| Library / Tipiṭaka / তিপিটক • Tipiṭaka / মহাৰিভঙ্গ • Mahāvibhaṅga |
৪. অত্তকামপারিচরিযসিক্খাপদং
4. Attakāmapāricariyasikkhāpadaṃ
২৯০. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন আযস্মা উদাযী সাৰত্থিযং কুলূপকো হোতি, বহুকানি কুলানি উপসঙ্কমতি। তেন খো পন সমযেন অঞ্ঞতরা ইত্থী মতপতিকা অভিরূপা হোতি দস্সনীযা পাসাদিকা। অথ খো আযস্মা উদাযী পুব্বণ্হসমযং নিৰাসেত্ৰা পত্তচীৰরমাদায যেন তস্সা ইত্থিযা নিৰেসনং তেনুপসঙ্কমি; উপসঙ্কমিত্ৰা পঞ্ঞত্তে আসনে নিসীদি। অথ খো সা ইত্থী যেনাযস্মা উদাযী তেনুপসঙ্কমি; উপসঙ্কমিত্ৰা আযস্মন্তং উদাযিং অভিৰাদেত্ৰা একমন্তং নিসীদি। একমন্তং নিসিন্নং খো তং ইত্থিং আযস্মা উদাযী ধম্মিযা কথায সন্দস্সেসি সমাদপেসি সমুত্তেজেসি সম্পহংসেসি। অথ খো সা ইত্থী আযস্মতা উদাযিনা ধম্মিযা কথায সন্দস্সিতা সমাদপিতা সমুত্তেজিতা সম্পহংসিতা আযস্মন্তং উদাযিং এতদৰোচ – ‘‘ৰদেয্যাথ, ভন্তে, যেন অত্থো। পটিবলা মযং অয্যস্স দাতুং যদিদং চীৰরপিণ্ডপাতসেনাসনগিলানপ্পচ্চযভেসজ্জপরিক্খার’’ন্তি।
290. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena āyasmā udāyī sāvatthiyaṃ kulūpako hoti, bahukāni kulāni upasaṅkamati. Tena kho pana samayena aññatarā itthī matapatikā abhirūpā hoti dassanīyā pāsādikā. Atha kho āyasmā udāyī pubbaṇhasamayaṃ nivāsetvā pattacīvaramādāya yena tassā itthiyā nivesanaṃ tenupasaṅkami; upasaṅkamitvā paññatte āsane nisīdi. Atha kho sā itthī yenāyasmā udāyī tenupasaṅkami; upasaṅkamitvā āyasmantaṃ udāyiṃ abhivādetvā ekamantaṃ nisīdi. Ekamantaṃ nisinnaṃ kho taṃ itthiṃ āyasmā udāyī dhammiyā kathāya sandassesi samādapesi samuttejesi sampahaṃsesi. Atha kho sā itthī āyasmatā udāyinā dhammiyā kathāya sandassitā samādapitā samuttejitā sampahaṃsitā āyasmantaṃ udāyiṃ etadavoca – ‘‘vadeyyātha, bhante, yena attho. Paṭibalā mayaṃ ayyassa dātuṃ yadidaṃ cīvarapiṇḍapātasenāsanagilānappaccayabhesajjaparikkhāra’’nti.
