| Library / Tipiṭaka / တိပိဋက • Tipiṭaka / ပရိဝာရပာဠိ • Parivārapāḷi |
၈. အဋ္ဌကဝာရော
8. Aṭṭhakavāro
၃၂၈. အဋ္ဌာနိသံသေ သမ္ပသ္သမာနေန န သော ဘိက္ခု အာပတ္တိယာ အဒသ္သနေ ဥက္ခိပိတဗ္ဗော။ အဋ္ဌာနိသံသေ သမ္ပသ္သမာနေန ပရေသမ္ပိ သဒ္ဓာယ သာ အာပတ္တိ ဒေသေတဗ္ဗာ။ အဋ္ဌ ယာဝတတိယကာ။ အဋ္ဌဟာကာရေဟိ ကုလာနိ ဒူသေတိ။ အဋ္ဌ မာတိကာ စီဝရသ္သ ဥပ္ပာဒာယ။ အဋ္ဌ မာတိကာ ကထိနသ္သ ဥဗ္ဘာရာယ။ အဋ္ဌ ပာနာနိ။ 1 အဋ္ဌဟိ အသဒ္ဓမ္မေဟိ အဘိဘူတော ပရိယာဒိန္နစိတ္တော ဒေဝဒတ္တော အာပာယိကော နေရယိကော ကပ္ပဋ္ဌော အတေကိစ္ဆော ။ အဋ္ဌ လောကဓမ္မာ။ အဋ္ဌ ဂရုဓမ္မာ။ အဋ္ဌ ပာဋိဒေသနီယာ။ အဋ္ဌင္ဂိကော မုသာဝာဒော ။ အဋ္ဌ ဥပောသထင္ဂာနိ။ အဋ္ဌ ဒူတေယ္ယင္ဂာနိ။ အဋ္ဌ တိတ္ထိယဝတ္တာနိ။ အဋ္ဌ အစ္ဆရိယာ အဗ္ဘုတဓမ္မာ မဟာသမုဒ္ဒေ။ အဋ္ဌ အစ္ဆရိယာ အဗ္ဘုတဓမ္မာ ဣမသ္မိံ ဓမ္မဝိနယေ။ အဋ္ဌ အနတိရိတ္တာ။ အဋ္ဌ အတိရိတ္တာ။ အဋ္ဌမေ အရုဏုဂ္ဂမနေ နိသ္သဂ္ဂိယံ ဟောတိ။ အဋ္ဌ ပာရာဇိကာ။ အဋ္ဌမံ ဝတ္ထုံ ပရိပူရေန္တီ နာသေတဗ္ဗာ။ အဋ္ဌမံ ဝတ္ထုံ ပရိပူရေန္တိယာ ဒေသိတာပိ အဒေသိတာ ဟောတိ။ အဋ္ဌဝာစိကာ ဥပသမ္ပဒာ။ အဋ္ဌန္နံ ပစ္စုဋ္ဌာတဗ္ဗံ။ အဋ္ဌန္နံ အာသနံ ဒာတဗ္ဗံ။ ဥပာသိကာ အဋ္ဌ ဝရာနိ ယာစတိ။ အဋ္ဌဟင္ဂေဟိ သမန္နာဂတော ဘိက္ခု ဘိက္ခုနောဝာဒကော သမ္မန္နိတဗ္ဗော 2။ အဋ္ဌာနိသံသာ ဝိနယဓရေ။ အဋ္ဌ ပရမာနိ။ တသ္သပာပိယသိကကမ္မကတေန ဘိက္ခုနာ အဋ္ဌသု ဓမ္မေသု သမ္မာ ဝတ္တိတဗ္ဗံ။ အဋ္ဌ အဓမ္မိကာနိ ပာတိမောက္ခဋ္ဌပနာနိ အဋ္ဌ ဓမ္မိကာနိ ပာတိမောက္ခဋ္ဌပနာနီတိ။
328. Aṭṭhānisaṃse sampassamānena na so bhikkhu āpattiyā adassane ukkhipitabbo. Aṭṭhānisaṃse sampassamānena paresampi saddhāya sā āpatti desetabbā. Aṭṭha yāvatatiyakā. Aṭṭhahākārehi kulāni dūseti. Aṭṭha mātikā cīvarassa uppādāya. Aṭṭha mātikā kathinassa ubbhārāya. Aṭṭha pānāni. 3 Aṭṭhahi asaddhammehi abhibhūto pariyādinnacitto devadatto āpāyiko nerayiko kappaṭṭho atekiccho . Aṭṭha lokadhammā. Aṭṭha garudhammā. Aṭṭha pāṭidesanīyā. Aṭṭhaṅgiko musāvādo . Aṭṭha uposathaṅgāni. Aṭṭha dūteyyaṅgāni. Aṭṭha titthiyavattāni. Aṭṭha acchariyā abbhutadhammā mahāsamudde. Aṭṭha acchariyā abbhutadhammā imasmiṃ dhammavinaye. Aṭṭha anatirittā. Aṭṭha atirittā. Aṭṭhame