| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) |
༦. ཨཊྛཀནཱགརསུཏྟཝཎྞནཱ
6. Aṭṭhakanāgarasuttavaṇṇanā
༡༦. ཚཊྛེ བེལུཝགཱམཀེཏི ཝེསཱལིཡཱ དཀྑིཎཔསྶེ ཨཝིདཱུརེ བེལུཝགཱམཀོ ནཱམ ཨཏྠི, ཏཾ གོཙརགཱམཾ ཀཏྭཱཏི ཨཏྠོ། སཱརཔྤཏྟཀུལགཎནཱཡཱཏི མཧཱསཱརམཧཔྤཏྟཀུལགཎནཱཡ། དསམེ ཋཱནེཏི ཨཉྙེ ཨཉྙེཏི དསགཎནཊྛཱནེ། ཨཊྛཀནགརེ ཛཱཏོ བྷཝོཏི ཨཊྛཀནཱགརོ། ཀུཀྐུཊཱརཱམོཏི པཱཊལིཔུཏྟེ ཀུཀྐུཊཱརཱམོ, ན ཀོསམྦིཡཾ།
16. Chaṭṭhe beluvagāmaketi vesāliyā dakkhiṇapasse avidūre beluvagāmako nāma atthi, taṃ gocaragāmaṃ katvāti attho. Sārappattakulagaṇanāyāti mahāsāramahappattakulagaṇanāya. Dasame ṭhāneti aññe aññeti dasagaṇanaṭṭhāne. Aṭṭhakanagare jāto bhavoti aṭṭhakanāgaro. Kukkuṭārāmoti pāṭaliputte kukkuṭārāmo, na kosambiyaṃ.
པཀཏཏྠཔྤཊིནིདྡེསོ ཏ-སདྡོཏི ཏསྶ ‘‘བྷགཝཏཱ’’ཏིཨཱདཱིཧི པདེཧི སམཱནཱདྷིཀརཎབྷཱཝེན ཝུཏྟསྶ ཡེན ཨབྷིསམྦུདྡྷབྷཱཝེན བྷགཝཱ པཀཏོ ཨདྷིགཏོ སུཔཱཀཊོ ཙ, ཏཾ ཨབྷིསམྦུདྡྷབྷཱཝཾ སདྡྷིཾ ཨཱགམནཱིཡཔཊིཔདཱཡ ཨཏྠབྷཱཝེནེཝ དསྶེནྟོ ‘‘ཡོ སོ…པེ॰… ཨབྷིསམྦུདྡྷོ’’ཏི ཨཱཧ། སཏིཔི ཉཱཎདསྶནསདྡཱནཾ ཨིདྷ པཉྙཱཝེཝཙནབྷཱཝེ ཏེན ཏེན ཝིསེསེན ནེསཾ ཝིསཡཝིསེསེ པཝཏྟིདསྶནཏྠཾ ཨསཱདྷཱརཎཉཱཎཝིསེསཝསེན, ཝིཛྫཱཏྟཡཝསེན, ཝིཛྫཱབྷིཉྙཱནཱཝརཎཝསེན, སབྦཉྙུཏཉྙཱཎམཾསཙཀྑུཝསེན པཊིཝེདྷདེསནཱཉཱཎཝསེན ཙ ཏདཏྠཾ ཡོཛེཏྭཱ དསྶེནྟོ ‘‘ཏེསཾ ཏེས’’ནྟིཨཱདིམཱཧ། ཏཏྠ ཨཱསཡཱནུསཡཾ ཛཱནཏཱ ཨཱསཡཱནུསཡཉཱཎེན, སབྦཉེཡྻདྷམྨཾ པསྶཏཱ སབྦཉྙུཏཱནཱཝརཎཉཱཎེཧི། པུབྦེནིཝཱསཱདཱིཧཱིཏི པུབྦེནིཝཱསཱསཝཀྑཡཉཱཎེཧི། པཊིཝེདྷཔཉྙཱཡཱཏི ཨརིཡམགྒཔཉྙཱཡ། དེསནཱཔཉྙཱཡ པསྶཏཱཏི དེསེཏབྦདྷམྨཱནཾ དེསེཏབྦཔྤཀཱརཾ བོདྷནེཡྻཔུགྒལཱནཉྩ ཨཱསཡཱནུསཡཙརིཏཱདྷིམུཏྟིཨཱདིབྷེདཾ དྷམྨཾ དེསནཱཔཉྙཱཡ ཡཱཐཱཝཏོ པསྶཏཱ། ཨརཱིནནྟི ཀིལེསཱརཱིནཾ, པཉྩཝིདྷམཱརཱནཾ ཝཱ སཱསནསྶ ཝཱ པཙྩཏྠིཀཱནཾ ཨཉྙཏིཏྠིཡཱནཾ། ཏེསཾ པན ཧནནཾ པཱཊིཧཱརིཡེཧི ཨབྷིབྷཝནཾ ཨཔྤཊིབྷཱནཏཱཀརཎཾ ཨཛ྄ཛྷུཔེཀྑཎཉྩ། ཀེསིཝིནཡསུཏྟཉྩེཏྠ ནིདསྶནཾ། ཏཐཱ ཋཱནཱཊྛཱནཱདཱིནི ཛཱནཏཱ། ཡཐཱཀམྨཱུཔགེ སཏྟེ པསྶཏཱ། སཝཱསནཱནམཱསཝཱནཾ ཁཱིཎཏྟཱ ཨརཧཏཱ། ཨབྷིཉྙེཡྻཱདིབྷེདེ དྷམྨེ ཨབྷིཉྙེཡྻཱདིཏོ ཨཝིཔརཱིཏཱཝབོདྷཏོ སམྨཱསམྦུདྡྷེན།
