| Library / Tipiṭaka / ತಿಪಿಟಕ • Tipiṭaka / ಕಥಾವತ್ಥುಪಾಳಿ • Kathāvatthupāḷi |
(೨೬) ೬. ಅಟ್ಠಮಕಸ್ಸಇನ್ದ್ರಿಯಕಥಾ
(26) 6. Aṭṭhamakassaindriyakathā
೩೭೧. ಅಟ್ಠಮಕಸ್ಸ ಪುಗ್ಗಲಸ್ಸ ನತ್ಥಿ ಸದ್ಧಿನ್ದ್ರಿಯನ್ತಿ? ಆಮನ್ತಾ। ಅಟ್ಠಮಕಸ್ಸ ಪುಗ್ಗಲಸ್ಸ ನತ್ಥಿ ಸದ್ಧಾತಿ? ನ ಹೇವಂ ವತ್ತಬ್ಬೇ। ಅಟ್ಠಮಕಸ್ಸ ಪುಗ್ಗಲಸ್ಸ ನತ್ಥಿ ವೀರಿಯಿನ್ದ್ರಿಯಂ…ಪೇ॰… ನತ್ಥಿ ಸತಿನ್ದ್ರಿಯಂ…ಪೇ॰… ನತ್ಥಿ ಸಮಾಧಿನ್ದ್ರಿಯಂ…ಪೇ॰… ನತ್ಥಿ ಪಞ್ಞಿನ್ದ್ರಿಯನ್ತಿ? ಆಮನ್ತಾ। ಅಟ್ಠಮಕಸ್ಸ ಪುಗ್ಗಲಸ್ಸ ನತ್ಥಿ ಪಞ್ಞಾತಿ? ನ ಹೇವಂ ವತ್ತಬ್ಬೇ…ಪೇ॰…।
371. Aṭṭhamakassa puggalassa natthi saddhindriyanti? Āmantā. Aṭṭhamakassa puggalassa natthi saddhāti? Na hevaṃ vattabbe. Aṭṭhamakassa puggalassa natthi vīriyindriyaṃ…pe… natthi satindriyaṃ…pe… natthi samādhindriyaṃ…pe… natthi paññindriyanti? Āmantā. Aṭṭhamakassa puggalassa natthi paññāti? Na hevaṃ vattabbe…pe….
ಅಟ್ಠಮಕಸ್ಸ ಪುಗ್ಗಲಸ್ಸ ಅತ್ಥಿ ಸದ್ಧಾತಿ? ಆಮನ್ತಾ। ಅಟ್ಠಮಕಸ್ಸ ಪುಗ್ಗಲಸ್ಸ ಅತ್ಥಿ ಸದ್ಧಿನ್ದ್ರಿಯನ್ತಿ? ನ ಹೇವಂ ವತ್ತಬ್ಬೇ…ಪೇ॰… ಅಟ್ಠಮಕಸ್ಸ ಪುಗ್ಗಲಸ್ಸ ಅತ್ಥಿ ವೀರಿಯಂ…ಪೇ॰… ಅತ್ಥಿ ಸತಿ… ಅತ್ಥಿ ಸಮಾಧಿ… ಅತ್ಥಿ ಪಞ್ಞಾತಿ? ಆಮನ್ತಾ। ಅಟ್ಠಮಕಸ್ಸ ಪುಗ್ಗಲಸ್ಸ ಅತ್ಥಿ ಪಞ್ಞಿನ್ದ್ರಿಯನ್ತಿ? ನ ಹೇವಂ ವತ್ತಬ್ಬೇ…ಪೇ॰…।
Aṭṭhamakassa puggalassa atthi saddhāti? Āmantā. Aṭṭhamakassa puggalassa atthi saddhindriyanti? Na hevaṃ vattabbe…pe… aṭṭhamakassa puggalassa atthi vīriyaṃ…pe… atthi sati… atthi samādhi… atthi paññāti? Āmantā. Aṭṭhamakassa puggalassa atthi paññindriyanti? Na hevaṃ vattabbe…pe….
