| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
232. அட்ட²சீவரமாதிகாகதா²
232. Aṭṭhacīvaramātikākathā
379. இதா³னி ஆஹாதி ஸம்ப³ந்தோ⁴. புக்³க³லாதி⁴ட்டா²னநயேனாதி ‘‘ஸீமாய தே³தீ’’தி கத்துவாசகேன கிரியாபதே³ன தா³யகபுக்³க³லஸங்கா²தகத்துனோ அதி⁴ட்டா²னவஸேன வுத்தத்தா புக்³க³லாதி⁴ட்டா²னேன நயேன. எத்தா²தி ஏதாஸு அட்ட²ஸு மாதிகாஸு. அட்ட²மா மாதிகாதி யோஜனா. தத்தா²தி அட்ட²ஸு மாதிகாஸு. ஸப்³ப³த்தா²தி ஸப்³பே³ஸு ‘‘கதிகாய தே³தீ’’திஆதீ³ஸு.
379. Idāni āhāti sambandho. Puggalādhiṭṭhānanayenāti ‘‘sīmāya detī’’ti kattuvācakena kiriyāpadena dāyakapuggalasaṅkhātakattuno adhiṭṭhānavasena vuttattā puggalādhiṭṭhānena nayena. Etthāti etāsu aṭṭhasu mātikāsu. Aṭṭhamā mātikāti yojanā. Tatthāti aṭṭhasu mātikāsu. Sabbatthāti sabbesu ‘‘katikāya detī’’tiādīsu.
ஸீமாய…பே॰… பா⁴ஜேதப்³ப³ந்திஆதி³ம்ஹி மாதிகானித்³தே³ஸே பன ஏவங் வினிச்ச²யோ வேதி³தப்³போ³தி யோஜனா. ஸீமாய தே³தீதி எத்த² பன்னரஸ ஸீமா வேதி³தப்³பா³தி ஸம்ப³ந்தோ⁴.
Sīmāya…pe… bhājetabbantiādimhi mātikāniddese pana evaṃ vinicchayo veditabboti yojanā. Sīmāya detīti ettha pannarasa sīmā veditabbāti sambandho.
தத்தா²தி பன்னரஸஸு ஸீமாஸு. உபசாரஸீமா பரிச்சி²ன்னா ஹோதீதி ஸம்ப³ந்தோ⁴. எத்தகங் டா²னந்தி பரிக்கே²பாரஹட்டா²னஸ்ஸ ஏகந்தேன அவுத்தத்தா ஏகந்தேன பரிக்கே²பாரஹட்டா²னங் த³ஸ்ஸெந்தோ ஆஹ ‘‘அபிசா’’திஆதி³. து⁴வஸன்னிபாததோ வா கி²பிதானந்தி ஸம்ப³ந்தோ⁴. ‘‘பரியந்தே’’தி பத³ங் புப்³பா³பராபெக்க²ங். தஸ்மா தீஸு நிஸ்ஸக்கபதே³ஸு யோஜேதப்³ப³ங். ஸா பனாதி உபசாரஸீமா பன. பி⁴க்கூ²ஸு வட்³ட⁴ந்தேஸு ஆவாஸோபி வட்³ட⁴தீதி மனஸிகத்வா வுத்தங் ‘‘பி⁴க்கூ²ஸு வட்³ட⁴ந்தேஸூ’’தி. ஸப்³பே³ஸங் பி⁴க்கூ²னந்தி ஸம்ப³ந்தோ⁴. வுத்தமேவாதி ஸீமகதா²யங் (மஹாவ॰ அட்ட²॰ 138, 144) வுத்தமேவ.
Tatthāti pannarasasu sīmāsu. Upacārasīmā paricchinnā hotīti sambandho. Ettakaṃ ṭhānanti parikkhepārahaṭṭhānassa ekantena avuttattā ekantena parikkhepārahaṭṭhānaṃ dassento āha ‘‘apicā’’tiādi. Dhuvasannipātato vā khipitānanti sambandho. ‘‘Pariyante’’ti padaṃ pubbāparāpekkhaṃ. Tasmā tīsu nissakkapadesu yojetabbaṃ. Sā panāti upacārasīmā pana. Bhikkhūsu vaḍḍhantesu āvāsopi vaḍḍhatīti manasikatvā vuttaṃ ‘‘bhikkhūsu vaḍḍhantesū’’ti. Sabbesaṃ bhikkhūnanti sambandho. Vuttamevāti sīmakathāyaṃ (mahāva. aṭṭha. 138, 144) vuttameva.
அபிச கோ²தி எத்த² அபிஸத்³தோ³ புச்ச²த்த²வாசகோ. கேஹி ட²பிதாதி ஹி அத்தோ². ராஜராஜமஹாமத்தா ட²பெந்தீதி ஸம்ப³ந்தோ⁴. லாப⁴ஸீமாதி லாப⁴ஸ்ஸ மரியாதோ³. யந்தி யோ லாபோ⁴. எத்த²ந்தரேதி ஏதஸ்மிங் கா³வுதாதி³அந்தரே. லாப⁴ஸீமா நாமாதி லாபே⁴ன பரிச்சி²ன்னா ஸீமா நாம. தத்தா²தி ப³ஹூஸு ஜனபதே³ஸு. அந்தரதீ³பா சாதி மஹாதீ³பதோ அஞ்ஞதீ³பா ச, கு²த்³த³கதீ³பாதி அதி⁴ப்பாயோ.
