| Library / Tipiṭaka / তিপিটক • Tipiṭaka / কথাৰত্থুপাল়ি • Kathāvatthupāḷi |
(২৬) ৬. অট্ঠমকস্সইন্দ্রিযকথা
(26) 6. Aṭṭhamakassaindriyakathā
৩৭১. অট্ঠমকস্স পুগ্গলস্স নত্থি সদ্ধিন্দ্রিযন্তি? আমন্তা। অট্ঠমকস্স পুগ্গলস্স নত্থি সদ্ধাতি? ন হেৰং ৰত্তব্বে। অট্ঠমকস্স পুগ্গলস্স নত্থি ৰীরিযিন্দ্রিযং…পে॰… নত্থি সতিন্দ্রিযং…পে॰… নত্থি সমাধিন্দ্রিযং…পে॰… নত্থি পঞ্ঞিন্দ্রিযন্তি? আমন্তা। অট্ঠমকস্স পুগ্গলস্স নত্থি পঞ্ঞাতি? ন হেৰং ৰত্তব্বে…পে॰…।
371. Aṭṭhamakassa puggalassa natthi saddhindriyanti? Āmantā. Aṭṭhamakassa puggalassa natthi saddhāti? Na hevaṃ vattabbe. Aṭṭhamakassa puggalassa natthi vīriyindriyaṃ…pe… natthi satindriyaṃ…pe… natthi samādhindriyaṃ…pe… natthi paññindriyanti? Āmantā. Aṭṭhamakassa puggalassa natthi paññāti? Na hevaṃ vattabbe…pe….
অট্ঠমকস্স পুগ্গলস্স অত্থি সদ্ধাতি? আমন্তা। অট্ঠমকস্স পুগ্গলস্স অত্থি সদ্ধিন্দ্রিযন্তি? ন হেৰং ৰত্তব্বে…পে॰… অট্ঠমকস্স পুগ্গলস্স অত্থি ৰীরিযং…পে॰… অত্থি সতি… অত্থি সমাধি… অত্থি পঞ্ঞাতি? আমন্তা। অট্ঠমকস্স পুগ্গলস্স অত্থি পঞ্ঞিন্দ্রিযন্তি? ন হেৰং ৰত্তব্বে…পে॰…।
Aṭṭhamakassa puggalassa atthi saddhāti? Āmantā. Aṭṭhamakassa puggalassa atthi saddhindriyanti? Na hevaṃ vattabbe…pe… aṭṭhamakassa puggalassa atthi vīriyaṃ…pe… atthi sati… atthi samādhi… atthi paññāti? Āmantā. Aṭṭhamakassa puggalassa atthi paññindriyanti? Na hevaṃ vattabbe…pe….
অট্ঠমকস্স পুগ্গলস্স অত্থি মনো, অত্থি মনিন্দ্রিযন্তি? আমন্তা। অট্ঠমকস্স পুগ্গলস্স অত্থি সদ্ধা, অত্থি সদ্ধিন্দ্রিযন্তি? ন হেৰং ৰত্তব্বে…পে॰… অট্ঠমকস্স পুগ্গলস্স অত্থি মনো, অত্থি মনিন্দ্রিযন্তি? আমন্তা। অট্ঠমকস্স পুগ্গলস্স অত্থি পঞ্ঞা, অত্থি পঞ্ঞিন্দ্রিযন্তি? ন হেৰং ৰত্তব্বে…পে॰…।
Aṭṭhamakassa puggalassa atthi mano, atthi manindriyanti? Āmantā. Aṭṭhamakassa puggalassa atthi saddhā, atthi saddhindriyanti? Na hevaṃ vattabbe…pe… aṭṭhamakassa puggalassa atthi mano, atthi manindriyanti? Āmantā. Aṭṭhamakassa puggalassa atthi paññā, atthi paññindriyanti? Na hevaṃ vattabbe…pe….
