| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
4. அத்தகாமபாரிசரியஸிக்கா²பத³வண்ணனா
4. Attakāmapāricariyasikkhāpadavaṇṇanā
290. சதுத்தே² பரேஹி பத்தே பாதியமானானங் பி⁴க்கா²பிண்டா³னங் பாதோ ஸன்னிபாதோதி பிண்ட³பாதோதி பி⁴க்கா²ஹாரோ வுச்சதி, தங்ஸதி³ஸதாய அஞ்ஞோபி யோ கோசி பி⁴க்கா²சரியங் வினா பி⁴க்கூ²ஹி லத்³தோ⁴ பிண்ட³பாதொத்வேவ வுச்சதி. பதி ஏதி ஏதஸ்மாதி பச்சயோதி ஆஹ ‘‘பதிகரணட்டே²ன பச்சயோ’’தி. ரோக³து³க்கா²னங் வா படிபக்க²பா⁴வேன அயதி பவத்ததீதி பச்சயோ. ஸப்பாயஸ்ஸாதி ஹிதஸ்ஸ. நக³ரபரிக்கா²ரேஹீதி நக³ரங் பரிவாரெத்வா ரக்க²ணகேஹி. ராஜூனங் கே³ஹபரிக்கே²போ பரிகா² உத்³தா³போ பாகாரோ ஏஸிகா பலிகோ⁴ அட்டோதி இமே ஸத்த நக³ரபரிக்கா²ராதி வத³ந்தி. ஸேதபரிக்கா²ரோதி விஸுத்³தி⁴ஸீலாலங்காரோ. அரியமக்³கோ³ ஹி இத⁴ ‘‘ரதோ²’’தி அதி⁴ப்பேதோ, தஸ்ஸ ச ஸம்மாவாசாத³யோ அலங்காரட்டே²ன ‘‘பரிக்கா²ரா’’தி வுத்தா. சக்கவீரியோதி வீரியசக்கோ. ஜீவிதபரிக்கா²ராதி ஜீவிதஸ்ஸ பவத்திகாரணானி. ஸமுதா³னேதப்³பா³தி ஸம்மா உத்³த⁴ங் ஆனேதப்³பா³ பரியேஸிதப்³பா³.
290. Catutthe parehi patte pātiyamānānaṃ bhikkhāpiṇḍānaṃ pāto sannipātoti piṇḍapātoti bhikkhāhāro vuccati, taṃsadisatāya aññopi yo koci bhikkhācariyaṃ vinā bhikkhūhi laddho piṇḍapātotveva vuccati. Pati eti etasmāti paccayoti āha ‘‘patikaraṇaṭṭhena paccayo’’ti. Rogadukkhānaṃ vā paṭipakkhabhāvena ayati pavattatīti paccayo. Sappāyassāti hitassa. Nagaraparikkhārehīti nagaraṃ parivāretvā rakkhaṇakehi. Rājūnaṃ gehaparikkhepo parikhā uddāpo pākāro esikā paligho aṭṭoti ime satta nagaraparikkhārāti vadanti. Setaparikkhāroti visuddhisīlālaṅkāro. Ariyamaggo hi idha ‘‘ratho’’ti adhippeto, tassa ca sammāvācādayo alaṅkāraṭṭhena ‘‘parikkhārā’’ti vuttā. Cakkavīriyoti vīriyacakko. Jīvitaparikkhārāti jīvitassa pavattikāraṇāni. Samudānetabbāti sammā uddhaṃ ānetabbā pariyesitabbā.
291. உபசாரேதி யத்த² டி²தோ விஞ்ஞாபேதுங் ஸக்கோதி, தாதி³ஸே டா²னே. காமோ சேவ ஹேது ச பாரிசரியா ச அத்தோ²தி பாளியங் ‘‘அத்தனோ காமங், அத்தனோ ஹேதுங், அத்தனோ அதி⁴ப்பாயங், அத்தனோ பாரிசரிய’’ந்தி (பாரா॰ 292) வுத்தேஸு இமேஸு சதூஸு பதே³ஸு காமோ, ஹேது, பாரிசரியா ச அட்ட²கதா²யங் வுத்தே பட²மே அத்த²விகப்பே விக்³க³ஹவாக்யாதி⁴ப்பாயஸூசனதோ அத்தோ². ஸேஸந்தி அதி⁴ப்பாயபத³மேகங். ப்³யஞ்ஜனந்தி ப்³யஞ்ஜனமத்தங், பட²மவிகப்பானுபயோகி³தாய வசனமத்தந்தி அத்தோ². து³தியே அத்த²விகப்பேபி ஏஸேவ நயோ.
291.Upacāreti yattha ṭhito viññāpetuṃ sakkoti, tādise ṭhāne. Kāmo ceva hetu ca pāricariyā ca atthoti pāḷiyaṃ ‘‘attano kāmaṃ, attano hetuṃ, attano adhippāyaṃ, attano pāricariya’’nti (pārā. 292) vuttesu imesu catūsu padesu kāmo, hetu, pāricariyā ca aṭṭhakathāyaṃ vutte paṭhame atthavikappe viggahavākyādhippāyasūcanato attho. Sesanti adhippāyapadamekaṃ. Byañjananti byañjanamattaṃ, paṭhamavikappānupayogitāya vacanamattanti attho. Dutiye atthavikappepi eseva nayo.