Apica khoti ettha apisaddo pucchatthavācako. Kehi ṭhapitāti hi attho. Rājarājamahāmattā ṭhapentīti sambandho. Lābhasīmāti lābhassa mariyādo. Yanti yo lābho. Etthantareti etasmiṃ gāvutādiantare. Lābhasīmā nāmāti lābhena paricchinnā sīmā nāma. Tatthāti bahūsu janapadesu. Antaradīpā cāti mahādīpato aññadīpā ca, khuddakadīpāti adhippāyo.
எத்தே²வ ஸீமாயாதி க²ண்ட³ஸீமாய ஏவ. தேஸங்யேவாதி க²ண்ட³ஸீமக³தானங்யேவ. ஏவத்த²ப²லங் த³ஸ்ஸெந்தோ ஆஹ ‘‘அஞ்ஞேஸ’’ந்திஆதி³. ருக்கே² வா பப்³ப³தே வா டி²தஸ்ஸ வா ஹெட்டா² பத²வீமஜ்ஜ²க³தஸ்ஸ வா பி⁴க்கு²ஸ்ஸாதி யோஜனா. இமிஸ்ஸா உபசாரஸீமாய டி²தஸ்ஸாதி ஸம்ப³ந்தோ⁴. ஸமானஸங்வாஸஸீமாயாதி மஹாஸீமாய. க²ண்ட³ஸீமஸீமந்தரிகாஸூதி க²ண்ட³ஸீமாயஞ்ச த்³வின்னங் ஸீமானங் ஸீமந்தரிகாயஞ்ச. தத்த² த்³வின்னங் கா³மட்டா²னம்பி பாபுணாதி. அவிப்பவாஸஸீமாய தி³ன்னங் கா³மட்டா²னங் ந பாபுணாதி ‘‘ட²பெத்வா கா³மஞ்ச கா³மூபசாரஞ்சா’’தி வுத்தத்தா.
Ettheva sīmāyāti khaṇḍasīmāya eva. Tesaṃyevāti khaṇḍasīmagatānaṃyeva. Evatthaphalaṃ dassento āha ‘‘aññesa’’ntiādi. Rukkhe vā pabbate vā ṭhitassa vā heṭṭhā pathavīmajjhagatassa vā bhikkhussāti yojanā. Imissā upacārasīmāya ṭhitassāti sambandho. Samānasaṃvāsasīmāyāti mahāsīmāya. Khaṇḍasīmasīmantarikāsūti khaṇḍasīmāyañca dvinnaṃ sīmānaṃ sīmantarikāyañca. Tattha dvinnaṃ gāmaṭṭhānampi pāpuṇāti. Avippavāsasīmāya dinnaṃ gāmaṭṭhānaṃ na pāpuṇāti ‘‘ṭhapetvā gāmañca gāmūpacārañcā’’ti vuttattā.
ஜம்பு³யா லக்கி²தோ தீ³போ ஜம்பு³தீ³போ. தம்போ³ லோஹிதோ பாணி ஹத்தோ² ஏதேஸந்தி தம்ப³பாணினோ. விஜயகுமாராத³யோ ஸத்தஸதா ஜனா. தேஸங் நிவாஸோ தம்ப³பண்ணி, ஸோயேவ தீ³போதி தம்ப³பண்ணிதீ³போ, தஸ்மிங். ஸப்³பே³ஸங் பா⁴க³ந்தி ஸம்ப³ந்தோ⁴. தத்ரேவாதி ஜம்பு³தீ³பேயேவ. ஏவந்திஆதி³ நிக³மனங்.
Jambuyā lakkhito dīpo jambudīpo. Tambo lohito pāṇi hattho etesanti tambapāṇino. Vijayakumārādayo sattasatā janā. Tesaṃ nivāso tambapaṇṇi, soyeva dīpoti tambapaṇṇidīpo, tasmiṃ. Sabbesaṃ bhāganti sambandho. Tatrevāti jambudīpeyeva. Evantiādi nigamanaṃ.
யோ பன ப⁴ணதீதி ஸம்ப³ந்தோ⁴. ததோதி கத²னதோ, பரந்தி ஸம்ப³ந்தோ⁴. நந்தி மஹாஸிவத்தே²ரங். தியோஜனாபீதி பிஸத்³தோ³ ததோ ஊனாபி ஹோதீதி த³ஸ்ஸேதி. ஸப்³ப³ங்பேதந்தி ஸப்³ப³ங்பி ஏதங் லாப⁴க³ண்ஹனாதி³ங். இதி ஆஹங்ஸூதி யோஜனா.
Yo pana bhaṇatīti sambandho. Tatoti kathanato, paranti sambandho. Nanti mahāsivattheraṃ. Tiyojanāpīti pisaddo tato ūnāpi hotīti dasseti. Sabbaṃpetanti sabbaṃpi etaṃ lābhagaṇhanādiṃ. Iti āhaṃsūti yojanā.
