| Library / Tipiṭaka / তিপিটক • Tipiṭaka / মহাৰিভঙ্গ-অট্ঠকথা • Mahāvibhaṅga-aṭṭhakathā |
৪. অত্তকামপারিচরিযসিক্খাপদৰণ্ণনা
4. Attakāmapāricariyasikkhāpadavaṇṇanā
২৯০. তেন সমযেন বুদ্ধো ভগৰাতি অত্তকামসিক্খাপদং। তত্থ কুলূপকোতি কুলপযিরুপাসনকো চতুন্নং পচ্চযানং অত্থায কুলূপসঙ্কমনে নিচ্চপ্পযুত্তো।
290.Tena samayena buddho bhagavāti attakāmasikkhāpadaṃ. Tattha kulūpakoti kulapayirupāsanako catunnaṃ paccayānaṃ atthāya kulūpasaṅkamane niccappayutto.
চীৰরপিণ্ডপাতসেনাসনগিলানপচ্চযভেসজ্জপরিক্খারন্তি চীৰরঞ্চ পিণ্ডপাতঞ্চ সেনাসনঞ্চ গিলানপচ্চযভেসজ্জপরিক্খারঞ্চ। গিলানপচ্চযভেসজ্জপরিক্খারন্তি চেত্থ পতিকরণত্থেন পচ্চযো, যস্স কস্সচি সপ্পাযস্সেতং অধিৰচনং। ভিসক্কস্স কম্মং তেন অনুঞ্ঞাতত্তাতি ভেসজ্জং। গিলানপচ্চযোৰ ভেসজ্জং গিলানপচ্চযভেসজ্জং, যংকিঞ্চি গিলানস্স সপ্পাযং ভিসক্ককম্মং তেলমধুফাণিতাদীতি ৰুত্তং হোতি। পরিক্খারোতি পন ‘‘সত্তহি নগরপরিক্খারেহি সুপরিক্খতং হোতী’’তিআদীসু (অ॰ নি॰ ৭.৬৭) পরিৰারো ৰুচ্চতি। ‘‘রথো সীসপরিক্খারো ঝানক্খো চক্কৰীরিযো’’তিআদীসু (সং॰ নি॰ ৫.৪) অলঙ্কারো। ‘‘যে চিমে পব্বজিতেন জীৰিতপরিক্খারা সমুদানেতব্বা’’তিআদীসু (রো॰ নি॰ ১.১.১৯১) সম্ভারো। ইধ পন সম্ভারোপি পরিৰারোপি ৰট্টতি। তঞ্হি গিলানপচ্চযভেসজ্জং জীৰিতস্স পরিৰারোপি হোতি জীৰিতৰিনাসকাবাধুপ্পত্তিযা অন্তরং অদত্ৰা রক্খণতো, সম্ভারোপি যথা চিরং পৰত্ততি এৰমস্স কারণভাৰতো, তস্মা পরিক্খারোতি ৰুচ্চতি। এৰং গিলানপচ্চযভেসজ্জঞ্চ তং পরিক্খারো চাতি গিলানপচ্চযভেসজ্জপরিক্খারো, তং গিলানপচ্চযভেসজ্জপরিক্খারন্তি এৰমত্থো দট্ঠব্বো।
Cīvarapiṇḍapātasenāsanagilānapaccayabhesajjaparikkhāranti cīvarañca piṇḍapātañca senāsanañca gilānapaccayabhesajjaparikkhārañca. Gilānapaccayabhesajjaparikkhāranti cettha patikaraṇatthena paccayo, yassa kassaci sappāyassetaṃ adhivacanaṃ. Bhisakkassa kammaṃ tena anuññātattāti bhesajjaṃ. Gilānapaccayova bhesajjaṃ gilānapaccayabhesajjaṃ, yaṃkiñci gilānassa sappāyaṃ bhisakkakammaṃ telamadhuphāṇitādīti vuttaṃ hoti. Parikkhāroti pana ‘‘sattahi nagaraparikkhārehi suparikkhataṃ hotī’’tiādīsu (a. ni. 7.67) parivāro vuccati. ‘‘Ratho sīsaparikkhāro jhānakkho cakkavīriyo’’tiādīsu (saṃ. ni. 5.4) alaṅkāro. ‘‘Ye cime pabbajitena jīvitaparikkhārā samudānetabbā’’tiādīsu (ro. ni. 1.1.191) sambhāro. Idha pana sambhāropi parivāropi vaṭṭati. Tañhi gilānapaccayabhesajjaṃ jīvitassa parivāropi hoti jīvitavināsakābādhuppattiyā antaraṃ adatvā rakkhaṇato, sambhāropi yathā ciraṃ pavattati evamassa kāraṇabhāvato, tasmā parikkhāroti vuccati. Evaṃ gilānapaccayabhesajjañca taṃ parikkhāro cāti gilānapaccayabhesajjaparikkhāro, taṃ gilānapaccayabhesajjaparikkhāranti evamattho daṭṭhabbo.
