| Library / Tipiṭaka / তিপিটক • Tipiṭaka / মজ্ঝিমনিকায (অট্ঠকথা) • Majjhimanikāya (aṭṭhakathā) |
২. অট্ঠকনাগরসুত্তৰণ্ণনা
2. Aṭṭhakanāgarasuttavaṇṇanā
১৭. এৰং মে সুতন্তি অট্ঠকনাগরসুত্তং। তত্থ বেলুৰগামকেতি ৰেসালিযা দক্খিণপস্সে অৰিদূরে বেলুৰগামকো নাম অত্থি, তং গোচরগামং কত্ৰাতি অত্থো। দসমোতি সো হি জাতিগোত্তৰসেন চেৰ সারপ্পত্তকুলগণনায চ দসমে ঠানে গণীযতি, তেনস্স দসমোত্ৰেৰ নামং জাতং। অট্ঠকনাগরোতি অট্ঠকনগরৰাসী। কুক্কুটারামোতি কুক্কুটসেট্ঠিনা কারিতো আরামো।
17.Evaṃme sutanti aṭṭhakanāgarasuttaṃ. Tattha beluvagāmaketi vesāliyā dakkhiṇapasse avidūre beluvagāmako nāma atthi, taṃ gocaragāmaṃ katvāti attho. Dasamoti so hi jātigottavasena ceva sārappattakulagaṇanāya ca dasame ṭhāne gaṇīyati, tenassa dasamotveva nāmaṃ jātaṃ. Aṭṭhakanāgaroti aṭṭhakanagaravāsī. Kukkuṭārāmoti kukkuṭaseṭṭhinā kārito ārāmo.
১৮. তেন ভগৰতা…পে॰… অক্খাতোতি এত্থ অযং সঙ্খেপত্থো, যো সো ভগৰা সমতিংস পারমিযো পূরেত্ৰা সব্বকিলেসে ভঞ্জিত্ৰা অনুত্তরং সম্মাসম্বোধিং অভিসম্বুদ্ধো, তেন ভগৰতা, তেসং তেসং সত্তানং আসযানুসযং জানতা, হত্থতলে ঠপিতআমলকং ৰিয সব্বং ঞেয্যধম্মং পস্সতা। অপিচ পুব্বেনিৰাসাদীহি জানতা, দিব্বেন চক্খুনা পস্সতা, তীহি ৰিজ্জাহি ছহি ৰা পন অভিঞ্ঞাহি জানতা, সব্বত্থ অপ্পটিহতেন সমন্তচক্খুনা পস্সতা, সব্বধম্মজাননসমত্থায পঞ্ঞায জানতা, সব্বসত্তানং চক্খুৰিসযাতীতানি তিরোকুট্টাদিগতানিপি রূপানি অতিৰিসুদ্ধেন মংসচক্খুনা পস্সতা, অত্তহিতসাধিকায সমাধিপদট্ঠানায পটিৰেধপঞ্ঞায জানতা, পরহিতসাধিকায করুণাপদট্ঠানায দেসনাপঞ্ঞায পস্সতা, অরীনং হতত্তা পচ্চযাদীনঞ্চ অরহত্তা অরহতা, সম্মা সামঞ্চ সচ্চানং বুদ্ধত্তা সম্মাসম্বুদ্ধেন। অন্তরাযিকধম্মে ৰা জানতা, নিয্যানিকধম্মে পস্সতা, কিলেসারীনং হতত্তা অরহতা, সামং সব্বধম্মানং বুদ্ধত্তা সম্মাসম্বুদ্ধেনাতি এৰং চতুৰেসারজ্জৰসেন চতূহি কারণেহি থোমিতেন। অত্থি নু খো একো ধম্মো অক্খাতোতি।
18.Tena bhagavatā…pe… akkhātoti ettha ayaṃ saṅkhepattho, yo so bhagavā samatiṃsa pāramiyo pūretvā sabbakilese bhañjitvā anuttaraṃ sammāsambodhiṃ abhisambuddho, tena bhagavatā, tesaṃ tesaṃ sattānaṃ āsayānusayaṃ jānatā, hatthatale ṭhapitaāmalakaṃ viya sabbaṃ ñeyyadhammaṃ passatā. Apica pubbenivāsādīhi jānatā, dibbena cakkhunā passatā, tīhi vijjāhi chahi vā pana abhiññāhi jānatā, sabbattha appaṭihatena samantacakkhunā passatā, sabbadhammajānanasamatthāya paññāya jānatā, sabbasattānaṃ cakkhuvisayātītāni tirokuṭṭādigatānipi rūpāni ativisuddhena maṃsacakkhunā passatā, attahitasādhikāya samādhipadaṭṭhānāya paṭivedhapaññāya jānatā, parahitasādhikāya karuṇāpadaṭṭhānāya desanāpaññāya passatā, arīnaṃ hatattā paccayādīnañca arahattā arahatā, sammā sāmañca saccānaṃ buddhattā sammāsambuddhena. Antarāyikadhamme vā jānatā, niyyānikadhamme passatā, kilesārīnaṃ hatattā arahatā, sāmaṃ sabbadhammānaṃ buddhattā sammāsambuddhenāti evaṃ catuvesārajjavasena catūhi kāraṇehi thomitena. Atthi nu kho eko dhammo akkhātoti.
