| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
4. அத்தகாமஸிக்கா²பத³வண்ணனா
4. Attakāmasikkhāpadavaṇṇanā
அத்தகாமபாரிசரியாவஸேனாதி அத்தகாமபாரிசரியாய ராக³வஸேன. இதா⁴பி து³ட்டு²ல்லாது³ட்டு²ல்லஜானநஸமத்தா²வ இத்தீ² அதி⁴ப்பேதாதி ஆஹ ‘‘து³ட்டு²ல்லோபா⁴ஸேன வுத்தப்பகாராய இத்தி²யா’’தி. ஸமீபேதி ஸவனூபசாரே. ‘‘ட²த்வா’’தி பாட²ஸேஸோ. அத்தகாமபாரிசரியாதி காமீயதீதி காமோ, மேது²னத⁴ம்மோ, பரிசரணங் உபட்டா²னங் பரிசரியா, ஸாவ பாரிசரியா, காமேன பாரிசரியா காமபாரிசரியா, அத்தனோ காமபாரிசரியா அத்தகாமபாரிசரியா, அத்தனோ அத்தா²ய மேது²னத⁴ம்மேன உபட்டா²னந்தி அத்தோ². அத² வா காமிதாதி காமா, பாரிசரியா, அத்தனோ காமா அத்தகாமா, அத்தகாமா ச ஸா பாரிசரியா சாதி அத்தகாமபாரிசரியா, ஸயங் மேது²னராக³வஸேன பத்தி²தஉபட்டா²னந்தி அத்தோ². தேனாஹ ‘‘மேது²னத⁴ம்மஸங்கா²தேனா’’திஆதி³. எத்த² ச பட²மேன அத்த²விகப்பேன காமஹேதுபாரிசரியாஸங்கா²தங் அத்த²த்தயங் த³ஸ்ஸேதி, து³தியேன அதி⁴ப்பாயபாரிசரியாஸங்கா²தங் அத்த²த்³வயங். ப்³யஞ்ஜனே (பாரா॰ அட்ட²॰ 2.291) பன ஆத³ரங் அகத்வா அத்த²மத்தமேவ த³ஸ்ஸேதுங் ‘‘அத்தனோ காமங் அத்தனோ ஹேதுங் அத்தனோ அதி⁴ப்பாயங் அத்தனோ பாரிசரிய’’ந்தி (பாரா॰ 292) பத³பா⁴ஜனங் வுத்தங். ‘‘அத்தனோ காமங் அத்தனோ ஹேதுங் அத்தனோ பாரிசரிய’’ந்தி ஹி வுத்தே ஜானிஸ்ஸந்தி பண்டி³தா ‘‘எத்தாவதா அத்தனோ அத்தா²ய காமபாரிசரியா வுத்தா’’தி, ‘‘அத்தனோ அதி⁴ப்பாயங் அத்தனோ பாரிசரிய’’ந்தி (பாரா॰ 292) வுத்தேபி ஜானிஸ்ஸந்தி ‘‘எத்தாவதா அத்தனா இச்சி²தகாமிதட்டே²ன அத்தகாமபாரிசரியா வுத்தா’’தி.
Attakāmapāricariyāvasenāti attakāmapāricariyāya rāgavasena. Idhāpi duṭṭhullāduṭṭhullajānanasamatthāva itthī adhippetāti āha ‘‘duṭṭhullobhāsena vuttappakārāya itthiyā’’ti. Samīpeti savanūpacāre. ‘‘Ṭhatvā’’ti pāṭhaseso. Attakāmapāricariyāti kāmīyatīti kāmo, methunadhammo, paricaraṇaṃ upaṭṭhānaṃ paricariyā, sāva pāricariyā, kāmena pāricariyā kāmapāricariyā, attano kāmapāricariyā attakāmapāricariyā, attano atthāya methunadhammena upaṭṭhānanti attho. Atha vā kāmitāti kāmā, pāricariyā, attano kāmā attakāmā, attakāmā ca sā pāricariyā cāti attakāmapāricariyā, sayaṃ methunarāgavasena patthitaupaṭṭhānanti attho. Tenāha ‘‘methunadhammasaṅkhātenā’’tiādi. Ettha ca paṭhamena atthavikappena kāmahetupāricariyāsaṅkhātaṃ atthattayaṃ dasseti, dutiyena adhippāyapāricariyāsaṅkhātaṃ atthadvayaṃ. Byañjane (pārā. aṭṭha. 2.291) pana ādaraṃ akatvā atthamattameva dassetuṃ ‘‘attano kāmaṃ attano hetuṃ attano adhippāyaṃ attano pāricariya’’nti (pārā. 292) padabhājanaṃ vuttaṃ. ‘‘Attano kāmaṃ attano hetuṃ attano pāricariya’’nti hi vutte jānissanti paṇḍitā ‘‘ettāvatā attano atthāya kāmapāricariyā vuttā’’ti, ‘‘attano adhippāyaṃ attano pāricariya’’nti (pārā. 292) vuttepi jānissanti ‘‘ettāvatā attanā icchitakāmitaṭṭhena attakāmapāricariyā vuttā’’ti.