ಅಟ್ಠಮಕಸ್ಸ ಪುಗ್ಗಲಸ್ಸ ಅತ್ಥಿ ಮನೋ, ಅತ್ಥಿ ಮನಿನ್ದ್ರಿಯನ್ತಿ? ಆಮನ್ತಾ। ಅಟ್ಠಮಕಸ್ಸ ಪುಗ್ಗಲಸ್ಸ ಅತ್ಥಿ ಸದ್ಧಾ, ಅತ್ಥಿ ಸದ್ಧಿನ್ದ್ರಿಯನ್ತಿ? ನ ಹೇವಂ ವತ್ತಬ್ಬೇ…ಪೇ॰… ಅಟ್ಠಮಕಸ್ಸ ಪುಗ್ಗಲಸ್ಸ ಅತ್ಥಿ ಮನೋ, ಅತ್ಥಿ ಮನಿನ್ದ್ರಿಯನ್ತಿ? ಆಮನ್ತಾ। ಅಟ್ಠಮಕಸ್ಸ ಪುಗ್ಗಲಸ್ಸ ಅತ್ಥಿ ಪಞ್ಞಾ, ಅತ್ಥಿ ಪಞ್ಞಿನ್ದ್ರಿಯನ್ತಿ? ನ ಹೇವಂ ವತ್ತಬ್ಬೇ…ಪೇ॰…।
Aṭṭhamakassa puggalassa atthi mano, atthi manindriyanti? Āmantā. Aṭṭhamakassa puggalassa atthi saddhā, atthi saddhindriyanti? Na hevaṃ vattabbe…pe… aṭṭhamakassa puggalassa atthi mano, atthi manindriyanti? Āmantā. Aṭṭhamakassa puggalassa atthi paññā, atthi paññindriyanti? Na hevaṃ vattabbe…pe….
ಅಟ್ಠಮಕಸ್ಸ ಪುಗ್ಗಲಸ್ಸ ಅತ್ಥಿ ಸೋಮನಸ್ಸಂ, ಅತ್ಥಿ ಸೋಮನಸ್ಸಿನ್ದ್ರಿಯಂ, ಅತ್ಥಿ ಜೀವಿತಂ, ಅತ್ಥಿ ಜೀವಿತಿನ್ದ್ರಿಯನ್ತಿ? ಆಮನ್ತಾ। ಅಟ್ಠಮಕಸ್ಸ ಪುಗ್ಗಲಸ್ಸ ಅತ್ಥಿ ಸದ್ಧಾ, ಅತ್ಥಿ ಸದ್ಧಿನ್ದ್ರಿಯನ್ತಿ? ನ ಹೇವಂ ವತ್ತಬ್ಬೇ…ಪೇ॰… ಅಟ್ಠಮಕಸ್ಸ ಪುಗ್ಗಲಸ್ಸ ಅತ್ಥಿ ಜೀವಿತಂ, ಅತ್ಥಿ ಜೀವಿತಿನ್ದ್ರಿಯನ್ತಿ? ಆಮನ್ತಾ। ಅಟ್ಠಮಕಸ್ಸ ಪುಗ್ಗಲಸ್ಸ…ಪೇ॰… ಅತ್ಥಿ ಪಞ್ಞಾ, ಅತ್ಥಿ ಪಞ್ಞಿನ್ದ್ರಿಯನ್ತಿ? ನ ಹೇವಂ ವತ್ತಬ್ಬೇ…ಪೇ॰…।
Aṭṭhamakassa puggalassa atthi somanassaṃ, atthi somanassindriyaṃ, atthi jīvitaṃ, atthi jīvitindriyanti? Āmantā. Aṭṭhamakassa puggalassa atthi saddhā, atthi saddhindriyanti? Na hevaṃ vattabbe…pe… aṭṭhamakassa puggalassa atthi jīvitaṃ, atthi jīvitindriyanti? Āmantā. Aṭṭhamakassa puggalassa…pe… atthi paññā, atthi paññindriyanti? Na hevaṃ vattabbe…pe….
