்யேவ அத்தபா⁴வே படிஸங்வேத³னீயங். ஸம்பராயிகந்தி அனாக³தே அத்தபா⁴வே படிஸங்வேத³னீயங். ஆகு³சாரீதி பாபகாரீ அபராத⁴காரீ. தமேனங் ராஜா பரிபா⁴ஸதீதி பாபகாரிங் ராஜா பரிபா⁴ஸதி, ப⁴யங் உப்பாதே³தி. து³க்க²ங் தோ³மனஸ்ஸங் படிஸங்வேதே³தீதி காயிகங் து³க்க²ங் சேதஸிகங் தோ³மனஸ்ஸங் விந்த³தி. ஏதங் ப⁴யங் து³க்க²ங் தோ³மனஸ்ஸந்தி ஏவரூபங் ப⁴யஞ்ச து³க்க²ஞ்ச தோ³மனஸ்ஸஞ்ச. குதோ தஸ்ஸாதி தஸ்ஸ சோரஸ்ஸ குதோ உப்பன்னங். அத்தத³ண்ட³தோ ஜாதந்தி அத்தனா கதது³ச்சரிததோ உப்பன்னங்.
Tayoti gaṇanaparicchedo. Daṇḍāti duccaritā. Kāyadaṇḍoti kāyaduccaritaṃ. Vacīdaṇḍādīsupi eseva nayo. Tividhaṃ kāyaduccaritanti pāṇātipātādikāyato pavattaṃ duṭṭhuṃ caritaṃ, kilesapūtikattā vā duṭṭhu caritanti laddhanāmaṃ tividhaṃ duccaritaṃ kāyaduccaritaṃ. Catubbidhanti musāvādādicatubbidhaṃ. Tividhanti abhijjhāditividhaṃ. Diṭṭhadhammikanti diṭṭheva dhamme imasmiṃyeva attabhāve paṭisaṃvedanīyaṃ. Samparāyikanti anāgate attabhāve paṭisaṃvedanīyaṃ. Āgucārīti pāpakārī aparādhakārī. Tamenaṃ rājā paribhāsatīti pāpakāriṃ rājā paribhāsati, bhayaṃ uppādeti. Dukkhaṃ domanassaṃ paṭisaṃvedetīti kāyikaṃ dukkhaṃ cetasikaṃ domanassaṃ vindati. Etaṃ bhayaṃ dukkhaṃ domanassanti evarūpaṃ bhayañca dukkhañca domanassañca. Kuto tassāti tassa corassa kuto uppannaṃ. Attadaṇḍato jātanti attanā kataduccaritato uppannaṃ.
அந்தமஸோதி ஹெட்டி²மதோ. ஸவசனீயம்பி கரோதி ‘‘ந தே லப்³பா⁴ இதோ பக்கமிது’’ந்தி இதோ இமம்ஹா கா³மாதி³னா க³ந்துங் ந லப்³பா⁴. ந ஸக்கா ப³ஹி நிக்க²மிதுந்தி பலிபோ³த⁴ங் ஸங்க³ங் கரோதி. த⁴னஜானிபச்சயாபீதி த⁴னபரிஹானிகாரணாபி. ராஜா தஸ்ஸ விவிதா⁴ கம்மகாரணா காராபேதி. கஸாஹிபி தாளேதீதி கஸாத³ண்ட³கேஹி போதே²தி. வெத்தேஹிபி தாளேதீதி ஸகண்டகவெத்தலதாஹி போதே²தி. அட்³ட⁴த³ண்ட³கேஹீதிஆத³யோ ஹெட்டா² வுத்தனயாயேவ. ஸுனகே²ஹிபி கா²தா³பேதீதி கதிபயானி தி³வஸானி ஆஹாரே அத³த்வா சா²தஸுனகே²ஹி கா²தா³பேதி. தே முஹுத்தேன அட்டி²கஸங்க²லிகமேவ கரோதி. ஸூலே உத்தாஸேதீதி ஸூலங் ஆரோபேதி. ராஜா இமேஸங் சதுன்னங் த³ண்டா³னங் இஸ்ஸரோதி இமாஸங் சதுன்னங் ஆணானங் காதுங் ராஜா ஸமத்தோ².
Antamasoti heṭṭhimato. Savacanīyampi karoti ‘‘nate labbhā ito pakkamitu’’nti ito imamhā gāmādinā gantuṃ na labbhā. Na sakkā bahi nikkhamitunti palibodhaṃ saṅgaṃ karoti. Dhanajānipaccayāpīti dhanaparihānikāraṇāpi. Rājā tassa vividhā kammakāraṇā kārāpeti. Kasāhipi tāḷetīti kasādaṇḍakehi potheti. Vettehipi tāḷetīti sakaṇṭakavettalatāhi potheti. Aḍḍhadaṇḍakehītiādayo heṭṭhā vuttanayāyeva. Sunakhehipikhādāpetīti katipayāni divasāni āhāre adatvā chātasunakhehi khādāpeti. Te muhuttena aṭṭhikasaṅkhalikameva karoti. Sūle uttāsetīti sūlaṃ āropeti. Rājā imesaṃ catunnaṃ daṇḍānaṃ issaroti imāsaṃ catunnaṃ āṇānaṃ kātuṃ rājā samattho.
ஸகேன கம்மேனாதி ஸயங்கதேன கம்மேன. தமேனங் நிரயபாலாதி எத்த² ஏகச்சே தே²ரா ‘‘நிரயபாலா நாம நத்தி², யந்தரூபங் விய கம்மமேவ காரணங் காரேதீ’’தி வத³ந்தி. தேஸங் தங் ‘‘அத்தி² நிரயேஸு நிரயபாலாதி, ஆமந்தா. அத்தி² ச காரணிகா’’திஆதி³னா நயேன அபி⁴த⁴ம்மே (கதா²॰ 866 ஆத³யோ) படிஸேதி⁴தமேவ. யதா² ஹி மனுஸ்ஸலோகே கம்மகாரணகாரகா அத்தி², ஏவமேவ நிரயேஸு நிரயபாலா அத்தீ²தி. தத்தங் அயோகி²லந்தி திகா³வுதங் அத்தபா⁴வங் ஸம்பஜ்ஜலிதாய லோஹபத²வியா உத்தானகங் நிபஜ்ஜாபெத்வா த³க்கி²ணஹத்தே² தாலப்பமாணங் அயஸூலங் பவேஸெந்தி, ததா² வாமஹத்தா²தீ³ஸு. யதா² ச உத்தானகங் நிபஜ்ஜாபெத்வா ஏவங் உரேனபி வாமபஸ்ஸேனபி த³க்கி²ணபஸ்ஸேனபி நிபஜ்ஜாபெத்வா தங் கம்மகாரணங் கரொந்தியேவ.
Sakena kammenāti sayaṃkatena kammena. Tamenaṃ nirayapālāti ettha ekacce therā ‘‘nirayapālā nāma natthi, yantarūpaṃ viya kammameva kāraṇaṃ kāretī’’ti vadanti. Tesaṃ taṃ ‘‘atthi nirayesu nirayapālāti, āmantā. Atthi ca kāraṇikā’’tiādinā nayena abhidhamme (kathā. 866 ādayo) paṭisedhitameva. Yathā hi manussaloke kammakāraṇakārakā atthi, evameva nirayesu nirayapālā atthīti. Tattaṃ ayokhilanti tigāvutaṃ attabhāvaṃ sampajjalitāya lohapathaviyā uttānakaṃ nipajjāpetvā dakkhiṇahatthe tālappamāṇaṃ ayasūlaṃ pavesenti, tathā vāmahatthādīsu. Yathā ca uttānakaṃ nipajjāpetvā evaṃ urenapi vāmapassenapi dakkhiṇapassenapi nipajjāpetvā taṃ kammakāraṇaṃ karontiyeva.
ஸங்வேஸெத்வாதி ஜலிதாய லோஹபத²வியா திகா³வுதங் அத்தபா⁴வங் நிபஜ்ஜாபெத்வா. குடா²ரீஹீதி மஹதீஹி கே³ஹச்சா²த³னஸ்ஸ ஏகபக்க²மத்தாஹி குடா²ரீஹி தச்செ²ந்தி, லோஹிதங் நதீ³ ஹுத்வா ஸந்த³தி, லோஹபத²விதோ ஜாலா உட்ட²ஹித்வா தச்சி²தட்டா²னங் க³ண்ஹாதி, மஹாது³க்க²ங் உப்பஜ்ஜதி, தச்ச²ந்தா பன ஸுத்தாஹதங் கரித்வா தா³ரு விய அட்ட²ங்ஸம்பி ச²ளங்ஸம்பி கரொந்தி. வாஸீஹீதி மஹாஸுப்பபமாணாஹி வாஸீஹி. ரதே² யோஜெத்வாதி ஸத்³தி⁴ங் யுக³யொத்தஉபக்க²ரசக்ககுப்³ப³ரபாஜனேஹி ஸப்³ப³தோ பஜ்ஜலிதே ரதே² யோஜெத்வா. மஹந்தந்தி மஹாகூடாகா³ரப்பமாணங். ஆரோபெந்தீதி ஸம்பஜ்ஜலிதேஹி அயமுக்³க³ரேஹி போதெ²ந்தா ஆரோபெந்தி. ஸகிம்பி உத்³த⁴ந்தி ஸுபக்குத்தி²தாய உக்க²லியா பக்கி²த்ததண்டு³லங் விய உத்³த⁴ங் அதோ⁴ திரியஞ்ச க³ச்ச²தி. மஹானிரயேதி அவீசிமஹானிரயம்ஹி.
Saṃvesetvāti jalitāya lohapathaviyā tigāvutaṃ attabhāvaṃ nipajjāpetvā. Kuṭhārīhīti mahatīhi gehacchādanassa ekapakkhamattāhi kuṭhārīhi tacchenti, lohitaṃ nadī hutvā sandati, lohapathavito jālā uṭṭhahitvā tacchitaṭṭhānaṃ gaṇhāti, mahādukkhaṃ uppajjati, tacchantā pana suttāhataṃ karitvā dāru viya aṭṭhaṃsampi chaḷaṃsampi karonti. Vāsīhīti mahāsuppapamāṇāhi vāsīhi. Rathe yojetvāti saddhiṃ yugayottaupakkharacakkakubbarapājanehi sabbato pajjalite rathe yojetvā. Mahantanti mahākūṭāgārappamāṇaṃ. Āropentīti sampajjalitehi ayamuggarehi pothentā āropenti. Sakimpi uddhanti supakkutthitāya ukkhaliyā pakkhittataṇḍulaṃ viya uddhaṃ adho tiriyañca gacchati. Mahānirayeti avīcimahānirayamhi.
சதுக்கண்ணோதி சதுரஸ்ஸமஞ்ஜூஸாஸதி³ஸோ. விப⁴த்தோதி சதுத்³வாரவஸேன விப⁴த்தோ. பா⁴க³ஸோ மிதோதி த்³வாரவீதீ²னங் வஸேன பா⁴கே³ ட²பெத்வா ட²பெத்வா விப⁴த்தோ. பரியந்தோதி பரிக்கி²த்தோ. அயஸாதி உபரி நவயோஜனிகேன அயபத்தேன சா²தி³தோ. ஸமந்தா யோஜனஸதங் ப²ரித்வா திட்ட²தீதி ஏவங் ப²ரித்வா திட்ட²தி, யதா² ஸமந்தா யோஜனஸதே ட²த்வா ஓலோகெந்தஸ்ஸ அக்கீ²னி யமககோ³ளகா விய நிக்க²மந்தி. கத³ரியாதபனாதி ஸப்³பே³பி தே உஸ்ஸதே³ஹி ஸத்³தி⁴ங் அட்ட² மஹானிரயா கத³ரியா நிச்சங் தபந்தீதி கத³ரியாதபனா. ப³லவது³க்க²தாய கோ⁴ரா. கப்பட்டி²கானங் அச்சீனங் அத்தி²தாய அச்சிமந்தோ. ஆஸாதே³துங் க⁴ட்டேதுங் து³க்கரதாய து³ராஸதா³. தி³ட்ட²மத்தா வா ஸுதமத்தா வா லோமானி ஹங்ஸெந்தீதி லோமஹங்ஸனரூபா. பீ⁴ஸனதாய பி⁴ஸ்மா. ப⁴யஜனநதாய படிப⁴யா. ஸுகா²பா⁴வேன து³கா².
