| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
6. அட்ட²கனாக³ரஸுத்தவண்ணனா
6. Aṭṭhakanāgarasuttavaṇṇanā
16. ச²ட்டே² பே³லுவகா³மகேதி வேஸாலியா த³க்கி²ணபஸ்ஸே அவிதூ³ரே பே³லுவகா³மகோ நாம அத்தி², தங் கோ³சரகா³மங் கத்வாதி அத்தோ². ஸாரப்பத்தகுலக³ணனாயாதி மஹாஸாரமஹப்பத்தகுலக³ணனாய. த³ஸமே டா²னேதி அஞ்ஞே அஞ்ஞேதி த³ஸக³ணனட்டா²னே. அட்ட²கனக³ரே ஜாதோ ப⁴வோதி அட்ட²கனாக³ரோ. குக்குடாராமோதி பாடலிபுத்தே குக்குடாராமோ, ந கோஸம்பி³யங்.
16. Chaṭṭhe beluvagāmaketi vesāliyā dakkhiṇapasse avidūre beluvagāmako nāma atthi, taṃ gocaragāmaṃ katvāti attho. Sārappattakulagaṇanāyāti mahāsāramahappattakulagaṇanāya. Dasame ṭhāneti aññe aññeti dasagaṇanaṭṭhāne. Aṭṭhakanagare jāto bhavoti aṭṭhakanāgaro. Kukkuṭārāmoti pāṭaliputte kukkuṭārāmo, na kosambiyaṃ.
பகதத்த²ப்படினித்³தே³ஸோ த-ஸத்³தோ³தி தஸ்ஸ ‘‘ப⁴க³வதா’’திஆதீ³ஹி பதே³ஹி ஸமானாதி⁴கரணபா⁴வேன வுத்தஸ்ஸ யேன அபி⁴ஸம்பு³த்³த⁴பா⁴வேன ப⁴க³வா பகதோ அதி⁴க³தோ ஸுபாகடோ ச, தங் அபி⁴ஸம்பு³த்³த⁴பா⁴வங் ஸத்³தி⁴ங் ஆக³மனீயபடிபதா³ய அத்த²பா⁴வேனேவ த³ஸ்ஸெந்தோ ‘‘யோ ஸோ…பே॰… அபி⁴ஸம்பு³த்³தோ⁴’’தி ஆஹ. ஸதிபி ஞாணத³ஸ்ஸனஸத்³தா³னங் இத⁴ பஞ்ஞாவேவசனபா⁴வே தேன தேன விஸேஸேன நேஸங் விஸயவிஸேஸே பவத்தித³ஸ்ஸனத்த²ங் அஸாதா⁴ரணஞாணவிஸேஸவஸேன, விஜ்ஜாத்தயவஸேன, விஜ்ஜாபி⁴ஞ்ஞானாவரணவஸேன, ஸப்³ப³ஞ்ஞுதஞ்ஞாணமங்ஸசக்கு²வஸேன படிவேத⁴தே³ஸனாஞாணவஸேன ச தத³த்த²ங் யோஜெத்வா த³ஸ்ஸெந்தோ ‘‘தேஸங் தேஸ’’ந்திஆதி³மாஹ. தத்த² ஆஸயானுஸயங் ஜானதா ஆஸயானுஸயஞாணேன, ஸப்³ப³ஞெய்யத⁴ம்மங் பஸ்ஸதா ஸப்³ப³ஞ்ஞுதானாவரணஞாணேஹி. புப்³பே³னிவாஸாதீ³ஹீதி புப்³பே³னிவாஸாஸவக்க²யஞாணேஹி. படிவேத⁴பஞ்ஞாயாதி அரியமக்³க³பஞ்ஞாய. தே³ஸனாபஞ்ஞாய பஸ்ஸதாதி தே³ஸேதப்³ப³த⁴ம்மானங் தே³ஸேதப்³ப³ப்பகாரங் போ³த⁴னெய்யபுக்³க³லானஞ்ச ஆஸயானுஸயசரிதாதி⁴முத்திஆதி³பே⁴த³ங் த⁴ம்மங் தே³ஸனாபஞ்ஞாய யாதா²வதோ பஸ்ஸதா. அரீனந்தி கிலேஸாரீனங், பஞ்சவித⁴மாரானங் வா ஸாஸனஸ்ஸ வா பச்சத்தி²கானங் அஞ்ஞதித்தி²யானங். தேஸங் பன ஹனநங் பாடிஹாரியேஹி அபி⁴ப⁴வனங் அப்படிபா⁴னதாகரணங் அஜ்ஜு²பெக்க²ணஞ்ச. கேஸிவினயஸுத்தஞ்செத்த² நித³ஸ்ஸனங். ததா² டா²னாட்டா²னாதீ³னி ஜானதா. யதா²கம்மூபகே³ ஸத்தே பஸ்ஸதா. ஸவாஸனானமாஸவானங் கீ²ணத்தா அரஹதா. அபி⁴ஞ்ஞெய்யாதி³பே⁴தே³ த⁴ம்மே அபி⁴ஞ்ஞெய்யாதி³தோ அவிபரீதாவபோ³த⁴தோ ஸம்மாஸம்பு³த்³தே⁴ன.