ಅಟ್ಠಮಕಸ್ಸ ಪುಗ್ಗಲಸ್ಸ ಅತ್ಥಿ ಸದ್ಧಾ, ನತ್ಥಿ ಸದ್ಧಿನ್ದ್ರಿಯನ್ತಿ? ಆಮನ್ತಾ। ಅಟ್ಠಮಕಸ್ಸ ಪುಗ್ಗಲಸ್ಸ ಅತ್ಥಿ ಮನೋ, ನತ್ಥಿ ಮನಿನ್ದ್ರಿಯನ್ತಿ? ನ ಹೇವಂ ವತ್ತಬ್ಬೇ…ಪೇ॰…।
Aṭṭhamakassa puggalassa atthi saddhā, natthi saddhindriyanti? Āmantā. Aṭṭhamakassa puggalassa atthi mano, natthi manindriyanti? Na hevaṃ vattabbe…pe….
ಅಟ್ಠಮಕಸ್ಸ ಪುಗ್ಗಲಸ್ಸ ಅತ್ಥಿ ಸದ್ಧಾ, ನತ್ಥಿ ಸದ್ಧಿನ್ದ್ರಿಯನ್ತಿ? ಆಮನ್ತಾ। ಅಟ್ಠಮಕಸ್ಸ ಪುಗ್ಗಲಸ್ಸ ಅತ್ಥಿ ಸೋಮನಸ್ಸಂ, ನತ್ಥಿ ಸೋಮನಸ್ಸಿನ್ದ್ರಿಯನ್ತಿ…ಪೇ॰… ಅತ್ಥಿ ಜೀವಿತಂ, ನತ್ಥಿ ಜೀವಿತಿನ್ದ್ರಿಯನ್ತಿ? ನ ಹೇವಂ ವತ್ತಬ್ಬೇ…ಪೇ॰… ಅಟ್ಠಮಕಸ್ಸ ಪುಗ್ಗಲಸ್ಸ ಅತ್ಥಿ ಪಞ್ಞಾ, ನತ್ಥಿ ಪಞ್ಞಿನ್ದ್ರಿಯನ್ತಿ? ಆಮನ್ತಾ। ಅಟ್ಠಮಕಸ್ಸ ಪುಗ್ಗಲಸ್ಸ ಅತ್ಥಿ ಮನೋ, ನತ್ಥಿ ಮನಿನ್ದ್ರಿಯನ್ತಿ? ಅತ್ಥಿ ಸೋಮನಸ್ಸಂ, ನತ್ಥಿ ಸೋಮನಸ್ಸಿನ್ದ್ರಿಯನ್ತಿ? ಅತ್ಥಿ ಜೀವಿತಂ, ನತ್ಥಿ ಜೀವಿತಿನ್ದ್ರಿಯನ್ತಿ? ನ ಹೇವಂ ವತ್ತಬ್ಬೇ…ಪೇ॰…।
Aṭṭhamakassa puggalassa atthi saddhā, natthi saddhindriyanti? Āmantā. Aṭṭhamakassa puggalassa atthi somanassaṃ, natthi somanassindriyanti…pe… atthi jīvitaṃ, natthi jīvitindriyanti? Na hevaṃ vattabbe…pe… aṭṭhamakassa puggalassa atthi paññā, natthi paññindriyanti? Āmantā. Aṭṭhamakassa puggalassa atthi mano, natthi manindriyanti? Atthi somanassaṃ, natthi somanassindriyanti? Atthi jīvitaṃ, natthi jīvitindriyanti? Na hevaṃ vattabbe…pe….
