| Library / Tipiṭaka / ਤਿਪਿਟਕ • Tipiṭaka / ਸਾਰਤ੍ਥਦੀਪਨੀ-ਟੀਕਾ • Sāratthadīpanī-ṭīkā |
੪. ਅਤ੍ਤਕਾਮਪਾਰਿਚਰਿਯਸਿਕ੍ਖਾਪਦવਣ੍ਣਨਾ
4. Attakāmapāricariyasikkhāpadavaṇṇanā
੨੯੦. ਚਤੁਤ੍ਥੇ ਚੀવਰਨ੍ਤਿ ਨਿવਾਸਨਾਦਿ ਯਂ ਕਿਞ੍ਚਿ ਚੀવਰਂ। ਪਿਣ੍ਡਪਾਤਨ੍ਤਿ ਯੋ ਕੋਚਿ ਆਹਾਰੋ। ਸੋ ਹਿ ਪਿਣ੍ਡੋਲ੍ਯੇਨ ਭਿਕ੍ਖੁਨੋ ਪਤ੍ਤੇ ਪਤਨਤੋ ਤਤ੍ਥ ਤਤ੍ਥ ਲਦ੍ਧਭਿਕ੍ਖਾਨਂ ਪਿਣ੍ਡਾਨਂ ਪਾਤੋ ਸਨ੍ਨਿਪਾਤੋਤਿ વਾ ਪਿਣ੍ਡਪਾਤੋਤਿ વੁਚ੍ਚਤਿ। ਸੇਨਾਸਨਨ੍ਤਿ ਸਯਨਞ੍ਚ ਆਸਨਞ੍ਚ। ਯਤ੍ਥ ਹਿ વਿਹਾਰਾਦਿਕੇ ਸੇਤਿ ਨਿਪਜ੍ਜਤਿ ਆਸਤਿ ਨਿਸੀਦਤਿ, ਤਂ ਸੇਨਾਸਨਂ। ਪਤਿ ਏਤਿ ਏਤਸ੍ਮਾਤਿ ਪਚ੍ਚਯੋਤਿ ਆਹ ‘‘ਪਤਿਕਰਣਟ੍ਠੇਨ ਪਚ੍ਚਯੋ’’ਤਿ। ਰੋਗਸ੍ਸ ਪਤਿਅਯਨਟ੍ਠੇਨ વਾ ਪਚ੍ਚਯੋ, ਪਚ੍ਚਨੀਕਗਮਨਟ੍ਠੇਨਾਤਿ ਅਤ੍ਥੋ, વੂਪਸਮਨਤ੍ਥੇਨਾਤਿ વੁਤ੍ਤਂ ਹੋਤਿ। ਧਾਤੁਕ੍ਖੋਭਲਕ੍ਖਣਸ੍ਸ ਹਿ ਤਂਹੇਤੁਕਦੁਕ੍ਖવੇਦਨਾਲਕ੍ਖਣਸ੍ਸ વਾ ਰੋਗਸ੍ਸ ਪਟਿਪਕ੍ਖਭਾવੋ ਪਤਿਅਯਨਟ੍ਠੋ। ਯਸ੍ਸ ਕਸ੍ਸਚੀਤਿ ਸਪ੍ਪਿਆਦੀਸੁ ਯਸ੍ਸ ਕਸ੍ਸਚਿ। ਸਪ੍ਪਾਯਸ੍ਸਾਤਿ ਹਿਤਸ੍ਸ વਿਕਾਰવੂਪਸਮੇਨਾਤਿ ਅਧਿਪ੍ਪਾਯੋ। ਭਿਸਕ੍ਕਸ੍ਸ ਕਮ੍ਮਂ ਤੇਨ વਿਧਾਤਬ੍ਬਤੋ, ਤੇਨਾਹ ‘‘ਅਨੁਞ੍ਞਾਤਤ੍ਤਾ’’ਤਿ। ਨਗਰਪਰਿਕ੍ਖਾਰੇਹੀਤਿ ਨਗਰਂ ਪਰਿવਾਰੇਤ੍વਾ ਰਕ੍ਖਣਕੇਹਿ। ਆવਾਟਪਰਿਕ੍ਖੇਪੋ ਪਰਿਖਾ ਉਦ੍ਦਾਪੋ ਪਾਕਾਰੋ ਏਸਿਕਾ ਪਲਿਘੋ ਪਾਕਾਰਮਤ੍ਥਕਮਣ੍ਡਲਨ੍ਤਿ ਸਤ੍ਤ ਨਗਰਪਰਿਕ੍ਖਾਰਾਤਿ વਦਨ੍ਤਿ। ਸੇਤਪਰਿਕ੍ਖਾਰੋਤਿ ਸੁવਿਸੁਦ੍ਧਸੀਲਾਲਙ੍ਕਾਰੋ। ਅਰਿਯਮਗ੍ਗੋ ਹਿ ਇਧ ‘‘ਰਥੋ’’ਤਿ ਅਧਿਪ੍ਪੇਤੋ। ਤਸ੍ਸ ਚ ਸਮ੍ਮਾવਾਚਾਦਯੋ ਅਲਙ੍ਕਾਰਟ੍ਠੇਨ ‘‘ਪਰਿਕ੍ਖਾਰੋ’’ਤਿ વੁਤ੍ਤਾ। ਚਕ੍ਕવੀਰਿਯੋਤਿ વੀਰਿਯਚਕ੍ਕੋ। ਜੀવਿਤਪਰਿਕ੍ਖਾਰਾਤਿ ਜੀવਿਤਸ੍ਸ ਪવਤ੍ਤਿਕਾਰਣਾਨਿ। ਸਮੁਦਾਨੇਤਬ੍ਬਾਤਿ ਸਮ੍ਮਾ ਉਦ੍ਧਂ ਉਦ੍ਧਂ ਆਨੇਤਬ੍ਬਾ ਪਰਿਯੇਸਿਤਬ੍ਬਾ। ਪਰਿવਾਰੋਪਿ ਹੋਤਿ ਅਨ੍ਤਰਾਯਾਨਂ ਪਰਿਤੋ વਾਰਣਤੋ, ਤੇਨਾਹ – ‘‘ਜੀવਿਤ…ਪੇ॰… ਰਕ੍ਖਣਤੋ’’ਤਿ। ਤਤ੍ਥ ਅਨ੍ਤਰਨ੍ਤਿ વਿવਰਂ, ਓਕਾਸੋਤਿ ਅਤ੍ਥੋ। ਰਕ੍ਖਣਤੋਤਿ વੇਰਿਕਾਨਂ ਅਨ੍ਤਰਂ ਅਦਤ੍વਾ ਅਤ੍ਤਨੋ ਸਾਮੀਨਂ ਪਰਿવਾਰੇਤ੍વਾ ਠਿਤਸੇવਕਾ વਿਯ ਰਕ੍ਖਣਤੋ। ਅਸ੍ਸਾਤਿ ਜੀવਿਤਸ੍ਸ। ਕਾਰਣਭਾવਤੋਤਿ ਚਿਰਪ੍ਪવਤ੍ਤਿਯਾ ਕਾਰਣਭਾવਤੋ। ਰਸਾਯਨਭੂਤਞ੍ਹਿ ਭੇਸਜ੍ਜਂ ਸੁਚਿਰਮ੍ਪਿ ਕਾਲਂ ਜੀવਿਤਂ ਪવਤ੍ਤੇਤਿਯੇવ।
