| Library / Tipiṭaka / തിപിടക • Tipiṭaka / പരിവാരപാളി • Parivārapāḷi |
൮. അട്ഠകവാരോ
8. Aṭṭhakavāro
൩൨൮. അട്ഠാനിസംസേ സമ്പസ്സമാനേന ന സോ ഭിക്ഖു ആപത്തിയാ അദസ്സനേ ഉക്ഖിപിതബ്ബോ. അട്ഠാനിസംസേ സമ്പസ്സമാനേന പരേസമ്പി സദ്ധായ സാ ആപത്തി ദേസേതബ്ബാ. അട്ഠ യാവതതിയകാ. അട്ഠഹാകാരേഹി കുലാനി ദൂസേതി. അട്ഠ മാതികാ ചീവരസ്സ ഉപ്പാദായ. അട്ഠ മാതികാ കഥിനസ്സ ഉബ്ഭാരായ. അട്ഠ പാനാനി. 1 അട്ഠഹി അസദ്ധമ്മേഹി അഭിഭൂതോ പരിയാദിന്നചിത്തോ ദേവദത്തോ ആപായികോ നേരയികോ കപ്പട്ഠോ അതേകിച്ഛോ . അട്ഠ ലോകധമ്മാ. അട്ഠ ഗരുധമ്മാ. അട്ഠ പാടിദേസനീയാ. അട്ഠങ്ഗികോ മുസാവാദോ . അട്ഠ ഉപോസഥങ്ഗാനി. അട്ഠ ദൂതേയ്യങ്ഗാനി. അട്ഠ തിത്ഥിയവത്താനി. അട്ഠ അച്ഛരിയാ അബ്ഭുതധമ്മാ മഹാസമുദ്ദേ. അട്ഠ അച്ഛരിയാ അബ്ഭുതധമ്മാ ഇമസ്മിം ധമ്മവിനയേ. അട്ഠ അനതിരിത്താ. അട്ഠ അതിരിത്താ. അട്ഠമേ അരുണുഗ്ഗമനേ നിസ്സഗ്ഗിയം ഹോതി. അട്ഠ പാരാജികാ. അട്ഠമം വത്ഥും പരിപൂരേന്തീ നാസേതബ്ബാ. അട്ഠമം വത്ഥും പരിപൂരേന്തിയാ ദേസിതാപി അദേസിതാ ഹോതി. അട്ഠവാചികാ ഉപസമ്പദാ. അട്ഠന്നം പച്ചുട്ഠാതബ്ബം. അട്ഠന്നം ആസനം ദാതബ്ബം. ഉപാസികാ അട്ഠ വരാനി യാചതി. അട്ഠഹങ്ഗേഹി സമന്നാഗതോ ഭിക്ഖു ഭിക്ഖുനോവാദകോ സമ്മന്നിതബ്ബോ 2. അട്ഠാനിസംസാ വിനയധരേ. അട്ഠ പരമാനി. തസ്സപാപിയസികകമ്മകതേന ഭിക്ഖുനാ അട്ഠസു ധമ്മേസു സമ്മാ വത്തിതബ്ബം. അട്ഠ അധമ്മികാനി പാതിമോക്ഖട്ഠപനാനി അട്ഠ ധമ്മികാനി പാതിമോക്ഖട്ഠപനാനീതി.
328. Aṭṭhānisaṃse sampassamānena na so bhikkhu āpattiyā adassane ukkhipitabbo. Aṭṭhānisaṃse sampassamānena paresampi saddhāya sā āpatti desetabbā. Aṭṭha yāvatatiyakā. Aṭṭhahākārehi kulāni dūseti. Aṭṭha mātikā cīvarassa uppādāya. Aṭṭha mātikā kathinassa ubbhārāya. Aṭṭha pānāni. 3 Aṭṭhahi asaddhammehi abhibhūto pariyādinnacitto devadatto āpāyiko nerayiko kappaṭṭho atekiccho . Aṭṭha lokadhammā. Aṭṭha garudhammā. Aṭṭha pāṭidesanīyā. Aṭṭhaṅgiko musāvādo . Aṭṭha uposathaṅgāni. Aṭṭha dūteyyaṅgāni. Aṭṭha titthiyavattāni. Aṭṭha acchariyā abbhutadhammā mahāsamudde. Aṭṭha acchariyā abbhutadhammā imasmiṃ dhammavinaye. Aṭṭha anatirittā. Aṭṭha atirittā. Aṭṭhame aruṇuggamane nissaggiyaṃ hoti. Aṭṭha pārājikā. Aṭṭhamaṃ vatthuṃ paripūrentī nāsetabbā. Aṭṭhamaṃ vatthuṃ paripūrentiyā desitāpi adesitā hoti. Aṭṭhavācikā upasampadā. Aṭṭhannaṃ paccuṭṭhātabbaṃ. Aṭṭhannaṃ āsanaṃ dātabbaṃ. Upāsikā aṭṭha varāni yācati. Aṭṭhahaṅgehi samannāgato bhikkhu bhikkhunovādako sammannitabbo 4. Aṭṭhānisaṃsā vinayadhare. Aṭṭha paramāni. Tassapāpiyasikakammakatena bhikkhunā aṭṭhasu dhammesu sammā vattitabbaṃ. Aṭṭha adhammikāni pātimokkhaṭṭhapanāni aṭṭha dhammikāni pātimokkhaṭṭhapanānīti.
