| Library / Tipiṭaka / ཏིཔིཊཀ • Tipiṭaka / སུཏྟནིཔཱཏ-ཨཊྛཀཐཱ • Suttanipāta-aṭṭhakathā |
༡༥. ཨཏྟདཎྜསུཏྟཝཎྞནཱ
15. Attadaṇḍasuttavaṇṇanā
༩༤༢. ཨཏྟདཎྜཱ བྷཡཾ ཛཱཏནྟི ཨཏྟདཎྜསུཏྟཾ། ཀཱ ཨུཔྤཏྟི? ཡོ སོ སམྨཱཔརིབྦཱཛནཱིཡསུཏྟསྶ ཨུཔྤཏྟིཡཾ ཝུཙྩམཱནཱཡ སཱཀིཡཀོལིཡཱནཾ ཨུདཀཾ པཊིཙྩ ཀལཧོ ཝཎྞིཏོ, ཏཾ ཉཏྭཱ བྷགཝཱ ‘‘ཉཱཏཀཱ ཀལཧཾ ཀརོནྟི, ཧནྡ ནེ ཝཱརེསྶཱམཱི’’ཏི དྭིནྣཾ སེནཱནཾ མཛ྄ཛྷེ ཋཏྭཱ ཨིམཾ སུཏྟམབྷཱསི།
942.Attadaṇḍābhayaṃ jātanti attadaṇḍasuttaṃ. Kā uppatti? Yo so sammāparibbājanīyasuttassa uppattiyaṃ vuccamānāya sākiyakoliyānaṃ udakaṃ paṭicca kalaho vaṇṇito, taṃ ñatvā bhagavā ‘‘ñātakā kalahaṃ karonti, handa ne vāressāmī’’ti dvinnaṃ senānaṃ majjhe ṭhatvā imaṃ suttamabhāsi.
ཏཏྠ པཋམགཱཐཱཡཏྠོ – ཡཾ ལོཀསྶ དིཊྛདྷམྨིཀཾ ཝཱ སམྤརཱཡིཀཾ ཝཱ བྷཡཾ ཛཱཏཾ, ཏཾ སབྦཾ ཨཏྟདཎྜཱ བྷཡཾ ཛཱཏཾ ཨཏྟནོ དུཙྩརིཏཀཱརཎཱ ཛཱཏཾ, ཨེཝཾ སནྟེཔི ཛནཾ པསྶཐ མེདྷགཾ, ཨིམཾ སཱཀིཡཱདིཛནཾ པསྶཐ ཨཉྙམཉྙཾ མེདྷགཾ ཧིཾསཀཾ བཱདྷཀནྟི། ཨེཝཾ ཏཾ པཊིཝིརུདྡྷཾ ཝིཔྤཊིཔནྣཾ ཛནཾ པརིབྷཱསིཏྭཱ ཨཏྟནོ སམྨཱཔཊིཔཏྟིདསྶནེན ཏསྶ སཾཝེགཾ ཛནེཏུཾ ཨཱཧ ‘‘སཾཝེགཾ ཀིཏྟཡིསྶཱམི, ཡཐཱ སཾཝིཛིཏཾ མཡཱ’’ཏི, པུབྦེ བོདྷིསཏྟེནེཝ སཏཱཏི ཨདྷིཔྤཱཡོ།
Tattha paṭhamagāthāyattho – yaṃ lokassa diṭṭhadhammikaṃ vā samparāyikaṃ vā bhayaṃ jātaṃ, taṃ sabbaṃ attadaṇḍā bhayaṃ jātaṃ attano duccaritakāraṇā jātaṃ, evaṃ santepi janaṃ passatha medhagaṃ, imaṃ sākiyādijanaṃ passatha aññamaññaṃ medhagaṃ hiṃsakaṃ bādhakanti. Evaṃ taṃ paṭiviruddhaṃ vippaṭipannaṃ janaṃ paribhāsitvā attano sammāpaṭipattidassanena tassa saṃvegaṃ janetuṃ āha ‘‘saṃvegaṃ kittayissāmi, yathā saṃvijitaṃ mayā’’ti, pubbe bodhisatteneva satāti adhippāyo.