Catukkaṇṇoti caturassamañjūsāsadiso. Vibhattoti catudvāravasena vibhatto. Bhāgaso mitoti dvāravīthīnaṃ vasena bhāge ṭhapetvā ṭhapetvā vibhatto. Pariyantoti parikkhitto. Ayasāti upari navayojanikena ayapattena chādito. Samantā yojanasataṃ pharitvā tiṭṭhatīti evaṃ pharitvā tiṭṭhati, yathā samantā yojanasate ṭhatvā olokentassa akkhīni yamakagoḷakā viya nikkhamanti. Kadariyātapanāti sabbepi te ussadehi saddhiṃ aṭṭha mahānirayā kadariyā niccaṃ tapantīti kadariyātapanā. Balavadukkhatāya ghorā. Kappaṭṭhikānaṃ accīnaṃ atthitāya accimanto. Āsādetuṃ ghaṭṭetuṃ dukkaratāya durāsadā. Diṭṭhamattā vā sutamattā vā lomāni haṃsentīti lomahaṃsanarūpā. Bhīsanatāya bhismā. Bhayajananatāya paṭibhayā. Sukhābhāvena dukhā.
புரத்தி²மாய பி⁴த்தியாதிஆதி³கா³தா²னங் ஏவங் அவீசினிரயோதி பரியந்தங் கத்வா அயங் ஸங்கே²பத்தோ² – அக்³கி³ஜாலானங் வா பன ஸத்தானங் வா தேஸங் து³க்க²ஸ்ஸ வா வீசி அந்தரங் நத்தி² எத்தா²தி அவீசி. தத்ர ஹி புரத்தி²மாதீ³ஹி பி⁴த்தீஹி ஜாலாராஸி உட்ட²ஹித்வா பாபகம்மினோ புக்³க³லே ஜா²பெந்தோ பச்சி²மாதீ³ஸு பி⁴த்தீஸு படிஹஞ்ஞதி பஹரதி, தா ச பி⁴த்தியோ வினிவிஜ்ஜி²த்வா பரதோ யோஜனஸதங் க³ண்ஹாதி, ஹெட்டா² உட்டி²தா உபரி படிஹஞ்ஞதி, உபரி உட்டி²தா ஹெட்டா² படிஹஞ்ஞதி. ஏவங் தாவெத்த² ஜாலானங் வீசி நாம நத்தி². தஸ்ஸ பன அந்தோ யோஜனஸதட்டா²னங் கீ²ரவல்லிபிட்ட²ஸ்ஸ பூரிதனாளி விய ஸத்தேஹி நிரந்தரங் பூரிதங் சதூஹி இரியாபதே²ஹி பச்சந்தானங் ஸத்தானங் பமாணங் நத்தி², ந ச அஞ்ஞமஞ்ஞங் ப்³யாபா³தெ⁴ந்தி, ஸகஸகட்டா²னேயேவ பச்சந்தி. ஏவமெத்த² ஸத்தானங் வீசி நாம நத்தி². யதா² பன ஜிவ்ஹக்³கே³ ச² மது⁴பி³ந்தூ³னி ஸத்தமஸ்ஸ தம்ப³லோஹபி³ந்து³னோ அனுத³ஹனப³லவதாய அப்³போ³ஹாரிகானி ஹொந்தி, ததா² தத்த² அனுத³ஹனப³லவதாய ஸேஸா ச² அகுஸலவிபாகுபெக்கா² அப்³போ³ஹாரிகா ஹொந்தி, து³க்க²மேவ நிரந்தரங் பஞ்ஞாயதி. ஏவமெத்த² து³க்க²ஸ்ஸ வீசி நாம நத்தி². நிரஸ்ஸாத³ட்டே²ன நிரயோ.
Puratthimāyabhittiyātiādigāthānaṃ evaṃ avīcinirayoti pariyantaṃ katvā ayaṃ saṅkhepattho – aggijālānaṃ vā pana sattānaṃ vā tesaṃ dukkhassa vā vīci antaraṃ natthi etthāti avīci. Tatra hi puratthimādīhi bhittīhi jālārāsi uṭṭhahitvā pāpakammino puggale jhāpento pacchimādīsu bhittīsu paṭihaññati paharati, tā ca bhittiyo vinivijjhitvā parato yojanasataṃ gaṇhāti, heṭṭhā uṭṭhitā upari paṭihaññati, upari uṭṭhitā heṭṭhā paṭihaññati. Evaṃ tāvettha jālānaṃ vīci nāma natthi. Tassa pana anto yojanasataṭṭhānaṃ khīravallipiṭṭhassa pūritanāḷi viya sattehi nirantaraṃ pūritaṃ catūhi iriyāpathehi paccantānaṃ sattānaṃ pamāṇaṃ natthi, na ca aññamaññaṃ byābādhenti, sakasakaṭṭhāneyeva paccanti. Evamettha sattānaṃ vīci nāma natthi. Yathā pana jivhagge cha madhubindūni sattamassa tambalohabinduno anudahanabalavatāya abbohārikāni honti, tathā tattha anudahanabalavatāya sesā cha akusalavipākupekkhā abbohārikā honti, dukkhameva nirantaraṃ paññāyati. Evamettha dukkhassa vīci nāma natthi. Nirassādaṭṭhena nirayo.
தத்த² ஸத்தா மஹாலுத்³தா³தி தஸ்மிங் நிப்³ப³த்தா ஸத்தா மஹந்தா லுத்³தா³. மஹாகிப்³பி³ஸகாரினோதி மஹந்ததா³ருணகம்மகாரினோ. அச்சந்தபாபகம்மந்தாதி ஏகங்ஸேன பாபகம்மினோ. பச்சந்தி ந ச மிய்யரேதி ச²ன்னங் ஜாலானமந்தரே பச்சந்தி, ந ச மிய்யந்தி. ஜாதவேத³ஸமோ காயோதி தேஸங் ஸரீரங் அக்³கி³ஸதி³ஸங். தேஸங் நிரயவாஸினந்தி தேஸங் பாபகம்மானங் நிரயவாஸீனங். பஸ்ஸ கம்மானங் த³ள்ஹத்தந்தி பாபகம்மானங் தி²ரபா⁴வங் ஓலோகேஹி. ந ப⁴ஸ்மா ஹோதி நபீ மஸீதி சா²ரிகாபி ந ஹோதி அங்கா³ரோபி. புரத்தி²மேனாதி யதா³ தங் த்³வாரங் அபாருதங் ஹோதி, அத² தத³பி⁴முகா² தா⁴வந்தி, தேஸங் தத்த² ச²விஆதீ³னி ஜா²யந்தி. த்³வாரஸமீபங் பத்தானஞ்ச தேஸங் தங் பீதீ⁴யதி, பச்சி²மங் அபாருதங் விய கா²யதி. ஏஸ நயோ ஸப்³ப³த்த². அபி⁴னிக்க²மிதாஸா தேதி நிரயா நிக்க²மிதுங் ஆஸா ஏதேஸந்தி நிக்க²மிதாஸா. மொக்க²க³வேஸினோதி முஞ்சனுபாயங் ஏஸந்தா க³வேஸந்தாபி. ந தே ததோ நிக்க²மிதுங், லப⁴ந்தி கம்மபச்சயாதி தே ஸத்தா நிரயதோ நிக்க²மனத்³வாரங் பாபகம்மபச்சயா நாதி⁴க³ச்ச²ந்தி. தேஸஞ்ச பாபகம்மந்தங், அவிபக்கங் கதங் ப³ஹுந்தி தேஸஞ்ச ஸத்தானங் லாமகங் தா³ருணகம்மங் அவிபாகங் ப³ஹுவித⁴ங் நானப்பகாரங் அதி³ன்னவிபாகங் கதங் உபசிதங் அத்தி².
Tattha sattā mahāluddāti tasmiṃ nibbattā sattā mahantā luddā. Mahākibbisakārinoti mahantadāruṇakammakārino. Accantapāpakammantāti ekaṃsena pāpakammino. Paccanti na ca miyyareti channaṃ jālānamantare paccanti, na ca miyyanti. Jātavedasamo kāyoti tesaṃ sarīraṃ aggisadisaṃ. Tesaṃ nirayavāsinanti tesaṃ pāpakammānaṃ nirayavāsīnaṃ. Passa kammānaṃ daḷhattanti pāpakammānaṃ thirabhāvaṃ olokehi. Na bhasmā hoti napī masīti chārikāpi na hoti aṅgāropi. Puratthimenāti yadā taṃ dvāraṃ apārutaṃ hoti, atha tadabhimukhā dhāvanti, tesaṃ tattha chaviādīni jhāyanti. Dvārasamīpaṃ pattānañca tesaṃ taṃ pīdhīyati, pacchimaṃ apārutaṃ viya khāyati. Esa nayo sabbattha. Abhinikkhamitāsā teti nirayā nikkhamituṃ āsā etesanti nikkhamitāsā. Mokkhagavesinoti muñcanupāyaṃ esantā gavesantāpi. Na te tato nikkhamituṃ, labhanti kammapaccayāti te sattā nirayato nikkhamanadvāraṃ pāpakammapaccayā nādhigacchanti. Tesañca pāpakammantaṃ, avipakkaṃ kataṃ bahunti tesañca sattānaṃ lāmakaṃ dāruṇakammaṃ avipākaṃ bahuvidhaṃ nānappakāraṃ adinnavipākaṃ kataṃ upacitaṃ atthi.
ஸங்வேக³ந்தி வினிலனங். உப்³பே³க³ந்தி டி²தட்டா²னதோ க³மனங். உத்ராஸந்தி உப்³பே³ஜனங் அஸன்னிட்டா²னங். ப⁴யந்தி சித்துத்ராஸனங். பீளனந்தி க⁴ட்டனங். க⁴ட்டனந்தி பீளாகரணங். உபத்³த³வந்தி ஈதிங். உபஸக்³க³ந்தி ருந்த⁴னங்.
Saṃveganti vinilanaṃ. Ubbeganti ṭhitaṭṭhānato gamanaṃ. Utrāsanti ubbejanaṃ asanniṭṭhānaṃ. Bhayanti cittutrāsanaṃ. Pīḷananti ghaṭṭanaṃ. Ghaṭṭananti pīḷākaraṇaṃ. Upaddavanti ītiṃ. Upasagganti rundhanaṃ.
171. இதா³னி யதா²னேன ஸங்விஜிதங், தங் பகாரங் த³ஸ்ஸெந்தோ ‘‘ப²ந்த³மான’’ந்திஆதி³மாஹ. தத்த² ப²ந்த³மானந்தி தண்ஹாதி³ட்டீ²ஹி கம்பமானங். அப்போத³கேதி அப்பே உத³கே. அஞ்ஞமஞ்ஞேஹி ப்³யாருத்³தே⁴ தி³ஸ்வாதி நானாஸத்தே ச அஞ்ஞமஞ்ஞேஹி ஸத்³தி⁴ங் விருத்³தே⁴ தி³ஸ்வா. மங் ப⁴யமாவிஸீதி மங் ப⁴யங் பவிட்ட²ங்.
171. Idāni yathānena saṃvijitaṃ, taṃ pakāraṃ dassento ‘‘phandamāna’’ntiādimāha. Tattha phandamānanti taṇhādiṭṭhīhi kampamānaṃ. Appodaketi appe udake. Aññamaññehi byāruddhedisvāti nānāsatte ca aññamaññehi saddhiṃ viruddhe disvā. Maṃ bhayamāvisīti maṃ bhayaṃ paviṭṭhaṃ.
