| Library / Tipiṭaka / තිපිටක • Tipiṭaka / පරිවාරපාළි • Parivārapāḷi |
8. අට්‌ඨකවාරො
8. Aṭṭhakavāro
328. අට්‌ඨානිසංසෙ සම්‌පස්‌සමානෙන න සො භික්‌ඛු ආපත්‌තියා අදස්‌සනෙ උක්‌ඛිපිතබ්‌බො. අට්‌ඨානිසංසෙ සම්‌පස්‌සමානෙන පරෙසම්‌පි සද්‌ධාය සා ආපත්‌ති දෙසෙතබ්‌බා. අට්‌ඨ යාවතතියකා. අට්‌ඨහාකාරෙහි කුලානි දූසෙති. අට්‌ඨ මාතිකා චීවරස්‌ස උප්‌පාදාය. අට්‌ඨ මාතිකා කථිනස්‌ස උබ්‌භාරාය. අට්‌ඨ පානානි. 1 අට්‌ඨහි අසද්‌ධම්‌මෙහි අභිභූතො පරියාදින්‌නචිත්‌තො දෙවදත්‌තො ආපායිකො නෙරයිකො කප්‌පට්‌ඨො අතෙකිච්‌ඡො . අට්‌ඨ ලොකධම්‌මා. අට්‌ඨ ගරුධම්‌මා. අට්‌ඨ පාටිදෙසනීයා. අට්‌ඨඞ්‌ගිකො මුසාවාදො . අට්‌ඨ උපොසථඞ්‌ගානි. අට්‌ඨ දූතෙය්‍යඞ්‌ගානි. අට්‌ඨ තිත්‌ථියවත්‌තානි. අට්‌ඨ අච්‌ඡරියා අබ්‌භුතධම්‌මා මහාසමුද්‌දෙ. අට්‌ඨ අච්‌ඡරියා අබ්‌භුතධම්‌මා ඉමස්‌මිං ධම්‌මවිනයෙ. අට්‌ඨ අනතිරිත්‌තා. අට්‌ඨ අතිරිත්‌තා. අට්‌ඨමෙ අරුණුග්‌ගමනෙ නිස්‌සග්‌ගියං හොති. අට්‌ඨ පාරාජිකා. අට්‌ඨමං වත්‌ථුං පරිපූරෙන්‌තී නාසෙතබ්‌බා. අට්‌ඨමං වත්‌ථුං පරිපූරෙන්‌තියා දෙසිතාපි අදෙසිතා හොති. අට්‌ඨවාචිකා උපසම්‌පදා. අට්‌ඨන්‌නං පච්‌චුට්‌ඨාතබ්‌බං. අට්‌ඨන්‌නං ආසනං දාතබ්‌බං. උපාසිකා අට්‌ඨ වරානි යාචති. අට්‌ඨහඞ්‌ගෙහි සමන්‌නාගතො භික්‌ඛු භික්‌ඛුනොවාදකො සම්‌මන්‌නිතබ්‌බො 2. අට්‌ඨානිසංසා විනයධරෙ. අට්‌ඨ පරමානි. තස්‌සපාපියසිකකම්‌මකතෙන භික්‌ඛුනා අට්‌ඨසු ධම්‌මෙසු සම්‌මා වත්‌තිතබ්‌බං. අට්‌ඨ අධම්‌මිකානි පාතිමොක්‌ඛට්‌ඨපනානි අට්‌ඨ ධම්‌මිකානි පාතිමොක්‌ඛට්‌ඨපනානීති.