༩༤༣. ཨིདཱནི ཡཐཱནེན སཾཝིཛིཏཾ, ཏཾ པཀཱརཾ དསྶེནྟོ ‘‘ཕནྡམཱན’’ནྟིཨཱདིམཱཧ། ཏཏྠ ཕནྡམཱནནྟི ཏཎྷཱདཱིཧི ཀམྤམཱནཾ། ཨཔྤོདཀེཏི ཨཔྤཨུདཀེ། ཨཉྙམཉྙེཧི བྱཱརུདྡྷེ དིསྭཱཏི ནཱནཱསཏྟེ ཙ ཨཉྙམཉྙེཧི སདྡྷིཾ ཝིརུདྡྷེ དིསྭཱ། མཾ བྷཡམཱཝིསཱིཏི མཾ བྷཡཾ པཝིཊྛཾ།
943. Idāni yathānena saṃvijitaṃ, taṃ pakāraṃ dassento ‘‘phandamāna’’ntiādimāha. Tattha phandamānanti taṇhādīhi kampamānaṃ. Appodaketi appaudake. Aññamaññehi byāruddhe disvāti nānāsatte ca aññamaññehi saddhiṃ viruddhe disvā. Maṃ bhayamāvisīti maṃ bhayaṃ paviṭṭhaṃ.
༩༤༤. སམནྟམསཱརོ ལོཀོཏི ནིརཡཾ ཨཱདིཾ ཀཏྭཱ སམནྟཏོ ལོཀོ ཨསཱརོ ནིཙྩསཱརཱདིརཧིཏོ། དིསཱ སབྦཱ སམེརིཏཱཏི སབྦཱ དིསཱ ཨནིཙྩཏཱཡ ཀམྤིཏཱ། ཨིཙྪཾ བྷཝནམཏྟནོཏི ཨཏྟནོ ཏཱཎཾ ཨིཙྪནྟོ། ནཱདྡསཱསིཾ ཨནོསིཏནྟི ཀིཉྩི ཋཱནཾ ཛརཱདཱིཧི ཨནཛ྄ཛྷཱཝུཏྠཾ ནཱདྡཀྑིཾ།
944.Samantamasāro lokoti nirayaṃ ādiṃ katvā samantato loko asāro niccasārādirahito. Disā sabbā sameritāti sabbā disā aniccatāya kampitā. Icchaṃ bhavanamattanoti attano tāṇaṃ icchanto. Nāddasāsiṃ anositanti kiñci ṭhānaṃ jarādīhi anajjhāvutthaṃ nāddakkhiṃ.
༩༤༥. ཨོསཱནེཏྭེཝ བྱཱརུདྡྷེ, དིསྭཱ མེ ཨརཏཱི ཨཧཱུཏི ཡོབྦཉྙཱདཱིནཾ ཨོསཱནེ ཨེཝ ཨནྟགམཀེ ཨེཝ ཝིནཱསཀེ ཨེཝ ཛརཱདཱིཧི བྱཱརུདྡྷེ ཨཱཧཏཙིཏྟེ སཏྟེ དིསྭཱ ཨརཏི མེ ཨཧོསི། ཨཐེཏྠ སལླནྟི ཨཐ ཨེཏེསུ སཏྟེསུ རཱགཱདིསལླཾ། ཧདཡནིསྶིཏནྟི ཙིཏྟནིསྶིཏཾ།
945.Osānetveva byāruddhe, disvā me aratī ahūti yobbaññādīnaṃ osāne eva antagamake eva vināsake eva jarādīhi byāruddhe āhatacitte satte disvā arati me ahosi. Athettha sallanti atha etesu sattesu rāgādisallaṃ. Hadayanissitanti cittanissitaṃ.
༩༤༦. ‘‘ཀཐཾཨཱནུབྷཱཝཾ སལླ’’ནྟི ཙེ – ཡེན སལླེན ཨོཏིཎྞོཏི གཱཐཱ། ཏཏྠ དིསཱ སབྦཱ ཝིདྷཱཝཏཱིཏི སབྦཱ དུཙྩརིཏདིསཱཔི པུརཏྠིམཱདིདིསཱཝིདིསཱཔི དྷཱཝཏི། ཏམེཝ སལླམབྦུཡ྄ཧ, ན དྷཱཝཏི ན སཱིདཏཱིཏི ཏམེཝ སལླཾ ཨུདྡྷརིཏྭཱ ཏཱ ཙ དིསཱ ན དྷཱཝཏི, ཙཏུརོགྷེ ཙ ན སཱིདཏཱིཏི།
946. ‘‘Kathaṃānubhāvaṃ salla’’nti ce – yena sallena otiṇṇoti gāthā. Tattha disā sabbā vidhāvatīti sabbā duccaritadisāpi puratthimādidisāvidisāpi dhāvati. Tameva sallamabbuyha, na dhāvati na sīdatīti tameva sallaṃ uddharitvā tā ca disā na dhāvati, caturoghe ca na sīdatīti.
