| Library / Tipiṭaka / ཏིཔིཊཀ • Tipiṭaka / པཊིསམྦྷིདཱམགྒཔཱལི༹ • Paṭisambhidāmaggapāḷi |
༢. ཨཏྟཱནུདིཊྛིནིདྡེསོ
2. Attānudiṭṭhiniddeso
༡༣༠. ཨཏྟཱནུདིཊྛིཡཱ ཀཏམེཧི ཝཱིསཏིཡཱ ཨཱཀཱརེཧི ཨབྷིནིཝེསོ ཧོཏི? ཨིདྷ ཨསྶུཏཝཱ པུཐུཛྫནོ ཨརིཡཱནཾ ཨདསྶཱཝཱི ཨརིཡདྷམྨསྶ ཨཀོཝིདོ ཨརིཡདྷམྨེ ཨཝིནཱིཏོ, སཔྤུརིསཱནཾ ཨདསྶཱཝཱི སཔྤུརིསདྷམྨསྶ ཨཀོཝིདོ སཔྤུརིསདྷམྨེ ཨཝིནཱིཏོ རཱུཔཾ ཨཏྟཏོ སམནུཔསྶཏི རཱུཔཝནྟཾ ཝཱ ཨཏྟཱནཾ ཨཏྟནི ཝཱ རཱུཔཾ རཱུཔསྨིཾ ཝཱ ཨཏྟཱནཾ; ཝེདནཾ…པེ॰… སཉྙཾ…པེ॰… སངྑཱརེ…པེ॰… ཝིཉྙཱཎཾ ཨཏྟཏོ སམནུཔསྶཏི ཝིཉྙཱཎཝནྟཾ ཝཱ ཨཏྟཱནཾ ཨཏྟནི ཝཱ ཝིཉྙཱཎཾ ཝིཉྙཱཎསྨིཾ ཝཱ ཨཏྟཱནཾ།
130. Attānudiṭṭhiyā katamehi vīsatiyā ākārehi abhiniveso hoti? Idha assutavā puthujjano ariyānaṃ adassāvī ariyadhammassa akovido ariyadhamme avinīto, sappurisānaṃ adassāvī sappurisadhammassa akovido sappurisadhamme avinīto rūpaṃ attato samanupassati rūpavantaṃ vā attānaṃ attani vā rūpaṃ rūpasmiṃ vā attānaṃ; vedanaṃ…pe… saññaṃ…pe… saṅkhāre…pe… viññāṇaṃ attato samanupassati viññāṇavantaṃ vā attānaṃ attani vā viññāṇaṃ viññāṇasmiṃ vā attānaṃ.
༡༣༡. ཀཐཾ རཱུཔཾ ཨཏྟཏོ སམནུཔསྶཏི? ཨིདྷེཀཙྩོ པཐཝཱིཀསིཎཾ ཨཏྟཏོ སམནུཔསྶཏི – ‘‘ཡཾ པཐཝཱིཀསིཎཾ, སོ ཨཧཾ; ཡོ ཨཧཾ, ཏཾ པཐཝཱིཀསིཎ’’ནྟི། པཐཝཱིཀསིཎཉྩ ཨཏྟཉྩ ཨདྭཡཾ སམནུཔསྶཏི། སེཡྻཐཱཔི ཏེལཔྤདཱིཔསྶ ཛྷཱཡཏོ ‘‘ཡཱ ཨཙྩི སོ ཝཎྞོ, ཡོ ཝཎྞོ སཱ ཨཙྩཱི’’ཏི – ཨཙྩིཉྩ ཝཎྞཉྩ ཨདྭཡཾ སམནུཔསྶཏི། ཨེཝམེཝཾ ཨིདྷེཀཙྩོ པཐཝཱིཀསིཎཾ ཨཏྟཏོ སམནུཔསྶཏི – ‘‘ཡཾ པཐཝཱིཀསིཎཾ, སོ ཨཧཾ; ཡོ ཨཧཾ , ཏཾ པཐཝཱིཀསིཎ’’ནྟི། པཐཝཱིཀསིཎཉྩ ཨཏྟཉྩ ཨདྭཡཾ སམནུཔསྶཏི། ཨབྷིནིཝེསཔརཱམཱསོ དིཊྛི། དིཊྛི ན ཝཏྠུ, ཝཏྠུ ན དིཊྛི། ཨཉྙཱ དིཊྛི, ཨཉྙཾ ཝཏྠུ། ཡཱ ཙ དིཊྛི ཡཉྩ ཝཏྠུ – ཨཡཾ པཋམཱ རཱུཔཝཏྠུཀཱ ཨཏྟཱནུདིཊྛི། ཨཏྟཱནུདིཊྛི མིཙྪཱདིཊྛི དིཊྛིཝིཔཏྟི…པེ॰… ཨཏྟཱནུདིཊྛི མིཙྪཱདིཊྛི། མིཙྪཱདིཊྛིཀསྶ པུརིསཔུགྒལསྶ དྭེཝ གཏིཡོ…པེ॰… ཨིམཱནི སཉྙོཛནཱནི, ན ཙ དིཊྛིཡོ།
131. Kathaṃ rūpaṃ attato samanupassati? Idhekacco pathavīkasiṇaṃ attato samanupassati – ‘‘yaṃ pathavīkasiṇaṃ, so ahaṃ; yo ahaṃ, taṃ pathavīkasiṇa’’nti. Pathavīkasiṇañca attañca advayaṃ samanupassati. Seyyathāpi telappadīpassa jhāyato ‘‘yā acci so vaṇṇo, yo vaṇṇo sā accī’’ti – acciñca vaṇṇañca advayaṃ samanupassati. Evamevaṃ idhekacco pathavīkasiṇaṃ attato samanupassati – ‘‘yaṃ pathavīkasiṇaṃ, so ahaṃ; yo ahaṃ , taṃ pathavīkasiṇa’’nti. Pathavīkasiṇañca attañca advayaṃ samanupassati. Abhinivesaparāmāso diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ paṭhamā rūpavatthukā attānudiṭṭhi. Attānudiṭṭhi micchādiṭṭhi diṭṭhivipatti…pe… attānudiṭṭhi micchādiṭṭhi. Micchādiṭṭhikassa purisapuggalassa dveva gatiyo…pe… imāni saññojanāni, na ca diṭṭhiyo.
ཨིདྷེཀཙྩོ ཨཱཔོཀསིཎཾ… ཏེཛོཀསིཎཾ… ཝཱཡོཀསིཎཾ… ནཱིལཀསིཎཾ… པཱིཏཀསིཎཾ… ལོཧིཏཀསིཎཾ… ཨོདཱཏཀསིཎཾ ཨཏྟཏོ སམནུཔསྶཏི – ‘‘ཡཾ ཨོདཱཏཀསིཎཾ, སོ ཨཧཾ; ཡོ ཨཧཾ, ཏཾ ཨོདཱཏཀསིཎ’’ནྟི། ཨོདཱཏཀསིཎཉྩ ཨཏྟཉྩ ཨདྭཡཾ སམནུཔསྶཏི། སེཡྻཐཱཔི ཏེལཔྤདཱིཔསྶ ཛྷཱཡཏོ ‘‘ཡཱ ཨཙྩི, སོ ཝཎྞོ; ཡོ ཝཎྞོ, སཱ ཨཙྩཱི’’ཏི – ཨཙྩིཉྩ ཝཎྞཉྩ ཨདྭཡཾ སམནུཔསྶཏི། ཨེཝམེཝ ཨིདྷེཀཙྩོ…པེ॰… ཨོདཱཏཀསིཎཉྩ ཨཏྟཉྩ ཨདྭཡཾ སམནུཔསྶཏི། ཨབྷིནིཝེསཔརཱམཱསོ དིཊྛི། དིཊྛི ན ཝཏྠུ, ཝཏྠུ ན དིཊྛི། ཨཉྙཱ དིཊྛི, ཨཉྙཾ ཝཏྠུ། ཡཱ ཙ དིཊྛི ཡཉྩ ཝཏྠུ – ཨཡཾ པཋམཱ རཱུཔཝཏྠུཀཱ ཨཏྟཱནུདིཊྛི། ཨཏྟཱནུདིཊྛི མིཙྪཱདིཊྛི དིཊྛིཝིཔཏྟི…པེ॰… ཨིམཱནི སཉྙོཛནཱནི, ན ཙ དིཊྛིཡོ། ཨེཝཾ རཱུཔཾ ཨཏྟཏོ སམནུཔསྶཏི།
Idhekacco āpokasiṇaṃ… tejokasiṇaṃ… vāyokasiṇaṃ… nīlakasiṇaṃ… pītakasiṇaṃ… lohitakasiṇaṃ… odātakasiṇaṃ attato samanupassati – ‘‘yaṃ odātakasiṇaṃ, so ahaṃ; yo ahaṃ, taṃ odātakasiṇa’’nti. Odātakasiṇañca attañca advayaṃ samanupassati. Seyyathāpi telappadīpassa jhāyato ‘‘yā acci, so vaṇṇo; yo vaṇṇo, sā accī’’ti – acciñca vaṇṇañca advayaṃ samanupassati. Evameva idhekacco…pe… odātakasiṇañca attañca advayaṃ samanupassati. Abhinivesaparāmāso diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ paṭhamā rūpavatthukā attānudiṭṭhi. Attānudiṭṭhi micchādiṭṭhi diṭṭhivipatti…pe… imāni saññojanāni, na ca diṭṭhiyo. Evaṃ rūpaṃ attato samanupassati.
