| Library / Tipiṭaka / තිපිටක • Tipiṭaka / පඤ්‌චපකරණ-අට්‌ඨකථා • Pañcapakaraṇa-aṭṭhakathā |
5. අට්‌ඨමකකථාවණ්‌ණනා
5. Aṭṭhamakakathāvaṇṇanā
368. ඉදානි අට්‌ඨමකකථා නාම හොති. තත්‌ථ යෙසං අනුලොමගොත්‍රභුමග්‌ගක්‌ඛණෙ කිලෙසානං සමුදාචාරාභාවතො අට්‌ඨමකස්‌ස සොතාපත්‌තිමග්‌ගට්‌ඨපුග්‌ගලස්‌ස ද්‌වෙ පරියුට්‌ඨානා පහීනාති ලද්‌ධි, සෙය්‍යථාපි එතරහි අන්‌ධකානඤ්‌චෙව සම්‌මිතියානඤ්‌ච; තෙසං අඤ්‌ඤතරං සන්‌ධාය පුච්‌ඡා සකවාදිස්‌ස, මග්‌ගක්‌ඛණතො පට්‌ඨාය දිට්‌ඨියා අනුප්‌පත්‌තිං සන්‌ධාය පටිඤ්‌ඤා ඉතරස්‌ස. තතො යස්‌මා දිට්‌ඨි නාමෙසා සොතාපන්‌නස්‌සෙව පහීනා, න මග්‌ගට්‌ඨස්‌ස, තස්‌මා අට්‌ඨමකො පුග්‌ගලො සොතාපන්‌නොති අනුයොගො සකවාදිස්‌ස. විචිකිච්‌ඡාපඤ්‌හෙපි එසෙව නයො. අනුසයපඤ්‌හෙ පරියුට්‌ඨානතො අඤ්‌ඤො අනුසයොති තෙසං ලද්‌ධි, තස්‌මා ‘‘න හෙව’’න්‌ති පටික්‌ඛිත්‌තං.
368. Idāni aṭṭhamakakathā nāma hoti. Tattha yesaṃ anulomagotrabhumaggakkhaṇe kilesānaṃ samudācārābhāvato aṭṭhamakassa sotāpattimaggaṭṭhapuggalassa dve pariyuṭṭhānā pahīnāti laddhi, seyyathāpi etarahi andhakānañceva sammitiyānañca; tesaṃ aññataraṃ sandhāya pucchā sakavādissa, maggakkhaṇato paṭṭhāya diṭṭhiyā anuppattiṃ sandhāya paṭiññā itarassa. Tato yasmā diṭṭhi nāmesā sotāpannasseva pahīnā, na maggaṭṭhassa, tasmā aṭṭhamako puggalo sotāpannoti anuyogo sakavādissa. Vicikicchāpañhepi eseva nayo. Anusayapañhe pariyuṭṭhānato añño anusayoti tesaṃ laddhi, tasmā ‘‘na heva’’nti paṭikkhittaṃ.
සීලබ්‌බතපරාමාසපඤ්‌හෙපි සීලබ්‌බතපරාමාසපරියුට්‌ඨානන්‌ති වොහාරං න පස්‌සති, තස්‌මා පටික්‌ඛිපති. පරියුට්‌ඨානමෙවස්‌ස පහීනන්‌ති ලද්‌ධි.
Sīlabbataparāmāsapañhepi sīlabbataparāmāsapariyuṭṭhānanti vohāraṃ na passati, tasmā paṭikkhipati. Pariyuṭṭhānamevassa pahīnanti laddhi.
369. මග්‌ගො භාවිතොති පඤ්‌හෙ තස්‌මිං ඛණෙ භාවෙති, න භාවිතො. තස්‌මා පටික්‌ඛිපති. අමග්‌ගෙනාතිආදිඅනුයොගෙ පඨමමග්‌ගෙනෙව පහීනභාවං සන්‌ධාය පටික්‌ඛිපති. යදි හි අමග්‌ගෙන පහීයෙථ, ගොත්‍රභුපුග්‌ගලාදීනම්‌පි පහීයෙථාති ආපජ්‌ජනතො. උප්‌පජ්‌ජිස්‌සතීති පුච්‌ඡා පරවාදිස්‌ස, විස්‌සජ්‌ජනං සකවාදිස්‌ස. සෙසං සබ්‌බත්‌ථ උත්‌තානත්‌ථමෙවාති.
369. Maggo bhāvitoti pañhe tasmiṃ khaṇe bhāveti, na bhāvito. Tasmā paṭikkhipati. Amaggenātiādianuyoge paṭhamamaggeneva pahīnabhāvaṃ sandhāya paṭikkhipati. Yadi hi amaggena pahīyetha, gotrabhupuggalādīnampi pahīyethāti āpajjanato. Uppajjissatīti pucchā paravādissa, vissajjanaṃ sakavādissa. Sesaṃ sabbattha uttānatthamevāti.
අට්‌ඨමකකථාවණ්‌ණනා.
Aṭṭhamakakathāvaṇṇanā.
Related texts:
තිපිටක (මූල) • Tipiṭaka (Mūla) / අභිධම්‌මපිටක • Abhidhammapiṭaka / කථාවත්‌ථුපාළි • Kathāvatthupāḷi / (25) 5. අට්‌ඨමකකථා • (25) 5. Aṭṭhamakakathā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-මූලටීකා • Pañcapakaraṇa-mūlaṭīkā / 5. අට්‌ඨමකකථාවණ්‌ණනා • 5. Aṭṭhamakakathāvaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-අනුටීකා • Pañcapakaraṇa-anuṭīkā / 5. අට්‌ඨමකකථාවණ්‌ණනා • 5. Aṭṭhamakakathāvaṇṇanā
