| Library / Tipiṭaka / တိပိဋက • Tipiṭaka / ကထာဝတ္ထုပာဠိ • Kathāvatthupāḷi |
(၂၆) ၆. အဋ္ဌမကသ္သဣန္ဒ္ရိယကထာ
(26) 6. Aṭṭhamakassaindriyakathā
၃၇၁. အဋ္ဌမကသ္သ ပုဂ္ဂလသ္သ နတ္ထိ သဒ္ဓိန္ဒ္ရိယန္တိ? အာမန္တာ။ အဋ္ဌမကသ္သ ပုဂ္ဂလသ္သ နတ္ထိ သဒ္ဓာတိ? န ဟေဝံ ဝတ္တဗ္ဗေ။ အဋ္ဌမကသ္သ ပုဂ္ဂလသ္သ နတ္ထိ ဝီရိယိန္ဒ္ရိယံ။ပေ.။ နတ္ထိ သတိန္ဒ္ရိယံ။ပေ.။ နတ္ထိ သမာဓိန္ဒ္ရိယံ။ပေ.။ နတ္ထိ ပညိန္ဒ္ရိယန္တိ? အာမန္တာ။ အဋ္ဌမကသ္သ ပုဂ္ဂလသ္သ နတ္ထိ ပညာတိ? န ဟေဝံ ဝတ္တဗ္ဗေ။ပေ.။။
371. Aṭṭhamakassa puggalassa natthi saddhindriyanti? Āmantā. Aṭṭhamakassa puggalassa natthi saddhāti? Na hevaṃ vattabbe. Aṭṭhamakassa puggalassa natthi vīriyindriyaṃ…pe… natthi satindriyaṃ…pe… natthi samādhindriyaṃ…pe… natthi paññindriyanti? Āmantā. Aṭṭhamakassa puggalassa natthi paññāti? Na hevaṃ vattabbe…pe….
အဋ္ဌမကသ္သ ပုဂ္ဂလသ္သ အတ္ထိ သဒ္ဓာတိ? အာမန္တာ။ အဋ္ဌမကသ္သ ပုဂ္ဂလသ္သ အတ္ထိ သဒ္ဓိန္ဒ္ရိယန္တိ? န ဟေဝံ ဝတ္တဗ္ဗေ။ပေ.။ အဋ္ဌမကသ္သ ပုဂ္ဂလသ္သ အတ္ထိ ဝီရိယံ။ပေ.။ အတ္ထိ သတိ။ အတ္ထိ သမာဓိ။ အတ္ထိ ပညာတိ? အာမန္တာ။ အဋ္ဌမကသ္သ ပုဂ္ဂလသ္သ အတ္ထိ ပညိန္ဒ္ရိယန္တိ? န ဟေဝံ ဝတ္တဗ္ဗေ။ပေ.။။
Aṭṭhamakassa puggalassa atthi saddhāti? Āmantā. Aṭṭhamakassa puggalassa atthi saddhindriyanti? Na hevaṃ vattabbe…pe… aṭṭhamakassa puggalassa atthi vīriyaṃ…pe… atthi sati… atthi samādhi… atthi paññāti? Āmantā. Aṭṭhamakassa puggalassa atthi paññindriyanti? Na hevaṃ vattabbe…pe….
အဋ္ဌမကသ္သ ပုဂ္ဂလသ္သ အတ္ထိ မနော, အတ္ထိ မနိန္ဒ္ရိယန္တိ? အာမန္တာ။ အဋ္ဌမကသ္သ ပုဂ္ဂလသ္သ အတ္ထိ သဒ္ဓာ, အတ္ထိ သဒ္ဓိန္ဒ္ရိယန္တိ? န ဟေဝံ ဝတ္တဗ္ဗေ။ပေ.။ အဋ္ဌမကသ္သ ပုဂ္ဂလသ္သ အတ္ထိ မနော, အတ္ထိ မနိန္ဒ္ရိယန္တိ? အာမန္တာ။ အဋ္ဌမကသ္သ ပုဂ္ဂလသ္သ အတ္ထိ ပညာ, အတ္ထိ ပညိန္ဒ္ရိယန္တိ? န ဟေဝံ ဝတ္တဗ္ဗေ။ပေ.။။
Aṭṭhamakassa puggalassa atthi mano, atthi manindriyanti? Āmantā. Aṭṭhamakassa puggalassa atthi saddhā, atthi saddhindriyanti? Na hevaṃ vattabbe…pe… aṭṭhamakassa puggalassa atthi mano, atthi manindriyanti? Āmantā. Aṭṭhamakassa puggalassa atthi paññā, atthi paññindriyanti? Na hevaṃ vattabbe…pe….
