| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
৮. অত্তকারীসুত্তং
8. Attakārīsuttaṃ
৩৮. অথ খো অঞ্ঞতরো ব্রাহ্মণো যেন ভগৰা তেনুপসঙ্কমি; উপসঙ্কমিত্ৰা ভগৰতা সদ্ধিং সম্মোদি। সম্মোদনীযং কথং সারণীযং ৰীতিসারেত্ৰা একমন্তং নিসীদি। একমন্তং নিসিন্নো খো সো ব্রাহ্মণো ভগৰন্তং এতদৰোচ – ‘‘অহঞ্হি, ভো গোতম, এৰংৰাদী এৰংদিট্ঠি – ‘নত্থি অত্তকারো, নত্থি পরকারো’’’তি। ‘‘মাহং, ব্রাহ্মণ, এৰংৰাদিং এৰংদিট্ঠিং অদ্দসং ৰা অস্সোসিং ৰা। কথঞ্হি নাম সযং অভিক্কমন্তো, সযং পটিক্কমন্তো এৰং ৰক্খতি – ‘নত্থি অত্তকারো, নত্থি পরকারো’’’তি!
38. Atha kho aññataro brāhmaṇo yena bhagavā tenupasaṅkami; upasaṅkamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho so brāhmaṇo bhagavantaṃ etadavoca – ‘‘ahañhi, bho gotama, evaṃvādī evaṃdiṭṭhi – ‘natthi attakāro, natthi parakāro’’’ti. ‘‘Māhaṃ, brāhmaṇa, evaṃvādiṃ evaṃdiṭṭhiṃ addasaṃ vā assosiṃ vā. Kathañhi nāma sayaṃ abhikkamanto, sayaṃ paṭikkamanto evaṃ vakkhati – ‘natthi attakāro, natthi parakāro’’’ti!
‘‘তং কিং মঞ্ঞসি, ব্রাহ্মণ, অত্থি আরব্ভধাতূ’’তি? ‘‘এৰং, ভো’’। ‘‘আরব্ভধাতুযা সতি আরব্ভৰন্তো সত্তা পঞ্ঞাযন্তী’’তি? ‘‘এৰং, ভো’’। ‘‘যং খো, ব্রাহ্মণ, আরব্ভধাতুযা সতি আরব্ভৰন্তো সত্তা পঞ্ঞাযন্তি, অযং সত্তানং অত্তকারো অযং পরকারো’’।
‘‘Taṃ kiṃ maññasi, brāhmaṇa, atthi ārabbhadhātū’’ti? ‘‘Evaṃ, bho’’. ‘‘Ārabbhadhātuyā sati ārabbhavanto sattā paññāyantī’’ti? ‘‘Evaṃ, bho’’. ‘‘Yaṃ kho, brāhmaṇa, ārabbhadhātuyā sati ārabbhavanto sattā paññāyanti, ayaṃ sattānaṃ attakāro ayaṃ parakāro’’.
‘‘তং কিং মঞ্ঞসি, ব্রাহ্মণ, অত্থি নিক্কমধাতু…পে॰… অত্থি পরক্কমধাতু… অত্থি থামধাতু… অত্থি ঠিতিধাতু… অত্থি উপক্কমধাতূ’’তি? ‘‘এৰং, ভো’’। ‘‘উপক্কমধাতুযা সতি উপক্কমৰন্তো সত্তা পঞ্ঞাযন্তী’’তি? ‘‘এৰং, ভো’’। ‘‘যং খো, ব্রাহ্মণ, উপক্কমধাতুযা সতি উপক্কমৰন্তো সত্তা পঞ্ঞাযন্তি, অযং সত্তানং অত্তকারো অযং পরকারো’’।
‘‘Taṃ kiṃ maññasi, brāhmaṇa, atthi nikkamadhātu…pe… atthi parakkamadhātu… atthi thāmadhātu… atthi ṭhitidhātu… atthi upakkamadhātū’’ti? ‘‘Evaṃ, bho’’. ‘‘Upakkamadhātuyā sati upakkamavanto sattā paññāyantī’’ti? ‘‘Evaṃ, bho’’. ‘‘Yaṃ kho, brāhmaṇa, upakkamadhātuyā sati upakkamavanto sattā paññāyanti, ayaṃ sattānaṃ attakāro ayaṃ parakāro’’.
‘‘মাহং, ব্রাহ্মণ 1, এৰংৰাদিং এৰংদিট্ঠিং অদ্দসং ৰা অস্সোসিং ৰা। কথঞ্হি নাম সযং অভিক্কমন্তো সযং পটিক্কমন্তো এৰং ৰক্খতি – ‘নত্থি অত্তকারো নত্থি পরকারো’’’তি।
‘‘Māhaṃ, brāhmaṇa 2, evaṃvādiṃ evaṃdiṭṭhiṃ addasaṃ vā assosiṃ vā. Kathañhi nāma sayaṃ abhikkamanto sayaṃ paṭikkamanto evaṃ vakkhati – ‘natthi attakāro natthi parakāro’’’ti.
‘‘অভিক্কন্তং, ভো গোতম…পে॰… অজ্জতগ্গে পাণুপেতং সরণং গত’’ন্তি! অট্ঠমং।
‘‘Abhikkantaṃ, bho gotama…pe… ajjatagge pāṇupetaṃ saraṇaṃ gata’’nti! Aṭṭhamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৮. অত্তকারীসুত্তৰণ্ণনা • 8. Attakārīsuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ৮-১১. অত্তকারীসুত্তাদিৰণ্ণনা • 8-11. Attakārīsuttādivaṇṇanā