༩༤༧. ཨེཝཾམཧཱནུབྷཱཝེན སལླེན ཨོཏིཎྞེསྭཔི ཙ སཏྟེསུ – ཏཏྠ སིཀྑཱནུགཱིཡནྟི, ཡཱནི ལོཀེ གདྷིཏཱནཱིཏི གཱཐཱ། ཏསྶཏྠོ – ཡེ ལོཀེ པཉྩ ཀཱམགུཎཱ པཊིལཱབྷཱཡ གིཛ྄ཛྷནྟཱིཏི ཀཏྭཱ ‘‘གདྷིཏཱནཱི’’ཏི ཝུཙྩནྟི, ཙིརཀཱལཱསེཝིཏཏྟཱ ཝཱ ‘‘གདྷིཏཱནཱི’’ཏི ཝུཙྩནྟི, ཏཏྠ ཏཾ ནིམིཏྟཾ ཧཏྠིསིཀྑཱདིཀཱ ཨནེཀཱ སིཀྑཱ ཀཐཱིཡནྟི ཨུགྒཡ྄ཧནྟི ཝཱ། པསྶཐ ཡཱཝ པམཏྟོ ཝཱཡཾ ལོཀོ, ཡཏོ པཎྜིཏོ ཀུལཔུཏྟོ ཏེསུ ཝཱ གདྷིཏེསུ ཏཱསུ ཝཱ སིཀྑཱསུ ཨདྷིམུཏྟོ ན སིཡཱ, ཨཉྙདཏྠུ ཨནིཙྩཱདིདསྶནེན ནིབྦིཛ྄ཛྷ སབྦསོ ཀཱམེ ཨཏྟནོ ནིབྦཱནམེཝ སིཀྑེཏི།
947. Evaṃmahānubhāvena sallena otiṇṇesvapi ca sattesu – tattha sikkhānugīyanti, yāni loke gadhitānīti gāthā. Tassattho – ye loke pañca kāmaguṇā paṭilābhāya gijjhantīti katvā ‘‘gadhitānī’’ti vuccanti, cirakālāsevitattā vā ‘‘gadhitānī’’ti vuccanti, tattha taṃ nimittaṃ hatthisikkhādikā anekā sikkhā kathīyanti uggayhanti vā. Passatha yāva pamatto vāyaṃ loko, yato paṇḍito kulaputto tesu vā gadhitesu tāsu vā sikkhāsu adhimutto na siyā, aññadatthu aniccādidassanena nibbijjha sabbaso kāme attano nibbānameva sikkheti.
༩༤༨. ཨིདཱནི ཡཐཱ ནིབྦཱནཱཡ སིཀྑིཏབྦཾ, ཏཾ དསྶེནྟོ ‘‘སཙྩོ སིཡཱ’’ཏིཨཱདིམཱཧ། ཏཏྠ སཙྩོཏི ཝཱཙཱསཙྩེན ཉཱཎསཙྩེན མགྒསཙྩེན ཙ སམནྣཱགཏོ། རིཏྟཔེསུཎོཏི པཧཱིནཔེསུཎོ། ཝེཝིཙྪནྟི མཙྪརིཡཾ།
948. Idāni yathā nibbānāya sikkhitabbaṃ, taṃ dassento ‘‘sacco siyā’’tiādimāha. Tattha saccoti vācāsaccena ñāṇasaccena maggasaccena ca samannāgato. Rittapesuṇoti pahīnapesuṇo. Vevicchanti macchariyaṃ.
༩༤༩. ནིདྡཾ ཏནྡིཾ སཧེ ཐཱིནནྟི པཙལཱཡིཀཉྩ ཀཱཡཱལསིཡཉྩ ཙིཏྟཱལསིཡཉྩཱཏི ཨིམེ ཏཡོ དྷམྨེ ཨབྷིབྷཝེཡྻ། ནིབྦཱནམནསོཏི ནིབྦཱནནིནྣཙིཏྟོ།
949.Niddaṃ tandiṃ sahe thīnanti pacalāyikañca kāyālasiyañca cittālasiyañcāti ime tayo dhamme abhibhaveyya. Nibbānamanasoti nibbānaninnacitto.