အဋ္ဌမကသ္သ ပုဂ္ဂလသ္သ အတ္ထိ သောမနသ္သံ, အတ္ထိ သောမနသ္သိန္ဒ္ရိယံ, အတ္ထိ ဇီဝိတံ, အတ္ထိ ဇီဝိတိန္ဒ္ရိယန္တိ? အာမန္တာ။ အဋ္ဌမကသ္သ ပုဂ္ဂလသ္သ အတ္ထိ သဒ္ဓာ, အတ္ထိ သဒ္ဓိန္ဒ္ရိယန္တိ? န ဟေဝံ ဝတ္တဗ္ဗေ။ပေ.။ အဋ္ဌမကသ္သ ပုဂ္ဂလသ္သ အတ္ထိ ဇီဝိတံ, အတ္ထိ ဇီဝိတိန္ဒ္ရိယန္တိ? အာမန္တာ။ အဋ္ဌမကသ္သ ပုဂ္ဂလသ္သ။ပေ.။ အတ္ထိ ပညာ, အတ္ထိ ပညိန္ဒ္ရိယန္တိ? န ဟေဝံ ဝတ္တဗ္ဗေ။ပေ.။။
Aṭṭhamakassa puggalassa atthi somanassaṃ, atthi somanassindriyaṃ, atthi jīvitaṃ, atthi jīvitindriyanti? Āmantā. Aṭṭhamakassa puggalassa atthi saddhā, atthi saddhindriyanti? Na hevaṃ vattabbe…pe… aṭṭhamakassa puggalassa atthi jīvitaṃ, atthi jīvitindriyanti? Āmantā. Aṭṭhamakassa puggalassa…pe… atthi paññā, atthi paññindriyanti? Na hevaṃ vattabbe…pe….
အဋ္ဌမကသ္သ ပုဂ္ဂလသ္သ အတ္ထိ သဒ္ဓာ, နတ္ထိ သဒ္ဓိန္ဒ္ရိယန္တိ? အာမန္တာ။ အဋ္ဌမကသ္သ ပုဂ္ဂလသ္သ အတ္ထိ မနော, နတ္ထိ မနိန္ဒ္ရိယန္တိ? န ဟေဝံ ဝတ္တဗ္ဗေ။ပေ.။။
Aṭṭhamakassa puggalassa atthi saddhā, natthi saddhindriyanti? Āmantā. Aṭṭhamakassa puggalassa atthi mano, natthi manindriyanti? Na hevaṃ vattabbe…pe….
အဋ္ဌမကသ္သ ပုဂ္ဂလသ္သ အတ္ထိ သဒ္ဓာ, နတ္ထိ သဒ္ဓိန္ဒ္ရိယန္တိ? အာမန္တာ။ အဋ္ဌမကသ္သ ပုဂ္ဂလသ္သ အတ္ထိ သောမနသ္သံ, နတ္ထိ သောမနသ္သိန္ဒ္ရိယန္တိ။ပေ.။ အတ္ထိ ဇီဝိတံ, နတ္ထိ ဇီဝိတိန္ဒ္ရိယန္တိ? န ဟေဝံ ဝတ္တဗ္ဗေ။ပေ.။ အဋ္ဌမကသ္သ ပုဂ္ဂလသ္သ အတ္ထိ ပညာ, နတ္ထိ ပညိန္ဒ္ရိယန္တိ? အာမန္တာ။ အဋ္ဌမကသ္သ ပုဂ္ဂလသ္သ အတ္ထိ မနော, နတ္ထိ မနိန္ဒ္ရိယန္တိ? အတ္ထိ သောမနသ္သံ, နတ္ထိ သောမနသ္သိန္ဒ္ရိယန္တိ? အတ္ထိ ဇီဝိတံ, နတ္ထိ ဇီဝိတိန္ဒ္ရိယန္တိ? န ဟေဝံ ဝတ္တဗ္ဗေ။ပေ.။။
Aṭṭhamakassa puggalassa atthi saddhā, natthi saddhindriyanti? Āmantā. Aṭṭhamakassa puggalassa atthi somanassaṃ, natthi somanassindriyanti…pe… atthi jīvitaṃ, natthi jīvitindriyanti? Na hevaṃ vattabbe…pe… aṭṭhamakassa puggalassa atthi paññā, natthi paññindriyanti? Āmantā. Aṭṭhamakassa puggalassa atthi mano, natthi manindriyanti? Atthi somanassaṃ, natthi somanassindriyanti? Atthi jīvitaṃ, natthi jīvitindriyanti? Na hevaṃ vattabbe…pe….
