| Library / Tipiṭaka / তিপিটক • Tipiṭaka / পঞ্চপকরণ-অট্ঠকথা • Pañcapakaraṇa-aṭṭhakathā |
৫. অট্ঠমককথাৰণ্ণনা
5. Aṭṭhamakakathāvaṇṇanā
৩৬৮. ইদানি অট্ঠমককথা নাম হোতি। তত্থ যেসং অনুলোমগোত্রভুমগ্গক্খণে কিলেসানং সমুদাচারাভাৰতো অট্ঠমকস্স সোতাপত্তিমগ্গট্ঠপুগ্গলস্স দ্ৰে পরিযুট্ঠানা পহীনাতি লদ্ধি, সেয্যথাপি এতরহি অন্ধকানঞ্চেৰ সম্মিতিযানঞ্চ; তেসং অঞ্ঞতরং সন্ধায পুচ্ছা সকৰাদিস্স, মগ্গক্খণতো পট্ঠায দিট্ঠিযা অনুপ্পত্তিং সন্ধায পটিঞ্ঞা ইতরস্স। ততো যস্মা দিট্ঠি নামেসা সোতাপন্নস্সেৰ পহীনা, ন মগ্গট্ঠস্স, তস্মা অট্ঠমকো পুগ্গলো সোতাপন্নোতি অনুযোগো সকৰাদিস্স। ৰিচিকিচ্ছাপঞ্হেপি এসেৰ নযো। অনুসযপঞ্হে পরিযুট্ঠানতো অঞ্ঞো অনুসযোতি তেসং লদ্ধি, তস্মা ‘‘ন হেৰ’’ন্তি পটিক্খিত্তং।
368. Idāni aṭṭhamakakathā nāma hoti. Tattha yesaṃ anulomagotrabhumaggakkhaṇe kilesānaṃ samudācārābhāvato aṭṭhamakassa sotāpattimaggaṭṭhapuggalassa dve pariyuṭṭhānā pahīnāti laddhi, seyyathāpi etarahi andhakānañceva sammitiyānañca; tesaṃ aññataraṃ sandhāya pucchā sakavādissa, maggakkhaṇato paṭṭhāya diṭṭhiyā anuppattiṃ sandhāya paṭiññā itarassa. Tato yasmā diṭṭhi nāmesā sotāpannasseva pahīnā, na maggaṭṭhassa, tasmā aṭṭhamako puggalo sotāpannoti anuyogo sakavādissa. Vicikicchāpañhepi eseva nayo. Anusayapañhe pariyuṭṭhānato añño anusayoti tesaṃ laddhi, tasmā ‘‘na heva’’nti paṭikkhittaṃ.
সীলব্বতপরামাসপঞ্হেপি সীলব্বতপরামাসপরিযুট্ঠানন্তি ৰোহারং ন পস্সতি, তস্মা পটিক্খিপতি। পরিযুট্ঠানমেৰস্স পহীনন্তি লদ্ধি।
Sīlabbataparāmāsapañhepi sīlabbataparāmāsapariyuṭṭhānanti vohāraṃ na passati, tasmā paṭikkhipati. Pariyuṭṭhānamevassa pahīnanti laddhi.
৩৬৯. মগ্গো ভাৰিতোতি পঞ্হে তস্মিং খণে ভাৰেতি, ন ভাৰিতো। তস্মা পটিক্খিপতি। অমগ্গেনাতিআদিঅনুযোগে পঠমমগ্গেনেৰ পহীনভাৰং সন্ধায পটিক্খিপতি। যদি হি অমগ্গেন পহীযেথ, গোত্রভুপুগ্গলাদীনম্পি পহীযেথাতি আপজ্জনতো। উপ্পজ্জিস্সতীতি পুচ্ছা পরৰাদিস্স, ৰিস্সজ্জনং সকৰাদিস্স। সেসং সব্বত্থ উত্তানত্থমেৰাতি।
369. Maggo bhāvitoti pañhe tasmiṃ khaṇe bhāveti, na bhāvito. Tasmā paṭikkhipati. Amaggenātiādianuyoge paṭhamamaggeneva pahīnabhāvaṃ sandhāya paṭikkhipati. Yadi hi amaggena pahīyetha, gotrabhupuggalādīnampi pahīyethāti āpajjanato. Uppajjissatīti pucchā paravādissa, vissajjanaṃ sakavādissa. Sesaṃ sabbattha uttānatthamevāti.
অট্ঠমককথাৰণ্ণনা।
Aṭṭhamakakathāvaṇṇanā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / কথাৰত্থুপাল়ি • Kathāvatthupāḷi / (২৫) ৫. অট্ঠমককথা • (25) 5. Aṭṭhamakakathā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ৫. অট্ঠমককথাৰণ্ণনা • 5. Aṭṭhamakakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ৫. অট্ঠমককথাৰণ্ণনা • 5. Aṭṭhamakakathāvaṇṇanā