অট্ঠমকস্স পুগ্গলস্স অত্থি সোমনস্সং, অত্থি সোমনস্সিন্দ্রিযং, অত্থি জীৰিতং, অত্থি জীৰিতিন্দ্রিযন্তি? আমন্তা। অট্ঠমকস্স পুগ্গলস্স অত্থি সদ্ধা, অত্থি সদ্ধিন্দ্রিযন্তি? ন হেৰং ৰত্তব্বে…পে॰… অট্ঠমকস্স পুগ্গলস্স অত্থি জীৰিতং, অত্থি জীৰিতিন্দ্রিযন্তি? আমন্তা। অট্ঠমকস্স পুগ্গলস্স…পে॰… অত্থি পঞ্ঞা, অত্থি পঞ্ঞিন্দ্রিযন্তি? ন হেৰং ৰত্তব্বে…পে॰…।
Aṭṭhamakassa puggalassa atthi somanassaṃ, atthi somanassindriyaṃ, atthi jīvitaṃ, atthi jīvitindriyanti? Āmantā. Aṭṭhamakassa puggalassa atthi saddhā, atthi saddhindriyanti? Na hevaṃ vattabbe…pe… aṭṭhamakassa puggalassa atthi jīvitaṃ, atthi jīvitindriyanti? Āmantā. Aṭṭhamakassa puggalassa…pe… atthi paññā, atthi paññindriyanti? Na hevaṃ vattabbe…pe….
অট্ঠমকস্স পুগ্গলস্স অত্থি সদ্ধা, নত্থি সদ্ধিন্দ্রিযন্তি? আমন্তা। অট্ঠমকস্স পুগ্গলস্স অত্থি মনো, নত্থি মনিন্দ্রিযন্তি? ন হেৰং ৰত্তব্বে…পে॰…।
Aṭṭhamakassa puggalassa atthi saddhā, natthi saddhindriyanti? Āmantā. Aṭṭhamakassa puggalassa atthi mano, natthi manindriyanti? Na hevaṃ vattabbe…pe….
অট্ঠমকস্স পুগ্গলস্স অত্থি সদ্ধা, নত্থি সদ্ধিন্দ্রিযন্তি? আমন্তা। অট্ঠমকস্স পুগ্গলস্স অত্থি সোমনস্সং, নত্থি সোমনস্সিন্দ্রিযন্তি…পে॰… অত্থি জীৰিতং, নত্থি জীৰিতিন্দ্রিযন্তি? ন হেৰং ৰত্তব্বে…পে॰… অট্ঠমকস্স পুগ্গলস্স অত্থি পঞ্ঞা, নত্থি পঞ্ঞিন্দ্রিযন্তি? আমন্তা। অট্ঠমকস্স পুগ্গলস্স অত্থি মনো, নত্থি মনিন্দ্রিযন্তি? অত্থি সোমনস্সং, নত্থি সোমনস্সিন্দ্রিযন্তি? অত্থি জীৰিতং, নত্থি জীৰিতিন্দ্রিযন্তি? ন হেৰং ৰত্তব্বে…পে॰…।
Aṭṭhamakassa puggalassa atthi saddhā, natthi saddhindriyanti? Āmantā. Aṭṭhamakassa puggalassa atthi somanassaṃ, natthi somanassindriyanti…pe… atthi jīvitaṃ, natthi jīvitindriyanti? Na hevaṃ vattabbe…pe… aṭṭhamakassa puggalassa atthi paññā, natthi paññindriyanti? Āmantā. Aṭṭhamakassa puggalassa atthi mano, natthi manindriyanti? Atthi somanassaṃ, natthi somanassindriyanti? Atthi jīvitaṃ, natthi jīvitindriyanti? Na hevaṃ vattabbe…pe….