အဋ္ဌမကသ္သ ပုဂ္ဂလသ္သ နတ္ထိ သဒ္ဓိန္ဒ္ရိယန္တိ? အာမန္တာ။ အဋ္ဌမကော ပုဂ္ဂလော အသ္သဒ္ဓောတိ? န ဟေဝံ ဝတ္တဗ္ဗေ။ပေ.။ အဋ္ဌမကသ္သ ပုဂ္ဂလသ္သ နတ္ထိ ဝီရိယိန္ဒ္ရိယန္တိ? အာမန္တာ။ အဋ္ဌမကော ပုဂ္ဂလော ကုသီတော ဟီနဝီရိယောတိ? န ဟေဝံ ဝတ္တဗ္ဗေ။ပေ.။ အဋ္ဌမကသ္သ ပုဂ္ဂလသ္သ နတ္ထိ သတိန္ဒ္ရိယန္တိ? အာမန္တာ။ အဋ္ဌမကော ပုဂ္ဂလော မုဋ္ဌသ္သတိ အသမ္ပဇာနောတိ? န ဟေဝံ ဝတ္တဗ္ဗေ။ပေ.။ အဋ္ဌမကသ္သ ပုဂ္ဂလသ္သ နတ္ထိ သမာဓိန္ဒ္ရိယန္တိ? အာမန္တာ။ အဋ္ဌမကော ပုဂ္ဂလော အသမာဟိတော ဝိဗ္ဘန္တစိတ္တောတိ? န ဟေဝံ ဝတ္တဗ္ဗေ။ပေ.။ အဋ္ဌမကသ္သ ပုဂ္ဂလသ္သ နတ္ထိ ပညိန္ဒ္ရိယန္တိ? အာမန္တာ။ အဋ္ဌမကော ပုဂ္ဂလော ဒုပ္ပညော ဧလမူဂောတိ? န ဟေဝံ ဝတ္တဗ္ဗေ။ပေ.။။
Aṭṭhamakassa puggalassa natthi saddhindriyanti? Āmantā. Aṭṭhamako puggalo assaddhoti? Na hevaṃ vattabbe…pe… aṭṭhamakassa puggalassa natthi vīriyindriyanti? Āmantā. Aṭṭhamako puggalo kusīto hīnavīriyoti? Na hevaṃ vattabbe…pe… aṭṭhamakassa puggalassa natthi satindriyanti? Āmantā. Aṭṭhamako puggalo muṭṭhassati asampajānoti? Na hevaṃ vattabbe…pe… aṭṭhamakassa puggalassa natthi samādhindriyanti? Āmantā. Aṭṭhamako puggalo asamāhito vibbhantacittoti? Na hevaṃ vattabbe…pe… aṭṭhamakassa puggalassa natthi paññindriyanti? Āmantā. Aṭṭhamako puggalo duppañño elamūgoti? Na hevaṃ vattabbe…pe….