‘‘ন খো তে, ভগিনি, অম্হাকং দুল্লভা যদিদং চীৰরপিণ্ডপাতসেনাসনগিলানপ্পচ্চযভেসজ্জপরিক্খারা। অপিচ, যো অম্হাকং দুল্লভো তং দেহী’’তি। ‘‘কিং, ভন্তে’’তি? ‘‘মেথুনধম্ম’’ন্তি। ‘‘অত্থো , ভন্তে’’তি? ‘‘অত্থো, ভগিনী’’তি। ‘‘এহি, ভন্তে’’তি, ওৰরকং পৰিসিত্ৰা সাটকং নিক্খিপিত্ৰা মঞ্চকে উত্তানা নিপজ্জি। অথ খো আযস্মা উদাযী যেন সা ইত্থী তেনুপসঙ্কমি; উপসঙ্কমিত্ৰা – ‘‘কো ইমং ৰসলং দুগ্গন্ধং আমসিস্সতী’’তি, নিট্ঠুহিত্ৰা পক্কামি। অথ খো সা ইত্থী উজ্ঝাযতি খিয্যতি ৰিপাচেতি – ‘‘অলজ্জিনো ইমে সমণা সক্যপুত্তিযা দুস্সীলা মুসাৰাদিনো। ইমে হি নাম ধম্মচারিনো সমচারিনো ব্রহ্মচারিনো সচ্চৰাদিনো সীলৰন্তো কল্যাণধম্মা পটিজানিস্সন্তি! নত্থি ইমেসং সামঞ্ঞং নত্থি ইমেসং ব্রহ্মঞ্ঞং, নট্ঠং ইমেসং সামঞ্ঞং নট্ঠং ইমেসং ব্রহ্মঞ্ঞং, কুতো ইমেসং সামঞ্ঞং কুতো ইমেসং ব্রহ্মঞ্ঞং, অপগতা ইমে সামঞ্ঞা অপগতা ইমে ব্রহ্মঞ্ঞা। কথঞ্হি নাম সমণো উদাযী মং সামং মেথুনধম্মং যাচিত্ৰা, ‘কো ইমং ৰসলং দুগ্গন্ধং আমসিস্সতী’’তি নিট্ঠুহিত্ৰা পক্কমিস্সতি! কিং মে পাপকং কিং মে দুগ্গন্ধং, কস্সাহং কেন হাযামী’’তি? অঞ্ঞাপি ইত্থিযো উজ্ঝাযন্তি খিয্যন্তি ৰিপাচেন্তি – ‘‘অলজ্জিনো ইমে সমণা সক্যপুত্তিযা দুস্সীলা মুসাৰাদিনো…পে॰… কথঞ্হি নাম সমণো উদাযী ইমিস্সা সামং মেথুনধম্মং যাচিত্ৰা, ‘কো ইমং ৰসলং দুগ্গন্ধং আমসিস্সতী’তি নিট্ঠুহিত্ৰা পক্কমিস্সতি! কিং ইমিস্সা পাপকং কিং ইমিস্সা দুগ্গন্ধং, কস্সাযং কেন হাযতী’’তি? অস্সোসুং খো ভিক্খূ তাসং ইত্থীনং উজ্ঝাযন্তীনং খিয্যন্তীনং ৰিপাচেন্তীনং। যে তে ভিক্খূ অপ্পিচ্ছা…পে॰… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম আযস্মা উদাযী মাতুগামস্স সন্তিকে অত্তকামপারিচরিযায ৰণ্ণং ভাসিস্সতী’’তি!
‘‘Na kho te, bhagini, amhākaṃ dullabhā yadidaṃ cīvarapiṇḍapātasenāsanagilānappaccayabhesajjaparikkhārā. Apica, yo amhākaṃ dullabho taṃ dehī’’ti. ‘‘Kiṃ, bhante’’ti? ‘‘Methunadhamma’’nti. ‘‘Attho , bhante’’ti? ‘‘Attho, bhaginī’’ti. ‘‘Ehi, bhante’’ti, ovarakaṃ pavisitvā sāṭakaṃ nikkhipitvā mañcake uttānā nipajji. Atha kho āyasmā udāyī yena sā itthī tenupasaṅkami; upasaṅkamitvā – ‘‘ko imaṃ vasalaṃ duggandhaṃ āmasissatī’’ti, niṭṭhuhitvā pakkāmi. Atha kho sā itthī ujjhāyati khiyyati vipāceti – ‘‘alajjino ime samaṇā sakyaputtiyā dussīlā musāvādino. Ime hi nāma dhammacārino samacārino brahmacārino saccavādino sīlavanto kalyāṇadhammā paṭijānissanti! Natthi imesaṃ sāmaññaṃ natthi imesaṃ brahmaññaṃ, naṭṭhaṃ imesaṃ sāmaññaṃ naṭṭhaṃ imesaṃ brahmaññaṃ, kuto imesaṃ sāmaññaṃ kuto imesaṃ brahmaññaṃ, apagatā ime sāmaññā apagatā ime brahmaññā. Kathañhi nāma samaṇo udāyī maṃ sāmaṃ methunadhammaṃ yācitvā, ‘ko imaṃ vasalaṃ duggandhaṃ āmasissatī’’ti niṭṭhuhitvā pakkamissati! Kiṃ me pāpakaṃ kiṃ me duggandhaṃ, kassāhaṃ kena hāyāmī’’ti? Aññāpi itthiyo ujjhāyanti khiyyanti vipācenti – ‘‘alajjino ime samaṇā sakyaputtiyā dussīlā musāvādino…pe… kathañhi nāma samaṇo udāyī imissā sāmaṃ methunadhammaṃ yācitvā, ‘ko imaṃ vasalaṃ duggandhaṃ āmasissatī’ti niṭṭhuhitvā pakkamissati! Kiṃ imissā pāpakaṃ kiṃ imissā duggandhaṃ, kassāyaṃ kena hāyatī’’ti? Assosuṃ kho bhikkhū tāsaṃ itthīnaṃ ujjhāyantīnaṃ khiyyantīnaṃ vipācentīnaṃ. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma āyasmā udāyī mātugāmassa santike attakāmapāricariyāya vaṇṇaṃ bhāsissatī’’ti!
অথ খো তে ভিক্খূ আযস্মন্তং উদাযিং অনেকপরিযাযেন ৰিগরহিত্ৰা ভগৰতো এতমত্থং আরোচেসুং। অথ খো ভগৰা এতস্মিং নিদানে এতস্মিং পকরণে ভিক্খুসঙ্ঘং সন্নিপাতাপেত্ৰা আযস্মন্তং উদাযিং পটিপুচ্ছি – ‘‘সচ্চং কির ত্ৰং, উদাযি, মাতুগামস্স সন্তিকে অত্তকামপারিচরিযায ৰণ্ণং ভাসসী’’তি? ‘‘সচ্চং, ভগৰা’’তি। ৰিগরহি বুদ্ধো ভগৰা – ‘‘অননুচ্ছৰিকং, মোঘপুরিস, অননুলোমিকং অপ্পতিরূপং অস্সামণকং অকপ্পিযং অকরণীযং। কথঞ্হি নাম ত্ৰং, মোঘপুরিস, মাতুগামস্স সন্তিকে অত্তকামপারিচরিযায ৰণ্ণং ভাসিস্সসি! ননু মযা , মোঘপুরিস, অনেকপরিযাযেন ৰিরাগায ধম্মো দেসিতো নো সরাগায…পে॰… কামপরিল়াহানং ৰূপসমো অক্খাতো? নেতং, মোঘপুরিস, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –
Atha kho te bhikkhū āyasmantaṃ udāyiṃ anekapariyāyena vigarahitvā bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe bhikkhusaṅghaṃ sannipātāpetvā āyasmantaṃ udāyiṃ paṭipucchi – ‘‘saccaṃ kira tvaṃ, udāyi, mātugāmassa santike attakāmapāricariyāya vaṇṇaṃ bhāsasī’’ti? ‘‘Saccaṃ, bhagavā’’ti. Vigarahi buddho bhagavā – ‘‘ananucchavikaṃ, moghapurisa, ananulomikaṃ appatirūpaṃ assāmaṇakaṃ akappiyaṃ akaraṇīyaṃ. Kathañhi nāma tvaṃ, moghapurisa, mātugāmassa santike attakāmapāricariyāya vaṇṇaṃ bhāsissasi! Nanu mayā , moghapurisa, anekapariyāyena virāgāya dhammo desito no sarāgāya…pe… kāmapariḷāhānaṃ vūpasamo akkhāto? Netaṃ, moghapurisa, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
২৯১. ‘‘যো পন ভিক্খু ওতিণ্ণো ৰিপরিণতেন চিত্তেন মাতুগামস্স সন্তিকে অত্তকামপারিচরিযায ৰণ্ণং ভাসেয্য – ‘এতদগ্গং, ভগিনি, পারিচরিযানং যা মাদিসং সীলৰন্তং কল্যাণধম্মং ব্রহ্মচারিং এতেন ধম্মেন পরিচরেয্যাতি মেথুনুপসংহিতেন’, সঙ্ঘাদিসেসো’’তি।
291.‘‘Yo pana bhikkhu otiṇṇo vipariṇatena cittena mātugāmassa santike attakāmapāricariyāya vaṇṇaṃ bhāseyya – ‘etadaggaṃ, bhagini, pāricariyānaṃ yā mādisaṃ sīlavantaṃ kalyāṇadhammaṃ brahmacāriṃ etena dhammena paricareyyāti methunupasaṃhitena’, saṅghādiseso’’ti.