১৯. অভিসঙ্খতন্তি কতং উপ্পাদিতং। অভিসঞ্চেতযিতন্তি চেতযিতং পকপ্পিতং। সো তত্থ ঠিতোতি সো তস্মিং সমথৰিপস্সনাধম্মে ঠিতো। ধম্মরাগেন ধম্মনন্দিযাতি পদদ্ৰযেহি সমথৰিপস্সনাসু ছন্দরাগো ৰুত্তো। সমথৰিপস্সনাসু হি সব্বেন সব্বং ছন্দরাগং পরিযাদিযিতুং সক্কোন্তো অরহা হোতি, অসক্কোন্তো অনাগামী হোতি। সো সমথৰিপস্সনাসু ছন্দরাগস্স অপ্পহীনত্তা চতুত্থজ্ঝানচেতনায সুদ্ধাৰাসে নিব্বত্ততি, অযং আচরিযানং সমানকথা।
19.Abhisaṅkhatanti kataṃ uppāditaṃ. Abhisañcetayitanti cetayitaṃ pakappitaṃ. So tattha ṭhitoti so tasmiṃ samathavipassanādhamme ṭhito. Dhammarāgena dhammanandiyāti padadvayehi samathavipassanāsu chandarāgo vutto. Samathavipassanāsu hi sabbena sabbaṃ chandarāgaṃ pariyādiyituṃ sakkonto arahā hoti, asakkonto anāgāmī hoti. So samathavipassanāsu chandarāgassa appahīnattā catutthajjhānacetanāya suddhāvāse nibbattati, ayaṃ ācariyānaṃ samānakathā.
ৰিতণ্ডৰাদী পনাহ ‘‘তেনেৰ ধম্মরাগেনাতি ৰচনতো অকুসলেন সুদ্ধাৰাসে নিব্বত্ততী’’তি সো ‘‘সুত্তং আহরা’’তি ৰত্তব্বো, অদ্ধা অঞ্ঞং অপস্সন্তো ইদমেৰ আহরিস্সতি, ততো ৰত্তব্বো ‘‘কিং পনিদং সুত্তং নেয্যত্থং নীতত্থ’’ন্তি, অদ্ধা নীতত্থন্তি ৰক্খতি। ততো ৰত্তব্বো – এৰং সন্তে অনাগামিফলত্থিকেন সমথৰিপস্সনাসু ছন্দরাগো কত্তব্বো ভৰিস্সতি, ছন্দরাগে উপ্পাদিতে অনাগামিফলং পটিৰিদ্ধং ভৰিস্সতি ‘‘মা সুত্তং মে লদ্ধ’’ন্তি যং ৰা তং ৰা দীপেহি। পঞ্হং কথেন্তেন হি আচরিযস্স সন্তিকে উগ্গহেত্ৰা অত্থরসং পটিৰিজ্ঝিত্ৰা কথেতুং ৰট্টতি, অকুসলেন হি সগ্গে, কুসলেন ৰা অপাযে পটিসন্ধি নাম নত্থি। ৰুত্তঞ্হেতং ভগৰতা –
Vitaṇḍavādī panāha ‘‘teneva dhammarāgenāti vacanato akusalena suddhāvāse nibbattatī’’ti so ‘‘suttaṃ āharā’’ti vattabbo, addhā aññaṃ apassanto idameva āharissati, tato vattabbo ‘‘kiṃ panidaṃ suttaṃ neyyatthaṃ nītattha’’nti, addhā nītatthanti vakkhati. Tato vattabbo – evaṃ sante anāgāmiphalatthikena samathavipassanāsu chandarāgo kattabbo bhavissati, chandarāge uppādite anāgāmiphalaṃ paṭividdhaṃ bhavissati ‘‘mā suttaṃ me laddha’’nti yaṃ vā taṃ vā dīpehi. Pañhaṃ kathentena hi ācariyassa santike uggahetvā attharasaṃ paṭivijjhitvā kathetuṃ vaṭṭati, akusalena hi sagge, kusalena vā apāye paṭisandhi nāma natthi. Vuttañhetaṃ bhagavatā –
