| Library / Tipiṭaka / д̇ибидага • Tipiṭaka / саарад̇т̇ад̣̇ийбаний-дийгаа • Sāratthadīpanī-ṭīkā |
адтаг̇аруд̇хаммагат̇ааван̣н̣анаа
Aṭṭhagarudhammakathāvaṇṇanā
403. сад̇т̇ааби ‘‘ид̇т̇ияо наама барид̇д̇асад̣̇д̇хаа, згааяаажид̇амад̇д̇зязва баб̣б̣аж̇ж̇ааяа анун̃н̃аад̇ааяа на мама саасанам̣ г̇арум̣ гад̇ваа г̇ан̣хиссанд̇ий’’д̇и д̇игкад̇д̇ум̣ бадигкибид̇ваа ид̣̇аани г̇арум̣ гад̇ваа г̇аахаабзд̇угаамад̇ааяа ‘‘сажз, аананд̣̇а, махаабаж̇аабад̇и г̇од̇амий адта г̇аруд̇хаммз бадиг̇г̇ан̣хаад̇и, саавассаа ход̇у убасамбад̣̇аа’’д̇иаад̣̇имааха. д̇ад̇т̇а саавассаад̇и саа зва ассаа баб̣б̣аж̇ж̇ааби убасамбад̣̇ааби ход̇у.
403. Satthāpi ‘‘itthiyo nāma parittasaddhā, ekāyācitamatteyeva pabbajjāya anuññātāya na mama sāsanaṃ garuṃ katvā gaṇhissantī’’ti tikkhattuṃ paṭikkhipitvā idāni garuṃ katvā gāhāpetukāmatāya ‘‘sace, ānanda, mahāpajāpati gotamī aṭṭha garudhamme paṭiggaṇhāti, sāvassā hotu upasampadā’’tiādimāha. Tattha sāvassāti sā eva assā pabbajjāpi upasampadāpi hotu.
д̇ад̣̇ахубасамбаннассаад̇и д̇ам̣ д̣̇ивасамби убасамбаннасса. абхиваад̣̇анам̣ бажжудтаанам̣ ан̃ж̇алигаммам̣ саамийжигаммам̣ гаад̇аб̣б̣анд̇и маанаад̇имаанам̣ агад̇ваа бан̃жабад̇идтид̇зна абхиваад̣̇анам̣, аасанаа удтааяа бажжуг̇г̇аманавасзна бажжудтаанам̣, д̣̇асанакз самод̇хаанзд̇ваа ан̃ж̇алигаммам̣, аасанабан̃н̃аабанаб̣ийж̇анаад̣̇игам̣ анужчавигагаммасан̇каад̇ам̣ саамийжигамман̃жа гад̇д̇аб̣б̣ам̣. абхигкугз ааваасзд̇и яад̇т̇а васанд̇ияаа ананд̇арааязна оваад̣̇ад̇т̇ааяа убасан̇гаманаарахз таанз оваад̣̇ад̣̇ааяаго аажарияо над̇т̇и, аяам̣ абхигкуго ааваасо наама, зваруубз ааваасз вассам̣ на убаг̇анд̇аб̣б̣ам̣. анвад̣̇д̇хамаасанд̇и анубосат̇игам̣. оваад̣̇уубасан̇гамананд̇и оваад̣̇ад̇т̇ааяа убасан̇гаманам̣. д̣̇идтзнаад̇и жагкунаа д̣̇идтзна. суд̇знаад̇и сод̇зна суд̇зна. барисан̇гааяаад̇и д̣̇идтасуд̇авасзна барисан̇гид̇зна. г̇аруд̇хамманд̇и г̇аругам̣ сан̇гхаад̣̇исзсаабад̇д̇им̣. багкамаанад̇д̇анд̇и ануунаани баннараса д̣̇ивасаани маанад̇д̇ам̣. часу д̇хаммзсууд̇и вигаалабхож̇анажчадтзсу сигкаабад̣̇зсу. сигкид̇асигкааяаад̇и згасигкамби акан̣д̣ам̣ гад̇ваа буурид̇асигкааяа.
Tadahupasampannassāti taṃ divasampi upasampannassa. Abhivādanaṃ paccuṭṭhānaṃ añjalikammaṃ sāmīcikammaṃ kātabbanti mānātimānaṃ akatvā pañcapatiṭṭhitena abhivādanaṃ, āsanā uṭṭhāya paccuggamanavasena paccuṭṭhānaṃ, dasanakhe samodhānetvā añjalikammaṃ, āsanapaññāpanabījanādikaṃ anucchavikakammasaṅkhātaṃ sāmīcikammañca kattabbaṃ. Abhikkhuke āvāseti yattha vasantiyā anantarāyena ovādatthāya upasaṅkamanārahe ṭhāne ovādadāyako ācariyo natthi, ayaṃ abhikkhuko āvāso nāma, evarūpe āvāse vassaṃ na upagantabbaṃ. Anvaddhamāsanti anuposathikaṃ. Ovādūpasaṅkamananti ovādatthāya upasaṅkamanaṃ. Diṭṭhenāti cakkhunā diṭṭhena. Sutenāti sotena sutena. Parisaṅkāyāti diṭṭhasutavasena parisaṅkitena. Garudhammanti garukaṃ saṅghādisesāpattiṃ. Pakkhamānattanti anūnāni pannarasa divasāni mānattaṃ. Chasu dhammesūti vikālabhojanacchaṭṭhesu sikkhāpadesu. Sikkhitasikkhāyāti ekasikkhampi akhaṇḍaṃ katvā pūritasikkhāya.