ཀཐཾ རཱུཔཝནྟཾ ཨཏྟཱནཾ སམནུཔསྶཏི? ཨིདྷེཀཙྩོ ཝེདནཾ… སཉྙཾ… སངྑཱརེ… ཝིཉྙཱཎཾ ཨཏྟཏོ སམནུཔསྶཏི། ཏསྶ ཨེཝཾ ཧོཏི – ‘‘ཨཡཾ ཁོ མེ ཨཏྟཱ། སོ ཁོ པན མེ ཨཡཾ ཨཏྟཱ ཨིམིནཱ རཱུཔེན རཱུཔཝཱ’’ཏི། རཱུཔཝནྟཾ ཨཏྟཱནཾ སམནུཔསྶཏི། སེཡྻཐཱཔི རུཀྑོ ཚཱཡཱསམྤནྣོ ཨསྶ། ཏམེནཾ པུརིསོ ཨེཝཾ ཝདེཡྻ – ‘‘ཨཡཾ རུཀྑོ, ཨཡཾ ཚཱཡཱ། ཨཉྙོ རུཀྑོ, ཨཉྙཱ ཚཱཡཱ། སོ ཁོ པནཱཡཾ རུཀྑོ ཨིམཱཡ ཚཱཡཱཡ ཚཱཡཱཝཱ’’ཏི། ཚཱཡཱཝནྟཾ རུཀྑཾ སམནུཔསྶཏི། ཨེཝམེཝཾ ཨིདྷེཀཙྩོ ཝེདནཾ…པེ॰… སཉྙཾ… སངྑཱརེ… ཝིཉྙཱཎཾ ཨཏྟཏོ སམནུཔསྶཏི། ཏསྶ ཨེཝཾ ཧོཏི – ‘‘ཨཡཾ ཁོ མེ ཨཏྟཱ། སོ ཁོ པན ཨཡཾ ཨཏྟཱ ཨིམིནཱ རཱུཔེན རཱུཔཝཱ’’ཏི། རཱུཔཝནྟཾ ཨཏྟཱནཾ སམནུཔསྶཏི། ཨབྷིནིཝེསཔརཱམཱསོ དིཊྛི། དིཊྛི ན ཝཏྠུ, ཝཏྠུ ན དིཊྛི། ཨཉྙཱ དིཊྛི, ཨཉྙཾ ཝཏྠུ། ཡཱ ཙ དིཊྛི ཡཉྩ ཝཏྠུ – ཨཡཾ དུཏིཡཱ རཱུཔཝཏྠུཀཱ ཨཏྟཱནུདིཊྛི། ཨཏྟཱནུདིཊྛི མིཙྪཱདིཊྛི དིཊྛིཝིཔཏྟི…པེ॰… ཨིམཱནི སཉྙོཛནཱནི, ན ཙ དིཊྛིཡོ། ཨེཝཾ རཱུཔཝནྟཾ ཨཏྟཱནཾ སམནུཔསྶཏི།
Kathaṃ rūpavantaṃ attānaṃ samanupassati? Idhekacco vedanaṃ… saññaṃ… saṅkhāre… viññāṇaṃ attato samanupassati. Tassa evaṃ hoti – ‘‘ayaṃ kho me attā. So kho pana me ayaṃ attā iminā rūpena rūpavā’’ti. Rūpavantaṃ attānaṃ samanupassati. Seyyathāpi rukkho chāyāsampanno assa. Tamenaṃ puriso evaṃ vadeyya – ‘‘ayaṃ rukkho, ayaṃ chāyā. Añño rukkho, aññā chāyā. So kho panāyaṃ rukkho imāya chāyāya chāyāvā’’ti. Chāyāvantaṃ rukkhaṃ samanupassati. Evamevaṃ idhekacco vedanaṃ…pe… saññaṃ… saṅkhāre… viññāṇaṃ attato samanupassati. Tassa evaṃ hoti – ‘‘ayaṃ kho me attā. So kho pana ayaṃ attā iminā rūpena rūpavā’’ti. Rūpavantaṃ attānaṃ samanupassati. Abhinivesaparāmāso diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ dutiyā rūpavatthukā attānudiṭṭhi. Attānudiṭṭhi micchādiṭṭhi diṭṭhivipatti…pe… imāni saññojanāni, na ca diṭṭhiyo. Evaṃ rūpavantaṃ attānaṃ samanupassati.
ཀཐཾ ཨཏྟནི རཱུཔཾ སམནུཔསྶཏི? ཨིདྷེཀཙྩོ ཝེདནཾ… སཉྙཾ… སངྑཱརེ… ཝིཉྙཱཎཾ ཨཏྟཏོ སམནུཔསྶཏི། ཏསྶ ཨེཝཾ ཧོཏི – ‘‘ཨཡཾ ཁོ མེ ཨཏྟཱ། ཨིམསྨིཉྩ པན ཨཏྟནི ཨིདཾ རཱུཔ’’ནྟི། ཨཏྟནི རཱུཔཾ སམནུཔསྶཏི། སེཡྻཐཱཔི པུཔྥཾ གནྡྷསམྤནྣཾ ཨསྶ། ཏམེནཾ པུརིསོ ཨེཝཾ ཝདེཡྻ – ‘‘ཨིདཾ པུཔྥཾ, ཨཡཾ གནྡྷོ; ཨཉྙཾ པུཔྥཾ, ཨཉྙོ གནྡྷོ། སོ ཁོ པནཱཡཾ གནྡྷོ ཨིམསྨིཾ པུཔྥེ’’ཏི། པུཔྥསྨིཾ གནྡྷཾ སམནུཔསྶཏི ། ཨེཝམེཝཾ ཨིདྷེཀཙྩོ ཝེདནཾ…པེ॰… སཉྙཾ… སངྑཱརེ… ཝིཉྙཱཎཾ ཨཏྟཏོ སམནུཔསྶཏི། ཏསྶ ཨེཝཾ ཧོཏི – ‘‘ཨཡཾ ཁོ མེ ཨཏྟཱ། ཨིམསྨིཉྩ པན ཨཏྟནི ཨིདཾ རཱུཔ’’ནྟི། ཨཏྟནི རཱུཔཾ སམནུཔསྶཏི། ཨབྷིནིཝེསཔརཱམཱསོ དིཊྛི། དིཊྛི ན ཝཏྠུ, ཝཏྠུ ན དིཊྛི། ཨཉྙཱ དིཊྛི, ཨཉྙཾ ཝཏྠུ། ཡཱ ཙ དིཊྛི ཡཉྩ ཝཏྠུ – ཨཡཾ ཏཏིཡཱ རཱུཔཝཏྠུཀཱ ཨཏྟཱནུདིཊྛི། ཨཏྟཱནུདིཊྛི མིཙྪཱདིཊྛི དིཊྛིཝིཔཏྟི…པེ॰… ཨིམཱནི སཉྙོཛནཱནི, ན ཙ དིཊྛིཡོ། ཨེཝཾ ཨཏྟནི རཱུཔཾ སམནུཔསྶཏི།
Kathaṃ attani rūpaṃ samanupassati? Idhekacco vedanaṃ… saññaṃ… saṅkhāre… viññāṇaṃ attato samanupassati. Tassa evaṃ hoti – ‘‘ayaṃ kho me attā. Imasmiñca pana attani idaṃ rūpa’’nti. Attani rūpaṃ samanupassati. Seyyathāpi pupphaṃ gandhasampannaṃ assa. Tamenaṃ puriso evaṃ vadeyya – ‘‘idaṃ pupphaṃ, ayaṃ gandho; aññaṃ pupphaṃ, añño gandho. So kho panāyaṃ gandho imasmiṃ pupphe’’ti. Pupphasmiṃ gandhaṃ samanupassati . Evamevaṃ idhekacco vedanaṃ…pe… saññaṃ… saṅkhāre… viññāṇaṃ attato samanupassati. Tassa evaṃ hoti – ‘‘ayaṃ kho me attā. Imasmiñca pana attani idaṃ rūpa’’nti. Attani rūpaṃ samanupassati. Abhinivesaparāmāso diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ tatiyā rūpavatthukā attānudiṭṭhi. Attānudiṭṭhi micchādiṭṭhi diṭṭhivipatti…pe… imāni saññojanāni, na ca diṭṭhiyo. Evaṃ attani rūpaṃ samanupassati.
ཀཐཾ རཱུཔསྨིཾ ཨཏྟཱནཾ སམནུཔསྶཏི? ཨིདྷེཀཙྩོ ཝེདནཾ…པེ॰… སཉྙཾ… སངྑཱརེ… ཝིཉྙཱཎཾ ཨཏྟཏོ སམནུཔསྶཏི། ཏསྶ ཨེཝཾ ཧོཏི – ‘‘ཨཡཾ ཁོ མེ ཨཏྟཱ། སོ ཁོ པན མེ ཨཡཾ ཨཏྟཱ ཨིམསྨིཾ རཱུཔེ’’ཏི། རཱུཔསྨིཾ ཨཏྟཱནཾ སམནུཔསྶཏི། སེཡྻཐཱཔི མཎི ཀརཎྜཀེ པཀྑིཏྟོ ཨསྶ། ཏམེནཾ པུརིསོ ཨེཝཾ ཝདེཡྻ – ‘‘ཨཡཾ མཎི, ཨཡཾ ཀརཎྜཀོ། ཨཉྙོ མཎི, ཨཉྙོ ཀརཎྜཀོ། སོ ཁོ པནཱཡཾ མཎི ཨིམསྨིཾ ཀརཎྜཀེ’’ཏི། ཀརཎྜཀསྨིཾ མཎིཾ སམནུཔསྶཏི། ཨེཝམེཝཾ ཨིདྷེཀཙྩོ ཝེདནཾ…པེ॰… སཉྙཾ… སངྑཱརེ… ཝིཉྙཱཎཾ ཨཏྟཏོ སམནུཔསྶཏི ། ཏསྶ ཨེཝཾ ཧོཏི – ‘‘ཨཡཾ ཁོ མེ ཨཏྟཱ། སོ ཁོ པན མེ ཨཡཾ ཨཏྟཱ ཨིམསྨིཾ རཱུཔེ’’ཏི། རཱུཔསྨིཾ ཨཏྟཱནཾ སམནུཔསྶཏི། ཨབྷིནིཝེསཔརཱམཱསོ དིཊྛི། དིཊྛི ན ཝཏྠུ, ཝཏྠུ ན དིཊྛི། ཨཉྙཱ དིཊྛི, ཨཉྙཾ ཝཏྠུ། ཡཱ ཙ དིཊྛི ཡཉྩ ཝཏྠུ – ཨཡཾ ཙཏུཏྠཱ རཱུཔཝཏྠུཀཱ ཨཏྟཱནུདིཊྛི། ཨཏྟཱནུདིཊྛི མིཙྪཱདིཊྛི དིཊྛིཝིཔཏྟི…པེ॰… ཨིམཱནི སཉྙོཛནཱནི, ན ཙ དིཊྛིཡོ། ཨེཝཾ རཱུཔསྨིཾ ཨཏྟཱནཾ སམནུཔསྶཏི།
Kathaṃ rūpasmiṃ attānaṃ samanupassati? Idhekacco vedanaṃ…pe… saññaṃ… saṅkhāre… viññāṇaṃ attato samanupassati. Tassa evaṃ hoti – ‘‘ayaṃ kho me attā. So kho pana me ayaṃ attā imasmiṃ rūpe’’ti. Rūpasmiṃ attānaṃ samanupassati. Seyyathāpi maṇi karaṇḍake pakkhitto assa. Tamenaṃ puriso evaṃ vadeyya – ‘‘ayaṃ maṇi, ayaṃ karaṇḍako. Añño maṇi, añño karaṇḍako. So kho panāyaṃ maṇi imasmiṃ karaṇḍake’’ti. Karaṇḍakasmiṃ maṇiṃ samanupassati. Evamevaṃ idhekacco vedanaṃ…pe… saññaṃ… saṅkhāre… viññāṇaṃ attato samanupassati . Tassa evaṃ hoti – ‘‘ayaṃ kho me attā. So kho pana me ayaṃ attā imasmiṃ rūpe’’ti. Rūpasmiṃ attānaṃ samanupassati. Abhinivesaparāmāso diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ catutthā rūpavatthukā attānudiṭṭhi. Attānudiṭṭhi micchādiṭṭhi diṭṭhivipatti…pe… imāni saññojanāni, na ca diṭṭhiyo. Evaṃ rūpasmiṃ attānaṃ samanupassati.