ಅಟ್ಠಮಕಸ್ಸ ಪುಗ್ಗಲಸ್ಸ ನತ್ಥಿ ಸದ್ಧಿನ್ದ್ರಿಯನ್ತಿ? ಆಮನ್ತಾ। ಅಟ್ಠಮಕೋ ಪುಗ್ಗಲೋ ಅಸ್ಸದ್ಧೋತಿ? ನ ಹೇವಂ ವತ್ತಬ್ಬೇ…ಪೇ॰… ಅಟ್ಠಮಕಸ್ಸ ಪುಗ್ಗಲಸ್ಸ ನತ್ಥಿ ವೀರಿಯಿನ್ದ್ರಿಯನ್ತಿ? ಆಮನ್ತಾ। ಅಟ್ಠಮಕೋ ಪುಗ್ಗಲೋ ಕುಸೀತೋ ಹೀನವೀರಿಯೋತಿ? ನ ಹೇವಂ ವತ್ತಬ್ಬೇ…ಪೇ॰… ಅಟ್ಠಮಕಸ್ಸ ಪುಗ್ಗಲಸ್ಸ ನತ್ಥಿ ಸತಿನ್ದ್ರಿಯನ್ತಿ? ಆಮನ್ತಾ। ಅಟ್ಠಮಕೋ ಪುಗ್ಗಲೋ ಮುಟ್ಠಸ್ಸತಿ ಅಸಮ್ಪಜಾನೋತಿ? ನ ಹೇವಂ ವತ್ತಬ್ಬೇ…ಪೇ॰… ಅಟ್ಠಮಕಸ್ಸ ಪುಗ್ಗಲಸ್ಸ ನತ್ಥಿ ಸಮಾಧಿನ್ದ್ರಿಯನ್ತಿ? ಆಮನ್ತಾ। ಅಟ್ಠಮಕೋ ಪುಗ್ಗಲೋ ಅಸಮಾಹಿತೋ ವಿಬ್ಭನ್ತಚಿತ್ತೋತಿ? ನ ಹೇವಂ ವತ್ತಬ್ಬೇ…ಪೇ॰… ಅಟ್ಠಮಕಸ್ಸ ಪುಗ್ಗಲಸ್ಸ ನತ್ಥಿ ಪಞ್ಞಿನ್ದ್ರಿಯನ್ತಿ? ಆಮನ್ತಾ। ಅಟ್ಠಮಕೋ ಪುಗ್ಗಲೋ ದುಪ್ಪಞ್ಞೋ ಏಲಮೂಗೋತಿ? ನ ಹೇವಂ ವತ್ತಬ್ಬೇ…ಪೇ॰…।
Aṭṭhamakassa puggalassa natthi saddhindriyanti? Āmantā. Aṭṭhamako puggalo assaddhoti? Na hevaṃ vattabbe…pe… aṭṭhamakassa puggalassa natthi vīriyindriyanti? Āmantā. Aṭṭhamako puggalo kusīto hīnavīriyoti? Na hevaṃ vattabbe…pe… aṭṭhamakassa puggalassa natthi satindriyanti? Āmantā. Aṭṭhamako puggalo muṭṭhassati asampajānoti? Na hevaṃ vattabbe…pe… aṭṭhamakassa puggalassa natthi samādhindriyanti? Āmantā. Aṭṭhamako puggalo asamāhito vibbhantacittoti? Na hevaṃ vattabbe…pe… aṭṭhamakassa puggalassa natthi paññindriyanti? Āmantā. Aṭṭhamako puggalo duppañño elamūgoti? Na hevaṃ vattabbe…pe….
ಅಟ್ಠಮಕಸ್ಸ ಪುಗ್ಗಲಸ್ಸ ಅತ್ಥಿ ಸದ್ಧಾ, ಸಾ ಚ ಸದ್ಧಾ ನಿಯ್ಯಾನಿಕಾತಿ? ಆಮನ್ತಾ। ಹಞ್ಚಿ ಅಟ್ಠಮಕಸ್ಸ ಪುಗ್ಗಲಸ್ಸ ಅತ್ಥಿ ಸದ್ಧಾ, ಸಾ ಚ ಸದ್ಧಾ ನಿಯ್ಯಾನಿಕಾ, ನೋ ಚ ವತ ರೇ ವತ್ತಬ್ಬೇ – ‘‘ಅಟ್ಠಮಕಸ್ಸ ಪುಗ್ಗಲಸ್ಸ ನತ್ಥಿ ಸದ್ಧಿನ್ದ್ರಿಯ’’ನ್ತಿ। ಅಟ್ಠಮಕಸ್ಸ ಪುಗ್ಗಲಸ್ಸ ಅತ್ಥಿ ವೀರಿಯಂ, ತಞ್ಚ ವೀರಿಯಂ ನಿಯ್ಯಾನಿಕಂ; ಅತ್ಥಿ ಸತಿ, ಸಾ ಚ ಸತಿ ನಿಯ್ಯಾನಿಕಾ; ಅತ್ಥಿ ಸಮಾಧಿ, ಸೋ ಚ ಸಮಾಧಿ ನಿಯ್ಯಾನಿಕೋ; ಅತ್ಥಿ ಪಞ್ಞಾ, ಸಾ ಚ ಪಞ್ಞಾ ನಿಯ್ಯಾನಿಕಾತಿ? ಆಮನ್ತಾ । ಹಞ್ಚಿ ಅಟ್ಠಮಕಸ್ಸ ಪುಗ್ಗಲಸ್ಸ ಅತ್ಥಿ ಪಞ್ಞಾ, ಸಾ ಚ ಪಞ್ಞಾ ನಿಯ್ಯಾನಿಕಾ, ನೋ ಚ ವತ ರೇ ವತ್ತಬ್ಬೇ – ‘‘ಅಟ್ಠಮಕಸ್ಸ ಪುಗ್ಗಲಸ್ಸ ನತ್ಥಿ ಪಞ್ಞಿನ್ದ್ರಿಯ’’ನ್ತಿ।
