| Library / Tipiṭaka / ਤਿਪਿਟਕ • Tipiṭaka / ਸਮ੍ਮੋਹવਿਨੋਦਨੀ-ਅਟ੍ਠਕਥਾ • Sammohavinodanī-aṭṭhakathā |
(੮.) ਅਟ੍ਠਕਨਿਦ੍ਦੇਸવਣ੍ਣਨਾ
(8.) Aṭṭhakaniddesavaṇṇanā
੯੫੨. ਅਟ੍ਠਕਨਿਦ੍ਦੇਸੇ ਕਿਲੇਸਾਯੇવ ਕਿਲੇਸવਤ੍ਥੂਨਿ। ਕੁਸੀਤવਤ੍ਥੂਨੀਤਿ ਕੁਸੀਤਸ੍ਸ ਅਲਸਸ੍ਸ વਤ੍ਥੂਨਿ, ਪਤਿਟ੍ਠਾ, ਕੋਸਜ੍ਜਕਾਰਣਾਨੀਤਿ ਅਤ੍ਥੋ। ਕਮ੍ਮਂ ਕਾਤਬ੍ਬਂ ਹੋਤੀਤਿ ਚੀવਰવਿਚਾਰਣਾਦਿਕਮ੍ਮਂ ਕਾਤਬ੍ਬਂ ਹੋਤਿ। ਨ વੀਰਿਯਂ ਆਰਭਤੀਤਿ ਦੁવਿਧਮ੍ਪਿ વੀਰਿਯਂ ਨਾਰਭਤਿ। ਅਪ੍ਪਤ੍ਤਸ੍ਸਾਤਿ ਝਾਨવਿਪਸ੍ਸਨਾਮਗ੍ਗਫਲਧਮ੍ਮਸ੍ਸ ਅਪ੍ਪਤ੍ਤਸ੍ਸ ਪਤ੍ਤਿਯਾ। ਅਨਧਿਗਤਸ੍ਸਾਤਿ ਤਸ੍ਸੇવ ਅਨਧਿਗਤਸ੍ਸ ਅਧਿਗਮਤ੍ਥਾਯ। ਅਸਚ੍ਛਿਕਤਸ੍ਸਾਤਿ ਤਸ੍ਸੇવ ਅਸਚ੍ਛਿਕਤਸ੍ਸ ਸਚ੍ਛਿਕਰਣਤ੍ਥਾਯ। ਇਦਂ ਪਠਮਨ੍ਤਿ ‘ਇਦਂ ਹਨ੍ਦਾਹਂ ਨਿਪਜ੍ਜਾਮੀ’ਤਿ ਏવਂ ਓਸੀਦਨਂ ਪਠਮਂ ਕੁਸੀਤવਤ੍ਥੁ। ਇਮਿਨਾ ਨਯੇਨ ਸਬ੍ਬਤ੍ਥ ਅਤ੍ਥੋ વੇਦਿਤਬ੍ਬੋ।
952. Aṭṭhakaniddese kilesāyeva kilesavatthūni. Kusītavatthūnīti kusītassa alasassa vatthūni, patiṭṭhā, kosajjakāraṇānīti attho. Kammaṃ kātabbaṃ hotīti cīvaravicāraṇādikammaṃ kātabbaṃ hoti. Na vīriyaṃ ārabhatīti duvidhampi vīriyaṃ nārabhati. Appattassāti jhānavipassanāmaggaphaladhammassa appattassa pattiyā. Anadhigatassāti tasseva anadhigatassa adhigamatthāya. Asacchikatassāti tasseva asacchikatassa sacchikaraṇatthāya. Idaṃ paṭhamanti ‘idaṃ handāhaṃ nipajjāmī’ti evaṃ osīdanaṃ paṭhamaṃ kusītavatthu. Iminā nayena sabbattha attho veditabbo.
