| Library / Tipiṭaka / তিপিটক • Tipiṭaka / সংযুত্তনিকায (অট্ঠকথা) • Saṃyuttanikāya (aṭṭhakathā) |
৫. অত্তদীপৰগ্গো
5. Attadīpavaggo
১. অত্তদীপসুত্তৰণ্ণনা
1. Attadīpasuttavaṇṇanā
৪৩. অত্তদীপৰগ্গস্স পঠমে অত্তদীপাতি অত্তানং দীপং তাণং লেণং গতিং পরাযণং পতিট্ঠং কত্ৰা ৰিহরথাতি অত্থো। অত্তসরণাতি ইদং তস্সেৰ ৰেৰচনং। অনঞ্ঞসরণাতি ইদং অঞ্ঞস্স সরণপটিক্খেপৰচনং। ন হি অঞ্ঞো অঞ্ঞস্স সরণং হোতি অঞ্ঞস্স ৰাযামেন অঞ্ঞস্স অসিজ্ঝনতো, ৰুত্তম্পি চেতং –
43. Attadīpavaggassa paṭhame attadīpāti attānaṃ dīpaṃ tāṇaṃ leṇaṃ gatiṃ parāyaṇaṃ patiṭṭhaṃ katvā viharathāti attho. Attasaraṇāti idaṃ tasseva vevacanaṃ. Anaññasaraṇāti idaṃ aññassa saraṇapaṭikkhepavacanaṃ. Na hi añño aññassa saraṇaṃ hoti aññassa vāyāmena aññassa asijjhanato, vuttampi cetaṃ –
‘‘অত্তা হি অত্তনো নাথো,
‘‘Attā hi attano nātho,
কো হি নাথো পরো সিযা’’তি॥ (ধ॰ প॰ ১৬০)।
Ko hi nātho paro siyā’’ti. (dha. pa. 160);
তেনাহ ‘‘অনঞ্ঞসরণা’’তি। কো পনেত্থ অত্তা নাম? লোকিযলোকুত্তরো ধম্মো। তেনেৰাহ – ‘‘ধম্মদীপা ধম্মসরণা অনঞ্ঞসরণা’’তি। যোনীতি কারণং – ‘‘যোনি হেসা, ভূমিজ, ফলস্স অধিগমাযা’’তিআদীসু (ম॰ নি॰ ৩.২২৭) ৰিয। কিংপহোতিকাতি কিংপভুতিকা, কুতো পভৰন্তীতি অত্থো? রূপস্স ত্ৰেৰাতি ইদং তেসংযেৰ সোকাদীনং পহানদস্সনত্থং আরদ্ধং। ন পরিতস্সতীতি ন গণ্হাতি ন গহতি। তদঙ্গনিব্বুতোতি তেন ৰিপস্সনঙ্গেন কিলেসানং নিব্বুতত্তা তদঙ্গনিব্বুতো। ইমস্মিং সুত্তে ৰিপস্সনাৰ কথিতা। পঠমং।
Tenāha ‘‘anaññasaraṇā’’ti. Ko panettha attā nāma? Lokiyalokuttaro dhammo. Tenevāha – ‘‘dhammadīpā dhammasaraṇā anaññasaraṇā’’ti. Yonīti kāraṇaṃ – ‘‘yoni hesā, bhūmija, phalassa adhigamāyā’’tiādīsu (ma. ni. 3.227) viya. Kiṃpahotikāti kiṃpabhutikā, kuto pabhavantīti attho? Rūpassa tvevāti idaṃ tesaṃyeva sokādīnaṃ pahānadassanatthaṃ āraddhaṃ. Na paritassatīti na gaṇhāti na gahati. Tadaṅganibbutoti tena vipassanaṅgena kilesānaṃ nibbutattā tadaṅganibbuto. Imasmiṃ sutte vipassanāva kathitā. Paṭhamaṃ.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ১. অত্তদীপসুত্তং • 1. Attadīpasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ১. অত্তদীপসুত্তৰণ্ণনা • 1. Attadīpasuttavaṇṇanā