на аггосид̇аб̣б̣о на барибхаасид̇аб̣б̣од̇и д̣̇асаннам̣ аггосавад̇т̇уунам̣ ан̃н̃ад̇арзна аггосавад̇т̇унаа на аггосид̇аб̣б̣о, бхаяубад̣̇ам̣санааяа гааяажи барибхаасааяа на барибхаасид̇аб̣б̣о. овадо бхигкунийнам̣ бхигкуусу важанабат̇од̇и оваад̣̇аанусаасанид̇хаммагат̇аасан̇каад̇о важанабат̇о бхигкунийнам̣ бхигкуусу овадо бихид̇о, на бхигкунияаа гожи бхигку овад̣̇ид̇аб̣б̣о ваа анусаасид̇аб̣б̣о ваа, ‘‘бханд̇з бораан̣агад̇т̇зраа ид̣̇ан̃жид̣̇ан̃жа вад̇д̇ам̣ буураяим̣суу’’д̇и звам̣ бана бавзн̣ивасзна гат̇зд̇ум̣ ваддад̇и. ановадо бхигкуунам̣ бхигкунийсууд̇и бхигкуунам̣ бана бхигкунийсу важанабат̇о аниваарид̇о, яат̇ааружияаа овад̣̇анд̇у анусаасанд̇у д̇хаммагат̇ам̣ гат̇знд̇ууд̇и аяамзд̇т̇а сан̇кзбо, вид̇т̇аарад̇о банзсаа г̇аруд̇хаммагат̇аа махаавибхан̇г̇з вуд̇д̇анаязнзва взд̣̇ид̇аб̣б̣аа.
Na akkositabbo na paribhāsitabboti dasannaṃ akkosavatthūnaṃ aññatarena akkosavatthunā na akkositabbo, bhayupadaṃsanāya kāyaci paribhāsāya na paribhāsitabbo. Ovaṭo bhikkhunīnaṃ bhikkhūsu vacanapathoti ovādānusāsanidhammakathāsaṅkhāto vacanapatho bhikkhunīnaṃ bhikkhūsu ovaṭo pihito, na bhikkhuniyā koci bhikkhu ovaditabbo vā anusāsitabbo vā, ‘‘bhante porāṇakattherā idañcidañca vattaṃ pūrayiṃsū’’ti evaṃ pana paveṇivasena kathetuṃ vaṭṭati. Anovaṭo bhikkhūnaṃ bhikkhunīsūti bhikkhūnaṃ pana bhikkhunīsu vacanapatho anivārito, yathāruciyā ovadantu anusāsantu dhammakathaṃ kathentūti ayamettha saṅkhepo, vitthārato panesā garudhammakathā mahāvibhaṅge vuttanayeneva veditabbā.
имз бана адта г̇аруд̇хаммз сад̇т̇у санд̇игз уг̇г̇ахзд̇ваа т̇зрзна ад̇д̇ано аарожияамаанз суд̇ваа махаабаж̇аабад̇ияаа д̇аавамаханд̇ам̣ д̣̇оманассам̣ кан̣зна бадиббассамбхи. анод̇ад̇д̇ад̣̇ахад̇о аахадзна сийд̇уд̣̇агасса гхадасад̇зна мад̇т̇агз барисид̇д̇аа вияа виг̇ад̇абарил̣аахаа ад̇д̇аманаа худ̇ваа г̇аруд̇хаммабадиг̇г̇ахан̣зна уббаннабийд̇ибаамож̇ж̇ам̣ аави гаронд̇ий ‘‘сзяяат̇ааби, бханд̇з’’д̇иаад̣̇игам̣ уд̣̇аанам̣ уд̣̇аанзси. д̇ад̇т̇а д̣̇ахарод̇и д̇арун̣о. яуваад̇и яоб̣б̣ан̃н̃абхаавз тид̇о. ман̣д̣анагаж̇аад̇игод̇и алан̇гаарасабхааво. д̇ад̇т̇а гожи д̇арун̣оби яуваа на ход̇и яат̇аа ад̇ид̇арун̣о. гожи яувааби ман̣д̣анагаж̇аад̇иго на ход̇и яат̇аа убасанд̇асабхааво ааласияаб̣яасанаад̣̇ийхи ваа абхибхууд̇о, ид̇ха бана д̣̇ахаро жзва яуваа жа ман̣д̣анагаж̇аад̇иго жа ад̇хиббзд̇о, д̇асмаа звамааха. уббалаад̣̇ийни логасаммад̇ад̇д̇аа вуд̇д̇аани. ид̇о барам̣ яам̣ яам̣ вад̇д̇аб̣б̣ам̣, д̇ам̣ д̇ам̣ адтагат̇ааяам̣ д̣̇ассид̇амзва.
Ime pana aṭṭha garudhamme satthu santike uggahetvā therena attano ārociyamāne sutvā mahāpajāpatiyā tāvamahantaṃ domanassaṃ khaṇena paṭippassambhi. Anotattadahato āhaṭena sītudakassa ghaṭasatena matthake parisittā viya vigatapariḷāhā attamanā hutvā garudhammapaṭiggahaṇena uppannapītipāmojjaṃ āvi karontī ‘‘seyyathāpi, bhante’’tiādikaṃ udānaṃ udānesi. Tattha daharoti taruṇo. Yuvāti yobbaññabhāve ṭhito. Maṇḍanakajātikoti alaṅkārasabhāvo. Tattha koci taruṇopi yuvā na hoti yathā atitaruṇo. Koci yuvāpi maṇḍanakajātiko na hoti yathā upasantasabhāvo ālasiyabyasanādīhi vā abhibhūto, idha pana daharo ceva yuvā ca maṇḍanakajātiko ca adhippeto, tasmā evamāha. Uppalādīni lokasammatattā vuttāni. Ito paraṃ yaṃ yaṃ vattabbaṃ, taṃ taṃ aṭṭhakathāyaṃ dassitameva.