২৯২. যো পনাতি যো যাদিসো…পে॰… ভিক্খূতি…পে॰… অযং ইমস্মিং অত্থে অধিপ্পেতো ভিক্খূতি।
292.Yopanāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
ওতিণ্ণো নাম সারত্তো অপেক্খৰা পটিবদ্ধচিত্তো।
Otiṇṇo nāma sāratto apekkhavā paṭibaddhacitto.
ৰিপরিণতন্তি রত্তম্পি চিত্তং ৰিপরিণত্তং, দুট্ঠম্পি চিত্তং ৰিপরিণতং, মূল়্হম্পি চিত্তং ৰিপরিণতং। অপিচ, রত্তং চিত্তং ইমস্মিং অত্থে অধিপ্পেতং ৰিপরিণতন্তি।
Vipariṇatanti rattampi cittaṃ vipariṇattaṃ, duṭṭhampi cittaṃ vipariṇataṃ, mūḷhampi cittaṃ vipariṇataṃ. Apica, rattaṃ cittaṃ imasmiṃ atthe adhippetaṃ vipariṇatanti.
মাতুগামো নাম মনুস্সিত্থী, ন যক্খী, ন পেতী, ন তিরচ্ছানগতা। ৰিঞ্ঞূ পটিবলা সুভাসিতদুব্ভাসিতং দুট্ঠল্লাদুট্ঠুল্লং আজানিতুং।
Mātugāmo nāma manussitthī, na yakkhī, na petī, na tiracchānagatā. Viññū paṭibalā subhāsitadubbhāsitaṃ duṭṭhallāduṭṭhullaṃ ājānituṃ.
মাতুগামস্স সন্তিকেতি মাতুগামস্স সামন্তা, মাতুগামস্স অৰিদূরে।
Mātugāmassa santiketi mātugāmassa sāmantā, mātugāmassa avidūre.
অত্তকামন্তি অত্তনো কামং অত্তনো হেতুং অত্তনো অধিপ্পাযং অত্তনো পারিচরিযং।
Attakāmanti attano kāmaṃ attano hetuṃ attano adhippāyaṃ attano pāricariyaṃ.
এতদগ্গন্তি এতং অগ্গং এতং সেট্ঠং এতং মোক্খং এতং উত্তমং এতং পৰরং।
Etadagganti etaṃ aggaṃ etaṃ seṭṭhaṃ etaṃ mokkhaṃ etaṃ uttamaṃ etaṃ pavaraṃ.
যাতি খত্তিযী 1 ৰা ব্রাহ্মণী ৰা ৰেস্সী ৰা সুদ্দী ৰা।
Yāti khattiyī 2 vā brāhmaṇī vā vessī vā suddī vā.
মাদিসন্তি খত্তিযং ৰা ব্রাহ্মণং ৰা ৰেস্সং ৰা সুদ্দং ৰা।
Mādisanti khattiyaṃ vā brāhmaṇaṃ vā vessaṃ vā suddaṃ vā.
সীলৰন্তন্তি পাণাতিপাতা পটিৰিরতং, অদিন্নাদানা পটিৰিরতং, মুসাৰাদা পটিৰিরতং।
Sīlavantanti pāṇātipātā paṭivirataṃ, adinnādānā paṭivirataṃ, musāvādā paṭivirataṃ.