༩༥༠-༥༡. སཱཧསཱཏི རཏྟསྶ རཱགཙརིཡཱདིབྷེདཱ སཱཧསཀརཎཱ། པུརཱཎཾ ནཱབྷིནནྡེཡྻཱཏི ཨཏཱིཏརཱུཔཱདིཾ ནཱབྷིནནྡེཡྻ། ནཝེཏི པཙྩུཔྤནྣེ། ཧིཡྻམཱནེཏི ཝིནསྶམཱནེ། ཨཱཀཱསཾ ན སིཏོ སིཡཱཏི ཏཎྷཱནིསྶིཏོ ན བྷཝེཡྻ། ཏཎྷཱ ཧི རཱུཔཱདཱིནཾ ཨཱཀཱསནཏོ ‘‘ཨཱཀཱསོ’’ཏི ཝུཙྩཏི།
950-51.Sāhasāti rattassa rāgacariyādibhedā sāhasakaraṇā. Purāṇaṃ nābhinandeyyāti atītarūpādiṃ nābhinandeyya. Naveti paccuppanne. Hiyyamāneti vinassamāne. Ākāsaṃ na sito siyāti taṇhānissito na bhaveyya. Taṇhā hi rūpādīnaṃ ākāsanato ‘‘ākāso’’ti vuccati.
༩༥༢. ‘‘ཀིཾཀཱརཎཱ ཨཱཀཱསཾ ན སིཏོ སིཡཱ’’ཏི ཙེ – ‘‘གེདྷཾ བྲཱུམཱི’’ཏི གཱཐཱ། ཏསྶཏྠོ – ཨཧཉྷི ཨིམཾ ཨཱཀཱསསངྑཱཏཾ ཏཎྷཾ རཱུཔཱདཱིསུ གིཛ྄ཛྷནཏོ གེདྷཾ བྲཱུམི ‘‘གེདྷོ’’ཏི ཝདཱམི། ཀིཉྩ བྷིཡྻོ – ཨཝཧནནཊྛེན ‘‘ཨོགྷོ’’ཏི ཙ ཨཱཛཝནཊྛེན ‘‘ཨཱཛཝ’’ནྟི ཙ ‘‘ཨིདཾ མཡ྄ཧཾ, ཨིདཾ མཡ྄ཧ’’ནྟི ཛཔྤཀཱརཎཏོ ‘‘ཛཔྤན’’ནྟི ཙ དུམྨུཉྩནཊྛེན ‘‘ཨཱརམྨཎ’’ནྟི ཙ ཀམྤཀརཎེན ‘‘པཀམྤན’’ནྟི ཙ བྲཱུམི, ཨེསཱ ཙ ལོཀསྶ པལིབོདྷཊྛེན དུརཏིཀྐམནཱིཡཊྛེན ཙ ཀཱམཔངྐོ དུརཙྩཡོཏི། ‘‘ཨཱཀཱསཾ ན སིཏོ སིཡཱ’’ཏི ཨེཝཾ ཝུཏྟེ ཝཱ ‘‘ཀིམེཏཾ ཨཱཀཱས’’ནྟི ཙེ? གེདྷཾ བྲཱུམཱིཏི། ཨེཝམྤི ཏསྶཱ གཱཐཱཡ སམྦནྡྷོ ཝེདིཏབྦོ། ཏཏྠ པདཡོཛནཱ – ཨཱཀཱསནྟི གེདྷཾ བྲཱུམཱིཏི། ཏཐཱ ཡྭཱཡཾ མཧོགྷོཏི ཝུཙྩཏི། ཏཾ བྲཱུམི, ཨཱཛཝཾ བྲཱུམི, ཛཔྤནཾ བྲཱུམི, པཀམྤནཾ བྲཱུམི, ཡྭཱཡཾ སདེཝཀེ ལོཀེ ཀཱམཔངྐོ དུརཙྩཡོ, ཏཾ བྲཱུམཱིཏི།
952. ‘‘Kiṃkāraṇā ākāsaṃ na sito siyā’’ti ce – ‘‘gedhaṃ brūmī’’ti gāthā. Tassattho – ahañhi imaṃ ākāsasaṅkhātaṃ taṇhaṃ rūpādīsu gijjhanato gedhaṃ brūmi ‘‘gedho’’ti vadāmi. Kiñca bhiyyo – avahananaṭṭhena ‘‘ogho’’ti ca ājavanaṭṭhena ‘‘ājava’’nti ca ‘‘idaṃ mayhaṃ, idaṃ mayha’’nti jappakāraṇato ‘‘jappana’’nti ca dummuñcanaṭṭhena ‘‘ārammaṇa’’nti ca kampakaraṇena ‘‘pakampana’’nti ca brūmi, esā ca lokassa palibodhaṭṭhena duratikkamanīyaṭṭhena ca kāmapaṅko duraccayoti. ‘‘Ākāsaṃ na sito siyā’’ti evaṃ vutte vā ‘‘kimetaṃ ākāsa’’nti ce? Gedhaṃ brūmīti. Evampi tassā gāthāya sambandho veditabbo. Tattha padayojanā – ākāsanti gedhaṃ brūmīti. Tathā yvāyaṃ mahoghoti vuccati. Taṃ brūmi, ājavaṃ brūmi, jappanaṃ brūmi, pakampanaṃ brūmi, yvāyaṃ sadevake loke kāmapaṅko duraccayo, taṃ brūmīti.
