| Library / Tipiṭaka / ತಿಪಿಟಕ • Tipiṭaka / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi |
೨೩೨. ಅಟ್ಠಚೀವರಮಾತಿಕಾಕಥಾ
232. Aṭṭhacīvaramātikākathā
೩೭೯. ಇದಾನಿ ಆಹಾತಿ ಸಮ್ಬನ್ಧೋ। ಪುಗ್ಗಲಾಧಿಟ್ಠಾನನಯೇನಾತಿ ‘‘ಸೀಮಾಯ ದೇತೀ’’ತಿ ಕತ್ತುವಾಚಕೇನ ಕಿರಿಯಾಪದೇನ ದಾಯಕಪುಗ್ಗಲಸಙ್ಖಾತಕತ್ತುನೋ ಅಧಿಟ್ಠಾನವಸೇನ ವುತ್ತತ್ತಾ ಪುಗ್ಗಲಾಧಿಟ್ಠಾನೇನ ನಯೇನ। ಏತ್ಥಾತಿ ಏತಾಸು ಅಟ್ಠಸು ಮಾತಿಕಾಸು। ಅಟ್ಠಮಾ ಮಾತಿಕಾತಿ ಯೋಜನಾ। ತತ್ಥಾತಿ ಅಟ್ಠಸು ಮಾತಿಕಾಸು। ಸಬ್ಬತ್ಥಾತಿ ಸಬ್ಬೇಸು ‘‘ಕತಿಕಾಯ ದೇತೀ’’ತಿಆದೀಸು।
379. Idāni āhāti sambandho. Puggalādhiṭṭhānanayenāti ‘‘sīmāya detī’’ti kattuvācakena kiriyāpadena dāyakapuggalasaṅkhātakattuno adhiṭṭhānavasena vuttattā puggalādhiṭṭhānena nayena. Etthāti etāsu aṭṭhasu mātikāsu. Aṭṭhamā mātikāti yojanā. Tatthāti aṭṭhasu mātikāsu. Sabbatthāti sabbesu ‘‘katikāya detī’’tiādīsu.
ಸೀಮಾಯ…ಪೇ॰… ಭಾಜೇತಬ್ಬನ್ತಿಆದಿಮ್ಹಿ ಮಾತಿಕಾನಿದ್ದೇಸೇ ಪನ ಏವಂ ವಿನಿಚ್ಛಯೋ ವೇದಿತಬ್ಬೋತಿ ಯೋಜನಾ। ಸೀಮಾಯ ದೇತೀತಿ ಏತ್ಥ ಪನ್ನರಸ ಸೀಮಾ ವೇದಿತಬ್ಬಾತಿ ಸಮ್ಬನ್ಧೋ।
Sīmāya…pe… bhājetabbantiādimhi mātikāniddese pana evaṃ vinicchayo veditabboti yojanā. Sīmāya detīti ettha pannarasa sīmā veditabbāti sambandho.
ತತ್ಥಾತಿ ಪನ್ನರಸಸು ಸೀಮಾಸು। ಉಪಚಾರಸೀಮಾ ಪರಿಚ್ಛಿನ್ನಾ ಹೋತೀತಿ ಸಮ್ಬನ್ಧೋ। ಏತ್ತಕಂ ಠಾನನ್ತಿ ಪರಿಕ್ಖೇಪಾರಹಟ್ಠಾನಸ್ಸ ಏಕನ್ತೇನ ಅವುತ್ತತ್ತಾ ಏಕನ್ತೇನ ಪರಿಕ್ಖೇಪಾರಹಟ್ಠಾನಂ ದಸ್ಸೇನ್ತೋ ಆಹ ‘‘ಅಪಿಚಾ’’ತಿಆದಿ। ಧುವಸನ್ನಿಪಾತತೋ ವಾ ಖಿಪಿತಾನನ್ತಿ ಸಮ್ಬನ್ಧೋ। ‘‘ಪರಿಯನ್ತೇ’’ತಿ ಪದಂ ಪುಬ್ಬಾಪರಾಪೇಕ್ಖಂ। ತಸ್ಮಾ ತೀಸು ನಿಸ್ಸಕ್ಕಪದೇಸು ಯೋಜೇತಬ್ಬಂ। ಸಾ ಪನಾತಿ ಉಪಚಾರಸೀಮಾ ಪನ। ಭಿಕ್ಖೂಸು ವಡ್ಢನ್ತೇಸು ಆವಾಸೋಪಿ ವಡ್ಢತೀತಿ ಮನಸಿಕತ್ವಾ ವುತ್ತಂ ‘‘ಭಿಕ್ಖೂಸು ವಡ್ಢನ್ತೇಸೂ’’ತಿ। ಸಬ್ಬೇಸಂ ಭಿಕ್ಖೂನನ್ತಿ ಸಮ್ಬನ್ಧೋ। ವುತ್ತಮೇವಾತಿ ಸೀಮಕಥಾಯಂ (ಮಹಾವ॰ ಅಟ್ಠ॰ ೧೩೮, ೧೪೪) ವುತ್ತಮೇವ।
Tatthāti pannarasasu sīmāsu. Upacārasīmā paricchinnā hotīti sambandho. Ettakaṃ ṭhānanti parikkhepārahaṭṭhānassa ekantena avuttattā ekantena parikkhepārahaṭṭhānaṃ dassento āha ‘‘apicā’’tiādi. Dhuvasannipātato vā khipitānanti sambandho. ‘‘Pariyante’’ti padaṃ pubbāparāpekkhaṃ. Tasmā tīsu nissakkapadesu yojetabbaṃ. Sā panāti upacārasīmā pana. Bhikkhūsu vaḍḍhantesu āvāsopi vaḍḍhatīti manasikatvā vuttaṃ ‘‘bhikkhūsu vaḍḍhantesū’’ti. Sabbesaṃ bhikkhūnanti sambandho. Vuttamevāti sīmakathāyaṃ (mahāva. aṭṭha. 138, 144) vuttameva.
