| Library / Tipiṭaka / तिपिटक • Tipiṭaka / परिवारपाळि • Parivārapāḷi |
८. अट्ठकवारो
8. Aṭṭhakavāro
३२८. अट्ठानिसंसे सम्पस्समानेन न सो भिक्खु आपत्तिया अदस्सने उक्खिपितब्बो। अट्ठानिसंसे सम्पस्समानेन परेसम्पि सद्धाय सा आपत्ति देसेतब्बा। अट्ठ यावततियका। अट्ठहाकारेहि कुलानि दूसेति। अट्ठ मातिका चीवरस्स उप्पादाय। अट्ठ मातिका कथिनस्स उब्भाराय। अट्ठ पानानि। 1 अट्ठहि असद्धम्मेहि अभिभूतो परियादिन्नचित्तो देवदत्तो आपायिको नेरयिको कप्पट्ठो अतेकिच्छो । अट्ठ लोकधम्मा। अट्ठ गरुधम्मा। अट्ठ पाटिदेसनीया। अट्ठङ्गिको मुसावादो । अट्ठ उपोसथङ्गानि। अट्ठ दूतेय्यङ्गानि। अट्ठ तित्थियवत्तानि। अट्ठ अच्छरिया अब्भुतधम्मा महासमुद्दे। अट्ठ अच्छरिया अब्भुतधम्मा इमस्मिं धम्मविनये। अट्ठ अनतिरित्ता। अट्ठ अतिरित्ता। अट्ठमे अरुणुग्गमने निस्सग्गियं होति। अट्ठ पाराजिका। अट्ठमं वत्थुं परिपूरेन्ती नासेतब्बा। अट्ठमं वत्थुं परिपूरेन्तिया देसितापि अदेसिता होति। अट्ठवाचिका उपसम्पदा। अट्ठन्नं पच्चुट्ठातब्बं। अट्ठन्नं आसनं दातब्बं। उपासिका अट्ठ वरानि याचति। अट्ठहङ्गेहि समन्नागतो भिक्खु भिक्खुनोवादको सम्मन्नितब्बो 2। अट्ठानिसंसा विनयधरे। अट्ठ परमानि। तस्सपापियसिककम्मकतेन भिक्खुना अट्ठसु धम्मेसु सम्मा वत्तितब्बं। अट्ठ अधम्मिकानि पातिमोक्खट्ठपनानि अट्ठ धम्मिकानि पातिमोक्खट्ठपनानीति।
328. Aṭṭhānisaṃse sampassamānena na so bhikkhu āpattiyā adassane ukkhipitabbo. Aṭṭhānisaṃse sampassamānena paresampi saddhāya sā āpatti desetabbā. Aṭṭha yāvatatiyakā. Aṭṭhahākārehi kulāni dūseti. Aṭṭha mātikā cīvarassa uppādāya. Aṭṭha mātikā kathinassa ubbhārāya. Aṭṭha pānāni. 3 Aṭṭhahi asaddhammehi abhibhūto pariyādinnacitto devadatto āpāyiko nerayiko kappaṭṭho atekiccho . Aṭṭha lokadhammā. Aṭṭha garudhammā. Aṭṭha pāṭidesanīyā. Aṭṭhaṅgiko musāvādo . Aṭṭha uposathaṅgāni. Aṭṭha dūteyyaṅgāni. Aṭṭha titthiyavattāni. Aṭṭha acchariyā abbhutadhammā mahāsamudde. Aṭṭha acchariyā abbhutadhammā imasmiṃ dhammavinaye. Aṭṭha anatirittā. Aṭṭha atirittā. Aṭṭhame aruṇuggamane nissaggiyaṃ hoti. Aṭṭha pārājikā. Aṭṭhamaṃ vatthuṃ paripūrentī nāsetabbā. Aṭṭhamaṃ vatthuṃ paripūrentiyā desitāpi adesitā hoti. Aṭṭhavācikā upasampadā. Aṭṭhannaṃ paccuṭṭhātabbaṃ. Aṭṭhannaṃ āsanaṃ dātabbaṃ. Upāsikā aṭṭha varāni yācati. Aṭṭhahaṅgehi samannāgato bhikkhu bhikkhunovādako sammannitabbo 4. Aṭṭhānisaṃsā vinayadhare. Aṭṭha paramāni. Tassapāpiyasikakammakatena bhikkhunā aṭṭhasu dhammesu sammā vattitabbaṃ. Aṭṭha adhammikāni pātimokkhaṭṭhapanāni aṭṭha dhammikāni pātimokkhaṭṭhapanānīti.
अट्ठकं निट्ठितं।
Aṭṭhakaṃ niṭṭhitaṃ.
तस्सुद्दानं –
Tassuddānaṃ –
न सो भिक्खु परेसम्पि, यावततियदूसना।
Na so bhikkhu paresampi, yāvatatiyadūsanā;
मातिका कथिनुब्भारा, पाना अभिभूतेन च॥
Mātikā kathinubbhārā, pānā abhibhūtena ca.
लोकधम्मा गरुधम्मा, पाटिदेसनीया मुसा।
Lokadhammā garudhammā, pāṭidesanīyā musā;
उपोसथा च दूतङ्गा, तित्थिया समुद्देपि च॥
Uposathā ca dūtaṅgā, titthiyā samuddepi ca.
अब्भुता अनतिरित्तं, अतिरित्तं निस्सग्गियं।
Abbhutā anatirittaṃ, atirittaṃ nissaggiyaṃ;
पाराजिकट्ठमं वत्थु, अदेसितूपसम्पदा॥
Pārājikaṭṭhamaṃ vatthu, adesitūpasampadā.
पच्चुट्ठानासनञ्चेव, वरं ओवादकेन च।
Paccuṭṭhānāsanañceva, varaṃ ovādakena ca;
आनिसंसा परमानि, अट्ठधम्मेसु वत्तना।
Ānisaṃsā paramāni, aṭṭhadhammesu vattanā;
अधम्मिका धम्मिका च, अट्ठका सुप्पकासिताति॥
Adhammikā dhammikā ca, aṭṭhakā suppakāsitāti.
Footnotes:
Related texts:
अट्ठकथा • Aṭṭhakathā / विनयपिटक (अट्ठकथा) • Vinayapiṭaka (aṭṭhakathā) / परिवार-अट्ठकथा • Parivāra-aṭṭhakathā / अट्ठकवारवण्णना • Aṭṭhakavāravaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / सारत्थदीपनी-टीका • Sāratthadīpanī-ṭīkā / अट्ठकवारवण्णना • Aṭṭhakavāravaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / वजिरबुद्धि-टीका • Vajirabuddhi-ṭīkā / अट्ठकवारवण्णना • Aṭṭhakavāravaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / विमतिविनोदनी-टीका • Vimativinodanī-ṭīkā / छक्कवारादिवण्णना • Chakkavārādivaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / पाचित्यादियोजनापाळि • Pācityādiyojanāpāḷi / एकुत्तरिकनयो अट्ठकवारवण्णना • Ekuttarikanayo aṭṭhakavāravaṇṇanā