‘‘ন, ভিক্খৰে, লোভজেন কম্মেন দোসজেন কম্মেন মোহজেন কম্মেন দেৰা পঞ্ঞাযন্তি, মনুস্সা পঞ্ঞাযন্তি, যা ৰা পনঞ্ঞাপি কাচি সুগতিযো, অথ খো, ভিক্খৰে, লোভজেন কম্মেন দোসজেন কম্মেন মোহজেন কম্মেন নিরযো পঞ্ঞাযতি, তিরচ্ছানযোনি পঞ্ঞাযতি, পেত্তিৰিসযো পঞ্ঞাযতি, যা ৰা পনঞ্ঞাপি কাচি দুগ্গতিযো’’তি –
‘‘Na, bhikkhave, lobhajena kammena dosajena kammena mohajena kammena devā paññāyanti, manussā paññāyanti, yā vā panaññāpi kāci sugatiyo, atha kho, bhikkhave, lobhajena kammena dosajena kammena mohajena kammena nirayo paññāyati, tiracchānayoni paññāyati, pettivisayo paññāyati, yā vā panaññāpi kāci duggatiyo’’ti –
এৰং পঞ্ঞাপেতব্বো। সচে সঞ্জানাতি সঞ্জানাতু, নো চে সঞ্জানাতি, ‘‘গচ্ছ পাতোৰ ৰিহারং পৰিসিত্ৰা যাগুং পিৰাহী’’তি উয্যোজেতব্বো।
Evaṃ paññāpetabbo. Sace sañjānāti sañjānātu, no ce sañjānāti, ‘‘gaccha pātova vihāraṃ pavisitvā yāguṃ pivāhī’’ti uyyojetabbo.
যথা চ পন ইমস্মিং সুত্তে, এৰং মহামালুক্যোৰাদেপি মহাসতিপট্ঠানেপি কাযগতাসতিসুত্তেপি সমথৰিপস্সনা কথিতা। তত্থ ইমস্মিং সুত্তে সমথৰসেন গচ্ছতোপি ৰিপস্সনাৰসেন গচ্ছতোপি সমথধুরমেৰ ধুরং, মহামালুক্যোৰাদে ৰিপস্সনাৰ ধুরং, মহাসতিপট্ঠানং পন ৰিপস্সনুত্তরং নাম কথিতং, কাযগতাসতিসুত্তং সমথুত্তরন্তি।
Yathā ca pana imasmiṃ sutte, evaṃ mahāmālukyovādepi mahāsatipaṭṭhānepi kāyagatāsatisuttepi samathavipassanā kathitā. Tattha imasmiṃ sutte samathavasena gacchatopi vipassanāvasena gacchatopi samathadhurameva dhuraṃ, mahāmālukyovāde vipassanāva dhuraṃ, mahāsatipaṭṭhānaṃ pana vipassanuttaraṃ nāma kathitaṃ, kāyagatāsatisuttaṃ samathuttaranti.
অযং খো গহপতি…পে॰… একধম্মো অক্খাতোতি একধম্মং পুচ্ছিতেন অযম্পি একধম্মোতি এৰং পুচ্ছাৰসেন কথিতত্তা একাদসপি ধম্মা একধম্মো নাম জাতো। মহাসকুলুদাযিসুত্তস্মিঞ্হি একূনৰীসতি পব্বানি পটিপদাৰসেন একধম্মো নাম জাতানি, ইধ একাদসপুচ্ছাৰসেন একধম্মোতি আগতানি। অমতুপ্পত্তিযত্থেন ৰা সব্বানিপি একধম্মোতি ৰত্তুং ৰট্টতি।
Ayaṃ kho gahapati…pe… ekadhammo akkhātoti ekadhammaṃ pucchitena ayampi ekadhammoti evaṃ pucchāvasena kathitattā ekādasapi dhammā ekadhammo nāma jāto. Mahāsakuludāyisuttasmiñhi ekūnavīsati pabbāni paṭipadāvasena ekadhammo nāma jātāni, idha ekādasapucchāvasena ekadhammoti āgatāni. Amatuppattiyatthena vā sabbānipi ekadhammoti vattuṃ vaṭṭati.