கதிகானங் யதி²ச்சி²தகதேன பவத்தத்தா ப³ஹு ஹோதி, தஸ்மா இத⁴ இச்சி²தகதிகங் த³ஸ்ஸேதுங் வுத்தங் ‘‘ஸமானலாப⁴கதிகாயா’’தி . தத்ராதி ‘‘கதிகாய தே³தீ’’தி பாடே². ஸன்னிபதிதேஹி பி⁴க்கூ²ஹி பா⁴ஜேதப்³ப³ந்தி ஸம்ப³ந்தோ⁴. தஸ்ஸாதி விஹாரஸ்ஸ. பு³த்³தா⁴தி⁴வுத்தோ²தி பு³த்³தே⁴ன அதி⁴ இஸ்ஸரவஸேன வஸியித்தா²தி பு³த்³தா⁴தி⁴வுத்தோ². எத்தாவதாதி எத்தகேன ஸாவனமத்தேன. நிஸின்னோவாதி நிஸின்னோ ஏவ ஹோதி, நிஸின்னோ இவ வா. தஸ்மிங் விஹாரேபீதி தஸ்மிங் போராணகாதி³விஹாரேபி. ஏவமேவாதி ‘‘அயங் போராணகோ விஹாரோ தேன நவவிஹாரேன ஸத்³தி⁴ங் ஸமானலாப⁴ங் காதுங் ஸங்க⁴ஸ்ஸ ருச்சதீ’’திஆதி³னா ஏவமேவ. இதா⁴தி போராணகவிஹாரே. தஸ்மிந்தி நவவிஹாரே. ஏவந்தி யதா² ஏகேன விஹாரேன ஸத்³தி⁴ங் ஏகோ விஹாரோ காதப்³போ³, ஏவங் ததா²தி அத்தோ².
Katikānaṃ yathicchitakatena pavattattā bahu hoti, tasmā idha icchitakatikaṃ dassetuṃ vuttaṃ ‘‘samānalābhakatikāyā’’ti . Tatrāti ‘‘katikāya detī’’ti pāṭhe. Sannipatitehi bhikkhūhi bhājetabbanti sambandho. Tassāti vihārassa. Buddhādhivutthoti buddhena adhi issaravasena vasiyitthāti buddhādhivuttho. Ettāvatāti ettakena sāvanamattena. Nisinnovāti nisinno eva hoti, nisinno iva vā. Tasmiṃ vihārepīti tasmiṃ porāṇakādivihārepi. Evamevāti ‘‘ayaṃ porāṇako vihāro tena navavihārena saddhiṃ samānalābhaṃ kātuṃ saṅghassa ruccatī’’tiādinā evameva. Idhāti porāṇakavihāre. Tasminti navavihāre. Evanti yathā ekena vihārena saddhiṃ eko vihāro kātabbo, evaṃ tathāti attho.
பி⁴க்கா²பஞ்ஞத்தியாதி எத்த² பி⁴க்கா² பஞ்ஞபியதி நிச்சவஸேன ட²பியதி எத்தா²தி பி⁴க்கா²பஞ்ஞத்தீதி த³ஸ்ஸெந்தோ ஆஹ ‘‘அத்தனோ பரிச்சாக³பஞ்ஞாபனட்டா²னே’’தி. தஸ்ஸாதி ‘‘யத்த² ஸங்க⁴ஸ்ஸ து⁴வகாரா கரியந்தீ’’திபாட²ஸ்ஸ. அத்தோ² ஏவங் வேதி³தப்³போ³தி யோஜனா. யத்த² வாதி யஸ்மிங் வா டா²னே. அனேனாதி சீவரதா³யகேன. ஸலாகப⁴த்தாதீ³னி வா நிப³த்³தா⁴னி காரிதானீதி ஸம்ப³ந்தோ⁴. யேன பனாதி சீவரதா³யகேன பன. ஸகலோபி விஹாரோதி ஸகலோபி ஸஆராமோ விஹாரோ. தத்தா²தி சீவரதா³யகே. இமேதி பாகவத்தஸ்ஸ வத்தனட்டா²னாத³யோ விஹாரா. து⁴வேன கரியந்தீதி து⁴வகாரா விஹாரா. ஸோதி சீவரதா³யகோ. யத்தா²தி யஸ்மிங் டா²னே. ஸப்³ப³த்தா²தி ஸப்³பே³ஸு ப³ஹூஸு விஹாரேஸு.
Bhikkhāpaññattiyāti ettha bhikkhā paññapiyati niccavasena ṭhapiyati etthāti bhikkhāpaññattīti dassento āha ‘‘attano pariccāgapaññāpanaṭṭhāne’’ti. Tassāti ‘‘yattha saṅghassa dhuvakārā kariyantī’’tipāṭhassa. Attho evaṃ veditabboti yojanā. Yattha vāti yasmiṃ vā ṭhāne. Anenāti cīvaradāyakena. Salākabhattādīni vā nibaddhāni kāritānīti sambandho. Yena panāti cīvaradāyakena pana. Sakalopi vihāroti sakalopi saārāmo vihāro. Tatthāti cīvaradāyake. Imeti pākavattassa vattanaṭṭhānādayo vihārā. Dhuvena kariyantīti dhuvakārā vihārā. Soti cīvaradāyako. Yatthāti yasmiṃ ṭhāne. Sabbatthāti sabbesu bahūsu vihāresu.