aruṇuggamane nissaggiyaṃ hoti. Aṭṭha pārājikā. Aṭṭhamaṃ vatthuṃ paripūrentī nāsetabbā. Aṭṭhamaṃ vatthuṃ paripūrentiyā desitāpi adesitā hoti. Aṭṭhavācikā upasampadā. Aṭṭhannaṃ paccuṭṭhātabbaṃ. Aṭṭhannaṃ āsanaṃ dātabbaṃ. Upāsikā aṭṭha varāni yācati. Aṭṭhahaṅgehi samannāgato bhikkhu bhikkhunovādako sammannitabbo 4. Aṭṭhānisaṃsā vinayadhare. Aṭṭha paramāni. Tassapāpiyasikakammakatena bhikkhunā aṭṭhasu dhammesu sammā vattitabbaṃ. Aṭṭha adhammikāni pātimokkhaṭṭhapanāni aṭṭha dhammikāni pātimokkhaṭṭhapanānīti.
အဋ္ဌကံ နိဋ္ဌိတံ။
Aṭṭhakaṃ niṭṭhitaṃ.
တသ္သုဒ္ဒာနံ –
Tassuddānaṃ –
န သော ဘိက္ခု ပရေသမ္ပိ၊ ယာဝတတိယဒူသနာ။
Na so bhikkhu paresampi, yāvatatiyadūsanā;
မာတိကာ ကထိနုဗ္ဘာရာ၊ ပာနာ အဘိဘူတေန စ။
Mātikā kathinubbhārā, pānā abhibhūtena ca.
လောကဓမ္မာ ဂရုဓမ္မာ၊ ပာဋိဒေသနီယာ မုသာ။
Lokadhammā garudhammā, pāṭidesanīyā musā;
ဥပောသထာ စ ဒူတင္ဂာ၊ တိတ္ထိယာ သမုဒ္ဒေပိ စ။
Uposathā ca dūtaṅgā, titthiyā samuddepi ca.
အဗ္ဘုတာ အနတိရိတ္တံ၊ အတိရိတ္တံ နိသ္သဂ္ဂိယံ။
Abbhutā anatirittaṃ, atirittaṃ nissaggiyaṃ;
ပာရာဇိကဋ္ဌမံ ဝတ္ထု၊ အဒေသိတူပသမ္ပဒာ။
Pārājikaṭṭhamaṃ vatthu, adesitūpasampadā.
ပစ္စုဋ္ဌာနာသနဉ္စေဝ၊ ဝရံ ဩဝာဒကေန စ။
Paccuṭṭhānāsanañceva, varaṃ ovādakena ca;
အာနိသံသာ ပရမာနိ၊ အဋ္ဌဓမ္မေသု ဝတ္တနာ။
Ānisaṃsā paramāni, aṭṭhadhammesu vattanā;
အဓမ္မိကာ ဓမ္မိကာ စ၊ အဋ္ဌကာ သုပ္ပကာသိတာတိ။
Adhammikā dhammikā ca, aṭṭhakā suppakāsitāti.
Footnotes:
Related texts:
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / ပရိဝာရ-အဋ္ဌကထာ • Parivāra-aṭṭhakathā / အဋ္ဌကဝာရဝဏ္ဏနာ • Aṭṭhakavāravaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / အဋ္ဌကဝာရဝဏ္ဏနာ • Aṭṭhakavāravaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / အဋ္ဌကဝာရဝဏ္ဏနာ • Aṭṭhakavāravaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ဆက္ကဝာရာဒိဝဏ္ဏနာ • Chakkavārādivaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ဧကုတ္တရိကနယော အဋ္ဌကဝာရဝဏ္ဏနာ • Ekuttarikanayo aṭṭhakavāravaṇṇanā