২১. নিধিমুখং গৰেসন্তোতি নিধিং পরিযেসন্তো। সকিদেৰাতি একপযোগেন। কথং পন একপযোগেনেৰ একাদসন্নং নিধীনং অধিগমো হোতীতি। ইধেকচ্চো অরঞ্ঞে নিধিং গৰেসমানো চরতি, তমেনং অঞ্ঞতরো অত্থচরকো দিস্ৰা ‘‘কিং ভো চরসী’’তি পুচ্ছতি। সো ‘‘জীৰিতৰুত্তিং পরিযেসামী’’তি আহ। ইতরো ‘‘তেন হি সম্ম আগচ্ছ, এতং পাসাণং পৰত্তেহী’’তি আহ। সো তং পৰত্তেত্ৰা উপরূপরি ঠপিতা ৰা কুচ্ছিযা কুচ্ছিং আহচ্চ ঠিতা ৰা একাদস কুম্ভিযো পস্সেয্য, এৰং একপযোগেন একাদসন্নং নিধীনং অধিগমো হোতি।
21.Nidhimukhaṃ gavesantoti nidhiṃ pariyesanto. Sakidevāti ekapayogena. Kathaṃ pana ekapayogeneva ekādasannaṃ nidhīnaṃ adhigamo hotīti. Idhekacco araññe nidhiṃ gavesamāno carati, tamenaṃ aññataro atthacarako disvā ‘‘kiṃ bho carasī’’ti pucchati. So ‘‘jīvitavuttiṃ pariyesāmī’’ti āha. Itaro ‘‘tena hi samma āgaccha, etaṃ pāsāṇaṃ pavattehī’’ti āha. So taṃ pavattetvā uparūpari ṭhapitā vā kucchiyā kucchiṃ āhacca ṭhitā vā ekādasa kumbhiyo passeyya, evaṃ ekapayogena ekādasannaṃ nidhīnaṃ adhigamo hoti.
আচরিযধনং পরিযেসিস্সন্তীতি অঞ্ঞতিত্থিযা হি যস্স সন্তিকে সিপ্পং উগ্গণ্হন্তি, তস্স সিপ্পুগ্গহণতো পুরে ৰা পচ্ছা ৰা অন্তরন্তরে ৰা গেহতো নীহরিত্ৰা ধনং দেন্তি। যেসং গেহে নত্থি, তে ঞাতিসভাগতো পরিযেসন্তি, তথা অলভমানা ভিক্খম্পি চরিত্ৰা দেন্তিযেৰ। তং সন্ধাযেতং ৰুত্তং।
Ācariyadhanaṃ pariyesissantīti aññatitthiyā hi yassa santike sippaṃ uggaṇhanti, tassa sippuggahaṇato pure vā pacchā vā antarantare vā gehato nīharitvā dhanaṃ denti. Yesaṃ gehe natthi, te ñātisabhāgato pariyesanti, tathā alabhamānā bhikkhampi caritvā dentiyeva. Taṃ sandhāyetaṃ vuttaṃ.
কিমঙ্গং পনাহন্তি বাহিরকা তাৰ অনিয্যানিকেপি সাসনে সিপ্পমত্তদাযকস্স ধনং পরিযেসন্তি; অহং পন এৰংৰিধে নিয্যানিকসাসনে একাদসৰিধং অমতুপ্পত্তিপটিপদং দেসেন্তস্স আচরিযস্স পূজং কিং ন করিস্সামি, করিস্সামিযেৰাতি ৰদতি। পচ্চেকদুস্সযুগেন অচ্ছাদেসীতি একমেকস্স ভিক্খুনো একেকং দুস্সযুগমদাসীতি অত্থো। সমুদাচারৰচনং পনেত্থ এৰরূপং হোতি, তস্মা অচ্ছাদেসীতি ৰুত্তং। পঞ্চসতৰিহারন্তি পঞ্চসতগ্ঘনিকং পণ্ণসালং কারেসীতি অত্থো। সেসং সব্বত্থ উত্তানমেৰাতি।
Kimaṅgaṃ panāhanti bāhirakā tāva aniyyānikepi sāsane sippamattadāyakassa dhanaṃ pariyesanti; ahaṃ pana evaṃvidhe niyyānikasāsane ekādasavidhaṃ amatuppattipaṭipadaṃ desentassa ācariyassa pūjaṃ kiṃ na karissāmi, karissāmiyevāti vadati. Paccekadussayugenaacchādesīti ekamekassa bhikkhuno ekekaṃ dussayugamadāsīti attho. Samudācāravacanaṃ panettha evarūpaṃ hoti, tasmā acchādesīti vuttaṃ. Pañcasatavihāranti pañcasatagghanikaṃ paṇṇasālaṃ kāresīti attho. Sesaṃ sabbattha uttānamevāti.
পপঞ্চসূদনিযা মজ্ঝিমনিকাযট্ঠকথায
Papañcasūdaniyā majjhimanikāyaṭṭhakathāya
অট্ঠকনাগরসুত্তৰণ্ণনা নিট্ঠিতা।
Aṭṭhakanāgarasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / মজ্ঝিমনিকায • Majjhimanikāya / ২. অট্ঠকনাগরসুত্তং • 2. Aṭṭhakanāgarasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / মজ্ঝিমনিকায (টীকা) • Majjhimanikāya (ṭīkā) / ২. অট্ঠকনাগরসুত্তৰণ্ণনা • 2. Aṭṭhakanāgarasuttavaṇṇanā