Aṭṭhamakassa puggalassa atthi saddhā, sā ca saddhā niyyānikāti? Āmantā. Hañci aṭṭhamakassa puggalassa atthi saddhā, sā ca saddhā niyyānikā, no ca vata re vattabbe – ‘‘aṭṭhamakassa puggalassa natthi saddhindriya’’nti. Aṭṭhamakassa puggalassa atthi vīriyaṃ, tañca vīriyaṃ niyyānikaṃ; atthi sati, sā ca sati niyyānikā; atthi samādhi, so ca samādhi niyyāniko; atthi paññā, sā ca paññā niyyānikāti? Āmantā . Hañci aṭṭhamakassa puggalassa atthi paññā, sā ca paññā niyyānikā, no ca vata re vattabbe – ‘‘aṭṭhamakassa puggalassa natthi paññindriya’’nti.
೩೭೨. ಸಕದಾಗಾಮಿಫಲಸಚ್ಛಿಕಿರಿಯಾಯ ಪಟಿಪನ್ನಸ್ಸ ಪುಗ್ಗಲಸ್ಸ ಅತ್ಥಿ ಸದ್ಧಾ, ಅತ್ಥಿ ಸದ್ಧಿನ್ದ್ರಿಯನ್ತಿ? ಆಮನ್ತಾ। ಅಟ್ಠಮಕಸ್ಸ ಪುಗ್ಗಲಸ್ಸ ಅತ್ಥಿ ಸದ್ಧಾ, ಅತ್ಥಿ ಸದ್ಧಿನ್ದ್ರಿಯನ್ತಿ? ನ ಹೇವಂ ವತ್ತಬ್ಬೇ…ಪೇ॰… ಸಕದಾಗಾಮಿಫಲಸಚ್ಛಿಕಿರಿಯಾಯ ಪಟಿಪನ್ನಸ್ಸ ಪುಗ್ಗಲಸ್ಸ ಅತ್ಥಿ ಪಞ್ಞಾ, ಅತ್ಥಿ ಪಞ್ಞಿನ್ದ್ರಿಯನ್ತಿ? ಆಮನ್ತಾ। ಅಟ್ಠಮಕಸ್ಸ ಪುಗ್ಗಲಸ್ಸ ಅತ್ಥಿ ಪಞ್ಞಾ, ಅತ್ಥಿ ಪಞ್ಞಿನ್ದ್ರಿಯನ್ತಿ? ನ ಹೇವಂ ವತ್ತಬ್ಬೇ…ಪೇ॰…।
372. Sakadāgāmiphalasacchikiriyāya paṭipannassa puggalassa atthi saddhā, atthi saddhindriyanti? Āmantā. Aṭṭhamakassa puggalassa atthi saddhā, atthi saddhindriyanti? Na hevaṃ vattabbe…pe… sakadāgāmiphalasacchikiriyāya paṭipannassa puggalassa atthi paññā, atthi paññindriyanti? Āmantā. Aṭṭhamakassa puggalassa atthi paññā, atthi paññindriyanti? Na hevaṃ vattabbe…pe….
