| Library / Tipiṭaka / д̇ибидага • Tipiṭaka / важ̇ираб̣уд̣̇д̇хи-дийгаа • Vajirabuddhi-ṭīkā |
адтажийварамаад̇игаагат̇ааван̣н̣анаа
Aṭṭhacīvaramātikākathāvaṇṇanā
379. яасмаа абаригкид̇д̇асса баригкзбаарахадтаанам̣ д̣̇уб̣б̣иж̇аанам̣, д̇асмаа ‘‘абижаа’’д̇иаад̣̇и вуд̇д̇ам̣. д̇ад̇т̇а д̇хувасаннибаад̇адтаанамби барияанд̇аг̇ад̇амзва г̇ахзд̇аб̣б̣ам̣. ‘‘махаабажжарияам̣ бана бхигкуусуби…бз… баабун̣аад̇ийд̇и ‘убажаарасиймааяа д̣̇змаа’д̇и звам̣ д̣̇иннамзва санд̇хааяаа’’д̇и ликид̇ам̣ . ‘‘самаанасам̣ваасагасиймааяаа’’д̇и вуд̇д̇з кан̣д̣асиймаад̣̇ийсу тид̇аанам̣ на баабун̣аад̇и д̇аасам̣ висум̣ самаанасам̣ваасагасиймад̇д̇аа. самаанасам̣ваасагаавиббаваасасиймаанам̣ ид̣̇ам̣ наанад̇д̇ам̣ – ‘‘авиббаваасасиймааяа д̣̇аммий’’д̇и д̣̇иннам̣ г̇аамадтаанам̣ на баабун̣аад̇и. гасмаа? ‘‘табзд̇ваа г̇ааман̃жа г̇аамуубажааран̃жаа’’д̇и вуд̇д̇ад̇д̇аа. ‘‘самаанасам̣ваасагасиймааяаа’’д̇и д̣̇иннам̣ бана яасмим̣ таанз авиббаваасасиймаа ад̇т̇и, д̇ад̇т̇а тид̇аанам̣, ид̇арад̇ра тид̇аанан̃жа баабун̣аад̇и. ‘‘кан̣д̣асиймааяам̣ тад̇ваа ‘сиймадтагасан̇гхасса д̣̇аммий’д̇и вуд̇д̇з убажаарасиймааяа зва барижчинд̣̇ид̇ваа д̣̇аад̇аб̣б̣а’’нд̇и вуд̇д̇ам̣. ‘‘авиббаваасасиймааяа д̣̇змаа’’д̇и кан̣д̣асиймааяам̣ тад̇ваа д̣̇иннз д̇ад̇т̇зва баабун̣аад̇ийд̇и гзжи. яож̇анасад̇амби буурзд̇ваа нисийд̣̇анд̇ийд̇и зд̇т̇а вихааруубажаарз хад̇т̇абаасзна, б̣ахиг̇аамаад̣̇ийсу д̣̇ваад̣̇асахад̇т̇зна убажаарод̇и згз. ‘‘имасмим̣ вихаарз сан̇гхассаа’’д̇и вуд̇д̇з згааб̣ад̣̇д̇хаа худ̇вааби баригкзбабаригкзбаарахадтаанам̣ ад̇иггамид̇ваа тид̇аанам̣ на баабун̣аад̇ийд̇и згз. ‘‘бхигкунивихаарад̇о б̣ахи яад̇т̇а гад̇т̇ажи тад̇ваа ‘сан̇гхассаа’д̇и вуд̇д̇з бхигкусан̇гхова саамий’’д̇и вад̣̇анд̇и. згоби г̇анд̇ваад̇и зд̇т̇а саб̣б̣зсам̣ ваа баабзд̇ваа г̇анд̇аб̣б̣ам̣, аанзд̇ваа ваа баабзд̇аб̣б̣ам̣, ид̇арат̇аа г̇ад̇асса на баабун̣аад̇и. самааналаабхагад̇игаа муулааваасз сад̇и сияаа, муулааваасавинаасзна гад̇игааби винассад̇и. самааналаабхаважанам̣ сад̇и д̣̇вийсу, б̣ахуусу ваа яуж̇ж̇ад̇и. д̇знзва згасмим̣ авасидтз яуж̇ж̇ад̇ийд̇и но мад̇и.