ಅಪಿಚ ಖೋತಿ ಏತ್ಥ ಅಪಿಸದ್ದೋ ಪುಚ್ಛತ್ಥವಾಚಕೋ। ಕೇಹಿ ಠಪಿತಾತಿ ಹಿ ಅತ್ಥೋ। ರಾಜರಾಜಮಹಾಮತ್ತಾ ಠಪೇನ್ತೀತಿ ಸಮ್ಬನ್ಧೋ। ಲಾಭಸೀಮಾತಿ ಲಾಭಸ್ಸ ಮರಿಯಾದೋ। ಯನ್ತಿ ಯೋ ಲಾಭೋ। ಏತ್ಥನ್ತರೇತಿ ಏತಸ್ಮಿಂ ಗಾವುತಾದಿಅನ್ತರೇ। ಲಾಭಸೀಮಾ ನಾಮಾತಿ ಲಾಭೇನ ಪರಿಚ್ಛಿನ್ನಾ ಸೀಮಾ ನಾಮ। ತತ್ಥಾತಿ ಬಹೂಸು ಜನಪದೇಸು। ಅನ್ತರದೀಪಾ ಚಾತಿ ಮಹಾದೀಪತೋ ಅಞ್ಞದೀಪಾ ಚ, ಖುದ್ದಕದೀಪಾತಿ ಅಧಿಪ್ಪಾಯೋ।
Apica khoti ettha apisaddo pucchatthavācako. Kehi ṭhapitāti hi attho. Rājarājamahāmattā ṭhapentīti sambandho. Lābhasīmāti lābhassa mariyādo. Yanti yo lābho. Etthantareti etasmiṃ gāvutādiantare. Lābhasīmā nāmāti lābhena paricchinnā sīmā nāma. Tatthāti bahūsu janapadesu. Antaradīpā cāti mahādīpato aññadīpā ca, khuddakadīpāti adhippāyo.
ಏತ್ಥೇವ ಸೀಮಾಯಾತಿ ಖಣ್ಡಸೀಮಾಯ ಏವ। ತೇಸಂಯೇವಾತಿ ಖಣ್ಡಸೀಮಗತಾನಂಯೇವ। ಏವತ್ಥಫಲಂ ದಸ್ಸೇನ್ತೋ ಆಹ ‘‘ಅಞ್ಞೇಸ’’ನ್ತಿಆದಿ। ರುಕ್ಖೇ ವಾ ಪಬ್ಬತೇ ವಾ ಠಿತಸ್ಸ ವಾ ಹೇಟ್ಠಾ ಪಥವೀಮಜ್ಝಗತಸ್ಸ ವಾ ಭಿಕ್ಖುಸ್ಸಾತಿ ಯೋಜನಾ। ಇಮಿಸ್ಸಾ ಉಪಚಾರಸೀಮಾಯ ಠಿತಸ್ಸಾತಿ ಸಮ್ಬನ್ಧೋ। ಸಮಾನಸಂವಾಸಸೀಮಾಯಾತಿ ಮಹಾಸೀಮಾಯ। ಖಣ್ಡಸೀಮಸೀಮನ್ತರಿಕಾಸೂತಿ ಖಣ್ಡಸೀಮಾಯಞ್ಚ ದ್ವಿನ್ನಂ ಸೀಮಾನಂ ಸೀಮನ್ತರಿಕಾಯಞ್ಚ। ತತ್ಥ ದ್ವಿನ್ನಂ ಗಾಮಟ್ಠಾನಮ್ಪಿ ಪಾಪುಣಾತಿ। ಅವಿಪ್ಪವಾಸಸೀಮಾಯ ದಿನ್ನಂ ಗಾಮಟ್ಠಾನಂ ನ ಪಾಪುಣಾತಿ ‘‘ಠಪೇತ್ವಾ ಗಾಮಞ್ಚ ಗಾಮೂಪಚಾರಞ್ಚಾ’’ತಿ ವುತ್ತತ್ತಾ।
Ettheva sīmāyāti khaṇḍasīmāya eva. Tesaṃyevāti khaṇḍasīmagatānaṃyeva. Evatthaphalaṃ dassento āha ‘‘aññesa’’ntiādi. Rukkhe vā pabbate vā ṭhitassa vā heṭṭhā pathavīmajjhagatassa vā bhikkhussāti yojanā. Imissā upacārasīmāya ṭhitassāti sambandho. Samānasaṃvāsasīmāyāti mahāsīmāya. Khaṇḍasīmasīmantarikāsūti khaṇḍasīmāyañca dvinnaṃ sīmānaṃ sīmantarikāyañca. Tattha dvinnaṃ gāmaṭṭhānampi pāpuṇāti. Avippavāsasīmāya dinnaṃ gāmaṭṭhānaṃ na pāpuṇāti ‘‘ṭhapetvā gāmañca gāmūpacārañcā’’ti vuttattā.
ಜಮ್ಬುಯಾ ಲಕ್ಖಿತೋ ದೀಪೋ ಜಮ್ಬುದೀಪೋ। ತಮ್ಬೋ ಲೋಹಿತೋ ಪಾಣಿ ಹತ್ಥೋ ಏತೇಸನ್ತಿ ತಮ್ಬಪಾಣಿನೋ। ವಿಜಯಕುಮಾರಾದಯೋ ಸತ್ತಸತಾ ಜನಾ। ತೇಸಂ ನಿವಾಸೋ ತಮ್ಬಪಣ್ಣಿ, ಸೋಯೇವ ದೀಪೋತಿ ತಮ್ಬಪಣ್ಣಿದೀಪೋ, ತಸ್ಮಿಂ। ಸಬ್ಬೇಸಂ ಭಾಗನ್ತಿ ಸಮ್ಬನ್ಧೋ। ತತ್ರೇವಾತಿ ಜಮ್ಬುದೀಪೇಯೇವ। ಏವನ್ತಿಆದಿ ನಿಗಮನಂ।
Jambuyā lakkhito dīpo jambudīpo. Tambo lohito pāṇi hattho etesanti tambapāṇino. Vijayakumārādayo sattasatā janā. Tesaṃ nivāso tambapaṇṇi, soyeva dīpoti tambapaṇṇidīpo, tasmiṃ. Sabbesaṃ bhāganti sambandho. Tatrevāti jambudīpeyeva. Evantiādi nigamanaṃ.
ಯೋ ಪನ ಭಣತೀತಿ ಸಮ್ಬನ್ಧೋ। ತತೋತಿ ಕಥನತೋ, ಪರನ್ತಿ ಸಮ್ಬನ್ಧೋ। ನನ್ತಿ ಮಹಾಸಿವತ್ಥೇರಂ। ತಿಯೋಜನಾಪೀತಿ ಪಿಸದ್ದೋ ತತೋ ಊನಾಪಿ ಹೋತೀತಿ ದಸ್ಸೇತಿ। ಸಬ್ಬಂಪೇತನ್ತಿ ಸಬ್ಬಂಪಿ ಏತಂ ಲಾಭಗಣ್ಹನಾದಿಂ। ಇತಿ ಆಹಂಸೂತಿ ಯೋಜನಾ।
Yo pana bhaṇatīti sambandho. Tatoti kathanato, paranti sambandho. Nanti mahāsivattheraṃ. Tiyojanāpīti pisaddo tato ūnāpi hotīti dasseti. Sabbaṃpetanti sabbaṃpi etaṃ lābhagaṇhanādiṃ. Iti āhaṃsūti yojanā.
