| Library / Tipiṭaka / ཏིཔིཊཀ • Tipiṭaka / པཉྩཔཀརཎ-ཨཊྛཀཐཱ • Pañcapakaraṇa-aṭṭhakathā |
༥. ཨཊྛམཀཀཐཱཝཎྞནཱ
5. Aṭṭhamakakathāvaṇṇanā
༣༦༨. ཨིདཱནི ཨཊྛམཀཀཐཱ ནཱམ ཧོཏི། ཏཏྠ ཡེསཾ ཨནུལོམགོཏྲབྷུམགྒཀྑཎེ ཀིལེསཱནཾ སམུདཱཙཱརཱབྷཱཝཏོ ཨཊྛམཀསྶ སོཏཱཔཏྟིམགྒཊྛཔུགྒལསྶ དྭེ པརིཡུཊྛཱནཱ པཧཱིནཱཏི ལདྡྷི, སེཡྻཐཱཔི ཨེཏརཧི ཨནྡྷཀཱནཉྩེཝ སམྨིཏིཡཱནཉྩ; ཏེསཾ ཨཉྙཏརཾ སནྡྷཱཡ པུཙྪཱ སཀཝཱདིསྶ, མགྒཀྑཎཏོ པཊྛཱཡ དིཊྛིཡཱ ཨནུཔྤཏྟིཾ སནྡྷཱཡ པཊིཉྙཱ ཨིཏརསྶ། ཏཏོ ཡསྨཱ དིཊྛི ནཱམེསཱ སོཏཱཔནྣསྶེཝ པཧཱིནཱ, ན མགྒཊྛསྶ, ཏསྨཱ ཨཊྛམཀོ པུགྒལོ སོཏཱཔནྣོཏི ཨནུཡོགོ སཀཝཱདིསྶ། ཝིཙིཀིཙྪཱཔཉྷེཔི ཨེསེཝ ནཡོ། ཨནུསཡཔཉྷེ པརིཡུཊྛཱནཏོ ཨཉྙོ ཨནུསཡོཏི ཏེསཾ ལདྡྷི, ཏསྨཱ ‘‘ན ཧེཝ’’ནྟི པཊིཀྑིཏྟཾ།
368. Idāni aṭṭhamakakathā nāma hoti. Tattha yesaṃ anulomagotrabhumaggakkhaṇe kilesānaṃ samudācārābhāvato aṭṭhamakassa sotāpattimaggaṭṭhapuggalassa dve pariyuṭṭhānā pahīnāti laddhi, seyyathāpi etarahi andhakānañceva sammitiyānañca; tesaṃ aññataraṃ sandhāya pucchā sakavādissa, maggakkhaṇato paṭṭhāya diṭṭhiyā anuppattiṃ sandhāya paṭiññā itarassa. Tato yasmā diṭṭhi nāmesā sotāpannasseva pahīnā, na maggaṭṭhassa, tasmā aṭṭhamako puggalo sotāpannoti anuyogo sakavādissa. Vicikicchāpañhepi eseva nayo. Anusayapañhe pariyuṭṭhānato añño anusayoti tesaṃ laddhi, tasmā ‘‘na heva’’nti paṭikkhittaṃ.
སཱིལབྦཏཔརཱམཱསཔཉྷེཔི སཱིལབྦཏཔརཱམཱསཔརིཡུཊྛཱནནྟི ཝོཧཱརཾ ན པསྶཏི, ཏསྨཱ པཊིཀྑིཔཏི། པརིཡུཊྛཱནམེཝསྶ པཧཱིནནྟི ལདྡྷི།
Sīlabbataparāmāsapañhepi sīlabbataparāmāsapariyuṭṭhānanti vohāraṃ na passati, tasmā paṭikkhipati. Pariyuṭṭhānamevassa pahīnanti laddhi.
༣༦༩. མགྒོ བྷཱཝིཏོཏི པཉྷེ ཏསྨིཾ ཁཎེ བྷཱཝེཏི, ན བྷཱཝིཏོ། ཏསྨཱ པཊིཀྑིཔཏི། ཨམགྒེནཱཏིཨཱདིཨནུཡོགེ པཋམམགྒེནེཝ པཧཱིནབྷཱཝཾ སནྡྷཱཡ པཊིཀྑིཔཏི། ཡདི ཧི ཨམགྒེན པཧཱིཡེཐ, གོཏྲབྷུཔུགྒལཱདཱིནམྤི པཧཱིཡེཐཱཏི ཨཱཔཛྫནཏོ། ཨུཔྤཛྫིསྶཏཱིཏི པུཙྪཱ པརཝཱདིསྶ, ཝིསྶཛྫནཾ སཀཝཱདིསྶ། སེསཾ སབྦཏྠ ཨུཏྟཱནཏྠམེཝཱཏི།
369. Maggo bhāvitoti pañhe tasmiṃ khaṇe bhāveti, na bhāvito. Tasmā paṭikkhipati. Amaggenātiādianuyoge paṭhamamaggeneva pahīnabhāvaṃ sandhāya paṭikkhipati. Yadi hi amaggena pahīyetha, gotrabhupuggalādīnampi pahīyethāti āpajjanato. Uppajjissatīti pucchā paravādissa, vissajjanaṃ sakavādissa. Sesaṃ sabbattha uttānatthamevāti.
ཨཊྛམཀཀཐཱཝཎྞནཱ།
Aṭṭhamakakathāvaṇṇanā.
Related texts:
ཏིཔིཊཀ (མཱུལ) • Tipiṭaka (Mūla) / ཨབྷིདྷམྨཔིཊཀ • Abhidhammapiṭaka / ཀཐཱཝཏྠུཔཱལི༹ • Kathāvatthupāḷi / (༢༥) ༥. ཨཊྛམཀཀཐཱ • (25) 5. Aṭṭhamakakathā
ཊཱིཀཱ • Tīkā / ཨབྷིདྷམྨཔིཊཀ (ཊཱིཀཱ) • Abhidhammapiṭaka (ṭīkā) / པཉྩཔཀརཎ-མཱུལཊཱིཀཱ • Pañcapakaraṇa-mūlaṭīkā / ༥. ཨཊྛམཀཀཐཱཝཎྞནཱ • 5. Aṭṭhamakakathāvaṇṇanā
ཊཱིཀཱ • Tīkā / ཨབྷིདྷམྨཔིཊཀ (ཊཱིཀཱ) • Abhidhammapiṭaka (ṭīkā) / པཉྩཔཀརཎ-ཨནུཊཱིཀཱ • Pañcapakaraṇa-anuṭīkā / ༥. ཨཊྛམཀཀཐཱཝཎྞནཱ • 5. Aṭṭhamakakathāvaṇṇanā