ਮਾਸਾਚਿਤਂ ਮਞ੍ਞੇਤਿ ਏਤ੍ਥ ਪਨ ਮਾਸਾਚਿਤਂ ਨਾਮ ਤਿਨ੍ਤਮਾਸੋ; ਯਥਾ ਤਿਨ੍ਤਮਾਸੋ ਗਰੁਕੋ ਹੋਤਿ, ਏવਂ ਗਰੁਕੋਤਿ ਅਧਿਪ੍ਪਾਯੋ। ਗਿਲਾਨਾ વੁਟ੍ਠਿਤੋ ਹੋਤੀਤਿ ਗਿਲਾਨੋ ਹੁਤ੍વਾ ਪਚ੍ਛਾ વੁਟ੍ਠਿਤੋ ਹੋਤਿ।
Māsācitaṃ maññeti ettha pana māsācitaṃ nāma tintamāso; yathā tintamāso garuko hoti, evaṃ garukoti adhippāyo. Gilānā vuṭṭhito hotīti gilāno hutvā pacchā vuṭṭhito hoti.
੯੫੪. ਅਟ੍ਠਸੁ ਲੋਕਧਮ੍ਮੇਸੂਤਿ ਏਤ੍ਥ ਲੋਕਸ੍ਸ ਧਮ੍ਮਾਤਿ ਲੋਕਧਮ੍ਮਾ। ਏਤੇਹਿ વਿਮੁਤ੍ਤੋ ਨਾਮ ਨਤ੍ਥਿ, ਬੁਦ੍ਧਾਨਮ੍ਪਿ ਹੋਨ੍ਤਿ ਏવ। ਤਸ੍ਮਾ ‘ਲੋਕਧਮ੍ਮਾ’ਤਿ વੁਚ੍ਚਨ੍ਤਿ। ਪਟਿਘਾਤੋਤਿ ਪਟਿਹਞ੍ਞਨਾਕਾਰੋ। ਲਾਭੇ ਸਾਰਾਗੋਤਿ ‘ਅਹਂ ਲਾਭਂ ਲਭਾਮੀ’ਤਿ ਏવਂ ਗੇਹਸਿਤਸੋਮਨਸ੍ਸવਸੇਨ ਉਪ੍ਪਨ੍ਨੋ ਸਾਰਾਗੋ; ਸੋ ਚਿਤ੍ਤਂ ਪਟਿਹਨਤਿ। ਅਲਾਭੇ ਪਟਿવਿਰੋਧੋਤਿ ‘ਅਹਂ ਲਾਭਂ ਨ ਲਭਾਮੀ’ਤਿ ਦੋਮਨਸ੍ਸવਸੇਨ ਉਪ੍ਪਨ੍ਨવਿਰੋਧੋ; ਸੋਪਿ ਚਿਤ੍ਤਂ ਪਟਿਹਨਤਿ। ਤਸ੍ਮਾ ‘ਪਟਿਘਾਤੋ’ਤਿ વੁਤ੍ਤੋ। ਯਸਾਦੀਸੁਪਿ ‘ਅਹਂ ਮਹਾਪਰਿવਾਰੋ, ਅਹਂ ਅਪ੍ਪਪਰਿવਾਰੋ, ਅਹਂ ਪਸਂਸਪ੍ਪਤ੍ਤੋ, ਅਹਂ ਗਰਹਪ੍ਪਤ੍ਤੋ, ਅਹਂ ਸੁਖਪ੍ਪਤ੍ਤੋ, ਅਹਂ ਦੁਕ੍ਖਪ੍ਪਤੋ’ਤਿ ਏવਮੇਤੇਸਂ ਉਪ੍ਪਤ੍ਤਿ વੇਦਿਤਬ੍ਬਾ। ਅਨਰਿਯવੋਹਾਰਾਤਿ ਅਨਰਿਯਾਨਂ વੋਹਾਰਾ।
954. Aṭṭhasu lokadhammesūti ettha lokassa dhammāti lokadhammā. Etehi vimutto nāma natthi, buddhānampi honti eva. Tasmā ‘lokadhammā’ti vuccanti. Paṭighātoti paṭihaññanākāro. Lābhe sārāgoti ‘ahaṃ lābhaṃ labhāmī’ti evaṃ gehasitasomanassavasena uppanno sārāgo; so cittaṃ paṭihanati. Alābhe paṭivirodhoti ‘ahaṃ lābhaṃ na labhāmī’ti domanassavasena uppannavirodho; sopi cittaṃ paṭihanati. Tasmā ‘paṭighāto’ti vutto. Yasādīsupi ‘ahaṃ mahāparivāro, ahaṃ appaparivāro, ahaṃ pasaṃsappatto, ahaṃ garahappatto, ahaṃ sukhappatto, ahaṃ dukkhappato’ti evametesaṃ uppatti veditabbā. Anariyavohārāti anariyānaṃ vohārā.
