| Library / Tipiṭaka / திபிடக • Tipiṭaka / மிலிந்த³பஞ்ஹபாளி • Milindapañhapāḷi |
5. அத்தனிபாதனபஞ்ஹோ
5. Attanipātanapañho
5. ‘‘ப⁴ந்தே நாக³ஸேன, பா⁴ஸிதம்பேதங் ப⁴க³வதா ‘ந, பி⁴க்க²வே, அத்தானங் பாதேதப்³ப³ங், யோ பாதெய்ய, யதா²த⁴ம்மோ காரேதப்³போ³’தி. புன ச தும்ஹே ப⁴ணத² ‘யத்த² கத்த²சி ப⁴க³வா ஸாவகானங் த⁴ம்மங் தே³ஸயமானோ அனேகபரியாயேன ஜாதியா ஜராய ப்³யாதி⁴னோ மரணஸ்ஸ ஸமுச்சே²தா³ய த⁴ம்மங் தே³ஸேதி, யோ ஹி கோசி ஜாதிஜராப்³யாதி⁴மரணங் ஸமதிக்கமதி, தங் பரமாய பஸங்ஸாய பஸங்ஸதீ’தி. யதி³, ப⁴ந்தே நாக³ஸேன, ப⁴க³வதா ப⁴ணிதங் ‘ந, பி⁴க்க²வே, அத்தானங் பாதேதப்³ப³ங், யோ பாதெய்ய, யதா²த⁴ம்மோ காரேதப்³போ³’தி, தேன ஹி ‘ஜாதியா ஜராய ப்³யாதி⁴னோ மரணஸ்ஸ ஸமுச்சே²தா³ய த⁴ம்மங் தே³ஸேதீ’தி யங் வசனங், தங் மிச்சா². யதி³ ஜாதியா ஜராய ப்³யாதி⁴னோ மரணஸ்ஸ ஸமுச்சே²தா³ய த⁴ம்மங் தே³ஸேதி, தேன ஹி ‘ந, பி⁴க்க²வே, அத்தானங் பாதேதப்³ப³ங், யோ பாதெய்ய, யதா²த⁴ம்மோ காரேதப்³போ³’’தி தம்பி வசனங் மிச்சா². அயம்பி உப⁴தோ கோடிகோ பஞ்ஹோ தவானுப்பத்தோ, ஸோ தயா நிப்³பா³ஹிதப்³போ³’’தி.
5. ‘‘Bhante nāgasena, bhāsitampetaṃ bhagavatā ‘na, bhikkhave, attānaṃ pātetabbaṃ, yo pāteyya, yathādhammo kāretabbo’ti. Puna ca tumhe bhaṇatha ‘yattha katthaci bhagavā sāvakānaṃ dhammaṃ desayamāno anekapariyāyena jātiyā jarāya byādhino maraṇassa samucchedāya dhammaṃ deseti, yo hi koci jātijarābyādhimaraṇaṃ samatikkamati, taṃ paramāya pasaṃsāya pasaṃsatī’ti. Yadi, bhante nāgasena, bhagavatā bhaṇitaṃ ‘na, bhikkhave, attānaṃ pātetabbaṃ, yo pāteyya, yathādhammo kāretabbo’ti, tena hi ‘jātiyā jarāya byādhino maraṇassa samucchedāya dhammaṃ desetī’ti yaṃ vacanaṃ, taṃ micchā. Yadi jātiyā jarāya byādhino maraṇassa samucchedāya dhammaṃ deseti, tena hi ‘na, bhikkhave, attānaṃ pātetabbaṃ, yo pāteyya, yathādhammo kāretabbo’’ti tampi vacanaṃ micchā. Ayampi ubhato koṭiko pañho tavānuppatto, so tayā nibbāhitabbo’’ti.