অট্ঠমকস্স পুগ্গলস্স নত্থি সদ্ধিন্দ্রিযন্তি? আমন্তা। অট্ঠমকো পুগ্গলো অস্সদ্ধোতি? ন হেৰং ৰত্তব্বে…পে॰… অট্ঠমকস্স পুগ্গলস্স নত্থি ৰীরিযিন্দ্রিযন্তি? আমন্তা। অট্ঠমকো পুগ্গলো কুসীতো হীনৰীরিযোতি? ন হেৰং ৰত্তব্বে…পে॰… অট্ঠমকস্স পুগ্গলস্স নত্থি সতিন্দ্রিযন্তি? আমন্তা। অট্ঠমকো পুগ্গলো মুট্ঠস্সতি অসম্পজানোতি? ন হেৰং ৰত্তব্বে…পে॰… অট্ঠমকস্স পুগ্গলস্স নত্থি সমাধিন্দ্রিযন্তি? আমন্তা। অট্ঠমকো পুগ্গলো অসমাহিতো ৰিব্ভন্তচিত্তোতি? ন হেৰং ৰত্তব্বে…পে॰… অট্ঠমকস্স পুগ্গলস্স নত্থি পঞ্ঞিন্দ্রিযন্তি? আমন্তা। অট্ঠমকো পুগ্গলো দুপ্পঞ্ঞো এলমূগোতি? ন হেৰং ৰত্তব্বে…পে॰…।
Aṭṭhamakassa puggalassa natthi saddhindriyanti? Āmantā. Aṭṭhamako puggalo assaddhoti? Na hevaṃ vattabbe…pe… aṭṭhamakassa puggalassa natthi vīriyindriyanti? Āmantā. Aṭṭhamako puggalo kusīto hīnavīriyoti? Na hevaṃ vattabbe…pe… aṭṭhamakassa puggalassa natthi satindriyanti? Āmantā. Aṭṭhamako puggalo muṭṭhassati asampajānoti? Na hevaṃ vattabbe…pe… aṭṭhamakassa puggalassa natthi samādhindriyanti? Āmantā. Aṭṭhamako puggalo asamāhito vibbhantacittoti? Na hevaṃ vattabbe…pe… aṭṭhamakassa puggalassa natthi paññindriyanti? Āmantā. Aṭṭhamako puggalo duppañño elamūgoti? Na hevaṃ vattabbe…pe….
অট্ঠমকস্স পুগ্গলস্স অত্থি সদ্ধা, সা চ সদ্ধা নিয্যানিকাতি? আমন্তা। হঞ্চি অট্ঠমকস্স পুগ্গলস্স অত্থি সদ্ধা, সা চ সদ্ধা নিয্যানিকা, নো চ ৰত রে ৰত্তব্বে – ‘‘অট্ঠমকস্স পুগ্গলস্স নত্থি সদ্ধিন্দ্রিয’’ন্তি। অট্ঠমকস্স পুগ্গলস্স অত্থি ৰীরিযং, তঞ্চ ৰীরিযং নিয্যানিকং; অত্থি সতি, সা চ সতি নিয্যানিকা; অত্থি সমাধি, সো চ সমাধি নিয্যানিকো; অত্থি পঞ্ঞা, সা চ পঞ্ঞা নিয্যানিকাতি? আমন্তা । হঞ্চি অট্ঠমকস্স পুগ্গলস্স অত্থি পঞ্ঞা, সা চ পঞ্ঞা নিয্যানিকা, নো চ ৰত রে ৰত্তব্বে – ‘‘অট্ঠমকস্স পুগ্গলস্স নত্থি পঞ্ঞিন্দ্রিয’’ন্তি।
Aṭṭhamakassa puggalassa atthi saddhā, sā ca saddhā niyyānikāti? Āmantā. Hañci aṭṭhamakassa puggalassa atthi saddhā, sā ca saddhā niyyānikā, no ca vata re vattabbe – ‘‘aṭṭhamakassa puggalassa natthi saddhindriya’’nti. Aṭṭhamakassa puggalassa atthi vīriyaṃ, tañca vīriyaṃ niyyānikaṃ; atthi sati, sā ca sati niyyānikā; atthi samādhi, so ca samādhi niyyāniko; atthi paññā, sā ca paññā niyyānikāti? Āmantā . Hañci aṭṭhamakassa puggalassa atthi paññā, sā ca paññā niyyānikā, no ca vata re vattabbe – ‘‘aṭṭhamakassa puggalassa natthi paññindriya’’nti.
৩৭২. সকদাগামিফলসচ্ছিকিরিযায পটিপন্নস্স পুগ্গলস্স অত্থি সদ্ধা, অত্থি সদ্ধিন্দ্রিযন্তি? আমন্তা। অট্ঠমকস্স পুগ্গলস্স অত্থি সদ্ধা, অত্থি সদ্ধিন্দ্রিযন্তি? ন হেৰং ৰত্তব্বে…পে॰… সকদাগামিফলসচ্ছিকিরিযায পটিপন্নস্স পুগ্গলস্স অত্থি পঞ্ঞা, অত্থি পঞ্ঞিন্দ্রিযন্তি? আমন্তা। অট্ঠমকস্স পুগ্গলস্স অত্থি পঞ্ঞা, অত্থি পঞ্ঞিন্দ্রিযন্তি? ন হেৰং ৰত্তব্বে…পে॰…।
372. Sakadāgāmiphalasacchikiriyāya paṭipannassa puggalassa atthi saddhā, atthi saddhindriyanti? Āmantā. Aṭṭhamakassa puggalassa atthi saddhā, atthi saddhindriyanti? Na hevaṃ vattabbe…pe… sakadāgāmiphalasacchikiriyāya paṭipannassa puggalassa atthi paññā, atthi paññindriyanti? Āmantā. Aṭṭhamakassa puggalassa atthi paññā, atthi paññindriyanti? Na hevaṃ vattabbe…pe….
