| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
அட்ட²சீவரமாதிகாகதா²வண்ணனா
Aṭṭhacīvaramātikākathāvaṇṇanā
379. புக்³க³லாதி⁴ட்டா²னநயேன வுத்தந்தி ‘‘ஸீமாய தா³ன’’ந்திஆதி³னா வத்தப்³பே³ ‘‘ஸீமாய தே³தீ’’திஆதி³ புக்³க³லாதி⁴ட்டா²னேன வுத்தங். ‘‘அபிசா’’திஆதி³னா பட²மலெட்³டு³பாதபூ⁴தபரிக்கே²பாரஹட்டா²னதோ ப³ஹி து³தியலெட்³டு³பாதோபி உபசாரஸீமா ஏவாதி த³ஸ்ஸேதி. து⁴வஸன்னிபாதட்டா²னாதி³கம்பி பரியந்தே டி²தமேவ க³ஹேதப்³ப³ங். லோகே கா³மஸீமாத³யோ விய லாப⁴ஸீமா நாம விஸுங் பஸித்³தா⁴ நாம நத்தி², கேனாயங் அனுஞ்ஞாதாதி ஆஹ ‘‘நேவ ஸம்மாஸம்பு³த்³தே⁴னா’’திஆதி³. ஏதேன நாயங் ஸாஸனவோஹாரஸித்³தா⁴, லோகவோஹாரஸித்³தா⁴ ஏவாதி த³ஸ்ஸேதி. ‘‘ஜனபத³பரிச்சே²தோ³’’தி இத³ங் லோகபஸித்³த⁴ஸீமாஸத்³த³த்த²வஸேன வுத்தங். பரிச்சே²த³ப்³ப⁴ந்தரங் பன ஸப்³ப³ங் ஜனபத³ஸீமாதி க³ஹேதப்³ப³ங், ஜனபதோ³ ஏவ ஜனபத³ஸீமா. ஏவங் ரட்ட²ஸீமாதீ³ஸுபி. தேனாஹ ‘‘ஆணாபவத்திட்டா²ன’’ந்திஆதி³.
379.Puggalādhiṭṭhānanayena vuttanti ‘‘sīmāya dāna’’ntiādinā vattabbe ‘‘sīmāya detī’’tiādi puggalādhiṭṭhānena vuttaṃ. ‘‘Apicā’’tiādinā paṭhamaleḍḍupātabhūtaparikkhepārahaṭṭhānato bahi dutiyaleḍḍupātopi upacārasīmā evāti dasseti. Dhuvasannipātaṭṭhānādikampi pariyante ṭhitameva gahetabbaṃ. Loke gāmasīmādayo viya lābhasīmā nāma visuṃ pasiddhā nāma natthi, kenāyaṃ anuññātāti āha ‘‘neva sammāsambuddhenā’’tiādi. Etena nāyaṃ sāsanavohārasiddhā, lokavohārasiddhā evāti dasseti. ‘‘Janapadaparicchedo’’ti idaṃ lokapasiddhasīmāsaddatthavasena vuttaṃ. Paricchedabbhantaraṃ pana sabbaṃ janapadasīmāti gahetabbaṃ, janapado eva janapadasīmā. Evaṃ raṭṭhasīmādīsupi. Tenāha ‘‘āṇāpavattiṭṭhāna’’ntiādi.
பத²வீவேமஜ்ஜே² க³தஸ்ஸாதி யாவ உத³கபரியந்தா க²ண்ட³ஸீமத்தா வுத்தங், உபசாரஸீமாதீ³ஸு பன அப³த்³த⁴ஸீமாஸு ஹெட்டா²பத²வியங் ஸப்³ப³த்த² டி²தானங் ந பாபுணாதி, கூபாதி³பவேஸாரஹட்டா²னே டி²தானஞ்ஞேவ பாபுணாதீதி ஹெட்டா² ஸீமாகதா²யங் வுத்தனயேன தங்தங்ஸீமட்ட²பா⁴வோ வேதி³தப்³போ³. சக்கவாளஸீமாய பன தி³ன்னங் பத²வீஸந்தா⁴ரகஉத³கட்டா²னேபி டி²தானங் பாபுணாதி ஸப்³ப³த்த² சக்கவாளவோஹாரத்தா.