தேஹீதி ப³ஹுதரேஹி பி⁴க்கூ²ஹி. து⁴வகாரேஸூதி நித்³தா⁴ரணே பு⁴ம்மங். ஏகத்தா²தி ஏகஸ்மிங் து⁴வகாரே. ‘‘ஸசே பி⁴க்கு²க³ணனாய க³ண்ஹதா²தி வத³தீ’’தி இமினா ஸசே ந வத³தி, பி⁴க்கு²க³ணனாய பா⁴ஜெத்வா க³ண்ஹிதுங் ந வட்டதீதி த³ஸ்ஸேதி, விஹாரக³ணனாய க³ண்ஹிதுங் வட்டதீதி அதி⁴ப்பாயோ. ததா²தி யதா² ‘‘பி⁴க்கு²க³ணனாய க³ண்ஹதா²’’தி வத³தி, ததா²தி அத்தோ². எத்தா²தி பா⁴ஜேதப்³ப³வத்தூ²ஸு. தந்தி மஞ்சபீட²கங், புச்சி²த்வா தா³தப்³ப³ந்தி ஸம்ப³ந்தோ⁴. புச்சி²த்வாதி தா³யகங் புச்சி²த்வா, வத³தீதி தா³யகோ வத³தி. ஸங்க⁴ஸ்ஸாபீதி பிஸத்³தோ³ ந தா³யகஸ்ஸேவாதி த³ஸ்ஸேதி.
Tehīti bahutarehi bhikkhūhi. Dhuvakāresūti niddhāraṇe bhummaṃ. Ekatthāti ekasmiṃ dhuvakāre. ‘‘Sace bhikkhugaṇanāya gaṇhathāti vadatī’’ti iminā sace na vadati, bhikkhugaṇanāya bhājetvā gaṇhituṃ na vaṭṭatīti dasseti, vihāragaṇanāya gaṇhituṃ vaṭṭatīti adhippāyo. Tathāti yathā ‘‘bhikkhugaṇanāya gaṇhathā’’ti vadati, tathāti attho. Etthāti bhājetabbavatthūsu. Tanti mañcapīṭhakaṃ, pucchitvā dātabbanti sambandho. Pucchitvāti dāyakaṃ pucchitvā, vadatīti dāyako vadati. Saṅghassāpīti pisaddo na dāyakassevāti dasseti.
உபசாரஸீமாயங் டி²தேன ஸங்கே⁴ன பா⁴ஜேதப்³ப³ந்தி ஸம்ப³ந்தோ⁴ . ஸீமட்ட²ஸ்ஸாதி உபசாரஸீமாயங் டி²தஸ்ஸ. அஸம்பத்தஸ்ஸாபீதி பா⁴ஜனட்டா²னங் அஸம்பத்தஸ்ஸாபி. அலஸஜாதிகாதி கோஸஜ்ஜஜாதிகா. டி²திகாதி பப³ந்த⁴வஸேன டி²யதே டி²தி, ஸாயேவ டி²திகா. அத² வா ‘‘டி²தட்டா²னதோ பட்டா²ய தா³தப்³ப³’’ந்தி அட்ட²கதா²யங் (மஹாவ॰ அட்ட²॰ 379) வுத்தத்தா திட்ட²தி பப³ந்த⁴வஸேன எத்தா²தி டி²தி, ஸாயேவ டி²திகாதி வசனத்தோ² காதப்³போ³. டி²திகங் ட²பெத்வாதி வீஸதிவஸ்ஸஸங்கா²தங் டி²திகங் ட²பெத்வா. தேஸந்தி தே²ரானங்.
Upacārasīmāyaṃ ṭhitena saṅghena bhājetabbanti sambandho . Sīmaṭṭhassāti upacārasīmāyaṃ ṭhitassa. Asampattassāpīti bhājanaṭṭhānaṃ asampattassāpi. Alasajātikāti kosajjajātikā. Ṭhitikāti pabandhavasena ṭhiyate ṭhiti, sāyeva ṭhitikā. Atha vā ‘‘ṭhitaṭṭhānato paṭṭhāya dātabba’’nti aṭṭhakathāyaṃ (mahāva. aṭṭha. 379) vuttattā tiṭṭhati pabandhavasena etthāti ṭhiti, sāyeva ṭhitikāti vacanattho kātabbo. Ṭhitikaṃ ṭhapetvāti vīsativassasaṅkhātaṃ ṭhitikaṃ ṭhapetvā. Tesanti therānaṃ.
ஸம்பத்தஸம்பத்தானந்தி பா⁴ஜனட்டா²னங் ஸம்பத்தஸம்பத்தானங். அத்தனோ விஹாரத்³வாரே வா அத்தனோ அந்தோவிஹாரேயேவ வாதி யோஜனா. ஸீமாதி உபசாரஸீமா. தே²ராஸனங் ஆரூள்ஹே ஸதீதி யோஜனா. வஸ்ஸக்³கே³னாதி வஸ்ஸக³ணனாய.
Sampattasampattānanti bhājanaṭṭhānaṃ sampattasampattānaṃ. Attano vihāradvāre vā attano antovihāreyeva vāti yojanā. Sīmāti upacārasīmā. Therāsanaṃ ārūḷhe satīti yojanā. Vassaggenāti vassagaṇanāya.
