| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) |
(13) 3. භයවග්‌ගො
(13) 3. Bhayavaggo
1. අත්‌තානුවාදසුත්‌තවණ්‌ණනා
1. Attānuvādasuttavaṇṇanā
121. තතියස්‌ස පඨමෙ අත්‌තානුවාදභයන්‌ති අත්‌තානං අනුවදන්‌තස්‌ස උප්‌පජ්‌ජනකභයං. පරානුවාදභයන්‌ති පරස්‌ස අනුවාදතො උප්‌පජ්‌ජනකභයං. දණ්‌ඩභයන්‌ති ද්‌වත්‌තිංස කම්‌මකාරණා පටිච්‌ච උප්‌පජ්‌ජනකභයං. දුග්‌ගතිභයන්‌ති චත්‌තාරො අපායෙ පටිච්‌ච උප්‌පජ්‌ජනකභයං. ඉදං වුච්‌චති, භික්‌ඛවෙ, අත්‌තානුවාදභයන්‌තිආදීසු අත්‌තානුවාදභයං තාව පච්‌චවෙක්‌ඛන්‌තස්‌ස අජ්‌ඣත්‌තං හිරී සමුට්‌ඨාති, සාස්‌ස තීසු ද්‌වාරෙසු සංවරං ජනෙති, තීසු ද්‌වාරෙසු සංවරො චතුපාරිසුද්‌ධිසීලං හොති. සො තස්‌මිං සීලෙ පතිට්‌ඨාය විපස්‌සනං වඩ්‌ඪෙත්‌වා අග්‌ගඵලෙ පතිට්‌ඨාති. පරානුවාදභයං පන පච්‌චවෙක්‌ඛන්‌තස්‌ස බහිද්‌ධා ඔත්‌තප්‌පං සමුට්‌ඨාති, තදස්‌ස තීසු ද්‌වාරෙසු සංවරං ජනෙති, තීසු ද්‌වාරෙසු සංවරො චතුපාරිසුද්‌ධිසීලං හොති. සො තස්‌මිං සීලෙ පතිට්‌ඨාය විපස්‌සනං වඩ්‌ඪෙත්‌වා අග්‌ගඵලෙ පතිට්‌ඨාති. දුග්‌ගතිභයං පච්‌චවෙක්‌ඛන්‌තස්‌ස අජ්‌ඣත්‌තං හිරී සමුට්‌ඨාති, සාස්‌ස තීසු ද්‌වාරෙසු සංවරං ජනෙති, තීසු ද්‌වාරෙසු සංවරො චතුපාරිසුද්‌ධිසීලං හොති. සො තස්‌මිං සීලෙ පතිට්‌ඨාය විපස්‌සනං වඩ්‌ඪෙත්‌වා අග්‌ගඵලෙ පතිට්‌ඨාති.
121. Tatiyassa paṭhame attānuvādabhayanti attānaṃ anuvadantassa uppajjanakabhayaṃ. Parānuvādabhayanti parassa anuvādato uppajjanakabhayaṃ. Daṇḍabhayanti dvattiṃsa kammakāraṇā paṭicca uppajjanakabhayaṃ. Duggatibhayanti cattāro apāye paṭicca uppajjanakabhayaṃ. Idaṃ vuccati, bhikkhave, attānuvādabhayantiādīsu attānuvādabhayaṃ tāva paccavekkhantassa ajjhattaṃ hirī samuṭṭhāti, sāssa tīsu dvāresu saṃvaraṃ janeti, tīsu dvāresu saṃvaro catupārisuddhisīlaṃ hoti. So tasmiṃ sīle patiṭṭhāya vipassanaṃ vaḍḍhetvā aggaphale patiṭṭhāti. Parānuvādabhayaṃ pana paccavekkhantassa bahiddhā ottappaṃ samuṭṭhāti, tadassa tīsu dvāresu saṃvaraṃ janeti, tīsu dvāresu saṃvaro catupārisuddhisīlaṃ hoti. So tasmiṃ sīle patiṭṭhāya vipassanaṃ vaḍḍhetvā aggaphale patiṭṭhāti. Duggatibhayaṃ paccavekkhantassa ajjhattaṃ hirī samuṭṭhāti, sāssa tīsu dvāresu saṃvaraṃ janeti, tīsu dvāresu saṃvaro catupārisuddhisīlaṃ hoti. So tasmiṃ sīle patiṭṭhāya vipassanaṃ vaḍḍhetvā aggaphale patiṭṭhāti.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 1. අත්‌තානුවාදසුත්‌තං • 1. Attānuvādasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 1. අත්‌තානුවාදසුත්‌තවණ්‌ණනා • 1. Attānuvādasuttavaṇṇanā