Pathavīvemajjhe gatassāti yāva udakapariyantā khaṇḍasīmattā vuttaṃ, upacārasīmādīsu pana abaddhasīmāsu heṭṭhāpathaviyaṃ sabbattha ṭhitānaṃ na pāpuṇāti, kūpādipavesārahaṭṭhāne ṭhitānaññeva pāpuṇātīti heṭṭhā sīmākathāyaṃ vuttanayena taṃtaṃsīmaṭṭhabhāvo veditabbo. Cakkavāḷasīmāya pana dinnaṃ pathavīsandhārakaudakaṭṭhānepi ṭhitānaṃ pāpuṇāti sabbattha cakkavāḷavohārattā.
பு³த்³தா⁴தி⁴வுத்தோ²தி பு³த்³தே⁴ன ப⁴க³வதா நிவுத்தோ². பாகவட்டந்தி நிப³த்³த⁴தா³னங். வத்ததீதி பவத்ததி. தேஹீதி யேஸங் ஸம்முகே² ஏஸ தே³தி, தேஹி பி⁴க்கூ²ஹி. து³தியபா⁴கே³ பன தே²ராஸனங் ஆருள்ஹேதி யாவ ஸங்க⁴னவகா ஏகவாரங் ஸப்³பே³ஸங் பா⁴க³ங் த³த்வா சீவரே அபரிக்கீ²ணே புன ஸப்³பே³ஸங் தா³துங் து³தியபா⁴கே³ தே²ரஸ்ஸ தி³ன்னேதி அத்தோ². பங்ஸுகூலிகானம்பி வட்டதீதி எத்த² ‘‘துய்ஹங் தே³மா’’தி அவுத்தத்தாதி காரணங் வத³ந்தி. யதி³ ஏவங் ‘‘ஸங்க⁴ஸ்ஸ தே³மா’’தி வுத்தேபி வட்டெய்ய, ‘‘பி⁴க்கூ²னங் தே³ம, தே²ரானங் தே³ம, ஸங்க⁴ஸ்ஸ தே³மா’’தி (மஹாவ॰ அட்ட²॰ 379) வசனதோ பே⁴தோ³ ந தி³ஸ்ஸதி. வீமங்ஸிதப்³ப³மெத்த² காரணங்.
Buddhādhivutthoti buddhena bhagavatā nivuttho. Pākavaṭṭanti nibaddhadānaṃ. Vattatīti pavattati. Tehīti yesaṃ sammukhe esa deti, tehi bhikkhūhi. Dutiyabhāge pana therāsanaṃ āruḷheti yāva saṅghanavakā ekavāraṃ sabbesaṃ bhāgaṃ datvā cīvare aparikkhīṇe puna sabbesaṃ dātuṃ dutiyabhāge therassa dinneti attho. Paṃsukūlikānampi vaṭṭatīti ettha ‘‘tuyhaṃ demā’’ti avuttattāti kāraṇaṃ vadanti. Yadi evaṃ ‘‘saṅghassa demā’’ti vuttepi vaṭṭeyya, ‘‘bhikkhūnaṃ dema, therānaṃ dema, saṅghassa demā’’ti (mahāva. aṭṭha. 379) vacanato bhedo na dissati. Vīmaṃsitabbamettha kāraṇaṃ.