379. Yasmā aparikkhittassa parikkhepārahaṭṭhānaṃ dubbijānaṃ, tasmā ‘‘apicā’’tiādi vuttaṃ. Tattha dhuvasannipātaṭṭhānampi pariyantagatameva gahetabbaṃ. ‘‘Mahāpaccariyaṃ pana bhikkhūsupi…pe… pāpuṇātīti ‘upacārasīmāya demā’ti evaṃ dinnameva sandhāyā’’ti likhitaṃ . ‘‘Samānasaṃvāsakasīmāyā’’ti vutte khaṇḍasīmādīsu ṭhitānaṃ na pāpuṇāti tāsaṃ visuṃ samānasaṃvāsakasīmattā. Samānasaṃvāsakaavippavāsasīmānaṃ idaṃ nānattaṃ – ‘‘avippavāsasīmāya dammī’’ti dinnaṃ gāmaṭṭhānaṃ na pāpuṇāti. Kasmā? ‘‘Ṭhapetvā gāmañca gāmūpacārañcā’’ti vuttattā. ‘‘Samānasaṃvāsakasīmāyā’’ti dinnaṃ pana yasmiṃ ṭhāne avippavāsasīmā atthi, tattha ṭhitānaṃ, itaratra ṭhitānañca pāpuṇāti. ‘‘Khaṇḍasīmāyaṃ ṭhatvā ‘sīmaṭṭhakasaṅghassa dammī’ti vutte upacārasīmāya eva paricchinditvā dātabba’’nti vuttaṃ. ‘‘Avippavāsasīmāya demā’’ti khaṇḍasīmāyaṃ ṭhatvā dinne tattheva pāpuṇātīti keci. Yojanasatampi pūretvā nisīdantīti ettha vihārūpacāre hatthapāsena, bahigāmādīsu dvādasahatthena upacāroti eke. ‘‘Imasmiṃ vihāre saṅghassā’’ti vutte ekābaddhā hutvāpi parikkhepaparikkhepārahaṭṭhānaṃ atikkamitvā ṭhitānaṃ na pāpuṇātīti eke. ‘‘Bhikkhunivihārato bahi yattha katthaci ṭhatvā ‘saṅghassā’ti vutte bhikkhusaṅghova sāmī’’ti vadanti. Ekopi gantvāti ettha sabbesaṃ vā pāpetvā gantabbaṃ, ānetvā vā pāpetabbaṃ, itarathā gatassa na pāpuṇāti. Samānalābhakatikā mūlāvāse sati siyā, mūlāvāsavināsena katikāpi vinassati. Samānalābhavacanaṃ sati dvīsu, bahūsu vā yujjati. Teneva ekasmiṃ avasiṭṭhe yujjatīti no mati.
‘‘д̇аавагаалигагаалзна, муулажчзд̣̇авасзна ваа;
‘‘Tāvakālikakālena, mūlacchedavasena vā;
ан̃н̃зсам̣ гаммам̣ ан̃н̃асса, сияаа нааваасасан̇г̇амо’’д̇и. –
Aññesaṃ kammaṃ aññassa, siyā nāvāsasaṅgamo’’ti. –
аажарияо.
Ācariyo.
саб̣б̣ад̇т̇а д̣̇иннамзваад̇и ‘‘самаанабхааг̇ова ход̇ий’’д̇и вад̣̇анд̇и. ‘‘згамзгам̣ амхаагам̣ баабун̣аад̇ийд̇и жз вад̣̇ад̇и, ваддад̇ий’’д̇и вад̣̇анд̇и вибхааг̇асса гад̇ад̇д̇аа. ‘‘бхигкусан̇гхасса жийварз д̣̇иннз бам̣сугуулигаанам̣ на ваддад̇ий’’д̇и вад̣̇анд̇и. ‘‘убхад̇осан̇гхассаа’’д̇и вуд̇д̇з ‘‘бхигкусан̇гхассаа’’д̇и авуд̇д̇ад̇д̇аа бхигкунисан̇гхзна миссид̇ад̇д̇аа, д̇ад̇т̇а абарияаабаннад̇д̇аа жа буг̇г̇ало висум̣ лабхад̇и. звам̣ санд̇з ‘‘бхигкусан̇гхасса жа бхигкунисан̇гхасса жа д̣̇аммий’’д̇и вуд̇д̇зби ‘‘убхад̇осан̇гхасса д̣̇иннамзва ход̇ий’’д̇и иминаа вируж̇жхад̇ийд̇и жз? на вируж̇жхад̇и, д̇ам̣ д̣̇виннам̣ сан̇гхаанам̣ д̣̇иннабхаавамзва д̣̇ийбзд̇и, на убхад̇осан̇гхабан̃н̃ад̇д̇им̣, д̇асмаа зва ‘‘бхигкусан̇гхасса жа бхигкунисан̇гхасса жа д̇уяхан̃жаа’’д̇и вааро на вуд̇д̇о. ат̇а ваа адтагат̇ааважанамзва бамаан̣ам̣, на вижааран̣аад̇и згз. яасмаа зго ад̣̇д̇хаанаад̣̇ияаго вияа д̣̇увид̇хо на ход̇и, д̇асмаа убхад̇осан̇гхаг̇г̇ахан̣зна зго бхигку на г̇ахид̇од̇и . ‘‘саб̣б̣ааваасасса жа жзд̇ияасса жа д̇хаммасса жаа’д̇и вуд̇д̇з саб̣б̣авихаарзсу жзд̇ияад̇хаммаанам̣ згзгасса бхигкуно бхааг̇о д̣̇аад̇аб̣б̣о’’д̇и вад̣̇анд̇и. ‘‘бхигкусан̇гхасса жа жзд̇ияасса жаа’’д̇и вуд̇д̇з на вируж̇жхад̇ийд̇и жз? на, д̇ад̇т̇а ‘‘бхигкусан̇гхассаа’’д̇и вуд̇д̇ад̇д̇аа, ид̇ха вихаарзна гхадид̇ад̇д̇аа жа д̇амхи д̇амхи вихаарз згабхааг̇ам̣ лабхид̇аб̣б̣амзваад̇и барихаранд̇и. ад̇д̇ано баабзд̇ваад̇и вигаалз абарибхог̇ад̇д̇аа сагалоби ваддзяяаад̇и жз? ‘‘бхигкусан̇гхасса хараа’’д̇и вуд̇д̇ад̇д̇аа, д̇зна ‘‘хараамий’’д̇и г̇ахид̇ад̇д̇аа жа на ваддад̇и. бажчимавассам̣вуд̇т̇аанамбийд̇и зд̇т̇а аби-сад̣̇д̣̇о авад̇хааран̣ад̇т̇о, бажчимавассам̣вуд̇т̇аанамзваад̇и ад̇т̇о, ид̇арат̇аа самужжаяад̇т̇з г̇ахид̇з ‘‘лагкан̣ан̃н̃уу вад̣̇анд̇ий’’д̇и важанам̣ нирад̇т̇агам̣ сияаа. гасмаад̇и аарабхид̇ваа бабан̃жам̣ гаронд̇и. гим̣ д̇зна, барад̇о ‘‘жийварамаасад̇о бадтааяа…бз… ад̇ийд̇авассам̣вуд̇т̇аанамзва баабун̣аад̇ий’’д̇и иминаа сид̣̇д̇хад̇д̇аа на вижаарид̇ам̣, д̇зна вуд̇д̇ам̣ ‘‘лагкан̣ан̃н̃уу’’д̇и ажалавасзна. сажз бана б̣ахиубажаарасиймааяа тид̇о…бз… самбад̇д̇аанам̣ саб̣б̣зсам̣ баабун̣аад̇ийд̇и яад̇т̇а гад̇т̇ажи вуд̇т̇авассаананд̇и ад̇хиббааяо ‘‘яад̇т̇а гад̇т̇ажи вуд̇т̇авассаанам̣ саб̣б̣зсам̣ самбад̇д̇аанам̣ баабун̣аад̇ий’’д̇и (ган̇каа. адта. агаалажийварасигкаабад̣̇аван̣н̣анаа) ган̇каавид̇аран̣ияам̣ вуд̇д̇ад̇д̇аа. г̇имхаанам̣ батамад̣̇ивасад̇о бадтааяа вуд̇д̇з бана яасмаа ананд̇араад̇ийд̇ам̣ хзманд̇ам̣ зва вуд̇т̇аа наама хонд̇и, на вассам̣, д̇асмаа ‘‘маад̇игаа ааробзд̇аб̣б̣аа’’д̇и вуд̇д̇ам̣. яз ваа т̇зрзхи бзсид̇аа, д̇зсам̣ баабун̣аад̇ийд̇и гира ад̇т̇о.
