| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
5. அத்ததீ³பவக்³கோ³
5. Attadīpavaggo
1. அத்ததீ³பஸுத்தங்
1. Attadīpasuttaṃ
43. ஸாவத்தி²னிதா³னங் . ‘‘அத்ததீ³பா, பி⁴க்க²வே, விஹரத² அத்தஸரணா அனஞ்ஞஸரணா, த⁴ம்மதீ³பா த⁴ம்மஸரணா அனஞ்ஞஸரணா. அத்ததீ³பானங், பி⁴க்க²வே, விஹரதங் அத்தஸரணானங் அனஞ்ஞஸரணானங், த⁴ம்மதீ³பானங் த⁴ம்மஸரணானங் அனஞ்ஞஸரணானங் யோனி உபபரிக்கி²தப்³பா³. கிங்ஜாதிகா ஸோகபரிதே³வது³க்க²தோ³மனஸ்ஸுபாயாஸா, கிங்பஹோதிகா’’தி?
43. Sāvatthinidānaṃ . ‘‘Attadīpā, bhikkhave, viharatha attasaraṇā anaññasaraṇā, dhammadīpā dhammasaraṇā anaññasaraṇā. Attadīpānaṃ, bhikkhave, viharataṃ attasaraṇānaṃ anaññasaraṇānaṃ, dhammadīpānaṃ dhammasaraṇānaṃ anaññasaraṇānaṃ yoni upaparikkhitabbā. Kiṃjātikā sokaparidevadukkhadomanassupāyāsā, kiṃpahotikā’’ti?
‘‘கிங்ஜாதிகா ச, பி⁴க்க²வே, ஸோகபரிதே³வது³க்க²தோ³மனஸ்ஸுபாயாஸா, கிங்பஹோதிகா? இத⁴, பி⁴க்க²வே, அஸ்ஸுதவா புது²ஜ்ஜனோ அரியானங் அத³ஸ்ஸாவீ அரியத⁴ம்மஸ்ஸ அகோவிதோ³ அரியத⁴ம்மே அவினீதோ, ஸப்புரிஸானங் அத³ஸ்ஸாவீ ஸப்புரிஸத⁴ம்மஸ்ஸ அகோவிதோ³ ஸப்புரிஸத⁴ம்மே அவினீதோ, ரூபங் அத்ததோ ஸமனுபஸ்ஸதி, ரூபவந்தங் வா அத்தானங்; அத்தனி வா ரூபங், ரூபஸ்மிங் வா அத்தானங். தஸ்ஸ தங் ரூபங் விபரிணமதி, அஞ்ஞதா² ச ஹோதி. தஸ்ஸ ரூபவிபரிணாமஞ்ஞதா²பா⁴வா உப்பஜ்ஜந்தி ஸோகபரிதே³வது³க்க²தோ³மனஸ்ஸுபாயாஸா. வேத³னங் அத்ததோ ஸமனுபஸ்ஸதி, வேத³னாவந்தங் வா அத்தானங்; அத்தனி வா வேத³னங், வேத³னாய வா அத்தானங். தஸ்ஸ ஸா வேத³னா விபரிணமதி, அஞ்ஞதா² ச ஹோதி. தஸ்ஸ வேத³னாவிபரிணாமஞ்ஞதா²பா⁴வா உப்பஜ்ஜந்தி ஸோகபரிதே³வது³க்க²தோ³மனஸ்ஸுபாயாஸா. ஸஞ்ஞங் அத்ததோ ஸமனுபஸ்ஸதி… ஸங்கா²ரே அத்ததோ ஸமனுபஸ்ஸதி… விஞ்ஞாணங் அத்ததோ ஸமனுபஸ்ஸதி, விஞ்ஞாணவந்தங் வா அத்தானங்; அத்தனி வா விஞ்ஞாணங், விஞ்ஞாணஸ்மிங் வா அத்தானங். தஸ்ஸ தங் விஞ்ஞாணங் விபரிணமதி, அஞ்ஞதா² ச ஹோதி . தஸ்ஸ விஞ்ஞாணவிபரிணாமஞ்ஞதா²பா⁴வா உப்பஜ்ஜந்தி ஸோகபரிதே³வது³க்க²தோ³மனஸ்ஸுபாயாஸா.