д̇ад̇т̇а маад̇уг̇аамасса баб̣б̣аж̇ид̇ад̇д̇аад̇и ид̣̇ам̣ бан̃жавассасад̇ад̇о уд̣̇д̇хам̣ адтад̇ваа бан̃жасуязва вассасад̇зсу сад̣̇д̇хаммадтид̇ияаа гааран̣анид̣̇ассанам̣. бадисамбхид̣̇аабабхзд̣̇аббад̇д̇акийн̣аасававасзнзва вуд̇д̇анд̇и зд̇т̇а ‘‘бадисамбхид̣̇аабад̇д̇акийн̣аасаваг̇г̇ахан̣зна жхаанааниби г̇ахид̇аанзва хонд̇и. на хи ниж̇жхаанагаанам̣ саб̣б̣аббагаарасамбад̇д̇и иж̇жхад̇ий’’д̇и г̇ан̣тибад̣̇зсу вуд̇д̇ам̣. сугкавибассагакийн̣аасававасзна вассасахассанд̇иаад̣̇инаа жа яам̣ вуд̇д̇ам̣. д̇ам̣ канд̇хагабхаан̣агаанам̣ мад̇зна вуд̇д̇анд̇и взд̣̇ид̇аб̣б̣ам̣. д̣̇ийгханигааяадтагат̇ааяам̣ (д̣̇ий. ни. адта. 3.161) бана звам̣ вуд̇д̇ам̣ –
Tattha mātugāmassa pabbajitattāti idaṃ pañcavassasatato uddhaṃ aṭṭhatvā pañcasuyeva vassasatesu saddhammaṭṭhitiyā kāraṇanidassanaṃ. Paṭisambhidāpabhedappattakhīṇāsavavaseneva vuttanti ettha ‘‘paṭisambhidāpattakhīṇāsavaggahaṇena jhānānipi gahitāneva honti. Na hi nijjhānakānaṃ sabbappakārasampatti ijjhatī’’ti gaṇṭhipadesu vuttaṃ. Sukkhavipassakakhīṇāsavavasena vassasahassantiādinā ca yaṃ vuttaṃ. Taṃ khandhakabhāṇakānaṃ matena vuttanti veditabbaṃ. Dīghanikāyaṭṭhakathāyaṃ (dī. ni. aṭṭha. 3.161) pana evaṃ vuttaṃ –
‘‘бадисамбхид̣̇аабад̇д̇зхи вассасахассам̣ адтааси, чал̣абхин̃н̃зхи вассасахассам̣, д̇звиж̇ж̇зхи вассасахассам̣, сугкавибассагзхи вассасахассам̣, баад̇имогкзна вассасахассам̣ адтаасий’’д̇и.
‘‘Paṭisambhidāpattehi vassasahassaṃ aṭṭhāsi, chaḷabhiññehi vassasahassaṃ, tevijjehi vassasahassaṃ, sukkhavipassakehi vassasahassaṃ, pātimokkhena vassasahassaṃ aṭṭhāsī’’ti.
ан̇г̇уд̇д̇аранигааяадтагат̇ааяамби (а. ни. адта. 1.1.130) –
Aṅguttaranikāyaṭṭhakathāyampi (a. ni. aṭṭha. 1.1.130) –
‘‘б̣уд̣̇д̇хаанан̃хи бариниб̣б̣аанад̇о вассасахассамзва бадисамбхид̣̇аа ниб̣б̣ад̇д̇зд̇ум̣ саггонд̇и, д̇ад̇о барам̣ ча абхин̃н̃аа, д̇ад̇о д̇ааби ниб̣б̣ад̇д̇зд̇ум̣ асаггонд̇аа д̇иссо виж̇ж̇аа ниб̣б̣ад̇д̇знд̇и, г̇ажчанд̇з г̇ажчанд̇з гаалз д̇ааби ниб̣б̣ад̇д̇зд̇ум̣ асаггонд̇аа сугкавибассагаа хонд̇и. зд̇знзва убааязна анааг̇аамино сагад̣̇ааг̇аамино сод̇аабаннаа’’д̇и –
‘‘Buddhānañhi parinibbānato vassasahassameva paṭisambhidā nibbattetuṃ sakkonti, tato paraṃ cha abhiññā, tato tāpi nibbattetuṃ asakkontā tisso vijjā nibbattenti, gacchante gacchante kāle tāpi nibbattetuṃ asakkontā sukkhavipassakā honti. Eteneva upāyena anāgāmino sakadāgāmino sotāpannā’’ti –
вуд̇д̇ам̣.
Vuttaṃ.
