| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
8. අත්‌තකාරීසුත්‌තං
8. Attakārīsuttaṃ
38. අථ ඛො අඤ්‌ඤතරො බ්‍රාහ්‌මණො යෙන භගවා තෙනුපසඞ්‌කමි; උපසඞ්‌කමිත්‌වා භගවතා සද්‌ධිං සම්‌මොදි. සම්‌මොදනීයං කථං සාරණීයං වීතිසාරෙත්‌වා එකමන්‌තං නිසීදි. එකමන්‌තං නිසින්‌නො ඛො සො බ්‍රාහ්‌මණො භගවන්‌තං එතදවොච – ‘‘අහඤ්‌හි, භො ගොතම, එවංවාදී එවංදිට්‌ඨි – ‘නත්‌ථි අත්‌තකාරො, නත්‌ථි පරකාරො’’’ති. ‘‘මාහං, බ්‍රාහ්‌මණ, එවංවාදිං එවංදිට්‌ඨිං අද්‌දසං වා අස්‌සොසිං වා. කථඤ්‌හි නාම සයං අභික්‌කමන්‌තො, සයං පටික්‌කමන්‌තො එවං වක්‌ඛති – ‘නත්‌ථි අත්‌තකාරො, නත්‌ථි පරකාරො’’’ති!
38. Atha kho aññataro brāhmaṇo yena bhagavā tenupasaṅkami; upasaṅkamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho so brāhmaṇo bhagavantaṃ etadavoca – ‘‘ahañhi, bho gotama, evaṃvādī evaṃdiṭṭhi – ‘natthi attakāro, natthi parakāro’’’ti. ‘‘Māhaṃ, brāhmaṇa, evaṃvādiṃ evaṃdiṭṭhiṃ addasaṃ vā assosiṃ vā. Kathañhi nāma sayaṃ abhikkamanto, sayaṃ paṭikkamanto evaṃ vakkhati – ‘natthi attakāro, natthi parakāro’’’ti!
‘‘තං කිං මඤ්‌ඤසි, බ්‍රාහ්‌මණ, අත්‌ථි ආරබ්‌භධාතූ’’ති? ‘‘එවං, භො’’. ‘‘ආරබ්‌භධාතුයා සති ආරබ්‌භවන්‌තො සත්‌තා පඤ්‌ඤායන්‌තී’’ති? ‘‘එවං, භො’’. ‘‘යං ඛො, බ්‍රාහ්‌මණ, ආරබ්‌භධාතුයා සති ආරබ්‌භවන්‌තො සත්‌තා පඤ්‌ඤායන්‌ති, අයං සත්‌තානං අත්‌තකාරො අයං පරකාරො’’.
‘‘Taṃ kiṃ maññasi, brāhmaṇa, atthi ārabbhadhātū’’ti? ‘‘Evaṃ, bho’’. ‘‘Ārabbhadhātuyā sati ārabbhavanto sattā paññāyantī’’ti? ‘‘Evaṃ, bho’’. ‘‘Yaṃ kho, brāhmaṇa, ārabbhadhātuyā sati ārabbhavanto sattā paññāyanti, ayaṃ sattānaṃ attakāro ayaṃ parakāro’’.
‘‘තං කිං මඤ්‌ඤසි, බ්‍රාහ්‌මණ, අත්‌ථි නික්‌කමධාතු…පෙ.… අත්‌ථි පරක්‌කමධාතු… අත්‌ථි ථාමධාතු… අත්‌ථි ඨිතිධාතු… අත්‌ථි උපක්‌කමධාතූ’’ති? ‘‘එවං, භො’’. ‘‘උපක්‌කමධාතුයා සති උපක්‌කමවන්‌තො සත්‌තා පඤ්‌ඤායන්‌තී’’ති? ‘‘එවං, භො’’. ‘‘යං ඛො, බ්‍රාහ්‌මණ, උපක්‌කමධාතුයා සති උපක්‌කමවන්‌තො සත්‌තා පඤ්‌ඤායන්‌ති, අයං සත්‌තානං අත්‌තකාරො අයං පරකාරො’’.
‘‘Taṃ kiṃ maññasi, brāhmaṇa, atthi nikkamadhātu…pe… atthi parakkamadhātu… atthi thāmadhātu… atthi ṭhitidhātu… atthi upakkamadhātū’’ti? ‘‘Evaṃ, bho’’. ‘‘Upakkamadhātuyā sati upakkamavanto sattā paññāyantī’’ti? ‘‘Evaṃ, bho’’. ‘‘Yaṃ kho, brāhmaṇa, upakkamadhātuyā sati upakkamavanto sattā paññāyanti, ayaṃ sattānaṃ attakāro ayaṃ parakāro’’.
‘‘මාහං, බ්‍රාහ්‌මණ 1, එවංවාදිං එවංදිට්‌ඨිං අද්‌දසං වා අස්‌සොසිං වා. කථඤ්‌හි නාම සයං අභික්‌කමන්‌තො සයං පටික්‌කමන්‌තො එවං වක්‌ඛති – ‘නත්‌ථි අත්‌තකාරො නත්‌ථි පරකාරො’’’ති.
‘‘Māhaṃ, brāhmaṇa 2, evaṃvādiṃ evaṃdiṭṭhiṃ addasaṃ vā assosiṃ vā. Kathañhi nāma sayaṃ abhikkamanto sayaṃ paṭikkamanto evaṃ vakkhati – ‘natthi attakāro natthi parakāro’’’ti.
‘‘අභික්‌කන්‌තං, භො ගොතම…පෙ.… අජ්‌ජතග්‌ගෙ පාණුපෙතං සරණං ගත’’න්‌ති! අට්‌ඨමං.
‘‘Abhikkantaṃ, bho gotama…pe… ajjatagge pāṇupetaṃ saraṇaṃ gata’’nti! Aṭṭhamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 8. අත්‌තකාරීසුත්‌තවණ්‌ණනා • 8. Attakārīsuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 8-11. අත්‌තකාරීසුත්‌තාදිවණ්‌ණනා • 8-11. Attakārīsuttādivaṇṇanā