கிலேஸப²ந்த³னாய ப²ந்த³மானந்தி ராகா³தி³கிலேஸசலனாய சலமானங். பயோகோ³தி காயவசீமனோபயோகோ³.
Kilesaphandanāya phandamānanti rāgādikilesacalanāya calamānaṃ. Payogoti kāyavacīmanopayogo.
விருத்³தா⁴தி விரோத⁴மாபன்னா. படிவிருத்³தா⁴தி படிமுக²ங் ஹுத்வா விரோத⁴மாபன்னா, ஸுட்டு² விருத்³தா⁴ வா. ஆஹதாதி கோதே⁴ன ஆஹதா பஹதா. பச்சாஹதாதி படிமல்லா ஹுத்வா ஆஹதா. ஆகா⁴திதாதி க⁴ட்டிதா. பச்சாகா⁴திதாதி விஸேஸேன க⁴ட்டிதா. பாணீஹிபி உபக்கமந்தீதி ஹத்தே²ஹிபி பஹரந்தி.
Viruddhāti virodhamāpannā. Paṭiviruddhāti paṭimukhaṃ hutvā virodhamāpannā, suṭṭhu viruddhā vā. Āhatāti kodhena āhatā pahatā. Paccāhatāti paṭimallā hutvā āhatā. Āghātitāti ghaṭṭitā. Paccāghātitāti visesena ghaṭṭitā. Pāṇīhipi upakkamantīti hatthehipi paharanti.
172. ஸமந்தமஸாரோ லோகோதி நிரயங் ஆதி³ங் கத்வா ஸமந்ததோ லோகோ அஸாரோ நிச்சஸாராதி³ரஹிதோ. தி³ஸா ஸப்³பா³ ஸமேரிதாதி ஸப்³பா³ தி³ஸா அனிச்சதாய கம்பிதா. இச்ச²ங் ப⁴வனமத்தனோதி அத்தனோ தாணங் இச்ச²ந்தோ. நாத்³த³ஸாஸிங் அனோஸிதந்தி கிஞ்சி டா²னங் ஜராதீ³ஹி அனஜ்ஜா²வுட்ட²ங் நாத்³த³க்கி²ந்தி.
172.Samantamasāro lokoti nirayaṃ ādiṃ katvā samantato loko asāro niccasārādirahito. Disā sabbā sameritāti sabbā disā aniccatāya kampitā. Icchaṃ bhavanamattanoti attano tāṇaṃ icchanto. Nāddasāsiṃ anositanti kiñci ṭhānaṃ jarādīhi anajjhāvuṭṭhaṃ nāddakkhinti.
அஸாரோதி ந ஸாரோ, ஸாரவிரஹிதோ வா. நிஸ்ஸாரோதி ஸப்³பே³ன ஸப்³ப³ங் ஸாரவிரஹிதோ. ஸாராபக³தோதி ஸாரதோ அபக³தோ. நிச்சஸாரஸாரேன வாதி ஸததஸாரஸங்கா²தேன ஸாரேன வா. உபரிபத³த்³வயேபி ஏஸேவ நயோ. யே புரத்தி²மாய தி³ஸாய ஸங்கா²ராதி யே புரத்தி²மாய தி³ஸாய பச்சயேஹி ஸங்க³ம்ம ஸமாக³ம்ம கதா ஸங்கா²ரா. தேபி ஏரிதாதி தேபி ஸங்கா²ரா கம்பிதா. ஸமேரிதாதி ஸம்மா கம்பிதா. சலிதாதி சலனங் க³தா. க⁴ட்டிதாதி உத³யப்³ப³யேன பீளிதா. அனிச்சதாயாதி ஹுத்வா அபா⁴வதாய. ஜாதியா அனுக³தாதி நிப்³ப³த்தியா அனுபவிட்டா². ஜராய அனுஸடாதி பரிபக்கதாய அனுபத்த²டா. ப்³யாதி⁴னா அபி⁴பூ⁴தாதி சாதுவிஸமேன உப்பன்னப்³யாதி⁴னா அஜ்ஜொ²த்த²டா. மரணேன அப்³பா⁴ஹதாதி மச்சுனா அபி⁴ஆஹதா பஹதா. அதாணாதி ரக்க²விரஹிதா. அலேணாதி லேணவிரஹிதா. அஸரணாதி நத்தி² ஏதேஸங் ஸரணந்தி அஸரணா. அஸரணீபூ⁴தாதி ஸயங் ஸரணகிச்சங் ந கரொந்தீதி அஸரணீபூ⁴தா.
Asāroti na sāro, sāravirahito vā. Nissāroti sabbena sabbaṃ sāravirahito. Sārāpagatoti sārato apagato. Niccasārasārena vāti satatasārasaṅkhātena sārena vā. Uparipadadvayepi eseva nayo. Ye puratthimāya disāya saṅkhārāti ye puratthimāya disāya paccayehi saṅgamma samāgamma katā saṅkhārā. Tepi eritāti tepi saṅkhārā kampitā. Sameritāti sammā kampitā. Calitāti calanaṃ gatā. Ghaṭṭitāti udayabbayena pīḷitā. Aniccatāyāti hutvā abhāvatāya. Jātiyā anugatāti nibbattiyā anupaviṭṭhā. Jarāya anusaṭāti paripakkatāya anupatthaṭā. Byādhinā abhibhūtāti cātuvisamena uppannabyādhinā ajjhotthaṭā. Maraṇena abbhāhatāti maccunā abhiāhatā pahatā. Atāṇāti rakkhavirahitā. Aleṇāti leṇavirahitā. Asaraṇāti natthi etesaṃ saraṇanti asaraṇā. Asaraṇībhūtāti sayaṃ saraṇakiccaṃ na karontīti asaraṇībhūtā.
அத்தனோ ப⁴வனந்தி நித்³தே³ஸபத³ஸ்ஸ உத்³தே³ஸபத³ங். தாணந்தி பாலனங். லேணந்தி லேணட்டா²னங். ஸரணந்தி து³க்க²னாஸனங். க³திந்தி பதிட்ட²ங். பராயனந்தி பரங் அயனங். அஜ்ஜோ²ஸிதங்யேவ அத்³த³ஸந்தி ஜராதீ³ஹி மத்³தி³தங்யேவ அத்³த³க்கி²ங். ஸப்³ப³ங் யொப்³ப³ஞ்ஞந்தி யொப்³ப³னபா⁴வோ யொப்³ப³ஞ்ஞங், ஸசேதனானங் ஸப்³ப³ங் யொப்³ப³ஞ்ஞங். ஜராய ஓஸிதந்தி பரிபாகாய ஜராய அவஸிதங் மத்³தி³தங். ஏவங் ஸப்³ப³த்த².
Attano bhavananti niddesapadassa uddesapadaṃ. Tāṇanti pālanaṃ. Leṇanti leṇaṭṭhānaṃ. Saraṇanti dukkhanāsanaṃ. Gatinti patiṭṭhaṃ. Parāyananti paraṃ ayanaṃ. Ajjhositaṃyevaaddasanti jarādīhi madditaṃyeva addakkhiṃ. Sabbaṃ yobbaññanti yobbanabhāvo yobbaññaṃ, sacetanānaṃ sabbaṃ yobbaññaṃ. Jarāya ositanti paripākāya jarāya avasitaṃ madditaṃ. Evaṃ sabbattha.
173. ஓஸானே த்வேவ ப்³யாருத்³தே⁴, தி³ஸ்வா மே அரதீ அஹூதி யொப்³ப³ஞ்ஞாதீ³னங் ஓஸானேயேவ அந்தக³மகே ஏவ வினாஸகே ஏவ ஜராதீ³ஹி ப்³யாருத்³தே⁴ ஆஹதசித்தே ஸத்தே தி³ஸ்வா அரதி மே அஹோஸி. அதெ²த்த² ஸல்லந்தி அத² ஏதேஸு ஸத்தேஸு ராகா³தி³ஸல்லங். ஹத³யஸ்ஸிதந்தி சித்தனிஸ்ஸிதங்.
173.Osāne tveva byāruddhe, disvā me aratī ahūti yobbaññādīnaṃ osāneyeva antagamake eva vināsake eva jarādīhi byāruddhe āhatacitte satte disvā arati me ahosi. Athettha sallanti atha etesu sattesu rāgādisallaṃ. Hadayassitanti cittanissitaṃ.
யொப்³ப³ஞ்ஞங் ஜரா ஓஸாபேதீதி ஜரா அத்த²ங்க³மேதி வினாஸேதி. ஏவங் ஸப்³ப³த்த².
Yobbaññaṃ jarā osāpetīti jarā atthaṅgameti vināseti. Evaṃ sabbattha.
174. ‘‘கத²ங் ஆனுபா⁴வங் ஸல்ல’’ந்தி சே? யேன ஸல்லேன ஓதிண்ணோதி கா³தா². தத்த² தி³ஸா ஸப்³பா³ விதா⁴வதீதி ஸப்³பா³ து³ச்சரிததி³ஸாபி புரத்தி²மாதி³தி³ஸாபி விதி³ஸாபி தா⁴வதி. தமேவ ஸல்லமப்³பு³ய்ஹ, ந தா⁴வதி ந ஸீத³தீதி தமேவ ஸல்லங் உத்³த⁴ரித்வா தா ச தி³ஸா ந தா⁴வதி, சதுரோகே⁴ ச ந ஸீத³தி.
174. ‘‘Kathaṃ ānubhāvaṃ salla’’nti ce? Yena sallena otiṇṇoti gāthā. Tattha disā sabbā vidhāvatīti sabbā duccaritadisāpi puratthimādidisāpi vidisāpi dhāvati. Tameva sallamabbuyha, na dhāvati na sīdatīti tameva sallaṃ uddharitvā tā ca disā na dhāvati, caturoghe ca na sīdati.
அஞ்ஞாணந்திஆதீ³ஸு ஞாணத³ஸ்ஸனபடிபக்க²தோ அஞ்ஞாணங் அத³ஸ்ஸனங். அபி⁴முகோ² ஹுத்வா த⁴ம்மேன ந ஸமேதி ந ஸமாக³ச்ச²தீதி அனபி⁴ஸமயோ. அனுரூபதோ த⁴ம்மே பு³ஜ்ஜ²தீதி அனுபோ³தோ⁴. தப்படிபக்க²தாய அனநுபோ³தோ⁴. அனிச்சாதீ³ஹி ஸத்³தி⁴ங் யோஜெத்வா ந பு³ஜ்ஜ²தீதி அஸம்போ³தோ⁴. அஸந்தங் அஸமஞ்ச பு³ஜ்ஜ²தீதிபி அஸம்போ³தோ⁴. சதுஸச்சத⁴ம்மங் ந படிவிஜ்ஜ²தீதி அப்படிவேதோ⁴. ரூபாதீ³ஸு ஏகத⁴ம்மம்பி அனிச்சாதி³ஸாமஞ்ஞதோ ந ஸங்க³ண்ஹாதீதி அஸங்கா³ஹணா. தமேவ த⁴ம்மங் ந பரியோகா³ஹதீதி அபரியோகா³ஹணா. ந ஸமங் பெக்க²தீதி அஸமபெக்க²னா. த⁴ம்மானங் ஸபா⁴வங் பதி ந அபெக்க²தீதி அபச்சவெக்க²ணா.
Aññāṇantiādīsu ñāṇadassanapaṭipakkhato aññāṇaṃ adassanaṃ. Abhimukho hutvā dhammena na sameti na samāgacchatīti anabhisamayo. Anurūpato dhamme bujjhatīti anubodho. Tappaṭipakkhatāya ananubodho. Aniccādīhi saddhiṃ yojetvā na bujjhatīti asambodho. Asantaṃ asamañca bujjhatītipi asambodho. Catusaccadhammaṃ na paṭivijjhatīti appaṭivedho. Rūpādīsu ekadhammampi aniccādisāmaññato na saṅgaṇhātīti asaṅgāhaṇā. Tameva dhammaṃ na pariyogāhatīti apariyogāhaṇā. Na samaṃ pekkhatīti asamapekkhanā. Dhammānaṃ sabhāvaṃ pati na apekkhatīti apaccavekkhaṇā.