290. Catutthe cīvaranti nivāsanādi yaṃ kiñci cīvaraṃ. Piṇḍapātanti yo koci āhāro. So hi piṇḍolyena bhikkhuno patte patanato tattha tattha laddhabhikkhānaṃ piṇḍānaṃ pāto sannipātoti vā piṇḍapātoti vuccati. Senāsananti sayanañca āsanañca. Yattha hi vihārādike seti nipajjati āsati nisīdati, taṃ senāsanaṃ. Pati eti etasmāti paccayoti āha ‘‘patikaraṇaṭṭhena paccayo’’ti. Rogassa patiayanaṭṭhena vā paccayo, paccanīkagamanaṭṭhenāti attho, vūpasamanatthenāti vuttaṃ hoti. Dhātukkhobhalakkhaṇassa hi taṃhetukadukkhavedanālakkhaṇassa vā rogassa paṭipakkhabhāvo patiayanaṭṭho. Yassa kassacīti sappiādīsu yassa kassaci. Sappāyassāti hitassa vikāravūpasamenāti adhippāyo. Bhisakkassa kammaṃ tena vidhātabbato, tenāha ‘‘anuññātattā’’ti. Nagaraparikkhārehīti nagaraṃ parivāretvā rakkhaṇakehi. Āvāṭaparikkhepo parikhā uddāpo pākāro esikā paligho pākāramatthakamaṇḍalanti satta nagaraparikkhārāti vadanti. Setaparikkhāroti suvisuddhasīlālaṅkāro. Ariyamaggo hi idha ‘‘ratho’’ti adhippeto. Tassa ca sammāvācādayo alaṅkāraṭṭhena ‘‘parikkhāro’’ti vuttā. Cakkavīriyoti vīriyacakko. Jīvitaparikkhārāti jīvitassa pavattikāraṇāni. Samudānetabbāti sammā uddhaṃ uddhaṃ ānetabbā pariyesitabbā. Parivāropi hoti antarāyānaṃ parito vāraṇato, tenāha – ‘‘jīvita…pe… rakkhaṇato’’ti. Tattha antaranti vivaraṃ, okāsoti attho. Rakkhaṇatoti verikānaṃ antaraṃ adatvā attano sāmīnaṃ parivāretvā ṭhitasevakā viya rakkhaṇato. Assāti jīvitassa. Kāraṇabhāvatoti cirappavattiyā kāraṇabhāvato. Rasāyanabhūtañhi bhesajjaṃ sucirampi kālaṃ jīvitaṃ pavattetiyeva.