အဋ္ဌမကသ္သ ပုဂ္ဂလသ္သ အတ္ထိ သဒ္ဓာ, သာ စ သဒ္ဓာ နိယ္ယာနိကာတိ? အာမန္တာ။ ဟဉ္စိ အဋ္ဌမကသ္သ ပုဂ္ဂလသ္သ အတ္ထိ သဒ္ဓာ, သာ စ သဒ္ဓာ နိယ္ယာနိကာ, နော စ ဝတ ရေ ဝတ္တဗ္ဗေ – ‘‘အဋ္ဌမကသ္သ ပုဂ္ဂလသ္သ နတ္ထိ သဒ္ဓိန္ဒ္ရိယ’’န္တိ။ အဋ္ဌမကသ္သ ပုဂ္ဂလသ္သ အတ္ထိ ဝီရိယံ, တဉ္စ ဝီရိယံ နိယ္ယာနိကံ; အတ္ထိ သတိ, သာ စ သတိ နိယ္ယာနိကာ; အတ္ထိ သမာဓိ, သော စ သမာဓိ နိယ္ယာနိကော; အတ္ထိ ပညာ, သာ စ ပညာ နိယ္ယာနိကာတိ? အာမန္တာ ။ ဟဉ္စိ အဋ္ဌမကသ္သ ပုဂ္ဂလသ္သ အတ္ထိ ပညာ, သာ စ ပညာ နိယ္ယာနိကာ, နော စ ဝတ ရေ ဝတ္တဗ္ဗေ – ‘‘အဋ္ဌမကသ္သ ပုဂ္ဂလသ္သ နတ္ထိ ပညိန္ဒ္ရိယ’’န္တိ။
Aṭṭhamakassa puggalassa atthi saddhā, sā ca saddhā niyyānikāti? Āmantā. Hañci aṭṭhamakassa puggalassa atthi saddhā, sā ca saddhā niyyānikā, no ca vata re vattabbe – ‘‘aṭṭhamakassa puggalassa natthi saddhindriya’’nti. Aṭṭhamakassa puggalassa atthi vīriyaṃ, tañca vīriyaṃ niyyānikaṃ; atthi sati, sā ca sati niyyānikā; atthi samādhi, so ca samādhi niyyāniko; atthi paññā, sā ca paññā niyyānikāti? Āmantā . Hañci aṭṭhamakassa puggalassa atthi paññā, sā ca paññā niyyānikā, no ca vata re vattabbe – ‘‘aṭṭhamakassa puggalassa natthi paññindriya’’nti.
၃၇၂. သကဒာဂာမိဖလသစ္ဆိကိရိယာယ ပဋိပန္နသ္သ ပုဂ္ဂလသ္သ အတ္ထိ သဒ္ဓာ, အတ္ထိ သဒ္ဓိန္ဒ္ရိယန္တိ? အာမန္တာ။ အဋ္ဌမကသ္သ ပုဂ္ဂလသ္သ အတ္ထိ သဒ္ဓာ, အတ္ထိ သဒ္ဓိန္ဒ္ရိယန္တိ? န ဟေဝံ ဝတ္တဗ္ဗေ။ပေ.။ သကဒာဂာမိဖလသစ္ဆိကိရိယာယ ပဋိပန္နသ္သ ပုဂ္ဂလသ္သ အတ္ထိ ပညာ, အတ္ထိ ပညိန္ဒ္ရိယန္တိ? အာမန္တာ။ အဋ္ဌမကသ္သ ပုဂ္ဂလသ္သ အတ္ထိ ပညာ, အတ္ထိ ပညိန္ဒ္ရိယန္တိ? န ဟေဝံ ဝတ္တဗ္ဗေ။ပေ.။။
372. Sakadāgāmiphalasacchikiriyāya paṭipannassa puggalassa atthi saddhā, atthi saddhindriyanti? Āmantā. Aṭṭhamakassa puggalassa atthi saddhā, atthi saddhindriyanti? Na hevaṃ vattabbe…pe… sakadāgāmiphalasacchikiriyāya paṭipannassa puggalassa atthi paññā, atthi paññindriyanti? Āmantā. Aṭṭhamakassa puggalassa atthi paññā, atthi paññindriyanti? Na hevaṃ vattabbe…pe….
အနာဂာမိဖလသစ္ဆိကိရိယာယ ပဋိပန္နသ္သ ပုဂ္ဂလသ္သ။ အရဟတ္တသစ္ဆိကိရိယာယ ပဋိပန္နသ္သ ပုဂ္ဂလသ္သ အတ္ထိ သဒ္ဓာ, အတ္ထိ သဒ္ဓိန္ဒ္ရိယံ။ပေ.။ အတ္ထိ ပညာ, အတ္ထိ ပညိန္ဒ္ရိယန္တိ? အာမန္တာ။ အဋ္ဌမကသ္သ ပုဂ္ဂလသ္သ အတ္ထိ ပညာ, အတ္ထိ ပညိန္ဒ္ရိယန္တိ? န ဟေဝံ ဝတ္တဗ္ဗေ။ပေ.။။
Anāgāmiphalasacchikiriyāya paṭipannassa puggalassa… arahattasacchikiriyāya paṭipannassa puggalassa atthi saddhā, atthi saddhindriyaṃ…pe… atthi paññā, atthi paññindriyanti? Āmantā. Aṭṭhamakassa puggalassa atthi paññā, atthi paññindriyanti? Na hevaṃ vattabbe…pe….