сам̣яуд̇д̇анигааяадтагат̇ааяам̣ бана (сам̣. ни. адта. 2.3.156) –
Saṃyuttanikāyaṭṭhakathāyaṃ pana (saṃ. ni. aṭṭha. 2.3.156) –
‘‘батамаб̣од̇хияан̃хи бхигкуу бадисамбхид̣̇аабад̇д̇аа ахзсум̣. ат̇а гаалз г̇ажчанд̇з бадисамбхид̣̇аа баабун̣ид̇ум̣ на сагким̣су, чал̣абхин̃н̃аа ахзсум̣, д̇ад̇о ча абхин̃н̃аа бад̇д̇ум̣ асаггонд̇аа д̇иссо виж̇ж̇аа баабун̣им̣су. ид̣̇аани гаалз г̇ажчанд̇з д̇иссо виж̇ж̇аа баабун̣ид̇ум̣ асаггонд̇аа аасавагкаяамад̇д̇ам̣ баабун̣иссанд̇и, д̇амби асаггонд̇аа анааг̇аамипалам̣, д̇амби асаггонд̇аа сагад̣̇ааг̇аамипалам̣, д̇амби асаггонд̇аа сод̇аабад̇д̇ипалам̣, г̇ажчанд̇з гаалз сод̇аабад̇д̇ипаламби бад̇д̇ум̣ на сагкиссанд̇ий’’д̇и –
‘‘Paṭhamabodhiyañhi bhikkhū paṭisambhidāpattā ahesuṃ. Atha kāle gacchante paṭisambhidā pāpuṇituṃ na sakkhiṃsu, chaḷabhiññā ahesuṃ, tato cha abhiññā pattuṃ asakkontā tisso vijjā pāpuṇiṃsu. Idāni kāle gacchante tisso vijjā pāpuṇituṃ asakkontā āsavakkhayamattaṃ pāpuṇissanti, tampi asakkontā anāgāmiphalaṃ, tampi asakkontā sakadāgāmiphalaṃ, tampi asakkontā sotāpattiphalaṃ, gacchante kāle sotāpattiphalampi pattuṃ na sakkhissantī’’ti –
вуд̇д̇ам̣.
Vuttaṃ.
яасмаа жзд̇ам̣ саб̣б̣ам̣ ан̃н̃аман̃н̃абадивируд̣̇д̇хам̣, д̇асмаа д̇зсам̣ д̇зсам̣ бхаан̣агаанам̣ мад̇амзва аажариязна д̇ад̇т̇а д̇ад̇т̇а д̣̇ассид̇анд̇и г̇ахзд̇аб̣б̣ам̣. ан̃н̃ат̇аа хи аажарияассзва буб̣б̣аабаравирод̇хаббасан̇г̇о сияаад̇и.
Yasmā cetaṃ sabbaṃ aññamaññapaṭiviruddhaṃ, tasmā tesaṃ tesaṃ bhāṇakānaṃ matameva ācariyena tattha tattha dassitanti gahetabbaṃ. Aññathā hi ācariyasseva pubbāparavirodhappasaṅgo siyāti.
д̇ааниязваад̇и д̇ааниязва бан̃жа вассасахассаани. барияад̇д̇имуулагам̣ саасананд̇и ааха ‘‘на хи барияад̇д̇ияаа асад̇и бадивзд̇хо ад̇т̇ий’’д̇иаад̣̇и. барияад̇д̇ияаа хи анд̇арахид̇ааяа бадибад̇д̇и анд̇арад̇хааяад̇и, бадибад̇д̇ияаа анд̇арахид̇ааяа ад̇хиг̇амо анд̇арад̇хааяад̇и. гим̣гааран̣аа? аяан̃хи барияад̇д̇и бадибад̇д̇ияаа бажжаяо ход̇и, бадибад̇д̇и ад̇хиг̇амасса, ид̇и бадибад̇д̇ид̇оби барияад̇д̇иязва бамаан̣ам̣. д̇ад̇т̇а бадивзд̇хо жа бадибад̇д̇и жа ход̇иби на ход̇иби. згасмин̃хи гаалз бадивзд̇хагараа бхигкуу б̣ахуу хонд̇и, ‘‘зса бхигку бут̇уж̇ж̇ано’’д̇и ан̇г̇улим̣ басаарзд̇ваа д̣̇ассзд̇аб̣б̣о ход̇и, имасмим̣язва д̣̇ийбз згаваарам̣ бут̇уж̇ж̇анабхигку наама наахоси. бадибад̇д̇ибуурагааби гад̣̇аажи б̣ахуу хонд̇и, гад̣̇аажи аббаа, ид̇и бадивзд̇хо жа бадибад̇д̇и жа ход̇иби на ход̇иби. саасанадтид̇ияаа бана барияад̇д̇иязва бамаан̣ам̣. бан̣д̣ид̇о хи д̇збидагам̣ суд̇ваа д̣̇взби буурзд̇и. яат̇аа амхаагам̣ б̣од̇хисад̇д̇о аал̣аарасса санд̇игз бан̃жаабхин̃н̃аа сад̇д̇а жа самаабад̇д̇ияо ниб̣б̣ад̇д̇зд̇ваа нзвасан̃н̃аанаасан̃н̃ааяад̇анасамаабад̇д̇ияаа баригаммам̣ бужчи, со ‘‘на ж̇аанаамий’’д̇и ааха, д̇ад̇о уд̣̇агасса санд̇игам̣ г̇анд̇ваа ад̇хиг̇ад̇ависзсам̣ сам̣санд̣̇ид̇ваа нзвасан̃н̃аанаасан̃н̃ааяад̇анасса баригаммам̣ бужчи, со аажигки, д̇асса важанасамананд̇арамзва махаасад̇д̇о д̇ам̣ самбаад̣̇зси, звамзва бан̃н̃аваа бхигку барияад̇д̇им̣ суд̇ваа д̣̇взби буурзд̇и, д̇асмаа барияад̇д̇ияаа тид̇ааяа саасанам̣ тид̇ам̣ ход̇и. яат̇ааби махад̇о д̇ал̣аагасса баал̣ияаа т̇ирааяа уд̣̇агам̣ на тассад̇ийд̇и на вад̇д̇аб̣б̣ам̣, уд̣̇агз сад̇и бад̣̇умаад̣̇ийни бубпаани на бубписсанд̇ийд̇и на вад̇д̇аб̣б̣ам̣, звамзва махаад̇ал̣аагасса т̇ирабаал̣исад̣̇исз д̇збидагз б̣уд̣̇д̇хаважанз сад̇и махаад̇ал̣аагз уд̣̇агасад̣̇исаа бадибад̇д̇ибуурагаа гулабуд̇д̇аа над̇т̇ийд̇и на вад̇д̇аб̣б̣ам̣, д̇зсу сад̇и махаад̇ал̣аагз бад̣̇умаад̣̇ийни бубпаани вияа сод̇аабаннаад̣̇аяо арияабуг̇г̇алаа над̇т̇ийд̇и на вад̇д̇аб̣б̣ам̣. звам̣ зганд̇ад̇о барияад̇д̇иязва бамаан̣ам̣.