ಕತಿಕಾನಂ ಯಥಿಚ್ಛಿತಕತೇನ ಪವತ್ತತ್ತಾ ಬಹು ಹೋತಿ, ತಸ್ಮಾ ಇಧ ಇಚ್ಛಿತಕತಿಕಂ ದಸ್ಸೇತುಂ ವುತ್ತಂ ‘‘ಸಮಾನಲಾಭಕತಿಕಾಯಾ’’ತಿ । ತತ್ರಾತಿ ‘‘ಕತಿಕಾಯ ದೇತೀ’’ತಿ ಪಾಠೇ। ಸನ್ನಿಪತಿತೇಹಿ ಭಿಕ್ಖೂಹಿ ಭಾಜೇತಬ್ಬನ್ತಿ ಸಮ್ಬನ್ಧೋ। ತಸ್ಸಾತಿ ವಿಹಾರಸ್ಸ। ಬುದ್ಧಾಧಿವುತ್ಥೋತಿ ಬುದ್ಧೇನ ಅಧಿ ಇಸ್ಸರವಸೇನ ವಸಿಯಿತ್ಥಾತಿ ಬುದ್ಧಾಧಿವುತ್ಥೋ। ಏತ್ತಾವತಾತಿ ಏತ್ತಕೇನ ಸಾವನಮತ್ತೇನ। ನಿಸಿನ್ನೋವಾತಿ ನಿಸಿನ್ನೋ ಏವ ಹೋತಿ, ನಿಸಿನ್ನೋ ಇವ ವಾ। ತಸ್ಮಿಂ ವಿಹಾರೇಪೀತಿ ತಸ್ಮಿಂ ಪೋರಾಣಕಾದಿವಿಹಾರೇಪಿ। ಏವಮೇವಾತಿ ‘‘ಅಯಂ ಪೋರಾಣಕೋ ವಿಹಾರೋ ತೇನ ನವವಿಹಾರೇನ ಸದ್ಧಿಂ ಸಮಾನಲಾಭಂ ಕಾತುಂ ಸಙ್ಘಸ್ಸ ರುಚ್ಚತೀ’’ತಿಆದಿನಾ ಏವಮೇವ। ಇಧಾತಿ ಪೋರಾಣಕವಿಹಾರೇ। ತಸ್ಮಿನ್ತಿ ನವವಿಹಾರೇ। ಏವನ್ತಿ ಯಥಾ ಏಕೇನ ವಿಹಾರೇನ ಸದ್ಧಿಂ ಏಕೋ ವಿಹಾರೋ ಕಾತಬ್ಬೋ, ಏವಂ ತಥಾತಿ ಅತ್ಥೋ।
Katikānaṃ yathicchitakatena pavattattā bahu hoti, tasmā idha icchitakatikaṃ dassetuṃ vuttaṃ ‘‘samānalābhakatikāyā’’ti . Tatrāti ‘‘katikāya detī’’ti pāṭhe. Sannipatitehi bhikkhūhi bhājetabbanti sambandho. Tassāti vihārassa. Buddhādhivutthoti buddhena adhi issaravasena vasiyitthāti buddhādhivuttho. Ettāvatāti ettakena sāvanamattena. Nisinnovāti nisinno eva hoti, nisinno iva vā. Tasmiṃ vihārepīti tasmiṃ porāṇakādivihārepi. Evamevāti ‘‘ayaṃ porāṇako vihāro tena navavihārena saddhiṃ samānalābhaṃ kātuṃ saṅghassa ruccatī’’tiādinā evameva. Idhāti porāṇakavihāre. Tasminti navavihāre. Evanti yathā ekena vihārena saddhiṃ eko vihāro kātabbo, evaṃ tathāti attho.
ಭಿಕ್ಖಾಪಞ್ಞತ್ತಿಯಾತಿ ಏತ್ಥ ಭಿಕ್ಖಾ ಪಞ್ಞಪಿಯತಿ ನಿಚ್ಚವಸೇನ ಠಪಿಯತಿ ಏತ್ಥಾತಿ ಭಿಕ್ಖಾಪಞ್ಞತ್ತೀತಿ ದಸ್ಸೇನ್ತೋ ಆಹ ‘‘ಅತ್ತನೋ ಪರಿಚ್ಚಾಗಪಞ್ಞಾಪನಟ್ಠಾನೇ’’ತಿ। ತಸ್ಸಾತಿ ‘‘ಯತ್ಥ ಸಙ್ಘಸ್ಸ ಧುವಕಾರಾ ಕರಿಯನ್ತೀ’’ತಿಪಾಠಸ್ಸ। ಅತ್ಥೋ ಏವಂ ವೇದಿತಬ್ಬೋತಿ ಯೋಜನಾ। ಯತ್ಥ ವಾತಿ ಯಸ್ಮಿಂ ವಾ ಠಾನೇ। ಅನೇನಾತಿ ಚೀವರದಾಯಕೇನ। ಸಲಾಕಭತ್ತಾದೀನಿ ವಾ ನಿಬದ್ಧಾನಿ ಕಾರಿತಾನೀತಿ ಸಮ್ಬನ್ಧೋ। ಯೇನ ಪನಾತಿ ಚೀವರದಾಯಕೇನ ಪನ। ಸಕಲೋಪಿ ವಿಹಾರೋತಿ ಸಕಲೋಪಿ ಸಆರಾಮೋ ವಿಹಾರೋ। ತತ್ಥಾತಿ ಚೀವರದಾಯಕೇ। ಇಮೇತಿ ಪಾಕವತ್ತಸ್ಸ ವತ್ತನಟ್ಠಾನಾದಯೋ ವಿಹಾರಾ। ಧುವೇನ ಕರಿಯನ್ತೀತಿ ಧುವಕಾರಾ ವಿಹಾರಾ। ಸೋತಿ ಚೀವರದಾಯಕೋ। ಯತ್ಥಾತಿ ಯಸ್ಮಿಂ ಠಾನೇ। ಸಬ್ಬತ್ಥಾತಿ ಸಬ್ಬೇಸು ಬಹೂಸು ವಿಹಾರೇಸು।
Bhikkhāpaññattiyāti ettha bhikkhā paññapiyati niccavasena ṭhapiyati etthāti bhikkhāpaññattīti dassento āha ‘‘attano pariccāgapaññāpanaṭṭhāne’’ti. Tassāti ‘‘yattha saṅghassa dhuvakārā kariyantī’’tipāṭhassa. Attho evaṃ veditabboti yojanā. Yattha vāti yasmiṃ vā ṭhāne. Anenāti cīvaradāyakena. Salākabhattādīni vā nibaddhāni kāritānīti sambandho. Yena panāti cīvaradāyakena pana. Sakalopi vihāroti sakalopi saārāmo vihāro. Tatthāti cīvaradāyake. Imeti pākavattassa vattanaṭṭhānādayo vihārā. Dhuvena kariyantīti dhuvakārā vihārā. Soti cīvaradāyako. Yatthāti yasmiṃ ṭhāne. Sabbatthāti sabbesu bahūsu vihāresu.
