| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၅. အတ္တဒီပဝဂ္ဂော
5. Attadīpavaggo
၁. အတ္တဒီပသုတ္တဝဏ္ဏနာ
1. Attadīpasuttavaṇṇanā
၄၃. ဒ္ဝီဟိ ဘာဂေဟိ အာပော ဧတ္ထ ဂတာတိ ဒီပော, ဒီပော ဝိယာတိ ဒီပော ဩဃေဟိ အနဇ္ဈောတ္ထရနီယတာယ။ ယော ပရော န ဟောတိ, သော အတ္တာ, ဣဓ ပန ဓမ္မော အဓိပ္ပေတော။ အတ္တာ ဒီပော ဧတေသန္တိ အတ္တဒီပာ။ ပဋိသရဏတ္ထော ဒီပဋ္ဌောတိ အာဟ – ‘‘အတ္တသရဏာတိ ဣဒံ တသ္သေဝ ဝေဝစန’’န္တိ။ လောကိယလောကုတ္တရော ဓမ္မော အတ္တာ နာမ ဧကန္တနာထဘာဝတော။ ပဌမေန ပဒေန ဝုတ္တော ဧဝ အတ္ထော ဒုတိယပဒေန ဝုစ္စတီတိ ဝုတ္တံ ‘‘တေနေဝာဟာ’’တိအာဒိ။ ယဝတိ ဧတသ္မာ ဖလံ ပသဝတီတိ ယောနိ, ကာရဏံ။ ကိံ ပဘုတိ ဥပ္ပတ္တိဋ္ဌာနံ ဧတေသန္တိ ကိံ ပဘုတိကာ။ ပဟာနဒသ္သနတ္ထံ အာရဒ္ဓံ။ တေနေဝာဟ ‘‘ပုဗ္ဗေ စေဝ။ပေ.။ တေ ပဟီယန္တီ’’တိ။ န ပရိတသ္သတိ တဏ္ဟာပရိတ္တာသသ္သ အဘာဝတော။ ဝိပသ္သနင္ဂေနာတိ ဝိပသ္သနာသင္ခာတေန ကာရဏေန။
43. Dvīhi bhāgehi āpo ettha gatāti dīpo, dīpo viyāti dīpo oghehi anajjhottharanīyatāya. Yo paro na hoti, so attā, idha pana dhammo adhippeto. Attā dīpo etesanti attadīpā. Paṭisaraṇattho dīpaṭṭhoti āha – ‘‘attasaraṇāti idaṃ tasseva vevacana’’nti. Lokiyalokuttaro dhammo attā nāma ekantanāthabhāvato. Paṭhamena padena vutto eva attho dutiyapadena vuccatīti vuttaṃ ‘‘tenevāhā’’tiādi. Yavati etasmā phalaṃ pasavatīti yoni, kāraṇaṃ. Kiṃ pabhuti uppattiṭṭhānaṃ etesanti kiṃ pabhutikā. Pahānadassanatthaṃ āraddhaṃ. Tenevāha ‘‘pubbe ceva…pe… te pahīyantī’’ti. Na paritassati taṇhāparittāsassa abhāvato. Vipassanaṅgenāti vipassanāsaṅkhātena kāraṇena.
အတ္တဒီပသုတ္တဝဏ္ဏနာ နိဋ္ဌိတာ။
Attadīpasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၁. အတ္တဒီပသုတ္တံ • 1. Attadīpasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၁. အတ္တဒီပသုတ္တဝဏ္ဏနာ • 1. Attadīpasuttavaṇṇanā