பாடேக்கந்தி பச்சேகங். ஸப்³பா³னேவ சீவரானீதி ஸம்ப³ந்தோ⁴. து³ப்³பா⁴ஸிதது³க்³க³ஹிதானமத்த²ங் த³ஸ்ஸெந்தோ ஆஹ ‘‘க³தக³தட்டா²னே ஸங்கி⁴கானேவ ஹொந்தீ’’தி. ஏகந்தி த³ஸஸு வத்தே²ஸு ஏகங்.
Pāṭekkanti paccekaṃ. Sabbāneva cīvarānīti sambandho. Dubbhāsitaduggahitānamatthaṃ dassento āha ‘‘gatagataṭṭhāne saṅghikāneva hontī’’ti. Ekanti dasasu vatthesu ekaṃ.
வத்த²ஸ்ஸேவ புப்ப²ங் வா வலி வா அத்தீ²தி யோஜனா. தேனாதி புப்ப²வலினா. ஏகங் தந்தந்தி ஏகங் ஸுத்தங். தத்தா²தி தேஸு டி²திகாய டா²னாட்டா²னேஸு. த்³வீஹிபி க³ஹேதப்³ப³ங் டி²திகாய அபா⁴வதோ.
Vatthasseva pupphaṃ vā vali vā atthīti yojanā. Tenāti pupphavalinā. Ekaṃ tantanti ekaṃ suttaṃ. Tatthāti tesu ṭhitikāya ṭhānāṭṭhānesu. Dvīhipi gahetabbaṃ ṭhitikāya abhāvato.
பி⁴க்கு² அத்தனோ ஸந்தகங் யங் சீவரந்தி யோஜனா. பங்ஸுகூலிகானம்பி வட்டதீதி ‘‘ஸங்க⁴ஸ்ஸ தே³மா’’தி வா ‘‘துய்ஹங் தே³மா’’தி வா அவத்வா ‘‘பி⁴க்கூ²னங் தே³ம, தே²ரானங் தே³மா’’தி வுத்தத்தா பங்ஸுகூலிகானம்பி வட்டதி. பி⁴க்கு²தே²ரா நாம ஹி ந அத்தனாயேவ ஹொந்தி, அஞ்ஞேபி ப³ஹூ, தஸ்மா வட்டதி. ‘‘ஸங்க⁴ஸ்ஸா’’தி வுத்தே அத்தனா ஏகந்தேன ஸங்கோ⁴யேவ, தஸ்மா ‘‘ஸங்க⁴ஸ்ஸா’’தி வுத்தேபி ந வட்டதி, பகே³வ ‘‘துய்ஹ’’ந்தி வுத்தே.
Bhikkhu attano santakaṃ yaṃ cīvaranti yojanā. Paṃsukūlikānampi vaṭṭatīti ‘‘saṅghassa demā’’ti vā ‘‘tuyhaṃ demā’’ti vā avatvā ‘‘bhikkhūnaṃ dema, therānaṃ demā’’ti vuttattā paṃsukūlikānampi vaṭṭati. Bhikkhutherā nāma hi na attanāyeva honti, aññepi bahū, tasmā vaṭṭati. ‘‘Saṅghassā’’ti vutte attanā ekantena saṅghoyeva, tasmā ‘‘saṅghassā’’ti vuttepi na vaṭṭati, pageva ‘‘tuyha’’nti vutte.
ததோதி ப³ஹுவத்த²தோ. க³ஹேதுங் ந வட்டதீதி பங்ஸுகூலிகானங் க³ஹேதுங் ந வட்டதி.
Tatoti bahuvatthato. Gahetuṃ na vaṭṭatīti paṃsukūlikānaṃ gahetuṃ na vaṭṭati.
யந்தி வத்த²ங். தத்தா²தி பரிக்கா²ரேஸு. ஸுத்தந்தி தந்தங்.
Yanti vatthaṃ. Tatthāti parikkhāresu. Suttanti tantaṃ.
ஏவங் அந்தோஸீமங் பவிஸித்வா ‘‘ஸங்க⁴ஸ்ஸ தே³மா’’தி தி³ன்னே வினிச்ச²யங் த³ஸ்ஸெத்வா ப³ஹிஸீமாய தி³ன்னே தங் த³ஸ்ஸெந்தோ ஆஹ ‘‘ஸசே பனா’’திஆதி³. ஏகப³த்³தா⁴ சாதி த்³வாத³ஸஹத்த²மனதிக்கமித்வா ஏகதோப³த்³தா⁴ ச. யே பனாதி பி⁴க்கூ² பன.
Evaṃ antosīmaṃ pavisitvā ‘‘saṅghassa demā’’ti dinne vinicchayaṃ dassetvā bahisīmāya dinne taṃ dassento āha ‘‘sace panā’’tiādi. Ekabaddhā cāti dvādasahatthamanatikkamitvā ekatobaddhā ca. Ye panāti bhikkhū pana.