Pakatatthappaṭiniddeso ta-saddoti tassa ‘‘bhagavatā’’tiādīhi padehi samānādhikaraṇabhāvena vuttassa yena abhisambuddhabhāvena bhagavā pakato adhigato supākaṭo ca, taṃ abhisambuddhabhāvaṃ saddhiṃ āgamanīyapaṭipadāya atthabhāveneva dassento ‘‘yo so…pe… abhisambuddho’’ti āha. Satipi ñāṇadassanasaddānaṃ idha paññāvevacanabhāve tena tena visesena nesaṃ visayavisese pavattidassanatthaṃ asādhāraṇañāṇavisesavasena, vijjāttayavasena, vijjābhiññānāvaraṇavasena, sabbaññutaññāṇamaṃsacakkhuvasena paṭivedhadesanāñāṇavasena ca tadatthaṃ yojetvā dassento ‘‘tesaṃ tesa’’ntiādimāha. Tattha āsayānusayaṃ jānatā āsayānusayañāṇena, sabbañeyyadhammaṃ passatā sabbaññutānāvaraṇañāṇehi. Pubbenivāsādīhīti pubbenivāsāsavakkhayañāṇehi. Paṭivedhapaññāyāti ariyamaggapaññāya. Desanāpaññāya passatāti desetabbadhammānaṃ desetabbappakāraṃ bodhaneyyapuggalānañca āsayānusayacaritādhimuttiādibhedaṃ dhammaṃ desanāpaññāya yāthāvato passatā. Arīnanti kilesārīnaṃ, pañcavidhamārānaṃ vā sāsanassa vā paccatthikānaṃ aññatitthiyānaṃ. Tesaṃ pana hananaṃ pāṭihāriyehi abhibhavanaṃ appaṭibhānatākaraṇaṃ ajjhupekkhaṇañca. Kesivinayasuttañcettha nidassanaṃ. Tathā ṭhānāṭṭhānādīni jānatā. Yathākammūpage satte passatā. Savāsanānamāsavānaṃ khīṇattā arahatā. Abhiññeyyādibhede dhamme abhiññeyyādito aviparītāvabodhato sammāsambuddhena.
அத² வா தீஸு காலேஸு அப்படிஹதஞாணதாய ஜானதா. காயகம்மாதி³வஸேன திண்ணம்பி கம்மானங் ஞாணானுபரிவத்திதோ நிஸம்மகாரிதாய பஸ்ஸதா. த³வாதீ³னம்பி அபா⁴வஸாதி⁴காய பஹானஸம்பதா³ய அரஹதா. ச²ந்தா³தீ³னங் அஹானிஹேதுபூ⁴தாய அக்க²யபடிபா⁴னஸாதி⁴காய ஸப்³ப³ஞ்ஞுதாய ஸம்மாஸம்பு³த்³தே⁴னாதி ஏவங் த³ஸப³லஅட்டா²ரஸஆவேணிகபு³த்³த⁴த⁴ம்மவஸேனபி யோஜனா காதப்³பா³.
Atha vā tīsu kālesu appaṭihatañāṇatāya jānatā. Kāyakammādivasena tiṇṇampi kammānaṃ ñāṇānuparivattito nisammakāritāya passatā. Davādīnampi abhāvasādhikāya pahānasampadāya arahatā. Chandādīnaṃ ahānihetubhūtāya akkhayapaṭibhānasādhikāya sabbaññutāya sammāsambuddhenāti evaṃ dasabalaaṭṭhārasaāveṇikabuddhadhammavasenapi yojanā kātabbā.
