| Library / Tipiṭaka / திபிடக • Tipiṭaka / மஹாவிப⁴ங்க³-அட்ட²கதா² • Mahāvibhaṅga-aṭṭhakathā |
4. அத்தகாமபாரிசரியஸிக்கா²பத³வண்ணனா
4. Attakāmapāricariyasikkhāpadavaṇṇanā
290. தேன ஸமயேன பு³த்³தோ⁴ ப⁴க³வாதி அத்தகாமஸிக்கா²பத³ங். தத்த² குலூபகோதி குலபயிருபாஸனகோ சதுன்னங் பச்சயானங் அத்தா²ய குலூபஸங்கமனே நிச்சப்பயுத்தோ.
290.Tena samayena buddho bhagavāti attakāmasikkhāpadaṃ. Tattha kulūpakoti kulapayirupāsanako catunnaṃ paccayānaṃ atthāya kulūpasaṅkamane niccappayutto.
சீவரபிண்ட³பாதஸேனாஸனகி³லானபச்சயபே⁴ஸஜ்ஜபரிக்கா²ரந்தி சீவரஞ்ச பிண்ட³பாதஞ்ச ஸேனாஸனஞ்ச கி³லானபச்சயபே⁴ஸஜ்ஜபரிக்கா²ரஞ்ச. கி³லானபச்சயபே⁴ஸஜ்ஜபரிக்கா²ரந்தி செத்த² பதிகரணத்தே²ன பச்சயோ, யஸ்ஸ கஸ்ஸசி ஸப்பாயஸ்ஸேதங் அதி⁴வசனங். பி⁴ஸக்கஸ்ஸ கம்மங் தேன அனுஞ்ஞாதத்தாதி பே⁴ஸஜ்ஜங். கி³லானபச்சயோவ பே⁴ஸஜ்ஜங் கி³லானபச்சயபே⁴ஸஜ்ஜங், யங்கிஞ்சி கி³லானஸ்ஸ ஸப்பாயங் பி⁴ஸக்ககம்மங் தேலமது⁴பா²ணிதாதீ³தி வுத்தங் ஹோதி. பரிக்கா²ரோதி பன ‘‘ஸத்தஹி நக³ரபரிக்கா²ரேஹி ஸுபரிக்க²தங் ஹோதீ’’திஆதீ³ஸு (அ॰ நி॰ 7.67) பரிவாரோ வுச்சதி. ‘‘ரதோ² ஸீஸபரிக்கா²ரோ ஜா²னக்கோ² சக்கவீரியோ’’திஆதீ³ஸு (ஸங்॰ நி॰ 5.4) அலங்காரோ. ‘‘யே சிமே பப்³ப³ஜிதேன ஜீவிதபரிக்கா²ரா ஸமுதா³னேதப்³பா³’’திஆதீ³ஸு (ரோ॰ நி॰ 1.1.191) ஸம்பா⁴ரோ. இத⁴ பன ஸம்பா⁴ரோபி பரிவாரோபி வட்டதி. தஞ்ஹி கி³லானபச்சயபே⁴ஸஜ்ஜங் ஜீவிதஸ்ஸ பரிவாரோபி ஹோதி ஜீவிதவினாஸகாபா³து⁴ப்பத்தியா அந்தரங் அத³த்வா ரக்க²ணதோ, ஸம்பா⁴ரோபி யதா² சிரங் பவத்ததி ஏவமஸ்ஸ காரணபா⁴வதோ, தஸ்மா பரிக்கா²ரோதி வுச்சதி. ஏவங் கி³லானபச்சயபே⁴ஸஜ்ஜஞ்ச தங் பரிக்கா²ரோ சாதி கி³லானபச்சயபே⁴ஸஜ்ஜபரிக்கா²ரோ, தங் கி³லானபச்சயபே⁴ஸஜ்ஜபரிக்கா²ரந்தி ஏவமத்தோ² த³ட்ட²ப்³போ³.