கல்யாணேன ப⁴த்³த³கேன கு³ணேன ஸமன்னாக³தத்தா கல்யாணத⁴ம்மங். தேனாஹ ‘‘தது³ப⁴யேனாபீ’’திஆதி³. அபி⁴ரமெய்யாதி தோஸெய்ய. ஏதத³க்³க³ந்தி ஏஸா அக்³கா³. பாரிசரியானந்தி பாரிசரியானங் மஜ்ஜே², நித்³தா⁴ரணே சேதங் ஸாமிவசனங். நனு து³ட்ட²ல்லவாசாஸிக்கா²பதே³ (பாரா॰ 285) மேது²னயாசனங் ஆக³தங், அத² கஸ்மா இத³ங் வுத்தங்? நாயங் தோ³ஸோ. தத்த² (ஸாரத்த²॰ டீ॰ 2.291) ஹி து³ட்டு²ல்லவாசஸ்ஸாத³ராக³வஸேன வுத்தங், இத⁴ பன அத்தனோ மேது²னஸ்ஸாத³ராக³வஸேனாதி.
Kalyāṇena bhaddakena guṇena samannāgatattā kalyāṇadhammaṃ. Tenāha ‘‘tadubhayenāpī’’tiādi. Abhirameyyāti toseyya. Etadagganti esā aggā. Pāricariyānanti pāricariyānaṃ majjhe, niddhāraṇe cetaṃ sāmivacanaṃ. Nanu duṭṭhallavācāsikkhāpade (pārā. 285) methunayācanaṃ āgataṃ, atha kasmā idaṃ vuttaṃ? Nāyaṃ doso. Tattha (sārattha. ṭī. 2.291) hi duṭṭhullavācassādarāgavasena vuttaṃ, idha pana attano methunassādarāgavasenāti.
தஸ்மிங்யேவ க²ணேதி ப⁴ணிதக்க²ணே. உப⁴தொப்³யஞ்ஜனகோ பன பண்ட³கக³திகத்தா விஸுங் ந வுத்தோ . ‘‘இமஸ்மிங் ஸிக்கா²பத³த்³வயே காயஸங்ஸக்³கே³ விய யக்கி²பேதீஸுபி து³ட்டு²ல்லத்தகாமவசனே து²ல்லச்சய’’ந்தி (வஜிர॰ டீ॰ பாராஜிக 295) வத³ந்தி. தஸ்மிங்யேவாதி பண்ட³கேயேவ இத்தி²ஸஞ்ஞினோ அத்தகாமபாரிசரியாய வண்ணப⁴ணனேபி து³க்கடங். ‘‘யோ தே விஹாரே வஸதி, தஸ்ஸ அக்³க³தா³னங் மேது²னங் த⁴ம்மங் தே³ஹீ’’தி பரியாயவசனேபி து³க்கடங். ‘‘அத்தகாமபாரிசரியாய வண்ணங் பா⁴ஸெய்ய யா மாதி³ஸங் ‘ஸீலவந்த’ந்தி வுத்தத்தா’’தி (வஜிர॰ டீ॰ பாராஜிக 295) ஏகே. ‘‘பஞ்சஸு அங்கே³ஸு ஸப்³பா⁴வா ஸங்கா⁴தி³ஸேஸோவா’’தி அபரே. ‘‘மேது²னுபஸங்ஹிதேனா’’தி வுத்தத்தா ‘‘சீவராதீ³ஹி…பே॰… பா⁴ஸந்தஸ்ஸ அனாபத்தீ’’தி வுத்தங்.
Tasmiṃyeva khaṇeti bhaṇitakkhaṇe. Ubhatobyañjanako pana paṇḍakagatikattā visuṃ na vutto . ‘‘Imasmiṃ sikkhāpadadvaye kāyasaṃsagge viya yakkhipetīsupi duṭṭhullattakāmavacane thullaccaya’’nti (vajira. ṭī. pārājika 295) vadanti. Tasmiṃyevāti paṇḍakeyeva itthisaññino attakāmapāricariyāya vaṇṇabhaṇanepi dukkaṭaṃ. ‘‘Yo te vihāre vasati, tassa aggadānaṃ methunaṃ dhammaṃ dehī’’ti pariyāyavacanepi dukkaṭaṃ. ‘‘Attakāmapāricariyāya vaṇṇaṃ bhāseyya yā mādisaṃ ‘sīlavanta’nti vuttattā’’ti (vajira. ṭī. pārājika 295) eke. ‘‘Pañcasu aṅgesu sabbhāvā saṅghādisesovā’’ti apare. ‘‘Methunupasaṃhitenā’’ti vuttattā ‘‘cīvarādīhi…pe… bhāsantassa anāpattī’’ti vuttaṃ.
அத்தகாமஸிக்கா²பத³வண்ணனா நிட்டி²தா.
Attakāmasikkhāpadavaṇṇanā niṭṭhitā.