༡༣༢. ཀཐཾ ཝེདནཾ ཨཏྟཏོ སམནུཔསྶཏི? ཨིདྷེཀཙྩོ ཙཀྑུསམྥསྶཛཾ ཝེདནཾ སོཏསམྥསྶཛཾ ཝེདནཾ གྷཱནསམྥསྶཛཾ ཝེདནཾ ཛིཝ྄ཧཱསམྥསྶཛཾ ཝེདནཾ ཀཱཡསམྥསྶཛཾ ཝེདནཾ མནོསམྥསྶཛཾ ཝེདནཾ ཨཏྟཏོ སམནུཔསྶཏི། ‘‘ཡཱ མནོསམྥསྶཛཱ ཝེདནཱ སོ ཨཧཾ, ཡོ ཨཧཾ སཱ མནོསམྥསྶཛཱ ཝེདནཱ’’ཏི – མནོསམྥསྶཛཾ ཝེདནཉྩ ཨཏྟཉྩ ཨདྭཡཾ སམནུཔསྶཏི། སེཡྻཐཱཔི ཏེལཔྤདཱིཔསྶ ཛྷཱཡཏོ ‘‘ཡཱ ཨཙྩི སོ ཝཎྞོ, ཡོ ཝཎྞོ སཱ ཨཙྩཱི’’ཏི – ཨཙྩིཉྩ ཝཎྞཉྩ ཨདྭཡཾ སམནུཔསྶཏི། ཨེཝམེཝཾ ཨིདྷེཀཙྩོ མནོསམྥསྶཛཾ ཝེདནཾ ཨཏྟཏོ སམནུཔསྶཏི། ‘‘ཡཱ མནོསམྥསྶཛཱ ཝེདནཱ སོ ཨཧཾ, ཡོ ཨཧཾ སཱ མནོསམྥསྶཛཱ ཝེདནཱ’’ཏི – མནོསམྥསྶཛཾ ཝེདནཉྩ ཨཏྟཉྩ ཨདྭཡཾ སམནུཔསྶཏི། ཨབྷིནིཝེསཔརཱམཱསོ དིཊྛི། དིཊྛི ན ཝཏྠུ, ཝཏྠུ ན དིཊྛི། ཨཉྙཱ དིཊྛི, ཨཉྙཾ ཝཏྠུ། ཡཱ ཙ དིཊྛི ཡཉྩ ཝཏྠུ – ཨཡཾ པཋམཱ ཝེདནཱཝཏྠུཀཱ ཨཏྟཱནུདིཊྛི། ཨཏྟཱནུདིཊྛི མིཙྪཱདིཊྛི དིཊྛིཝིཔཏྟི…པེ॰… ཨིམཱནི སཉྙོཛནཱནི, ན ཙ དིཊྛིཡོ། ཨེཝཾ ཝེདནཾ ཨཏྟཏོ སམནུཔསྶཏི།
132. Kathaṃ vedanaṃ attato samanupassati? Idhekacco cakkhusamphassajaṃ vedanaṃ sotasamphassajaṃ vedanaṃ ghānasamphassajaṃ vedanaṃ jivhāsamphassajaṃ vedanaṃ kāyasamphassajaṃ vedanaṃ manosamphassajaṃ vedanaṃ attato samanupassati. ‘‘Yā manosamphassajā vedanā so ahaṃ, yo ahaṃ sā manosamphassajā vedanā’’ti – manosamphassajaṃ vedanañca attañca advayaṃ samanupassati. Seyyathāpi telappadīpassa jhāyato ‘‘yā acci so vaṇṇo, yo vaṇṇo sā accī’’ti – acciñca vaṇṇañca advayaṃ samanupassati. Evamevaṃ idhekacco manosamphassajaṃ vedanaṃ attato samanupassati. ‘‘Yā manosamphassajā vedanā so ahaṃ, yo ahaṃ sā manosamphassajā vedanā’’ti – manosamphassajaṃ vedanañca attañca advayaṃ samanupassati. Abhinivesaparāmāso diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ paṭhamā vedanāvatthukā attānudiṭṭhi. Attānudiṭṭhi micchādiṭṭhi diṭṭhivipatti…pe… imāni saññojanāni, na ca diṭṭhiyo. Evaṃ vedanaṃ attato samanupassati.
ཀཐཾ ཝེདནཱཝནྟཾ ཨཏྟཱནཾ སམནུཔསྶཏི? ཨིདྷེཀཙྩོ སཉྙཾ…པེ॰… སངྑཱརེ… ཝིཉྙཱཎཾ… རཱུཔཾ ཨཏྟཏོ སམནུཔསྶཏི། ཏསྶ ཨེཝཾ ཧོཏི – ‘‘ཨཡཾ ཁོ མེ ཨཏྟཱ། སོ ཁོ པན མེ ཨཡཾ ཨཏྟཱ ཨིམཱཡ ཝེདནཱཡ ཝེདནཱཝཱ’’ཏི། ཝེདནཱཝནྟཾ ཨཏྟཱནཾ སམནུཔསྶཏི། སེཡྻཐཱཔི རུཀྑོ ཚཱཡཱསམྤནྣོ ཨསྶ། ཏམེནཾ པུརིསོ ཨེཝཾ ཝདེཡྻ – ‘‘ཨཡཾ རུཀྑོ, ཨཡཾ ཚཱཡཱ། ཨཉྙོ རུཀྑོ, ཨཉྙཱ ཚཱཡཱ། སོ ཁོ པནཱཡཾ རུཀྑོ ཨིམཱཡ ཚཱཡཱཡ ཚཱཡཱཝཱ’’ཏི། ཚཱཡཱཝནྟཾ རུཀྑཾ སམནུཔསྶཏི། ཨེཝམེཝཾ ཨིདྷེཀཙྩོ སཉྙཾ…པེ॰… སངྑཱརེ… ཝིཉྙཱཎཾ… རཱུཔཾ ཨཏྟཏོ སམནུཔསྶཏི། ཏསྶ ཨེཝཾ ཧོཏི – ‘‘ཨཡཾ ཁོ མེ ཨཏྟཱ། སོ ཁོ པན མེ ཨཡཾ ཨཏྟཱ ཨིམཱཡ ཝེདནཱཡ ཝེདནཱཝཱ’’ཏི། ཝེདནཱཝནྟཾ ཨཏྟཱནཾ སམནུཔསྶཏི། ཨབྷིནིཝེསཔརཱམཱསོ དིཊྛི། དིཊྛི ན ཝཏྠུ, ཝཏྠུ ན དིཊྛི། ཨཉྙཱ དིཊྛི, ཨཉྙཾ ཝཏྠུ། ཡཱ ཙ དིཊྛི ཡཉྩ ཝཏྠུ – ཨཡཾ དུཏིཡཱ ཝེདནཱཝཏྠུཀཱ ཨཏྟཱནུདིཊྛི། ཨཏྟཱནུདིཊྛི མིཙྪཱདིཊྛི དིཊྛིཝིཔཏྟི…པེ॰… ཨིམཱནི སཉྙོཛནཱནི, ན ཙ དིཊྛིཡོ། ཨེཝཾ ཝེདནཱཝནྟཾ ཨཏྟཱནཾ སམནུཔསྶཏི།
Kathaṃ vedanāvantaṃ attānaṃ samanupassati? Idhekacco saññaṃ…pe… saṅkhāre… viññāṇaṃ… rūpaṃ attato samanupassati. Tassa evaṃ hoti – ‘‘ayaṃ kho me attā. So kho pana me ayaṃ attā imāya vedanāya vedanāvā’’ti. Vedanāvantaṃ attānaṃ samanupassati. Seyyathāpi rukkho chāyāsampanno assa. Tamenaṃ puriso evaṃ vadeyya – ‘‘ayaṃ rukkho, ayaṃ chāyā. Añño rukkho, aññā chāyā. So kho panāyaṃ rukkho imāya chāyāya chāyāvā’’ti. Chāyāvantaṃ rukkhaṃ samanupassati. Evamevaṃ idhekacco saññaṃ…pe… saṅkhāre… viññāṇaṃ… rūpaṃ attato samanupassati. Tassa evaṃ hoti – ‘‘ayaṃ kho me attā. So kho pana me ayaṃ attā imāya vedanāya vedanāvā’’ti. Vedanāvantaṃ attānaṃ samanupassati. Abhinivesaparāmāso diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ dutiyā vedanāvatthukā attānudiṭṭhi. Attānudiṭṭhi micchādiṭṭhi diṭṭhivipatti…pe… imāni saññojanāni, na ca diṭṭhiyo. Evaṃ vedanāvantaṃ attānaṃ samanupassati.
ཀཐཾ ཨཏྟནི ཝེདནཾ སམནུཔསྶཏི? ཨིདྷེཀཙྩོ སཉྙཾ…པེ॰… སངྑཱརེ… ཝིཉྙཱཎཾ… རཱུཔཾ ཨཏྟཏོ སམནུཔསྶཏི། ཏསྶ ཨེཝཾ ཧོཏི – ‘‘ཨཡཾ ཁོ མེ ཨཏྟཱ། ཨིམསྨིཉྩ པན ཨཏྟནི ཨཡཾ ཝེདནཱ’’ཏི། ཨཏྟནི ཝེདནཾ སམནུཔསྶཏི། སེཡྻཐཱཔི པུཔྥཾ གནྡྷསམྤནྣཾ ཨསྶ། ཏམེནཾ པུརིསོ ཨེཝཾ ཝདེཡྻ – ‘‘ཨིདཾ པུཔྥཾ, ཨཡཾ གནྡྷོ; ཨཉྙཾ པུཔྥཾ, ཨཉྙོ གནྡྷོ། སོ ཁོ པནཱཡཾ གནྡྷོ ཨིམསྨིཾ པུཔྥེ’’ཏི། པུཔྥསྨིཾ གནྡྷཾ སམནུཔསྶཏི། ཨེཝམེཝཾ ཨིདྷེཀཙྩོ སཉྙཾ…པེ॰… སངྑཱརེ… ཝིཉྙཱཎཾ… རཱུཔཾ ཨཏྟཏོ སམནུཔསྶཏི། ཏསྶ ཨེཝཾ ཧོཏི – ‘‘ཨཡཾ ཁོ མེ ཨཏྟཱ། ཨིམསྨིཉྩ པན ཨཏྟནི ཨཡཾ ཝེདནཱ’’ཏི། ཨཏྟནི ཝེདནཾ སམནུཔསྶཏི ། ཨབྷིནིཝེསཔརཱམཱསོ དིཊྛི། དིཊྛི ན ཝཏྠུ, ཝཏྠུ ན དིཊྛི། ཨཉྙཱ དིཊྛི, ཨཉྙཾ ཝཏྠུ། ཡཱ ཙ དིཊྛི ཡཉྩ ཝཏྠུ – ཨཡཾ ཏཏིཡཱ ཝེདནཱཝཏྠུཀཱ ཨཏྟཱནུདིཊྛི། ཨཏྟཱནུདིཊྛི མིཙྪཱདིཊྛི དིཊྛིཝིཔཏྟི…པེ॰… ཨིམཱནི སཉྙོཛནཱནི, ན ཙ དིཊྛིཡོ། ཨེཝཾ ཨཏྟནི ཝེདནཾ སམནུཔསྶཏི།
Kathaṃ attani vedanaṃ samanupassati? Idhekacco saññaṃ…pe… saṅkhāre… viññāṇaṃ… rūpaṃ attato samanupassati. Tassa evaṃ hoti – ‘‘ayaṃ kho me attā. Imasmiñca pana attani ayaṃ vedanā’’ti. Attani vedanaṃ samanupassati. Seyyathāpi pupphaṃ gandhasampannaṃ assa. Tamenaṃ puriso evaṃ vadeyya – ‘‘idaṃ pupphaṃ, ayaṃ gandho; aññaṃ pupphaṃ, añño gandho. So kho panāyaṃ gandho imasmiṃ pupphe’’ti. Pupphasmiṃ gandhaṃ samanupassati. Evamevaṃ idhekacco saññaṃ…pe… saṅkhāre… viññāṇaṃ… rūpaṃ attato samanupassati. Tassa evaṃ hoti – ‘‘ayaṃ kho me attā. Imasmiñca pana attani ayaṃ vedanā’’ti. Attani vedanaṃ samanupassati . Abhinivesaparāmāso diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ tatiyā vedanāvatthukā attānudiṭṭhi. Attānudiṭṭhi micchādiṭṭhi diṭṭhivipatti…pe… imāni saññojanāni, na ca diṭṭhiyo. Evaṃ attani vedanaṃ samanupassati.
ཀཐཾ ཝེདནཱཡ ཨཏྟཱནཾ སམནུཔསྶཏི? ཨིདྷེཀཙྩོ སཉྙཾ…པེ॰… སངྑཱརེ… ཝིཉྙཱཎཾ… རཱུཔཾ ཨཏྟཏོ སམནུཔསྶཏི། ཏསྶ ཨེཝཾ ཧོཏི – ‘‘ཨཡཾ ཁོ མེ ཨཏྟཱ། སོ ཁོ པན མེ ཨཡཾ ཨཏྟཱ ཨིམཱཡ ཝེདནཱཡཱ’’ཏི། ཝེདནཱཡ ཨཏྟཱནཾ སམནུཔསྶཏི། སེཡྻཐཱཔི མཎི ཀརཎྜཀེ པཀྑིཏྟོ ཨསྶ། ཏམེནཾ པུརིསོ ཨེཝཾ ཝདེཡྻ – ‘‘ཨཡཾ མཎི, ཨཡཾ ཀརཎྜཀོ། ཨཉྙོ མཎི, ཨཉྙོ ཀརཎྜཀོ། སོ ཁོ པནཱཡཾ མཎི ཨིམསྨིཾ ཀརཎྜཀེ’’ཏི། ཀརཎྜཀསྨིཾ མཎིཾ སམནུཔསྶཏི། ཨེཝམེཝཾ ཨིདྷེཀཙྩོ སཉྙཾ… སངྑཱརེ… ཝིཉྙཱཎཾ… རཱུཔཾ ཨཏྟཏོ སམནུཔསྶཏི། ཏསྶ ཨེཝཾ ཧོཏི – ‘‘ཨཡཾ ཁོ མེ ཨཏྟཱ། སོ ཁོ པན མེ ཨཡཾ ཨཏྟཱ ཨིམཱཡ ཝེདནཱཡཱ’’ཏི། ཝེདནཱཡ ཨཏྟཱནཾ སམནུཔསྶཏི། ཨབྷིནིཝེསཔརཱམཱསོ དིཊྛི། དིཊྛི ན ཝཏྠུ, ཝཏྠུ ན དིཊྛི། ཨཉྙཱ དིཊྛི, ཨཉྙཾ ཝཏྠུ། ཡཱ ཙ དིཊྛི ཡཉྩ ཝཏྠུ – ཨཡཾ ཙཏུཏྠཱ ཝེདནཱཝཏྠུཀཱ ཨཏྟཱནུདིཊྛི། ཨཏྟཱནུདིཊྛི མིཙྪཱདིཊྛི དིཊྛིཝིཔཏྟི…པེ॰… ཨིམཱནི སཉྙོཛནཱནི, ན ཙ དིཊྛིཡོ། ཨེཝཾ ཝེདནཱཡ ཨཏྟཱནཾ སམནུཔསྶཏི།
Kathaṃ vedanāya attānaṃ samanupassati? Idhekacco saññaṃ…pe… saṅkhāre… viññāṇaṃ… rūpaṃ attato samanupassati. Tassa evaṃ hoti – ‘‘ayaṃ kho me attā. So kho pana me ayaṃ attā imāya vedanāyā’’ti. Vedanāya attānaṃ samanupassati. Seyyathāpi maṇi karaṇḍake pakkhitto assa. Tamenaṃ puriso evaṃ vadeyya – ‘‘ayaṃ maṇi, ayaṃ karaṇḍako. Añño maṇi, añño karaṇḍako. So kho panāyaṃ maṇi imasmiṃ karaṇḍake’’ti. Karaṇḍakasmiṃ maṇiṃ samanupassati. Evamevaṃ idhekacco saññaṃ… saṅkhāre… viññāṇaṃ… rūpaṃ attato samanupassati. Tassa evaṃ hoti – ‘‘ayaṃ kho me attā. So kho pana me ayaṃ attā imāya vedanāyā’’ti. Vedanāya attānaṃ samanupassati. Abhinivesaparāmāso diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ catutthā vedanāvatthukā attānudiṭṭhi. Attānudiṭṭhi micchādiṭṭhi diṭṭhivipatti…pe… imāni saññojanāni, na ca diṭṭhiyo. Evaṃ vedanāya attānaṃ samanupassati.
༡༣༣. ཀཐཾ སཉྙཾ ཨཏྟཏོ སམནུཔསྶཏི? ཨིདྷེཀཙྩོ ཙཀྑུསམྥསྶཛཾ སཉྙཾ…པེ॰… སོཏསམྥསྶཛཾ སཉྙཾ… གྷཱནསམྥསྶཛཾ སཉྙཾ… ཛིཝ྄ཧཱསམྥསྶཛཾ སཉྙཾ… ཀཱཡསམྥསྶཛཾ སཉྙཾ… མནོསམྥསྶཛཾ སཉྙཾ ཨཏྟཏོ སམནུཔསྶཏི། ཡཱ མནོསམྥསྶཛཱ སཉྙཱ སོ ཨཧཾ, ཡོ ཨཧཾ སཱ མནོསམྥསྶཛཱ སཉྙཱ’’ཏི། མནོསམྥསྶཛཾ སཉྙཉྩ ཨཏྟཉྩ ཨདྭཡཾ སམནུཔསྶཏི། སེཡྻཐཱཔི ཏེལཔྤདཱིཔསྶ ཛྷཱཡཏོ ‘‘ཡཱ ཨཙྩི སོ ཝཎྞོ, ཡོ ཝཎྞོ སཱ ཨཙྩཱི’’ཏི – ཨཙྩིཉྩ ཝཎྞཉྩ ཨདྭཡཾ སམནུཔསྶཏི། ཨེཝམེཝཾ ཨིདྷེཀཙྩོ མནོསམྥསྶཛཾ སཉྙཾ ཨཏྟཏོ སམནུཔསྶཏི – ‘‘ཡཱ མནོསམྥསྶཛཱ སཉྙཱ སོ ཨཧཾ, ཡོ ཨཧཾ སཱ མནོསམྥསྶཛཱ སཉྙཱ’’ཏི། མནོསམྥསྶཛཾ སཉྙཉྩ ཨཏྟཉྩ ཨདྭཡཾ སམནུཔསྶཏི། ཨབྷིནིཝེསཔརཱམཱསོ དིཊྛི། དིཊྛི ན ཝཏྠུ, ཝཏྠུ ན དིཊྛི། ཨཉྙཱ དིཊྛི, ཨཉྙཾ ཝཏྠུ། ཡཱ ཙ དིཊྛི ཡཉྩ ཝཏྠུ – ཨཡཾ པཋམཱ སཉྙཱཝཏྠུཀཱ ཨཏྟཱནུདིཊྛི། ཨཏྟཱནུདིཊྛི མིཙྪཱདིཊྛི དིཊྛིཝིཔཏྟི…པེ॰… ཨིམཱནི སཉྙོཛནཱནི, ན ཙ དིཊྛིཡོ། ཨེཝཾ སཉྙཾ ཨཏྟཏོ སམནུཔསྶཏི།
133. Kathaṃ saññaṃ attato samanupassati? Idhekacco cakkhusamphassajaṃ saññaṃ…pe… sotasamphassajaṃ saññaṃ… ghānasamphassajaṃ saññaṃ… jivhāsamphassajaṃ saññaṃ… kāyasamphassajaṃ saññaṃ… manosamphassajaṃ saññaṃ attato samanupassati. Yā manosamphassajā saññā so ahaṃ, yo ahaṃ sā manosamphassajā saññā’’ti. Manosamphassajaṃ saññañca attañca advayaṃ samanupassati. Seyyathāpi telappadīpassa jhāyato ‘‘yā acci so vaṇṇo, yo vaṇṇo sā accī’’ti – acciñca vaṇṇañca advayaṃ samanupassati. Evamevaṃ idhekacco manosamphassajaṃ saññaṃ attato samanupassati – ‘‘yā manosamphassajā saññā so ahaṃ, yo ahaṃ sā manosamphassajā saññā’’ti. Manosamphassajaṃ saññañca attañca advayaṃ samanupassati. Abhinivesaparāmāso diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ paṭhamā saññāvatthukā attānudiṭṭhi. Attānudiṭṭhi micchādiṭṭhi diṭṭhivipatti…pe… imāni saññojanāni, na ca diṭṭhiyo. Evaṃ saññaṃ attato samanupassati.
ཀཐཾ སཉྙཱཝནྟཾ ཨཏྟཱནཾ སམནུཔསྶཏི? ཨིདྷེཀཙྩོ སངྑཱརེ…པེ॰… ཝིཉྙཱཎཾ… རཱུཔཾ… ཝེདནཾ ཨཏྟཏོ སམནུཔསྶཏི། ཏསྶ ཨེཝཾ ཧོཏི – ‘‘ཨཡཾ ཁོ མེ ཨཏྟཱ། སོ ཁོ པན མེ ཨཡཾ ཨཏྟཱ ཨིམཱཡ སཉྙཱཡ སཉྙཱཝཱ’’ཏི། སཉྙཱཝནྟཾ ཨཏྟཱནཾ སམནུཔསྶཏི། སེཡྻཐཱཔི རུཀྑོ ཚཱཡཱསམྤནྣོ ཨསྶ། ཏམེནཾ པུརིསོ ཨེཝཾ ཝདེཡྻ – ‘‘ཨཡཾ རུཀྑོ, ཨཡཾ ཚཱཡཱ། ཨཉྙོ རུཀྑོ, ཨཉྙཱ ཚཱཡཱ། སོ ཁོ པནཱཡཾ རུཀྑོ ཨིམཱཡ ཚཱཡཱཡ ཚཱཡཱཝཱ’’ཏི། ཚཱཡཱཝནྟཾ རུཀྑཾ སམནུཔསྶཏི། ཨེཝམེཝཾ ཨིདྷེཀཙྩོ སངྑཱརེ… ཝིཉྙཱཎཾ… རཱུཔཾ… ཝེདནཾ ཨཏྟཏོ སམནུཔསྶཏི། ཏསྶ ཨེཝཾ ཧོཏི – ‘‘ཨཡཾ ཁོ མེ ཨཏྟཱ། སོ ཁོ པན མེ ཨཡཾ ཨཏྟཱ ཨིམཱཡ སཉྙཱཡ སཉྙཱཝཱ’’ཏི། སཉྙཱཝནྟཾ ཨཏྟཱནཾ སམནུཔསྶཏི། ཨབྷིནིཝེསཔརཱམཱསོ དིཊྛི། དིཊྛི ན ཝཏྠུ, ཝཏྠུ ན དིཊྛི། ཨཉྙཱ དིཊྛི, ཨཉྙཾ ཝཏྠུ། ཡཱ ཙ དིཊྛི ཡཉྩ ཝཏྠུ – ཨཡཾ དུཏིཡཱ སཉྙཱཝཏྠུཀཱ ཨཏྟཱནུདིཊྛི། ཨཏྟཱནུདིཊྛི མིཙྪཱདིཊྛི…པེ॰… ཨིམཱནི སཉྙོཛནཱནི, ན ཙ དིཊྛིཡོ། ཨེཝཾ སཉྙཱཝནྟཾ ཨཏྟཱནཾ སམནུཔསྶཏི།
Kathaṃ saññāvantaṃ attānaṃ samanupassati? Idhekacco saṅkhāre…pe… viññāṇaṃ… rūpaṃ… vedanaṃ attato samanupassati. Tassa evaṃ hoti – ‘‘ayaṃ kho me attā. So kho pana me ayaṃ attā imāya saññāya saññāvā’’ti. Saññāvantaṃ attānaṃ samanupassati. Seyyathāpi rukkho chāyāsampanno assa. Tamenaṃ puriso evaṃ vadeyya – ‘‘ayaṃ rukkho, ayaṃ chāyā. Añño rukkho, aññā chāyā. So kho panāyaṃ rukkho imāya chāyāya chāyāvā’’ti. Chāyāvantaṃ rukkhaṃ samanupassati. Evamevaṃ idhekacco saṅkhāre… viññāṇaṃ… rūpaṃ… vedanaṃ attato samanupassati. Tassa evaṃ hoti – ‘‘ayaṃ kho me attā. So kho pana me ayaṃ attā imāya saññāya saññāvā’’ti. Saññāvantaṃ attānaṃ samanupassati. Abhinivesaparāmāso diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ dutiyā saññāvatthukā attānudiṭṭhi. Attānudiṭṭhi micchādiṭṭhi…pe… imāni saññojanāni, na ca diṭṭhiyo. Evaṃ saññāvantaṃ attānaṃ samanupassati.
ཀཐཾ ཨཏྟནི སཉྙཾ སམནུཔསྶཏི? ཨིདྷེཀཙྩོ སངྑཱརེ…པེ॰… ཝིཉྙཱཎཾ… རཱུཔཾ… ཝེདནཾ ཨཏྟཏོ སམནུཔསྶཏི། ཏསྶ ཨེཝཾ ཧོཏི – ‘‘ཨཡཾ ཁོ མེ ཨཏྟཱ། ཨིམསྨིཉྩ པན ཨཏྟནི ཨཡཾ སཉྙཱ’’ཏི། ཨཏྟནི སཉྙཾ སམནུཔསྶཏི། སེཡྻཐཱཔི པུཔྥཾ གནྡྷསམྤནྣཾ ཨསྶ། ཏམེནཾ པུརིསོ ཨེཝཾ ཝདེཡྻ – ‘‘ཨིདཾ པུཔྥཾ, ཨཡཾ གནྡྷོ། ཨཉྙཾ པུཔྥཾ, ཨཉྙོ གནྡྷོ། སོ ཁོ པནཱཡཾ གནྡྷོ ཨིམསྨིཾ པུཔྥེ’’ཏི། པུཔྥསྨིཾ གནྡྷཾ སམནུཔསྶཏི། ཨེཝམེཝཾ ཨིདྷེཀཙྩོ སངྑཱརེ… ཝིཉྙཱཎཾ… རཱུཔཾ… ཝེདནཾ ཨཏྟཏོ སམནུཔསྶཏི། ཏསྶ ཨེཝཾ ཧོཏི – ‘‘ཨཡཾ ཁོ མེ ཨཏྟཱ། ཨིམསྨིཉྩ པན ཨཏྟནི ཨཡཾ སཉྙཱ’’ཏི། ཨཏྟནི སཉྙཾ སམནུཔསྶཏི། ཨབྷིནིཝེསཔརཱམཱསོ དིཊྛི། དིཊྛི ན ཝཏྠུ, ཝཏྠུ ན དིཊྛི། ཨཉྙཱ དིཊྛི, ཨཉྙཾ ཝཏྠུ། ཡཱ ཙ དིཊྛི ཡཉྩ ཝཏྠུ – ཨཡཾ ཏཏིཡཱ སཉྙཱཝཏྠུཀཱ ཨཏྟཱནུདིཊྛི། ཨཏྟཱནུདིཊྛི མིཙྪཱདིཊྛི…པེ॰… ཨིམཱནི སཉྙོཛནཱནི, ན ཙ དིཊྛིཡོ། ཨེཝཾ ཨཏྟནི སཉྙཾ སམནུཔསྶཏི།
Kathaṃ attani saññaṃ samanupassati? Idhekacco saṅkhāre…pe… viññāṇaṃ… rūpaṃ… vedanaṃ attato samanupassati. Tassa evaṃ hoti – ‘‘ayaṃ kho me attā. Imasmiñca pana attani ayaṃ saññā’’ti. Attani saññaṃ samanupassati. Seyyathāpi pupphaṃ gandhasampannaṃ assa. Tamenaṃ puriso evaṃ vadeyya – ‘‘idaṃ pupphaṃ, ayaṃ gandho. Aññaṃ pupphaṃ, añño gandho. So kho panāyaṃ gandho imasmiṃ pupphe’’ti. Pupphasmiṃ gandhaṃ samanupassati. Evamevaṃ idhekacco saṅkhāre… viññāṇaṃ… rūpaṃ… vedanaṃ attato samanupassati. Tassa evaṃ hoti – ‘‘ayaṃ kho me attā. Imasmiñca pana attani ayaṃ saññā’’ti. Attani saññaṃ samanupassati. Abhinivesaparāmāso diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ tatiyā saññāvatthukā attānudiṭṭhi. Attānudiṭṭhi micchādiṭṭhi…pe… imāni saññojanāni, na ca diṭṭhiyo. Evaṃ attani saññaṃ samanupassati.
ཀཐཾ སཉྙཱཡ ཨཏྟཱནཾ སམནུཔསྶཏི? ཨིདྷེཀཙྩོ སངྑཱརེ …པེ॰… ཝིཉྙཱཎཾ… རཱུཔཾ… ཝེདནཾ ཨཏྟཏོ སམནུཔསྶཏི། ཏསྶ ཨེཝཾ ཧོཏི – ‘‘ཨཡཾ ཁོ མེ ཨཏྟཱ། སོ ཁོ པན མེ ཨཡཾ ཨཏྟཱ ཨིམཱཡ སཉྙཱཡཱ’’ཏི། སཉྙཱཡ ཨཏྟཱནཾ སམནུཔསྶཏི། སེཡྻཐཱཔི མཎི ཀརཎྜཀེ པཀྑིཏྟོ ཨསྶ། ཏམེནཾ པུརིསོ ཨེཝཾ ཝདེཡྻ – ‘‘ཨཡཾ མཎི, ཨཡཾ ཀརཎྜཀོ། ཨཉྙོ མཎི, ཨཉྙོ ཀརཎྜཀོ། སོ ཁོ པནཱཡཾ མཎི ཨིམསྨིཾ ཀརཎྜཀེ’’ཏི། ཀརཎྜཀསྨིཾ མཎིཾ སམནུཔསྶཏི། ཨེཝམེཝ ཨིདྷེཀཙྩོ སངྑཱརེ… ཝིཉྙཱཎཾ… རཱུཔཾ… ཝེདནཾ ཨཏྟཏོ སམནུཔསྶཏི། ཏསྶ ཨེཝཾ ཧོཏི – ‘‘ཨཡཾ ཁོ མེ ཨཏྟཱ། སོ ཁོ པན མེ ཨཡཾ ཨཏྟཱ ཨིམཱཡ སཉྙཱཡཱ’’ཏི། སཉྙཱཡ ཨཏྟཱནཾ སམནུཔསྶཏི། ཨབྷིནིཝེསཔརཱམཱསོ དིཊྛི། དིཊྛི ན ཝཏྠུ, ཝཏྠུ ན དིཊྛི། ཨཉྙཱ དིཊྛི, ཨཉྙཾ ཝཏྠུ། ཡཱ ཙ དིཊྛི ཡཉྩ ཝཏྠུ – ཨཡཾ ཙཏུཏྠཱ སཉྙཱཝཏྠུཀཱ ཨཏྟཱནུདིཊྛི། ཨཏྟཱནུདིཊྛི མིཙྪཱདིཊྛི…པེ॰… ཨིམཱནི སཉྙོཛནཱནི ན ཙ དིཊྛིཡོ། ཨེཝཾ སཉྙཱཡ ཨཏྟཱནཾ སམནུཔསྶཏི།
Kathaṃ saññāya attānaṃ samanupassati? Idhekacco saṅkhāre …pe… viññāṇaṃ… rūpaṃ… vedanaṃ attato samanupassati. Tassa evaṃ hoti – ‘‘ayaṃ kho me attā. So kho pana me ayaṃ attā imāya saññāyā’’ti. Saññāya attānaṃ samanupassati. Seyyathāpi maṇi karaṇḍake pakkhitto assa. Tamenaṃ puriso evaṃ vadeyya – ‘‘ayaṃ maṇi, ayaṃ karaṇḍako. Añño maṇi, añño karaṇḍako. So kho panāyaṃ maṇi imasmiṃ karaṇḍake’’ti. Karaṇḍakasmiṃ maṇiṃ samanupassati. Evameva idhekacco saṅkhāre… viññāṇaṃ… rūpaṃ… vedanaṃ attato samanupassati. Tassa evaṃ hoti – ‘‘ayaṃ kho me attā. So kho pana me ayaṃ attā imāya saññāyā’’ti. Saññāya attānaṃ samanupassati. Abhinivesaparāmāso diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ catutthā saññāvatthukā attānudiṭṭhi. Attānudiṭṭhi micchādiṭṭhi…pe… imāni saññojanāni na ca diṭṭhiyo. Evaṃ saññāya attānaṃ samanupassati.
༡༣༤. ཀཐཾ སངྑཱརེ ཨཏྟཏོ སམནུཔསྶཏི? ཨིདྷེཀཙྩོ ཙཀྑུསམྥསྶཛཾ ཙེཏནཾ སོཏསམྥསྶཛཾ ཙེཏནཾ གྷཱནསམྥསྶཛཾ ཙེཏནཾ ཛིཝ྄ཧཱསམྥསྶཛཾ ཙེཏནཾ ཀཱཡསམྥསྶཛཾ ཙེཏནཾ མནོསམྥསྶཛཾ ཙེཏནཾ ཨཏྟཏོ སམནུཔསྶཏི། ‘‘ཡཱ མནོསམྥསྶཛཱ ཙེཏནཱ, སོ ཨཧཾ; ཡོ ཨཧཾ སཱ མནོསམྥསྶཛཱ ཙེཏནཱ’’ཏི – མནོསམྥསྶཛཾ ཙེཏནཉྩ ཨཏྟཉྩ ཨདྭཡཾ སམནུཔསྶཏི། སེཡྻཐཱཔི ཏེལཔྤདཱིཔསྶ ཛྷཱཡཏོ ‘‘ཡཱ ཨཙྩི སོ ཝཎྞོ, ཡོ ཝཎྞོ སཱ ཨཙྩཱི’’ཏི – ཨཙྩིཉྩ ཝཎྞཉྩ ཨདྭཡཾ སམནུཔསྶཏི། ཨེཝམེཝཾ ཨིདྷེཀཙྩོ མནོསམྥསྶཛཾ ཙེཏནཾ ཨཏྟཏོ སམནུཔསྶཏི། ‘‘ཡཱ མནོསམྥསྶཛཱ ཙེཏནཱ སོ ཨཧཾ, ཡོ ཨཧཾ སཱ མནོསམྥསྶཛཱ ཙེཏནཱ’’ཏི – མནོསམྥསྶཛཾ ཙེཏནཉྩ ཨཏྟཉྩ ཨདྭཡཾ སམནུཔསྶཏི། ཨབྷིནིཝེསཔརཱམཱསོ དིཊྛི། དིཊྛི ན ཝཏྠུ, ཝཏྠུ ན དིཊྛི། ཨཉྙཱ དིཊྛི, ཨཉྙཾ ཝཏྠུ། ཡཱ ཙ དིཊྛི ཡཉྩ ཝཏྠུ – ཨཡཾ པཋམཱ སངྑཱརཝཏྠུཀཱ ཨཏྟཱནུདིཊྛི། ཨཏྟཱནུདིཊྛི མིཙྪཱདིཊྛི…པེ॰… ཨིམཱནི སཉྙོཛནཱནི, ན ཙ དིཊྛིཡོ། ཨེཝཾ སངྑཱརེ ཨཏྟཏོ སམནུཔསྶཏི།
134. Kathaṃ saṅkhāre attato samanupassati? Idhekacco cakkhusamphassajaṃ cetanaṃ sotasamphassajaṃ cetanaṃ ghānasamphassajaṃ cetanaṃ jivhāsamphassajaṃ cetanaṃ kāyasamphassajaṃ cetanaṃ manosamphassajaṃ cetanaṃ attato samanupassati. ‘‘Yā manosamphassajā cetanā, so ahaṃ; yo ahaṃ sā manosamphassajā cetanā’’ti – manosamphassajaṃ cetanañca attañca advayaṃ samanupassati. Seyyathāpi telappadīpassa jhāyato ‘‘yā acci so vaṇṇo, yo vaṇṇo sā accī’’ti – acciñca vaṇṇañca advayaṃ samanupassati. Evamevaṃ idhekacco manosamphassajaṃ cetanaṃ attato samanupassati. ‘‘Yā manosamphassajā cetanā so ahaṃ, yo ahaṃ sā manosamphassajā cetanā’’ti – manosamphassajaṃ cetanañca attañca advayaṃ samanupassati. Abhinivesaparāmāso diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ paṭhamā saṅkhāravatthukā attānudiṭṭhi. Attānudiṭṭhi micchādiṭṭhi…pe… imāni saññojanāni, na ca diṭṭhiyo. Evaṃ saṅkhāre attato samanupassati.
ཀཐཾ སངྑཱརཝནྟཾ ཨཏྟཱནཾ སམནུཔསྶཏི? ཨིདྷེཀཙྩོ ཝིཉྙཱཎཾ… རཱུཔཾ… ཝེདནཾ… སཉྙཾ ཨཏྟཏོ སམནུཔསྶཏི། ཏསྶ ཨེཝཾ ཧོཏི – ‘‘ཨཡཾ ཁོ མེ ཨཏྟཱ། སོ ཁོ པན མེ ཨཡཾ ཨཏྟཱ ཨིམེཧི སངྑཱརེཧི སངྑཱརཝཱ’’ཏི། སངྑཱརཝནྟཾ ཨཏྟཱནཾ སམནུཔསྶཏི། སེཡྻཐཱཔི རུཀྑོ ཚཱཡཱསམྤནྣོ ཨསྶ། ཏམེནཾ པུརིསོ ཨེཝཾ ཝདེཡྻ – ‘‘ཨཡཾ རུཀྑོ, ཨཡཾ ཚཱཡཱ། ཨཉྙོ རུཀྑོ, ཨཉྙཱ ཚཱཡཱ། སོ ཁོ པནཱཡཾ རུཀྑོ ཨིམཱཡ ཚཱཡཱཡ ཚཱཡཱཝཱ’’ཏི། ཚཱཡཱཝནྟཾ རུཀྑཾ སམནུཔསྶཏི། ཨེཝམེཝ ཨིདྷེཀཙྩོ ཝིཉྙཱཎཾ… རཱུཔཾ… ཝེདནཾ… སཉྙཾ ཨཏྟཏོ སམནུཔསྶཏི། ཏསྶ ཨེཝཾ ཧོཏི – ‘‘ཨཡཾ ཁོ མེ ཨཏྟཱ། སོ ཁོ པན མེ ཨཡཾ ཨཏྟཱ། ཨིམེཧི སངྑཱརེཧི སངྑཱརཝཱ’’ཏི། སངྑཱརཝནྟཾ ཨཏྟཱནཾ སམནུཔསྶཏི། ཨབྷིནིཝེསཔརཱམཱསོ དིཊྛི། དིཊྛི ན ཝཏྠུ, ཝཏྠུ ན དིཊྛི། ཨཉྙཱ དིཊྛི, ཨཉྙཾ ཝཏྠུ། ཡཱ ཙ དིཊྛི ཡཉྩ ཝཏྠུ – ཨཡཾ དུཏིཡཱ སངྑཱརཝཏྠུཀཱ ཨཏྟཱནུདིཊྛི། ཨཏྟཱནུདིཊྛི མིཙྪཱདིཊྛི…པེ॰… ཨིམཱནི སཉྙོཛནཱནི, ན ཙ དིཊྛིཡོ། ཨེཝཾ སངྑཱརཝནྟཾ ཨཏྟཱནཾ སམནུཔསྶཏི།
Kathaṃ saṅkhāravantaṃ attānaṃ samanupassati? Idhekacco viññāṇaṃ… rūpaṃ… vedanaṃ… saññaṃ attato samanupassati. Tassa evaṃ hoti – ‘‘ayaṃ kho me attā. So kho pana me ayaṃ attā imehi saṅkhārehi saṅkhāravā’’ti. Saṅkhāravantaṃ attānaṃ samanupassati. Seyyathāpi rukkho chāyāsampanno assa. Tamenaṃ puriso evaṃ vadeyya – ‘‘ayaṃ rukkho, ayaṃ chāyā. Añño rukkho, aññā chāyā. So kho panāyaṃ rukkho imāya chāyāya chāyāvā’’ti. Chāyāvantaṃ rukkhaṃ samanupassati. Evameva idhekacco viññāṇaṃ… rūpaṃ… vedanaṃ… saññaṃ attato samanupassati. Tassa evaṃ hoti – ‘‘ayaṃ kho me attā. So kho pana me ayaṃ attā. Imehi saṅkhārehi saṅkhāravā’’ti. Saṅkhāravantaṃ attānaṃ samanupassati. Abhinivesaparāmāso diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ dutiyā saṅkhāravatthukā attānudiṭṭhi. Attānudiṭṭhi micchādiṭṭhi…pe… imāni saññojanāni, na ca diṭṭhiyo. Evaṃ saṅkhāravantaṃ attānaṃ samanupassati.
ཀཐཾ ཨཏྟནི སངྑཱརེ སམནུཔསྶཏི? ཨིདྷེཀཙྩོ ཝིཉྙཱཎཾ… རཱུཔཾ… ཝེདནཾ… སཉྙཾ ཨཏྟཏོ སམནུཔསྶཏི། ཏསྶ ཨེཝཾ ཧོཏི – ‘‘ཨཡཾ ཁོ མེ ཨཏྟཱ། ཨིམསྨིཉྩ པན ཨཏྟནི ཨིམེ སངྑཱརཱ’’ཏི། ཨཏྟནི སངྑཱརེ སམནུཔསྶཏི། སེཡྻཐཱཔི པུཔྥཾ གནྡྷསམྤནྣཾ ཨསྶ། ཏམེནཾ པུརིསོ ཨེཝཾ ཝདེཡྻ – ‘‘ཨིདཾ པུཔྥཾ, ཨཡཾ གནྡྷོ; ཨཉྙཾ པུཔྥཾ, ཨཉྙོ གནྡྷོ། སོ ཁོ པནཱཡཾ གནྡྷོ ཨིམསྨིཾ པུཔྥེ’’ཏི། པུཔྥསྨིཾ གནྡྷཾ སམནུཔསྶཏི། ཨེཝམེཝཾ ཨིདྷེཀཙྩོ ཝིཉྙཱཎཾ… རཱུཔཾ… ཝེདནཾ… སཉྙཾ ཨཏྟཏོ སམནུཔསྶཏི། ཏསྶ ཨེཝཾ ཧོཏི – ‘‘ཨཡཾ ཁོ མེ ཨཏྟཱ། ཨིམསྨིཉྩ པན ཨཏྟནི ཨིམེ སངྑཱརཱ’’ཏི། ཨཏྟནི སངྑཱརེ སམནུཔསྶཏི། ཨབྷིནིཝེསཔརཱམཱསོ དིཊྛི། དིཊྛི ན ཝཏྠུ, ཝཏྠུ ན དིཊྛི། ཨཉྙཱ དིཊྛི, ཨཉྙཾ ཝཏྠུ། ཡཱ ཙ དིཊྛི ཡཉྩ ཝཏྠུ – ཨཡཾ ཏཏིཡཱ སངྑཱརཝཏྠུཀཱ ཨཏྟཱནུདིཊྛི། ཨཏྟཱནུདིཊྛི མིཙྪཱདིཊྛི…པེ॰… ཨིམཱནི སཉྙོཛནཱནི, ན ཙ དིཊྛིཡོ། ཨེཝཾ ཨཏྟནི སངྑཱརེ སམནུཔསྶཏི།
Kathaṃ attani saṅkhāre samanupassati? Idhekacco viññāṇaṃ… rūpaṃ… vedanaṃ… saññaṃ attato samanupassati. Tassa evaṃ hoti – ‘‘ayaṃ kho me attā. Imasmiñca pana attani ime saṅkhārā’’ti. Attani saṅkhāre samanupassati. Seyyathāpi pupphaṃ gandhasampannaṃ assa. Tamenaṃ puriso evaṃ vadeyya – ‘‘idaṃ pupphaṃ, ayaṃ gandho; aññaṃ pupphaṃ, añño gandho. So kho panāyaṃ gandho imasmiṃ pupphe’’ti. Pupphasmiṃ gandhaṃ samanupassati. Evamevaṃ idhekacco viññāṇaṃ… rūpaṃ… vedanaṃ… saññaṃ attato samanupassati. Tassa evaṃ hoti – ‘‘ayaṃ kho me attā. Imasmiñca pana attani ime saṅkhārā’’ti. Attani saṅkhāre samanupassati. Abhinivesaparāmāso diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ tatiyā saṅkhāravatthukā attānudiṭṭhi. Attānudiṭṭhi micchādiṭṭhi…pe… imāni saññojanāni, na ca diṭṭhiyo. Evaṃ attani saṅkhāre samanupassati.