‘‘பா⁴ஸிதம்பேதங், மஹாராஜ, ப⁴க³வதா ‘ந, பி⁴க்க²வே, அத்தானங் பாதேதப்³ப³ங், யோ பாதெய்ய, யதா²த⁴ம்மோ காரேதப்³போ³’தி. யத்த² கத்த²சி ப⁴க³வதா ஸாவகானங் த⁴ம்மங் தே³ஸயாமானேன ச அனேகபரியாயேன ஜாதியா ஜராய ப்³யாதி⁴னோ மரணஸ்ஸ ஸமுச்சே²தா³ய த⁴ம்மோ தே³ஸிதோ, தத்த² பன காரணங் அத்தி², யேன ப⁴க³வா காரணேன படிக்கி²பி ஸமாத³பேஸி சா’’தி.
‘‘Bhāsitampetaṃ, mahārāja, bhagavatā ‘na, bhikkhave, attānaṃ pātetabbaṃ, yo pāteyya, yathādhammo kāretabbo’ti. Yattha katthaci bhagavatā sāvakānaṃ dhammaṃ desayāmānena ca anekapariyāyena jātiyā jarāya byādhino maraṇassa samucchedāya dhammo desito, tattha pana kāraṇaṃ atthi, yena bhagavā kāraṇena paṭikkhipi samādapesi cā’’ti.
‘‘கிங் பனெத்த², ப⁴ந்தே நாக³ஸேன, காரணங், யேன ப⁴க³வா காரணேன படிக்கி²பி ஸமாத³பேஸி சா’’தி? ‘‘ஸீலவா, மஹாராஜ, ஸீலஸம்பன்னோ அக³த³ஸமோ ஸத்தானங் கிலேஸவிஸவினாஸனே, ஓஸத⁴ஸமோ ஸத்தானங் கிலேஸப்³யாதி⁴வூபஸமே, உத³கஸமோ ஸத்தானங் கிலேஸரஜோஜல்லாபஹரணே, மணிரதனஸமோ ஸத்தானங் ஸப்³ப³ஸம்பத்திதா³னே, நாவாஸமோ ஸத்தானங் சதுரோக⁴பாரக³மனே, ஸத்த²வாஹஸமோ ஸத்தானங் ஜாதிகந்தாரதாரணே, வாதஸமோ ஸத்தானங் திவித⁴க்³கி³ஸந்தாபனிப்³பா³பனே, மஹாமேக⁴ஸமோ ஸத்தானங் மானஸபரிபூரணே, ஆசரியஸமோ ஸத்தானங் குஸலஸிக்கா²பனே, ஸுதே³ஸகஸமோ ஸத்தானங் கே²மபத²மாசிக்க²ணே. ஏவரூபோ, மஹாராஜ, ப³ஹுகு³ணோ அனேககு³ணோ அப்பமாணகு³ணோ கு³ணராஸி கு³ணபுஞ்ஜோ ஸத்தானங் வட்³டி⁴கரோ ஸீலவா ‘மா வினஸ்ஸீ’தி ஸத்தானங் அனுகம்பாய ப⁴க³வா ஸிக்கா²பத³ங் பஞ்ஞபேஸி ‘ந, பி⁴க்க²வே, அத்தானங் பாதேதப்³ப³ங், யோ பாதெய்ய, யதா²த⁴ம்மோ காரேதப்³போ³’தி. இத³மெத்த², மஹாராஜ, காரணங், யேன காரணேன ப⁴க³வா படிக்கி²பி. பா⁴ஸிதம்பேதங், மஹாராஜ, தே²ரேன குமாரகஸ்ஸபேன விசித்ரகதி²கேன பாயாஸிராஜஞ்ஞஸ்ஸ பரலோகங் தீ³பயமானேன ‘யதா² யதா² கோ² ராஜஞ்ஞ ஸமணப்³ராஹ்மணா ஸீலவந்தோ கல்யாணத⁴ம்மா சிரங் தீ³க⁴மத்³தா⁴னங் திட்ட²ந்தி, ததா² ததா² ப³ஹுங் புஞ்ஞங் பஸவந்தி, ப³ஹுஜனஹிதாய ச படிபஜ்ஜந்தி ப³ஹுஜனஸுகா²ய லோகானுகம்பாய அத்தா²ய ஹிதாய ஸுகா²ய தே³வமனுஸ்ஸான’ந்தி.