੯੫੭. ਪੁਰਿਸਦੋਸਾਤਿ ਪੁਰਿਸਾਨਂ ਦੋਸਾ। ਨ ਸਰਾਮੀਤਿ ‘ਮਯਾ ਏਤਸ੍ਸ ਕਮ੍ਮਸ੍ਸ ਕਤਟ੍ਠਾਨਂ ਨ ਸਰਾਮਿ ਨ ਸਲ੍ਲਕ੍ਖੇਮੀ’ਤਿ ਏવਂ ਅਸ੍ਸਤਿਭਾવੇਨ ਨਿਬ੍ਬੇਠੇਤਿ ਮੋਚੇਤਿ। ਚੋਦਕਂਯੇવ ਪਟਿਪ੍ਫਰਤੀਤਿ ਪਟਿવਿਰੁਦ੍ਧੋ ਹੁਤ੍વਾ ਫਰਤਿ, ਪਟਿਭਾਣਿਤਭਾવੇਨ ਤਿਟ੍ਠਤਿ। ਕਿਂ ਨੁ ਖੋ ਤੁਯ੍ਹਨ੍ਤਿ ‘ਤੁਯ੍ਹਂ ਬਾਲਸ੍ਸ ਅਬ੍ਯਤ੍ਤਸ੍ਸ ਭਣਿਤੇਨ ਨਾਮ ਕਿਂ’ ਯੋ ਤ੍વਂ ਨੇવ વਤ੍ਥੁਨਾ ਆਪਤ੍ਤਿਂ, ਨ ਚੋਦਨਂ ਜਾਨਾਸੀ’ਤਿ ਦੀਪੇਤਿ; ‘ਤ੍વਂ ਪਿ ਨਾਮ ਏવਂ ਕਿਞ੍ਚਿ ਅਜਾਨਨ੍ਤੋ ਭਣਿਤਬ੍ਬਂ ਮਞ੍ਞਿਸ੍ਸਸੀ’ਤਿ ਅਜ੍ਝੋਤ੍ਥਰਤਿ। ਪਚ੍ਚਾਰੋਪੇਤੀਤਿ ‘ਤ੍વਂ ਪਿ ਖੋਸੀ’ਤਿਆਦੀਨਿ વਦਨ੍ਤੋ ਪਟਿਆਰੋਪੇਤਿ। ਪਟਿਕਰੋਹੀਤਿ ਦੇਸਨਾਗਾਮਿਨਿਂ ਦੇਸੇਹਿ, વੁਟ੍ਠਾਨਗਾਮਿਨਿਤੋ વੁਟ੍ਠਾਹਿ ਤਤੋ ਸੁਦ੍ਧਨ੍ਤੇ ਪਤਿਟ੍ਠਿਤੋ ਅਞ੍ਞਂ ਚੋਦੇਸ੍ਸਸੀ’ਤਿ ਦੀਪੇਤਿ।
957. Purisadosāti purisānaṃ dosā. Na sarāmīti ‘mayā etassa kammassa kataṭṭhānaṃ na sarāmi na sallakkhemī’ti evaṃ assatibhāvena nibbeṭheti moceti. Codakaṃyeva paṭippharatīti paṭiviruddho hutvā pharati, paṭibhāṇitabhāvena tiṭṭhati. Kiṃ nu kho tuyhanti ‘tuyhaṃ bālassa abyattassa bhaṇitena nāma kiṃ’ yo tvaṃ neva vatthunā āpattiṃ, na codanaṃ jānāsī’ti dīpeti; ‘tvaṃ pi nāma evaṃ kiñci ajānanto bhaṇitabbaṃ maññissasī’ti ajjhottharati. Paccāropetīti ‘tvaṃ pi khosī’tiādīni vadanto paṭiāropeti. Paṭikarohīti desanāgāminiṃ desehi, vuṭṭhānagāminito vuṭṭhāhi tato suddhante patiṭṭhito aññaṃ codessasī’ti dīpeti.