ತೇಹೀತಿ ಬಹುತರೇಹಿ ಭಿಕ್ಖೂಹಿ। ಧುವಕಾರೇಸೂತಿ ನಿದ್ಧಾರಣೇ ಭುಮ್ಮಂ। ಏಕತ್ಥಾತಿ ಏಕಸ್ಮಿಂ ಧುವಕಾರೇ। ‘‘ಸಚೇ ಭಿಕ್ಖುಗಣನಾಯ ಗಣ್ಹಥಾತಿ ವದತೀ’’ತಿ ಇಮಿನಾ ಸಚೇ ನ ವದತಿ, ಭಿಕ್ಖುಗಣನಾಯ ಭಾಜೇತ್ವಾ ಗಣ್ಹಿತುಂ ನ ವಟ್ಟತೀತಿ ದಸ್ಸೇತಿ, ವಿಹಾರಗಣನಾಯ ಗಣ್ಹಿತುಂ ವಟ್ಟತೀತಿ ಅಧಿಪ್ಪಾಯೋ। ತಥಾತಿ ಯಥಾ ‘‘ಭಿಕ್ಖುಗಣನಾಯ ಗಣ್ಹಥಾ’’ತಿ ವದತಿ, ತಥಾತಿ ಅತ್ಥೋ। ಏತ್ಥಾತಿ ಭಾಜೇತಬ್ಬವತ್ಥೂಸು। ತನ್ತಿ ಮಞ್ಚಪೀಠಕಂ, ಪುಚ್ಛಿತ್ವಾ ದಾತಬ್ಬನ್ತಿ ಸಮ್ಬನ್ಧೋ। ಪುಚ್ಛಿತ್ವಾತಿ ದಾಯಕಂ ಪುಚ್ಛಿತ್ವಾ, ವದತೀತಿ ದಾಯಕೋ ವದತಿ। ಸಙ್ಘಸ್ಸಾಪೀತಿ ಪಿಸದ್ದೋ ನ ದಾಯಕಸ್ಸೇವಾತಿ ದಸ್ಸೇತಿ।
Tehīti bahutarehi bhikkhūhi. Dhuvakāresūti niddhāraṇe bhummaṃ. Ekatthāti ekasmiṃ dhuvakāre. ‘‘Sace bhikkhugaṇanāya gaṇhathāti vadatī’’ti iminā sace na vadati, bhikkhugaṇanāya bhājetvā gaṇhituṃ na vaṭṭatīti dasseti, vihāragaṇanāya gaṇhituṃ vaṭṭatīti adhippāyo. Tathāti yathā ‘‘bhikkhugaṇanāya gaṇhathā’’ti vadati, tathāti attho. Etthāti bhājetabbavatthūsu. Tanti mañcapīṭhakaṃ, pucchitvā dātabbanti sambandho. Pucchitvāti dāyakaṃ pucchitvā, vadatīti dāyako vadati. Saṅghassāpīti pisaddo na dāyakassevāti dasseti.
ಉಪಚಾರಸೀಮಾಯಂ ಠಿತೇನ ಸಙ್ಘೇನ ಭಾಜೇತಬ್ಬನ್ತಿ ಸಮ್ಬನ್ಧೋ । ಸೀಮಟ್ಠಸ್ಸಾತಿ ಉಪಚಾರಸೀಮಾಯಂ ಠಿತಸ್ಸ। ಅಸಮ್ಪತ್ತಸ್ಸಾಪೀತಿ ಭಾಜನಟ್ಠಾನಂ ಅಸಮ್ಪತ್ತಸ್ಸಾಪಿ। ಅಲಸಜಾತಿಕಾತಿ ಕೋಸಜ್ಜಜಾತಿಕಾ। ಠಿತಿಕಾತಿ ಪಬನ್ಧವಸೇನ ಠಿಯತೇ ಠಿತಿ, ಸಾಯೇವ ಠಿತಿಕಾ। ಅಥ ವಾ ‘‘ಠಿತಟ್ಠಾನತೋ ಪಟ್ಠಾಯ ದಾತಬ್ಬ’’ನ್ತಿ ಅಟ್ಠಕಥಾಯಂ (ಮಹಾವ॰ ಅಟ್ಠ॰ ೩೭೯) ವುತ್ತತ್ತಾ ತಿಟ್ಠತಿ ಪಬನ್ಧವಸೇನ ಏತ್ಥಾತಿ ಠಿತಿ, ಸಾಯೇವ ಠಿತಿಕಾತಿ ವಚನತ್ಥೋ ಕಾತಬ್ಬೋ। ಠಿತಿಕಂ ಠಪೇತ್ವಾತಿ ವೀಸತಿವಸ್ಸಸಙ್ಖಾತಂ ಠಿತಿಕಂ ಠಪೇತ್ವಾ। ತೇಸನ್ತಿ ಥೇರಾನಂ।
Upacārasīmāyaṃ ṭhitena saṅghena bhājetabbanti sambandho . Sīmaṭṭhassāti upacārasīmāyaṃ ṭhitassa. Asampattassāpīti bhājanaṭṭhānaṃ asampattassāpi. Alasajātikāti kosajjajātikā. Ṭhitikāti pabandhavasena ṭhiyate ṭhiti, sāyeva ṭhitikā. Atha vā ‘‘ṭhitaṭṭhānato paṭṭhāya dātabba’’nti aṭṭhakathāyaṃ (mahāva. aṭṭha. 379) vuttattā tiṭṭhati pabandhavasena etthāti ṭhiti, sāyeva ṭhitikāti vacanattho kātabbo. Ṭhitikaṃ ṭhapetvāti vīsativassasaṅkhātaṃ ṭhitikaṃ ṭhapetvā. Tesanti therānaṃ.
ಸಮ್ಪತ್ತಸಮ್ಪತ್ತಾನನ್ತಿ ಭಾಜನಟ್ಠಾನಂ ಸಮ್ಪತ್ತಸಮ್ಪತ್ತಾನಂ। ಅತ್ತನೋ ವಿಹಾರದ್ವಾರೇ ವಾ ಅತ್ತನೋ ಅನ್ತೋವಿಹಾರೇಯೇವ ವಾತಿ ಯೋಜನಾ। ಸೀಮಾತಿ ಉಪಚಾರಸೀಮಾ। ಥೇರಾಸನಂ ಆರೂಳ್ಹೇ ಸತೀತಿ ಯೋಜನಾ। ವಸ್ಸಗ್ಗೇನಾತಿ ವಸ್ಸಗಣನಾಯ।
Sampattasampattānanti bhājanaṭṭhānaṃ sampattasampattānaṃ. Attano vihāradvāre vā attano antovihāreyeva vāti yojanā. Sīmāti upacārasīmā. Therāsanaṃ ārūḷhe satīti yojanā. Vassaggenāti vassagaṇanāya.
ಪಾಟೇಕ್ಕನ್ತಿ ಪಚ್ಚೇಕಂ। ಸಬ್ಬಾನೇವ ಚೀವರಾನೀತಿ ಸಮ್ಬನ್ಧೋ। ದುಬ್ಭಾಸಿತದುಗ್ಗಹಿತಾನಮತ್ಥಂ ದಸ್ಸೇನ್ತೋ ಆಹ ‘‘ಗತಗತಟ್ಠಾನೇ ಸಙ್ಘಿಕಾನೇವ ಹೋನ್ತೀ’’ತಿ। ಏಕನ್ತಿ ದಸಸು ವತ್ಥೇಸು ಏಕಂ।
Pāṭekkanti paccekaṃ. Sabbāneva cīvarānīti sambandho. Dubbhāsitaduggahitānamatthaṃ dassento āha ‘‘gatagataṭṭhāne saṅghikāneva hontī’’ti. Ekanti dasasu vatthesu ekaṃ.
ವತ್ಥಸ್ಸೇವ ಪುಪ್ಫಂ ವಾ ವಲಿ ವಾ ಅತ್ಥೀತಿ ಯೋಜನಾ। ತೇನಾತಿ ಪುಪ್ಫವಲಿನಾ। ಏಕಂ ತನ್ತನ್ತಿ ಏಕಂ ಸುತ್ತಂ। ತತ್ಥಾತಿ ತೇಸು ಠಿತಿಕಾಯ ಠಾನಾಟ್ಠಾನೇಸು। ದ್ವೀಹಿಪಿ ಗಹೇತಬ್ಬಂ ಠಿತಿಕಾಯ ಅಭಾವತೋ।
Vatthasseva pupphaṃ vā vali vā atthīti yojanā. Tenāti pupphavalinā. Ekaṃ tantanti ekaṃ suttaṃ. Tatthāti tesu ṭhitikāya ṭhānāṭṭhānesu. Dvīhipi gahetabbaṃ ṭhitikāya abhāvato.
ಭಿಕ್ಖು ಅತ್ತನೋ ಸನ್ತಕಂ ಯಂ ಚೀವರನ್ತಿ ಯೋಜನಾ। ಪಂಸುಕೂಲಿಕಾನಮ್ಪಿ ವಟ್ಟತೀತಿ ‘‘ಸಙ್ಘಸ್ಸ ದೇಮಾ’’ತಿ ವಾ ‘‘ತುಯ್ಹಂ ದೇಮಾ’’ತಿ ವಾ ಅವತ್ವಾ ‘‘ಭಿಕ್ಖೂನಂ ದೇಮ, ಥೇರಾನಂ ದೇಮಾ’’ತಿ ವುತ್ತತ್ತಾ ಪಂಸುಕೂಲಿಕಾನಮ್ಪಿ ವಟ್ಟತಿ। ಭಿಕ್ಖುಥೇರಾ ನಾಮ ಹಿ ನ ಅತ್ತನಾಯೇವ ಹೋನ್ತಿ, ಅಞ್ಞೇಪಿ ಬಹೂ, ತಸ್ಮಾ ವಟ್ಟತಿ। ‘‘ಸಙ್ಘಸ್ಸಾ’’ತಿ ವುತ್ತೇ ಅತ್ತನಾ ಏಕನ್ತೇನ ಸಙ್ಘೋಯೇವ, ತಸ್ಮಾ ‘‘ಸಙ್ಘಸ್ಸಾ’’ತಿ ವುತ್ತೇಪಿ ನ ವಟ್ಟತಿ, ಪಗೇವ ‘‘ತುಯ್ಹ’’ನ್ತಿ ವುತ್ತೇ।
Bhikkhu attano santakaṃ yaṃ cīvaranti yojanā. Paṃsukūlikānampi vaṭṭatīti ‘‘saṅghassa demā’’ti vā ‘‘tuyhaṃ demā’’ti vā avatvā ‘‘bhikkhūnaṃ dema, therānaṃ demā’’ti vuttattā paṃsukūlikānampi vaṭṭati. Bhikkhutherā nāma hi na attanāyeva honti, aññepi bahū, tasmā vaṭṭati. ‘‘Saṅghassā’’ti vutte attanā ekantena saṅghoyeva, tasmā ‘‘saṅghassā’’ti vuttepi na vaṭṭati, pageva ‘‘tuyha’’nti vutte.
ತತೋತಿ ಬಹುವತ್ಥತೋ। ಗಹೇತುಂ ನ ವಟ್ಟತೀತಿ ಪಂಸುಕೂಲಿಕಾನಂ ಗಹೇತುಂ ನ ವಟ್ಟತಿ।
Tatoti bahuvatthato. Gahetuṃ na vaṭṭatīti paṃsukūlikānaṃ gahetuṃ na vaṭṭati.
ಯನ್ತಿ ವತ್ಥಂ। ತತ್ಥಾತಿ ಪರಿಕ್ಖಾರೇಸು। ಸುತ್ತನ್ತಿ ತನ್ತಂ।
Yanti vatthaṃ. Tatthāti parikkhāresu. Suttanti tantaṃ.
ಏವಂ ಅನ್ತೋಸೀಮಂ ಪವಿಸಿತ್ವಾ ‘‘ಸಙ್ಘಸ್ಸ ದೇಮಾ’’ತಿ ದಿನ್ನೇ ವಿನಿಚ್ಛಯಂ ದಸ್ಸೇತ್ವಾ ಬಹಿಸೀಮಾಯ ದಿನ್ನೇ ತಂ ದಸ್ಸೇನ್ತೋ ಆಹ ‘‘ಸಚೇ ಪನಾ’’ತಿಆದಿ। ಏಕಬದ್ಧಾ ಚಾತಿ ದ್ವಾದಸಹತ್ಥಮನತಿಕ್ಕಮಿತ್ವಾ ಏಕತೋಬದ್ಧಾ ಚ। ಯೇ ಪನಾತಿ ಭಿಕ್ಖೂ ಪನ।
Evaṃ antosīmaṃ pavisitvā ‘‘saṅghassa demā’’ti dinne vinicchayaṃ dassetvā bahisīmāya dinne taṃ dassento āha ‘‘sace panā’’tiādi. Ekabaddhā cāti dvādasahatthamanatikkamitvā ekatobaddhā ca. Ye panāti bhikkhū pana.
ಉಭತೋಸಙ್ಘಸ್ಸ ದೇತೀತಿ ಏತ್ಥ ಚತುನ್ನಂ ವಾಕ್ಯಾನಂ ವಸೇನ ವುತ್ತೇಪಿ ಉಭತೋಸಙ್ಘಸ್ಸ ದೇತಿಯೇವ ನಾಮಾತಿ ದಸ್ಸೇನ್ತೋ ಆಹ ‘‘ಉಭತೋಸಙ್ಘಸ್ಸ ದಮ್ಮೀತಿ ವುತ್ತೇಪೀ’’ತಿಆದಿ। ಉಭತೋಸಙ್ಘಗ್ಗಹಣೇನ ಗಹಿತತ್ತಾತಿ ಪುಗ್ಗಲಸ್ಸ ಉಭತೋಸಙ್ಘಗ್ಗಹಣೇನ ಗಹಿತತ್ತಾ। ‘‘ಏಸೇವ ನಯೋ’’ತಿ ಇಮಿನಾ ಏಕವೀಸತಿಪಟಿವೀಸೇ ಕತ್ವಾ ಏಕೋ ಚೇತಿಯಸ್ಸ ದಾತಬ್ಬೋತಿ ನಯಂ ಅತಿದಿಸತಿ। ಪಾಪುಣನಕೋಟ್ಠಾಸೋ ನಾಮ ನತ್ಥಿ ಚೇತಿಯಸ್ಸ ಉಭತೋಸಙ್ಘಗ್ಗಹಣೇನ ಅಗಹಿತತ್ತಾ।
Ubhatosaṅghassa detīti ettha catunnaṃ vākyānaṃ vasena vuttepi ubhatosaṅghassa detiyeva nāmāti dassento āha ‘‘ubhatosaṅghassa dammīti vuttepī’’tiādi. Ubhatosaṅghaggahaṇena gahitattāti puggalassa ubhatosaṅghaggahaṇena gahitattā. ‘‘Eseva nayo’’ti iminā ekavīsatipaṭivīse katvā eko cetiyassa dātabboti nayaṃ atidisati. Pāpuṇanakoṭṭhāso nāma natthi cetiyassa ubhatosaṅghaggahaṇena agahitattā.
ತತ್ಥಾತಿ ಉಭತೋಸಙ್ಘಪುಗ್ಗಲಚೇತಿಯೇಸು। ಸೇಸಂ ಸುವಿಞ್ಞೇಯ್ಯಮೇವ।
Tatthāti ubhatosaṅghapuggalacetiyesu. Sesaṃ suviññeyyameva.
ಪುಬ್ಬೇತಿ ಬುದ್ಧಸ್ಸ ಭಗವತೋ ಧರಮಾನಕಾಲೇ। ತದಾತಿ ಯದಾ ಬುದ್ಧೋ ಭಗವಾ ಧರತಿ, ತದಾ। ಪಟಿಮಂ ವಾತಿ ಪಟಿಬಿಮ್ಬಂ ವಾ। ತಞ್ಹಿ ಭಗವತಾ ಪಟಿ ಸದಿಸಂ ಮಾನೀಯತೀತಿ ಪಟಿಮಾತಿ ವುಚ್ಚತಿ। ಚೇತಿಯಂ ವಾತಿ ಥೂಪಂ ವಾ। ಸೋ ಹಿ ದೇವಮನುಸ್ಸೇಹಿ ಚಿತಿತಬ್ಬಂ, ಪೂಜೇತಬ್ಬಂ, ಇಟ್ಠಕಾದೀಹಿ ವಾ ಚಿನಿತಬ್ಬನ್ತಿ ಚೇತಿಯನ್ತಿ ವುಚ್ಚತಿ। ತತ್ಥಾತಿ ದೇಯ್ಯಧಮ್ಮೇಸು। ಯನ್ತಿ ಕಿರಿಯಾಪರಾಮಸನಂ। ಯಂ ದೇನ್ತೀತಿ ಯೋಜನಾ। ತತ್ಥಾತಿ ತಸ್ಮಿಂ ದಾನೇ। ಅನಿಯಮವಾಚಕಸ್ಸ ‘‘ಯೋ’’ತಿ ಸಬ್ಬನಾಮಸ್ಸ ಅತ್ಥಂ ದಸ್ಸೇನ್ತೋ ಆಹ ‘‘ಪಬ್ಬಜಿತೋ ವಾ ಗಹಟ್ಠೋ ವಾ’’ತಿ। ವತ್ತಂ ಕತ್ವಾ ಪರಿಭುಞ್ಜಿತುನ್ತಿ ಪುಬ್ಬಕಾಲಅಪರಕಾಲಕಿರಿಯಾನಂ ವಿಕಾರವಸೇನ ಅನಿಯತತ್ತಾ ವುತ್ತಂ ‘‘ಭುಞ್ಜಿತ್ವಾ ಪಚ್ಛಾಪಿ ವತ್ತಂ ಕಾತು’’ನ್ತಿ।
Pubbeti buddhassa bhagavato dharamānakāle. Tadāti yadā buddho bhagavā dharati, tadā. Paṭimaṃ vāti paṭibimbaṃ vā. Tañhi bhagavatā paṭi sadisaṃ mānīyatīti paṭimāti vuccati. Cetiyaṃ vāti thūpaṃ vā. So hi devamanussehi cititabbaṃ, pūjetabbaṃ, iṭṭhakādīhi vā cinitabbanti cetiyanti vuccati. Tatthāti deyyadhammesu. Yanti kiriyāparāmasanaṃ. Yaṃ dentīti yojanā. Tatthāti tasmiṃ dāne. Aniyamavācakassa ‘‘yo’’ti sabbanāmassa atthaṃ dassento āha ‘‘pabbajito vā gahaṭṭho vā’’ti. Vattaṃ katvā paribhuñjitunti pubbakālaaparakālakiriyānaṃ vikāravasena aniyatattā vuttaṃ ‘‘bhuñjitvā pacchāpi vattaṃ kātu’’nti.
‘‘ದೂರಮ್ಪಿ ಹರಿತ್ವಾ ಪೂಜೇತಬ್ಬ’’ನ್ತಿ ಇಮಿನಾ ಜಙ್ಘಪೇಸನಿಕಕಮ್ಮಂ ನ ಹೋತೀತಿ ದಸ್ಸೇತಿ। ಹರನ್ತಸ್ಸ ಭಿಕ್ಖುನೋತಿ ಸಮ್ಬನ್ಧೋ। ಗಚ್ಛತೋತಿ ಅನಾದರೇ ಸಾಮಿವಚನಂ। ತನ್ತಿ ಸಙ್ಘಸ್ಸ ಆಹಟಭತ್ತಂ।
‘‘Dūrampi haritvā pūjetabba’’nti iminā jaṅghapesanikakammaṃ na hotīti dasseti. Harantassa bhikkhunoti sambandho. Gacchatoti anādare sāmivacanaṃ. Tanti saṅghassa āhaṭabhattaṃ.