குஸலாகுஸலகம்மேஸு விபரீதவுத்தியா ஸபா⁴வக³ஹணாபா⁴வேன வா ஏகம்பி கம்மங் ஏதஸ்ஸ பச்சக்க²ங் நத்தி², ஸயங் வா கஸ்ஸசி த⁴ம்மஸ்ஸ பச்சக்க²கரணங் நாம ந ஹோதீதி அபச்சக்க²கம்மங். யங் ஏதஸ்மிங் அனுப்பஜ்ஜமானே சித்தஸந்தானங் மெஜ்ஜ²ங் ப⁴வெய்ய ஸுசி வோதா³னங், தங் து³ட்டு²ங் மெஜ்ஜ²ங் இமினாதி து³ம்மெஜ்ஜ²ங். பா³லானங் பா⁴வோ பா³ல்யங். முய்ஹதீதி மோஹோ. ப³லவதரோ மோஹோ பமோஹோ. ஸமந்ததோ முய்ஹதீதி ஸம்மோஹோ. விஜ்ஜாய படிபக்க²பா⁴வதோ ந விஜ்ஜாதி அவிஜ்ஜா. ஓக⁴யோக³த்தோ² வுத்தோயேவ. தா²மக³தட்டே²ன அனுஸேதீதி அனுஸயோ. சித்தங் பரியுட்டா²தி அபி⁴ப⁴வதீதி பரியுட்டா²னங். ஹிதக்³க³ஹணாபா⁴வேன ஹிதாபி⁴முக²ங் க³ந்துங் ந ஸக்கோதி அஞ்ஞத³த்து² லங்க³தியேவாதி லங்கீ³, க²ஞ்ஜதீதி அத்தோ². து³ருக்³கா⁴டனட்டே²ன வா லங்கீ³. யதா² ஹி மஹாபலிக⁴ஸங்கா²தா லங்கீ³ து³ருக்³கா⁴டா ஹோதி, ஏவமயம்பி லங்கீ³ வியாதி லங்கீ³. ஸேஸங் உத்தானத்த²மேவ.
Kusalākusalakammesu viparītavuttiyā sabhāvagahaṇābhāvena vā ekampi kammaṃ etassa paccakkhaṃ natthi, sayaṃ vā kassaci dhammassa paccakkhakaraṇaṃ nāma na hotīti apaccakkhakammaṃ. Yaṃ etasmiṃ anuppajjamāne cittasantānaṃ mejjhaṃ bhaveyya suci vodānaṃ, taṃ duṭṭhuṃ mejjhaṃ imināti dummejjhaṃ. Bālānaṃ bhāvo bālyaṃ. Muyhatīti moho. Balavataro moho pamoho. Samantato muyhatīti sammoho. Vijjāya paṭipakkhabhāvato na vijjāti avijjā. Oghayogattho vuttoyeva. Thāmagataṭṭhena anusetīti anusayo. Cittaṃ pariyuṭṭhāti abhibhavatīti pariyuṭṭhānaṃ. Hitaggahaṇābhāvena hitābhimukhaṃ gantuṃ na sakkoti aññadatthu laṅgatiyevāti laṅgī, khañjatīti attho. Durugghāṭanaṭṭhena vā laṅgī. Yathā hi mahāpalighasaṅkhātā laṅgī durugghāṭā hoti, evamayampi laṅgī viyāti laṅgī. Sesaṃ uttānatthameva.
யா ஏவரூபா கங்கா²தி எத்த² கங்க²னவஸேன கங்கா². கங்க²ங் ஆனயதீதி கங்கா²யனா. புரிமகங்கா² ஹி உத்தரகங்க²ங் ஆனயதி நாம. ஆகாரவஸேன வா ஏதங் வுத்தங். கங்கா²ஸமங்கி³சித்தங் கங்கா²ய ஆயிதத்தா கங்கா²யிதங் நாம. தஸ்ஸ பா⁴வோ கங்கா²யிதத்தங். விமதீதி விக³தா மதி விமதி. விசிகிச்சா²தி விக³தா சிகிச்சா² விசிகிச்சா², ஸபா⁴வங் வா விசினந்தோ கிச்ச²தி கிலமதி ஏதாயாதி விசிகிச்சா². ஸா ஸங்ஸயலக்க²ணா, கம்பனரஸா, அனிச்ச²யபச்சுபட்டா²னா, அனேகங்ஸக்³கா³ஹபச்சுபட்டா²னா வா, அயோனிஸோமனஸிகாரபத³ட்டா²னா, படிபத்தியா அந்தராயகராதி த³ட்ட²ப்³பா³.
Yāevarūpā kaṅkhāti ettha kaṅkhanavasena kaṅkhā. Kaṅkhaṃ ānayatīti kaṅkhāyanā. Purimakaṅkhā hi uttarakaṅkhaṃ ānayati nāma. Ākāravasena vā etaṃ vuttaṃ. Kaṅkhāsamaṅgicittaṃ kaṅkhāya āyitattā kaṅkhāyitaṃ nāma. Tassa bhāvo kaṅkhāyitattaṃ. Vimatīti vigatā mati vimati. Vicikicchāti vigatā cikicchā vicikicchā, sabhāvaṃ vā vicinanto kicchati kilamati etāyāti vicikicchā. Sā saṃsayalakkhaṇā, kampanarasā, anicchayapaccupaṭṭhānā, anekaṃsaggāhapaccupaṭṭhānā vā, ayonisomanasikārapadaṭṭhānā, paṭipattiyā antarāyakarāti daṭṭhabbā.
கம்பனட்டே²ன த்³விதா⁴ ஏளயதீதி த்³வெள்ஹகங். படிபத்தினிவாரணேன த்³விதா⁴பதோ² வியாதி த்³வேதா⁴பதோ². ‘‘நிச்சங் வா இத³ங் அனிச்சங் வா’’திஆதி³பவத்தியா ஏகஸ்மிங் ஆகாரே ஸண்டா²துங் அஸமத்த²தாய ஸமந்ததோ ஸேதீதி ஸங்ஸயோ. ஏகங்ஸங் க³ஹேதுங் அஸமத்த²தாய ந ஏகங்ஸக்³கா³ஹோதி அனேகங்ஸக்³கா³ஹோ. நிச்சே²துங் அஸக்கொந்தீ ஆரம்மணதோ ஓஸக்கதீதி ஆஸப்பனா. ஓகா³ஹிதுங் அஸக்கொந்தீ பரிஸமந்ததோ ஸப்பதீதி பரிஸப்பனா. பரியோகா³ஹிதுங் அஸமத்த²தாய அபரியோகா³ஹணா. நிச்ச²யவஸேன ஆரம்மணே பவத்திதுங் அஸமத்த²தாய ச²ம்பி⁴தத்தங் சித்தஸ்ஸ, த²த்³த⁴பா⁴வோதி அத்தோ². விசிகிச்சா² ஹி உப்பஜ்ஜித்வா சித்தங் த²த்³த⁴ங் கரோதி, யஸ்மா பன ஸா உப்பஜ்ஜமானா ஆரம்மணங் க³ஹெத்வா மனங் விலிக²ந்தீ விய, தஸ்மா மனோவிலேகோ²தி வுத்தா.
Kampanaṭṭhena dvidhā eḷayatīti dveḷhakaṃ. Paṭipattinivāraṇena dvidhāpatho viyāti dvedhāpatho. ‘‘Niccaṃ vā idaṃ aniccaṃ vā’’tiādipavattiyā ekasmiṃ ākāre saṇṭhātuṃ asamatthatāya samantato setīti saṃsayo. Ekaṃsaṃ gahetuṃ asamatthatāya na ekaṃsaggāhoti anekaṃsaggāho. Nicchetuṃ asakkontī ārammaṇato osakkatīti āsappanā. Ogāhituṃ asakkontī parisamantato sappatīti parisappanā. Pariyogāhituṃ asamatthatāya apariyogāhaṇā. Nicchayavasena ārammaṇe pavattituṃ asamatthatāya chambhitattaṃ cittassa, thaddhabhāvoti attho. Vicikicchā hi uppajjitvā cittaṃ thaddhaṃ karoti, yasmā pana sā uppajjamānā ārammaṇaṃ gahetvā manaṃ vilikhantī viya, tasmā manovilekhoti vuttā.
வித்³தோ⁴தி ஸல்லேன லத்³த⁴ப்பஹாரோ. பு²ட்டோ²தி க⁴ட்டிதோ. பரேதோதி பீளிதோ. தா⁴வதீதி புரதோ க³ச்ச²தி. விதா⁴வதீதி அனேகவிதே⁴ன க³ச்ச²தி. ஸந்தா⁴வதீதி வேகே³ன தா⁴வதி. ஸங்ஸரதீதி இதோ சிதோ ச சரதி.
Viddhoti sallena laddhappahāro. Phuṭṭhoti ghaṭṭito. Paretoti pīḷito. Dhāvatīti purato gacchati. Vidhāvatīti anekavidhena gacchati. Sandhāvatīti vegena dhāvati. Saṃsaratīti ito cito ca carati.
அசேலகோதி நிச்சோலோ, நக்³கோ³தி அத்தோ². முத்தாசாரோதி விஸட்டா²சாரோ, உச்சாரகம்மாதீ³ஸு லோகியகுலபுத்தாசாரேன விரஹிதோ டி²தகோவ உச்சாரங் கரோதி, பஸ்ஸாவங் கரோதி, கா²த³தி பு⁴ஞ்ஜதி. ஹத்தா²பலேக²னோதி ஹத்தே² பிண்ட³ம்ஹி டி²தே ஜிவ்ஹாய ஹத்த²ங் அபலிக²தி, உச்சாரங் வா கத்வா ஹத்த²ம்ஹியேவ த³ண்ட³கஸஞ்ஞீ ஹுத்வா ஹத்தே²ன அபலிக²தி. தே கிர த³ண்ட³கங் ‘‘ஸத்தோ’’தி பஞ்ஞபெந்தி. பி⁴க்கா²க³ஹணத்த²ங் ‘‘ஏஹி ப⁴த³ந்தே’’தி வுத்தோ ந ஏதீதி ந ஏஹிப⁴த³ந்திகோ. தேன ஹி ‘‘திட்ட² ப⁴த³ந்தே’’தி வுத்தோபி ந திட்ட²தீதி ந திட்ட²ப⁴த³ந்திகோ. தது³ப⁴யம்பி கிர ஸோ ‘‘ஏதஸ்ஸ வசனங் கதங் ப⁴விஸ்ஸதீ’’தி ந கரோதி.
Acelakoti niccolo, naggoti attho. Muttācāroti visaṭṭhācāro, uccārakammādīsu lokiyakulaputtācārena virahito ṭhitakova uccāraṃ karoti, passāvaṃ karoti, khādati bhuñjati. Hatthāpalekhanoti hatthe piṇḍamhi ṭhite jivhāya hatthaṃ apalikhati, uccāraṃ vā katvā hatthamhiyeva daṇḍakasaññī hutvā hatthena apalikhati. Te kira daṇḍakaṃ ‘‘satto’’ti paññapenti. Bhikkhāgahaṇatthaṃ ‘‘ehi bhadante’’ti vutto na etīti na ehibhadantiko. Tena hi ‘‘tiṭṭha bhadante’’ti vuttopi na tiṭṭhatīti na tiṭṭhabhadantiko. Tadubhayampi kira so ‘‘etassa vacanaṃ kataṃ bhavissatī’’ti na karoti.
