| Library / Tipiṭaka / তিপিটক • Tipiṭaka / পরিৰারপাল়ি • Parivārapāḷi |
৮. অট্ঠকৰারো
8. Aṭṭhakavāro
৩২৮. অট্ঠানিসংসে সম্পস্সমানেন ন সো ভিক্খু আপত্তিযা অদস্সনে উক্খিপিতব্বো। অট্ঠানিসংসে সম্পস্সমানেন পরেসম্পি সদ্ধায সা আপত্তি দেসেতব্বা। অট্ঠ যাৰততিযকা। অট্ঠহাকারেহি কুলানি দূসেতি। অট্ঠ মাতিকা চীৰরস্স উপ্পাদায। অট্ঠ মাতিকা কথিনস্স উব্ভারায। অট্ঠ পানানি। 1 অট্ঠহি অসদ্ধম্মেহি অভিভূতো পরিযাদিন্নচিত্তো দেৰদত্তো আপাযিকো নেরযিকো কপ্পট্ঠো অতেকিচ্ছো । অট্ঠ লোকধম্মা। অট্ঠ গরুধম্মা। অট্ঠ পাটিদেসনীযা। অট্ঠঙ্গিকো মুসাৰাদো । অট্ঠ উপোসথঙ্গানি। অট্ঠ দূতেয্যঙ্গানি। অট্ঠ তিত্থিযৰত্তানি। অট্ঠ অচ্ছরিযা অব্ভুতধম্মা মহাসমুদ্দে। অট্ঠ অচ্ছরিযা অব্ভুতধম্মা ইমস্মিং ধম্মৰিনযে। অট্ঠ অনতিরিত্তা। অট্ঠ অতিরিত্তা। অট্ঠমে অরুণুগ্গমনে নিস্সগ্গিযং হোতি। অট্ঠ পারাজিকা। অট্ঠমং ৰত্থুং পরিপূরেন্তী নাসেতব্বা। অট্ঠমং ৰত্থুং পরিপূরেন্তিযা দেসিতাপি অদেসিতা হোতি। অট্ঠৰাচিকা উপসম্পদা। অট্ঠন্নং পচ্চুট্ঠাতব্বং। অট্ঠন্নং আসনং দাতব্বং। উপাসিকা অট্ঠ ৰরানি যাচতি। অট্ঠহঙ্গেহি সমন্নাগতো ভিক্খু ভিক্খুনোৰাদকো সম্মন্নিতব্বো 2। অট্ঠানিসংসা ৰিনযধরে। অট্ঠ পরমানি। তস্সপাপিযসিককম্মকতেন ভিক্খুনা অট্ঠসু ধম্মেসু সম্মা ৰত্তিতব্বং। অট্ঠ অধম্মিকানি পাতিমোক্খট্ঠপনানি অট্ঠ ধম্মিকানি পাতিমোক্খট্ঠপনানীতি।
328. Aṭṭhānisaṃse sampassamānena na so bhikkhu āpattiyā adassane ukkhipitabbo. Aṭṭhānisaṃse sampassamānena paresampi saddhāya sā āpatti desetabbā. Aṭṭha yāvatatiyakā. Aṭṭhahākārehi kulāni dūseti. Aṭṭha mātikā cīvarassa uppādāya. Aṭṭha mātikā kathinassa ubbhārāya. Aṭṭha pānāni. 3 Aṭṭhahi asaddhammehi abhibhūto pariyādinnacitto devadatto āpāyiko nerayiko kappaṭṭho atekiccho . Aṭṭha lokadhammā. Aṭṭha garudhammā. Aṭṭha pāṭidesanīyā. Aṭṭhaṅgiko musāvādo . Aṭṭha uposathaṅgāni. Aṭṭha dūteyyaṅgāni. Aṭṭha titthiyavattāni. Aṭṭha acchariyā abbhutadhammā mahāsamudde. Aṭṭha acchariyā abbhutadhammā imasmiṃ dhammavinaye. Aṭṭha anatirittā. Aṭṭha atirittā. Aṭṭhame aruṇuggamane nissaggiyaṃ hoti. Aṭṭha pārājikā. Aṭṭhamaṃ vatthuṃ paripūrentī nāsetabbā. Aṭṭhamaṃ vatthuṃ paripūrentiyā desitāpi adesitā hoti. Aṭṭhavācikā upasampadā. Aṭṭhannaṃ paccuṭṭhātabbaṃ. Aṭṭhannaṃ āsanaṃ dātabbaṃ. Upāsikā aṭṭha varāni yācati. Aṭṭhahaṅgehi samannāgato bhikkhu bhikkhunovādako sammannitabbo 4. Aṭṭhānisaṃsā vinayadhare. Aṭṭha paramāni. Tassapāpiyasikakammakatena bhikkhunā aṭṭhasu dhammesu sammā vattitabbaṃ. Aṭṭha adhammikāni pātimokkhaṭṭhapanāni aṭṭha dhammikāni pātimokkhaṭṭhapanānīti.
অট্ঠকং নিট্ঠিতং।
Aṭṭhakaṃ niṭṭhitaṃ.
তস্সুদ্দানং –
Tassuddānaṃ –
ন সো ভিক্খু পরেসম্পি, যাৰততিযদূসনা।
Na so bhikkhu paresampi, yāvatatiyadūsanā;
মাতিকা কথিনুব্ভারা, পানা অভিভূতেন চ॥
Mātikā kathinubbhārā, pānā abhibhūtena ca.
লোকধম্মা গরুধম্মা, পাটিদেসনীযা মুসা।
Lokadhammā garudhammā, pāṭidesanīyā musā;
উপোসথা চ দূতঙ্গা, তিত্থিযা সমুদ্দেপি চ॥
Uposathā ca dūtaṅgā, titthiyā samuddepi ca.
অব্ভুতা অনতিরিত্তং, অতিরিত্তং নিস্সগ্গিযং।
Abbhutā anatirittaṃ, atirittaṃ nissaggiyaṃ;
পারাজিকট্ঠমং ৰত্থু, অদেসিতূপসম্পদা॥
Pārājikaṭṭhamaṃ vatthu, adesitūpasampadā.
পচ্চুট্ঠানাসনঞ্চেৰ, ৰরং ওৰাদকেন চ।
Paccuṭṭhānāsanañceva, varaṃ ovādakena ca;
আনিসংসা পরমানি, অট্ঠধম্মেসু ৰত্তনা।
Ānisaṃsā paramāni, aṭṭhadhammesu vattanā;
অধম্মিকা ধম্মিকা চ, অট্ঠকা সুপ্পকাসিতাতি॥
Adhammikā dhammikā ca, aṭṭhakā suppakāsitāti.
Footnotes:
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / পরিৰার-অট্ঠকথা • Parivāra-aṭṭhakathā / অট্ঠকৰারৰণ্ণনা • Aṭṭhakavāravaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / অট্ঠকৰারৰণ্ণনা • Aṭṭhakavāravaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / অট্ঠকৰারৰণ্ণনা • Aṭṭhakavāravaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ছক্কৰারাদিৰণ্ণনা • Chakkavārādivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / একুত্তরিকনযো অট্ঠকৰারৰণ্ণনা • Ekuttarikanayo aṭṭhakavāravaṇṇanā
