| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৫. অত্তরক্খিতসুত্তং
5. Attarakkhitasuttaṃ
১১৬. সাৰত্থিনিদানং। একমন্তং নিসিন্নো খো রাজা পসেনদি কোসলো ভগৰন্তং এতদৰোচ – ‘‘ইধ ময্হং, ভন্তে, রহোগতস্স পটিসল্লীনস্স এৰং চেতসো পরিৰিতক্কো উদপাদি – ‘কেসং নু খো রক্খিতো অত্তা, কেসং অরক্খিতো অত্তা’তি? তস্স ময্হং, ভন্তে, এতদহোসি – ‘যে খো কেচি কাযেন দুচ্চরিতং চরন্তি, ৰাচায দুচ্চরিতং চরন্তি, মনসা দুচ্চরিতং চরন্তি; তেসং অরক্খিতো অত্তা। কিঞ্চাপি তে হত্থিকাযো ৰা রক্খেয্য, অস্সকাযো ৰা রক্খেয্য, রথকাযো ৰা রক্খেয্য, পত্তিকাযো ৰা রক্খেয্য; অথ খো তেসং অরক্খিতো অত্তা। তং কিস্স হেতু? বাহিরা হেসা রক্খা, নেসা রক্খা অজ্ঝত্তিকা; তস্মা তেসং অরক্খিতো অত্তা। যে চ খো কেচি কাযেন সুচরিতং চরন্তি, ৰাচায সুচরিতং চরন্তি, মনসা সুচরিতং চরন্তি; তেসং রক্খিতো অত্তা। কিঞ্চাপি তে নেৰ হত্থিকাযো রক্খেয্য, ন অস্সকাযো রক্খেয্য, ন রথকাযো রক্খেয্য , ন পত্তিকাযো রক্খেয্য; অথ খো তেসং রক্খিতো অত্তা। তং কিস্স হেতু? অজ্ঝত্তিকা হেসা রক্খা, নেসা রক্খা বাহিরা; তস্মা তেসং রক্খিতো অত্তা’’’তি।
116. Sāvatthinidānaṃ. Ekamantaṃ nisinno kho rājā pasenadi kosalo bhagavantaṃ etadavoca – ‘‘idha mayhaṃ, bhante, rahogatassa paṭisallīnassa evaṃ cetaso parivitakko udapādi – ‘kesaṃ nu kho rakkhito attā, kesaṃ arakkhito attā’ti? Tassa mayhaṃ, bhante, etadahosi – ‘ye kho keci kāyena duccaritaṃ caranti, vācāya duccaritaṃ caranti, manasā duccaritaṃ caranti; tesaṃ arakkhito attā. Kiñcāpi te hatthikāyo vā rakkheyya, assakāyo vā rakkheyya, rathakāyo vā rakkheyya, pattikāyo vā rakkheyya; atha kho tesaṃ arakkhito attā. Taṃ kissa hetu? Bāhirā hesā rakkhā, nesā rakkhā ajjhattikā; tasmā tesaṃ arakkhito attā. Ye ca kho keci kāyena sucaritaṃ caranti, vācāya sucaritaṃ caranti, manasā sucaritaṃ caranti; tesaṃ rakkhito attā. Kiñcāpi te neva hatthikāyo rakkheyya, na assakāyo rakkheyya, na rathakāyo rakkheyya , na pattikāyo rakkheyya; atha kho tesaṃ rakkhito attā. Taṃ kissa hetu? Ajjhattikā hesā rakkhā, nesā rakkhā bāhirā; tasmā tesaṃ rakkhito attā’’’ti.
‘‘এৰমেতং, মহারাজ, এৰমেতং, মহারাজ! যে হি কেচি, মহারাজ, কাযেন দুচ্চরিতং চরন্তি…পে॰… তেসং অরক্খিতো অত্তা। তং কিস্স হেতু? বাহিরা হেসা, মহারাজ, রক্খা, নেসা রক্খা অজ্ঝত্তিকা; তস্মা তেসং অরক্খিতো অত্তা। যে চ খো কেচি, মহারাজ, কাযেন সুচরিতং চরন্তি, ৰাচায সুচরিতং চরন্তি, মনসা সুচরিতং চরন্তি; তেসং রক্খিতো অত্তা। কিঞ্চাপি তে নেৰ হত্থিকাযো রক্খেয্য, ন অস্সকাযো রক্খেয্য, ন রথকাযো রক্খেয্য, ন পত্তিকাযো রক্খেয্য; অথ খো তেসং রক্খিতো অত্তা। তং কিস্স হেতু? অজ্ঝত্তিকা হেসা, মহারাজ, রক্খা, নেসা রক্খা বাহিরা; তস্মা তেসং রক্খিতো অত্তা’’তি। ইদমৰোচ…পে॰…
‘‘Evametaṃ, mahārāja, evametaṃ, mahārāja! Ye hi keci, mahārāja, kāyena duccaritaṃ caranti…pe… tesaṃ arakkhito attā. Taṃ kissa hetu? Bāhirā hesā, mahārāja, rakkhā, nesā rakkhā ajjhattikā; tasmā tesaṃ arakkhito attā. Ye ca kho keci, mahārāja, kāyena sucaritaṃ caranti, vācāya sucaritaṃ caranti, manasā sucaritaṃ caranti; tesaṃ rakkhito attā. Kiñcāpi te neva hatthikāyo rakkheyya, na assakāyo rakkheyya, na rathakāyo rakkheyya, na pattikāyo rakkheyya; atha kho tesaṃ rakkhito attā. Taṃ kissa hetu? Ajjhattikā hesā, mahārāja, rakkhā, nesā rakkhā bāhirā; tasmā tesaṃ rakkhito attā’’ti. Idamavoca…pe…
‘‘কাযেন সংৰরো সাধু, সাধু ৰাচায সংৰরো।
‘‘Kāyena saṃvaro sādhu, sādhu vācāya saṃvaro;
মনসা সংৰরো সাধু, সাধু সব্বত্থ সংৰরো।
Manasā saṃvaro sādhu, sādhu sabbattha saṃvaro;
সব্বত্থ সংৰুতো লজ্জী, রক্খিতোতি পৰুচ্চতী’’তি॥
Sabbattha saṃvuto lajjī, rakkhitoti pavuccatī’’ti.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৫. অত্তরক্খিতসুত্তৰণ্ণনা • 5. Attarakkhitasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৫. অত্তরক্খিতসুত্তৰণ্ণনা • 5. Attarakkhitasuttavaṇṇanā