அபி⁴ஹடந்தி புரேதரங் க³ஹெத்வா ஆஹடங் பி⁴க்க²ங். உத்³தி³ஸ்ஸகதந்தி ‘‘இத³ங் தும்ஹே உத்³தி³ஸ்ஸ கத’’ந்தி ஏவங் ஆரோசிதங் பி⁴க்க²ங். ந நிமந்தனந்தி ‘‘அஸுகங் நாம குலங் வா வீதி²ங் வா கா³மங் வா பவிஸெய்யாதா²’’தி ஏவங் நிமந்திதபி⁴க்க²ம்பி ந ஸாதி³யதி ந க³ண்ஹாதி. ந கும்பி⁴முகா²தி கும்பி⁴தோ உத்³த⁴ரித்வா தி³ய்யமானங் பி⁴க்க²ங் ந க³ண்ஹாதி. ந களோபிமுகா²தி களோபீதி உக்க²லி வா பச்சி² வா, ததோபி ந க³ண்ஹாதி. கஸ்மா? கும்பி⁴களோபியோ மங் நிஸ்ஸாய கடச்சு²னா பஹாரங் லப⁴ந்தீதி. ந ஏளகமந்தரந்தி உம்மாரங் அந்தரங் கரித்வா தி³ய்யமானங் ந க³ண்ஹாதி. கஸ்மா? அயங் மங் நிஸ்ஸாய அந்தரகரணங் லப⁴தீதி. த³ண்ட³முஸலேஸுபி ஏஸேவ நயோ.
Abhihaṭanti puretaraṃ gahetvā āhaṭaṃ bhikkhaṃ. Uddissakatanti ‘‘idaṃ tumhe uddissa kata’’nti evaṃ ārocitaṃ bhikkhaṃ. Na nimantananti ‘‘asukaṃ nāma kulaṃ vā vīthiṃ vā gāmaṃ vā paviseyyāthā’’ti evaṃ nimantitabhikkhampi na sādiyati na gaṇhāti. Na kumbhimukhāti kumbhito uddharitvā diyyamānaṃ bhikkhaṃ na gaṇhāti. Na kaḷopimukhāti kaḷopīti ukkhali vā pacchi vā, tatopi na gaṇhāti. Kasmā? Kumbhikaḷopiyo maṃ nissāya kaṭacchunā pahāraṃ labhantīti. Na eḷakamantaranti ummāraṃ antaraṃ karitvā diyyamānaṃ na gaṇhāti. Kasmā? Ayaṃ maṃ nissāya antarakaraṇaṃ labhatīti. Daṇḍamusalesupi eseva nayo.
ந த்³வின்னந்தி த்³வீஸு பு⁴ஞ்ஜமானேஸு ஏகஸ்மிங் உட்டா²ய தெ³ந்தே ந க³ண்ஹாதி. கஸ்மா? கப³ளந்தராயோ ஹோதீதி. ந க³ப்³பி⁴னியாதிஆதீ³ஸு பன ‘‘க³ப்³பி⁴னியா குச்சி²யங் தா³ரகோ கிலமதீ’’தி, பாயந்தியா தா³ரகஸ்ஸ கீ²ரந்தராயோ ஹோதீ’’தி, ‘‘புரிஸந்தரக³தாய ரதிஅந்தராயோ ஹோதீ’’தி ந க³ண்ஹாதி. ந ஸங்கித்தீஸூதி ஸங்கித்தெத்வா கதப⁴த்தேஸு. து³ப்³பி⁴க்க²ஸமயே கிர அசேலகஸாவகா அசேலகானமத்தா²ய ததோ ததோ தண்டு³லாதீ³னி ஸமாத³பெத்வா ப⁴த்தங் பசந்தி, உக்கட்டோ² அசேலகோ ததோபி ந படிக்³க³ண்ஹாதி. ந யத்த² ஸாதி யத்த² ஸுனகோ² ‘‘பிண்ட³ங் லபி⁴ஸ்ஸாமீ’’தி உபட்டி²தோ ஹோதி, தத்த² தஸ்ஸ அத³த்வா ஆஹடங் ந க³ண்ஹாதி. கஸ்மா? ஏதஸ்ஸ பிண்ட³ந்தராயோ ஹோதீதி. ஸண்ட³ஸண்ட³சாரினீதி ஸமூஹஸமூஹசாரினீ . ஸசே ஹி அசேலகங் தி³ஸ்வா ‘‘இமஸ்ஸ பி⁴க்க²ங் த³ஸ்ஸாமா’’தி மனுஸ்ஸா ப⁴த்தகே³ஹங் பவிஸந்தி, தேஸு ச பவிஸந்தேஸு களோபிமுகா²தீ³ஸு நிலீனா மக்கி²கா உப்பதித்வா ஸண்ட³ஸண்டா³ சரந்தி. ததோ ஆஹடங் பி⁴க்க²ங் ந க³ண்ஹாதி. கஸ்மா? மங் நிஸ்ஸாய மக்கி²கானங் கோ³சரந்தராயோ ஜாதோதி. து²ஸோத³கந்தி ஸப்³ப³ஸஸ்ஸஸம்பா⁴ரேஹி கதங் ஸோவீரகங். எத்த² ச ஸுராபானமேவ ஸாவஜ்ஜங், அயங் பன ஸப்³பே³ஸுபி ஸாவஜ்ஜஸஞ்ஞீ.
Na dvinnanti dvīsu bhuñjamānesu ekasmiṃ uṭṭhāya dente na gaṇhāti. Kasmā? Kabaḷantarāyo hotīti. Na gabbhiniyātiādīsu pana ‘‘gabbhiniyā kucchiyaṃ dārako kilamatī’’ti, pāyantiyā dārakassa khīrantarāyo hotī’’ti, ‘‘purisantaragatāya ratiantarāyo hotī’’ti na gaṇhāti. Na saṃkittīsūti saṃkittetvā katabhattesu. Dubbhikkhasamaye kira acelakasāvakā acelakānamatthāya tato tato taṇḍulādīni samādapetvā bhattaṃ pacanti, ukkaṭṭho acelako tatopi na paṭiggaṇhāti. Na yattha sāti yattha sunakho ‘‘piṇḍaṃ labhissāmī’’ti upaṭṭhito hoti, tattha tassa adatvā āhaṭaṃ na gaṇhāti. Kasmā? Etassa piṇḍantarāyo hotīti. Saṇḍasaṇḍacārinīti samūhasamūhacārinī . Sace hi acelakaṃ disvā ‘‘imassa bhikkhaṃ dassāmā’’ti manussā bhattagehaṃ pavisanti, tesu ca pavisantesu kaḷopimukhādīsu nilīnā makkhikā uppatitvā saṇḍasaṇḍā caranti. Tato āhaṭaṃ bhikkhaṃ na gaṇhāti. Kasmā? Maṃ nissāya makkhikānaṃ gocarantarāyo jātoti. Thusodakanti sabbasassasambhārehi kataṃ sovīrakaṃ. Ettha ca surāpānameva sāvajjaṃ, ayaṃ pana sabbesupi sāvajjasaññī.
ஏகாகா³ரிகோதி யோ ஏகஸ்மிங்யேவ கே³ஹே பி⁴க்க²ங் லபி⁴த்வா நிவத்ததி. ஏகாலோபிகோதி யோ ஏகேனேவ ஆலோபேன யாபேதி. த்³வாகா³ரிகாதீ³ஸுபி ஏஸேவ நயோ. ஏகிஸ்ஸாபி த³த்தியாதி ஏகாய த³த்தியா. த³த்தி நாம ஏகா கு²த்³த³கபாதி ஹோதி, யத்த² அக்³க³பி⁴க்க²ங் பக்கி²பித்வா ட²பெந்தி. ஏகாஹிகந்தி ஏகதி³வஸந்தரிகங். அட்³ட⁴மாஸிகந்தி அட்³ட⁴மாஸந்தரிகங். பரியாயப⁴த்தபோ⁴ஜனந்தி வாரப⁴த்தபோ⁴ஜனங் , ஏகாஹவாரேன த்³வீஹவாரேன ஸத்தாஹவாரேன அட்³ட⁴மாஸவாரேனாதி ஏவங் தி³வஸவாரேன ஆப⁴தங் ப⁴த்தபோ⁴ஜனங்.
Ekāgārikoti yo ekasmiṃyeva gehe bhikkhaṃ labhitvā nivattati. Ekālopikoti yo ekeneva ālopena yāpeti. Dvāgārikādīsupi eseva nayo. Ekissāpi dattiyāti ekāya dattiyā. Datti nāma ekā khuddakapāti hoti, yattha aggabhikkhaṃ pakkhipitvā ṭhapenti. Ekāhikanti ekadivasantarikaṃ. Aḍḍhamāsikanti aḍḍhamāsantarikaṃ. Pariyāyabhattabhojananti vārabhattabhojanaṃ , ekāhavārena dvīhavārena sattāhavārena aḍḍhamāsavārenāti evaṃ divasavārena ābhataṃ bhattabhojanaṃ.
ஸாகப⁴க்கோ²திஆதீ³னி வுத்தத்தா²னேவ. உப்³ப⁴ட்ட²கோதி உத்³த⁴ங் டி²தகோ. உக்குடிகப்பதா⁴னமனுயுத்தோதி உக்குடிகங் வீரியங் அனுயுத்தோ. க³ச்ச²ந்தோபி உக்குடிகோவ ஹுத்வா உப்பதித்வா உப்பதித்வா க³ச்ச²தி. கண்டகாபஸ்ஸயிகோதி அயகண்டகே வா பகதிகண்டகே வா பூ⁴மியங் கொட்டெத்வா தத்த² சம்மங் அத்த²ரித்வா டா²னசங்கமாதீ³னி கரோதி. ஸெய்யந்தி ஸயந்தோபி தத்தே²வ ஸெய்யங் கப்பேதி. ப²லகஸெய்யந்தி ருக்க²ப²லகே ஸெய்யங். த²ண்டி³லஸெய்யந்தி த²ண்டி³லே உச்சே பூ⁴மிட்டா²னே ஸெய்யங். ஏகபஸ்ஸயிகோதி ஏகபஸ்ஸேனேவ ஸயதி. ரஜோஜல்லத⁴ரோதி ஸரீரங் தேலேன மக்கெ²த்வா ரஜுட்டா²னட்டா²னே திட்ட²தி, அத²ஸ்ஸ ஸரீரே ரஜோஜல்லங் லக்³க³தி, தங் தா⁴ரேதி. யதா²ஸந்த²திகோதி லத்³த⁴ங் ஆஸனங் அகோபெத்வா யதே³வ லப⁴தி, தத்தே²வ நிஸீத³னஸீலோ. வேகடிகோதி விகடகா²த³னஸீலோ, விகடந்தி கூ³த²ங் வுச்சதி. அபானகோதி படிக்கி²த்தஸீதுத³கபானோ. ஸாயங் ததியங் அஸ்ஸாதி ஸாயததியகங். பாதோ மஜ்ஜ²ன்ஹிகே ஸாயந்தி தி³வஸஸ்ஸ திக்க²த்துங் ‘‘பாபங் பவாஹெஸ்ஸாமீ’’தி உத³கோரோஹனானுயோக³ங் அனுயுத்தோ விஹரதி.
Sākabhakkhotiādīni vuttatthāneva. Ubbhaṭṭhakoti uddhaṃ ṭhitako. Ukkuṭikappadhānamanuyuttoti ukkuṭikaṃ vīriyaṃ anuyutto. Gacchantopi ukkuṭikova hutvā uppatitvā uppatitvā gacchati. Kaṇṭakāpassayikoti ayakaṇṭake vā pakatikaṇṭake vā bhūmiyaṃ koṭṭetvā tattha cammaṃ attharitvā ṭhānacaṅkamādīni karoti. Seyyanti sayantopi tattheva seyyaṃ kappeti. Phalakaseyyanti rukkhaphalake seyyaṃ. Thaṇḍilaseyyanti thaṇḍile ucce bhūmiṭṭhāne seyyaṃ. Ekapassayikoti ekapasseneva sayati. Rajojalladharoti sarīraṃ telena makkhetvā rajuṭṭhānaṭṭhāne tiṭṭhati, athassa sarīre rajojallaṃ laggati, taṃ dhāreti. Yathāsanthatikoti laddhaṃ āsanaṃ akopetvā yadeva labhati, tattheva nisīdanasīlo. Vekaṭikoti vikaṭakhādanasīlo, vikaṭanti gūthaṃ vuccati. Apānakoti paṭikkhittasītudakapāno. Sāyaṃ tatiyaṃ assāti sāyatatiyakaṃ. Pāto majjhanhike sāyanti divasassa tikkhattuṃ ‘‘pāpaṃ pavāhessāmī’’ti udakorohanānuyogaṃ anuyutto viharati.