Sabbattha dinnamevāti ‘‘samānabhāgova hotī’’ti vadanti. ‘‘Ekamekaṃ amhākaṃ pāpuṇātīti ce vadati, vaṭṭatī’’ti vadanti vibhāgassa katattā. ‘‘Bhikkhusaṅghassa cīvare dinne paṃsukūlikānaṃ na vaṭṭatī’’ti vadanti. ‘‘Ubhatosaṅghassā’’ti vutte ‘‘bhikkhusaṅghassā’’ti avuttattā bhikkhunisaṅghena missitattā, tattha apariyāpannattā ca puggalo visuṃ labhati. Evaṃ sante ‘‘bhikkhusaṅghassa ca bhikkhunisaṅghassa ca dammī’’ti vuttepi ‘‘ubhatosaṅghassa dinnameva hotī’’ti iminā virujjhatīti ce? Na virujjhati, taṃ dvinnaṃ saṅghānaṃ dinnabhāvameva dīpeti, na ubhatosaṅghapaññattiṃ, tasmā eva ‘‘bhikkhusaṅghassa ca bhikkhunisaṅghassa ca tuyhañcā’’ti vāro na vutto. Atha vā aṭṭhakathāvacanameva pamāṇaṃ, na vicāraṇāti eke. Yasmā eko addhānādiyako viya duvidho na hoti, tasmā ubhatosaṅghaggahaṇena eko bhikkhu na gahitoti . ‘‘Sabbāvāsassa ca cetiyassa ca dhammassa cā’ti vutte sabbavihāresu cetiyadhammānaṃ ekekassa bhikkhuno bhāgo dātabbo’’ti vadanti. ‘‘Bhikkhusaṅghassa ca cetiyassa cā’’ti vutte na virujjhatīti ce? Na, tattha ‘‘bhikkhusaṅghassā’’ti vuttattā, idha vihārena ghaṭitattā ca tamhi tamhi vihāre ekabhāgaṃ labhitabbamevāti pariharanti. Attano pāpetvāti vikāle aparibhogattā sakalopi vaṭṭeyyāti ce? ‘‘Bhikkhusaṅghassa harā’’ti vuttattā, tena ‘‘harāmī’’ti gahitattā ca na vaṭṭati. Pacchimavassaṃvutthānampīti ettha api-saddo avadhāraṇattho, pacchimavassaṃvutthānamevāti attho, itarathā samuccayatthe gahite ‘‘lakkhaṇaññū vadantī’’ti vacanaṃ niratthakaṃ siyā. Kasmāti ārabhitvā papañcaṃ karonti. Kiṃ tena, parato ‘‘cīvaramāsato paṭṭhāya…pe… atītavassaṃvutthānameva pāpuṇātī’’ti iminā siddhattā na vicāritaṃ, tena vuttaṃ ‘‘lakkhaṇaññū’’ti acalavasena. Sace pana bahiupacārasīmāya ṭhito…pe… sampattānaṃ sabbesaṃ pāpuṇātīti yattha katthaci vutthavassānanti adhippāyo ‘‘yattha katthaci vutthavassānaṃ sabbesaṃ sampattānaṃ pāpuṇātī’’ti (kaṅkhā. aṭṭha. akālacīvarasikkhāpadavaṇṇanā) kaṅkhāvitaraṇiyaṃ vuttattā. Gimhānaṃ paṭhamadivasato paṭṭhāya vutte pana yasmā anantarātītaṃ hemantaṃ eva vutthā nāma honti, na vassaṃ, tasmā ‘‘mātikā āropetabbā’’ti vuttaṃ. Ye vā therehi pesitā, tesaṃ pāpuṇātīti kira attho.
жийварагканд̇хагаван̣н̣анаа нидтид̇аа.
Cīvarakkhandhakavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / махааваг̇г̇абаал̣и • Mahāvaggapāḷi / 232. адтажийварамаад̇игаа • 232. Aṭṭhacīvaramātikā
адтагат̇аа • Aṭṭhakathā / винаяабидага (адтагат̇аа) • Vinayapiṭaka (aṭṭhakathā) / махааваг̇г̇а-адтагат̇аа • Mahāvagga-aṭṭhakathā / адтажийварамаад̇игаагат̇аа • Aṭṭhacīvaramātikākathā
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā / адтажийварамаад̇игаагат̇ааван̣н̣анаа • Aṭṭhacīvaramātikākathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / адтажийварамаад̇игаагат̇ааван̣н̣анаа • Aṭṭhacīvaramātikākathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / баажид̇яаад̣̇ияож̇анаабаал̣и • Pācityādiyojanāpāḷi / 232. адтажийварамаад̇игаагат̇аа • 232. Aṭṭhacīvaramātikākathā