༩༥༣. ཨེཝམེཏཾ གེདྷཱདིཔརིཡཱཡཾ ཨཱཀཱསཾ ཨནིསྶིཏོ – སཙྩཱ ཨཝོཀྐམྨཱཏི གཱཐཱ། ཏསྶཏྠོ – པུབྦེ ཝུཏྟཱ ཏིཝིདྷཱཔི སཙྩཱ ཨཝོཀྐམྨ མོནེཡྻཔྤཏྟིཡཱ མུནཱིཏི སངྑྱཾ གཏོ ནིབྦཱནཏྠལེ ཏིཊྛཏི བྲཱཧྨཎོ, ས ཝེ ཨེཝརཱུཔོ སབྦཱནི ཨཱཡཏནཱནི ནིསྶཛྫིཏྭཱ ‘‘སནྟོ’’ཏི ཝུཙྩཏཱིཏི།
953. Evametaṃ gedhādipariyāyaṃ ākāsaṃ anissito – saccā avokkammāti gāthā. Tassattho – pubbe vuttā tividhāpi saccā avokkamma moneyyappattiyā munīti saṅkhyaṃ gato nibbānatthale tiṭṭhati brāhmaṇo, sa ve evarūpo sabbāni āyatanāni nissajjitvā ‘‘santo’’ti vuccatīti.
༩༥༤. ཀིཉྩ བྷིཡྻོ – ས ཝེ ཝིདྭཱཏི གཱཐཱ། ཏཏྠ ཉཏྭཱ དྷམྨནྟི ཨནིཙྩཱདིནཡེན སངྑཏདྷམྨཾ ཉཏྭཱ། སམྨཱ སོ ལོཀེ ཨིརིཡཱནོཏི ཨསམྨཱཨིརིཡནཀརཱནཾ ཀིལེསཱནཾ པཧཱནཱ སམྨཱ སོ ལོཀེ ཨིརིཡམཱནོ།
954. Kiñca bhiyyo – sa ve vidvāti gāthā. Tattha ñatvā dhammanti aniccādinayena saṅkhatadhammaṃ ñatvā. Sammā so loke iriyānoti asammāiriyanakarānaṃ kilesānaṃ pahānā sammā so loke iriyamāno.
༩༥༥. ཨེཝཾ ཨཔིཧེནྟོ ཙ – ཡོདྷ ཀཱམེཏི གཱཐཱ། ཏཏྠ སངྒནྟི སཏྟཝིདྷཾ སངྒཉྩ ཡོ ཨཙྩཏརི ནཱཛ྄ཛྷེཏཱིཏི ནཱབྷིཛ྄ཛྷཱཡཏི།