‘‘Kiṃ panettha, bhante nāgasena, kāraṇaṃ, yena bhagavā kāraṇena paṭikkhipi samādapesi cā’’ti? ‘‘Sīlavā, mahārāja, sīlasampanno agadasamo sattānaṃ kilesavisavināsane, osadhasamo sattānaṃ kilesabyādhivūpasame, udakasamo sattānaṃ kilesarajojallāpaharaṇe, maṇiratanasamo sattānaṃ sabbasampattidāne, nāvāsamo sattānaṃ caturoghapāragamane, satthavāhasamo sattānaṃ jātikantāratāraṇe, vātasamo sattānaṃ tividhaggisantāpanibbāpane, mahāmeghasamo sattānaṃ mānasaparipūraṇe, ācariyasamo sattānaṃ kusalasikkhāpane, sudesakasamo sattānaṃ khemapathamācikkhaṇe. Evarūpo, mahārāja, bahuguṇo anekaguṇo appamāṇaguṇo guṇarāsi guṇapuñjo sattānaṃ vaḍḍhikaro sīlavā ‘mā vinassī’ti sattānaṃ anukampāya bhagavā sikkhāpadaṃ paññapesi ‘na, bhikkhave, attānaṃ pātetabbaṃ, yo pāteyya, yathādhammo kāretabbo’ti. Idamettha, mahārāja, kāraṇaṃ, yena kāraṇena bhagavā paṭikkhipi. Bhāsitampetaṃ, mahārāja, therena kumārakassapena vicitrakathikena pāyāsirājaññassa paralokaṃ dīpayamānena ‘yathā yathā kho rājañña samaṇabrāhmaṇā sīlavanto kalyāṇadhammā ciraṃ dīghamaddhānaṃ tiṭṭhanti, tathā tathā bahuṃ puññaṃ pasavanti, bahujanahitāya ca paṭipajjanti bahujanasukhāya lokānukampāya atthāya hitāya sukhāya devamanussāna’nti.
‘‘கேன பன காரணேன ப⁴க³வா ஸமாத³பேஸி? ஜாதிபி, மஹாராஜ, து³க்கா², ஜராபி து³க்கா², ப்³யாதி⁴பி து³க்கோ², மரணம்பி து³க்க²ங், ஸோகோபி து³க்கோ², பரிதே³வோபி து³க்கோ², து³க்க²ம்பி து³க்க²ங், தோ³மனஸ்ஸம்பி து³க்க²ங், உபாயாஸோபி து³க்கோ², அப்பியேஹி ஸம்பயோகோ³பி து³க்கோ², பியேஹி விப்பயோகோ³பி து³க்கோ², மாதுமரணம்பி து³க்க²ங், பிதுமரணம்பி து³க்க²ங், பா⁴துமரணம்பி து³க்க²ங், ப⁴கி³னிமரணம்பி து³க்க²ங், புத்தமரணம்பி து³க்க²ங், தா³ரமரணம்பி து³க்க²ங், தா³ஸமரணம்பி து³க்க²ங் 1, ஞாதிமரணம்பி து³க்க²ங், ஞாதிப்³யஸனம்பி து³க்க²ங், ரோக³ப்³யஸனம்பி து³க்க²ங், போ⁴க³ப்³யஸனம்பி து³க்க²ங், ஸீலப்³யஸனம்பி து³க்க²ங், தி³ட்டி²ப்³யஸனம்பி து³க்க²ங், ராஜப⁴யம்பி து³க்க²ங், சோரப⁴யம்பி து³க்க²ங், வேரிப⁴யம்பி து³க்க²ங், து³ப்³பி⁴க்க²ப⁴யம்பி து³க்க²ங், அக்³கி³ப⁴யம்பி து³க்க²ங், உத³கப⁴யம்பி து³க்க²ங், ஊமிப⁴யம்பி து³க்க²ங், ஆவட்டப⁴யம்பி து³க்க²ங், கும்பீ⁴லப⁴யம்பி து³க்க²ங், ஸுஸுகாப⁴யம்பி