Tāniyevāti tāniyeva pañca vassasahassāni. Pariyattimūlakaṃ sāsananti āha ‘‘na hi pariyattiyā asati paṭivedho atthī’’tiādi. Pariyattiyā hi antarahitāya paṭipatti antaradhāyati, paṭipattiyā antarahitāya adhigamo antaradhāyati. Kiṃkāraṇā? Ayañhi pariyatti paṭipattiyā paccayo hoti, paṭipatti adhigamassa, iti paṭipattitopi pariyattiyeva pamāṇaṃ. Tattha paṭivedho ca paṭipatti ca hotipi na hotipi. Ekasmiñhi kāle paṭivedhakarā bhikkhū bahū honti, ‘‘esa bhikkhu puthujjano’’ti aṅguliṃ pasāretvā dassetabbo hoti, imasmiṃyeva dīpe ekavāraṃ puthujjanabhikkhu nāma nāhosi. Paṭipattipūrakāpi kadāci bahū honti, kadāci appā, iti paṭivedho ca paṭipatti ca hotipi na hotipi. Sāsanaṭṭhitiyā pana pariyattiyeva pamāṇaṃ. Paṇḍito hi tepiṭakaṃ sutvā dvepi pūreti. Yathā amhākaṃ bodhisatto āḷārassa santike pañcābhiññā satta ca samāpattiyo nibbattetvā nevasaññānāsaññāyatanasamāpattiyā parikammaṃ pucchi, so ‘‘na jānāmī’’ti āha, tato udakassa santikaṃ gantvā adhigatavisesaṃ saṃsanditvā nevasaññānāsaññāyatanassa parikammaṃ pucchi, so ācikkhi, tassa vacanasamanantarameva mahāsatto taṃ sampādesi, evameva paññavā bhikkhu pariyattiṃ sutvā dvepi pūreti, tasmā pariyattiyā ṭhitāya sāsanaṃ ṭhitaṃ hoti. Yathāpi mahato taḷākassa pāḷiyā thirāya udakaṃ na ṭhassatīti na vattabbaṃ, udake sati padumādīni pupphāni na pupphissantīti na vattabbaṃ, evameva mahātaḷākassa thirapāḷisadise tepiṭake buddhavacane sati mahātaḷāke udakasadisā paṭipattipūrakā kulaputtā natthīti na vattabbaṃ, tesu sati mahātaḷāke padumādīni pupphāni viya sotāpannādayo ariyapuggalā natthīti na vattabbaṃ. Evaṃ ekantato pariyattiyeva pamāṇaṃ.
барияад̇д̇ияаа анд̇арахид̇ааяаад̇и зд̇т̇а барияад̇д̇ийд̇и (а. ни. адта. 1.1.130) д̇збидагам̣ б̣уд̣̇д̇хаважанам̣ саадтагат̇аа баал̣и. яаава саа д̇идтад̇и, д̇аава барияад̇д̇и барибун̣н̣аа наама ход̇и. г̇ажчанд̇з г̇ажчанд̇з гаалз галияуг̇арааж̇аано ад̇хаммигаа хонд̇и, д̇зсу ад̇хаммигзсу д̇зсамби амажжаад̣̇аяо ад̇хаммигаа хонд̇и, д̇ад̇о радтаж̇анабад̣̇аваасинод̇и д̇зсам̣ ад̇хаммигад̇ааяа на д̣̇зво саммаа вассад̇и, д̇ад̇о сассаани на самбаж̇ж̇анд̇и, д̇зсу асамбаж̇ж̇анд̇зсу бажжаяад̣̇ааяагаа бхигкусан̇гхасса бажжаяз д̣̇аад̇ум̣ на саггонд̇и, бхигкуу бажжаязхи гиламанд̇аа анд̇зваасигз сан̇г̇ахзд̇ум̣ на саггонд̇и. г̇ажчанд̇з г̇ажчанд̇з гаалз барияад̇д̇и барихааяад̇и, ад̇т̇авасзна д̇хаарзд̇ум̣ на саггонд̇и, баал̣ивасзнзва д̇хаарзнд̇и. д̇ад̇о гаалз г̇ажчанд̇з баал̣имби сагалам̣ д̇хаарзд̇ум̣ на саггонд̇и, батамам̣ абхид̇хаммабидагам̣ барихааяад̇и, барихааяамаанам̣ мад̇т̇агад̇о бадтааяа барихааяад̇и. батамамзва хи махаабагаран̣ам̣ барихааяад̇и, д̇асмим̣ барихийнз яамагам̣, гат̇аавад̇т̇у, буг̇г̇алабан̃н̃ад̇д̇и, д̇хаад̇угат̇аа, вибхан̇г̇о, д̇хаммасан̇г̇аход̇и.
