| Library / Tipiṭaka / တိပိဋက • Tipiṭaka / ပဉ္စပကရဏ-အဋ္ဌကထာ • Pañcapakaraṇa-aṭṭhakathā |
၅. အဋ္ဌမကကထာဝဏ္ဏနာ
5. Aṭṭhamakakathāvaṇṇanā
၃၆၈. ဣဒာနိ အဋ္ဌမကကထာ နာမ ဟောတိ။ တတ္ထ ယေသံ အနုလောမဂောတ္ရဘုမဂ္ဂက္ခဏေ ကိလေသာနံ သမုဒာစာရာဘာဝတော အဋ္ဌမကသ္သ သောတာပတ္တိမဂ္ဂဋ္ဌပုဂ္ဂလသ္သ ဒ္ဝေ ပရိယုဋ္ဌာနာ ပဟီနာတိ လဒ္ဓိ, သေယ္ယထာပိ ဧတရဟိ အန္ဓကာနဉ္စေဝ သမ္မိတိယာနဉ္စ; တေသံ အညတရံ သန္ဓာယ ပုစ္ဆာ သကဝာဒိသ္သ, မဂ္ဂက္ခဏတော ပဋ္ဌာယ ဒိဋ္ဌိယာ အနုပ္ပတ္တိံ သန္ဓာယ ပဋိညာ ဣတရသ္သ။ တတော ယသ္မာ ဒိဋ္ဌိ နာမေသာ သောတာပန္နသ္သေဝ ပဟီနာ, န မဂ္ဂဋ္ဌသ္သ, တသ္မာ အဋ္ဌမကော ပုဂ္ဂလော သောတာပန္နောတိ အနုယောဂော သကဝာဒိသ္သ။ ဝိစိကိစ္ဆာပဉ္ဟေပိ ဧသေဝ နယော။ အနုသယပဉ္ဟေ ပရိယုဋ္ဌာနတော အညော အနုသယောတိ တေသံ လဒ္ဓိ, တသ္မာ ‘‘န ဟေဝ’’န္တိ ပဋိက္ခိတ္တံ။
368. Idāni aṭṭhamakakathā nāma hoti. Tattha yesaṃ anulomagotrabhumaggakkhaṇe kilesānaṃ samudācārābhāvato aṭṭhamakassa sotāpattimaggaṭṭhapuggalassa dve pariyuṭṭhānā pahīnāti laddhi, seyyathāpi etarahi andhakānañceva sammitiyānañca; tesaṃ aññataraṃ sandhāya pucchā sakavādissa, maggakkhaṇato paṭṭhāya diṭṭhiyā anuppattiṃ sandhāya paṭiññā itarassa. Tato yasmā diṭṭhi nāmesā sotāpannasseva pahīnā, na maggaṭṭhassa, tasmā aṭṭhamako puggalo sotāpannoti anuyogo sakavādissa. Vicikicchāpañhepi eseva nayo. Anusayapañhe pariyuṭṭhānato añño anusayoti tesaṃ laddhi, tasmā ‘‘na heva’’nti paṭikkhittaṃ.
သီလဗ္ဗတပရာမာသပဉ္ဟေပိ သီလဗ္ဗတပရာမာသပရိယုဋ္ဌာနန္တိ ဝောဟာရံ န ပသ္သတိ, တသ္မာ ပဋိက္ခိပတိ။ ပရိယုဋ္ဌာနမေဝသ္သ ပဟီနန္တိ လဒ္ဓိ။
Sīlabbataparāmāsapañhepi sīlabbataparāmāsapariyuṭṭhānanti vohāraṃ na passati, tasmā paṭikkhipati. Pariyuṭṭhānamevassa pahīnanti laddhi.
၃၆၉. မဂ္ဂော ဘာဝိတောတိ ပဉ္ဟေ တသ္မိံ ခဏေ ဘာဝေတိ, န ဘာဝိတော။ တသ္မာ ပဋိက္ခိပတိ။ အမဂ္ဂေနာတိအာဒိအနုယောဂေ ပဌမမဂ္ဂေနေဝ ပဟီနဘာဝံ သန္ဓာယ ပဋိက္ခိပတိ။ ယဒိ ဟိ အမဂ္ဂေန ပဟီယေထ, ဂောတ္ရဘုပုဂ္ဂလာဒီနမ္ပိ ပဟီယေထာတိ အာပဇ္ဇနတော။ ဥပ္ပဇ္ဇိသ္သတီတိ ပုစ္ဆာ ပရဝာဒိသ္သ, ဝိသ္သဇ္ဇနံ သကဝာဒိသ္သ။ သေသံ သဗ္ဗတ္ထ ဥတ္တာနတ္ထမေဝာတိ။
369. Maggo bhāvitoti pañhe tasmiṃ khaṇe bhāveti, na bhāvito. Tasmā paṭikkhipati. Amaggenātiādianuyoge paṭhamamaggeneva pahīnabhāvaṃ sandhāya paṭikkhipati. Yadi hi amaggena pahīyetha, gotrabhupuggalādīnampi pahīyethāti āpajjanato. Uppajjissatīti pucchā paravādissa, vissajjanaṃ sakavādissa. Sesaṃ sabbattha uttānatthamevāti.
အဋ္ဌမကကထာဝဏ္ဏနာ။
Aṭṭhamakakathāvaṇṇanā.
Related texts:
တိပိဋက (မူလ) • Tipiṭaka (Mūla) / အဘိဓမ္မပိဋက • Abhidhammapiṭaka / ကထာဝတ္ထုပာဠိ • Kathāvatthupāḷi / (၂၅) ၅. အဋ္ဌမကကထာ • (25) 5. Aṭṭhamakakathā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-မူလဋီကာ • Pañcapakaraṇa-mūlaṭīkā / ၅. အဋ္ဌမကကထာဝဏ္ဏနာ • 5. Aṭṭhamakakathāvaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-အနုဋီကာ • Pañcapakaraṇa-anuṭīkā / ၅. အဋ္ဌမကကထာဝဏ္ဏနာ • 5. Aṭṭhamakakathāvaṇṇanā