தே ஸல்லே அபி⁴ஸங்க²ரோதீதி தே ராகா³தி³ஸத்தஸல்லே அபி⁴னிப்³ப³த்தேதி. அபி⁴ஸங்க²ரொந்தோதி அபி⁴னிப்³ப³த்தெந்தோ. ஸல்லாபி⁴ஸங்கா²ரவஸேனாதி ஸல்லாபி⁴னிப்³ப³த்தாபனகாரணா. புரத்தி²மங் தி³ஸங் தா⁴வதீதி புரிமங் தி³ஸங் க³ச்ச²தி. தே ஸல்லாபி⁴ஸங்கா²ரா அப்பஹீனாதி ஏதே ராகா³தி³ஸல்லா பயோகா³ நப்பஹீனா. ஸல்லாபி⁴ஸங்கா²ரானங் அப்பஹீனத்தாதி ஸல்லபயோகா³னங் அப்பஹீனபா⁴வேன. க³தியா தா⁴வதீதி க³தியங் தா⁴வதி. க³தியா க³திந்தி க³திதோ க³திங்.
Te salle abhisaṅkharotīti te rāgādisattasalle abhinibbatteti. Abhisaṅkharontoti abhinibbattento. Sallābhisaṅkhāravasenāti sallābhinibbattāpanakāraṇā. Puratthimaṃ disaṃ dhāvatīti purimaṃ disaṃ gacchati. Te sallābhisaṅkhārā appahīnāti ete rāgādisallā payogā nappahīnā. Sallābhisaṅkhārānaṃ appahīnattāti sallapayogānaṃ appahīnabhāvena. Gatiyā dhāvatīti gatiyaṃ dhāvati. Gatiyā gatinti gatito gatiṃ.
ந ஸீத³தீதி ந நிமுஜ்ஜதி. ந ஸங்ஸீத³தீதி ந ஸமந்ததோ முஜ்ஜதி. ந ஓஸீத³தீதி ந ஓஸக்கதி. ந அவஸீத³தீதி ந பச்சோஸக்கதி. ந அவக³ச்ச²தீதி ந ஹெட்டா² க³ச்ச²தி.
Na sīdatīti na nimujjati. Na saṃsīdatīti na samantato mujjati. Na osīdatīti na osakkati. Na avasīdatīti na paccosakkati. Na avagacchatīti na heṭṭhā gacchati.
175. ஏவங் மஹானுபா⁴வேன ஸல்லேன ஓதிண்ணேஸு ச ஸத்தேஸு – தத்த² ஸிக்கா²னுகீ³யந்தி, யானி லோகே க³தி⁴தானீதி கா³தா². தஸ்ஸத்தோ² – யே லோகே பஞ்ச காமகு³ணா படிலாபா⁴ய கி³ஜ்ஜ²ந்தீதி கத்வா ‘‘க³தி⁴தானீ’’தி வுச்சந்தி, சிரகாலஸேவிதத்தா வா ‘‘க³தி⁴தானீ’’தி வுச்சந்தி. தத்த² தங் நிமித்தங் ஹத்தி²ஸிக்கா²தி³கா அனேகா ஸிக்கா² கதீ²யந்தி, உக்³க³ய்ஹந்தி வா. பஸ்ஸத² யாவ ஸமத்தோ² வாயங் லோகோ, யதோ பண்டி³தோ குலபுத்தோ தேஸு வா க³தி⁴தேஸு தாஸு வா ஸிக்கா²ஸு அதி⁴முத்தோ ந ஸியா, அஞ்ஞத³த்து² அனிச்சாதி³த³ஸ்ஸனேன நிப்³பி³ஜ்ஜ² ஸப்³ப³ஸோ காமே. அத்தனோ நிப்³பா³னமேவ ஸிக்கே²தி.
175. Evaṃ mahānubhāvena sallena otiṇṇesu ca sattesu – tattha sikkhānugīyanti, yāni loke gadhitānīti gāthā. Tassattho – ye loke pañca kāmaguṇā paṭilābhāya gijjhantīti katvā ‘‘gadhitānī’’ti vuccanti, cirakālasevitattā vā ‘‘gadhitānī’’ti vuccanti. Tattha taṃ nimittaṃ hatthisikkhādikā anekā sikkhā kathīyanti, uggayhanti vā. Passatha yāva samattho vāyaṃ loko, yato paṇḍito kulaputto tesu vā gadhitesu tāsu vā sikkhāsu adhimutto na siyā, aññadatthu aniccādidassanena nibbijjha sabbaso kāme. Attano nibbānameva sikkheti.
படிவிஜ்ஜி²த்வாதி ஞாணேன நிக்க²மெத்வா வா நிப்³பி³ஜ்ஜி²த்வா வா.
Paṭivijjhitvāti ñāṇena nikkhametvā vā nibbijjhitvā vā.
176. இதா³னி யதா² நிப்³பா³னாய ஸிக்கி²தப்³ப³ங், தங் த³ஸ்ஸெந்தோ ‘‘ஸச்சோ ஸியா’’திஆதி³மாஹ. தத்த² ஸச்சோதி வாசாஸச்சேன ஞாணஸச்சேன மக்³க³ஸச்சேன ச ஸமன்னாக³தோ. ரித்தபேஸுணோதி பஹீனபேஸுணோ. வேவிச்ச²ந்தி மச்ச²ரியங்.
176. Idāni yathā nibbānāya sikkhitabbaṃ, taṃ dassento ‘‘sacco siyā’’tiādimāha. Tattha saccoti vācāsaccena ñāṇasaccena maggasaccena ca samannāgato. Rittapesuṇoti pahīnapesuṇo. Vevicchanti macchariyaṃ.
177. நித்³த³ங் தந்தி³ங் ஸஹே தீ²னந்தி பசலாயிகஞ்ச காயாலஸியஞ்ச சித்தாலஸியஞ்சாதி இமே தயோ த⁴ம்மே அபி⁴ப⁴வெய்ய. நிப்³பா³னமானஸோதி நிப்³பா³னநின்னசித்தோ.
177.Niddaṃ tandiṃ sahe thīnanti pacalāyikañca kāyālasiyañca cittālasiyañcāti ime tayo dhamme abhibhaveyya. Nibbānamānasoti nibbānaninnacitto.
காயஸ்ஸ அகல்யதாதி க²ந்த⁴த்தயஸங்கா²தஸ்ஸ நாமகாயஸ்ஸ கி³லானபா⁴வோ. கி³லானோ ஹி அகல்லகோதி வுச்சதி. வினயேபி (பாரா॰ 151) வுத்தங் – ‘‘நாஹங், ப⁴ந்தே, அகல்லகோ’’தி. அகம்மஞ்ஞதாதி காயகே³லஞ்ஞஸங்கா²தோ அகம்மஞ்ஞதாகாரோ. மேகோ⁴ விய ஆகாஸங் காயங் ஓனய்ஹதீதி ஓனாஹோ. ஸப்³ப³தோ பா⁴கே³ன ஓனாஹோ பரியோனாஹோ. அப்³ப⁴ந்தரே ஸமோருந்த⁴தீதி அந்தோஸமோரோதோ⁴. மேத⁴தீதி மித்³த⁴ங், அகம்மஞ்ஞபா⁴வேன விஹிங்ஸதீதி அத்தோ². ஸுபந்தி தேனாதி ஸுப்பங். அக்கி²த³லாதீ³னங் பசலபா⁴வங் கரோதீதி பசலாயிகா. ஸுப்பனா ஸுப்பிதத்தந்தி ஆகாரபா⁴வனித்³தே³ஸா. ஓலீயனாதி ஓலீயனாகாரோ. து³தியங் உபஸக்³க³வஸேன வட்³டி⁴தங். லீனந்தி அவிப்பா²ரிகதாய படிகுடிகங். இதரே த்³வே ஆகாரபா⁴வனித்³தே³ஸா. தி²னந்தி ஸப்பிபிண்டோ³ விய அவிப்பா²ரிகதாய க⁴னபா⁴வேன டி²தங். தி²யனாதி ஆகாரனித்³தே³ஸோ. தி²யிதஸ்ஸ பா⁴வோ தி²யிதத்தங், அவிப்பா²ரவஸேன த²த்³த⁴தாதி அத்தோ².
Kāyassa akalyatāti khandhattayasaṅkhātassa nāmakāyassa gilānabhāvo. Gilāno hi akallakoti vuccati. Vinayepi (pārā. 151) vuttaṃ – ‘‘nāhaṃ, bhante, akallako’’ti. Akammaññatāti kāyagelaññasaṅkhāto akammaññatākāro. Megho viya ākāsaṃ kāyaṃ onayhatīti onāho. Sabbato bhāgena onāho pariyonāho. Abbhantare samorundhatīti antosamorodho. Medhatīti middhaṃ, akammaññabhāvena vihiṃsatīti attho. Supanti tenāti suppaṃ. Akkhidalādīnaṃ pacalabhāvaṃ karotīti pacalāyikā. Suppanā suppitattanti ākārabhāvaniddesā. Olīyanāti olīyanākāro. Dutiyaṃ upasaggavasena vaḍḍhitaṃ. Līnanti avipphārikatāya paṭikuṭikaṃ. Itare dve ākārabhāvaniddesā. Thinanti sappipiṇḍo viya avipphārikatāya ghanabhāvena ṭhitaṃ. Thiyanāti ākāraniddeso. Thiyitassa bhāvo thiyitattaṃ, avipphāravasena thaddhatāti attho.
ஸப்³ப³ஸங்கா²ரதா⁴துயாதி நிப்³பா³னநின்னமானஸோ ஸப்³ப³தேபூ⁴மிகஸங்கா²ததா⁴துயா. சித்தங் படிவாபெத்வாதி சித்தங் நிவத்தாபெத்வா. ஏதங் ஸந்தந்தி ஏதங் நிப்³பா³னங். கிலேஸஸந்ததாய ஸந்தங். அதப்பகட்டே²ன பணீதங்.
Sabbasaṅkhāradhātuyāti nibbānaninnamānaso sabbatebhūmikasaṅkhātadhātuyā. Cittaṃ paṭivāpetvāti cittaṃ nivattāpetvā. Etaṃ santanti etaṃ nibbānaṃ. Kilesasantatāya santaṃ. Atappakaṭṭhena paṇītaṃ.
ந பண்டி³தா உபதி⁴ஸுக²ஸ்ஸ ஹேதூதி த³ப்³ப³ஜாதிகா காமஸுக²ஸ்ஸ காரணா தா³னானி ந தெ³ந்தி. காமஞ்ச தே உபதி⁴பரிக்க²யாயாதி ஏகங்ஸேன தே பண்டி³தா காமக்க²யாய காமக்கே²பனத்த²ங் தா³னானி தெ³ந்தி . அபுனப்³ப⁴வாயாதி நிப்³பா³னத்தா²ய. ஜா²னானி பா⁴வெந்தீதி பட²மஜ்ஜா²னாதீ³னி வட்³டெ⁴ந்தி. புனப்³ப⁴வாயாதி புனப்³ப⁴வகாரணா. தே பண்டி³தா நிப்³பா³னங் அபி⁴முக²ங் ஹுத்வா தா³னங் த³த³ந்தி.