੨੯੧. ਉਪਚਾਰੇਤਿ ਯਤ੍ਥ ਠਿਤੋ વਿਞ੍ਞਾਪੇਤੁਂ ਸਕ੍ਕੋਤਿ, ਤਾਦਿਸੇ। ਕਾਮੋ ਚੇવ ਹੇਤੁ ਚ ਪਾਰਿਚਰਿਯਾ ਚ ਅਤ੍ਥੋ। ਸੇਸਂ ਬ੍ਯਞ੍ਜਨਨ੍ਤਿਆਦੀਸੁ ਪਾਲ਼ਿਯਂ ‘‘ਅਤ੍ਤਕਾਮ’’ਨ੍ਤਿ ਪਦਂ ਉਦ੍ਧਰਿਤ੍વਾ ਅਤ੍ਤਨੋ ਕਾਮਂ, ਅਤ੍ਤਨੋ ਹੇਤੁਂ, ਅਤ੍ਤਨੋ ਅਧਿਪ੍ਪਾਯਂ, ਅਤ੍ਤਨੋ ਪਾਰਿਚਰਿਯਨ੍ਤਿ ਚਤ੍ਤਾਰੋ ਅਤ੍ਥਾ ਪਦਭਾਜਨੇ વੁਤ੍ਤਾ। ਤੇਸੁ ਪਠਮੇ ਅਤ੍ਥવਿਕਪ੍ਪੇ ਕਾਮੋ ਚ ਹੇਤੁ ਚ ਪਾਰਿਚਰਿਯਾ ਚ ਅਤ੍ਥੋ, ਸੇਸਂ ਅਧਿਪ੍ਪਾਯਪਦਮੇਕਂ ਬ੍ਯਞ੍ਜਨਂ ਪਠਮવਿਗ੍ਗਹੇ ਤਦਤ੍ਥਸ੍ਸ ਅਸਮ੍ਭવਭਾવਤੋ ਨਿਰਤ੍ਥਕਤ੍ਤਾ। ਦੁਤਿਯੇ ਪਨ ਅਤ੍ਥવਿਕਪ੍ਪੇ ਅਧਿਪ੍ਪਾਯੋ ਚ ਪਾਰਿਚਰਿਯਾ ਚ ਅਤ੍ਥੋ, ਕਾਮੋ ਚ ਹੇਤੁ ਚਾਤਿ ਸੇਸਂ ਪਦਦ੍વਯਂ ਬ੍ਯਞ੍ਜਨਂ ਤੇਸਂ ਤਤ੍ਥ ਅਤ੍ਥਾਭਾવਤੋਤਿ ਏવਂ ਚਤ੍ਤਾਰਿ ਪਦਾਨਿ ਦ੍વਿਨ੍ਨਂ વਿਗ੍ਗਹਾਨਂ વਸੇਨ ਯੋਜਿਤਾਨੀਤਿ ਕੇਚਿ વਦਨ੍ਤਿ। ਗਣ੍ਠਿਪਦੇ ਚ ਅਯਮੇવਤ੍ਥੋ વੁਤ੍ਤੋ। ਚੂਲ਼ਮਜ੍ਝਿਮਮਹਾਗਣ੍ਠਿਪਦੇਸੁ ਪਨ ‘‘ਪਠਮਸ੍ਮਿਂ ਅਤ੍ਥવਿਕਪ੍ਪੇ ਕਾਮੋ ਚ ਹੇਤੁ ਚ ਪਾਰਿਚਰਿਯਾ ਚ ਅਧਿਪ੍ਪਾਯਤ੍ਥੋ, ਸੇਸਂ ਮੇਥੁਨਧਮ੍ਮਸਙ੍ਖਾਤੇਨ ਕਾਮੇਨਾਤਿਆਦਿ વਿਗ੍ਗਹવਾਕ੍ਯਂ ਅਕ੍ਖਰવਿવਰਣਮਤ੍ਤਤੋ ਬ੍ਯਞ੍ਜਨਮਤ੍ਤਂ। ਦੁਤਿਯੇ ਅਤ੍ਥવਿਕਪ੍ਪੇ ਅਧਿਪ੍ਪਾਯੋ ਚ ਪਾਰਿਚਰਿਯਾ ਚ ਅਧਿਪ੍ਪਾਯਤ੍ਥੋ, ਸੇਸਂ ਅਤ੍ਤਨਾ ਕਾਮਿਤਾ ਇਚ੍ਛਿਤਾਤਿਆਦਿ વਿਗ੍ਗਹવਾਕ੍ਯਂ ਅਕ੍ਖਰવਿવਰਣਮਤ੍ਤਤੋ ਬ੍ਯਞ੍ਜਨਮਤ੍ਤ’’ਨ੍ਤਿ ਏવਮਤ੍ਥੋ વੁਤ੍ਤੋ । ‘‘ਬ੍ਯਞ੍ਜਨੇ ਆਦਰਂ ਅਕਤ੍વਾ’’ਤਿ વਚਨਤੋ ਅਯਮੇવਤ੍ਥੋ ਇਧ ਯੁਤ੍ਤਤਰੋਤਿ વਿਞ੍ਞਾਯਤਿ। ਬ੍ਯਞ੍ਜਨੇ ਆਦਰਂ ਅਕਤ੍વਾਤਿ ਇਮਿਨਾ ਹਿ ਅਟ੍ਠਕਥਾਯਂ વੁਤ੍ਤવਿਗ੍ਗਹવਸੇਨ ਬ੍ਯਞ੍ਜਨੇ ਆਦਰਂ ਅਕਤ੍વਾਤਿ ਅਯਮਤ੍ਥੋ ਦੀਪਿਤੋ।