ৰসলন্তি হীনং লামকং। অথ ৰা ৰস্সতীতি ৰসলো, পগ্ঘরতীতি অত্থো, তং ৰসলং, অসুচিপগ্ঘরণকন্তি ৰুত্তং হোতি। নিট্ঠুহিত্ৰাতি খেল়ং পাতেত্ৰা।
Vasalanti hīnaṃ lāmakaṃ. Atha vā vassatīti vasalo, paggharatīti attho, taṃ vasalaṃ, asucipaggharaṇakanti vuttaṃ hoti. Niṭṭhuhitvāti kheḷaṃ pātetvā.
কস্সাহং কেন হাযামীতি অহং কস্সা অঞ্ঞিস্সা ইত্থিযা কেন ভোগেন ৰা অলঙ্কারেন ৰা রূপেন ৰা পরিহাযামি, কা নাম মযা উত্তরিতরাতি দীপেতি।
Kassāhaṃ kena hāyāmīti ahaṃ kassā aññissā itthiyā kena bhogena vā alaṅkārena vā rūpena vā parihāyāmi, kā nāma mayā uttaritarāti dīpeti.
২৯১. সন্তিকেতি উপচারে ঠত্ৰা সামন্তা অৰিদূরে, পদভাজনেপি অযমেৰঅত্থো দীপিতো । অত্তকামপারিচরিযাযাতি মেথুনধম্মসঙ্খাতেন কামেন পারিচরিযা কামপারিচরিযা। অত্তনো অত্থায কামপারিচরিযা অত্তকামপারিচরিযা, অত্তনা ৰা কামিতা ইচ্ছিতাতি অত্তকামা, সযং মেথুনরাগৰসেন পত্থিতাতি অত্থো। অত্তকামা চ সা পারিচরিযা চাতি অত্তকামপারিচরিযা, তস্সা অত্তকামপারিচরিযায। ৰণ্ণং ভাসেয্যাতি গুণং আনিসংসং পকাসেয্য।
291.Santiketi upacāre ṭhatvā sāmantā avidūre, padabhājanepi ayamevaattho dīpito . Attakāmapāricariyāyāti methunadhammasaṅkhātena kāmena pāricariyā kāmapāricariyā. Attano atthāya kāmapāricariyā attakāmapāricariyā, attanā vā kāmitā icchitāti attakāmā, sayaṃ methunarāgavasena patthitāti attho. Attakāmā ca sā pāricariyā cāti attakāmapāricariyā, tassā attakāmapāricariyāya. Vaṇṇaṃ bhāseyyāti guṇaṃ ānisaṃsaṃ pakāseyya.
তত্র যস্মা ‘‘অত্তনো অত্থায কামপারিচরিযা’’তি ইমস্মিং অত্থৰিকপ্পে কামো চেৰ হেতু চ পারিচরিযা চ অত্থো, সেসং ব্যঞ্জনং। ‘‘অত্তকামা চ সা পারিচরিযা চাতি অত্তকামপারিচরিযা’’তি ইমস্মিং অত্থৰিকপ্পে অধিপ্পাযো চেৰ পারিচরিযা চাতি অত্থো, সেসং ব্যঞ্জনং। তস্মা ব্যঞ্জনে আদরং অকত্ৰা অত্থমত্তমেৰ দস্সেতুং ‘‘অত্তনো কামং অত্তনো হেতুং অত্তনো অধিপ্পাযং অত্তনো পারিচরিয’’ন্তি পদভাজনং ৰুত্তং। ‘‘অত্তনো কামং অত্তনো হেতুং অত্তনো পারিচরিয’’ন্তি হি ৰুত্তে জানিস্সন্তি পণ্ডিতা ‘‘এত্তাৰতা অত্তনো অত্থায কামপারিচরিযা ৰুত্তা’’তি। ‘‘অত্তনো অধিপ্পাযং অত্তনো পারিচরিয’’ন্তি ৰুত্তেপি জানিস্সন্তি ‘‘এত্তাৰতা অত্তনা ইচ্ছিতকামিতট্ঠেন অত্তকামপারিচরিযা ৰুত্তা’’তি।
Tatra yasmā ‘‘attano atthāya kāmapāricariyā’’ti imasmiṃ atthavikappe kāmo ceva hetu ca pāricariyā ca attho, sesaṃ byañjanaṃ. ‘‘Attakāmā ca sā pāricariyā cāti attakāmapāricariyā’’ti imasmiṃ atthavikappe adhippāyo ceva pāricariyā cāti attho, sesaṃ byañjanaṃ. Tasmā byañjane ādaraṃ akatvā atthamattameva dassetuṃ ‘‘attano kāmaṃ attano hetuṃ attano adhippāyaṃ attano pāricariya’’nti padabhājanaṃ vuttaṃ. ‘‘Attano kāmaṃ attano hetuṃ attano pāricariya’’nti hi vutte jānissanti paṇḍitā ‘‘ettāvatā attano atthāya kāmapāricariyā vuttā’’ti. ‘‘Attano adhippāyaṃ attano pāricariya’’nti vuttepi jānissanti ‘‘ettāvatā attanā icchitakāmitaṭṭhena attakāmapāricariyā vuttā’’ti.