328. Aṭṭhānisaṃse sampassamānena na so bhikkhu āpattiyā adassane ukkhipitabbo. Aṭṭhānisaṃse sampassamānena paresampi saddhāya sā āpatti desetabbā. Aṭṭha yāvatatiyakā. Aṭṭhahākārehi kulāni dūseti. Aṭṭha mātikā cīvarassa uppādāya. Aṭṭha mātikā kathinassa ubbhārāya. Aṭṭha pānāni. 3 Aṭṭhahi asaddhammehi abhibhūto pariyādinnacitto devadatto āpāyiko nerayiko kappaṭṭho atekiccho . Aṭṭha lokadhammā. Aṭṭha garudhammā. Aṭṭha pāṭidesanīyā. Aṭṭhaṅgiko musāvādo . Aṭṭha uposathaṅgāni. Aṭṭha dūteyyaṅgāni. Aṭṭha titthiyavattāni. Aṭṭha acchariyā abbhutadhammā mahāsamudde. Aṭṭha acchariyā abbhutadhammā imasmiṃ dhammavinaye. Aṭṭha anatirittā. Aṭṭha atirittā. Aṭṭhame aruṇuggamane nissaggiyaṃ hoti. Aṭṭha pārājikā. Aṭṭhamaṃ vatthuṃ paripūrentī nāsetabbā. Aṭṭhamaṃ vatthuṃ paripūrentiyā desitāpi adesitā hoti. Aṭṭhavācikā upasampadā. Aṭṭhannaṃ paccuṭṭhātabbaṃ. Aṭṭhannaṃ āsanaṃ dātabbaṃ. Upāsikā aṭṭha varāni yācati. Aṭṭhahaṅgehi samannāgato bhikkhu bhikkhunovādako sammannitabbo 4. Aṭṭhānisaṃsā vinayadhare. Aṭṭha paramāni. Tassapāpiyasikakammakatena bhikkhunā aṭṭhasu dhammesu sammā vattitabbaṃ. Aṭṭha adhammikāni pātimokkhaṭṭhapanāni aṭṭha dhammikāni pātimokkhaṭṭhapanānīti.
අට්‌ඨකං නිට්‌ඨිතං.
Aṭṭhakaṃ niṭṭhitaṃ.
තස්‌සුද්‌දානං –
Tassuddānaṃ –
න සො භික්‌ඛු පරෙසම්‌පි, යාවතතියදූසනා;
Na so bhikkhu paresampi, yāvatatiyadūsanā;
මාතිකා කථිනුබ්‌භාරා, පානා අභිභූතෙන ච.
Mātikā kathinubbhārā, pānā abhibhūtena ca.
ලොකධම්‌මා ගරුධම්‌මා, පාටිදෙසනීයා මුසා;
Lokadhammā garudhammā, pāṭidesanīyā musā;
උපොසථා ච දූතඞ්‌ගා, තිත්‌ථියා සමුද්‌දෙපි ච.
Uposathā ca dūtaṅgā, titthiyā samuddepi ca.
අබ්‌භුතා අනතිරිත්‌තං, අතිරිත්‌තං නිස්‌සග්‌ගියං;
Abbhutā anatirittaṃ, atirittaṃ nissaggiyaṃ;
පාරාජිකට්‌ඨමං වත්‌ථු, අදෙසිතූපසම්‌පදා.
Pārājikaṭṭhamaṃ vatthu, adesitūpasampadā.
පච්‌චුට්‌ඨානාසනඤ්‌චෙව, වරං ඔවාදකෙන ච;
Paccuṭṭhānāsanañceva, varaṃ ovādakena ca;
ආනිසංසා පරමානි, අට්‌ඨධම්‌මෙසු වත්‌තනා;
Ānisaṃsā paramāni, aṭṭhadhammesu vattanā;
අධම්‌මිකා ධම්‌මිකා ච, අට්‌ඨකා සුප්‌පකාසිතාති.
Adhammikā dhammikā ca, aṭṭhakā suppakāsitāti.
Footnotes:
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / පරිවාර-අට්‌ඨකථා • Parivāra-aṭṭhakathā / අට්‌ඨකවාරවණ්‌ණනා • Aṭṭhakavāravaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / අට්‌ඨකවාරවණ්‌ණනා • Aṭṭhakavāravaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / අට්‌ඨකවාරවණ්‌ණනා • Aṭṭhakavāravaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / ඡක්‌කවාරාදිවණ්‌ණනා • Chakkavārādivaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / එකුත්‌තරිකනයො අට්‌ඨකවාරවණ්‌ණනා • Ekuttarikanayo aṭṭhakavāravaṇṇanā