உப⁴தோஸங்க⁴ஸ்ஸ தே³தீதி எத்த² சதுன்னங் வாக்யானங் வஸேன வுத்தேபி உப⁴தோஸங்க⁴ஸ்ஸ தே³தியேவ நாமாதி த³ஸ்ஸெந்தோ ஆஹ ‘‘உப⁴தோஸங்க⁴ஸ்ஸ த³ம்மீதி வுத்தேபீ’’திஆதி³. உப⁴தோஸங்க⁴க்³க³ஹணேன க³ஹிதத்தாதி புக்³க³லஸ்ஸ உப⁴தோஸங்க⁴க்³க³ஹணேன க³ஹிதத்தா. ‘‘ஏஸேவ நயோ’’தி இமினா ஏகவீஸதிபடிவீஸே கத்வா ஏகோ சேதியஸ்ஸ தா³தப்³போ³தி நயங் அதிதி³ஸதி. பாபுணனகொட்டா²ஸோ நாம நத்தி² சேதியஸ்ஸ உப⁴தோஸங்க⁴க்³க³ஹணேன அக³ஹிதத்தா.
Ubhatosaṅghassa detīti ettha catunnaṃ vākyānaṃ vasena vuttepi ubhatosaṅghassa detiyeva nāmāti dassento āha ‘‘ubhatosaṅghassa dammīti vuttepī’’tiādi. Ubhatosaṅghaggahaṇena gahitattāti puggalassa ubhatosaṅghaggahaṇena gahitattā. ‘‘Eseva nayo’’ti iminā ekavīsatipaṭivīse katvā eko cetiyassa dātabboti nayaṃ atidisati. Pāpuṇanakoṭṭhāso nāma natthi cetiyassa ubhatosaṅghaggahaṇena agahitattā.
தத்தா²தி உப⁴தோஸங்க⁴புக்³க³லசேதியேஸு. ஸேஸங் ஸுவிஞ்ஞெய்யமேவ.
Tatthāti ubhatosaṅghapuggalacetiyesu. Sesaṃ suviññeyyameva.
புப்³பே³தி பு³த்³த⁴ஸ்ஸ ப⁴க³வதோ த⁴ரமானகாலே. ததா³தி யதா³ பு³த்³தோ⁴ ப⁴க³வா த⁴ரதி, ததா³. படிமங் வாதி படிபி³ம்ப³ங் வா. தஞ்ஹி ப⁴க³வதா படி ஸதி³ஸங் மானீயதீதி படிமாதி வுச்சதி. சேதியங் வாதி தூ²பங் வா. ஸோ ஹி தே³வமனுஸ்ஸேஹி சிதிதப்³ப³ங், பூஜேதப்³ப³ங், இட்ட²காதீ³ஹி வா சினிதப்³ப³ந்தி சேதியந்தி வுச்சதி. தத்தா²தி தெ³ய்யத⁴ம்மேஸு. யந்தி கிரியாபராமஸனங். யங் தெ³ந்தீதி யோஜனா. தத்தா²தி தஸ்மிங் தா³னே. அனியமவாசகஸ்ஸ ‘‘யோ’’தி ஸப்³ப³னாமஸ்ஸ அத்த²ங் த³ஸ்ஸெந்தோ ஆஹ ‘‘பப்³ப³ஜிதோ வா க³ஹட்டோ² வா’’தி. வத்தங் கத்வா பரிபு⁴ஞ்ஜிதுந்தி புப்³ப³காலஅபரகாலகிரியானங் விகாரவஸேன அனியதத்தா வுத்தங் ‘‘பு⁴ஞ்ஜித்வா பச்சா²பி வத்தங் காது’’ந்தி.
Pubbeti buddhassa bhagavato dharamānakāle. Tadāti yadā buddho bhagavā dharati, tadā. Paṭimaṃ vāti paṭibimbaṃ vā. Tañhi bhagavatā paṭi sadisaṃ mānīyatīti paṭimāti vuccati. Cetiyaṃ vāti thūpaṃ vā. So hi devamanussehi cititabbaṃ, pūjetabbaṃ, iṭṭhakādīhi vā cinitabbanti cetiyanti vuccati. Tatthāti deyyadhammesu. Yanti kiriyāparāmasanaṃ. Yaṃ dentīti yojanā. Tatthāti tasmiṃ dāne. Aniyamavācakassa ‘‘yo’’ti sabbanāmassa atthaṃ dassento āha ‘‘pabbajito vā gahaṭṭho vā’’ti. Vattaṃ katvā paribhuñjitunti pubbakālaaparakālakiriyānaṃ vikāravasena aniyatattā vuttaṃ ‘‘bhuñjitvā pacchāpi vattaṃ kātu’’nti.
‘‘தூ³ரம்பி ஹரித்வா பூஜேதப்³ப³’’ந்தி இமினா ஜங்க⁴பேஸனிககம்மங் ந ஹோதீதி த³ஸ்ஸேதி. ஹரந்தஸ்ஸ பி⁴க்கு²னோதி ஸம்ப³ந்தோ⁴. க³ச்ச²தோதி அனாத³ரே ஸாமிவசனங். தந்தி ஸங்க⁴ஸ்ஸ ஆஹடப⁴த்தங்.
‘‘Dūrampi haritvā pūjetabba’’nti iminā jaṅghapesanikakammaṃ na hotīti dasseti. Harantassa bhikkhunoti sambandho. Gacchatoti anādare sāmivacanaṃ. Tanti saṅghassa āhaṭabhattaṃ.