291.Upacāreti yattha ṭhito viññāpetuṃ sakkoti, tādise. Kāmo ceva hetu ca pāricariyā ca attho. Sesaṃ byañjanantiādīsu pāḷiyaṃ ‘‘attakāma’’nti padaṃ uddharitvā attano kāmaṃ, attano hetuṃ, attano adhippāyaṃ, attano pāricariyanti cattāro atthā padabhājane vuttā. Tesu paṭhame atthavikappe kāmo ca hetu ca pāricariyā ca attho, sesaṃ adhippāyapadamekaṃ byañjanaṃ paṭhamaviggahe tadatthassa asambhavabhāvato niratthakattā. Dutiye pana atthavikappe adhippāyo ca pāricariyā ca attho, kāmo ca hetu cāti sesaṃ padadvayaṃ byañjanaṃ tesaṃ tattha atthābhāvatoti evaṃ cattāri padāni dvinnaṃ viggahānaṃ vasena yojitānīti keci vadanti. Gaṇṭhipade ca ayamevattho vutto. Cūḷamajjhimamahāgaṇṭhipadesu pana ‘‘paṭhamasmiṃ atthavikappe kāmo ca hetu ca pāricariyā ca adhippāyattho, sesaṃ methunadhammasaṅkhātena kāmenātiādi viggahavākyaṃ akkharavivaraṇamattato byañjanamattaṃ. Dutiye atthavikappe adhippāyo ca pāricariyā ca adhippāyattho, sesaṃ attanā kāmitā icchitātiādi viggahavākyaṃ akkharavivaraṇamattato byañjanamatta’’nti evamattho vutto . ‘‘Byañjane ādaraṃ akatvā’’ti vacanato ayamevattho idha yuttataroti viññāyati. Byañjane ādaraṃ akatvāti iminā hi aṭṭhakathāyaṃ vuttaviggahavasena byañjane ādaraṃ akatvāti ayamattho dīpito.