Pakatatthappaṭiniddeso ta-saddoti tassa ‘‘bhagavatā’’tiādīhi padehi samānādhikaraṇabhāvena vuttassa yena abhisambuddhabhāvena bhagavā pakato adhigato supākaṭo ca, taṃ abhisambuddhabhāvaṃ saddhiṃ āgamanīyapaṭipadāya atthabhāveneva dassento ‘‘yo so…pe… abhisambuddho’’ti āha. Satipi ñāṇadassanasaddānaṃ idha paññāvevacanabhāve tena tena visesena nesaṃ visayavisese pavattidassanatthaṃ asādhāraṇañāṇavisesavasena, vijjāttayavasena, vijjābhiññānāvaraṇavasena, sabbaññutaññāṇamaṃsacakkhuvasena paṭivedhadesanāñāṇavasena ca tadatthaṃ yojetvā dassento ‘‘tesaṃ tesa’’ntiādimāha. Tattha āsayānusayaṃ jānatā āsayānusayañāṇena, sabbañeyyadhammaṃ passatā sabbaññutānāvaraṇañāṇehi. Pubbenivāsādīhīti pubbenivāsāsavakkhayañāṇehi. Paṭivedhapaññāyāti ariyamaggapaññāya. Desanāpaññāya passatāti desetabbadhammānaṃ desetabbappakāraṃ bodhaneyyapuggalānañca āsayānusayacaritādhimuttiādibhedaṃ dhammaṃ desanāpaññāya yāthāvato passatā. Arīnanti kilesārīnaṃ, pañcavidhamārānaṃ vā sāsanassa vā paccatthikānaṃ aññatitthiyānaṃ. Tesaṃ pana hananaṃ pāṭihāriyehi abhibhavanaṃ appaṭibhānatākaraṇaṃ ajjhupekkhaṇañca. Kesivinayasuttañcettha nidassanaṃ. Tathā ṭhānāṭṭhānādīni jānatā. Yathākammūpage satte passatā. Savāsanānamāsavānaṃ khīṇattā arahatā. Abhiññeyyādibhede dhamme abhiññeyyādito aviparītāvabodhato sammāsambuddhena.