ಅನಾಗಾಮಿಫಲಸಚ್ಛಿಕಿರಿಯಾಯ ಪಟಿಪನ್ನಸ್ಸ ಪುಗ್ಗಲಸ್ಸ… ಅರಹತ್ತಸಚ್ಛಿಕಿರಿಯಾಯ ಪಟಿಪನ್ನಸ್ಸ ಪುಗ್ಗಲಸ್ಸ ಅತ್ಥಿ ಸದ್ಧಾ, ಅತ್ಥಿ ಸದ್ಧಿನ್ದ್ರಿಯಂ…ಪೇ॰… ಅತ್ಥಿ ಪಞ್ಞಾ, ಅತ್ಥಿ ಪಞ್ಞಿನ್ದ್ರಿಯನ್ತಿ? ಆಮನ್ತಾ। ಅಟ್ಠಮಕಸ್ಸ ಪುಗ್ಗಲಸ್ಸ ಅತ್ಥಿ ಪಞ್ಞಾ, ಅತ್ಥಿ ಪಞ್ಞಿನ್ದ್ರಿಯನ್ತಿ? ನ ಹೇವಂ ವತ್ತಬ್ಬೇ…ಪೇ॰…।
Anāgāmiphalasacchikiriyāya paṭipannassa puggalassa… arahattasacchikiriyāya paṭipannassa puggalassa atthi saddhā, atthi saddhindriyaṃ…pe… atthi paññā, atthi paññindriyanti? Āmantā. Aṭṭhamakassa puggalassa atthi paññā, atthi paññindriyanti? Na hevaṃ vattabbe…pe….
ಅಟ್ಠಮಕಸ್ಸ ಪುಗ್ಗಲಸ್ಸ ಅತ್ಥಿ ಸದ್ಧಾ, ನತ್ಥಿ ಸದ್ಧಿನ್ದ್ರಿಯನ್ತಿ? ಆಮನ್ತಾ। ಸಕದಾಗಾಮಿಫಲಸಚ್ಛಿಕಿರಿಯಾಯ ಪಟಿಪನ್ನಸ್ಸ ಪುಗ್ಗಲಸ್ಸ ಅತ್ಥಿ ಸದ್ಧಾ, ನತ್ಥಿ ಸದ್ಧಿನ್ದ್ರಿಯನ್ತಿ? ನ ಹೇವಂ ವತ್ತಬ್ಬೇ…ಪೇ॰… ಅಟ್ಠಮಕಸ್ಸ ಪುಗ್ಗಲಸ್ಸ ಅತ್ಥಿ ಪಞ್ಞಾ, ನತ್ಥಿ ಪಞ್ಞಿನ್ದ್ರಿಯನ್ತಿ? ಆಮನ್ತಾ। ಸಕದಾಗಾಮಿಫಲಸಚ್ಛಿಕಿರಿಯಾಯ ಪಟಿಪನ್ನಸ್ಸ ಪುಗ್ಗಲಸ್ಸ ಅತ್ಥಿ ಪಞ್ಞಾ, ನತ್ಥಿ ಪಞ್ಞಿನ್ದ್ರಿಯನ್ತಿ? ನ ಹೇವಂ ವತ್ತಬ್ಬೇ…ಪೇ॰…।
Aṭṭhamakassa puggalassa atthi saddhā, natthi saddhindriyanti? Āmantā. Sakadāgāmiphalasacchikiriyāya paṭipannassa puggalassa atthi saddhā, natthi saddhindriyanti? Na hevaṃ vattabbe…pe… aṭṭhamakassa puggalassa atthi paññā, natthi paññindriyanti? Āmantā. Sakadāgāmiphalasacchikiriyāya paṭipannassa puggalassa atthi paññā, natthi paññindriyanti? Na hevaṃ vattabbe…pe….