வஸ்ஸங்வுத்த²ஸங்க⁴ஸ்ஸாதி வஸ்ஸங் வஸித்தா²தி வஸ்ஸங்வுத்தோ². அலுத்தகிதந்தஸமாஸோயங், ஸோயேவ ஸங்கோ⁴ வஸ்ஸங்வுத்த²ஸங்கோ⁴, தஸ்ஸ. யாவதிகஸத்³தோ³ யத்தகபரியாயோதி ஆஹ ‘‘யத்தகா’’தி. தி³ஸாபக்கந்தஸ்ஸாபீதி அஞ்ஞங் தி³ஸங் பக்கந்தஸ்ஸபி, தா³தப்³ப³ந்தி ஸம்ப³ந்தோ⁴. வத³ந்தீதி அட்ட²கதா²சரியேஹி அபரே ஆசரியா வத³ந்தி. ஏதந்தி வசனங்.
Vassaṃvutthasaṅghassāti vassaṃ vasitthāti vassaṃvuttho. Aluttakitantasamāsoyaṃ, soyeva saṅgho vassaṃvutthasaṅgho, tassa. Yāvatikasaddo yattakapariyāyoti āha ‘‘yattakā’’ti. Disāpakkantassāpīti aññaṃ disaṃ pakkantassapi, dātabbanti sambandho. Vadantīti aṭṭhakathācariyehi apare ācariyā vadanti. Etanti vacanaṃ.
ஸம்பத்தானந்தி தி³ன்னட்டா²னங் ஸம்பத்தானங். ஸப்³பே³ஸந்தி யத்த² கத்த²சி வுத்த²வஸ்ஸானங் ஸப்³பே³ஸங். தத்ராதி விஹாரே. தத்ராதி தஸ்மிங் வத³னே ஸதி, தேஸு பி⁴க்கூ²ஸு வா. வஸ்ஸங் வஸந்தீதி வஸ்ஸங்வஸந்தா, தேஸங். சீவரமாஸேதி சீவரேன லக்கி²தே பச்சி²மகத்திகமாஸே.
Sampattānanti dinnaṭṭhānaṃ sampattānaṃ. Sabbesanti yattha katthaci vutthavassānaṃ sabbesaṃ. Tatrāti vihāre. Tatrāti tasmiṃ vadane sati, tesu bhikkhūsu vā. Vassaṃ vasantīti vassaṃvasantā, tesaṃ. Cīvaramāseti cīvarena lakkhite pacchimakattikamāse.
ஹேமந்தஸ்ஸ பச்சி²மோ தி³வஸோதி ப²க்³கு³ணபுண்ணமீஸங்கா²தோ ஹேமந்தஸ்ஸ பச்சி²மோ தி³வஸோ. வஸ்ஸாவாஸிகந்தி வஸ்ஸங் ஆவஸந்தானங் தா³தப்³ப³ங் சீவரங். ஆரோபேதப்³பா³காரங் த³ஸ்ஸெந்தோ ஆஹ ‘‘அதீதவஸ்ஸாவாஸஸ்ஸா’’திஆதி³. தத்த² அதீதவஸ்ஸாவாஸஸ்ஸாதி அதீதவஸ்ஸங், அதீதவஸ்ஸே வா ஆவாஸஸ்ஸ ஸங்க⁴ஸ்ஸ. தந்தி சீவரங்.
Hemantassa pacchimo divasoti phagguṇapuṇṇamīsaṅkhāto hemantassa pacchimo divaso. Vassāvāsikanti vassaṃ āvasantānaṃ dātabbaṃ cīvaraṃ. Āropetabbākāraṃ dassento āha ‘‘atītavassāvāsassā’’tiādi. Tattha atītavassāvāsassāti atītavassaṃ, atītavasse vā āvāsassa saṅghassa. Tanti cīvaraṃ.
ட²பெத்வாதி விஹாரே ட²பெத்வா. ஸம்பத்தானந்தி இமங் டா²னங் ஸம்பத்தானங். இதோதி சீவரதா³னகாலதோ. தேதி அந்தோவஸ்ஸே வுத்த²பி⁴க்கூ².
Ṭhapetvāti vihāre ṭhapetvā. Sampattānanti imaṃ ṭhānaṃ sampattānaṃ. Itoti cīvaradānakālato. Teti antovasse vutthabhikkhū.
ஆதி³ஸ்ஸாதி பத³ஸ்ஸ த்வாபச்சயந்தபா⁴வங் த³ஸ்ஸெந்தோ ஆஹ ‘‘ஆதி³ஸித்வா’’தி. அயமத்தோ² வேதி³தப்³போ³தி யோஜனா. தத்ராதி ‘‘யாகு³யா வா’’திஆதி³பாடே². அஜ்ஜதனாய வாதி அஜ்ஜ ப⁴வானங் புஞ்ஞானங் அத்தா²ய வா. தேஸந்தி நிமந்தகானங், பவிட்டா²னங் பி⁴க்கூ²னந்தி ஸம்ப³ந்தோ⁴. யேஹி நிமந்திதேஹீதி நிமந்திதேஹி யேஹி பி⁴க்கூ²ஹி. யேஸங் வா பத்தந்தி ஸம்ப³ந்தோ⁴. தேஸங் ந பாபுணாதீதி ஸப்³பே³ஸங் தேஸங் ந பாபுணாதி, கஸ்மா? அனிமந்திதத்தா. தேஸங் ந பாபுணந்தி, கஸ்மா? நிமந்திதகே³ஹங் அபவிட்ட²த்தா. ஸோதி தா³யகோ.