ཨཐ ཝཱ ཏཱིསུ ཀཱལེསུ ཨཔྤཊིཧཏཉཱཎཏཱཡ ཛཱནཏཱ། ཀཱཡཀམྨཱདིཝསེན ཏིཎྞམྤི ཀམྨཱནཾ ཉཱཎཱནུཔརིཝཏྟིཏོ ནིསམྨཀཱརིཏཱཡ པསྶཏཱ། དཝཱདཱིནམྤི ཨབྷཱཝསཱདྷིཀཱཡ པཧཱནསམྤདཱཡ ཨརཧཏཱ། ཚནྡཱདཱིནཾ ཨཧཱནིཧེཏུབྷཱུཏཱཡ ཨཀྑཡཔཊིབྷཱནསཱདྷིཀཱཡ སབྦཉྙུཏཱཡ སམྨཱསམྦུདྡྷེནཱཏི ཨེཝཾ དསབལཨཊྛཱརསཨཱཝེཎིཀབུདྡྷདྷམྨཝསེནཔི ཡོཛནཱ ཀཱཏབྦཱ།
Atha vā tīsu kālesu appaṭihatañāṇatāya jānatā. Kāyakammādivasena tiṇṇampi kammānaṃ ñāṇānuparivattito nisammakāritāya passatā. Davādīnampi abhāvasādhikāya pahānasampadāya arahatā. Chandādīnaṃ ahānihetubhūtāya akkhayapaṭibhānasādhikāya sabbaññutāya sammāsambuddhenāti evaṃ dasabalaaṭṭhārasaāveṇikabuddhadhammavasenapi yojanā kātabbā.
ཨབྷིསངྑཏནྟི ཨཏྟནོ པཙྩཡེཧི ཨབྷིསམྨུཁབྷཱཝེན སམེཙྩ སམྦྷུཡྻ ཀཏཾ། སྭཱསྶ ཀཏབྷཱཝོ ཨུཔྤཱདནེན ཝེདིཏབྦོ, ན ཨུཔྤནྣསྶ པཊིསངྑརཎེནཱཏི ཨཱཧ ‘‘ཨུཔྤཱདིཏ’’ནྟི། ཏེ ཙསྶ པཙྩཡཱ ཙེཏནཱཔདྷཱནཱཏི དསྶེཏུཾ པཱལི༹ཡཾ ‘‘ཨབྷིསངྑཏཾ ཨབྷིསཉྩེཏཡིཏ’’ནྟི ཝུཏྟནྟི ‘‘ཙེཏཡིཏཾ ཀཔྤཡིཏ’’ནྟི ཨཏྠམཱཧ། ཨབྷིསངྑཏཾ ཨབྷིསཉྩེཏཡིཏནྟི ཙ ཛྷཱནསྶ པཱཏུབྷཱཝདསྶནམུཁེན ཝིདྡྷཾསནབྷཱཝཾ ཨུལླིངྒེཏི། ཡཉྷི ཨཧུཏྭཱ སམྦྷཝཏི, ཏཾ ཧུཏྭཱ པཊིཝེཏི། ཏེནཱཧ པཱལི༹ཡཾ ‘‘ཡཾ ཁོ པནཱ’’ཏིཨཱདི། སམཐཝིཔསྶནཱདྷམྨེ ཋིཏོཏི ཨེཏྠ སམཐདྷམྨེ ཋིཏཏྟཱ སམཱཧིཏོ ཝིཔསྶནཾ པཊྛཔེཏྭཱ ཨནིཙྩཱནུཔསྶནཱདཱིཧི ནིཙྩསཉྙཱདཡོ པཛཧནྟོ ཨནུཀྐམེན ཏཾ ཨནུལོམཉཱཎཾ པཱཔེཏཱ ཧུཏྭཱ ཝིཔསྶནྣཱདྷམྨེ ཋིཏོ། སམཐཝིཔསྶནཱསངྑཱཏེསུ དྷམྨེསུ རཉྫནཊྛེན རཱགོ། ནནྡནཊྛེན ནནྡཱི། ཏཏྠ སུཁུམཱ ཨཔེཀྑཱ ཝུཏྟཱ། ཡཱ ནིཀནྟཱིཏི ཝུཙྩཏི།
Abhisaṅkhatanti attano paccayehi abhisammukhabhāvena samecca sambhuyya kataṃ. Svāssa katabhāvo uppādanena veditabbo, na uppannassa paṭisaṅkharaṇenāti āha ‘‘uppādita’’nti. Te cassa paccayā cetanāpadhānāti dassetuṃ pāḷiyaṃ ‘‘abhisaṅkhataṃ abhisañcetayita’’nti vuttanti ‘‘cetayitaṃ kappayita’’nti atthamāha. Abhisaṅkhataṃ abhisañcetayitanti ca jhānassa pātubhāvadassanamukhena viddhaṃsanabhāvaṃ ulliṅgeti. Yañhi ahutvā sambhavati, taṃ hutvā paṭiveti. Tenāha pāḷiyaṃ ‘‘yaṃ kho panā’’tiādi. Samathavipassanādhamme ṭhitoti ettha samathadhamme ṭhitattā samāhito vipassanaṃ paṭṭhapetvā aniccānupassanādīhi niccasaññādayo pajahanto anukkamena taṃ anulomañāṇaṃ pāpetā hutvā vipassannādhamme ṭhito. Samathavipassanāsaṅkhātesu dhammesu rañjanaṭṭhena rāgo. Nandanaṭṭhena nandī. Tattha sukhumā apekkhā vuttā. Yā nikantīti vuccati.
ཨེཝཾ སནྟེཏི ཨེཝཾ ཡཐཱརུཏཝསེནེཝ ཨིམསྶ སུཏྟཔདསྶ ཨཏྠེ གཧེཏབྦེ སཏི། སམཐཝིཔསྶནཱསུ ཚནྡརཱགོ ཀཏྟབྦོཏི ཨནཱགཱམིཕལཾ ཨནིབྦཏྟེཏྭཱ ཏདཏྠཱཡ སམཐཝིཔསྶནཱཔི ཨནིབྦཏྟེཏྭཱ ཀེཝལཾ ཏཏྠ ཚནྡརཱགོ ཀཏྟབྦོ བྷཝིསྶཏི། ཀསྨཱ? ཏེསུ སམཐཝིཔསྶནཱསངྑཱཏེསུ དྷམྨེསུ ཚནྡརཱགམཏྟེན ཨནཱགཱམིནཱ ལདྡྷབྦསྶ ཨལདྡྷཨནཱགཱམིཕལེནཔི ལདྡྷབྦཏྟཱ། ཏཐཱ སཏི ཏེན ཨནཱགཱམིཕལམྤི ལདྡྷབྦམེཝ ཧོཏི། ཏེནཱཧ ‘‘ཨནཱགཱམིཕལཾ པཊིལདྡྷཾ བྷཝིསྶཏཱི’’ཏི། སབྷཱཝཏོ རསིཏབྦཏྟཱ ཨཝིཔརཱིཏོ ཨཏྠོ ཨེཝ ཨཏྠརསོ།
Evaṃ santeti evaṃ yathārutavaseneva imassa suttapadassa atthe gahetabbe sati. Samathavipassanāsu chandarāgo kattabboti anāgāmiphalaṃ anibbattetvā tadatthāya samathavipassanāpi anibbattetvā kevalaṃ tattha chandarāgo kattabbo bhavissati. Kasmā? Tesu samathavipassanāsaṅkhātesu dhammesu chandarāgamattena anāgāminā laddhabbassa aladdhaanāgāmiphalenapi laddhabbattā. Tathā sati tena anāgāmiphalampi laddhabbameva hoti. Tenāha ‘‘anāgāmiphalaṃ paṭiladdhaṃ bhavissatī’’ti. Sabhāvato rasitabbattā aviparīto attho eva attharaso.