ಅಟ್ಠಮಕಸ್ಸ ಪುಗ್ಗಲಸ್ಸ ಅತ್ಥಿ ಸದ್ಧಾ, ನತ್ಥಿ ಸದ್ಧಿನ್ದ್ರಿಯನ್ತಿ…ಪೇ॰… ಅತ್ಥಿ ಪಞ್ಞಾ, ನತ್ಥಿ ಪಞ್ಞಿನ್ದ್ರಿಯನ್ತಿ? ಆಮನ್ತಾ । ಅನಾಗಾಮಿಫಲಸಚ್ಛಿಕಿರಿಯಾಯ ಪಟಿಪನ್ನಸ್ಸ ಪುಗ್ಗಲಸ್ಸ… ಅರಹತ್ತಸಚ್ಛಿಕಿರಿಯಾಯ ಪಟಿಪನ್ನಸ್ಸ ಪುಗ್ಗಲಸ್ಸ ಅತ್ಥಿ ಪಞ್ಞಾ, ನತ್ಥಿ ಪಞ್ಞಿನ್ದ್ರಿಯನ್ತಿ? ನ ಹೇವಂ ವತ್ತಬ್ಬೇ…ಪೇ॰…।
Aṭṭhamakassa puggalassa atthi saddhā, natthi saddhindriyanti…pe… atthi paññā, natthi paññindriyanti? Āmantā . Anāgāmiphalasacchikiriyāya paṭipannassa puggalassa… arahattasacchikiriyāya paṭipannassa puggalassa atthi paññā, natthi paññindriyanti? Na hevaṃ vattabbe…pe….
ಅಟ್ಠಮಕಸ್ಸ ಪುಗ್ಗಲಸ್ಸ ನತ್ಥಿ ಪಞ್ಚಿನ್ದ್ರಿಯಾನೀತಿ? ಆಮನ್ತಾ। ನನು ವುತ್ತಂ ಭಗವತಾ – ‘‘ಪಞ್ಚಿಮಾನಿ, ಭಿಕ್ಖವೇ, ಇನ್ದ್ರಿಯಾನಿ! ಕತಮಾನಿ ಪಞ್ಚ? ಸದ್ಧಿನ್ದ್ರಿಯಂ, ವೀರಿಯಿನ್ದ್ರಿಯಂ, ಸತಿನ್ದ್ರಿಯಂ, ಸಮಾಧಿನ್ದ್ರಿಯಂ, ಪಞ್ಞಿನ್ದ್ರಿಯಂ – ಇಮಾನಿ ಖೋ, ಭಿಕ್ಖವೇ, ಪಞ್ಚಿನ್ದ್ರಿಯಾನಿ। ಇಮೇಸಂ ಖೋ, ಭಿಕ್ಖವೇ, ಪಞ್ಚನ್ನಂ ಇನ್ದ್ರಿಯಾನಂ ಸಮತ್ತಾ ಪರಿಪೂರತ್ತಾ ಅರಹಾ ಹೋತಿ। ತತೋ ಮುದುತರೇಹಿ ಅರಹತ್ತಸಚ್ಛಿಕಿರಿಯಾಯ ಪಟಿಪನ್ನೋ ಹೋತಿ, ತತೋ ಮುದುತರೇಹಿ ಅನಾಗಾಮೀ ಹೋತಿ, ತತೋ ಮುದುತರೇಹಿ ಅನಾಗಾಮಿಫಲಸಚ್ಛಿಕಿರಿಯಾಯ ಪಟಿಪನ್ನೋ ಹೋತಿ, ತತೋ ಮುದುತರೇಹಿ ಸಕದಾಗಾಮೀ ಹೋತಿ, ತತೋ ಮುದುತರೇಹಿ ಸಕದಾಗಾಮಿಫಲಸಚ್ಛಿಕಿರಿಯಾಯ ಪಟಿಪನ್ನೋ ಹೋತಿ, ತತೋ ಮುದುತರೇಹಿ ಸೋತಾಪನ್ನೋ ಹೋತಿ, ತತೋ ಮುದುತರೇಹಿ ಸೋತಾಪತ್ತಿಫಲಸಚ್ಛಿಕಿರಿಯಾಯ ಪಟಿಪನ್ನೋ ಹೋತಿ। ಯಸ್ಸ ಖೋ, ಭಿಕ್ಖವೇ, ಇಮಾನಿ ಪಞ್ಚಿನ್ದ್ರಿಯಾನಿ ಸಬ್ಬೇನ ಸಬ್ಬಂ ಸಬ್ಬಥಾ ಸಬ್ಬಂ ನತ್ಥಿ, ತಮಹಂ ‘ಬಾಹಿರೋ ಪುಥುಜ್ಜನಪಕ್ಖೇ ಠಿತೋ’ತಿ ವದಾಮೀ’’ತಿ 1। ಅತ್ಥೇವ ಸುತ್ತನ್ತೋತಿ? ಆಮನ್ತಾ। ಅಟ್ಠಮಕೋ ಪುಗ್ಗಲೋ ಬಾಹಿರೋ ಪುಥುಜ್ಜನಪಕ್ಖೇ ಠಿತೋತಿ? ನ ಹೇವಂ ವತ್ತಬ್ಬೇ…ಪೇ॰… ತೇನ ಹಿ ಅಟ್ಠಮಕಸ್ಸ ಪುಗ್ಗಲಸ್ಸ ಅತ್ಥಿ ಪಞ್ಚಿನ್ದ್ರಿಯಾನೀತಿ।
Aṭṭhamakassa puggalassa natthi pañcindriyānīti? Āmantā. Nanu vuttaṃ bhagavatā – ‘‘pañcimāni, bhikkhave, indriyāni! Katamāni pañca? Saddhindriyaṃ, vīriyindriyaṃ, satindriyaṃ, samādhindriyaṃ, paññindriyaṃ – imāni kho, bhikkhave, pañcindriyāni. Imesaṃ kho, bhikkhave, pañcannaṃ indriyānaṃ samattā paripūrattā arahā hoti. Tato mudutarehi arahattasacchikiriyāya paṭipanno hoti, tato mudutarehi anāgāmī hoti, tato mudutarehi anāgāmiphalasacchikiriyāya paṭipanno hoti, tato mudutarehi sakadāgāmī hoti, tato mudutarehi sakadāgāmiphalasacchikiriyāya paṭipanno hoti, tato mudutarehi sotāpanno hoti, tato mudutarehi sotāpattiphalasacchikiriyāya paṭipanno hoti. Yassa kho, bhikkhave, imāni pañcindriyāni sabbena sabbaṃ sabbathā sabbaṃ natthi, tamahaṃ ‘bāhiro puthujjanapakkhe ṭhito’ti vadāmī’’ti 2. Attheva suttantoti? Āmantā. Aṭṭhamako puggalo bāhiro puthujjanapakkhe ṭhitoti? Na hevaṃ vattabbe…pe… tena hi aṭṭhamakassa puggalassa atthi pañcindriyānīti.
ಅಟ್ಠಮಕಸ್ಸ ಇನ್ದ್ರಿಯಕಥಾ ನಿಟ್ಠಿತಾ।
Aṭṭhamakassa indriyakathā niṭṭhitā.
೩. ತತಿಯವಗ್ಗೋ
3. Tatiyavaggo
Footnotes:
Related texts:
ಅಟ್ಠಕಥಾ • Aṭṭhakathā / ಅಭಿಧಮ್ಮಪಿಟಕ (ಅಟ್ಠಕಥಾ) • Abhidhammapiṭaka (aṭṭhakathā) / ಪಞ್ಚಪಕರಣ-ಅಟ್ಠಕಥಾ • Pañcapakaraṇa-aṭṭhakathā / ೬. ಅಟ್ಠಮಕಸ್ಸ ಇನ್ದ್ರಿಯಕಥಾವಣ್ಣನಾ • 6. Aṭṭhamakassa indriyakathāvaṇṇanā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಪಞ್ಚಪಕರಣ-ಮೂಲಟೀಕಾ • Pañcapakaraṇa-mūlaṭīkā / ೬. ಅಟ್ಠಮಕಸ್ಸ ಇನ್ದ್ರಿಯಕಥಾವಣ್ಣನಾ • 6. Aṭṭhamakassa indriyakathāvaṇṇanā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಪಞ್ಚಪಕರಣ-ಅನುಟೀಕಾ • Pañcapakaraṇa-anuṭīkā / ೬. ಅಟ್ಠಮಕಸ್ಸ ಇನ್ದ್ರಿಯಕಥಾವಣ್ಣನಾ • 6. Aṭṭhamakassa indriyakathāvaṇṇanā