ವಸ್ಸಂವುತ್ಥಸಙ್ಘಸ್ಸಾತಿ ವಸ್ಸಂ ವಸಿತ್ಥಾತಿ ವಸ್ಸಂವುತ್ಥೋ। ಅಲುತ್ತಕಿತನ್ತಸಮಾಸೋಯಂ, ಸೋಯೇವ ಸಙ್ಘೋ ವಸ್ಸಂವುತ್ಥಸಙ್ಘೋ, ತಸ್ಸ। ಯಾವತಿಕಸದ್ದೋ ಯತ್ತಕಪರಿಯಾಯೋತಿ ಆಹ ‘‘ಯತ್ತಕಾ’’ತಿ। ದಿಸಾಪಕ್ಕನ್ತಸ್ಸಾಪೀತಿ ಅಞ್ಞಂ ದಿಸಂ ಪಕ್ಕನ್ತಸ್ಸಪಿ, ದಾತಬ್ಬನ್ತಿ ಸಮ್ಬನ್ಧೋ। ವದನ್ತೀತಿ ಅಟ್ಠಕಥಾಚರಿಯೇಹಿ ಅಪರೇ ಆಚರಿಯಾ ವದನ್ತಿ। ಏತನ್ತಿ ವಚನಂ।
Vassaṃvutthasaṅghassāti vassaṃ vasitthāti vassaṃvuttho. Aluttakitantasamāsoyaṃ, soyeva saṅgho vassaṃvutthasaṅgho, tassa. Yāvatikasaddo yattakapariyāyoti āha ‘‘yattakā’’ti. Disāpakkantassāpīti aññaṃ disaṃ pakkantassapi, dātabbanti sambandho. Vadantīti aṭṭhakathācariyehi apare ācariyā vadanti. Etanti vacanaṃ.
ಸಮ್ಪತ್ತಾನನ್ತಿ ದಿನ್ನಟ್ಠಾನಂ ಸಮ್ಪತ್ತಾನಂ। ಸಬ್ಬೇಸನ್ತಿ ಯತ್ಥ ಕತ್ಥಚಿ ವುತ್ಥವಸ್ಸಾನಂ ಸಬ್ಬೇಸಂ। ತತ್ರಾತಿ ವಿಹಾರೇ। ತತ್ರಾತಿ ತಸ್ಮಿಂ ವದನೇ ಸತಿ, ತೇಸು ಭಿಕ್ಖೂಸು ವಾ। ವಸ್ಸಂ ವಸನ್ತೀತಿ ವಸ್ಸಂವಸನ್ತಾ, ತೇಸಂ। ಚೀವರಮಾಸೇತಿ ಚೀವರೇನ ಲಕ್ಖಿತೇ ಪಚ್ಛಿಮಕತ್ತಿಕಮಾಸೇ।
Sampattānanti dinnaṭṭhānaṃ sampattānaṃ. Sabbesanti yattha katthaci vutthavassānaṃ sabbesaṃ. Tatrāti vihāre. Tatrāti tasmiṃ vadane sati, tesu bhikkhūsu vā. Vassaṃ vasantīti vassaṃvasantā, tesaṃ. Cīvaramāseti cīvarena lakkhite pacchimakattikamāse.
ಹೇಮನ್ತಸ್ಸ ಪಚ್ಛಿಮೋ ದಿವಸೋತಿ ಫಗ್ಗುಣಪುಣ್ಣಮೀಸಙ್ಖಾತೋ ಹೇಮನ್ತಸ್ಸ ಪಚ್ಛಿಮೋ ದಿವಸೋ। ವಸ್ಸಾವಾಸಿಕನ್ತಿ ವಸ್ಸಂ ಆವಸನ್ತಾನಂ ದಾತಬ್ಬಂ ಚೀವರಂ। ಆರೋಪೇತಬ್ಬಾಕಾರಂ ದಸ್ಸೇನ್ತೋ ಆಹ ‘‘ಅತೀತವಸ್ಸಾವಾಸಸ್ಸಾ’’ತಿಆದಿ। ತತ್ಥ ಅತೀತವಸ್ಸಾವಾಸಸ್ಸಾತಿ ಅತೀತವಸ್ಸಂ, ಅತೀತವಸ್ಸೇ ವಾ ಆವಾಸಸ್ಸ ಸಙ್ಘಸ್ಸ। ತನ್ತಿ ಚೀವರಂ।
Hemantassa pacchimo divasoti phagguṇapuṇṇamīsaṅkhāto hemantassa pacchimo divaso. Vassāvāsikanti vassaṃ āvasantānaṃ dātabbaṃ cīvaraṃ. Āropetabbākāraṃ dassento āha ‘‘atītavassāvāsassā’’tiādi. Tattha atītavassāvāsassāti atītavassaṃ, atītavasse vā āvāsassa saṅghassa. Tanti cīvaraṃ.
ಠಪೇತ್ವಾತಿ ವಿಹಾರೇ ಠಪೇತ್ವಾ। ಸಮ್ಪತ್ತಾನನ್ತಿ ಇಮಂ ಠಾನಂ ಸಮ್ಪತ್ತಾನಂ। ಇತೋತಿ ಚೀವರದಾನಕಾಲತೋ। ತೇತಿ ಅನ್ತೋವಸ್ಸೇ ವುತ್ಥಭಿಕ್ಖೂ।
Ṭhapetvāti vihāre ṭhapetvā. Sampattānanti imaṃ ṭhānaṃ sampattānaṃ. Itoti cīvaradānakālato. Teti antovasse vutthabhikkhū.