അട്ഠകം നിട്ഠിതം.
Aṭṭhakaṃ niṭṭhitaṃ.
തസ്സുദ്ദാനം –
Tassuddānaṃ –
ന സോ ഭിക്ഖു പരേസമ്പി, യാവതതിയദൂസനാ;
Na so bhikkhu paresampi, yāvatatiyadūsanā;
മാതികാ കഥിനുബ്ഭാരാ, പാനാ അഭിഭൂതേന ച.
Mātikā kathinubbhārā, pānā abhibhūtena ca.
ലോകധമ്മാ ഗരുധമ്മാ, പാടിദേസനീയാ മുസാ;
Lokadhammā garudhammā, pāṭidesanīyā musā;
ഉപോസഥാ ച ദൂതങ്ഗാ, തിത്ഥിയാ സമുദ്ദേപി ച.
Uposathā ca dūtaṅgā, titthiyā samuddepi ca.
അബ്ഭുതാ അനതിരിത്തം, അതിരിത്തം നിസ്സഗ്ഗിയം;
Abbhutā anatirittaṃ, atirittaṃ nissaggiyaṃ;
പാരാജികട്ഠമം വത്ഥു, അദേസിതൂപസമ്പദാ.
Pārājikaṭṭhamaṃ vatthu, adesitūpasampadā.
പച്ചുട്ഠാനാസനഞ്ചേവ, വരം ഓവാദകേന ച;
Paccuṭṭhānāsanañceva, varaṃ ovādakena ca;
ആനിസംസാ പരമാനി, അട്ഠധമ്മേസു വത്തനാ;
Ānisaṃsā paramāni, aṭṭhadhammesu vattanā;
അധമ്മികാ ധമ്മികാ ച, അട്ഠകാ സുപ്പകാസിതാതി.
Adhammikā dhammikā ca, aṭṭhakā suppakāsitāti.
Footnotes:
Related texts:
അട്ഠകഥാ • Aṭṭhakathā / വിനയപിടക (അട്ഠകഥാ) • Vinayapiṭaka (aṭṭhakathā) / പരിവാര-അട്ഠകഥാ • Parivāra-aṭṭhakathā / അട്ഠകവാരവണ്ണനാ • Aṭṭhakavāravaṇṇanā
ടീകാ • Tīkā / വിനയപിടക (ടീകാ) • Vinayapiṭaka (ṭīkā) / സാരത്ഥദീപനീ-ടീകാ • Sāratthadīpanī-ṭīkā / അട്ഠകവാരവണ്ണനാ • Aṭṭhakavāravaṇṇanā
ടീകാ • Tīkā / വിനയപിടക (ടീകാ) • Vinayapiṭaka (ṭīkā) / വജിരബുദ്ധി-ടീകാ • Vajirabuddhi-ṭīkā / അട്ഠകവാരവണ്ണനാ • Aṭṭhakavāravaṇṇanā
ടീകാ • Tīkā / വിനയപിടക (ടീകാ) • Vinayapiṭaka (ṭīkā) / വിമതിവിനോദനീ-ടീകാ • Vimativinodanī-ṭīkā / ഛക്കവാരാദിവണ്ണനാ • Chakkavārādivaṇṇanā
ടീകാ • Tīkā / വിനയപിടക (ടീകാ) • Vinayapiṭaka (ṭīkā) / പാചിത്യാദിയോജനാപാളി • Pācityādiyojanāpāḷi / ഏകുത്തരികനയോ അട്ഠകവാരവണ്ണനാ • Ekuttarikanayo aṭṭhakavāravaṇṇanā
