| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
5. அத்தரக்கி²தஸுத்தங்
5. Attarakkhitasuttaṃ
116. ஸாவத்தி²னிதா³னங். ஏகமந்தங் நிஸின்னோ கோ² ராஜா பஸேனதி³ கோஸலோ ப⁴க³வந்தங் ஏதத³வோச – ‘‘இத⁴ மய்ஹங், ப⁴ந்தே, ரஹோக³தஸ்ஸ படிஸல்லீனஸ்ஸ ஏவங் சேதஸோ பரிவிதக்கோ உத³பாதி³ – ‘கேஸங் நு கோ² ரக்கி²தோ அத்தா, கேஸங் அரக்கி²தோ அத்தா’தி? தஸ்ஸ மய்ஹங், ப⁴ந்தே, ஏதத³ஹோஸி – ‘யே கோ² கேசி காயேன து³ச்சரிதங் சரந்தி, வாசாய து³ச்சரிதங் சரந்தி, மனஸா து³ச்சரிதங் சரந்தி; தேஸங் அரக்கி²தோ அத்தா. கிஞ்சாபி தே ஹத்தி²காயோ வா ரக்கெ²ய்ய, அஸ்ஸகாயோ வா ரக்கெ²ய்ய, ரத²காயோ வா ரக்கெ²ய்ய, பத்திகாயோ வா ரக்கெ²ய்ய; அத² கோ² தேஸங் அரக்கி²தோ அத்தா. தங் கிஸ்ஸ ஹேது? பா³ஹிரா ஹேஸா ரக்கா², நேஸா ரக்கா² அஜ்ஜ²த்திகா; தஸ்மா தேஸங் அரக்கி²தோ அத்தா. யே ச கோ² கேசி காயேன ஸுசரிதங் சரந்தி, வாசாய ஸுசரிதங் சரந்தி, மனஸா ஸுசரிதங் சரந்தி; தேஸங் ரக்கி²தோ அத்தா. கிஞ்சாபி தே நேவ ஹத்தி²காயோ ரக்கெ²ய்ய, ந அஸ்ஸகாயோ ரக்கெ²ய்ய, ந ரத²காயோ ரக்கெ²ய்ய , ந பத்திகாயோ ரக்கெ²ய்ய; அத² கோ² தேஸங் ரக்கி²தோ அத்தா. தங் கிஸ்ஸ ஹேது? அஜ்ஜ²த்திகா ஹேஸா ரக்கா², நேஸா ரக்கா² பா³ஹிரா; தஸ்மா தேஸங் ரக்கி²தோ அத்தா’’’தி.
116. Sāvatthinidānaṃ. Ekamantaṃ nisinno kho rājā pasenadi kosalo bhagavantaṃ etadavoca – ‘‘idha mayhaṃ, bhante, rahogatassa paṭisallīnassa evaṃ cetaso parivitakko udapādi – ‘kesaṃ nu kho rakkhito attā, kesaṃ arakkhito attā’ti? Tassa mayhaṃ, bhante, etadahosi – ‘ye kho keci kāyena duccaritaṃ caranti, vācāya duccaritaṃ caranti, manasā duccaritaṃ caranti; tesaṃ arakkhito attā. Kiñcāpi te hatthikāyo vā rakkheyya, assakāyo vā rakkheyya, rathakāyo vā rakkheyya, pattikāyo vā rakkheyya; atha kho tesaṃ arakkhito attā. Taṃ kissa hetu? Bāhirā hesā rakkhā, nesā rakkhā ajjhattikā; tasmā tesaṃ arakkhito attā. Ye ca kho keci kāyena sucaritaṃ caranti, vācāya sucaritaṃ caranti, manasā sucaritaṃ caranti; tesaṃ rakkhito attā. Kiñcāpi te neva hatthikāyo rakkheyya, na assakāyo rakkheyya, na rathakāyo rakkheyya , na pattikāyo rakkheyya; atha kho tesaṃ rakkhito attā. Taṃ kissa hetu? Ajjhattikā hesā rakkhā, nesā rakkhā bāhirā; tasmā tesaṃ rakkhito attā’’’ti.
‘‘ஏவமேதங், மஹாராஜ, ஏவமேதங், மஹாராஜ! யே ஹி கேசி, மஹாராஜ, காயேன து³ச்சரிதங் சரந்தி…பே॰… தேஸங் அரக்கி²தோ அத்தா. தங் கிஸ்ஸ ஹேது? பா³ஹிரா ஹேஸா, மஹாராஜ, ரக்கா², நேஸா ரக்கா² அஜ்ஜ²த்திகா; தஸ்மா தேஸங் அரக்கி²தோ அத்தா. யே ச கோ² கேசி, மஹாராஜ, காயேன ஸுசரிதங் சரந்தி, வாசாய ஸுசரிதங் சரந்தி, மனஸா ஸுசரிதங் சரந்தி; தேஸங் ரக்கி²தோ அத்தா. கிஞ்சாபி தே நேவ ஹத்தி²காயோ ரக்கெ²ய்ய, ந அஸ்ஸகாயோ ரக்கெ²ய்ய, ந ரத²காயோ ரக்கெ²ய்ய, ந பத்திகாயோ ரக்கெ²ய்ய; அத² கோ² தேஸங் ரக்கி²தோ அத்தா. தங் கிஸ்ஸ ஹேது? அஜ்ஜ²த்திகா ஹேஸா, மஹாராஜ, ரக்கா², நேஸா ரக்கா² பா³ஹிரா; தஸ்மா தேஸங் ரக்கி²தோ அத்தா’’தி. இத³மவோச…பே॰…
‘‘Evametaṃ, mahārāja, evametaṃ, mahārāja! Ye hi keci, mahārāja, kāyena duccaritaṃ caranti…pe… tesaṃ arakkhito attā. Taṃ kissa hetu? Bāhirā hesā, mahārāja, rakkhā, nesā rakkhā ajjhattikā; tasmā tesaṃ arakkhito attā. Ye ca kho keci, mahārāja, kāyena sucaritaṃ caranti, vācāya sucaritaṃ caranti, manasā sucaritaṃ caranti; tesaṃ rakkhito attā. Kiñcāpi te neva hatthikāyo rakkheyya, na assakāyo rakkheyya, na rathakāyo rakkheyya, na pattikāyo rakkheyya; atha kho tesaṃ rakkhito attā. Taṃ kissa hetu? Ajjhattikā hesā, mahārāja, rakkhā, nesā rakkhā bāhirā; tasmā tesaṃ rakkhito attā’’ti. Idamavoca…pe…
‘‘காயேன ஸங்வரோ ஸாது⁴, ஸாது⁴ வாசாய ஸங்வரோ;
‘‘Kāyena saṃvaro sādhu, sādhu vācāya saṃvaro;
மனஸா ஸங்வரோ ஸாது⁴, ஸாது⁴ ஸப்³ப³த்த² ஸங்வரோ;
Manasā saṃvaro sādhu, sādhu sabbattha saṃvaro;
ஸப்³ப³த்த² ஸங்வுதோ லஜ்ஜீ, ரக்கி²தோதி பவுச்சதீ’’தி.
Sabbattha saṃvuto lajjī, rakkhitoti pavuccatī’’ti.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 5. அத்தரக்கி²தஸுத்தவண்ணனா • 5. Attarakkhitasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 5. அத்தரக்கி²தஸுத்தவண்ணனா • 5. Attarakkhitasuttavaṇṇanā