အဋ္ဌမကသ္သ ပုဂ္ဂလသ္သ အတ္ထိ သဒ္ဓာ, နတ္ထိ သဒ္ဓိန္ဒ္ရိယန္တိ? အာမန္တာ။ သကဒာဂာမိဖလသစ္ဆိကိရိယာယ ပဋိပန္နသ္သ ပုဂ္ဂလသ္သ အတ္ထိ သဒ္ဓာ, နတ္ထိ သဒ္ဓိန္ဒ္ရိယန္တိ? န ဟေဝံ ဝတ္တဗ္ဗေ။ပေ.။ အဋ္ဌမကသ္သ ပုဂ္ဂလသ္သ အတ္ထိ ပညာ, နတ္ထိ ပညိန္ဒ္ရိယန္တိ? အာမန္တာ။ သကဒာဂာမိဖလသစ္ဆိကိရိယာယ ပဋိပန္နသ္သ ပုဂ္ဂလသ္သ အတ္ထိ ပညာ, နတ္ထိ ပညိန္ဒ္ရိယန္တိ? န ဟေဝံ ဝတ္တဗ္ဗေ။ပေ.။။
Aṭṭhamakassa puggalassa atthi saddhā, natthi saddhindriyanti? Āmantā. Sakadāgāmiphalasacchikiriyāya paṭipannassa puggalassa atthi saddhā, natthi saddhindriyanti? Na hevaṃ vattabbe…pe… aṭṭhamakassa puggalassa atthi paññā, natthi paññindriyanti? Āmantā. Sakadāgāmiphalasacchikiriyāya paṭipannassa puggalassa atthi paññā, natthi paññindriyanti? Na hevaṃ vattabbe…pe….
အဋ္ဌမကသ္သ ပုဂ္ဂလသ္သ အတ္ထိ သဒ္ဓာ, နတ္ထိ သဒ္ဓိန္ဒ္ရိယန္တိ။ပေ.။ အတ္ထိ ပညာ, နတ္ထိ ပညိန္ဒ္ရိယန္တိ? အာမန္တာ ။ အနာဂာမိဖလသစ္ဆိကိရိယာယ ပဋိပန္နသ္သ ပုဂ္ဂလသ္သ။ အရဟတ္တသစ္ဆိကိရိယာယ ပဋိပန္နသ္သ ပုဂ္ဂလသ္သ အတ္ထိ ပညာ, နတ္ထိ ပညိန္ဒ္ရိယန္တိ? န ဟေဝံ ဝတ္တဗ္ဗေ။ပေ.။။
Aṭṭhamakassa puggalassa atthi saddhā, natthi saddhindriyanti…pe… atthi paññā, natthi paññindriyanti? Āmantā . Anāgāmiphalasacchikiriyāya paṭipannassa puggalassa… arahattasacchikiriyāya paṭipannassa puggalassa atthi paññā, natthi paññindriyanti? Na hevaṃ vattabbe…pe….