ਇਦਾਨਿ ਯਥਾવੁਤ੍ਤਮੇવਤ੍ਥਂ ਪਦਭਾਜਨੇਨ ਸਂਸਨ੍ਦਿਤ੍વਾ ਦਸ੍ਸੇਤੁਂ ‘‘ਅਤ੍ਤਨੋ ਕਾਮਂ ਅਤ੍ਤਨੋ ਹੇਤੁਂ ਅਤ੍ਤਨੋ ਪਾਰਿਚਰਿਯਨ੍ਤਿ ਹਿ વੁਤ੍ਤੇ ਜਾਨਿਸ੍ਸਨ੍ਤਿ ਪਣ੍ਡਿਤਾ’’ਤਿਆਦਿ ਆਰਦ੍ਧਂ। ਇਦਂ વੁਤ੍ਤਂ ਹੋਤਿ – ‘‘ਅਤ੍ਤਨੋ ਹੇਤੁ’’ਨ੍ਤਿ વੁਤ੍ਤੇ ਅਤ੍ਤਨੋ ਅਤ੍ਥਾਯਾਤਿ ਅਯਮਤ੍ਥੋ વਿਞ੍ਞਾਯਤਿ। ‘‘ਅਤ੍ਤਨੋ ਕਾਮਂ ਅਤ੍ਤਨੋ ਪਾਰਿਚਰਿਯ’’ਨ੍ਤਿ ਚ વੁਤ੍ਤੇ ਕਾਮੇਨ ਪਾਰਿਚਰਿਯਾਤਿ ਅਯਮਤ੍ਥੋ વਿਞ੍ਞਾਯਤਿ। ਤਸ੍ਮਾ ਅਤ੍ਤਨੋ ਕਾਮਂ ਅਤ੍ਤਨੋ ਹੇਤੁਂ ਅਤ੍ਤਨੋ ਪਾਰਿਚਰਿਯਨ੍ਤਿ ਇਮੇਹਿ ਤੀਹਿ ਪਦੇਹਿ ਅਤ੍ਤਨੋ ਅਤ੍ਥਾਯ ਕਾਮੇਨ ਪਾਰਿਚਰਿਯਾ ਅਤ੍ਤਕਾਮਪਾਰਿਚਰਿਯਾਤਿ ਅਯਮਤ੍ਥવਿਕਪ੍ਪੋ વੁਤ੍ਤੋਤਿ વਿਞ੍ਞੂ ਜਾਨਿਸ੍ਸਨ੍ਤਿ। ‘‘ਅਤ੍ਤਨੋ ਅਧਿਪ੍ਪਾਯ’’ਨ੍ਤਿ વੁਤ੍ਤੇ ਪਨ ਅਧਿਪ੍ਪਾਯਸਦ੍ਦਸ੍ਸ ਕਾਮਿਤਸਦ੍ਦੇਨ ਸਮਾਨਤ੍ਥਭਾવਤੋ ਅਤ੍ਤਨੋ ਪਾਰਿਚਰਿਯਨ੍ਤਿ ਇਮਸ੍ਸ ਚ ਉਭਯવਿਗ੍ਗਹਸਾਮਞ੍ਞਤੋ ਅਤ੍ਤਨੋ ਇਚ੍ਛਿਤਕਾਮਿਤਟ੍ਠੇਨ ਅਤ੍ਤਕਾਮਪਾਰਿਚਰਿਯਾਤਿ ਅਯਮਤ੍ਥવਿਕਪ੍ਪੋ ਦ੍વੀਹਿ ਪਦੇਹਿ ਦਸ੍ਸਿਤੋਤਿ વਿਞ੍ਞੂ ਜਾਨਿਸ੍ਸਨ੍ਤੀਤਿ।
Idāni yathāvuttamevatthaṃ padabhājanena saṃsanditvā dassetuṃ ‘‘attano kāmaṃ attano hetuṃ attano pāricariyanti hi vutte jānissanti paṇḍitā’’tiādi āraddhaṃ. Idaṃ vuttaṃ hoti – ‘‘attano hetu’’nti vutte attano atthāyāti ayamattho viññāyati. ‘‘Attano kāmaṃ attano pāricariya’’nti ca vutte kāmena pāricariyāti ayamattho viññāyati. Tasmā attano kāmaṃ attano hetuṃ attano pāricariyanti imehi tīhi padehi attano atthāya kāmena pāricariyā attakāmapāricariyāti ayamatthavikappo vuttoti viññū jānissanti. ‘‘Attano adhippāya’’nti vutte pana adhippāyasaddassa kāmitasaddena samānatthabhāvato attano pāricariyanti imassa ca ubhayaviggahasāmaññato attano icchitakāmitaṭṭhena attakāmapāricariyāti ayamatthavikappo dvīhi padehi dassitoti viññū jānissantīti.