பாருபிதுங் வட்டதீதி பங்ஸுகூலிகானங் வட்டதி. பி⁴க்கு²ஸங்க⁴ஸ்ஸ ச பி⁴க்கு²னீனஞ்ச த³ம்மீதி வுத்தே பன ந மஜ்ஜே² பி⁴ந்தி³த்வா தா³தப்³ப³ந்தி எத்த² யஸ்மா பி⁴க்கு²னிபக்கே² ஸங்க⁴ஸ்ஸ பச்சேகங் அபராமட்ட²த்தா பி⁴க்கு²னீனங் க³ணனாய பா⁴கோ³ தா³தப்³போ³தி தா³யகஸ்ஸ அதி⁴ப்பாயோதி ஸிஜ்ஜ²தி, ததா² தா³னஞ்ச பி⁴க்கூ²பி க³ணெத்வா தி³ன்னே ஏவ யுஜ்ஜதி. இதரதா² ஹி கித்தகங் பி⁴க்கூ²னங் தா³தப்³ப³ங், கித்தகங் பி⁴க்கு²னீனந்தி ந விஞ்ஞாயதி, தஸ்மா ‘‘பி⁴க்கு²ஸங்க⁴ஸ்ஸா’’தி வுத்தவசனம்பி ‘‘பி⁴க்கூ²ன’’ந்தி வுத்தவசனஸதி³ஸமேவாதி ஆஹ ‘‘பி⁴க்கூ² ச பி⁴க்கு²னியோ ச க³ணெத்வா தா³தப்³ப³’’ந்தி. தேனாஹ ‘‘புக்³க³லோ …பே॰… பி⁴க்கு²ஸங்க⁴க்³க³ஹணேன அக்³க³ஹிதத்தா’’தி. பி⁴க்கு²ஸங்க⁴-ஸத்³தே³ன பி⁴க்கூ²னஞ்ஞேவ க³ஹிதத்தா, புக்³க³லஸ்ஸ பன ‘‘துய்ஹஞ்சா’’தி விஸுங் க³ஹிதத்தா ச தத்த²ஸ்ஸ அக்³க³ஹிததா த³ட்ட²ப்³பா³, ‘‘பி⁴க்கூ²னஞ்ச பி⁴க்கு²னீனஞ்ச துய்ஹஞ்சா’’தி வுத்தட்டா²னஸதி³ஸத்தாதி அதி⁴ப்பாயோ. புக்³க³லப்பதா⁴னோ ஹெத்த² ஸங்க⁴-ஸத்³தோ³ த³ட்ட²ப்³போ³. கேசி பன ‘‘பி⁴க்கு²ஸங்க⁴க்³க³ஹணேன க³ஹிதத்தா’’தி (ஸாரத்த²॰ டீ॰ மஹாவக்³க³ 3.379) பாட²ங் லிக²ந்தி, தங் ந ஸுந்த³ரங் தஸ்ஸ விஸுங் லாப⁴க்³க³ஹணே காரணவசனத்தா. ததா² ஹி விஸுங் ஸங்க⁴க்³க³ஹணேன க³ஹிதத்தாதி விஸுங் புக்³க³லஸ்ஸபி பா⁴க³க்³க³ஹணே காரணங் வுத்தங். யதா² செத்த² புக்³க³லஸ்ஸ அக்³க³ஹணங், ஏவங் உபரி ‘‘பி⁴க்கு²ஸங்க⁴ஸ்ஸ ச துய்ஹஞ்சா’’திஆதீ³ஸுபி ஸங்கா⁴தி³-ஸத்³தே³ஹி புக்³க³லஸ்ஸ அக்³க³ஹணங் த³ட்ட²ப்³ப³ங். யதி³ ஹி க³ஹணங் ஸியா, ஸங்க⁴தோபி, விஸும்பீதி பா⁴க³த்³வயங் லபெ⁴ய்ய உப⁴யத்த² க³ஹிதத்தா.