Ādissāti padassa tvāpaccayantabhāvaṃ dassento āha ‘‘ādisitvā’’ti. Ayamattho veditabboti yojanā. Tatrāti ‘‘yāguyā vā’’tiādipāṭhe. Ajjatanāya vāti ajja bhavānaṃ puññānaṃ atthāya vā. Tesanti nimantakānaṃ, paviṭṭhānaṃ bhikkhūnanti sambandho. Yehi nimantitehīti nimantitehi yehi bhikkhūhi. Yesaṃ vā pattanti sambandho. Tesaṃ na pāpuṇātīti sabbesaṃ tesaṃ na pāpuṇāti, kasmā? Animantitattā. Tesaṃ na pāpuṇanti, kasmā? Nimantitagehaṃ apaviṭṭhattā. Soti dāyako.
புப்³பே³பீதி இதோ புப்³பே³பி. அஸ்ஸாதி தா³யகஸ்ஸ. வாஸெத்வாதி வாஸாபெத்வா. ஸோதி தா³யகோ. யோதி பி⁴க்கு², வஸதீதி ஸம்ப³ந்தோ⁴. தானீதி பே⁴ஸஜ்ஜானி. இத³ந்தி சீவரங்.
Pubbepīti ito pubbepi. Assāti dāyakassa. Vāsetvāti vāsāpetvā. Soti dāyako. Yoti bhikkhu, vasatīti sambandho. Tānīti bhesajjāni. Idanti cīvaraṃ.
‘‘அந்தேவாஸிகானஞ்சா’’தி பதே³ன ஸத்³தி⁴விஹாரிகாபி க³ஹேதப்³பா³ உத்³தே³ஸாதி³வஸேன அந்தே வஸனஸீலத்தா. உத்³தே³ஸங் க³ஹேதுங் ஆக³தோ ச க³ஹெத்வா க³ச்ச²ந்தோ சாதி இமே அந்தே அவஸனஸீலாபி ரூள்ஹீவஸேன அந்தேவாஸிகா நாம. இமினா நிஸ்ஸயங் க³ஹேதுங் ஆக³தோ ச தே²ரஸ்ஸ ஸந்திகே நிஸ்ஸயங் க³ஹிதபுப்³போ³ ச அந்தேவாஸிகோ நாமாதி த³ஸ்ஸேதி. வத்தங் கத்வா உத்³தே³ஸபரிபுச்சா²தீ³னி க³ஹெத்வா விசரந்தானங் ஸப்³பே³ஸங் உத்³தே³ஸந்தேவாஸிகானங் பாபுணாதீதி யோஜனா. இமினா ஸத்³தி⁴விஹாரிகனிஸ்ஸயந்தேவாஸிகஉபஸம்பத³ந்தேவாஸிகபப்³ப³ஜ்ஜந்தேவாஸிகாபி க³ஹேதப்³பா³ தேஸம்பி நிப³த்³த⁴சாரிகபி⁴க்கு²பா⁴வதோ. ஸப்³ப³த்தா²தி ஸப்³ப³ஸ்மிங் சீவரக்க²ந்த⁴கே.
‘‘Antevāsikānañcā’’ti padena saddhivihārikāpi gahetabbā uddesādivasena ante vasanasīlattā. Uddesaṃ gahetuṃ āgato ca gahetvā gacchanto cāti ime ante avasanasīlāpi rūḷhīvasena antevāsikā nāma. Iminā nissayaṃ gahetuṃ āgato ca therassa santike nissayaṃ gahitapubbo ca antevāsiko nāmāti dasseti. Vattaṃ katvā uddesaparipucchādīni gahetvā vicarantānaṃ sabbesaṃ uddesantevāsikānaṃ pāpuṇātīti yojanā. Iminā saddhivihārikanissayantevāsikaupasampadantevāsikapabbajjantevāsikāpi gahetabbā tesampi nibaddhacārikabhikkhubhāvato. Sabbatthāti sabbasmiṃ cīvarakkhandhake.
இதி சீவரக்க²ந்த⁴கவண்ணனாய யோஜனா ஸமத்தா.
Iti cīvarakkhandhakavaṇṇanāya yojanā samattā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 232. அட்ட²சீவரமாதிகா • 232. Aṭṭhacīvaramātikā
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / அட்ட²சீவரமாதிகாகதா² • Aṭṭhacīvaramātikākathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / அட்ட²சீவரமாதிகாகதா²வண்ணனா • Aṭṭhacīvaramātikākathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / அட்ட²சீவரமாதிகாகதா²வண்ணனா • Aṭṭhacīvaramātikākathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / அட்ட²சீவரமாதிகாகதா²வண்ணனா • Aṭṭhacīvaramātikākathāvaṇṇanā
