| Library / Tipiṭaka / តិបិដក • Tipiṭaka / សំយុត្តនិកាយ (ដីកា) • Saṃyuttanikāya (ṭīkā) |
៥. អត្តទីបវគ្គោ
5. Attadīpavaggo
១. អត្តទីបសុត្តវណ្ណនា
1. Attadīpasuttavaṇṇanā
៤៣. ទ្វីហិ ភាគេហិ អាបោ ឯត្ថ គតាតិ ទីបោ, ទីបោ វិយាតិ ទីបោ ឱឃេហិ អនជ្ឈោត្ថរនីយតាយ។ យោ បរោ ន ហោតិ, សោ អត្តា, ឥធ បន ធម្មោ អធិប្បេតោ។ អត្តា ទីបោ ឯតេសន្តិ អត្តទីបា។ បដិសរណត្ថោ ទីបដ្ឋោតិ អាហ – ‘‘អត្តសរណាតិ ឥទំ តស្សេវ វេវចន’’ន្តិ។ លោកិយលោកុត្តរោ ធម្មោ អត្តា នាម ឯកន្តនាថភាវតោ។ បឋមេន បទេន វុត្តោ ឯវ អត្ថោ ទុតិយបទេន វុច្ចតីតិ វុត្តំ ‘‘តេនេវាហា’’តិអាទិ។ យវតិ ឯតស្មា ផលំ បសវតីតិ យោនិ, ការណំ។ កិំ បភុតិ ឧប្បត្តិដ្ឋានំ ឯតេសន្តិ កិំ បភុតិកា។ បហានទស្សនត្ថំ អារទ្ធំ។ តេនេវាហ ‘‘បុព្ពេ ចេវ…បេ.… តេ បហីយន្តី’’តិ។ ន បរិតស្សតិ តណ្ហាបរិត្តាសស្ស អភាវតោ។ វិបស្សនង្គេនាតិ វិបស្សនាសង្ខាតេន ការណេន។
43. Dvīhi bhāgehi āpo ettha gatāti dīpo, dīpo viyāti dīpo oghehi anajjhottharanīyatāya. Yo paro na hoti, so attā, idha pana dhammo adhippeto. Attā dīpo etesanti attadīpā. Paṭisaraṇattho dīpaṭṭhoti āha – ‘‘attasaraṇāti idaṃ tasseva vevacana’’nti. Lokiyalokuttaro dhammo attā nāma ekantanāthabhāvato. Paṭhamena padena vutto eva attho dutiyapadena vuccatīti vuttaṃ ‘‘tenevāhā’’tiādi. Yavati etasmā phalaṃ pasavatīti yoni, kāraṇaṃ. Kiṃ pabhuti uppattiṭṭhānaṃ etesanti kiṃ pabhutikā. Pahānadassanatthaṃ āraddhaṃ. Tenevāha ‘‘pubbe ceva…pe… te pahīyantī’’ti. Na paritassati taṇhāparittāsassa abhāvato. Vipassanaṅgenāti vipassanāsaṅkhātena kāraṇena.
អត្តទីបសុត្តវណ្ណនា និដ្ឋិតា។
Attadīpasuttavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ១. អត្តទីបសុត្តំ • 1. Attadīpasuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ១. អត្តទីបសុត្តវណ្ណនា • 1. Attadīpasuttavaṇṇanā