ব্রহ্মচারিন্তি মেথুনধম্মা পটিৰিরতং।
Brahmacārinti methunadhammā paṭivirataṃ.
কল্যাণধম্মো নাম তেন চ সীলেন তেন চ ব্রহ্মচরিযেন কল্যাণধম্মো হোতি।
Kalyāṇadhammo nāma tena ca sīlena tena ca brahmacariyena kalyāṇadhammo hoti.
এতেন ধম্মেনাতি মেথুনধম্মেন।
Etenadhammenāti methunadhammena.
পরিচরেয্যাতি অভিরমেয্য।
Paricareyyāti abhirameyya.
মেথুনুপসংহিতেনাতি মেথুনধম্মপ্পটিসংযুত্তেন।
Methunupasaṃhitenāti methunadhammappaṭisaṃyuttena.
সঙ্ঘাদিসেসোতি…পে॰… তেনপি ৰুচ্চতি সঙ্ঘাদিসেসোতি।
Saṅghādisesoti…pe… tenapi vuccati saṅghādisesoti.
২৯৩. ইত্থী চ হোতি ইত্থিসঞ্ঞী সারত্তো চ। ভিক্খু চ নং ইত্থিযা সন্তিকে অত্তকামপারিচরিযায ৰণ্ণং ভাসতি, আপত্তি সঙ্ঘাদিসেসস্স ।
293. Itthī ca hoti itthisaññī sāratto ca. Bhikkhu ca naṃ itthiyā santike attakāmapāricariyāya vaṇṇaṃ bhāsati, āpatti saṅghādisesassa .
ইত্থী চ হোতি ৰেমতিকো…পে॰… পণ্ডকসঞ্ঞী… পুরিসসঞ্ঞী… তিরচ্ছানগতসঞ্ঞী সারত্তো চ। ভিক্খু চ নং ইত্থিযা সন্তিকে অত্তকামপারিচরিযায ৰণ্ণং ভাসতি, আপত্তি থুল্লচ্চযস্স।
Itthī ca hoti vematiko…pe… paṇḍakasaññī… purisasaññī… tiracchānagatasaññī sāratto ca. Bhikkhu ca naṃ itthiyā santike attakāmapāricariyāya vaṇṇaṃ bhāsati, āpatti thullaccayassa.
পণ্ডকো চ হোতি পণ্ডকসঞ্ঞী সারত্তো চ। ভিক্খু চ নং পণ্ডকস্স সন্তিকে অত্তকামপারিচরিযায ৰণ্ণং ভাসতি, আপত্তি থুল্লচ্চযস্স।
Paṇḍako ca hoti paṇḍakasaññī sāratto ca. Bhikkhu ca naṃ paṇḍakassa santike attakāmapāricariyāya vaṇṇaṃ bhāsati, āpatti thullaccayassa.
পণ্ডকো চ হোতি ৰেমতিকো…পে॰… পুরিসসঞ্ঞী… তিরচ্ছানগতসঞ্ঞী… ইত্থিসঞ্ঞী সারত্তো চ। ভিক্খু চ নং পণ্ডকস্স সন্তিকে অত্তকামপারিচরিযায ৰণ্ণং ভাসতি, আপত্তি দুক্কটস্স।
Paṇḍako ca hoti vematiko…pe… purisasaññī… tiracchānagatasaññī… itthisaññī sāratto ca. Bhikkhu ca naṃ paṇḍakassa santike attakāmapāricariyāya vaṇṇaṃ bhāsati, āpatti dukkaṭassa.
পুরিসো চ হোতি…পে॰… তিরচ্ছানগতো চ হোতি তিরচ্ছানগতসঞ্ঞী…পে॰… ৰেমতিকো ইত্থিসঞ্ঞী… পণ্ডকসঞ্ঞী… পুরিসসঞ্ঞী সারত্তো চ। ভিক্খু চ নং তিরচ্ছানগতস্স সন্তিকে অত্তকামপারিচরিযায ৰণ্ণং ভাসতি, আপত্তি দুক্কটস্স।
Puriso ca hoti…pe… tiracchānagato ca hoti tiracchānagatasaññī…pe… vematiko itthisaññī… paṇḍakasaññī… purisasaññī sāratto ca. Bhikkhu ca naṃ tiracchānagatassa santike attakāmapāricariyāya vaṇṇaṃ bhāsati, āpatti dukkaṭassa.