‘‘Kiṃjātikā ca, bhikkhave, sokaparidevadukkhadomanassupāyāsā, kiṃpahotikā? Idha, bhikkhave, assutavā puthujjano ariyānaṃ adassāvī ariyadhammassa akovido ariyadhamme avinīto, sappurisānaṃ adassāvī sappurisadhammassa akovido sappurisadhamme avinīto, rūpaṃ attato samanupassati, rūpavantaṃ vā attānaṃ; attani vā rūpaṃ, rūpasmiṃ vā attānaṃ. Tassa taṃ rūpaṃ vipariṇamati, aññathā ca hoti. Tassa rūpavipariṇāmaññathābhāvā uppajjanti sokaparidevadukkhadomanassupāyāsā. Vedanaṃ attato samanupassati, vedanāvantaṃ vā attānaṃ; attani vā vedanaṃ, vedanāya vā attānaṃ. Tassa sā vedanā vipariṇamati, aññathā ca hoti. Tassa vedanāvipariṇāmaññathābhāvā uppajjanti sokaparidevadukkhadomanassupāyāsā. Saññaṃ attato samanupassati… saṅkhāre attato samanupassati… viññāṇaṃ attato samanupassati, viññāṇavantaṃ vā attānaṃ; attani vā viññāṇaṃ, viññāṇasmiṃ vā attānaṃ. Tassa taṃ viññāṇaṃ vipariṇamati, aññathā ca hoti . Tassa viññāṇavipariṇāmaññathābhāvā uppajjanti sokaparidevadukkhadomanassupāyāsā.
‘‘ரூபஸ்ஸ த்வேவ, பி⁴க்க²வே, அனிச்சதங் விதி³த்வா விபரிணாமங் விராக³ங் நிரோத⁴ங் 1, புப்³பே³ சேவ ரூபங் ஏதரஹி ச ஸப்³ப³ங் ரூபங் அனிச்சங் து³க்க²ங் விபரிணாமத⁴ம்மந்தி, ஏவமேதங் யதா²பூ⁴தங் ஸம்மப்பஞ்ஞாய பஸ்ஸதோ யே ஸோகபரிதே³வது³க்க²தோ³மனஸ்ஸுபாயாஸா தே பஹீயந்தி. தேஸங் பஹானா ந பரிதஸ்ஸதி, அபரிதஸ்ஸங் ஸுக²ங் விஹரதி, ஸுக²விஹாரீ பி⁴க்கு² ‘தத³ங்க³னிப்³பு³தோ’தி வுச்சதி. வேத³னாய த்வேவ, பி⁴க்க²வே, அனிச்சதங் விதி³த்வா விபரிணாமங் விராக³ங் நிரோத⁴ங், புப்³பே³ சேவ வேத³னா ஏதரஹி ச ஸப்³பா³ வேத³னா அனிச்சா து³க்கா² விபரிணாமத⁴ம்மாதி, ஏவமேதங் யதா²பூ⁴தங் ஸம்மப்பஞ்ஞாய பஸ்ஸதோ யே ஸோகபரிதே³வது³க்க²தோ³மனஸ்ஸுபாயாஸா தே பஹீயந்தி. தேஸங் பஹானா ந பரிதஸ்ஸதி, அபரிதஸ்ஸங் ஸுக²ங் விஹரதி, ஸுக²விஹாரீ பி⁴க்கு² ‘தத³ங்க³னிப்³பு³தோ’தி வுச்சதி. ஸஞ்ஞாய… ஸங்கா²ரானங் த்வேவ, பி⁴க்க²வே, அனிச்சதங் விதி³த்வா விபரிணாமங் விராக³ங் நிரோத⁴ங், புப்³பே³ சேவ ஸங்கா²ரா ஏதரஹி ச ஸப்³பே³ ஸங்கா²ரா அனிச்சா து³க்கா² விபரிணாமத⁴ம்மாதி, ஏவமேதங் யதா²பூ⁴தங் ஸம்மப்பஞ்ஞாய பஸ்ஸதோ யே ஸோகபரிதே³வது³க்க²தோ³மனஸ்ஸுபாயாஸா தே பஹீயந்தி. தேஸங் பஹானா ந பரிதஸ்ஸதி, அபரிதஸ்ஸங் ஸுக²ங் விஹரதி, ஸுக²விஹாரீ பி⁴க்கு² ‘தத³ங்க³னிப்³பு³தோ’தி