| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
6. அட்ட²மகஸ்ஸ இந்த்³ரியகதா²வண்ணனா
6. Aṭṭhamakassa indriyakathāvaṇṇanā
371. இதா³னி அட்ட²மகஸ்ஸ இந்த்³ரியகதா² நாம ஹோதி. தத்த² யேஸங் ‘‘அட்ட²மகோ மக்³க³க்க²ணே இந்த்³ரியானி படிலப⁴தி நாம, நோ சஸ்ஸ படிலத்³தா⁴னி ஹொந்தீ’’தி லத்³தி⁴, ஸெய்யதா²பி ஏதரஹி அந்த⁴கானங்; தே ஸந்தா⁴ய நத்தி² ஸத்³தி⁴ந்த்³ரியந்தி புச்சா² ஸகவாதி³ஸ்ஸ, படிஞ்ஞா இதரஸ்ஸ. நத்தி² ஸத்³தா⁴தி புட்டோ² பன ஸத்³தி⁴ந்த்³ரியதோ ஸத்³தா⁴ய நானத்தங் ஸல்லக்கெ²த்வா படிக்கி²பதி. ஸேஸேஸுபி ஏஸேவ நயோ. யதா² பன யஸ்ஸ அத்தி² மனோ, தஸ்ஸ மனிந்த்³ரியம்பி அத்தி²; ஏவங் யஸ்ஸ ஸத்³தா⁴த³யோ அத்தி², தஸ்ஸ அத்தி² ஸத்³தி⁴ந்த்³ரியாதீ³னிபீதி தீ³பனத்த²ங் அத்தி² மனோ அத்தி² மனிந்த்³ரியந்திஆதி³ ஆரத்³த⁴ங். தங் ஸப்³ப³ங் உத்தானத்த²மேவ ஸத்³தி⁴ங் ஸுத்தஸாத⁴னேனாதி.
371. Idāni aṭṭhamakassa indriyakathā nāma hoti. Tattha yesaṃ ‘‘aṭṭhamako maggakkhaṇe indriyāni paṭilabhati nāma, no cassa paṭiladdhāni hontī’’ti laddhi, seyyathāpi etarahi andhakānaṃ; te sandhāya natthi saddhindriyanti pucchā sakavādissa, paṭiññā itarassa. Natthi saddhāti puṭṭho pana saddhindriyato saddhāya nānattaṃ sallakkhetvā paṭikkhipati. Sesesupi eseva nayo. Yathā pana yassa atthi mano, tassa manindriyampi atthi; evaṃ yassa saddhādayo atthi, tassa atthi saddhindriyādīnipīti dīpanatthaṃ atthi mano atthi manindriyantiādi āraddhaṃ. Taṃ sabbaṃ uttānatthameva saddhiṃ suttasādhanenāti.
அட்ட²மகஸ்ஸ இந்த்³ரியகதா²வண்ணனா.
Aṭṭhamakassa indriyakathāvaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / கதா²வத்து²பாளி • Kathāvatthupāḷi / (26) 6. அட்ட²மகஸ்ஸஇந்த்³ரியகதா² • (26) 6. Aṭṭhamakassaindriyakathā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 6. அட்ட²மகஸ்ஸ இந்த்³ரியகதா²வண்ணனா • 6. Aṭṭhamakassa indriyakathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 6. அட்ட²மகஸ்ஸ இந்த்³ரியகதா²வண்ணனா • 6. Aṭṭhamakassa indriyakathāvaṇṇanā