து³க்க²ங், அத்தானுவாத³ப⁴யம்பி து³க்க²ங், பரானுவாத³ப⁴யம்பி து³க்க²ங், த³ண்ட³ப⁴யம்பி து³க்க²ங், து³க்³க³திப⁴யம்பி து³க்க²ங், பரிஸாஸாரஜ்ஜப⁴யம்பி து³க்க²ங், ஆஜீவகப⁴யம்பி து³க்க²ங், மரணப⁴யம்பி து³க்க²ங், வெத்தேஹி தாளனம்பி து³க்க²ங், கஸாஹி தாளனம்பி து³க்க²ங், அத்³த⁴த³ண்ட³கேஹி தாளனம்பி து³க்க²ங், ஹத்த²ச்சே²த³னம்பி து³க்க²ங், பாத³ச்சே²த³னம்பி து³க்க²ங், ஹத்த²பாத³ச்சே²த³னம்பி து³க்க²ங், கண்ணச்சே²த³னம்பி து³க்க²ங், நாஸச்சே²த³னம்பி து³க்க²ங், கண்ணனாஸச்சே²த³னம்பி து³க்க²ங், பி³லங்க³தா²லிகம்பி து³க்க²ங், ஸங்க²முண்டி³கம்பி து³க்க²ங், ராஹுமுக²ம்பி து³க்க²ங், ஜோதிமாலிகம்பி து³க்க²ங், ஹத்த²பஜ்ஜோதிகம்பி து³க்க²ங், ஏரகவத்திகம்பி து³க்க²ங், சீரகவாஸிகம்பி து³க்க²ங், ஏணெய்யகம்பி து³க்க²ங் , ப³ளிஸமங்ஸிகம்பி து³க்க²ங், கஹாபணிகம்பி து³க்க²ங், கா²ராபதச்சி²கம்பி து³க்க²ங், பலிக⁴பரிவத்திகம்பி து³க்க²ங், பலாலபீட²கம்பி து³க்க²ங், தத்தேன தேலேன ஓஸிஞ்சனம்பி து³க்க²ங், ஸுனகே²ஹி கா²தா³பனம்பி து³க்க²ங், ஜீவஸூலாரோபனம்பி து³க்க²ங், அஸினா ஸீஸச்சே²த³னம்பி து³க்க²ங், ஏவரூபானி, மஹாராஜ, ப³ஹுவிதா⁴னி அனேகவிதா⁴னி து³க்கா²னி ஸங்ஸாரக³தோ அனுப⁴வதி.
‘‘Kena pana kāraṇena bhagavā samādapesi? Jātipi, mahārāja, dukkhā, jarāpi dukkhā, byādhipi dukkho, maraṇampi dukkhaṃ, sokopi dukkho, paridevopi dukkho, dukkhampi dukkhaṃ, domanassampi dukkhaṃ, upāyāsopi dukkho, appiyehi sampayogopi dukkho, piyehi vippayogopi dukkho, mātumaraṇampi dukkhaṃ, pitumaraṇampi dukkhaṃ, bhātumaraṇampi dukkhaṃ, bhaginimaraṇampi dukkhaṃ, puttamaraṇampi dukkhaṃ, dāramaraṇampi dukkhaṃ, dāsamaraṇampi dukkhaṃ 2, ñātimaraṇampi dukkhaṃ, ñātibyasanampi dukkhaṃ, rogabyasanampi dukkhaṃ, bhogabyasanampi dukkhaṃ, sīlabyasanampi dukkhaṃ, diṭṭhibyasanampi dukkhaṃ, rājabhayampi dukkhaṃ, corabhayampi dukkhaṃ, veribhayampi dukkhaṃ, dubbhikkhabhayampi dukkhaṃ, aggibhayampi dukkhaṃ, udakabhayampi dukkhaṃ, ūmibhayampi dukkhaṃ, āvaṭṭabhayampi dukkhaṃ, kumbhīlabhayampi dukkhaṃ, susukābhayampi dukkhaṃ, attānuvādabhayampi dukkhaṃ, parānuvādabhayampi dukkhaṃ, daṇḍabhayampi dukkhaṃ, duggatibhayampi dukkhaṃ, parisāsārajjabhayampi dukkhaṃ, ājīvakabhayampi dukkhaṃ, maraṇabhayampi dukkhaṃ, vettehi tāḷanampi