ইদানি তস্সা অত্তকামপারিচরিযায ৰণ্ণভাসনাকারং দস্সেন্তো ‘‘এতদগ্গ’’ন্তিআদিমাহ। তং উদ্দেসতোপি নিদ্দেসতোপি উত্তানত্থমেৰ। অযং পনেত্থ পদসম্বন্ধো চ আপত্তিৰিনিচ্ছযো চ – এতদগ্গং…পে॰… পরিচরেয্যাতি যা মাদিসং সীলৰন্তং কল্যাণধম্মং ব্রহ্মচারিং এতেন ধম্মেন পরিচরেয্য, তস্সা এৰং মাদিসং পরিচরন্তিযা যা অযং পারিচরিযা নাম, এতদগ্গং পারিচরিযানন্তি।
Idāni tassā attakāmapāricariyāya vaṇṇabhāsanākāraṃ dassento ‘‘etadagga’’ntiādimāha. Taṃ uddesatopi niddesatopi uttānatthameva. Ayaṃ panettha padasambandho ca āpattivinicchayo ca – etadaggaṃ…pe… paricareyyāti yā mādisaṃ sīlavantaṃ kalyāṇadhammaṃ brahmacāriṃ etena dhammena paricareyya, tassā evaṃ mādisaṃ paricarantiyā yā ayaṃ pāricariyā nāma, etadaggaṃ pāricariyānanti.
মেথুনুপসংহিতেন সঙ্ঘাদিসেসোতি এৰং অত্তকামপারিচরিযায ৰণ্ণং ভাসন্তো চ মেথুনুপসংহিতেন মেথুনধম্মপটিসংযুত্তেনেৰ ৰচনেন যো ভাসেয্য, তস্স সঙ্ঘাদিসেসোতি।
Methunupasaṃhitena saṅghādisesoti evaṃ attakāmapāricariyāya vaṇṇaṃ bhāsanto ca methunupasaṃhitena methunadhammapaṭisaṃyutteneva vacanena yo bhāseyya, tassa saṅghādisesoti.
ইধানি যস্মা মেথুনুপসংহিতেনেৰ ভাসন্তস্স সঙ্ঘাদিসেসো ৰুত্তো, তস্মা ‘‘অহম্পি খত্তিযো, ত্ৰম্পি খত্তিযা, অরহতি খত্তিযা খত্তিযস্স দাতুং সমজাতিকত্তা’’তি এৰমাদীহি ৰচনেহি পারিচরিযায ৰণ্ণং ভাসমানস্সাপি সঙ্ঘাদিসেসো নত্থি। ‘‘অহম্পি খত্তিযো’’তিআদিকে পন বহূপি পরিযাযে ৰত্ৰা ‘‘অরহসি ত্ৰং ময্হং মেথুনধম্মং দাতু’’ন্তি এৰং মেথুনপ্পটিসংযুত্তেনেৰ ভাসমানস্স সঙ্ঘাদিসেসোতি।
Idhāni yasmā methunupasaṃhiteneva bhāsantassa saṅghādiseso vutto, tasmā ‘‘ahampi khattiyo, tvampi khattiyā, arahati khattiyā khattiyassa dātuṃ samajātikattā’’ti evamādīhi vacanehi pāricariyāya vaṇṇaṃ bhāsamānassāpi saṅghādiseso natthi. ‘‘Ahampi khattiyo’’tiādike pana bahūpi pariyāye vatvā ‘‘arahasi tvaṃ mayhaṃ methunadhammaṃ dātu’’nti evaṃ methunappaṭisaṃyutteneva bhāsamānassa saṅghādisesoti.
ইত্থী চ হোতীতিআদি পুব্বে ৰুত্তনযমেৰ। ইধ উদাযিত্থেরো আদিকম্মিকো, তস্স অনাপত্তি আদিকম্মিকস্সাতি।
Itthīca hotītiādi pubbe vuttanayameva. Idha udāyitthero ādikammiko, tassa anāpatti ādikammikassāti.
সমুট্ঠানাদি সব্বং দুট্ঠুল্লৰাচাসদিসং। ৰিনীতৰত্থূনি উত্তানত্থানেৰাতি।
Samuṭṭhānādi sabbaṃ duṭṭhullavācāsadisaṃ. Vinītavatthūni uttānatthānevāti.
অত্তকামপারিচরিযসিক্খাপদৰণ্ণনা নিট্ঠিতা।
Attakāmapāricariyasikkhāpadavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ৪. অত্তকামপারিচরিযসিক্খাপদং • 4. Attakāmapāricariyasikkhāpadaṃ
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ৪. অত্তকামপারিচরিযসিক্খাপদৰণ্ণনা • 4. Attakāmapāricariyasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ৪. অত্তকামপারিচরিযসিক্খাপদৰণ্ণনা • 4. Attakāmapāricariyasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ৪. অত্তকামপারিচরিযসিক্খাপদৰণ্ণনা • 4. Attakāmapāricariyasikkhāpadavaṇṇanā