Cīvarapiṇḍapātasenāsanagilānapaccayabhesajjaparikkhāranti cīvarañca piṇḍapātañca senāsanañca gilānapaccayabhesajjaparikkhārañca. Gilānapaccayabhesajjaparikkhāranti cettha patikaraṇatthena paccayo, yassa kassaci sappāyassetaṃ adhivacanaṃ. Bhisakkassa kammaṃ tena anuññātattāti bhesajjaṃ. Gilānapaccayova bhesajjaṃ gilānapaccayabhesajjaṃ, yaṃkiñci gilānassa sappāyaṃ bhisakkakammaṃ telamadhuphāṇitādīti vuttaṃ hoti. Parikkhāroti pana ‘‘sattahi nagaraparikkhārehi suparikkhataṃ hotī’’tiādīsu (a. ni. 7.67) parivāro vuccati. ‘‘Ratho sīsaparikkhāro jhānakkho cakkavīriyo’’tiādīsu (saṃ. ni. 5.4) alaṅkāro. ‘‘Ye cime pabbajitena jīvitaparikkhārā samudānetabbā’’tiādīsu (ro. ni. 1.1.191) sambhāro. Idha pana sambhāropi parivāropi vaṭṭati. Tañhi gilānapaccayabhesajjaṃ jīvitassa parivāropi hoti jīvitavināsakābādhuppattiyā antaraṃ adatvā rakkhaṇato, sambhāropi yathā ciraṃ pavattati evamassa kāraṇabhāvato, tasmā parikkhāroti vuccati. Evaṃ gilānapaccayabhesajjañca taṃ parikkhāro cāti gilānapaccayabhesajjaparikkhāro, taṃ gilānapaccayabhesajjaparikkhāranti evamattho daṭṭhabbo.
வஸலந்தி ஹீனங் லாமகங். அத² வா வஸ்ஸதீதி வஸலோ, பக்³க⁴ரதீதி அத்தோ², தங் வஸலங், அஸுசிபக்³க⁴ரணகந்தி வுத்தங் ஹோதி. நிட்டு²ஹித்வாதி கே²ளங் பாதெத்வா.
Vasalanti hīnaṃ lāmakaṃ. Atha vā vassatīti vasalo, paggharatīti attho, taṃ vasalaṃ, asucipaggharaṇakanti vuttaṃ hoti. Niṭṭhuhitvāti kheḷaṃ pātetvā.
கஸ்ஸாஹங் கேன ஹாயாமீதி அஹங் கஸ்ஸா அஞ்ஞிஸ்ஸா இத்தி²யா கேன போ⁴கே³ன வா அலங்காரேன வா ரூபேன வா பரிஹாயாமி, கா நாம மயா உத்தரிதராதி தீ³பேதி.
Kassāhaṃ kena hāyāmīti ahaṃ kassā aññissā itthiyā kena bhogena vā alaṅkārena vā rūpena vā parihāyāmi, kā nāma mayā uttaritarāti dīpeti.
291. ஸந்திகேதி உபசாரே ட²த்வா ஸாமந்தா அவிதூ³ரே, பத³பா⁴ஜனேபி அயமேவஅத்தோ² தீ³பிதோ . அத்தகாமபாரிசரியாயாதி மேது²னத⁴ம்மஸங்கா²தேன காமேன பாரிசரியா காமபாரிசரியா. அத்தனோ அத்தா²ய காமபாரிசரியா அத்தகாமபாரிசரியா, அத்தனா வா காமிதா இச்சி²தாதி அத்தகாமா, ஸயங் மேது²னராக³வஸேன பத்தி²தாதி அத்தோ². அத்தகாமா ச ஸா பாரிசரியா சாதி அத்தகாமபாரிசரியா, தஸ்ஸா அத்தகாமபாரிசரியாய. வண்ணங் பா⁴ஸெய்யாதி கு³ணங் ஆனிஸங்ஸங் பகாஸெய்ய.
291.Santiketi upacāre ṭhatvā sāmantā avidūre, padabhājanepi ayamevaattho dīpito . Attakāmapāricariyāyāti methunadhammasaṅkhātena kāmena pāricariyā kāmapāricariyā. Attano atthāya kāmapāricariyā attakāmapāricariyā, attanā vā kāmitā icchitāti attakāmā, sayaṃ methunarāgavasena patthitāti attho. Attakāmā ca sā pāricariyā cāti attakāmapāricariyā, tassā attakāmapāricariyāya. Vaṇṇaṃ bhāseyyāti guṇaṃ ānisaṃsaṃ pakāseyya.