955. Evaṃ apihento ca – yodha kāmeti gāthā. Tattha saṅganti sattavidhaṃ saṅgañca yo accatari nājjhetīti nābhijjhāyati.
༩༥༦. ཏསྨཱ ཏུམྷེསུཔི ཡོ ཨེཝརཱུཔོ ཧོཏུམིཙྪཏི, ཏཾ ཝདཱམི – ཡཾ པུབྦེཏི གཱཐཱ། ཏཏྠ ཡཾ པུབྦེཏི ཨཏཱིཏེ སངྑཱརེ ཨཱརབྦྷ ཨུཔྤཛྫནདྷམྨཾ ཀིལེསཛཱཏཾ ཨཏཱིཏཀམྨཉྩ། པཙྪཱ ཏེ མཱཧུ ཀིཉྩནནྟི ཨནཱགཏེཔི སངྑཱརེ ཨཱརབྦྷ ཨུཔྤཛྫནདྷམྨཾ རཱགཱདིཀིཉྩནཾ མཱཧུ། མཛ྄ཛྷེ ཙེ ནོ གཧེསྶསཱིཏི པཙྩུཔྤནྣེ རཱུཔཱདིདྷམྨེཔི ན གཧེསྶསི ཙེ།
956. Tasmā tumhesupi yo evarūpo hotumicchati, taṃ vadāmi – yaṃ pubbeti gāthā. Tattha yaṃ pubbeti atīte saṅkhāre ārabbha uppajjanadhammaṃ kilesajātaṃ atītakammañca. Pacchā te māhu kiñcananti anāgatepi saṅkhāre ārabbha uppajjanadhammaṃ rāgādikiñcanaṃ māhu. Majjhe ce no gahessasīti paccuppanne rūpādidhammepi na gahessasi ce.
༩༥༧. ཨེཝཾ ‘‘ཨུཔསནྟོ ཙརིསྶསཱི’’ཏི ཨརཧཏྟཔྤཏྟིཾ དསྶེཏྭཱ ཨིདཱནི ཨརཧཏོ ཐུཏིཝསེན ཨིཏོ པརཱ གཱཐཱཡོ ཨབྷཱསི། ཏཏྠ སབྦསོཏི གཱཐཱཡ མམཱཡིཏནྟི མམཏྟཀརཎཾ, ‘‘མམ ཨིད’’ནྟི གཧིཏཾ ཝཱ ཝཏྠུ། ཨསཏཱ ཙ ན སོཙཏཱིཏི ཨཝིཛྫམཱནཀཱརཎཱ ཨསནྟཀཱརཎཱ ན སོཙཏི། ན ཛཱིཡཏཱིཏི ཛཱནིམྤི ན གཙྪཏི།
957. Evaṃ ‘‘upasanto carissasī’’ti arahattappattiṃ dassetvā idāni arahato thutivasena ito parā gāthāyo abhāsi. Tattha sabbasoti gāthāya mamāyitanti mamattakaraṇaṃ, ‘‘mama ida’’nti gahitaṃ vā vatthu. Asatā ca na socatīti avijjamānakāraṇā asantakāraṇā na socati. Na jīyatīti jānimpi na gacchati.
༩༥༨-༩. ཀིཉྩ བྷིཡྻོ – ཡསྶ ནཏྠཱིཏི གཱཐཱ། ཏཏྠ ཀིཉྩནནྟི ཀིཉྩི རཱུཔཱདིདྷམྨཛཱཏཾ། ཀིཉྩ བྷིཡྻོ – ཨནིཊྛུརཱིཏི གཱཐཱ། ཏཏྠ ཨནིཊྛུརཱིཏི ཨནིསྶུཀཱི། ‘‘ཨནིདྡྷུརཱི’’ཏིཔི ཀེཙི པཋནྟི། སབྦདྷཱི སམོཏི སབྦཏྠ སམོ, ཨུཔེཀྑཀོཏི ཨདྷིཔྤཱཡོ། ཀིཾ ཝུཏྟཾ ཧོཏི? ཡོ སོ ‘‘ནཏྠི མེ’’ཏི ན སོཙཏི, ཏམཧཾ ཨཝིཀམྤིནཾ པུགྒལཾ པུཊྛོ སམཱནོ ཨནིཊྛུརཱི ཨནནུགིདྡྷོ ཨནེཛོ སབྦདྷི སམོཏི ཨིམཾ ཏསྨིཾ པུགྒལེ ཙཏུབྦིདྷམཱནིསཾསཾ བྲཱུམཱིཏི།
958-9. Kiñca bhiyyo – yassa natthīti gāthā. Tattha kiñcananti kiñci rūpādidhammajātaṃ. Kiñca bhiyyo – aniṭṭhurīti gāthā. Tattha aniṭṭhurīti anissukī. ‘‘Aniddhurī’’tipi keci paṭhanti. Sabbadhī samoti sabbattha samo, upekkhakoti adhippāyo. Kiṃ vuttaṃ hoti? Yo so ‘‘natthi me’’ti na socati, tamahaṃ avikampinaṃ puggalaṃ puṭṭho samāno aniṭṭhurī ananugiddho anejo sabbadhi samoti imaṃ tasmiṃ puggale catubbidhamānisaṃsaṃ brūmīti.