দ্ৰে ইত্থিযো দ্ৰিন্নং ইত্থীনং ইত্থিসঞ্ঞী সারত্তো চ। ভিক্খু চ নং দ্ৰিন্নং ইত্থীনং সন্তিকে অত্তকামপারিচরিযায ৰণ্ণং ভাসতি, আপত্তি দ্ৰিন্নং সঙ্ঘাদিসেসানং…পে॰… ।
Dve itthiyo dvinnaṃ itthīnaṃ itthisaññī sāratto ca. Bhikkhu ca naṃ dvinnaṃ itthīnaṃ santike attakāmapāricariyāya vaṇṇaṃ bhāsati, āpatti dvinnaṃ saṅghādisesānaṃ…pe… .
ইত্থী চ পণ্ডকো চ উভিন্নং ইত্থিসঞ্ঞী সারত্তো চ। ভিক্খু চ নং উভিন্নং সন্তিকে অত্তকামপারিচরিযায ৰণ্ণং ভাসতি, আপত্তি সঙ্ঘাদিসেসেন দুক্কটস্স…পে॰… ।
Itthī ca paṇḍako ca ubhinnaṃ itthisaññī sāratto ca. Bhikkhu ca naṃ ubhinnaṃ santike attakāmapāricariyāya vaṇṇaṃ bhāsati, āpatti saṅghādisesena dukkaṭassa…pe… .
২৯৪. অনাপত্তি ‘‘চীৰরপিণ্ডপাতসেনাসনগিলানপ্পচ্চযভেসজ্জপরিক্খারেন উপট্ঠহা’’তি ভণতি, উম্মত্তকস্স আদিকম্মিকস্সাতি।
294. Anāpatti ‘‘cīvarapiṇḍapātasenāsanagilānappaccayabhesajjaparikkhārena upaṭṭhahā’’ti bhaṇati, ummattakassa ādikammikassāti.
ৰিনীতৰত্থুউদ্দানগাথা
Vinītavatthuuddānagāthā
কথং ৰঞ্ঝা লভে পুত্তং, পিযা চ সুভগা সিযং।
Kathaṃ vañjhā labhe puttaṃ, piyā ca subhagā siyaṃ;
কিং দজ্জং কেনুপট্ঠেয্যং, কথং গচ্ছেয্যং সুগ্গতিন্তি॥
Kiṃ dajjaṃ kenupaṭṭheyyaṃ, kathaṃ gaccheyyaṃ suggatinti.
ৰিনীতৰত্থু
Vinītavatthu
২৯৫. তেন খো পন সমযেন অঞ্ঞতরা ৰঞ্ঝা ইত্থী কুলূপকং ভিক্খুং এতদৰোচ – ‘‘কথাহং, ভন্তে, ৰিজাযেয্য’’ন্তি? ‘‘তেন হি, ভগিনি, অগ্গদানং দেহী’’তি। ‘‘কিং, ভন্তে, অগ্গদান’’ন্তি? ‘‘মেথুনধম্ম’’ন্তি। তস্স কুক্কুচ্চং অহোসি…পে॰… ‘‘আপত্তিং ত্ৰং, ভিক্খু, আপন্নো সঙ্ঘাদিসেস’’ন্তি।
295. Tena kho pana samayena aññatarā vañjhā itthī kulūpakaṃ bhikkhuṃ etadavoca – ‘‘kathāhaṃ, bhante, vijāyeyya’’nti? ‘‘Tena hi, bhagini, aggadānaṃ dehī’’ti. ‘‘Kiṃ, bhante, aggadāna’’nti? ‘‘Methunadhamma’’nti. Tassa kukkuccaṃ ahosi…pe… ‘‘āpattiṃ tvaṃ, bhikkhu, āpanno saṅghādisesa’’nti.