dukkhaṃ, kasāhi tāḷanampi dukkhaṃ, addhadaṇḍakehi tāḷanampi dukkhaṃ, hatthacchedanampi dukkhaṃ, pādacchedanampi dukkhaṃ, hatthapādacchedanampi dukkhaṃ, kaṇṇacchedanampi dukkhaṃ, nāsacchedanampi dukkhaṃ, kaṇṇanāsacchedanampi dukkhaṃ, bilaṅgathālikampi dukkhaṃ, saṅkhamuṇḍikampi dukkhaṃ, rāhumukhampi dukkhaṃ, jotimālikampi dukkhaṃ, hatthapajjotikampi dukkhaṃ, erakavattikampi dukkhaṃ, cīrakavāsikampi dukkhaṃ, eṇeyyakampi dukkhaṃ , baḷisamaṃsikampi dukkhaṃ, kahāpaṇikampi dukkhaṃ, khārāpatacchikampi dukkhaṃ, palighaparivattikampi dukkhaṃ, palālapīṭhakampi dukkhaṃ, tattena telena osiñcanampi dukkhaṃ, sunakhehi khādāpanampi dukkhaṃ, jīvasūlāropanampi dukkhaṃ, asinā sīsacchedanampi dukkhaṃ, evarūpāni, mahārāja, bahuvidhāni anekavidhāni dukkhāni saṃsāragato anubhavati.
‘‘யதா², மஹாராஜ, ஹிமவந்தபப்³ப³தே அபி⁴வுட்ட²ங் உத³கங் க³ங்கா³ய நதி³யா பாஸாண ஸக்க²ர க²ர மரும்ப³ ஆவட்ட க³க்³க³லக ஊமிகவங்கசதி³க ஆவரணனீவரணமூலகஸாகா²ஸு பரியொத்த²ரதி, ஏவமேவ கோ², மஹாராஜ, ஏவரூபானி ப³ஹுவிதா⁴னி அனேகவிதா⁴னி து³க்கா²னி ஸங்ஸாரக³தோ அனுப⁴வதி. பவத்தங், மஹாராஜ, து³க்க²ங், அப்பவத்தங் ஸுக²ங். அப்பவத்தஸ்ஸ கு³ணங் பவத்தஸ்ஸ 3 ச ப⁴யங் தீ³பயமானோ, மஹாராஜ, ப⁴க³வா அப்பவத்தஸ்ஸ ஸச்சி²கிரியாய ஜாதிஜராப்³யாதி⁴மரணஸமதிக்கமாய ஸமாத³பேஸி, இத³மெத்த², மஹாராஜ, காரணங், யேன காரணேன ப⁴க³வா ஸமாத³பேஸீ’’தி. ‘‘ஸாது⁴, ப⁴ந்தே நாக³ஸேன, ஸுனிப்³பே³டி²தோ பஞ்ஹோ, ஸுகதி²தங் காரணங், ஏவமேதங் ததா² ஸம்படிச்சா²மீ’’தி.
‘‘Yathā, mahārāja, himavantapabbate abhivuṭṭhaṃ udakaṃ gaṅgāya nadiyā pāsāṇa sakkhara khara marumba āvaṭṭa gaggalaka ūmikavaṅkacadika āvaraṇanīvaraṇamūlakasākhāsu pariyottharati, evameva kho, mahārāja, evarūpāni bahuvidhāni anekavidhāni dukkhāni saṃsāragato anubhavati. Pavattaṃ, mahārāja, dukkhaṃ, appavattaṃ sukhaṃ. Appavattassa guṇaṃ pavattassa 4 ca bhayaṃ dīpayamāno, mahārāja, bhagavā appavattassa sacchikiriyāya jātijarābyādhimaraṇasamatikkamāya samādapesi, idamettha, mahārāja, kāraṇaṃ, yena kāraṇena bhagavā samādapesī’’ti. ‘‘Sādhu, bhante nāgasena, sunibbeṭhito pañho, sukathitaṃ kāraṇaṃ, evametaṃ tathā sampaṭicchāmī’’ti.
அத்தனிபாதனபஞ்ஹோ பஞ்சமோ.
Attanipātanapañho pañcamo.
Footnotes:
