| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
12. අත්‌තානුදිට්‌ඨිපහානසුත්‌තං
12. Attānudiṭṭhipahānasuttaṃ
167. අථ ඛො අඤ්‌ඤතරො භික්‌ඛු…පෙ.… එතදවොච – ‘‘කථං නු ඛො , භන්‌තෙ, ජානතො කථං පස්‌සතො අත්‌තානුදිට්‌ඨි පහීයතී’’ති? ‘‘චක්‌ඛුං ඛො, භික්‌ඛු, අනත්‌තතො ජානතො පස්‌සතො අත්‌තානුදිට්‌ඨි පහීයති. රූපෙ අනත්‌තතො ජානතො පස්‌සතො අත්‌තානුදිට්‌ඨි පහීයති. චක්‌ඛුවිඤ්‌ඤාණං අනත්‌තතො ජානතො පස්‌සතො අත්‌තානුදිට්‌ඨි පහීයති. චක්‌ඛුසම්‌ඵස්‌සං අනත්‌තතො ජානතො පස්‌සතො අත්‌තානුදිට්‌ඨි පහීයති. යම්‌පිදං චක්‌ඛුසම්‌ඵස්‌සපච්‌චයා උප්‌පජ්‌ජති වෙදයිතං සුඛං වා දුක්‌ඛං වා අදුක්‌ඛමසුඛං වා තම්‌පි අනත්‌තතො ජානතො පස්‌සතො අත්‌තානුදිට්‌ඨි පහීයති…පෙ.… ජිව්‌හං අනත්‌තතො ජානතො පස්‌සතො අත්‌තානුදිට්‌ඨි පහීයති…පෙ.… මනං අනත්‌තතො ජානතො පස්‌සතො අත්‌තානුදිට්‌ඨි පහීයති. ධම්‌මෙ… මනොවිඤ්‌ඤාණං… මනොසම්‌ඵස්‌සං… යම්‌පිදං මනොසම්‌ඵස්‌සපච්‌චයා උප්‌පජ්‌ජති වෙදයිතං සුඛං වා දුක්‌ඛං වා අදුක්‌ඛමසුඛං වා තම්‌පි අනත්‌තතො ජානතො පස්‌සතො අත්‌තානුදිට්‌ඨි පහීයතී’’ති. ද්‌වාදසමං.
167. Atha kho aññataro bhikkhu…pe… etadavoca – ‘‘kathaṃ nu kho , bhante, jānato kathaṃ passato attānudiṭṭhi pahīyatī’’ti? ‘‘Cakkhuṃ kho, bhikkhu, anattato jānato passato attānudiṭṭhi pahīyati. Rūpe anattato jānato passato attānudiṭṭhi pahīyati. Cakkhuviññāṇaṃ anattato jānato passato attānudiṭṭhi pahīyati. Cakkhusamphassaṃ anattato jānato passato attānudiṭṭhi pahīyati. Yampidaṃ cakkhusamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi anattato jānato passato attānudiṭṭhi pahīyati…pe… jivhaṃ anattato jānato passato attānudiṭṭhi pahīyati…pe… manaṃ anattato jānato passato attānudiṭṭhi pahīyati. Dhamme… manoviññāṇaṃ… manosamphassaṃ… yampidaṃ manosamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi anattato jānato passato attānudiṭṭhi pahīyatī’’ti. Dvādasamaṃ.
නන්‌දික්‌ඛයවග්‌ගො සොළසමො.
Nandikkhayavaggo soḷasamo.
තස්‌සුද්‌දානං –
Tassuddānaṃ –
නන්‌දික්‌ඛයෙන චත්‌තාරො, ජීවකම්‌බවනෙ දුවෙ;
Nandikkhayena cattāro, jīvakambavane duve;
කොට්‌ඨිකෙන තයො වුත්‌තා, මිච්‌ඡා සක්‌කාය අත්‌තනොති.
Koṭṭhikena tayo vuttā, micchā sakkāya attanoti.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 10-12. මිච්‌ඡාදිට්‌ඨිපහානසුත්‌තාදිවණ්‌ණනා • 10-12. Micchādiṭṭhipahānasuttādivaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 10-12. මිච්‌ඡාදිට්‌ඨිපහානසුත්‌තාදිවණ්‌ණනා • 10-12. Micchādiṭṭhipahānasuttādivaṇṇanā