အဋ္ဌမကသ္သ ပုဂ္ဂလသ္သ နတ္ထိ ပဉ္စိန္ဒ္ရိယာနီတိ? အာမန္တာ။ နနု ဝုတ္တံ ဘဂဝတာ – ‘‘ပဉ္စိမာနိ, ဘိက္ခဝေ, ဣန္ဒ္ရိယာနိ! ကတမာနိ ပဉ္စ? သဒ္ဓိန္ဒ္ရိယံ, ဝီရိယိန္ဒ္ရိယံ, သတိန္ဒ္ရိယံ, သမာဓိန္ဒ္ရိယံ, ပညိန္ဒ္ရိယံ – ဣမာနိ ခော, ဘိက္ခဝေ, ပဉ္စိန္ဒ္ရိယာနိ။ ဣမေသံ ခော, ဘိက္ခဝေ, ပဉ္စန္နံ ဣန္ဒ္ရိယာနံ သမတ္တာ ပရိပူရတ္တာ အရဟာ ဟောတိ။ တတော မုဒုတရေဟိ အရဟတ္တသစ္ဆိကိရိယာယ ပဋိပန္နော ဟောတိ, တတော မုဒုတရေဟိ အနာဂာမီ ဟောတိ, တတော မုဒုတရေဟိ အနာဂာမိဖလသစ္ဆိကိရိယာယ ပဋိပန္နော ဟောတိ, တတော မုဒုတရေဟိ သကဒာဂာမီ ဟောတိ, တတော မုဒုတရေဟိ သကဒာဂာမိဖလသစ္ဆိကိရိယာယ ပဋိပန္နော ဟောတိ, တတော မုဒုတရေဟိ သောတာပန္နော ဟောတိ, တတော မုဒုတရေဟိ သောတာပတ္တိဖလသစ္ဆိကိရိယာယ ပဋိပန္နော ဟောတိ။ ယသ္သ ခော, ဘိက္ခဝေ, ဣမာနိ ပဉ္စိန္ဒ္ရိယာနိ သဗ္ဗေန သဗ္ဗံ သဗ္ဗထာ သဗ္ဗံ နတ္ထိ, တမဟံ ‘ဗာဟိရော ပုထုဇ္ဇနပက္ခေ ဌိတော’တိ ဝဒာမီ’’တိ 1။ အတ္ထေဝ သုတ္တန္တောတိ? အာမန္တာ။ အဋ္ဌမကော ပုဂ္ဂလော ဗာဟိရော ပုထုဇ္ဇနပက္ခေ ဌိတောတိ? န ဟေဝံ ဝတ္တဗ္ဗေ။ပေ.။ တေန ဟိ အဋ္ဌမကသ္သ ပုဂ္ဂလသ္သ အတ္ထိ ပဉ္စိန္ဒ္ရိယာနီတိ။
Aṭṭhamakassa puggalassa natthi pañcindriyānīti? Āmantā. Nanu vuttaṃ bhagavatā – ‘‘pañcimāni, bhikkhave, indriyāni! Katamāni pañca? Saddhindriyaṃ, vīriyindriyaṃ, satindriyaṃ, samādhindriyaṃ, paññindriyaṃ – imāni kho, bhikkhave, pañcindriyāni. Imesaṃ kho, bhikkhave, pañcannaṃ indriyānaṃ samattā paripūrattā arahā hoti. Tato mudutarehi arahattasacchikiriyāya paṭipanno hoti, tato mudutarehi anāgāmī hoti, tato mudutarehi anāgāmiphalasacchikiriyāya paṭipanno hoti, tato mudutarehi sakadāgāmī hoti, tato mudutarehi sakadāgāmiphalasacchikiriyāya paṭipanno hoti, tato mudutarehi sotāpanno hoti, tato mudutarehi sotāpattiphalasacchikiriyāya paṭipanno hoti. Yassa kho, bhikkhave, imāni pañcindriyāni sabbena sabbaṃ sabbathā sabbaṃ natthi, tamahaṃ ‘bāhiro puthujjanapakkhe ṭhito’ti vadāmī’’ti 2. Attheva suttantoti? Āmantā. Aṭṭhamako puggalo bāhiro puthujjanapakkhe ṭhitoti? Na hevaṃ vattabbe…pe… tena hi aṭṭhamakassa puggalassa atthi pañcindriyānīti.
အဋ္ဌမကသ္သ ဣန္ဒ္ရိယကထာ နိဋ္ဌိတာ။
Aṭṭhamakassa indriyakathā niṭṭhitā.
၃. တတိယဝဂ္ဂော
3. Tatiyavaggo
Footnotes:
Related texts:
အဋ္ဌကထာ • Aṭṭhakathā / အဘိဓမ္မပိဋက (အဋ္ဌကထာ) • Abhidhammapiṭaka (aṭṭhakathā) / ပဉ္စပကရဏ-အဋ္ဌကထာ • Pañcapakaraṇa-aṭṭhakathā / ၆. အဋ္ဌမကသ္သ ဣန္ဒ္ရိယကထာဝဏ္ဏနာ • 6. Aṭṭhamakassa indriyakathāvaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-မူလဋီကာ • Pañcapakaraṇa-mūlaṭīkā / ၆. အဋ္ဌမကသ္သ ဣန္ဒ္ရိယကထာဝဏ္ဏနာ • 6. Aṭṭhamakassa indriyakathāvaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-အနုဋီကာ • Pañcapakaraṇa-anuṭīkā / ၆. အဋ္ဌမကသ္သ ဣန္ဒ္ရိယကထာဝဏ္ဏနာ • 6. Aṭṭhamakassa indriyakathāvaṇṇanā