তেন খো পন সমযেন অঞ্ঞতরা ৰিজাযিনী ইত্থী কুলূপকং ভিক্খুং এতদৰোচ – ‘‘কথাহং, ভন্তে, পুত্তং লভেয্য’’ন্তি? ‘‘তেন হি, ভগিনি, অগ্গদানং দেহী’’তি। ‘‘কিং, ভন্তে, অগ্গদান’’ন্তি? ‘‘মেথুনধম্ম’’ন্তি। তস্স কুক্কুচ্চং অহোসি…পে॰… ‘‘আপত্তিং ত্ৰং, ভিক্খু, আপন্নো সঙ্ঘাদিসেস’’ন্তি।
Tena kho pana samayena aññatarā vijāyinī itthī kulūpakaṃ bhikkhuṃ etadavoca – ‘‘kathāhaṃ, bhante, puttaṃ labheyya’’nti? ‘‘Tena hi, bhagini, aggadānaṃ dehī’’ti. ‘‘Kiṃ, bhante, aggadāna’’nti? ‘‘Methunadhamma’’nti. Tassa kukkuccaṃ ahosi…pe… ‘‘āpattiṃ tvaṃ, bhikkhu, āpanno saṅghādisesa’’nti.
তেন খো পন সমযেন অঞ্ঞতরা ইত্থী কুলূপকং ভিক্খুং এতদৰোচ – ‘‘কথাহং, ভন্তে, সামিকস্স পিযা অস্স’’ন্তি? ‘‘তেন হি, ভগিনি, অগ্গদানং দেহী’’তি। ‘‘কিং, ভন্তে, অগ্গদান’’ন্তি? ‘‘মেথুনধম্ম’’ন্তি। তস্স কুক্কুচ্চং অহোসি…পে॰… ‘‘আপত্তিং ত্ৰং, ভিক্খু, আপন্নো সঙ্ঘাদিসেস’’ন্তি।
Tena kho pana samayena aññatarā itthī kulūpakaṃ bhikkhuṃ etadavoca – ‘‘kathāhaṃ, bhante, sāmikassa piyā assa’’nti? ‘‘Tena hi, bhagini, aggadānaṃ dehī’’ti. ‘‘Kiṃ, bhante, aggadāna’’nti? ‘‘Methunadhamma’’nti. Tassa kukkuccaṃ ahosi…pe… ‘‘āpattiṃ tvaṃ, bhikkhu, āpanno saṅghādisesa’’nti.
তেন খো পন সমযেন অঞ্ঞতরা ইত্থী কুলূপকং ভিক্খুং এতদৰোচ – ‘‘কথাহং, ভন্তে, সুভগা অস্স’’ন্তি? ‘‘তেন হি , ভগিনি, অগ্গদানং দেহী’’তি। ‘‘কিং, ভন্তে, অগ্গদান’’ন্তি? ‘‘মেথুনধম্ম’’ন্তি। তস্স কুক্কুচ্চং অহোসি…পে॰… ‘‘আপত্তিং ত্ৰং, ভিক্খু, আপন্নো সঙ্ঘাদিসেস’’ন্তি।
Tena kho pana samayena aññatarā itthī kulūpakaṃ bhikkhuṃ etadavoca – ‘‘kathāhaṃ, bhante, subhagā assa’’nti? ‘‘Tena hi , bhagini, aggadānaṃ dehī’’ti. ‘‘Kiṃ, bhante, aggadāna’’nti? ‘‘Methunadhamma’’nti. Tassa kukkuccaṃ ahosi…pe… ‘‘āpattiṃ tvaṃ, bhikkhu, āpanno saṅghādisesa’’nti.