அபி⁴ஸங்க²தந்தி அத்தனோ பச்சயேஹி அபி⁴ஸம்முக²பா⁴வேன ஸமேச்ச ஸம்பு⁴ய்ய கதங். ஸ்வாஸ்ஸ கதபா⁴வோ உப்பாத³னேன வேதி³தப்³போ³, ந உப்பன்னஸ்ஸ படிஸங்க²ரணேனாதி ஆஹ ‘‘உப்பாதி³த’’ந்தி. தே சஸ்ஸ பச்சயா சேதனாபதா⁴னாதி த³ஸ்ஸேதுங் பாளியங் ‘‘அபி⁴ஸங்க²தங் அபி⁴ஸஞ்சேதயித’’ந்தி வுத்தந்தி ‘‘சேதயிதங் கப்பயித’’ந்தி அத்த²மாஹ. அபி⁴ஸங்க²தங் அபி⁴ஸஞ்சேதயிதந்தி ச ஜா²னஸ்ஸ பாதுபா⁴வத³ஸ்ஸனமுகே²ன வித்³த⁴ங்ஸனபா⁴வங் உல்லிங்கே³தி. யஞ்ஹி அஹுத்வா ஸம்ப⁴வதி, தங் ஹுத்வா படிவேதி. தேனாஹ பாளியங் ‘‘யங் கோ² பனா’’திஆதி³. ஸமத²விபஸ்ஸனாத⁴ம்மே டி²தோதி எத்த² ஸமத²த⁴ம்மே டி²தத்தா ஸமாஹிதோ விபஸ்ஸனங் பட்ட²பெத்வா அனிச்சானுபஸ்ஸனாதீ³ஹி நிச்சஸஞ்ஞாத³யோ பஜஹந்தோ அனுக்கமேன தங் அனுலோமஞாணங் பாபேதா ஹுத்வா விபஸ்ஸன்னாத⁴ம்மே டி²தோ. ஸமத²விபஸ்ஸனாஸங்கா²தேஸு த⁴ம்மேஸு ரஞ்ஜனட்டே²ன ராகோ³. நந்த³னட்டே²ன நந்தீ³. தத்த² ஸுகு²மா அபெக்கா² வுத்தா. யா நிகந்தீதி வுச்சதி.
Abhisaṅkhatanti attano paccayehi abhisammukhabhāvena samecca sambhuyya kataṃ. Svāssa katabhāvo uppādanena veditabbo, na uppannassa paṭisaṅkharaṇenāti āha ‘‘uppādita’’nti. Te cassa paccayā cetanāpadhānāti dassetuṃ pāḷiyaṃ ‘‘abhisaṅkhataṃ abhisañcetayita’’nti vuttanti ‘‘cetayitaṃ kappayita’’nti atthamāha. Abhisaṅkhataṃ abhisañcetayitanti ca jhānassa pātubhāvadassanamukhena viddhaṃsanabhāvaṃ ulliṅgeti. Yañhi ahutvā sambhavati, taṃ hutvā paṭiveti. Tenāha pāḷiyaṃ ‘‘yaṃ kho panā’’tiādi. Samathavipassanādhamme ṭhitoti ettha samathadhamme ṭhitattā samāhito vipassanaṃ paṭṭhapetvā aniccānupassanādīhi niccasaññādayo pajahanto anukkamena taṃ anulomañāṇaṃ pāpetā hutvā vipassannādhamme ṭhito. Samathavipassanāsaṅkhātesu dhammesu rañjanaṭṭhena rāgo. Nandanaṭṭhena nandī. Tattha sukhumā apekkhā vuttā. Yā nikantīti vuccati.
ஏவங் ஸந்தேதி ஏவங் யதா²ருதவஸேனேவ இமஸ்ஸ ஸுத்தபத³ஸ்ஸ அத்தே² க³ஹேதப்³பே³ ஸதி. ஸமத²விபஸ்ஸனாஸு ச²ந்த³ராகோ³ கத்தப்³போ³தி அனாகா³மிப²லங் அனிப்³ப³த்தெத்வா தத³த்தா²ய ஸமத²விபஸ்ஸனாபி அனிப்³ப³த்தெத்வா கேவலங் தத்த² ச²ந்த³ராகோ³ கத்தப்³போ³ ப⁴விஸ்ஸதி. கஸ்மா? தேஸு ஸமத²விபஸ்ஸனாஸங்கா²தேஸு த⁴ம்மேஸு ச²ந்த³ராக³மத்தேன அனாகா³மினா லத்³த⁴ப்³ப³ஸ்ஸ அலத்³த⁴அனாகா³மிப²லேனபி லத்³த⁴ப்³ப³த்தா. ததா² ஸதி தேன அனாகா³மிப²லம்பி லத்³த⁴ப்³ப³மேவ ஹோதி. தேனாஹ ‘‘அனாகா³மிப²லங் படிலத்³த⁴ங் ப⁴விஸ்ஸதீ’’தி. ஸபா⁴வதோ ரஸிதப்³ப³த்தா அவிபரீதோ அத்தோ² ஏவ அத்த²ரஸோ.