யதா²வுத்தமேவ அத்த²ங் பத³பா⁴ஜனேன ஸங்ஸந்தி³த்வா த³ஸ்ஸேதுங் ‘‘அத்தனோ காமங் அத்தனோ ஹேதுங் அத்தனோ பாரிசரியந்தி ஹி வுத்தே ஜானிஸ்ஸந்தி பண்டி³தா’’திஆதி³ ஆரத்³த⁴ங். இத³ங் வுத்தங் ஹோதி – ‘‘அத்தனோ ஹேது’’ந்தி வுத்தே அத்தனோ அத்தா²யாதி அயமத்தோ² விஞ்ஞாயதி, ‘‘அத்தனோ காமங் அத்தனோ பாரிசரிய’’ந்தி வுத்தே காமேன பாரிசரியாதி அயமத்தோ² விஞ்ஞாயதி. தஸ்மா இமேஹி தீஹி பதே³ஹி அத்தனோ அத்தா²ய காமேன பாரிசரியா அத்தகாமபாரிசரியாதி இமங் அத்த²விகப்பங் விஞ்ஞூ ஜானிஸ்ஸந்தி. ‘‘அத்தனோ அதி⁴ப்பாய’’ந்தி வுத்தே பன அதி⁴ப்பாய-ஸத்³த³ஸ்ஸ காமித-ஸத்³தே³ன ஸமானத்த²பா⁴வதோ அத்தனா அதி⁴ப்பேதகாமிதட்டே²ன அத்தகாமபாரிசரியாதி இமமத்த²ங் விகப்பங் விஞ்ஞூ ஜானிஸ்ஸந்தி.
Yathāvuttameva atthaṃ padabhājanena saṃsanditvā dassetuṃ ‘‘attano kāmaṃ attano hetuṃ attano pāricariyanti hi vutte jānissanti paṇḍitā’’tiādi āraddhaṃ. Idaṃ vuttaṃ hoti – ‘‘attano hetu’’nti vutte attano atthāyāti ayamattho viññāyati, ‘‘attano kāmaṃ attano pāricariya’’nti vutte kāmena pāricariyāti ayamattho viññāyati. Tasmā imehi tīhi padehi attano atthāya kāmena pāricariyā attakāmapāricariyāti imaṃ atthavikappaṃ viññū jānissanti. ‘‘Attano adhippāya’’nti vutte pana adhippāya-saddassa kāmita-saddena samānatthabhāvato attanā adhippetakāmitaṭṭhena attakāmapāricariyāti imamatthaṃ vikappaṃ viññū jānissanti.
ஏதத³க்³க³ந்தி ஏஸா அக்³கா³. து³ட்டு²ல்லவாசாஸிக்கா²பதே³பி (பாரா॰ 285) காமங் ‘‘யாசதிபி ஆயாசதிபீ’’தி ஏவங் மேது²னயாசனங் ஆக³தங், தங் பன து³ட்டு²ல்லவாசஸ்ஸாத³ராக³வஸேன வுத்தங், இத⁴ பன அத்தனோ மேது²னஸ்ஸாத³ராக³வஸேனாதி அயங் விஸேஸோ.
Etadagganti esā aggā. Duṭṭhullavācāsikkhāpadepi (pārā. 285) kāmaṃ ‘‘yācatipi āyācatipī’’ti evaṃ methunayācanaṃ āgataṃ, taṃ pana duṭṭhullavācassādarāgavasena vuttaṃ, idha pana attano methunassādarāgavasenāti ayaṃ viseso.
வினீதவத்தூ²ஸு ‘‘அக்³க³தா³னங் தே³ஹீ’’தி இத³ங் அத்தனோ அத்தா²ய வுத்தங், து³ட்டு²ல்லவாசாஸிக்கா²பதே³ பன பரத்தா²யபி வுத்தே ஸீஸங் ஏதீதி வேதி³தப்³ப³ங். ஸுப⁴கா³தி இஸ்ஸரியாதீ³ஹி ஸுந்த³ரேஹி ப⁴கே³ஹி ஸமன்னாக³தா. மனுஸ்ஸித்தீ², ததா²ஸஞ்ஞிதா, அத்தகாமபாரிசரியாய ராகோ³, தேன காமபாரிசரியயாசனங், தங்க²ணவிஜானநந்தி இமானெத்த² பஞ்ச அங்கா³னி.
Vinītavatthūsu ‘‘aggadānaṃ dehī’’ti idaṃ attano atthāya vuttaṃ, duṭṭhullavācāsikkhāpade pana paratthāyapi vutte sīsaṃ etīti veditabbaṃ. Subhagāti issariyādīhi sundarehi bhagehi samannāgatā. Manussitthī, tathāsaññitā, attakāmapāricariyāya rāgo, tena kāmapāricariyayācanaṃ, taṅkhaṇavijānananti imānettha pañca aṅgāni.
அத்தகாமபாரிசரியஸிக்கா²பத³வண்ணனா நிட்டி²தா.
Attakāmapāricariyasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 4. அத்தகாமபாரிசரியஸிக்கா²பத³ங் • 4. Attakāmapāricariyasikkhāpadaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 4. அத்தகாமபாரிசரியஸிக்கா²பத³வண்ணனா • 4. Attakāmapāricariyasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 4. அத்தகாமபாரிசரியஸிக்கா²பத³வண்ணனா • 4. Attakāmapāricariyasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 4. அத்தகாமபாரிசரியஸிக்கா²பத³வண்ணனா • 4. Attakāmapāricariyasikkhāpadavaṇṇanā