༩༦༠. ཀིཉྩ བྷིཡྻོ – ཨནེཛསྶཱཏི གཱཐཱ། ཏཏྠ ནིསངྑཏཱིཏི པུཉྙཱབྷིསངྑཱརཱདཱིསུ ཡོ ཀོཙི སངྑཱརོ། སོ ཧི ཡསྨཱ ནིསངྑརིཡཏི ནིསངྑརོཏི ཝཱ, ཏསྨཱ ‘‘ནིསངྑཏཱི’’ཏི ཝུཙྩཏི། ཝིཡཱརམྦྷཱཏི ཝིཝིདྷཱ པུཉྙཱབྷིསངྑཱརཱདིཀཱ ཨཱརམྦྷཱ། ཁེམཾ པསྶཏི སབྦདྷཱིཏི སབྦཏྠ ཨབྷཡམེཝ པསྶཏི།
960. Kiñca bhiyyo – anejassāti gāthā. Tattha nisaṅkhatīti puññābhisaṅkhārādīsu yo koci saṅkhāro. So hi yasmā nisaṅkhariyati nisaṅkharoti vā, tasmā ‘‘nisaṅkhatī’’ti vuccati. Viyārambhāti vividhā puññābhisaṅkhārādikā ārambhā. Khemaṃ passati sabbadhīti sabbattha abhayameva passati.
༩༦༡. ཨེཝཾ པསྶནྟོ ན སམེསཱུཏི གཱཐཱ། ཏཏྠ ན ཝདཏེཏི ‘‘སདིསོཧམསྨཱི’’ཏིཨཱདིནཱ མཱནཝསེན སམེསུཔི ཨཏྟཱནཾ ན ཝདཏི ཨོམེསུཔི ཨུསྶེསུཔི། ནཱདེཏི ན ནིརསྶཏཱིཏི རཱུཔཱདཱིསུ ཀཉྩི དྷམྨཾ ན གཎྷཱཏི; ན ནིསྶཛྫཏི། སེསཾ སབྦཏྠ པཱཀཊམེཝ། ཨེཝཾ ཨརཧཏྟནིཀཱུཊེན དེསནཾ ནིཊྛཱཔེསི, དེསནཱཔརིཡོསཱནེ པཉྩསཏཱ སཱཀིཡཀུམཱརཱ ཙ ཀོལིཡཀུམཱརཱ ཙ ཨེཧིབྷིཀྑུཔབྦཛྫཱཡ པབྦཛིཏཱ, ཏེ གཧེཏྭཱ བྷགཝཱ མཧཱཝནཾ པཱཝིསཱིཏི།
961. Evaṃ passanto na samesūti gāthā. Tattha na vadateti ‘‘sadisohamasmī’’tiādinā mānavasena samesupi attānaṃ na vadati omesupi ussesupi. Nādeti na nirassatīti rūpādīsu kañci dhammaṃ na gaṇhāti; na nissajjati. Sesaṃ sabbattha pākaṭameva. Evaṃ arahattanikūṭena desanaṃ niṭṭhāpesi, desanāpariyosāne pañcasatā sākiyakumārā ca koliyakumārā ca ehibhikkhupabbajjāya pabbajitā, te gahetvā bhagavā mahāvanaṃ pāvisīti.
པརམཏྠཛོཏིཀཱཡ ཁུདྡཀ-ཨཊྛཀཐཱཡ
Paramatthajotikāya khuddaka-aṭṭhakathāya
སུཏྟནིཔཱཏ-ཨཊྛཀཐཱཡ ཨཏྟདཎྜསུཏྟཝཎྞནཱ ནིཊྛིཏཱ།
Suttanipāta-aṭṭhakathāya attadaṇḍasuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཁུདྡཀནིཀཱཡ • Khuddakanikāya / སུཏྟནིཔཱཏཔཱལི༹ • Suttanipātapāḷi / ༡༥. ཨཏྟདཎྜསུཏྟཾ • 15. Attadaṇḍasuttaṃ
