| Library / Tipiṭaka / ཏིཔིཊཀ • Tipiṭaka / པརིཝཱརཔཱལི༹ • Parivārapāḷi |
༨. ཨཊྛཀཝཱརོ
8. Aṭṭhakavāro
༣༢༨. ཨཊྛཱནིསཾསེ སམྤསྶམཱནེན ན སོ བྷིཀྑུ ཨཱཔཏྟིཡཱ ཨདསྶནེ ཨུཀྑིཔིཏབྦོ། ཨཊྛཱནིསཾསེ སམྤསྶམཱནེན པརེསམྤི སདྡྷཱཡ སཱ ཨཱཔཏྟི དེསེཏབྦཱ། ཨཊྛ ཡཱཝཏཏིཡཀཱ། ཨཊྛཧཱཀཱརེཧི ཀུལཱནི དཱུསེཏི། ཨཊྛ མཱཏིཀཱ ཙཱིཝརསྶ ཨུཔྤཱདཱཡ། ཨཊྛ མཱཏིཀཱ ཀཐིནསྶ ཨུབྦྷཱརཱཡ། ཨཊྛ པཱནཱནི། 1 ཨཊྛཧི ཨསདྡྷམྨེཧི ཨབྷིབྷཱུཏོ པརིཡཱདིནྣཙིཏྟོ དེཝདཏྟོ ཨཱཔཱཡིཀོ ནེརཡིཀོ ཀཔྤཊྛོ ཨཏེཀིཙྪོ ། ཨཊྛ ལོཀདྷམྨཱ། ཨཊྛ གརུདྷམྨཱ། ཨཊྛ པཱཊིདེསནཱིཡཱ། ཨཊྛངྒིཀོ མུསཱཝཱདོ ། ཨཊྛ ཨུཔོསཐངྒཱནི། ཨཊྛ དཱུཏེཡྻངྒཱནི། ཨཊྛ ཏིཏྠིཡཝཏྟཱནི། ཨཊྛ ཨཙྪརིཡཱ ཨབྦྷུཏདྷམྨཱ མཧཱསམུདྡེ། ཨཊྛ ཨཙྪརིཡཱ ཨབྦྷུཏདྷམྨཱ ཨིམསྨིཾ དྷམྨཝིནཡེ། ཨཊྛ ཨནཏིརིཏྟཱ། ཨཊྛ ཨཏིརིཏྟཱ། ཨཊྛམེ ཨརུཎུགྒམནེ ནིསྶགྒིཡཾ ཧོཏི། ཨཊྛ པཱརཱཛིཀཱ། ཨཊྛམཾ ཝཏྠུཾ པརིཔཱུརེནྟཱི ནཱསེཏབྦཱ། ཨཊྛམཾ ཝཏྠུཾ པརིཔཱུརེནྟིཡཱ དེསིཏཱཔི ཨདེསིཏཱ ཧོཏི། ཨཊྛཝཱཙིཀཱ ཨུཔསམྤདཱ། ཨཊྛནྣཾ པཙྩུཊྛཱཏབྦཾ། ཨཊྛནྣཾ ཨཱསནཾ དཱཏབྦཾ། ཨུཔཱསིཀཱ ཨཊྛ ཝརཱནི ཡཱཙཏི། ཨཊྛཧངྒེཧི སམནྣཱགཏོ བྷིཀྑུ བྷིཀྑུནོཝཱདཀོ སམྨནྣིཏབྦོ 2། ཨཊྛཱནིསཾསཱ ཝིནཡདྷརེ། ཨཊྛ པརམཱནི། ཏསྶཔཱཔིཡསིཀཀམྨཀཏེན བྷིཀྑུནཱ ཨཊྛསུ དྷམྨེསུ སམྨཱ ཝཏྟིཏབྦཾ། ཨཊྛ ཨདྷམྨིཀཱནི པཱཏིམོཀྑཊྛཔནཱནི ཨཊྛ དྷམྨིཀཱནི པཱཏིམོཀྑཊྛཔནཱནཱིཏི།
328. Aṭṭhānisaṃse sampassamānena na so bhikkhu āpattiyā adassane ukkhipitabbo. Aṭṭhānisaṃse sampassamānena paresampi saddhāya sā āpatti desetabbā. Aṭṭha yāvatatiyakā. Aṭṭhahākārehi kulāni dūseti. Aṭṭha mātikā cīvarassa uppādāya. Aṭṭha mātikā kathinassa ubbhārāya. Aṭṭha pānāni. 3 Aṭṭhahi asaddhammehi abhibhūto pariyādinnacitto devadatto āpāyiko nerayiko kappaṭṭho atekiccho . Aṭṭha lokadhammā. Aṭṭha garudhammā. Aṭṭha pāṭidesanīyā. Aṭṭhaṅgiko musāvādo . Aṭṭha uposathaṅgāni. Aṭṭha dūteyyaṅgāni. Aṭṭha titthiyavattāni. Aṭṭha acchariyā abbhutadhammā mahāsamudde. Aṭṭha acchariyā abbhutadhammā imasmiṃ dhammavinaye. Aṭṭha anatirittā. Aṭṭha atirittā. Aṭṭhame aruṇuggamane nissaggiyaṃ hoti. Aṭṭha pārājikā. Aṭṭhamaṃ vatthuṃ paripūrentī nāsetabbā. Aṭṭhamaṃ vatthuṃ paripūrentiyā desitāpi adesitā hoti. Aṭṭhavācikā upasampadā. Aṭṭhannaṃ paccuṭṭhātabbaṃ. Aṭṭhannaṃ āsanaṃ dātabbaṃ. Upāsikā aṭṭha varāni yācati. Aṭṭhahaṅgehi samannāgato bhikkhu bhikkhunovādako sammannitabbo 4. Aṭṭhānisaṃsā vinayadhare. Aṭṭha paramāni. Tassapāpiyasikakammakatena bhikkhunā aṭṭhasu dhammesu sammā vattitabbaṃ. Aṭṭha adhammikāni pātimokkhaṭṭhapanāni aṭṭha dhammikāni pātimokkhaṭṭhapanānīti.
ཨཊྛཀཾ ནིཊྛིཏཾ།
Aṭṭhakaṃ niṭṭhitaṃ.
ཏསྶུདྡཱནཾ –
Tassuddānaṃ –
ན སོ བྷིཀྑུ པརེསམྤི, ཡཱཝཏཏིཡདཱུསནཱ།
Na so bhikkhu paresampi, yāvatatiyadūsanā;
མཱཏིཀཱ ཀཐིནུབྦྷཱརཱ, པཱནཱ ཨབྷིབྷཱུཏེན ཙ༎
Mātikā kathinubbhārā, pānā abhibhūtena ca.
ལོཀདྷམྨཱ གརུདྷམྨཱ, པཱཊིདེསནཱིཡཱ མུསཱ།
Lokadhammā garudhammā, pāṭidesanīyā musā;
ཨུཔོསཐཱ ཙ དཱུཏངྒཱ, ཏིཏྠིཡཱ སམུདྡེཔི ཙ༎
Uposathā ca dūtaṅgā, titthiyā samuddepi ca.
ཨབྦྷུཏཱ ཨནཏིརིཏྟཾ, ཨཏིརིཏྟཾ ནིསྶགྒིཡཾ།
Abbhutā anatirittaṃ, atirittaṃ nissaggiyaṃ;
པཱརཱཛིཀཊྛམཾ ཝཏྠུ, ཨདེསིཏཱུཔསམྤདཱ༎
Pārājikaṭṭhamaṃ vatthu, adesitūpasampadā.
པཙྩུཊྛཱནཱསནཉྩེཝ, ཝརཾ ཨོཝཱདཀེན ཙ།
Paccuṭṭhānāsanañceva, varaṃ ovādakena ca;
ཨཱནིསཾསཱ པརམཱནི, ཨཊྛདྷམྨེསུ ཝཏྟནཱ།
Ānisaṃsā paramāni, aṭṭhadhammesu vattanā;
ཨདྷམྨིཀཱ དྷམྨིཀཱ ཙ, ཨཊྛཀཱ སུཔྤཀཱསིཏཱཏི༎
Adhammikā dhammikā ca, aṭṭhakā suppakāsitāti.
Footnotes:
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / པརིཝཱར-ཨཊྛཀཐཱ • Parivāra-aṭṭhakathā / ཨཊྛཀཝཱརཝཎྞནཱ • Aṭṭhakavāravaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / ཨཊྛཀཝཱརཝཎྞནཱ • Aṭṭhakavāravaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ཨཊྛཀཝཱརཝཎྞནཱ • Aṭṭhakavāravaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ཚཀྐཝཱརཱདིཝཎྞནཱ • Chakkavārādivaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ཨེཀུཏྟརིཀནཡོ ཨཊྛཀཝཱརཝཎྞནཱ • Ekuttarikanayo aṭṭhakavāravaṇṇanā