Pārupituṃ vaṭṭatīti paṃsukūlikānaṃ vaṭṭati. Bhikkhusaṅghassa ca bhikkhunīnañca dammīti vutte pana na majjhe bhinditvā dātabbanti ettha yasmā bhikkhunipakkhe saṅghassa paccekaṃ aparāmaṭṭhattā bhikkhunīnaṃ gaṇanāya bhāgo dātabboti dāyakassa adhippāyoti sijjhati, tathā dānañca bhikkhūpi gaṇetvā dinne eva yujjati. Itarathā hi kittakaṃ bhikkhūnaṃ dātabbaṃ, kittakaṃ bhikkhunīnanti na viññāyati, tasmā ‘‘bhikkhusaṅghassā’’ti vuttavacanampi ‘‘bhikkhūna’’nti vuttavacanasadisamevāti āha ‘‘bhikkhū ca bhikkhuniyo ca gaṇetvā dātabba’’nti. Tenāha ‘‘puggalo…pe… bhikkhusaṅghaggahaṇena aggahitattā’’ti. Bhikkhusaṅgha-saddena bhikkhūnaññeva gahitattā, puggalassa pana ‘‘tuyhañcā’’ti visuṃ gahitattā ca tatthassa aggahitatā daṭṭhabbā, ‘‘bhikkhūnañca bhikkhunīnañca tuyhañcā’’ti vuttaṭṭhānasadisattāti adhippāyo. Puggalappadhāno hettha saṅgha-saddo daṭṭhabbo. Keci pana ‘‘bhikkhusaṅghaggahaṇena gahitattā’’ti (sārattha. ṭī. mahāvagga 3.379) pāṭhaṃ likhanti, taṃ na sundaraṃ tassa visuṃ lābhaggahaṇe kāraṇavacanattā. Tathā hi visuṃ saṅghaggahaṇena gahitattāti visuṃ puggalassapi bhāgaggahaṇe kāraṇaṃ vuttaṃ. Yathā cettha puggalassa aggahaṇaṃ, evaṃ upari ‘‘bhikkhusaṅghassa ca tuyhañcā’’tiādīsupi saṅghādi-saddehi puggalassa aggahaṇaṃ daṭṭhabbaṃ. Yadi hi gahaṇaṃ siyā, saṅghatopi, visumpīti bhāgadvayaṃ labheyya ubhayattha gahitattā.
பூஜேதப்³ப³ந்திஆதி³ கி³ஹிகம்மங் ந ஹோதீதி த³ஸ்ஸனத்த²ங் வுத்தங். ‘‘பி⁴க்கு²ஸங்க⁴ஸ்ஸ ஹரா’’தி இத³ங் பிண்ட³பாதஹரணங் ஸந்தா⁴ய வுத்தங். தேனாஹ ‘‘பு⁴ஞ்ஜிதுங் வட்டதீ’’தி. ‘‘அந்தோஹேமந்தே’’தி இமினா அனத்த²தே கதி²னே வஸ்ஸானங் பச்சி²மே மாஸே தி³ன்னங் புரிமவஸ்ஸங்வுத்தா²னஞ்ஞேவ பாபுணாதி, ததோ பரங் ஹேமந்தே தி³ன்னங் பச்சி²மவஸ்ஸங்வுத்தா²னம்பி வுத்த²வஸ்ஸத்தா பாபுணாதி. ஹேமந்ததோ பன பரங் பிட்டி²ஸமயே ‘‘வஸ்ஸங்வுத்த²ஸங்க⁴ஸ்ஸா’’தி ஏவங் வத்வா தி³ன்னங் அனந்தரே வஸ்ஸே வா ததோ பரேஸு வா யத்த² கத்த²சி தஸ்மிங் வுத்த²வஸ்ஸானங் ஸப்³பே³ஸங் பாபுணாதி. யே பன ஸப்³ப³தா² அவுத்த²வஸ்ஸா, தேஸங் ந பாபுணாதீதி த³ஸ்ஸேதி. ஸப்³பே³ஸம்பீதி ஹி தஸ்மிங் பி⁴க்கு²பா⁴வே வுத்த²வஸ்ஸானங் ஸப்³பே³ஸம்பீதி அத்தோ² த³ட்ட²ப்³போ³. ‘‘வஸ்ஸங்வுத்த²ஸங்க⁴ஸ்ஸா’’தி வுத்தத்தா ஸம்முகீ²பூ⁴தானங் ஸப்³பே³ஸந்தி எத்தா²பி ஏஸேவ நயோ. அதீதவஸ்ஸந்தி அனந்தராதீதவஸ்ஸங்.