ಆದಿಸ್ಸಾತಿ ಪದಸ್ಸ ತ್ವಾಪಚ್ಚಯನ್ತಭಾವಂ ದಸ್ಸೇನ್ತೋ ಆಹ ‘‘ಆದಿಸಿತ್ವಾ’’ತಿ। ಅಯಮತ್ಥೋ ವೇದಿತಬ್ಬೋತಿ ಯೋಜನಾ। ತತ್ರಾತಿ ‘‘ಯಾಗುಯಾ ವಾ’’ತಿಆದಿಪಾಠೇ। ಅಜ್ಜತನಾಯ ವಾತಿ ಅಜ್ಜ ಭವಾನಂ ಪುಞ್ಞಾನಂ ಅತ್ಥಾಯ ವಾ। ತೇಸನ್ತಿ ನಿಮನ್ತಕಾನಂ, ಪವಿಟ್ಠಾನಂ ಭಿಕ್ಖೂನನ್ತಿ ಸಮ್ಬನ್ಧೋ। ಯೇಹಿ ನಿಮನ್ತಿತೇಹೀತಿ ನಿಮನ್ತಿತೇಹಿ ಯೇಹಿ ಭಿಕ್ಖೂಹಿ। ಯೇಸಂ ವಾ ಪತ್ತನ್ತಿ ಸಮ್ಬನ್ಧೋ। ತೇಸಂ ನ ಪಾಪುಣಾತೀತಿ ಸಬ್ಬೇಸಂ ತೇಸಂ ನ ಪಾಪುಣಾತಿ, ಕಸ್ಮಾ? ಅನಿಮನ್ತಿತತ್ತಾ। ತೇಸಂ ನ ಪಾಪುಣನ್ತಿ, ಕಸ್ಮಾ? ನಿಮನ್ತಿತಗೇಹಂ ಅಪವಿಟ್ಠತ್ತಾ। ಸೋತಿ ದಾಯಕೋ।
Ādissāti padassa tvāpaccayantabhāvaṃ dassento āha ‘‘ādisitvā’’ti. Ayamattho veditabboti yojanā. Tatrāti ‘‘yāguyā vā’’tiādipāṭhe. Ajjatanāya vāti ajja bhavānaṃ puññānaṃ atthāya vā. Tesanti nimantakānaṃ, paviṭṭhānaṃ bhikkhūnanti sambandho. Yehi nimantitehīti nimantitehi yehi bhikkhūhi. Yesaṃ vā pattanti sambandho. Tesaṃ na pāpuṇātīti sabbesaṃ tesaṃ na pāpuṇāti, kasmā? Animantitattā. Tesaṃ na pāpuṇanti, kasmā? Nimantitagehaṃ apaviṭṭhattā. Soti dāyako.
ಪುಬ್ಬೇಪೀತಿ ಇತೋ ಪುಬ್ಬೇಪಿ। ಅಸ್ಸಾತಿ ದಾಯಕಸ್ಸ। ವಾಸೇತ್ವಾತಿ ವಾಸಾಪೇತ್ವಾ। ಸೋತಿ ದಾಯಕೋ। ಯೋತಿ ಭಿಕ್ಖು, ವಸತೀತಿ ಸಮ್ಬನ್ಧೋ। ತಾನೀತಿ ಭೇಸಜ್ಜಾನಿ। ಇದನ್ತಿ ಚೀವರಂ।
Pubbepīti ito pubbepi. Assāti dāyakassa. Vāsetvāti vāsāpetvā. Soti dāyako. Yoti bhikkhu, vasatīti sambandho. Tānīti bhesajjāni. Idanti cīvaraṃ.
‘‘ಅನ್ತೇವಾಸಿಕಾನಞ್ಚಾ’’ತಿ ಪದೇನ ಸದ್ಧಿವಿಹಾರಿಕಾಪಿ ಗಹೇತಬ್ಬಾ ಉದ್ದೇಸಾದಿವಸೇನ ಅನ್ತೇ ವಸನಸೀಲತ್ತಾ। ಉದ್ದೇಸಂ ಗಹೇತುಂ ಆಗತೋ ಚ ಗಹೇತ್ವಾ ಗಚ್ಛನ್ತೋ ಚಾತಿ ಇಮೇ ಅನ್ತೇ ಅವಸನಸೀಲಾಪಿ ರೂಳ್ಹೀವಸೇನ ಅನ್ತೇವಾಸಿಕಾ ನಾಮ। ಇಮಿನಾ ನಿಸ್ಸಯಂ ಗಹೇತುಂ ಆಗತೋ ಚ ಥೇರಸ್ಸ ಸನ್ತಿಕೇ ನಿಸ್ಸಯಂ ಗಹಿತಪುಬ್ಬೋ ಚ ಅನ್ತೇವಾಸಿಕೋ ನಾಮಾತಿ ದಸ್ಸೇತಿ। ವತ್ತಂ ಕತ್ವಾ ಉದ್ದೇಸಪರಿಪುಚ್ಛಾದೀನಿ ಗಹೇತ್ವಾ ವಿಚರನ್ತಾನಂ ಸಬ್ಬೇಸಂ ಉದ್ದೇಸನ್ತೇವಾಸಿಕಾನಂ ಪಾಪುಣಾತೀತಿ ಯೋಜನಾ। ಇಮಿನಾ ಸದ್ಧಿವಿಹಾರಿಕನಿಸ್ಸಯನ್ತೇವಾಸಿಕಉಪಸಮ್ಪದನ್ತೇವಾಸಿಕಪಬ್ಬಜ್ಜನ್ತೇವಾಸಿಕಾಪಿ ಗಹೇತಬ್ಬಾ ತೇಸಮ್ಪಿ ನಿಬದ್ಧಚಾರಿಕಭಿಕ್ಖುಭಾವತೋ। ಸಬ್ಬತ್ಥಾತಿ ಸಬ್ಬಸ್ಮಿಂ ಚೀವರಕ್ಖನ್ಧಕೇ।
‘‘Antevāsikānañcā’’ti padena saddhivihārikāpi gahetabbā uddesādivasena ante vasanasīlattā. Uddesaṃ gahetuṃ āgato ca gahetvā gacchanto cāti ime ante avasanasīlāpi rūḷhīvasena antevāsikā nāma. Iminā nissayaṃ gahetuṃ āgato ca therassa santike nissayaṃ gahitapubbo ca antevāsiko nāmāti dasseti. Vattaṃ katvā uddesaparipucchādīni gahetvā vicarantānaṃ sabbesaṃ uddesantevāsikānaṃ pāpuṇātīti yojanā. Iminā saddhivihārikanissayantevāsikaupasampadantevāsikapabbajjantevāsikāpi gahetabbā tesampi nibaddhacārikabhikkhubhāvato. Sabbatthāti sabbasmiṃ cīvarakkhandhake.
ಇತಿ ಚೀವರಕ್ಖನ್ಧಕವಣ್ಣನಾಯ ಯೋಜನಾ ಸಮತ್ತಾ।
Iti cīvarakkhandhakavaṇṇanāya yojanā samattā.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಮಹಾವಗ್ಗಪಾಳಿ • Mahāvaggapāḷi / ೨೩೨. ಅಟ್ಠಚೀವರಮಾತಿಕಾ • 232. Aṭṭhacīvaramātikā
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಮಹಾವಗ್ಗ-ಅಟ್ಠಕಥಾ • Mahāvagga-aṭṭhakathā / ಅಟ್ಠಚೀವರಮಾತಿಕಾಕಥಾ • Aṭṭhacīvaramātikākathā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ಅಟ್ಠಚೀವರಮಾತಿಕಾಕಥಾವಣ್ಣನಾ • Aṭṭhacīvaramātikākathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ಅಟ್ಠಚೀವರಮಾತಿಕಾಕಥಾವಣ್ಣನಾ • Aṭṭhacīvaramātikākathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ಅಟ್ಠಚೀವರಮಾತಿಕಾಕಥಾವಣ್ಣನಾ • Aṭṭhacīvaramātikākathāvaṇṇanā