Evaṃ santeti evaṃ yathārutavaseneva imassa suttapadassa atthe gahetabbe sati. Samathavipassanāsu chandarāgo kattabboti anāgāmiphalaṃ anibbattetvā tadatthāya samathavipassanāpi anibbattetvā kevalaṃ tattha chandarāgo kattabbo bhavissati. Kasmā? Tesu samathavipassanāsaṅkhātesu dhammesu chandarāgamattena anāgāminā laddhabbassa aladdhaanāgāmiphalenapi laddhabbattā. Tathā sati tena anāgāmiphalampi laddhabbameva hoti. Tenāha ‘‘anāgāmiphalaṃ paṭiladdhaṃ bhavissatī’’ti. Sabhāvato rasitabbattā aviparīto attho eva attharaso.
அஞ்ஞாபி காசி ஸுக³தியோதி வினிபாதிகே ஸந்தா⁴யாஹ. அஞ்ஞாபி காசி து³க்³க³தியோதி அஸுரகாயமாஹ.
Aññāpi kāci sugatiyoti vinipātike sandhāyāha. Aññāpi kāci duggatiyoti asurakāyamāha.
அப்பங் யாசிதேன ப³ஹுங் தெ³ந்தேன உளாரபுரிஸேன விய ஏகங் த⁴ம்மங் புச்சி²தேன ‘‘அயம்பி ஏகத⁴ம்மோ’’தி கதி²தத்தா ஏகாத³ஸபி த⁴ம்மா புச்சா²வஸேன ஏகத⁴ம்மோ நாம ஜாதோ பச்சேகங் வாக்யபரிஸமாபனஞாயேன. புச்சா²வஸேனாதி ‘‘அத்தி² நு கோ², ப⁴ந்தே ஆனந்த³, தேன…பே॰… ஸம்மாஸம்பு³த்³தே⁴ன ஏகத⁴ம்மோ ஸம்மத³க்கா²தோ’’தி ஏவங் பவத்தபுச்சா²வஸேன. அமதுப்பத்திஅத்தே²னாதி அமதபா⁴வஸ்ஸ உப்பத்திஹேதுதாய, ஸப்³பா³னிபி கம்மட்டா²னானி ஏகரஸாபி அமதாதி⁴க³மஸ்ஸ படிபத்தியாதி அத்தோ². ஏவமெத்த² அக்³க³ப²லபூ⁴மி அனாகா³மிப²லபூ⁴மீதி த்³வேவ பூ⁴மியோ ஸரூபதோ ஆக³தா, நானந்தரியதாய பன ஹெட்டி²மாபி த்³வே பூ⁴மியோ அத்த²தோ ஆக³தா ஏவாதி த³ட்ட²ப்³பா³தி. பஞ்ச ஸதானி அக்³கோ⁴ ஏதஸ்ஸாதி பஞ்சஸதங். ஸேஸமெத்த² உத்தானமேவ.
Appaṃ yācitena bahuṃ dentena uḷārapurisena viya ekaṃ dhammaṃ pucchitena ‘‘ayampi ekadhammo’’ti kathitattā ekādasapi dhammā pucchāvasena ekadhammo nāma jāto paccekaṃ vākyaparisamāpanañāyena. Pucchāvasenāti ‘‘atthi nu kho, bhante ānanda, tena…pe… sammāsambuddhena ekadhammo sammadakkhāto’’ti evaṃ pavattapucchāvasena. Amatuppattiatthenāti amatabhāvassa uppattihetutāya, sabbānipi kammaṭṭhānāni ekarasāpi amatādhigamassa paṭipattiyāti attho. Evamettha aggaphalabhūmi anāgāmiphalabhūmīti dveva bhūmiyo sarūpato āgatā, nānantariyatāya pana heṭṭhimāpi dve bhūmiyo atthato āgatā evāti daṭṭhabbāti. Pañca satāni aggho etassāti pañcasataṃ. Sesamettha uttānameva.
அட்ட²கனாக³ரஸுத்தவண்ணனா நிட்டி²தா.
Aṭṭhakanāgarasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 6. அட்ட²கனாக³ரஸுத்தங் • 6. Aṭṭhakanāgarasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 6. அட்ட²கனாக³ரஸுத்தவண்ணனா • 6. Aṭṭhakanāgarasuttavaṇṇanā