তেন খো পন সমযেন অঞ্ঞতরা ইত্থী কুলূপকং ভিক্খুং এতদৰোচ – ‘‘ক্যাহং, ভন্তে, অয্যস্স দজ্জামী’’তি? ‘‘অগ্গদানং, ভগিনী’’তি। ‘‘কিং, ভন্তে, অগ্গদান’’ন্তি? ‘‘মেথুনধম্ম’’ন্তি। তস্স কুক্কুচ্চং অহোসি…পে॰… ‘‘আপত্তিং ত্ৰং, ভিক্খু, আপন্নো সঙ্ঘাদিসেস’’ন্তি।
Tena kho pana samayena aññatarā itthī kulūpakaṃ bhikkhuṃ etadavoca – ‘‘kyāhaṃ, bhante, ayyassa dajjāmī’’ti? ‘‘Aggadānaṃ, bhaginī’’ti. ‘‘Kiṃ, bhante, aggadāna’’nti? ‘‘Methunadhamma’’nti. Tassa kukkuccaṃ ahosi…pe… ‘‘āpattiṃ tvaṃ, bhikkhu, āpanno saṅghādisesa’’nti.
তেন খো পন সমযেন অঞ্ঞতরা ইত্থী কুলূপকং ভিক্খুং এতদৰোচ – ‘‘কেনাহং, ভন্তে, অয্যং উপট্ঠেমী’’তি? ‘‘অগ্গদানেন, ভগিনী’’তি। ‘‘কিং, ভন্তে, অগ্গদান’’ন্তি? ‘‘মেথুনধম্ম’’ন্তি। তস্স কুক্কুচ্চং অহোসি…পে॰… ‘‘আপত্তিং ত্ৰং, ভিক্খু, আপন্নো সঙ্ঘাদিসেস’’ন্তি।
Tena kho pana samayena aññatarā itthī kulūpakaṃ bhikkhuṃ etadavoca – ‘‘kenāhaṃ, bhante, ayyaṃ upaṭṭhemī’’ti? ‘‘Aggadānena, bhaginī’’ti. ‘‘Kiṃ, bhante, aggadāna’’nti? ‘‘Methunadhamma’’nti. Tassa kukkuccaṃ ahosi…pe… ‘‘āpattiṃ tvaṃ, bhikkhu, āpanno saṅghādisesa’’nti.
তেন খো পন সমযেন অঞ্ঞতরা ইত্থী কুলূপকং ভিক্খুং এতদৰোচ – ‘‘কথাহং,
Tena kho pana samayena aññatarā itthī kulūpakaṃ bhikkhuṃ etadavoca – ‘‘kathāhaṃ,
ভন্তে, সুগতিং গচ্ছেয্য’’ন্তি? ‘‘তেন হি, ভগিনি, অগ্গদানং দেহী’’তি। ‘‘কিং, ভন্তে, অগ্গদান’’ন্তি? ‘‘মেথুনধম্ম’’ন্তি। তস্স কুক্কুচ্চং অহোসি…পে॰… ‘‘আপত্তিং ত্ৰং, ভিক্খু, আপন্নো সঙ্ঘাদিসেস’’ন্তি।
Bhante, sugatiṃ gaccheyya’’nti? ‘‘Tena hi, bhagini, aggadānaṃ dehī’’ti. ‘‘Kiṃ, bhante, aggadāna’’nti? ‘‘Methunadhamma’’nti. Tassa kukkuccaṃ ahosi…pe… ‘‘āpattiṃ tvaṃ, bhikkhu, āpanno saṅghādisesa’’nti.
অত্তকামপারিচরিযসিক্খাপদং নিট্ঠিতং চতুত্থং।
Attakāmapāricariyasikkhāpadaṃ niṭṭhitaṃ catutthaṃ.
Footnotes:
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰিভঙ্গ-অট্ঠকথা • Mahāvibhaṅga-aṭṭhakathā / ৪. অত্তকামপারিচরিযসিক্খাপদৰণ্ণনা • 4. Attakāmapāricariyasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ৪. অত্তকামপারিচরিযসিক্খাপদৰণ্ণনা • 4. Attakāmapāricariyasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ৪. অত্তকামপারিচরিযসিক্খাপদৰণ্ণনা • 4. Attakāmapāricariyasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ৪. অত্তকামপারিচরিযসিক্খাপদৰণ্ণনা • 4. Attakāmapāricariyasikkhāpadavaṇṇanā