ཀཐཾ སངྑཱརེསུ ཨཏྟཱནཾ སམནུཔསྶཏི? ཨིདྷེཀཙྩོ ཝིཉྙཱཎཾ… རཱུཔཾ… ཝེདནཾ… སཉྙཾ ཨཏྟཏོ སམནུཔསྶཏི། ཏསྶ ཨེཝཾ ཧོཏི – ‘‘ཨཡཾ ཁོ མེ ཨཏྟཱ། སོ ཁོ པན མེ ཨཡཾ ཨཏྟཱ ཨིམེསུ སངྑཱརེསཱུ’’ཏི། སངྑཱརེསུ ཨཏྟཱནཾ སམནུཔསྶཏི། སེཡྻཐཱཔི མཎི ཀརཎྜཀེ པཀྑིཏྟོ ཨསྶ། ཏམེནཾ པུརིསོ ཨེཝཾ ཝདེཡྻ – ‘‘ཨཡཾ མཎི, ཨཡཾ ཀརཎྜཀོ། ཨཉྙོ མཎི, ཨཉྙོ ཀརཎྜཀོ། སོ ཁོ པནཱཡཾ མཎི ཨིམསྨིཾ ཀརཎྜཀེ’’ཏི། ཀརཎྜཀསྨིཾ མཎིཾ སམནུཔསྶཏི། ཨེཝམེཝ ཨིདྷེཀཙྩོ ཝིཉྙཱཎཾ… རཱུཔཾ… ཝེདནཾ… སཉྙཾ ཨཏྟཏོ སམནུཔསྶཏི། ཏསྶ ཨེཝཾ ཧོཏི – ‘‘ཨཡཾ ཁོ མེ ཨཏྟཱ། སོ ཁོ པན མེ ཨཡཾ ཨཏྟཱ ཨིམེསུ སངྑཱརེསཱུ’’ཏི། སངྑཱརེསུ ཨཏྟཱནཾ སམནུཔསྶཏི། ཨབྷིནིཝེསཔརཱམཱསོ དིཊྛི། དིཊྛི ན ཝཏྠུ, ཝཏྠུ ན དིཊྛི། ཨཉྙཱ དིཊྛི, ཨཉྙཾ ཝཏྠུ། ཡཱ ཙ དིཊྛི ཡཉྩ ཝཏྠུ – ཨཡཾ ཙཏུཏྠཱ སངྑཱརཝཏྠུཀཱ ཨཏྟཱནུདིཊྛི། ཨཏྟཱནུདིཊྛི མིཙྪཱདིཊྛི…པེ॰… ཨིམཱནི སཉྙོཛནཱནི, ན ཙ དིཊྛིཡོ། ཨེཝཾ སངྑཱརེསུ ཨཏྟཱནཾ སམནུཔསྶཏི།
Kathaṃ saṅkhāresu attānaṃ samanupassati? Idhekacco viññāṇaṃ… rūpaṃ… vedanaṃ… saññaṃ attato samanupassati. Tassa evaṃ hoti – ‘‘ayaṃ kho me attā. So kho pana me ayaṃ attā imesu saṅkhāresū’’ti. Saṅkhāresu attānaṃ samanupassati. Seyyathāpi maṇi karaṇḍake pakkhitto assa. Tamenaṃ puriso evaṃ vadeyya – ‘‘ayaṃ maṇi, ayaṃ karaṇḍako. Añño maṇi, añño karaṇḍako. So kho panāyaṃ maṇi imasmiṃ karaṇḍake’’ti. Karaṇḍakasmiṃ maṇiṃ samanupassati. Evameva idhekacco viññāṇaṃ… rūpaṃ… vedanaṃ… saññaṃ attato samanupassati. Tassa evaṃ hoti – ‘‘ayaṃ kho me attā. So kho pana me ayaṃ attā imesu saṅkhāresū’’ti. Saṅkhāresu attānaṃ samanupassati. Abhinivesaparāmāso diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ catutthā saṅkhāravatthukā attānudiṭṭhi. Attānudiṭṭhi micchādiṭṭhi…pe… imāni saññojanāni, na ca diṭṭhiyo. Evaṃ saṅkhāresu attānaṃ samanupassati.
༡༣༥. ཀཐཾ ཝིཉྙཱཎཾ ཨཏྟཏོ སམནུཔསྶཏི? ཨིདྷེཀཙྩོ ཙཀྑུཝིཉྙཱཎཾ… སོཏཝིཉྙཱཎཾ… གྷཱནཝིཉྙཱཎཾ… ཛིཝ྄ཧཱཝིཉྙཱཎཾ ཀཱཡཝིཉྙཱཎཾ… མནོཝིཉྙཱཎཾ ཨཏྟཏོ སམནུཔསྶཏི། ‘‘ཡཾ མནོཝིཉྙཱཎཾ, སོ ཨཧཾ; ཡོ ཨཧཾ, ཏཾ མནོཝིཉྙཱཎ’’ནྟི – མནོཝིཉྙཱཎཉྩ ཨཏྟཉྩ ཨདྭཡཾ སམནུཔསྶཏི། སེཡྻཐཱཔི ཏེལཔྤདཱིཔསྶ ཛྷཱཡཏོ ‘‘ཡཱ ཨཙྩི སོ ཝཎྞོ, ཡོ ཝཎྞོ སཱ ཨཙྩཱི’’ཏི – ཨཙྩིཉྩ ཝཎྞཉྩ ཨདྭཡཾ སམནུཔསྶཏི། ཨེཝམེཝཾ ཨིདྷེཀཙྩོ མནོཝིཉྙཱཎཾ ཨཏྟཏོ སམནུཔསྶཏི ། ‘‘ཡཾ མནོཝིཉྙཱཎཾ, སོ ཨཧཾ; ཡོ ཨཧཾ ཏཾ མནོཝིཉྙཱཎ’’ནྟི – མནོཝིཉྙཱཎཉྩ ཨཏྟཉྩ ཨདྭཡཾ སམནུཔསྶཏི། ཨབྷིནིཝེསཔརཱམཱསོ དིཊྛི། དིཊྛི ན ཝཏྠུ, ཝཏྠུ ན དིཊྛི། ཨཉྙཱ དིཊྛི, ཨཉྙཾ ཝཏྠུ། ཡཱ ཙ དིཊྛི ཡཉྩ ཝཏྠུ – ཨཡཾ པཋམཱ ཝིཉྙཱཎཝཏྠུཀཱ ཨཏྟཱནུདིཊྛི། ཨཏྟཱནུདིཊྛི མིཙྪཱདིཊྛི…པེ॰… ཨིམཱནི སཉྙོཛནཱནི, ན ཙ དིཊྛིཡོ། ཨེཝཾ ཝིཉྙཱཎཾ ཨཏྟཏོ སམནུཔསྶཏི།
135. Kathaṃ viññāṇaṃ attato samanupassati? Idhekacco cakkhuviññāṇaṃ… sotaviññāṇaṃ… ghānaviññāṇaṃ… jivhāviññāṇaṃ kāyaviññāṇaṃ… manoviññāṇaṃ attato samanupassati. ‘‘Yaṃ manoviññāṇaṃ, so ahaṃ; yo ahaṃ, taṃ manoviññāṇa’’nti – manoviññāṇañca attañca advayaṃ samanupassati. Seyyathāpi telappadīpassa jhāyato ‘‘yā acci so vaṇṇo, yo vaṇṇo sā accī’’ti – acciñca vaṇṇañca advayaṃ samanupassati. Evamevaṃ idhekacco manoviññāṇaṃ attato samanupassati . ‘‘Yaṃ manoviññāṇaṃ, so ahaṃ; yo ahaṃ taṃ manoviññāṇa’’nti – manoviññāṇañca attañca advayaṃ samanupassati. Abhinivesaparāmāso diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ paṭhamā viññāṇavatthukā attānudiṭṭhi. Attānudiṭṭhi micchādiṭṭhi…pe… imāni saññojanāni, na ca diṭṭhiyo. Evaṃ viññāṇaṃ attato samanupassati.
ཀཐཾ ཝིཉྙཱཎཝནྟཾ ཨཏྟཱནཾ སམནུཔསྶཏི? ཨིདྷེཀཙྩོ རཱུཔཾ… ཝེདནཾ… སཉྙཾ… སངྑཱརེ ཨཏྟཏོ སམནུཔསྶཏི། ཏསྶ ཨེཝཾ ཧོཏི – ‘‘ཨཡཾ ཁོ མེ ཨཏྟཱ། སོ ཁོ པན མེ ཨཡཾ ཨཏྟཱ ཨིམིནཱ ཝིཉྙཱཎེན ཝིཉྙཱཎཝཱ’’ཏི། ཝིཉྙཱཎཝནྟཾ ཨཏྟཱནཾ སམནུཔསྶཏི། སེཡྻཐཱཔི རུཀྑོ ཚཱཡཱསམྤནྣོ ཨསྶ། ཏམེནཾ པུརིསོ ཨེཝཾ ཝདེཡྻ – ‘‘ཨཡཾ རུཀྑོ, ཨཡཾ ཚཱཡཱ། ཨཉྙོ རུཀྑོ, ཨཉྙཱ ཚཱཡཱ། སོ ཁོ པནཱཡཾ རུཀྑོ ཨིམཱཡ ཚཱཡཱཡ ཚཱཡཱཝཱ’’ཏི། ཚཱཡཱཝནྟཾ རུཀྑཾ སམནུཔསྶཏི། ཨེཝམེཝཾ ཨིདྷེཀཙྩོ རཱུཔཾ… ཝེདནཾ… སཉྙཾ… སངྑཱརེ ཨཏྟཏོ སམནུཔསྶཏི། ཏསྶ ཨེཝཾ ཧོཏི – ‘‘ཨཡཾ ཁོ མེ ཨཏྟཱ། སོ ཁོ པན མེ ཨཡཾ ཨཏྟཱ ཨིམིནཱ ཝིཉྙཱཎེན ཝིཉྙཱཎཝཱ’’ཏི། ཝིཉྙཱཎཝནྟཾ ཨཏྟཱནཾ སམནུཔསྶཏི། ཨབྷིནིཝེསཔརཱམཱསོ དིཊྛི། དིཊྛི ན ཝཏྠུ, ཝཏྠུ ན དིཊྛི། ཨཉྙཱ དིཊྛི, ཨཉྙཾ ཝཏྠུ། ཡཱ ཙ དིཊྛི ཡཉྩ ཝཏྠུ – ཨཡཾ དུཏིཡཱ ཝིཉྙཱཎཝཏྠུཀཱ ཨཏྟཱནུདིཊྛི། ཨཏྟཱནུདིཊྛི མིཙྪཱདིཊྛི…པེ॰… ཨིམཱནི སཉྙོཛནཱནི, ན ཙ དིཊྛིཡོ། ཨེཝཾ ཝིཉྙཱཎཝནྟཾ ཨཏྟཱནཾ སམནུཔསྶཏི།
Kathaṃ viññāṇavantaṃ attānaṃ samanupassati? Idhekacco rūpaṃ… vedanaṃ… saññaṃ… saṅkhāre attato samanupassati. Tassa evaṃ hoti – ‘‘ayaṃ kho me attā. So kho pana me ayaṃ attā iminā viññāṇena viññāṇavā’’ti. Viññāṇavantaṃ attānaṃ samanupassati. Seyyathāpi rukkho chāyāsampanno assa. Tamenaṃ puriso evaṃ vadeyya – ‘‘ayaṃ rukkho, ayaṃ chāyā. Añño rukkho, aññā chāyā. So kho panāyaṃ rukkho imāya chāyāya chāyāvā’’ti. Chāyāvantaṃ rukkhaṃ samanupassati. Evamevaṃ idhekacco rūpaṃ… vedanaṃ… saññaṃ… saṅkhāre attato samanupassati. Tassa evaṃ hoti – ‘‘ayaṃ kho me attā. So kho pana me ayaṃ attā iminā viññāṇena viññāṇavā’’ti. Viññāṇavantaṃ attānaṃ samanupassati. Abhinivesaparāmāso diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ dutiyā viññāṇavatthukā attānudiṭṭhi. Attānudiṭṭhi micchādiṭṭhi…pe… imāni saññojanāni, na ca diṭṭhiyo. Evaṃ viññāṇavantaṃ attānaṃ samanupassati.
ཀཐཾ ཨཏྟནི ཝིཉྙཱཎཾ སམནུཔསྶཏི? ཨིདྷེཀཙྩོ རཱུཔཾ… ཝེདནཾ… སཉྙཾ… སངྑཱརེ ཨཏྟཏོ སམནུཔསྶཏི། ཏསྶ ཨེཝཾ ཧོཏི – ‘‘ཨཡཾ ཁོ མེ ཨཏྟཱ ། ཨིམསྨིཉྩ པན ཨཏྟནི ཨིདཾ ཝིཉྙཱཎ’’ནྟི། ཨཏྟནི ཝིཉྙཱཎཾ སམནུཔསྶཏི། སེཡྻཐཱཔི པུཔྥཾ གནྡྷསམྤནྣཾ ཨསྶ། ཏམེནཾ པུརིསོ ཨེཝཾ ཝདེཡྻ – ‘‘ཨིདཾ པུཔྥཾ, ཨཡཾ གནྡྷོ; ཨཉྙཾ པུཔྥཾ, ཨཉྙོ གནྡྷོ། སོ ཁོ པནཱཡཾ གནྡྷོ ཨིམསྨིཾ པུཔྥེ’’ཏི། པུཔྥསྨིཾ གནྡྷཾ སམནུཔསྶཏི། ཨེཝམེཝཾ ཨིདྷེཀཙྩོ རཱུཔཾ… ཝེདནཾ… སཉྙཾ… སངྑཱརེ ཨཏྟཏོ སམནུཔསྶཏི། ཏསྶ ཨེཝཾ ཧོཏི – ‘‘ཨཡཾ ཁོ མེ ཨཏྟཱ། ཨིམསྨིཉྩ པན ཨཏྟནི ཨིདཾ ཝིཉྙཱཎ’’ནྟི། ཨཏྟནི ཝིཉྙཱཎཾ སམནུཔསྶཏི། ཨབྷིནིཝེསཔརཱམཱསོ དིཊྛི། དིཊྛི ན ཝཏྠུ, ཝཏྠུ ན དིཊྛི། ཨཉྙཱ དིཊྛི, ཨཉྙཾ ཝཏྠུ། ཡཱ ཙ དིཊྛི ཡཉྩ ཝཏྠུ – ཨཡཾ ཏཏིཡཱ ཝིཉྙཱཎཝཏྠུཀཱ ཨཏྟཱནུདིཊྛི། ཨཏྟཱནུདིཊྛི མིཙྪཱདིཊྛི…པེ॰… ཨིམཱནི སཉྙོཛནཱནི, ན ཙ དིཊྛིཡོ། ཨེཝཾ ཨཏྟནི ཝིཉྙཱཎཾ སམནུཔསྶཏི།
Kathaṃ attani viññāṇaṃ samanupassati? Idhekacco rūpaṃ… vedanaṃ… saññaṃ… saṅkhāre attato samanupassati. Tassa evaṃ hoti – ‘‘ayaṃ kho me attā . Imasmiñca pana attani idaṃ viññāṇa’’nti. Attani viññāṇaṃ samanupassati. Seyyathāpi pupphaṃ gandhasampannaṃ assa. Tamenaṃ puriso evaṃ vadeyya – ‘‘idaṃ pupphaṃ, ayaṃ gandho; aññaṃ pupphaṃ, añño gandho. So kho panāyaṃ gandho imasmiṃ pupphe’’ti. Pupphasmiṃ gandhaṃ samanupassati. Evamevaṃ idhekacco rūpaṃ… vedanaṃ… saññaṃ… saṅkhāre attato samanupassati. Tassa evaṃ hoti – ‘‘ayaṃ kho me attā. Imasmiñca pana attani idaṃ viññāṇa’’nti. Attani viññāṇaṃ samanupassati. Abhinivesaparāmāso diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ tatiyā viññāṇavatthukā attānudiṭṭhi. Attānudiṭṭhi micchādiṭṭhi…pe… imāni saññojanāni, na ca diṭṭhiyo. Evaṃ attani viññāṇaṃ samanupassati.
ཀཐཾ ཝིཉྙཱཎསྨིཾ ཨཏྟཱནཾ སམནུཔསྶཏི? ཨིདྷེཀཙྩོ རཱུཔཾ… ཝེདནཾ… སཉྙཾ… སངྑཱརེ ཨཏྟཏོ སམནུཔསྶཏི། ཏསྶ ཨེཝཾ ཧོཏི – ‘‘ཨཡཾ ཁོ མེ ཨཏྟཱ། སོ ཁོ པན མེ ཨཡཾ ཨཏྟཱ ཨིམསྨིཾ ཝིཉྙཱཎེ’’ཏི། ཝིཉྙཱཎསྨིཾ ཨཏྟཱནཾ སམནུཔསྶཏི། སེཡྻཐཱཔི མཎི ཀརཎྜཀེ པཀྑིཏྟོ ཨསྶ། ཏམེནཾ པུརིསོ ཨེཝཾ ཝདེཡྻ – ‘‘ཨཡཾ མཎི, ཨཡཾ ཀརཎྜཀོ། ཨཉྙོ མཎི, ཨཉྙོ ཀརཎྜཀོ། སོ ཁོ པནཱཡཾ མཎི ཨིམསྨིཾ ཀརཎྜཀེ’’ཏི། ཀརཎྜཀསྨིཾ མཎིཾ སམནུཔསྶཏི། ཨེཝམེཝཾ ཨིདྷེཀཙྩོ རཱུཔཾ… ཝེདནཾ… སཉྙཾ… སངྑཱརེ ཨཏྟཏོ སམནུཔསྶཏི། ཏསྶ ཨེཝཾ ཧོཏི – ‘‘ཨཡཾ ཁོ མེ ཨཏྟཱ། སོ ཁོ པན མེ ཨཡཾ ཨཏྟཱ ཨིམསྨིཾ ཝིཉྙཱཎེ’’ཏི། ཝིཉྙཱཎསྨིཾ ཨཏྟཱནཾ སམནུཔསྶཏི། ཨབྷིནིཝེསཔརཱམཱསོ དིཊྛི། དིཊྛི ན ཝཏྠུ, ཝཏྠུ ན དིཊྛི། ཨཉྙཱ དིཊྛི, ཨཉྙཾ ཝཏྠུ། ཡཱ ཙ དིཊྛི ཡཉྩ ཝཏྠུ – ཨཡཾ ཙཏུཏྠཱ ཝིཉྙཱཎཝཏྠུཀཱ ཨཏྟཱནུདིཊྛི། ཨཏྟཱནུདིཊྛི མིཙྪཱདིཊྛི…པེ॰… ཨིམཱནི སཉྙོཛནཱནི, ན ཙ དིཊྛིཡོ། ཨེཝཾ ཝིཉྙཱཎསྨིཾ ཨཏྟཱནཾ སམནུཔསྶཏི། ཨཏྟཱནུདིཊྛིཡཱ ཨིམེཧི ཝཱིསཏིཡཱ ཨཱཀཱརེཧི ཨབྷིནིཝེསོ ཧོཏི།
Kathaṃ viññāṇasmiṃ attānaṃ samanupassati? Idhekacco rūpaṃ… vedanaṃ… saññaṃ… saṅkhāre attato samanupassati. Tassa evaṃ hoti – ‘‘ayaṃ kho me attā. So kho pana me ayaṃ attā imasmiṃ viññāṇe’’ti. Viññāṇasmiṃ attānaṃ samanupassati. Seyyathāpi maṇi karaṇḍake pakkhitto assa. Tamenaṃ puriso evaṃ vadeyya – ‘‘ayaṃ maṇi, ayaṃ karaṇḍako. Añño maṇi, añño karaṇḍako. So kho panāyaṃ maṇi imasmiṃ karaṇḍake’’ti. Karaṇḍakasmiṃ maṇiṃ samanupassati. Evamevaṃ idhekacco rūpaṃ… vedanaṃ… saññaṃ… saṅkhāre attato samanupassati. Tassa evaṃ hoti – ‘‘ayaṃ kho me attā. So kho pana me ayaṃ attā imasmiṃ viññāṇe’’ti. Viññāṇasmiṃ attānaṃ samanupassati. Abhinivesaparāmāso diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ catutthā viññāṇavatthukā attānudiṭṭhi. Attānudiṭṭhi micchādiṭṭhi…pe… imāni saññojanāni, na ca diṭṭhiyo. Evaṃ viññāṇasmiṃ attānaṃ samanupassati. Attānudiṭṭhiyā imehi vīsatiyā ākārehi abhiniveso hoti.
ཨཏྟཱནུདིཊྛིནིདྡེསོ དུཏིཡོ།
Attānudiṭṭhiniddeso dutiyo.
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཁུདྡཀནིཀཱཡ (ཨཊྛཀཐཱ) • Khuddakanikāya (aṭṭhakathā) / པཊིསམྦྷིདཱམགྒ-ཨཊྛཀཐཱ • Paṭisambhidāmagga-aṭṭhakathā / ༢. ཨཏྟཱནུདིཊྛིནིདྡེསཝཎྞནཱ • 2. Attānudiṭṭhiniddesavaṇṇanā