অনাগামিফলসচ্ছিকিরিযায পটিপন্নস্স পুগ্গলস্স… অরহত্তসচ্ছিকিরিযায পটিপন্নস্স পুগ্গলস্স অত্থি সদ্ধা, অত্থি সদ্ধিন্দ্রিযং…পে॰… অত্থি পঞ্ঞা, অত্থি পঞ্ঞিন্দ্রিযন্তি? আমন্তা। অট্ঠমকস্স পুগ্গলস্স অত্থি পঞ্ঞা, অত্থি পঞ্ঞিন্দ্রিযন্তি? ন হেৰং ৰত্তব্বে…পে॰…।
Anāgāmiphalasacchikiriyāya paṭipannassa puggalassa… arahattasacchikiriyāya paṭipannassa puggalassa atthi saddhā, atthi saddhindriyaṃ…pe… atthi paññā, atthi paññindriyanti? Āmantā. Aṭṭhamakassa puggalassa atthi paññā, atthi paññindriyanti? Na hevaṃ vattabbe…pe….
অট্ঠমকস্স পুগ্গলস্স অত্থি সদ্ধা, নত্থি সদ্ধিন্দ্রিযন্তি? আমন্তা। সকদাগামিফলসচ্ছিকিরিযায পটিপন্নস্স পুগ্গলস্স অত্থি সদ্ধা, নত্থি সদ্ধিন্দ্রিযন্তি? ন হেৰং ৰত্তব্বে…পে॰… অট্ঠমকস্স পুগ্গলস্স অত্থি পঞ্ঞা, নত্থি পঞ্ঞিন্দ্রিযন্তি? আমন্তা। সকদাগামিফলসচ্ছিকিরিযায পটিপন্নস্স পুগ্গলস্স অত্থি পঞ্ঞা, নত্থি পঞ্ঞিন্দ্রিযন্তি? ন হেৰং ৰত্তব্বে…পে॰…।
Aṭṭhamakassa puggalassa atthi saddhā, natthi saddhindriyanti? Āmantā. Sakadāgāmiphalasacchikiriyāya paṭipannassa puggalassa atthi saddhā, natthi saddhindriyanti? Na hevaṃ vattabbe…pe… aṭṭhamakassa puggalassa atthi paññā, natthi paññindriyanti? Āmantā. Sakadāgāmiphalasacchikiriyāya paṭipannassa puggalassa atthi paññā, natthi paññindriyanti? Na hevaṃ vattabbe…pe….
অট্ঠমকস্স পুগ্গলস্স অত্থি সদ্ধা, নত্থি সদ্ধিন্দ্রিযন্তি…পে॰… অত্থি পঞ্ঞা, নত্থি পঞ্ঞিন্দ্রিযন্তি? আমন্তা । অনাগামিফলসচ্ছিকিরিযায পটিপন্নস্স পুগ্গলস্স… অরহত্তসচ্ছিকিরিযায পটিপন্নস্স পুগ্গলস্স অত্থি পঞ্ঞা, নত্থি পঞ্ঞিন্দ্রিযন্তি? ন হেৰং ৰত্তব্বে…পে॰…।
Aṭṭhamakassa puggalassa atthi saddhā, natthi saddhindriyanti…pe… atthi paññā, natthi paññindriyanti? Āmantā . Anāgāmiphalasacchikiriyāya paṭipannassa puggalassa… arahattasacchikiriyāya paṭipannassa puggalassa atthi paññā, natthi paññindriyanti? Na hevaṃ vattabbe…pe….