தத்ர யஸ்மா ‘‘அத்தனோ அத்தா²ய காமபாரிசரியா’’தி இமஸ்மிங் அத்த²விகப்பே காமோ சேவ ஹேது ச பாரிசரியா ச அத்தோ², ஸேஸங் ப்³யஞ்ஜனங். ‘‘அத்தகாமா ச ஸா பாரிசரியா சாதி அத்தகாமபாரிசரியா’’தி இமஸ்மிங் அத்த²விகப்பே அதி⁴ப்பாயோ சேவ பாரிசரியா சாதி அத்தோ², ஸேஸங் ப்³யஞ்ஜனங். தஸ்மா ப்³யஞ்ஜனே ஆத³ரங் அகத்வா அத்த²மத்தமேவ த³ஸ்ஸேதுங் ‘‘அத்தனோ காமங் அத்தனோ ஹேதுங் அத்தனோ அதி⁴ப்பாயங் அத்தனோ பாரிசரிய’’ந்தி பத³பா⁴ஜனங் வுத்தங். ‘‘அத்தனோ காமங் அத்தனோ ஹேதுங் அத்தனோ பாரிசரிய’’ந்தி ஹி வுத்தே ஜானிஸ்ஸந்தி பண்டி³தா ‘‘எத்தாவதா அத்தனோ அத்தா²ய காமபாரிசரியா வுத்தா’’தி. ‘‘அத்தனோ அதி⁴ப்பாயங் அத்தனோ பாரிசரிய’’ந்தி வுத்தேபி ஜானிஸ்ஸந்தி ‘‘எத்தாவதா அத்தனா இச்சி²தகாமிதட்டே²ன அத்தகாமபாரிசரியா வுத்தா’’தி.
Tatra yasmā ‘‘attano atthāya kāmapāricariyā’’ti imasmiṃ atthavikappe kāmo ceva hetu ca pāricariyā ca attho, sesaṃ byañjanaṃ. ‘‘Attakāmā ca sā pāricariyā cāti attakāmapāricariyā’’ti imasmiṃ atthavikappe adhippāyo ceva pāricariyā cāti attho, sesaṃ byañjanaṃ. Tasmā byañjane ādaraṃ akatvā atthamattameva dassetuṃ ‘‘attano kāmaṃ attano hetuṃ attano adhippāyaṃ attano pāricariya’’nti padabhājanaṃ vuttaṃ. ‘‘Attano kāmaṃ attano hetuṃ attano pāricariya’’nti hi vutte jānissanti paṇḍitā ‘‘ettāvatā attano atthāya kāmapāricariyā vuttā’’ti. ‘‘Attano adhippāyaṃ attano pāricariya’’nti vuttepi jānissanti ‘‘ettāvatā attanā icchitakāmitaṭṭhena attakāmapāricariyā vuttā’’ti.
இதா³னி தஸ்ஸா அத்தகாமபாரிசரியாய வண்ணபா⁴ஸனாகாரங் த³ஸ்ஸெந்தோ ‘‘ஏதத³க்³க³’’ந்திஆதி³மாஹ. தங் உத்³தே³ஸதோபி நித்³தே³ஸதோபி உத்தானத்த²மேவ. அயங் பனெத்த² பத³ஸம்ப³ந்தோ⁴ ச ஆபத்திவினிச்ச²யோ ச – ஏதத³க்³க³ங்…பே॰… பரிசரெய்யாதி யா மாதி³ஸங் ஸீலவந்தங் கல்யாணத⁴ம்மங் ப்³ரஹ்மசாரிங் ஏதேன த⁴ம்மேன பரிசரெய்ய, தஸ்ஸா ஏவங் மாதி³ஸங் பரிசரந்தியா யா அயங் பாரிசரியா நாம, ஏதத³க்³க³ங் பாரிசரியானந்தி.
Idāni tassā attakāmapāricariyāya vaṇṇabhāsanākāraṃ dassento ‘‘etadagga’’ntiādimāha. Taṃ uddesatopi niddesatopi uttānatthameva. Ayaṃ panettha padasambandho ca āpattivinicchayo ca – etadaggaṃ…pe… paricareyyāti yā mādisaṃ sīlavantaṃ kalyāṇadhammaṃ brahmacāriṃ etena dhammena paricareyya, tassā evaṃ mādisaṃ paricarantiyā yā ayaṃ pāricariyā nāma, etadaggaṃ pāricariyānanti.