ਏਤਦਗ੍ਗਨ੍ਤਿ ਏਸਾ ਅਗ੍ਗਾ। ਦੁਟ੍ਠੁਲ੍ਲવਾਚਾਸਿਕ੍ਖਾਪਦੇ ਕਿਞ੍ਚਾਪਿ ਮੇਥੁਨਯਾਚਨਂ ਆਗਤਂ, ਤਥਾਪਿ ਤਂ ਦੁਟ੍ਠੁਲ੍ਲવਾਚਸ੍ਸਾਦਰਾਗવਸੇਨ વੁਤ੍ਤਂ, ਇਧ ਪਨ ਅਤ੍ਤਨੋ ਮੇਥੁਨਸ੍ਸਾਦਰਾਗવਸੇਨਾਤਿ ਅਯਂ વਿਸੇਸੋ। વਿਨੀਤવਤ੍ਥੂਸੁ ‘‘ਤੇਨ ਹਿ ਭਗਿਨਿ ਅਗ੍ਗਦਾਨਂ ਦੇਹੀ’’ਤਿ ਇਦਂ ਅਤ੍ਤਨੋ ਅਤ੍ਥਾਯ વੁਤ੍ਤਨ੍ਤਿ વੇਦਿਤਬ੍ਬਂ। ਮਨੁਸ੍ਸਿਤ੍ਥੀ, ਇਤ੍ਥਿਸਞ੍ਞਿਤਾ, ਅਤ੍ਤਕਾਮਪਾਰਿਚਰਿਯਾਯ ਰਾਗੋ, ਤੇਨ ਰਾਗੇਨ વਣ੍ਣਭਣਨਂ, ਤਙ੍ਖਣવਿਜਾਨਨਨ੍ਤਿ ਇਮਾਨੇਤ੍ਥ ਪਞ੍ਚ ਅਙ੍ਗਾਨਿ।
Etadagganti esā aggā. Duṭṭhullavācāsikkhāpade kiñcāpi methunayācanaṃ āgataṃ, tathāpi taṃ duṭṭhullavācassādarāgavasena vuttaṃ, idha pana attano methunassādarāgavasenāti ayaṃ viseso. Vinītavatthūsu ‘‘tena hi bhagini aggadānaṃ dehī’’ti idaṃ attano atthāya vuttanti veditabbaṃ. Manussitthī, itthisaññitā, attakāmapāricariyāya rāgo, tena rāgena vaṇṇabhaṇanaṃ, taṅkhaṇavijānananti imānettha pañca aṅgāni.
ਅਤ੍ਤਕਾਮਪਾਰਿਚਰਿਯਸਿਕ੍ਖਾਪਦવਣ੍ਣਨਾ ਨਿਟ੍ਠਿਤਾ।
Attakāmapāricariyasikkhāpadavaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / વਿਨਯਪਿਟਕ • Vinayapiṭaka / ਮਹਾવਿਭਙ੍ਗ • Mahāvibhaṅga / ੪. ਅਤ੍ਤਕਾਮਪਾਰਿਚਰਿਯਸਿਕ੍ਖਾਪਦਂ • 4. Attakāmapāricariyasikkhāpadaṃ
ਅਟ੍ਠਕਥਾ • Aṭṭhakathā / વਿਨਯਪਿਟਕ (ਅਟ੍ਠਕਥਾ) • Vinayapiṭaka (aṭṭhakathā) / ਮਹਾવਿਭਙ੍ਗ-ਅਟ੍ਠਕਥਾ • Mahāvibhaṅga-aṭṭhakathā / ੪. ਅਤ੍ਤਕਾਮਪਾਰਿਚਰਿਯਸਿਕ੍ਖਾਪਦવਣ੍ਣਨਾ • 4. Attakāmapāricariyasikkhāpadavaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / વਜਿਰਬੁਦ੍ਧਿ-ਟੀਕਾ • Vajirabuddhi-ṭīkā / ੪. ਅਤ੍ਤਕਾਮਪਾਰਿਚਰਿਯਸਿਕ੍ਖਾਪਦવਣ੍ਣਨਾ • 4. Attakāmapāricariyasikkhāpadavaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / વਿਮਤਿવਿਨੋਦਨੀ-ਟੀਕਾ • Vimativinodanī-ṭīkā / ੪. ਅਤ੍ਤਕਾਮਪਾਰਿਚਰਿਯਸਿਕ੍ਖਾਪਦવਣ੍ਣਨਾ • 4. Attakāmapāricariyasikkhāpadavaṇṇanā