Pūjetabbantiādi gihikammaṃ na hotīti dassanatthaṃ vuttaṃ. ‘‘Bhikkhusaṅghassa harā’’ti idaṃ piṇḍapātaharaṇaṃ sandhāya vuttaṃ. Tenāha ‘‘bhuñjituṃ vaṭṭatī’’ti. ‘‘Antohemante’’ti iminā anatthate kathine vassānaṃ pacchime māse dinnaṃ purimavassaṃvutthānaññeva pāpuṇāti, tato paraṃ hemante dinnaṃ pacchimavassaṃvutthānampi vutthavassattā pāpuṇāti. Hemantato pana paraṃ piṭṭhisamaye ‘‘vassaṃvutthasaṅghassā’’ti evaṃ vatvā dinnaṃ anantare vasse vā tato paresu vā yattha katthaci tasmiṃ vutthavassānaṃ sabbesaṃ pāpuṇāti. Ye pana sabbathā avutthavassā, tesaṃ na pāpuṇātīti dasseti. Sabbesampīti hi tasmiṃ bhikkhubhāve vutthavassānaṃ sabbesampīti attho daṭṭhabbo. ‘‘Vassaṃvutthasaṅghassā’’ti vuttattā sammukhībhūtānaṃ sabbesanti etthāpi eseva nayo. Atītavassanti anantarātītavassaṃ.
உத்³தே³ஸங் க³ஹேதுங் ஆக³தோதி உத்³தே³ஸே அக்³க³ஹிதேபி அந்தேவாஸிகோவாதி வுத்தங். க³ஹெத்வா க³ச்ச²ந்தோதி பரினிட்டி²தஉத்³தே³ஸோ ஹுத்வா க³ச்ச²ந்தோ. ‘‘வத்தங் கத்வா உத்³தே³ஸபரிபுச்சா²தீ³னி க³ஹெத்வா விசரந்தான’’ந்தி இத³ங் ‘‘உத்³தே³ஸந்தேவாஸிகான’’ந்தி இமஸ்ஸேவ விஸேஸனங், தேன உத்³தே³ஸகாலே ஆக³ந்த்வா உத்³தே³ஸங் க³ஹெத்வா க³ந்த்வா அஞ்ஞத்த² நிவஸந்தே அனிப³த்³த⁴சாரிகே நிவத்தேதி.
Uddesaṃ gahetuṃ āgatoti uddese aggahitepi antevāsikovāti vuttaṃ. Gahetvā gacchantoti pariniṭṭhitauddeso hutvā gacchanto. ‘‘Vattaṃ katvā uddesaparipucchādīni gahetvā vicarantāna’’nti idaṃ ‘‘uddesantevāsikāna’’nti imasseva visesanaṃ, tena uddesakāle āgantvā uddesaṃ gahetvā gantvā aññattha nivasante anibaddhacārike nivatteti.
அட்ட²சீவரமாதிகாகதா²வண்ணனா நிட்டி²தா.
Aṭṭhacīvaramātikākathāvaṇṇanā niṭṭhitā.
சீவரக்க²ந்த⁴கவண்ணனானயோ நிட்டி²தோ.
Cīvarakkhandhakavaṇṇanānayo niṭṭhito.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 232. அட்ட²சீவரமாதிகா • 232. Aṭṭhacīvaramātikā
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / அட்ட²சீவரமாதிகாகதா² • Aṭṭhacīvaramātikākathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / அட்ட²சீவரமாதிகாகதா²வண்ணனா • Aṭṭhacīvaramātikākathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / அட்ட²சீவரமாதிகாகதா²வண்ணனா • Aṭṭhacīvaramātikākathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 232. அட்ட²சீவரமாதிகாகதா² • 232. Aṭṭhacīvaramātikākathā