Na paṇḍitā upadhisukhassa hetūti dabbajātikā kāmasukhassa kāraṇā dānāni na denti. Kāmañca te upadhiparikkhayāyāti ekaṃsena te paṇḍitā kāmakkhayāya kāmakkhepanatthaṃ dānāni denti . Apunabbhavāyāti nibbānatthāya. Jhānāni bhāventīti paṭhamajjhānādīni vaḍḍhenti. Punabbhavāyāti punabbhavakāraṇā. Te paṇḍitā nibbānaṃ abhimukhaṃ hutvā dānaṃ dadanti.
178. ஸாஹஸாதி ரத்தஸ்ஸ ராக³சரிதாதி³பே⁴தா³ ஸாஹஸாகாரணா. நித்³தே³ஸோ உத்தானத்தோ²யேவ.
178.Sāhasāti rattassa rāgacaritādibhedā sāhasākāraṇā. Niddeso uttānatthoyeva.
179. புராணங் நாபி⁴னந்தெ³ய்யாதி அதீதங் ரூபாதி³ங் நாபி⁴னந்தெ³ய்ய. நவேதி பச்சுப்பன்னே. ஹீயமானேதி வினஸ்ஸமானே. ஆகாஸங் ந ஸிதோ ஸியாதி தண்ஹானிஸ்ஸிதோ ந ப⁴வெய்ய. தண்ஹா ஹி ரூபாதீ³னங் ஆகாஸனதோ ‘‘ஆகாஸோ’’தி வுச்சதி.
179.Purāṇaṃ nābhinandeyyāti atītaṃ rūpādiṃ nābhinandeyya. Naveti paccuppanne. Hīyamāneti vinassamāne. Ākāsaṃ na sito siyāti taṇhānissito na bhaveyya. Taṇhā hi rūpādīnaṃ ākāsanato ‘‘ākāso’’ti vuccati.
வேமானேதி அப⁴வமானே. விக³ச்ச²மானேதி அபக³ச்ச²மானே.
Vemāneti abhavamāne. Vigacchamāneti apagacchamāne.
‘‘ஆகாஸதீ’’தி ‘‘ஆகஸ்ஸதீ’’தி ச து³விதோ⁴ பாடோ².
‘‘Ākāsatī’’ti ‘‘ākassatī’’ti ca duvidho pāṭho.
180. கிங் காரணா ஆகாஸங் ந ஸிதோ ஸியாதி சே? கே³த⁴ங் ப்³ரூமீதி கா³தா². தஸ்ஸத்தோ² – அஹஞ்ஹி இமங் ஆகாஸஸங்கா²தங் தண்ஹங் ரூபாதீ³ஸு கி³ஜ்ஜ²னதோ கே³த⁴ங் ப்³ரூமி ‘‘கே³தோ⁴’’தி வதா³மி. கிஞ்ச பி⁴ய்யோ – அவஹனநட்டே²ன ‘‘ஓகோ⁴’’தி ச ஆஜவனட்டே²ன ‘‘ஆஜவ’’ந்தி ச ‘‘இத³ங் மய்ஹங், இத³ங் மய்ஹ’’ந்தி ஜப்பகாரணதோ ‘‘ஜப்பன’’ந்தி ச து³ம்முஞ்சனட்டே²ன ‘‘ஆரம்மண’’ந்தி ச கம்பகரணட்டே²ன ‘‘கம்பன’’ந்தி ச ப்³ரூமி, ஏஸாவ லோகஸ்ஸ பலிபோ³த⁴ட்டே²ன து³ரதிக்கமனீயட்டே²ன ச ‘‘காமபங்கோ து³ரச்சயோ’’தி.
180. Kiṃ kāraṇā ākāsaṃ na sito siyāti ce? Gedhaṃ brūmīti gāthā. Tassattho – ahañhi imaṃ ākāsasaṅkhātaṃ taṇhaṃ rūpādīsu gijjhanato gedhaṃ brūmi ‘‘gedho’’ti vadāmi. Kiñca bhiyyo – avahananaṭṭhena ‘‘ogho’’ti ca ājavanaṭṭhena ‘‘ājava’’nti ca ‘‘idaṃ mayhaṃ, idaṃ mayha’’nti jappakāraṇato ‘‘jappana’’nti ca dummuñcanaṭṭhena ‘‘ārammaṇa’’nti ca kampakaraṇaṭṭhena ‘‘kampana’’nti ca brūmi, esāva lokassa palibodhaṭṭhena duratikkamanīyaṭṭhena ca ‘‘kāmapaṅko duraccayo’’ti.
ஆஜவந்தி ஆபடிஸந்தி⁴தோ ஜவதி தா⁴வதீதி ஆஜவங், வட்டமூலதாய புனப்³ப⁴வே படிஸந்தி⁴தா³னதண்ஹாயேதங் அதி⁴வசனங். ஜப்பனந்தி பத்த²னா, தண்ஹாயேதங் அதி⁴வசனங். ஆரம்மணம்பி வுச்சதி தண்ஹாதி ரூபாதீ³ஸு ஆரம்மணேஸு உப்பன்னதண்ஹா முச்சிதுங் அஸக்குணெய்யட்டே²ன ஆரம்மணாதி கதீ²யதி. காமபங்கோதி ஓஸீத³னட்டே²ன கலலங். கத்³த³மோதி ஸங்க³ட்டே²ன கத்³த³மோ. தாபனட்டே²ன கிலேஸோ . நிய்யாஸங் விய லக்³கா³பனட்டே²ன பலிபோ. ருந்தி⁴த்வா தா⁴ரணட்டே²ன பலிரோதோ⁴. ஏவமேதங் கே³தா⁴தி³பரியாயங் ஆகாஸங் அனிஸ்ஸிதோ.
Ājavanti āpaṭisandhito javati dhāvatīti ājavaṃ, vaṭṭamūlatāya punabbhave paṭisandhidānataṇhāyetaṃ adhivacanaṃ. Jappananti patthanā, taṇhāyetaṃ adhivacanaṃ. Ārammaṇampi vuccati taṇhāti rūpādīsu ārammaṇesu uppannataṇhā muccituṃ asakkuṇeyyaṭṭhena ārammaṇāti kathīyati. Kāmapaṅkoti osīdanaṭṭhena kalalaṃ. Kaddamoti saṅgaṭṭhena kaddamo. Tāpanaṭṭhena kileso. Niyyāsaṃ viya laggāpanaṭṭhena palipo. Rundhitvā dhāraṇaṭṭhena palirodho. Evametaṃ gedhādipariyāyaṃ ākāsaṃ anissito.
181. ஸச்சா அவோக்கமந்தி கா³தா². தஸ்ஸத்தோ² – புப்³பே³ வுத்தா திவிதா⁴பி ஸச்சா அவோக்கமங் மோனெய்யபத்தியா முனீதி ஸங்க²ங் க³தோ நிப்³பா³னத²லே திட்ட²தி ப்³ராஹ்மணோ, ஸ வேஏவரூபோ ஸப்³பா³னி ஆயதனானி நிஸ்ஸஜ்ஜித்வா ‘‘ஸந்தோ’’தி வுச்சதி. நித்³தே³ஸே வத்தப்³ப³ங் நத்தி².
181.Saccā avokkamanti gāthā. Tassattho – pubbe vuttā tividhāpi saccā avokkamaṃ moneyyapattiyā munīti saṅkhaṃ gato nibbānathale tiṭṭhati brāhmaṇo, sa veevarūpo sabbāni āyatanāni nissajjitvā ‘‘santo’’ti vuccati. Niddese vattabbaṃ natthi.
182. கிஞ்ச பி⁴ய்யோ – ஸ வே வித்³வாதி கா³தா². தத்த² ஞத்வா த⁴ம்மந்தி அனிச்சாதி³னயேன ஸங்க²தத⁴ம்மங் அஞ்ஞாய. ஸம்மா ஸோ லோகே இரியானோதி அஸம்மாஇரியனகரானங் கிலேஸானங் பஹானா ஸம்மா ஸோ லோகே இரியமானோ.
182. Kiñca bhiyyo – sa ve vidvāti gāthā. Tattha ñatvā dhammanti aniccādinayena saṅkhatadhammaṃ aññāya. Sammā so loke iriyānoti asammāiriyanakarānaṃ kilesānaṃ pahānā sammā so loke iriyamāno.
183. ஏவங் அபிஹெந்தோ ச – யோத⁴ காமேதி கா³தா². தத்த² ஸங்க³ந்தி ஸத்தவித⁴ங் ஸங்க³ங் யோ அச்சதரி. நாஜ்ஜே²தீதி ந அபி⁴ஜ்ஜா²யதி.
183. Evaṃ apihento ca – yodha kāmeti gāthā. Tattha saṅganti sattavidhaṃ saṅgaṃ yo accatari. Nājjhetīti na abhijjhāyati.
184. தஸ்மா தும்ஹேஸுபி யோ ஏவரூபோ ஹோதுங் இச்ச²தி, தங் வதா³மி – யங் புப்³பே³தி கா³தா². தத்த² யங் புப்³பே³தி அதீதே ஸங்கா²ரே ஆரப்³ப⁴ உப்பஜ்ஜனத⁴ம்மங் கிலேஸஜாதங் அதீதங் கம்மஞ்ச. பச்சா² தே மாஹு கிஞ்சனந்தி அனாக³தேபி ஸங்கா²ரே ஆரப்³ப⁴ உப்பஜ்ஜனத⁴ம்மங் ராகா³தி³கிஞ்சனங் மா அஹு. மஜ்ஜே² சே நோ க³ஹெஸ்ஸஸீதி பச்சுப்பன்னரூபாதி³த⁴ம்மேபி ந க³ஹெஸ்ஸஸி சே. ஏவங் உபஸந்தோ சரிஸ்ஸஸி.
184. Tasmā tumhesupi yo evarūpo hotuṃ icchati, taṃ vadāmi – yaṃ pubbeti gāthā. Tattha yaṃ pubbeti atīte saṅkhāre ārabbha uppajjanadhammaṃ kilesajātaṃ atītaṃ kammañca. Pacchā te māhu kiñcananti anāgatepi saṅkhāre ārabbha uppajjanadhammaṃ rāgādikiñcanaṃ mā ahu. Majjhe ce no gahessasīti paccuppannarūpādidhammepi na gahessasi ce. Evaṃ upasanto carissasi.
அபீ³ஜங் கரோஹீதி மக்³க³ஞாணேன ந பீ³ஜங் கரோஹி. ராக³கிஞ்சனந்தி ராக³ப²ந்த³னங். தோ³ஸகிஞ்சனாதீ³ஸுபி ஏஸேவ நயோ.
Abījaṃ karohīti maggañāṇena na bījaṃ karohi. Rāgakiñcananti rāgaphandanaṃ. Dosakiñcanādīsupi eseva nayo.
185. ஏவங் அரஹத்தப்பத்திங் த³ஸ்ஸெத்வா இதா³னி அரஹதோ து²திவஸேன இதோ பரா கா³தா²யோ அபா⁴ஸி. தத்த² ஸப்³ப³ஸோதி கா³தா²ய மமாயிதந்தி மமத்தகரணங். ‘‘மம இத³’’ந்தி க³ஹிதங் வா வத்து². அஸதா ச ந ஸோசதீதி அவிஜ்ஜமானகாரணா அஸந்தகாரணா ந ஸோசதி. ந ஜீயதீதி ஜானிங் நாதி⁴க³ச்ச²தி.
185. Evaṃ arahattappattiṃ dassetvā idāni arahato thutivasena ito parā gāthāyo abhāsi. Tattha sabbasoti gāthāya mamāyitanti mamattakaraṇaṃ. ‘‘Mama ida’’nti gahitaṃ vā vatthu. Asatā ca na socatīti avijjamānakāraṇā asantakāraṇā na socati. Na jīyatīti jāniṃ nādhigacchati.
அஹு வத மேதி மய்ஹங் அஹோஸி வத. தங் வத மே நத்தீ²தி யங் அதீதே அஹோஸி, தங் மய்ஹங் இதா³னி ந ஸந்தி. ஸியா வத மேதி யங் மய்ஹங் ப⁴விஸ்ஸதி, தங் வதாஹங் ந லபா⁴மீதி இதா³னி அஹங் ஏகங்ஸேன ந பாபுணாமி.