অট্ঠমকস্স পুগ্গলস্স নত্থি পঞ্চিন্দ্রিযানীতি? আমন্তা। ননু ৰুত্তং ভগৰতা – ‘‘পঞ্চিমানি, ভিক্খৰে, ইন্দ্রিযানি! কতমানি পঞ্চ? সদ্ধিন্দ্রিযং, ৰীরিযিন্দ্রিযং, সতিন্দ্রিযং, সমাধিন্দ্রিযং, পঞ্ঞিন্দ্রিযং – ইমানি খো, ভিক্খৰে, পঞ্চিন্দ্রিযানি। ইমেসং খো, ভিক্খৰে, পঞ্চন্নং ইন্দ্রিযানং সমত্তা পরিপূরত্তা অরহা হোতি। ততো মুদুতরেহি অরহত্তসচ্ছিকিরিযায পটিপন্নো হোতি, ততো মুদুতরেহি অনাগামী হোতি, ততো মুদুতরেহি অনাগামিফলসচ্ছিকিরিযায পটিপন্নো হোতি, ততো মুদুতরেহি সকদাগামী হোতি, ততো মুদুতরেহি সকদাগামিফলসচ্ছিকিরিযায পটিপন্নো হোতি, ততো মুদুতরেহি সোতাপন্নো হোতি, ততো মুদুতরেহি সোতাপত্তিফলসচ্ছিকিরিযায পটিপন্নো হোতি। যস্স খো, ভিক্খৰে, ইমানি পঞ্চিন্দ্রিযানি সব্বেন সব্বং সব্বথা সব্বং নত্থি, তমহং ‘বাহিরো পুথুজ্জনপক্খে ঠিতো’তি ৰদামী’’তি 1। অত্থেৰ সুত্তন্তোতি? আমন্তা। অট্ঠমকো পুগ্গলো বাহিরো পুথুজ্জনপক্খে ঠিতোতি? ন হেৰং ৰত্তব্বে…পে॰… তেন হি অট্ঠমকস্স পুগ্গলস্স অত্থি পঞ্চিন্দ্রিযানীতি।
Aṭṭhamakassa puggalassa natthi pañcindriyānīti? Āmantā. Nanu vuttaṃ bhagavatā – ‘‘pañcimāni, bhikkhave, indriyāni! Katamāni pañca? Saddhindriyaṃ, vīriyindriyaṃ, satindriyaṃ, samādhindriyaṃ, paññindriyaṃ – imāni kho, bhikkhave, pañcindriyāni. Imesaṃ kho, bhikkhave, pañcannaṃ indriyānaṃ samattā paripūrattā arahā hoti. Tato mudutarehi arahattasacchikiriyāya paṭipanno hoti, tato mudutarehi anāgāmī hoti, tato mudutarehi anāgāmiphalasacchikiriyāya paṭipanno hoti, tato mudutarehi sakadāgāmī hoti, tato mudutarehi sakadāgāmiphalasacchikiriyāya paṭipanno hoti, tato mudutarehi sotāpanno hoti, tato mudutarehi sotāpattiphalasacchikiriyāya paṭipanno hoti. Yassa kho, bhikkhave, imāni pañcindriyāni sabbena sabbaṃ sabbathā sabbaṃ natthi, tamahaṃ ‘bāhiro puthujjanapakkhe ṭhito’ti vadāmī’’ti 2. Attheva suttantoti? Āmantā. Aṭṭhamako puggalo bāhiro puthujjanapakkhe ṭhitoti? Na hevaṃ vattabbe…pe… tena hi aṭṭhamakassa puggalassa atthi pañcindriyānīti.
অট্ঠমকস্স ইন্দ্রিযকথা নিট্ঠিতা।
Aṭṭhamakassa indriyakathā niṭṭhitā.
৩. ততিযৰগ্গো
3. Tatiyavaggo
Footnotes:
Related texts:
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / পঞ্চপকরণ-অট্ঠকথা • Pañcapakaraṇa-aṭṭhakathā / ৬. অট্ঠমকস্স ইন্দ্রিযকথাৰণ্ণনা • 6. Aṭṭhamakassa indriyakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ৬. অট্ঠমকস্স ইন্দ্রিযকথাৰণ্ণনা • 6. Aṭṭhamakassa indriyakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ৬. অট্ঠমকস্স ইন্দ্রিযকথাৰণ্ণনা • 6. Aṭṭhamakassa indriyakathāvaṇṇanā