மேது²னுபஸங்ஹிதேன ஸங்கா⁴தி³ஸேஸோதி ஏவங் அத்தகாமபாரிசரியாய வண்ணங் பா⁴ஸந்தோ ச மேது²னுபஸங்ஹிதேன மேது²னத⁴ம்மபடிஸங்யுத்தேனேவ வசனேன யோ பா⁴ஸெய்ய, தஸ்ஸ ஸங்கா⁴தி³ஸேஸோதி.
Methunupasaṃhitena saṅghādisesoti evaṃ attakāmapāricariyāya vaṇṇaṃ bhāsanto ca methunupasaṃhitena methunadhammapaṭisaṃyutteneva vacanena yo bhāseyya, tassa saṅghādisesoti.
இதா⁴னி யஸ்மா மேது²னுபஸங்ஹிதேனேவ பா⁴ஸந்தஸ்ஸ ஸங்கா⁴தி³ஸேஸோ வுத்தோ, தஸ்மா ‘‘அஹம்பி க²த்தியோ, த்வம்பி க²த்தியா, அரஹதி க²த்தியா க²த்தியஸ்ஸ தா³துங் ஸமஜாதிகத்தா’’தி ஏவமாதீ³ஹி வசனேஹி பாரிசரியாய வண்ணங் பா⁴ஸமானஸ்ஸாபி ஸங்கா⁴தி³ஸேஸோ நத்தி². ‘‘அஹம்பி க²த்தியோ’’திஆதி³கே பன ப³ஹூபி பரியாயே வத்வா ‘‘அரஹஸி த்வங் மய்ஹங் மேது²னத⁴ம்மங் தா³து’’ந்தி ஏவங் மேது²னப்படிஸங்யுத்தேனேவ பா⁴ஸமானஸ்ஸ ஸங்கா⁴தி³ஸேஸோதி.
Idhāni yasmā methunupasaṃhiteneva bhāsantassa saṅghādiseso vutto, tasmā ‘‘ahampi khattiyo, tvampi khattiyā, arahati khattiyā khattiyassa dātuṃ samajātikattā’’ti evamādīhi vacanehi pāricariyāya vaṇṇaṃ bhāsamānassāpi saṅghādiseso natthi. ‘‘Ahampi khattiyo’’tiādike pana bahūpi pariyāye vatvā ‘‘arahasi tvaṃ mayhaṃ methunadhammaṃ dātu’’nti evaṃ methunappaṭisaṃyutteneva bhāsamānassa saṅghādisesoti.
இத்தீ² ச ஹோதீதிஆதி³ புப்³பே³ வுத்தனயமேவ. இத⁴ உதா³யித்தே²ரோ ஆதி³கம்மிகோ, தஸ்ஸ அனாபத்தி ஆதி³கம்மிகஸ்ஸாதி.
Itthīca hotītiādi pubbe vuttanayameva. Idha udāyitthero ādikammiko, tassa anāpatti ādikammikassāti.
ஸமுட்டா²னாதி³ ஸப்³ப³ங் து³ட்டு²ல்லவாசாஸதி³ஸங். வினீதவத்தூ²னி உத்தானத்தா²னேவாதி.
Samuṭṭhānādi sabbaṃ duṭṭhullavācāsadisaṃ. Vinītavatthūni uttānatthānevāti.
அத்தகாமபாரிசரியஸிக்கா²பத³வண்ணனா நிட்டி²தா.
Attakāmapāricariyasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 4. அத்தகாமபாரிசரியஸிக்கா²பத³ங் • 4. Attakāmapāricariyasikkhāpadaṃ
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 4. அத்தகாமபாரிசரியஸிக்கா²பத³வண்ணனா • 4. Attakāmapāricariyasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 4. அத்தகாமபாரிசரியஸிக்கா²பத³வண்ணனா • 4. Attakāmapāricariyasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 4. அத்தகாமபாரிசரியஸிக்கா²பத³வண்ணனா • 4. Attakāmapāricariyasikkhāpadavaṇṇanā