Ahuvata meti mayhaṃ ahosi vata. Taṃ vata me natthīti yaṃ atīte ahosi, taṃ mayhaṃ idāni na santi. Siyā vata meti yaṃ mayhaṃ bhavissati, taṃ vatāhaṃ na labhāmīti idāni ahaṃ ekaṃsena na pāpuṇāmi.
186. கிஞ்ச பி⁴ய்யோ – யஸ்ஸ நத்தீ²தி கா³தா². தத்த² கிஞ்சனந்தி கிஞ்சி ரூபாதி³த⁴ம்மஜாதங்.
186. Kiñca bhiyyo – yassa natthīti gāthā. Tattha kiñcananti kiñci rūpādidhammajātaṃ.
அபி⁴ஸங்க²தந்தி கம்மேன ஸங்க²ரிதங். அபி⁴ஸஞ்சேதயிதந்தி சித்தேன ராஸிகதங். அவிஜ்ஜாய த்வேவாதி அவிஜ்ஜாய து ஏவ. அஸேஸவிராக³னிரோதா⁴தி விராக³ஸங்கா²தேன மக்³கே³ன நிரவஸேஸனிரோதா⁴.
Abhisaṅkhatanti kammena saṅkharitaṃ. Abhisañcetayitanti cittena rāsikataṃ. Avijjāya tvevāti avijjāya tu eva. Asesavirāganirodhāti virāgasaṅkhātena maggena niravasesanirodhā.
ஸுஞ்ஞதோ லோகங் அவெக்க²ஸ்ஸூதி அவஸவத்திஸல்லக்க²ணவஸேன வா துச்ச²ஸங்கா²ரஸமனுபஸ்ஸனவஸேன வாதி த்³வீஹாகாரேஹி ஸுஞ்ஞதோ லோகங் பஸ்ஸ. அத்தானுதி³ட்டி²ங் ஊஹச்சாதி ஸக்காயதி³ட்டி²ங் உத்³த⁴ரித்வா. ஏவங் மச்சுதரோ ஸியாதி ஏவங் மரணஸ்ஸ தரணோ ப⁴வெய்ய. ஏவங் லோகங் அவெக்க²ந்தந்தி ஏவங் க²ந்த⁴லோகங் பஸ்ஸந்தங். மச்சுராஜா ந பஸ்ஸதீதி மரணராஜா ந ஓலோகேதி ந த³க்க²தி.
Suññatolokaṃ avekkhassūti avasavattisallakkhaṇavasena vā tucchasaṅkhārasamanupassanavasena vāti dvīhākārehi suññato lokaṃ passa. Attānudiṭṭhiṃ ūhaccāti sakkāyadiṭṭhiṃ uddharitvā. Evaṃ maccutaro siyāti evaṃ maraṇassa taraṇo bhaveyya. Evaṃ lokaṃ avekkhantanti evaṃ khandhalokaṃ passantaṃ. Maccurājā na passatīti maraṇarājā na oloketi na dakkhati.
நாஞ்ஞங் பத்த²யதே கிஞ்சீதி அஞ்ஞங் அப்பமத்தகம்பி ந பத்த²யதி ந பிஹயதி. அஞ்ஞத்ர அப்படிஸந்தி⁴யாதி நிப்³பா³னங் ட²பெத்வா. ‘‘அஞ்ஞத்ரப்படிஸந்தி⁴யா’’தி ஏகபத³ங் கத்வாபி பட²ந்தி.
Nāññaṃ patthayate kiñcīti aññaṃ appamattakampi na patthayati na pihayati. Aññatra appaṭisandhiyāti nibbānaṃ ṭhapetvā. ‘‘Aññatrappaṭisandhiyā’’ti ekapadaṃ katvāpi paṭhanti.
187. கிஞ்ச பி⁴ய்யோ – அனிட்டு²ரீதி கா³தா². தத்த² அனிட்டு²ரீதி அனிஸ்ஸுகீ. ‘‘அனிட்ட²ரீ’’திபி கேசி பட²ந்தி. ஸப்³ப³தீ⁴ ஸமோதி ஸப்³ப³த்த² ஸமோ, உபெக்க²கோதி அதி⁴ப்பாயோ. கிங் வுத்தங் ஹோதி? யோ ஸோ ‘‘நத்தி² மே’’தி ந ஸோசதி, தமஹங் அவிகம்பினங் புக்³க³லங் புட்டோ² ஸமானோ அனிட்டு²ரீ அனநுகி³த்³தோ⁴, அனேஜோ ஸப்³ப³தீ⁴ ஸமோதி இமங் தஸ்மிங் புக்³க³லே சதுப்³பி³த⁴ங் ஆனிஸங்ஸங் ப்³ரூமீதி.
187. Kiñca bhiyyo – aniṭṭhurīti gāthā. Tattha aniṭṭhurīti anissukī. ‘‘Aniṭṭharī’’tipi keci paṭhanti. Sabbadhī samoti sabbattha samo, upekkhakoti adhippāyo. Kiṃ vuttaṃ hoti? Yo so ‘‘natthi me’’ti na socati, tamahaṃ avikampinaṃ puggalaṃ puṭṭho samāno aniṭṭhurī ananugiddho, anejo sabbadhī samoti imaṃ tasmiṃ puggale catubbidhaṃ ānisaṃsaṃ brūmīti.
நிட்டு²ரியோதி இஸ்ஸுகீ. நிட்டு²ரபா⁴வோ நிட்டு²ரியங், தங் நிஸ்ஸாய எத்தகம்பி நத்தீ²தி கே²ளபாதந்தி அத்தோ². நிட்டு²ரியகம்மந்தி நிட்டு²ரியகரணங். க³ஹட்டோ² வா ஹி க³ஹட்ட²ங் பி⁴க்கு² வா பி⁴க்கு²ங் நிஸ்ஸாய வஸந்தோ அப்பமத்தகேனேவ குஜ்ஜி²த்வா தங் நிஸ்ஸாய எத்தகம்பி நத்தீ²தி கே²ளங் பாதெத்வா பாதே³ன மத்³த³ந்தோ விய நிட்டு²ரியங் நாம கரோதி. தஸ்ஸ தங் கம்மங் ‘‘நிட்டு²ரியகம்ம’’ந்தி வுச்சதி. இஸ்ஸாதி ஸபா⁴வனித்³தே³ஸோ . ததோ பரா த்³வே ஆகாரபா⁴வனித்³தே³ஸா. இதரத்தயங் பரியாயவசனங். லக்க²ணாதி³தோ பனேஸா பரஸம்பத்தீனங் உஸூயனலக்க²ணா இஸ்ஸா; தத்த² ச அனபி⁴ரதிரஸா; ததோ விமுக²பா⁴வபச்சுபட்டா²னா; பரஸம்பத்திபத³ட்டா²னா.
Niṭṭhuriyoti issukī. Niṭṭhurabhāvo niṭṭhuriyaṃ, taṃ nissāya ettakampi natthīti kheḷapātanti attho. Niṭṭhuriyakammanti niṭṭhuriyakaraṇaṃ. Gahaṭṭho vā hi gahaṭṭhaṃ bhikkhu vā bhikkhuṃ nissāya vasanto appamattakeneva kujjhitvā taṃ nissāya ettakampi natthīti kheḷaṃ pātetvā pādena maddanto viya niṭṭhuriyaṃ nāma karoti. Tassa taṃ kammaṃ ‘‘niṭṭhuriyakamma’’nti vuccati. Issāti sabhāvaniddeso . Tato parā dve ākārabhāvaniddesā. Itarattayaṃ pariyāyavacanaṃ. Lakkhaṇādito panesā parasampattīnaṃ usūyanalakkhaṇā issā; tattha ca anabhiratirasā; tato vimukhabhāvapaccupaṭṭhānā; parasampattipadaṭṭhānā.
லாபே⁴பி ந இஞ்ஜதீதி பச்சயலாபே⁴ ந சலதி. அலாபே⁴பீதி பச்சயானங் அலாபே⁴பி.
Lābhepi na iñjatīti paccayalābhe na calati. Alābhepīti paccayānaṃ alābhepi.
188. கிஞ்ச பி⁴ய்யோ – அனேஜஸ்ஸாதி கா³தா². தத்த² நிஸங்க²தீதி புஞ்ஞாபி⁴ஸங்கா²ராதீ³ஸு யோ கோசி ஸங்கா²ரோ. ஸோ ஹி யஸ்மா நிஸங்க²ரியதி, நிஸங்க²ரோதி வா, தஸ்மா ‘‘நிஸங்க²தீ’’தி வுச்சதி. வியாரம்பா⁴தி விவிதா⁴ புஞ்ஞாபி⁴ஸங்கா²ராதி³கா ஆரம்பா⁴. கே²மங் பஸ்ஸதி ஸப்³ப³தீ⁴தி ஸப்³ப³த்த² அப⁴யமேவ பஸ்ஸதி.
188. Kiñca bhiyyo – anejassāti gāthā. Tattha nisaṅkhatīti puññābhisaṅkhārādīsu yo koci saṅkhāro. So hi yasmā nisaṅkhariyati, nisaṅkharoti vā, tasmā ‘‘nisaṅkhatī’’ti vuccati. Viyārambhāti vividhā puññābhisaṅkhārādikā ārambhā. Khemaṃ passati sabbadhīti sabbattha abhayameva passati.
ஆரம்பா⁴தி கம்மானங் பட²மாரம்பா⁴. வியாரம்பா⁴தி உபரூபரி விவித⁴ஆரம்ப⁴னவஸேன வீரியாரம்பா⁴. தீஸு ப⁴வேஸு படிஸந்தி⁴ஜனககம்மானங் ஏதங் அதி⁴வசனங். தஸ்மா வியாரம்பா⁴ ஆரதோ.
Ārambhāti kammānaṃ paṭhamārambhā. Viyārambhāti uparūpari vividhaārambhanavasena vīriyārambhā. Tīsu bhavesu paṭisandhijanakakammānaṃ etaṃ adhivacanaṃ. Tasmā viyārambhā ārato.
189. ஏவங் பஸ்ஸந்தோ ந ஸமேஸூதி கா³தா². தத்த² ந வத³தேதி ‘‘ஸதி³ஸோஹமஸ்மீ’’திஆதி³னா மானவஸேன ஸமேஸுபி அத்தானங் ந வத³தி ஓமேஸுபி உஸ்ஸேஸுபி. நாதே³தி ந நிரஸ்ஸதீதி ரூபாதீ³ஸு கஞ்சி த⁴ம்மங் ந க³ண்ஹாதி ந நிஸ்ஸஜ்ஜதி. ஸேஸங் ஸப்³ப³த்த² தத்த² தத்த² வுத்தனயத்தா பாகடமேவ. ஏவங் அரஹத்தனிகூடேனேவ தே³ஸனங் நிட்டா²பேஸீதி.
189. Evaṃ passanto na samesūti gāthā. Tattha na vadateti ‘‘sadisohamasmī’’tiādinā mānavasena samesupi attānaṃ na vadati omesupi ussesupi. Nādeti na nirassatīti rūpādīsu kañci dhammaṃ na gaṇhāti na nissajjati. Sesaṃ sabbattha tattha tattha vuttanayattā pākaṭameva. Evaṃ arahattanikūṭeneva desanaṃ niṭṭhāpesīti.
ஸத்³த⁴ம்மப்பஜ்ஜோதிகாய மஹானித்³தே³ஸட்ட²கதா²ய
Saddhammappajjotikāya mahāniddesaṭṭhakathāya
அத்தத³ண்ட³ஸுத்தனித்³தே³ஸவண்ணனா நிட்டி²தா.
Attadaṇḍasuttaniddesavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / மஹானித்³தே³ஸபாளி • Mahāniddesapāḷi / 15. அத்தத³ண்ட³ஸுத்தனித்³தே³ஸோ • 15. Attadaṇḍasuttaniddeso