Pariyattiyā antarahitāyāti ettha pariyattīti (a. ni. aṭṭha. 1.1.130) tepiṭakaṃ buddhavacanaṃ sāṭṭhakathā pāḷi. Yāva sā tiṭṭhati, tāva pariyatti paripuṇṇā nāma hoti. Gacchante gacchante kāle kaliyugarājāno adhammikā honti, tesu adhammikesu tesampi amaccādayo adhammikā honti, tato raṭṭhajanapadavāsinoti tesaṃ adhammikatāya na devo sammā vassati, tato sassāni na sampajjanti, tesu asampajjantesu paccayadāyakā bhikkhusaṅghassa paccaye dātuṃ na sakkonti, bhikkhū paccayehi kilamantā antevāsike saṅgahetuṃ na sakkonti. Gacchante gacchante kāle pariyatti parihāyati, atthavasena dhāretuṃ na sakkonti, pāḷivaseneva dhārenti. Tato kāle gacchante pāḷimpi sakalaṃ dhāretuṃ na sakkonti, paṭhamaṃ abhidhammapiṭakaṃ parihāyati, parihāyamānaṃ matthakato paṭṭhāya parihāyati. Paṭhamameva hi mahāpakaraṇaṃ parihāyati, tasmiṃ parihīne yamakaṃ, kathāvatthu, puggalapaññatti, dhātukathā, vibhaṅgo, dhammasaṅgahoti.
звам̣ абхид̇хаммабидагз барихийнз мад̇т̇агад̇о бадтааяа суд̇д̇анд̇абидагам̣ барихааяад̇и. батаман̃хи ан̇г̇уд̇д̇аранигааяо барихааяад̇и, д̇асмимби батамам̣ згаад̣̇асаганибаад̇о…бз… д̇ад̇о згаганибаад̇од̇и. звам̣ ан̇г̇уд̇д̇аранигааяз барихийнз мад̇т̇агад̇о бадтааяа сам̣яуд̇д̇анигааяо барихааяад̇и. батаман̃хи махааваг̇г̇о барихааяад̇и, д̇ад̇о сал̣ааяад̇анаваг̇г̇о, канд̇хагаваг̇г̇о, нид̣̇аанаваг̇г̇о, саг̇аат̇ааваг̇г̇од̇и. звам̣ сам̣яуд̇д̇анигааяз барихийнз мад̇т̇агад̇о бадтааяа маж̇жхиманигааяо барихааяад̇и. батаман̃хи убарибан̣н̣аасаго барихааяад̇и, д̇ад̇о маж̇жхимабан̣н̣аасаго, д̇ад̇о муулабан̣н̣аасагод̇и. звам̣ маж̇жхиманигааяз барихийнз мад̇т̇агад̇о бадтааяа д̣̇ийгханигааяо барихааяад̇и. батаман̃хи баат̇игаваг̇г̇о барихааяад̇и, д̇ад̇о махааваг̇г̇о, д̇ад̇о сийлагканд̇хаваг̇г̇од̇и. звам̣ д̣̇ийгханигааяз барихийнз суд̇д̇анд̇абидагам̣ барихийнам̣ наама ход̇и. винаяабидагзна сад̣̇д̇хим̣ ж̇аад̇агамзва д̇хаарзнд̇и. винаяабидаган̃хи лаж̇ж̇ино д̇хаарзнд̇и, лаабхагаамаа бана ‘‘суд̇д̇анд̇з гат̇ид̇зби саллагкзнд̇аа над̇т̇ий’’д̇и ж̇аад̇агамзва д̇хаарзнд̇и. г̇ажчанд̇з гаалз ж̇аад̇агамби д̇хаарзд̇ум̣ на саггонд̇и. ат̇а нзсам̣ батамам̣ взссанд̇араж̇аад̇агам̣ барихааяад̇и, д̇ад̇о бадиломаггамзна бун̣н̣агаж̇аад̇агам̣, махаанаарад̣̇аж̇аад̇аганд̇и барияосаанз абан̣н̣агаж̇аад̇агам̣ барихааяад̇и, винаяабидагамзва д̇хаарзнд̇и.
Evaṃ abhidhammapiṭake parihīne matthakato paṭṭhāya suttantapiṭakaṃ parihāyati. Paṭhamañhi aṅguttaranikāyo parihāyati, tasmimpi paṭhamaṃ ekādasakanipāto…pe… tato ekakanipātoti. Evaṃ aṅguttaranikāye parihīne matthakato paṭṭhāya saṃyuttanikāyo parihāyati. Paṭhamañhi mahāvaggo parihāyati, tato saḷāyatanavaggo, khandhakavaggo, nidānavaggo, sagāthāvaggoti. Evaṃ saṃyuttanikāye parihīne matthakato paṭṭhāya majjhimanikāyo parihāyati. Paṭhamañhi uparipaṇṇāsako parihāyati, tato majjhimapaṇṇāsako, tato mūlapaṇṇāsakoti. Evaṃ majjhimanikāye parihīne matthakato paṭṭhāya dīghanikāyo parihāyati. Paṭhamañhi pāthikavaggo parihāyati, tato mahāvaggo, tato sīlakkhandhavaggoti. Evaṃ dīghanikāye parihīne suttantapiṭakaṃ parihīnaṃ nāma hoti. Vinayapiṭakena saddhiṃ jātakameva dhārenti. Vinayapiṭakañhi lajjino dhārenti, lābhakāmā pana ‘‘suttante kathitepi sallakkhentā natthī’’ti jātakameva dhārenti. Gacchante kāle jātakampi dhāretuṃ na sakkonti. Atha nesaṃ paṭhamaṃ vessantarajātakaṃ parihāyati, tato paṭilomakkamena puṇṇakajātakaṃ, mahānāradajātakanti pariyosāne apaṇṇakajātakaṃ parihāyati, vinayapiṭakameva dhārenti.