ਅਞ੍ਞੇਨਾਞ੍ਞਂ ਪਟਿਚਰਤੀਤਿ ਅਞ੍ਞੇਨ ਕਾਰਣੇਨ વਚਨੇਨ વਾ ਅਞ੍ਞਂ ਕਾਰਣਂ વਚਨਂ વਾ ਪਟਿਚ੍ਛਾਦੇਤਿ। ‘ਆਪਤ੍ਤਿਂ ਆਪਨ੍ਨੋਸੀ’ਤਿ વੁਤ੍ਤੋ ‘ਕੋ ਆਪਨ੍ਨੋ? ਕਿਂ ਆਪਨ੍ਨੋ? ਕਥਂ ਆਪਨ੍ਨੋ? ਕਿਸ੍ਮਿਂ ਆਪਨ੍ਨੋ? ਕਂ ਭਣਥ? ਕਿਂ ਭਣਥਾ’ਤਿ વਦਤਿ। ‘ਏવਰੂਪਂ ਕਿਞ੍ਚਿ ਤਯਾ ਦਿਟ੍ਠ’ਨ੍ਤਿ વੁਤ੍ਤੇ ‘ਨ ਸੁਣਾਮੀ’ਤਿ ਸੋਤਂ વਾ ਉਪਨੇਤਿ। ਬਹਿਦ੍ਧਾ ਕਥਂ ਅਪਨਾਮੇਤੀਤਿ ‘ਇਤ੍ਥਨ੍ਨਾਮਂ ਆਪਤ੍ਤਿਂ ਆਪਨ੍ਨੋਸੀ’ਤਿ ਪੁਟ੍ਠੋ ‘ਪਾਟਲਿਪੁਤ੍ਤਂ ਗਤੋਮ੍ਹੀ’ਤਿ વਤ੍વਾ ਪੁਨ ‘ਤવ ਪਾਟਲਿਪੁਤ੍ਤਗਮਨਂ ਨ ਪੁਚ੍ਛਾਮਾ’ਤਿ વੁਤ੍ਤੇ ‘ਤਤੋ ਰਾਜਗਹਂ ਗਤੋਮ੍ਹੀ’ਤਿ ‘ਰਾਜਗਹਂ વਾ ਯਾਹਿ, ਬ੍ਰਾਹ੍ਮਣਗੇਹਂ વਾ; ਆਪਤ੍ਤਿਂ ਆਪਨ੍ਨੋਸੀ’ਤਿ? ‘ਤਤ੍ਥ ਮੇ ਸੂਕਰਮਂਸਂ ਲਦ੍ਧ’ਨ੍ਤਿਆਦੀਨਿ વਦਨ੍ਤੋ ਕਥਂ ਬਹਿਦ੍ਧਾ વਿਕ੍ਖਿਪਤਿ। ਕੋਪਨ੍ਤਿ ਕੁਪਿਤਭਾવਂ। ਦੋਸਨ੍ਤਿ ਦੁਟ੍ਠਭਾવਂ। ਉਭਯਮ੍ਪੇਤਂ ਕੋਧਸ੍ਸੇવ ਨਾਮਂ। ਅਪ੍ਪਚ੍ਚਯਨ੍ਤਿ ਅਸਨ੍ਤੁਟ੍ਠਾਕਾਰਂ; ਦੋਮਨਸ੍ਸਸ੍ਸੇਤਂ ਨਾਮਂ। ਪਾਤੁਕਰੋਤੀਤਿ ਦਸ੍ਸੇਤਿ ਪਕਾਸੇਤਿ। ਬਾਹਾવਿਕ੍ਖੇਪਕਂ ਭਣਤੀਤਿ ਬਾਹਾ વਿਕ੍ਖਿਪਿਤ੍વਾ ਅਲਜ੍ਜਿવਚਨਂ વਦਤਿ। વਿਹੇਸੇਤੀਤਿ વਿਹੇਠੇਤਿ ਬਾਧਤਿ। ਅਨਾਦਿਯਿਤ੍વਾਤਿ ਚਿਤ੍ਤੀਕਾਰੇਨ ਅਗ੍ਗਹੇਤ੍વਾ ਅવਜਾਨਿਤ੍વਾ; ਅਨਾਦਰੋ ਹੁਤ੍વਾਤਿ ਅਤ੍ਥੋ।
Aññenāññaṃ paṭicaratīti aññena kāraṇena vacanena vā aññaṃ kāraṇaṃ vacanaṃ vā paṭicchādeti. ‘Āpattiṃ āpannosī’ti vutto ‘ko āpanno? Kiṃ āpanno? Kathaṃ āpanno? Kismiṃ āpanno? Kaṃ bhaṇatha? Kiṃ bhaṇathā’ti vadati. ‘Evarūpaṃ kiñci tayā diṭṭha’nti vutte ‘na suṇāmī’ti sotaṃ vā upaneti. Bahiddhā kathaṃ apanāmetīti ‘itthannāmaṃ āpattiṃ āpannosī’ti puṭṭho ‘pāṭaliputtaṃ gatomhī’ti vatvā puna ‘tava pāṭaliputtagamanaṃ na pucchāmā’ti vutte ‘tato rājagahaṃ gatomhī’ti ‘rājagahaṃ vā yāhi, brāhmaṇagehaṃ vā; āpattiṃ āpannosī’ti? ‘Tattha me sūkaramaṃsaṃ laddha’ntiādīni vadanto kathaṃ bahiddhā vikkhipati. Kopanti kupitabhāvaṃ. Dosanti duṭṭhabhāvaṃ. Ubhayampetaṃ kodhasseva nāmaṃ. Appaccayanti asantuṭṭhākāraṃ; domanassassetaṃ nāmaṃ. Pātukarotīti dasseti pakāseti. Bāhāvikkhepakaṃ bhaṇatīti bāhā vikkhipitvā alajjivacanaṃ vadati. Vihesetīti viheṭheti bādhati. Anādiyitvāti cittīkārena aggahetvā avajānitvā; anādaro hutvāti attho.
ਅਤਿਬਾਲ਼੍ਹਨ੍ਤਿ ਅਤਿਦਲ਼੍ਹਂ ਅਤਿਪ੍ਪਮਾਣਂ। ਮਯਿ ਬ੍ਯਾવਟਾਤਿ ਮਯਿ ਬ੍ਯਾਪਾਰਂ ਆਪਨ੍ਨਾ। ਹੀਨਾਯਾવਤ੍ਤਿਤ੍વਾਤਿ ਹੀਨਸ੍ਸ ਗਿਹਿਭਾવਸ੍ਸ ਅਤ੍ਥਾਯ ਆવਤ੍ਤਿਤ੍વਾ; ਗਿਹੀ ਹੁਤ੍વਾਤਿ ਅਤ੍ਥੋ। ਅਤ੍ਤਮਨਾ ਹੋਥਾਤਿ ਤੁਟ੍ਠਚਿਤ੍ਤਾ ਹੋਥ, ‘ਮਯਾ ਲਭਿਤਬ੍ਬਂ ਲਭਥ, ਮਯਾ વਸਿਤਬ੍ਬਟ੍ਠਾਨੇ વਸਥ, ਫਾਸੁવਿਹਾਰੋ વੋ ਮਯਾ ਕਤੋ’ਤਿ ਅਧਿਪ੍ਪਾਯੇਨ વਦਤਿ।
Atibāḷhanti atidaḷhaṃ atippamāṇaṃ. Mayi byāvaṭāti mayi byāpāraṃ āpannā. Hīnāyāvattitvāti hīnassa gihibhāvassa atthāya āvattitvā; gihī hutvāti attho. Attamanā hothāti tuṭṭhacittā hotha, ‘mayā labhitabbaṃ labhatha, mayā vasitabbaṭṭhāne vasatha, phāsuvihāro vo mayā kato’ti adhippāyena vadati.