ཨཉྙཱཔི ཀཱཙི སུགཏིཡོཏི ཝིནིཔཱཏིཀེ སནྡྷཱཡཱཧ། ཨཉྙཱཔི ཀཱཙི དུགྒཏིཡོཏི ཨསུརཀཱཡམཱཧ།
Aññāpi kāci sugatiyoti vinipātike sandhāyāha. Aññāpi kāci duggatiyoti asurakāyamāha.
ཨཔྤཾ ཡཱཙིཏེན བཧུཾ དེནྟེན ཨུལཱ༹རཔུརིསེན ཝིཡ ཨེཀཾ དྷམྨཾ པུཙྪིཏེན ‘‘ཨཡམྤི ཨེཀདྷམྨོ’’ཏི ཀཐིཏཏྟཱ ཨེཀཱདསཔི དྷམྨཱ པུཙྪཱཝསེན ཨེཀདྷམྨོ ནཱམ ཛཱཏོ པཙྩེཀཾ ཝཱཀྱཔརིསམཱཔནཉཱཡེན། པུཙྪཱཝསེནཱཏི ‘‘ཨཏྠི ནུ ཁོ, བྷནྟེ ཨཱནནྡ, ཏེན…པེ॰… སམྨཱསམྦུདྡྷེན ཨེཀདྷམྨོ སམྨདཀྑཱཏོ’’ཏི ཨེཝཾ པཝཏྟཔུཙྪཱཝསེན། ཨམཏུཔྤཏྟིཨཏྠེནཱཏི ཨམཏབྷཱཝསྶ ཨུཔྤཏྟིཧེཏུཏཱཡ, སབྦཱནིཔི ཀམྨཊྛཱནཱནི ཨེཀརསཱཔི ཨམཏཱདྷིགམསྶ པཊིཔཏྟིཡཱཏི ཨཏྠོ། ཨེཝམེཏྠ ཨགྒཕལབྷཱུམི ཨནཱགཱམིཕལབྷཱུམཱིཏི དྭེཝ བྷཱུམིཡོ སརཱུཔཏོ ཨཱགཏཱ, ནཱནནྟརིཡཏཱཡ པན ཧེཊྛིམཱཔི དྭེ བྷཱུམིཡོ ཨཏྠཏོ ཨཱགཏཱ ཨེཝཱཏི དཊྛབྦཱཏི། པཉྩ སཏཱནི ཨགྒྷོ ཨེཏསྶཱཏི པཉྩསཏཾ། སེསམེཏྠ ཨུཏྟཱནམེཝ།
Appaṃ yācitena bahuṃ dentena uḷārapurisena viya ekaṃ dhammaṃ pucchitena ‘‘ayampi ekadhammo’’ti kathitattā ekādasapi dhammā pucchāvasena ekadhammo nāma jāto paccekaṃ vākyaparisamāpanañāyena. Pucchāvasenāti ‘‘atthi nu kho, bhante ānanda, tena…pe… sammāsambuddhena ekadhammo sammadakkhāto’’ti evaṃ pavattapucchāvasena. Amatuppattiatthenāti amatabhāvassa uppattihetutāya, sabbānipi kammaṭṭhānāni ekarasāpi amatādhigamassa paṭipattiyāti attho. Evamettha aggaphalabhūmi anāgāmiphalabhūmīti dveva bhūmiyo sarūpato āgatā, nānantariyatāya pana heṭṭhimāpi dve bhūmiyo atthato āgatā evāti daṭṭhabbāti. Pañca satāni aggho etassāti pañcasataṃ. Sesamettha uttānameva.
ཨཊྛཀནཱགརསུཏྟཝཎྞནཱ ནིཊྛིཏཱ།
Aṭṭhakanāgarasuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཨངྒུཏྟརནིཀཱཡ • Aṅguttaranikāya / ༦. ཨཊྛཀནཱགརསུཏྟཾ • 6. Aṭṭhakanāgarasuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༦. ཨཊྛཀནཱགརསུཏྟཝཎྞནཱ • 6. Aṭṭhakanāgarasuttavaṇṇanā
