| Library / Tipiṭaka / တိပိဋက • Tipiṭaka / ပဋိသမ္ဘိဒာမဂ္ဂပာဠိ • Paṭisambhidāmaggapāḷi |
၁၃. အတ္တဝာဒပဋိသံယုတ္တဒိဋ္ဌိနိဒ္ဒေသော
13. Attavādapaṭisaṃyuttadiṭṭhiniddeso
၁၄၆. အတ္တဝာဒပဋိသံယုတ္တာယ ဒိဋ္ဌိယာ ကတမေဟိ ဝီသတိယာ အာကာရေဟိ အဘိနိဝေသော ဟောတိ? ဣဓ အသ္သုတဝာ ပုထုဇ္ဇနော အရိယာနံ အဒသ္သာဝီ အရိယဓမ္မသ္သ အကောဝိဒော အရိယဓမ္မေ အဝိနီတော သပ္ပုရိသာနံ အဒသ္သာဝီ သပ္ပုရိသဓမ္မသ္သ အကောဝိဒော သပ္ပုရိသဓမ္မေ အဝိနီတော ရူပံ အတ္တတော သမနုပသ္သတိ ရူပဝန္တံ ဝာ အတ္တာနံ အတ္တနိ ဝာ ရူပံ ရူပသ္မိံ ဝာ အတ္တာနံ။ပေ.။ ဝေဒနံ။ သညံ။ သင္ခာရေ။ ဝိညာဏံ အတ္တတော သမနုပသ္သတိ ဝိညာဏဝန္တံ ဝာ အတ္တာနံ အတ္တနိ ဝာ ဝိညာဏံ ဝိညာဏသ္မိံ ဝာ အတ္တာနံ။ပေ.။။
146. Attavādapaṭisaṃyuttāya diṭṭhiyā katamehi vīsatiyā ākārehi abhiniveso hoti? Idha assutavā puthujjano ariyānaṃ adassāvī ariyadhammassa akovido ariyadhamme avinīto sappurisānaṃ adassāvī sappurisadhammassa akovido sappurisadhamme avinīto rūpaṃ attato samanupassati rūpavantaṃ vā attānaṃ attani vā rūpaṃ rūpasmiṃ vā attānaṃ…pe… vedanaṃ… saññaṃ… saṅkhāre… viññāṇaṃ attato samanupassati viññāṇavantaṃ vā attānaṃ attani vā viññāṇaṃ viññāṇasmiṃ vā attānaṃ…pe….
ကထံ ရူပံ အတ္တတော သမနုပသ္သတိ? ဣဓေကစ္စော ပထဝီကသိဏံ။ပေ.။ ဩဒာတကသိဏံ အတ္တတော သမနုပသ္သတိ။ ‘‘ယံ ဩဒာတကသိဏံ, သော အဟံ; ယော အဟံ, တံ ဩဒာတကသိဏ’’န္တိ – ဩဒာတကသိဏဉ္စ အတ္တဉ္စ အဒ္ဝယံ သမနုပသ္သတိ။ သေယ္ယထာပိ တေလပ္ပဒီပသ္သ ဈာယတော ‘‘ယာ အစ္စိ, သော ဝဏ္ဏော; ယော ဝဏ္ဏော, သာ အစ္စီ’’တိ – အစ္စိဉ္စ ဝဏ္ဏဉ္စ အဒ္ဝယံ သမနုပသ္သတိ။ ဧဝမေဝံ ဣဓေကစ္စော ဩဒာတကသိဏံ အတ္တတော သမနုပသ္သတိ။ပေ.။ အယံ ပဌမာ ရူပဝတ္ထုကာ အတ္တဝာဒပဋိသံယုတ္တာ ဒိဋ္ဌိ။ အတ္တဝာဒပဋိသံယုတ္တာ ဒိဋ္ဌိ မိစ္ဆာဒိဋ္ဌိ။ပေ.။ ဣမာနိ သညောဇနာနိ, န စ ဒိဋ္ဌိယော။ ဧဝံ ရူပံ အတ္တတော သမနုပသ္သတိ။ပေ.။ အတ္တဝာဒပဋိသံယုတ္တာယ ဒိဋ္ဌိယာ ဣမေဟိ ဝီသတိယာ အာကာရေဟိ အဘိနိဝေသော ဟောတိ။
Kathaṃ rūpaṃ attato samanupassati? Idhekacco pathavīkasiṇaṃ…pe… odātakasiṇaṃ attato samanupassati. ‘‘Yaṃ odātakasiṇaṃ, so ahaṃ; yo ahaṃ, taṃ odātakasiṇa’’nti – odātakasiṇañca attañca advayaṃ samanupassati. Seyyathāpi telappadīpassa jhāyato ‘‘yā acci, so vaṇṇo; yo vaṇṇo, sā accī’’ti – acciñca vaṇṇañca advayaṃ samanupassati. Evamevaṃ idhekacco odātakasiṇaṃ attato samanupassati…pe… ayaṃ paṭhamā rūpavatthukā attavādapaṭisaṃyuttā diṭṭhi. Attavādapaṭisaṃyuttā diṭṭhi micchādiṭṭhi…pe… imāni saññojanāni, na ca diṭṭhiyo. Evaṃ rūpaṃ attato samanupassati…pe… attavādapaṭisaṃyuttāya diṭṭhiyā imehi vīsatiyā ākārehi abhiniveso hoti.
အတ္တဝာဒပဋိသံယုတ္တဒိဋ္ဌိနိဒ္ဒေသော တေရသမော။
Attavādapaṭisaṃyuttadiṭṭhiniddeso terasamo.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / ခုဒ္ဒကနိကာယ (အဋ္ဌကထာ) • Khuddakanikāya (aṭṭhakathā) / ပဋိသမ္ဘိဒာမဂ္ဂ-အဋ္ဌကထာ • Paṭisambhidāmagga-aṭṭhakathā / ၁၃. အတ္တဝာဒပဋိသံယုတ္တဒိဋ္ဌိနိဒ္ဒေသဝဏ္ဏနာ • 13. Attavādapaṭisaṃyuttadiṭṭhiniddesavaṇṇanā