੯੫੮. ਅਸਞ੍ਞੀਤਿ ਪવਤ੍ਤੋ વਾਦੋ ਅਸਞ੍ਞੀવਾਦੋ; ਸੋ ਤੇਸਂ ਅਤ੍ਥੀਤਿ ਅਸਞ੍ਞੀવਾਦਾ। ਰੂਪੀ ਅਤ੍ਤਾਤਿਆਦੀਸੁ ਲਾਭਿਨੋ ਕਸਿਣਰੂਪਂ ਅਤ੍ਤਾਤਿ ਗਹੇਤ੍વਾ ਰੂਪੀਤਿ ਦਿਟ੍ਠਿ ਉਪ੍ਪਜ੍ਜਤਿ; ਅਲਾਭਿਨੋ ਤਕ੍ਕਮਤ੍ਤੇਨੇવ , ਆਜੀવਕਾਨਂ વਿਯ। ਲਾਭਿਨੋਯੇવ ਚ ਪਨ ਅਰੂਪਸਮਾਪਤ੍ਤਿਨਿਮਿਤ੍ਤਂ ਅਤ੍ਤਾਤਿ ਗਹੇਤ੍વਾ ਅਰੂਪੀਤਿ ਦਿਟ੍ਠਿ ਉਪ੍ਪਜ੍ਜਤਿ; ਅਲਾਭਿਨੋ ਤਕ੍ਕਮਤ੍ਤੇਨੇવ, ਨਿਗਣ੍ਠਾਨਂ વਿਯ। ਅਸਞ੍ਞੀਭਾવੇ ਪਨੇਤ੍ਥ ਏਕਨ੍ਤੇਨੇવ ਕਾਰਣਂ ਨ ਪਰਿਯੇਸਿਤਬ੍ਬਂ। ਦਿਟ੍ਠਿਗਤਿਕੋ ਹਿ ਉਮ੍ਮਤ੍ਤਕੋ વਿਯ ਯਂ વਾ ਤਂ વਾ ਗਣ੍ਹਾਤਿ। ਰੂਪੀ ਚ ਅਰੂਪੀ ਚਾਤਿ ਰੂਪਾਰੂਪਮਿਸ੍ਸਕਗਾਹવਸੇਨ વੁਤ੍ਤਂ। ਅਯਂ ਦਿਟ੍ਠਿ ਰੂਪਾવਚਰਾਰੂਪਾવਚਰਸਮਾਪਤ੍ਤਿਲਾਭਿਨੋਪਿ ਤਕ੍ਕਿਕਸ੍ਸਾਪਿ ਉਪ੍ਪਜ੍ਜਤਿ। ਨੇવ ਰੂਪੀ ਨਾਰੂਪੀਤਿ ਪਨ ਏਕਨ੍ਤਤੋ ਤਕ੍ਕਿਕਦਿਟ੍ਠਿਯੇવ। ਅਨ੍ਤવਾਤਿ ਪਰਿਤ੍ਤਕਸਿਣਂ ਅਤ੍ਤਤੋ ਗਣ੍ਹਨ੍ਤਸ੍ਸ ਦਿਟ੍ਠਿ। ਅਨਨ੍ਤવਾਤਿ ਅਪ੍ਪਮਾਣਕਸਿਣਂ। ਅਨ੍ਤવਾ ਚ ਅਨਨ੍ਤવਾ ਚਾਤਿ ਉਦ੍ਧਮਧੋ ਸਪਰਿਯਨ੍ਤਂ ਤਿਰਿਯਂ ਅਪਰਿਯਨ੍ਤਂ ਕਸਿਣਂ ਅਤ੍ਤਾਤਿ ਗਹੇਤ੍વਾ ਉਪ੍ਪਨ੍ਨਦਿਟ੍ਠਿ। ਨੇવਨ੍ਤવਾ ਨਾਨਨ੍ਤવਾਤਿ ਤਕ੍ਕਿਕਦਿਟ੍ਠਿਯੇવ। ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇવਾਤਿ।
958. Asaññīti pavatto vādo asaññīvādo; so tesaṃ atthīti asaññīvādā. Rūpī attātiādīsu lābhino kasiṇarūpaṃ attāti gahetvā rūpīti diṭṭhi uppajjati; alābhino takkamatteneva , ājīvakānaṃ viya. Lābhinoyeva ca pana arūpasamāpattinimittaṃ attāti gahetvā arūpīti diṭṭhi uppajjati; alābhino