г̇ажчанд̇з гаалз д̇амби мад̇т̇агад̇о бадтааяа барихааяад̇и. батаман̃хи баривааро барихааяад̇и, д̇ад̇о канд̇хаго, бхигкунийвибхан̇г̇о, махаавибхан̇г̇од̇и ануггамзна убосат̇агканд̇хагамад̇д̇амзва д̇хаарзнд̇и. д̇ад̣̇ааби барияад̇д̇и ананд̇арахид̇аава ход̇и. яаава бана мануссзсу жад̇уббад̣̇игаг̇аат̇ааби бавад̇д̇ад̇и, д̇аава барияад̇д̇и ананд̇арахид̇аава ход̇и. яад̣̇аа сад̣̇д̇хо басанно рааж̇аа хад̇т̇игканд̇хз суван̣н̣ажан̇годагамхи сахассад̇т̇авигам̣ табаабзд̇ваа ‘‘б̣уд̣̇д̇хзхи гат̇ид̇ам̣ жад̇уббад̣̇игам̣ г̇аат̇ам̣ ж̇аананд̇о имам̣ сахассам̣ г̇ан̣хад̇уу’’д̇и наг̇арз бхзрим̣ жараабзд̇ваа г̇ан̣ханагам̣ алабхид̇ваа ‘‘згаваарам̣ жараабид̇з наамам̣ сун̣анд̇ааби хонд̇и асун̣анд̇аабий’’д̇и яаавад̇ад̇ияам̣ жараабзд̇ваа г̇ан̣ханагам̣ алабхид̇ваа рааж̇абурисаа сахассад̇т̇авигам̣ буна рааж̇агулам̣ бавзсзнд̇и, д̇ад̣̇аа барияад̇д̇и анд̇арахид̇аа наама ход̇и.
Gacchante kāle tampi matthakato paṭṭhāya parihāyati. Paṭhamañhi parivāro parihāyati, tato khandhako, bhikkhunīvibhaṅgo, mahāvibhaṅgoti anukkamena uposathakkhandhakamattameva dhārenti. Tadāpi pariyatti anantarahitāva hoti. Yāva pana manussesu catuppadikagāthāpi pavattati, tāva pariyatti anantarahitāva hoti. Yadā saddho pasanno rājā hatthikkhandhe suvaṇṇacaṅkoṭakamhi sahassatthavikaṃ ṭhapāpetvā ‘‘buddhehi kathitaṃ catuppadikaṃ gāthaṃ jānanto imaṃ sahassaṃ gaṇhatū’’ti nagare bheriṃ carāpetvā gaṇhanakaṃ alabhitvā ‘‘ekavāraṃ carāpite nāmaṃ suṇantāpi honti asuṇantāpī’’ti yāvatatiyaṃ carāpetvā gaṇhanakaṃ alabhitvā rājapurisā sahassatthavikaṃ puna rājakulaṃ pavesenti, tadā pariyatti antarahitā nāma hoti.
жирам̣ бавад̇д̇иссад̇ийд̇и барияад̇д̇ияаа анд̇арахид̇ааяаби лин̇г̇амад̇д̇ам̣ ад̣̇д̇хаанам̣ бавад̇д̇иссад̇и. гат̇ам̣? г̇ажчанд̇з г̇ажчанд̇з хи гаалз жийвараг̇г̇ахан̣ам̣ бад̇д̇аг̇г̇ахан̣ам̣ самин̃ж̇анабасааран̣ам̣ аалогид̇авилогид̇ам̣ на баасаад̣̇игам̣ ход̇и, ниг̇ан̣тасаман̣аа вияа алааб̣убад̇д̇ам̣ бхигкуу бад̇д̇ам̣ аг̇г̇аб̣аахааяа баригкибид̇ваа аад̣̇ааяа вижаранд̇и, зд̇д̇аавад̇ааби лин̇г̇ам̣ ананд̇арахид̇амзва ход̇и. г̇ажчанд̇з бана гаалз аг̇г̇аб̣аахад̇о од̇аарзд̇ваа хад̇т̇зна ваа сиггааяа ваа оламб̣зд̇ваа вижаранд̇и, жийварамби раж̇анасааруббам̣ агад̇ваа одтадтиван̣н̣ам̣ гад̇ваа раж̇анд̇и. г̇ажчанд̇з гаалз раж̇анамби на ход̇и, д̣̇асажчинд̣̇анам̣ оваддигаавиж̇жханам̣ габбамад̇д̇ан̃жа гад̇ваа вал̣ан̃ж̇анд̇и, буна оваддигам̣ виж̇жхид̇ваа габбам̣ на гаронд̇и. д̇ад̇о убхаяамби агад̇ваа д̣̇асаа чзд̇ваа бариб̣б̣ааж̇агаа вияа жаранд̇и. г̇ажчанд̇з гаалз ‘‘го иминаа амхаагам̣ ад̇т̇о’’д̇и куд̣̇д̣̇агам̣ гаасаавакан̣д̣ам̣ хад̇т̇з ваа г̇ийвааяам̣ ваа б̣анд̇ханд̇и, гзсзсу ваа аллийяаабзнд̇и, д̣̇аарабхаран̣ам̣ гаронд̇аа гасид̇ваа вабид̇ваа ж̇ийвигам̣ габбзд̇ваа вижаранд̇и, д̇ад̣̇аа д̣̇агкин̣ам̣ д̣̇знд̇о ж̇ано сан̇гхам̣ уд̣̇д̣̇исса зд̇зсамби д̣̇зд̇и. ид̣̇ам̣ санд̇хааяа бхаг̇авад̇аа вуд̇д̇ам̣ ‘‘бхависсанд̇и ко банаананд̣̇а, анааг̇ад̇амад̣̇д̇хаанам̣ г̇од̇рабхуно гаасааваган̣таа д̣̇уссийлаа баабад̇хаммаа, д̇зсу д̣̇уссийлзсу сан̇гхам̣ уд̣̇д̣̇исса д̣̇аанам̣ д̣̇ассанд̇и, д̇ад̣̇аабаахам̣, аананд̣̇а, сан̇гхаг̇ад̇ам̣ д̣̇агкин̣ам̣ асан̇кязяяам̣ аббамзяяам̣ вад̣̇аамий’’д̇и (ма. ни. 3.380). д̇ад̇о г̇ажчанд̇з гаалз наанаавид̇хаани гаммаани гаронд̇аа ‘‘бабан̃жо зса, гим̣ иминаа амхаага’’нд̇и гаасаавакан̣д̣ам̣ чинд̣̇ид̇ваа аран̃н̃з кибанд̇и, д̇асмим̣ гаалз лин̇г̇ам̣ анд̇арахид̇ам̣ наама ход̇и. гассабад̣̇асаб̣аласса гира гаалад̇о бадтааяа яонагаанам̣ сзд̇авад̇т̇аани баарубид̇ваа жаран̣ажаарид̇д̇ам̣ ж̇аад̇ам̣. звам̣ барияад̇д̇ияаа анд̇арахид̇ааяаби лин̇г̇амад̇д̇ам̣ жирам̣ бавад̇д̇иссад̇ийд̇и взд̣̇ид̇аб̣б̣ам̣.
Ciraṃ pavattissatīti pariyattiyā antarahitāyapi liṅgamattaṃ addhānaṃ pavattissati. Kathaṃ? Gacchante gacchante hi kāle cīvaraggahaṇaṃ pattaggahaṇaṃ samiñjanapasāraṇaṃ ālokitavilokitaṃ na pāsādikaṃ hoti, nigaṇṭhasamaṇā viya alābupattaṃ bhikkhū pattaṃ aggabāhāya parikkhipitvā ādāya vicaranti, ettāvatāpi liṅgaṃ anantarahitameva hoti. Gacchante pana kāle aggabāhato otāretvā hatthena vā sikkāya vā olambetvā vicaranti, cīvarampi rajanasāruppaṃ akatvā oṭṭhaṭṭhivaṇṇaṃ katvā rajanti. Gacchante kāle rajanampi na hoti, dasacchindanaṃ ovaṭṭikāvijjhanaṃ kappamattañca katvā vaḷañjanti, puna ovaṭṭikaṃ vijjhitvā kappaṃ na karonti. Tato ubhayampi akatvā dasā chetvā paribbājakā viya caranti. Gacchante kāle ‘‘ko iminā amhākaṃ attho’’ti khuddakaṃ kāsāvakhaṇḍaṃ hatthe vā gīvāyaṃ vā bandhanti, kesesu vā allīyāpenti, dārabharaṇaṃ karontā kasitvā vapitvā jīvikaṃ kappetvā vicaranti, tadā dakkhiṇaṃ dento jano saṅghaṃ uddissa etesampi deti. Idaṃ sandhāya bhagavatā vuttaṃ ‘‘bhavissanti kho panānanda, anāgatamaddhānaṃ gotrabhuno kāsāvakaṇṭhā dussīlā pāpadhammā, tesu dussīlesu saṅghaṃ uddissa dānaṃ dassanti, tadāpāhaṃ, ānanda, saṅghagataṃ dakkhiṇaṃ asaṅkhyeyyaṃ appameyyaṃ vadāmī’’ti (ma. ni. 3.380). Tato gacchante kāle nānāvidhāni kammāni karontā ‘‘papañco esa, kiṃ iminā amhāka’’nti kāsāvakhaṇḍaṃ chinditvā araññe khipanti, tasmiṃ kāle liṅgaṃ antarahitaṃ nāma hoti. Kassapadasabalassa kira kālato paṭṭhāya yonakānaṃ setavatthāni pārupitvā caraṇacārittaṃ jātaṃ. Evaṃ pariyattiyā antarahitāyapi liṅgamattaṃ ciraṃ pavattissatīti veditabbaṃ.
адтаг̇аруд̇хаммагат̇ааван̣н̣анаа нидтид̇аа.
Aṭṭhagarudhammakathāvaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / жуул̣аваг̇г̇абаал̣и • Cūḷavaggapāḷi / адтаг̇аруд̇хаммаа • Aṭṭhagarudhammā
адтагат̇аа • Aṭṭhakathā / винаяабидага (адтагат̇аа) • Vinayapiṭaka (aṭṭhakathā) / жуул̣аваг̇г̇а-адтагат̇аа • Cūḷavagga-aṭṭhakathā / махаабаж̇аабад̇иг̇од̇амийвад̇т̇угат̇аа • Mahāpajāpatigotamīvatthukathā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / махаабаж̇аабад̇иг̇од̇амийвад̇т̇угат̇ааван̣н̣анаа • Mahāpajāpatigotamīvatthukathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / махаабаж̇аабад̇иг̇од̇амийвад̇т̇угат̇ааван̣н̣анаа • Mahāpajāpatigotamīvatthukathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / баажид̇яаад̣̇ияож̇анаабаал̣и • Pācityādiyojanāpāḷi / махаабаж̇аабад̇иг̇од̇амийвад̇т̇угат̇аа • Mahāpajāpatigotamīvatthukathā