வுச்சதி. விஞ்ஞாணஸ்ஸ த்வேவ, பி⁴க்க²வே, அனிச்சதங் விதி³த்வா விபரிணாமங் விராக³ங் நிரோத⁴ங், புப்³பே³ சேவ விஞ்ஞாணங் ஏதரஹி ச ஸப்³ப³ங் விஞ்ஞாணங் அனிச்சங் து³க்க²ங் விபரிணாமத⁴ம்மந்தி, ஏவமேதங் யதா²பூ⁴தங் ஸம்மப்பஞ்ஞாய பஸ்ஸதோ யே ஸோகபரிதே³வது³க்க²தோ³மனஸ்ஸுபாயாஸா தே பஹீயந்தி. தேஸங் பஹானா ந பரிதஸ்ஸதி, அபரிதஸ்ஸங் ஸுக²ங் விஹரதி, ஸுக²விஹாரீ பி⁴க்கு² ‘தத³ங்க³னிப்³பு³தோ’தி வுச்சதீ’’தி. பட²மங்.
‘‘Rūpassa tveva, bhikkhave, aniccataṃ viditvā vipariṇāmaṃ virāgaṃ nirodhaṃ 2, pubbe ceva rūpaṃ etarahi ca sabbaṃ rūpaṃ aniccaṃ dukkhaṃ vipariṇāmadhammanti, evametaṃ yathābhūtaṃ sammappaññāya passato ye sokaparidevadukkhadomanassupāyāsā te pahīyanti. Tesaṃ pahānā na paritassati, aparitassaṃ sukhaṃ viharati, sukhavihārī bhikkhu ‘tadaṅganibbuto’ti vuccati. Vedanāya tveva, bhikkhave, aniccataṃ viditvā vipariṇāmaṃ virāgaṃ nirodhaṃ, pubbe ceva vedanā etarahi ca sabbā vedanā aniccā dukkhā vipariṇāmadhammāti, evametaṃ yathābhūtaṃ sammappaññāya passato ye sokaparidevadukkhadomanassupāyāsā te pahīyanti. Tesaṃ pahānā na paritassati, aparitassaṃ sukhaṃ viharati, sukhavihārī bhikkhu ‘tadaṅganibbuto’ti vuccati. Saññāya… saṅkhārānaṃ tveva, bhikkhave, aniccataṃ viditvā vipariṇāmaṃ virāgaṃ nirodhaṃ, pubbe ceva saṅkhārā etarahi ca sabbe saṅkhārā aniccā dukkhā vipariṇāmadhammāti, evametaṃ yathābhūtaṃ sammappaññāya passato ye sokaparidevadukkhadomanassupāyāsā te pahīyanti. Tesaṃ pahānā na paritassati, aparitassaṃ sukhaṃ viharati, sukhavihārī bhikkhu ‘tadaṅganibbuto’ti vuccati. Viññāṇassa tveva, bhikkhave, aniccataṃ viditvā vipariṇāmaṃ virāgaṃ nirodhaṃ, pubbe ceva viññāṇaṃ etarahi ca sabbaṃ viññāṇaṃ aniccaṃ dukkhaṃ vipariṇāmadhammanti, evametaṃ yathābhūtaṃ sammappaññāya passato ye sokaparidevadukkhadomanassupāyāsā te pahīyanti. Tesaṃ pahānā na paritassati, aparitassaṃ sukhaṃ viharati, sukhavihārī bhikkhu ‘tadaṅganibbuto’ti vuccatī’’ti. Paṭhamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 1. அத்ததீ³பஸுத்தவண்ணனா • 1. Attadīpasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 1. அத்ததீ³பஸுத்தவண்ணனா • 1. Attadīpasuttavaṇṇanā
