| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) |
೫. ಅತ್ತದೀಪವಗ್ಗೋ
5. Attadīpavaggo
೧. ಅತ್ತದೀಪಸುತ್ತವಣ್ಣನಾ
1. Attadīpasuttavaṇṇanā
೪೩. ಅತ್ತದೀಪವಗ್ಗಸ್ಸ ಪಠಮೇ ಅತ್ತದೀಪಾತಿ ಅತ್ತಾನಂ ದೀಪಂ ತಾಣಂ ಲೇಣಂ ಗತಿಂ ಪರಾಯಣಂ ಪತಿಟ್ಠಂ ಕತ್ವಾ ವಿಹರಥಾತಿ ಅತ್ಥೋ। ಅತ್ತಸರಣಾತಿ ಇದಂ ತಸ್ಸೇವ ವೇವಚನಂ। ಅನಞ್ಞಸರಣಾತಿ ಇದಂ ಅಞ್ಞಸ್ಸ ಸರಣಪಟಿಕ್ಖೇಪವಚನಂ। ನ ಹಿ ಅಞ್ಞೋ ಅಞ್ಞಸ್ಸ ಸರಣಂ ಹೋತಿ ಅಞ್ಞಸ್ಸ ವಾಯಾಮೇನ ಅಞ್ಞಸ್ಸ ಅಸಿಜ್ಝನತೋ, ವುತ್ತಮ್ಪಿ ಚೇತಂ –
43. Attadīpavaggassa paṭhame attadīpāti attānaṃ dīpaṃ tāṇaṃ leṇaṃ gatiṃ parāyaṇaṃ patiṭṭhaṃ katvā viharathāti attho. Attasaraṇāti idaṃ tasseva vevacanaṃ. Anaññasaraṇāti idaṃ aññassa saraṇapaṭikkhepavacanaṃ. Na hi añño aññassa saraṇaṃ hoti aññassa vāyāmena aññassa asijjhanato, vuttampi cetaṃ –
‘‘ಅತ್ತಾ ಹಿ ಅತ್ತನೋ ನಾಥೋ,
‘‘Attā hi attano nātho,
ಕೋ ಹಿ ನಾಥೋ ಪರೋ ಸಿಯಾ’’ತಿ॥ (ಧ॰ ಪ॰ ೧೬೦)।
Ko hi nātho paro siyā’’ti. (dha. pa. 160);
ತೇನಾಹ ‘‘ಅನಞ್ಞಸರಣಾ’’ತಿ। ಕೋ ಪನೇತ್ಥ ಅತ್ತಾ ನಾಮ? ಲೋಕಿಯಲೋಕುತ್ತರೋ ಧಮ್ಮೋ। ತೇನೇವಾಹ – ‘‘ಧಮ್ಮದೀಪಾ ಧಮ್ಮಸರಣಾ ಅನಞ್ಞಸರಣಾ’’ತಿ। ಯೋನೀತಿ ಕಾರಣಂ – ‘‘ಯೋನಿ ಹೇಸಾ, ಭೂಮಿಜ, ಫಲಸ್ಸ ಅಧಿಗಮಾಯಾ’’ತಿಆದೀಸು (ಮ॰ ನಿ॰ ೩.೨೨೭) ವಿಯ। ಕಿಂಪಹೋತಿಕಾತಿ ಕಿಂಪಭುತಿಕಾ, ಕುತೋ ಪಭವನ್ತೀತಿ ಅತ್ಥೋ? ರೂಪಸ್ಸ ತ್ವೇವಾತಿ ಇದಂ ತೇಸಂಯೇವ ಸೋಕಾದೀನಂ ಪಹಾನದಸ್ಸನತ್ಥಂ ಆರದ್ಧಂ। ನ ಪರಿತಸ್ಸತೀತಿ ನ ಗಣ್ಹಾತಿ ನ ಗಹತಿ। ತದಙ್ಗನಿಬ್ಬುತೋತಿ ತೇನ ವಿಪಸ್ಸನಙ್ಗೇನ ಕಿಲೇಸಾನಂ ನಿಬ್ಬುತತ್ತಾ ತದಙ್ಗನಿಬ್ಬುತೋ। ಇಮಸ್ಮಿಂ ಸುತ್ತೇ ವಿಪಸ್ಸನಾವ ಕಥಿತಾ। ಪಠಮಂ।
Tenāha ‘‘anaññasaraṇā’’ti. Ko panettha attā nāma? Lokiyalokuttaro dhammo. Tenevāha – ‘‘dhammadīpā dhammasaraṇā anaññasaraṇā’’ti. Yonīti kāraṇaṃ – ‘‘yoni hesā, bhūmija, phalassa adhigamāyā’’tiādīsu (ma. ni. 3.227) viya. Kiṃpahotikāti kiṃpabhutikā, kuto pabhavantīti attho? Rūpassa tvevāti idaṃ tesaṃyeva sokādīnaṃ pahānadassanatthaṃ āraddhaṃ. Na paritassatīti na gaṇhāti na gahati. Tadaṅganibbutoti tena vipassanaṅgena kilesānaṃ nibbutattā tadaṅganibbuto. Imasmiṃ sutte vipassanāva kathitā. Paṭhamaṃ.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೧. ಅತ್ತದೀಪಸುತ್ತಂ • 1. Attadīpasuttaṃ
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) / ೧. ಅತ್ತದೀಪಸುತ್ತವಣ್ಣನಾ • 1. Attadīpasuttavaṇṇanā