takkamatteneva, nigaṇṭhānaṃ viya. Asaññībhāve panettha ekanteneva kāraṇaṃ na pariyesitabbaṃ. Diṭṭhigatiko hi ummattako viya yaṃ vā taṃ vā gaṇhāti. Rūpī ca arūpī cāti rūpārūpamissakagāhavasena vuttaṃ. Ayaṃ diṭṭhi rūpāvacarārūpāvacarasamāpattilābhinopi takkikassāpi uppajjati. Neva rūpī nārūpīti pana ekantato takkikadiṭṭhiyeva. Antavāti parittakasiṇaṃ attato gaṇhantassa diṭṭhi. Anantavāti appamāṇakasiṇaṃ. Antavā ca anantavā cāti uddhamadho sapariyantaṃ tiriyaṃ apariyantaṃ kasiṇaṃ attāti gahetvā uppannadiṭṭhi. Nevantavā nānantavāti takkikadiṭṭhiyeva. Sesaṃ sabbattha uttānatthamevāti.
ਅਟ੍ਠਕਨਿਦ੍ਦੇਸવਣ੍ਣਨਾ।
Aṭṭhakaniddesavaṇṇanā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਅਭਿਧਮ੍ਮਪਿਟਕ • Abhidhammapiṭaka / વਿਭਙ੍ਗਪਾਲ਼ਿ • Vibhaṅgapāḷi / ੧੭. ਖੁਦ੍ਦਕવਤ੍ਥੁવਿਭਙ੍ਗੋ • 17. Khuddakavatthuvibhaṅgo
ਟੀਕਾ • Tīkā / ਅਭਿਧਮ੍ਮਪਿਟਕ (ਟੀਕਾ) • Abhidhammapiṭaka (ṭīkā) / વਿਭਙ੍ਗ-ਮੂਲਟੀਕਾ • Vibhaṅga-mūlaṭīkā / ੧੭. ਖੁਦ੍ਦਕવਤ੍ਥੁવਿਭਙ੍ਗੋ • 17. Khuddakavatthuvibhaṅgo
ਟੀਕਾ • Tīkā / ਅਭਿਧਮ੍ਮਪਿਟਕ (ਟੀਕਾ) • Abhidhammapiṭaka (ṭīkā) / વਿਭਙ੍ਗ-ਅਨੁਟੀਕਾ • Vibhaṅga-anuṭīkā / ੧੭. ਖੁਦ੍ਦਕવਤ੍ਥੁવਿਭਙ੍ਗੋ • 17. Khuddakavatthuvibhaṅgo
